ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಎ.14: ಸುರತ್ಕಲ್ ಡ್ ಪಟ್ಲ ಫೌಂಡೇಶನ್ ಸುರತ್ಕಲ್ ಘಟಕದ ವಾರ್ಷಿಕ ಉಚ್ಚಯ

ಸುರತ್ಕಲ್: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ.) ಸುರತ್ಕಲ್ ಘಟಕದ 4 ನೇ ವರ್ಷದ ಉಚ್ಚಯ ಎ.14 ಐತಾರ ಬಯ್ಯಗ್ ಸುರತ್ಕಲ್ ಬಂಟರ ಭವನದಲ್ಪ ನಡಪರೆ ಉಂಡು.

ಈ ಲೇಸ್ ದ ಉದಿಪನನ್ ಯಕ್ಷಧ್ರುವ ಯಕ್ಷ ಶಿಕ್ಷಣದ ಪ್ರಧಾನ ಸಂಚಾಲಕೆರ್ ಪಣಂಬೂರು ವಾಸುದೇವ ಐತಾಳ ತುಡರ್ ಅರ್ಲಾದ್ ಉದಿಪನ ಮಲ್ಪುವೆರ್. ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಗೌರವ ಉಪಸ್ಥಿತಿಡ್ ನಡಪುನ ಲೇಸ್ ದ ಗುರ್ಕಾರ್ಮೆನ್ ಸುರತ್ಕಲ್ ಘಟಕದ ಅಧ್ಯಕ್ಷೆರ್ ಸುಧಾಕರ ಎಸ್ ಪೂಂಜ ಒಯಿಸೊನ್ವೆರ್.

ಮಲ್ಲ ಬಿನ್ನೆರಾದ್ ಫೌಂಡೇಶನ್ ದ ಟ್ರಸ್ಟಿ, ಉದ್ಯಮಿ ಚಂದ್ರಶೇಖರ ಮಾಡ ಕುದ್ರಾಡಿಗುತ್ತು, ಕೇಂದ್ರೀಯ ಮಹಿಳಾ ಘಟಕದ ಗೌರವಾಧ್ಯಕ್ಷೆರ್ ಆರತಿ ಆಳ್ವ, ಗೋವಿಂದ ದಾಸ ಕಾಲೇಜ್ ದ ನಿವೃತ್ತ ಉಪ ಪ್ರಾಂಶುಪಾಲೆರ್ ಪ್ರೊ.‌ರಮೇಶ್ ಭಟ್ ಯಸ್ ಜಿ, ಲಲಿತಾ ಕಲಾ ಆರ್ಟ್ಸ್ ದ ಮಾಲಕೆರ್ ಧನಪಾಲ್ ಶೆಟ್ಟಿಗಾರ್ ತಡಂಬೈಲ್ ಪಾಲ್ ಪಡೆಯೆರೆ ಉಲ್ಲೆರ್.

ಲೇಸ್ ಡ್ ಹಿರಿಯ ಯಕ್ಷಗಾನ ಕಲಾವಿದೆರ್ ನೆಲ್ಲಿಕಟ್ಟೆ ನಾರಾಯಣ ಹಾಸ್ಯಗಾರ್ ಮೆರೆಗ್ ಸನ್ಮಾನ ನಡಪರೆ ಉಂಡು. ಅಂಚೆನೆ ಯಕ್ಷಗಾನ ತಾಳಮದ್ದಲೆಡ್ ಸಾಧನೆ ಮಲ್ತಿನ ಮಹಾಬಲ ಶೆಟ್ಟಿ ಜೋಕಟ್ಟೆ, ಜಯಂತಿ ಹೊಳ್ಳ ಕೃಷ್ಣಾಪುರ, ವಾಸುದೇವ ಆಚಾರ್ಯ ಕುಳಾಯಿ, ಕರುಣಾಕರ ಪೂಜಾರಿ ಮಧ್ಯ, ಲಿಂಗಪ್ಪ ಶೆಟ್ಟಿ ಕೃಷ್ಣಾಪುರ ಮೊಕ್ಲೆಗ್ ಮಾನಾದಿಗೆ ಮಲ್ಪೆರೆ ಉಂಡು.

ಯಕ್ಷಸಿರಿ ತರಗತಿದ ವಿದ್ಯಾರ್ಥಿ ದಿ. ಯಶ್ವಿತ್ ಅಗರಮೇಲು ಕುಟುಂಬಗ್ ಮರಣೋತ್ತರ ಪನವುದ ಸಕಾಯ ಕೊರಿಯೆರೆ ಉಂಡು. ಬೊಕ್ಕ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ನಾಗವೃಜ ಕ್ಷೇತ್ರ ಪಾವಂಜೆ ಮೊಕ್ಲೆರ್ದ್ ಅಯೋಧ್ಯಾ ದೀಪ ಯಕ್ಷಗಾನ ಪ್ರದರ್ಶನ ಅವೆರೆ ಉಂಡು ಪಂದ್ ಸುರತ್ಕಲ್ ಘಟಕದ ಪ್ರಧಾನ ಕಾರ್ಯದರ್ಶಿ ಬಾಳ ಗಂಗಾಧರ ಪೂಜಾರಿ ಚೇಳಾರ್ ಪ್ರಕಟಣೆಡ್ ತೆರಿಪಾದೆರ್.

ಪಿಯುಸಿ ರಿಸಲ್ಟ್: ದಕ್ಷಿಣ ಕನ್ನಡ ಫಸ್ಟ್, ಒಡಿಪು ಸೆಕೆಂಡ್

ಸೆಕೆಂಡ್ ಪಿಯುಸಿ ರಿಸಲ್ಟ್ ಪ್ರಕಟ

ದಕ್ಷಿಣ ಕನ್ನಡಗ್ ಸುರುತ್ತ ತಾನ 97.37%

ಒಡಿಪುಗ್ ರಡ್ಡನೇ ತಾನ 96.80%

ಒಟ್ಟು 5,52,690 ವಿದ್ಯಾರ್ಥಿಲು ಉತ್ತೀರ್ಣ

ಕಲಾ ವಿಭಾಗಡ್ 128448 ವಿದ್ಯಾರ್ಥಿಲು ಪಾಸ್

ವಿಜ್ಞಾನ ವಿಭಾಗಡ್ 249927 ವಿದ್ಯಾರ್ಥಿಲು ಪಾಸ್

ವಾಣಿಜ್ಯ ವಿಭಾಗಡ್ 174315ವಿದ್ಯಾರ್ಥಿಲು ಪಾಸ್

ಭಕ್ತಿಡ್ ಭಜನೆ ಮಲ್ತ್ಂಡ ದೇವೆರೇ ಒಲಿವೆರ್

ವಿಜಯನಗರ (ಬೆಂಗಳೂರು) : ಪ್ರತಿನಿತ್ಯ ಪ್ರತಿ ಇಲ್ಲ್ ಇಲ್ಲಡ್ ಬೊಕ್ಕ ಮಾತಾ ಹಿಂದೂ ಧಾರ್ಮಿಕ ಕ್ಷೇತ್ರಲೆಡ್ ಭಜನೆದ ಅಜನೆ ಇತ್ತ್ಂಡ ಅಲ್ಪ ದೇವೆರೆನ ಸಾನ್ನಿಧ್ಯ ಉಪ್ಪುಂಡು. ವಾರಡೊಂಜಿ ದಿನ ಆಂಡಲ ಭಜನೆ ಮಲ್ತ್ಂಡ ಕಣ್ಣ್ ಗ್ ತೋಜಂದಿ ದೇವೆರೇ ಬೇತೊಂಜಿ ರೂಪೊಡು ಬತ್ತ್ ದ್ ಒಲಿವರೆ ಸಾಧ್ಯ ಆವು ಪಂಡ್ದ್ ನಮ್ಮ ನಂಬುಗೆ. ಅಂಚೆನೇ ಹಿಂದೂ ಸಮಾಜ ನನಲಾ ಬಲಿಷ್ಠ ಆವೊಡಾಂಡ ಭಜನೆದಂಚಿನ ಸೇವೆ ಮಲ್ತ್ ದ್ ಶ್ರದ್ಧಾ ಭಕ್ತಿದಂಚಿ ಗಮನ ಕೊರ್ಪಿನ ಅಗತ್ಯ ಉಂಡು.

ತುಳುವ ಮಣ್ಣ್ ದ ಜವನೆರ್ ಬದ್ ಕ್ ದ ತಾದಿಗೋಸ್ಕರ ರಾಜಬೂಡು ಬೆಂಗಳೂರುಗು ಬತ್ತ್ ದ್ , ಪೊರ್ಲುದ ಬದುಕುದೊಟ್ಟುಗು ನನ ದುಂಬುದ ಜನಾಂಗದ ಜೋಕುಲೆಗ್ ಭಜನೆ ಪಂಡ ದಾದಂದ್ ಪಂಡ್ದ್ ಶ್ರದ್ದಾ-ಭಕ್ತಿಡ್ ಭಜನೆ ಮಲ್ಪುನ ಮುಖಾಂತರ ಮನಸ್ಸ್ ದ ಬೇನೆ ಬೇಜಾರ್ ದೂರ ಮಲ್ಪುನ ಮೂಲಕ ಭಜನೆದ ಮಹತ್ವ ತೆರಿಪಾವೆರೆ ಮಲ್ಲ ಪ್ರಯತ್ನ ಮಲ್ತೊಂದುಲ್ಲೆರ್ ನಮ್ಮ ಮಕರಶ್ರೀ ಭಜನಾ ಮಂಡಳಿದ ಸರ್ವ ಸದಸ್ಯೆರ್.

ಏಪ್ರಿಲ್ 9 ಅಂಗಾರೆ 2024 ವಿಜಯನಗರದ ಆದಿ ಚುಂಚನಗಿರಿ ಶ್ರೀ ಬಾಲ ಗಂಗಾಧರೇಶ್ವರ ದೇವಸ್ಥಾನದ ಸಾನಿದ್ಯೊಡ್ ಯುಗಾದಿ ಪರ್ಬದ ಸಂಬ್ರಮೊಡು ವಿಜಯನಗರ ಆದಿ ಚುಂಚನಗಿರಿ ಮಠತ್ತ ಶ್ರೀ ಸೌಮ್ಯಾನಂದ ಸ್ವಾಮೀಜಿ ಮೆರೆನ ಉಪಸ್ಥಿತಿಡ್ ಮಕರಶ್ರೀ ಭಜನಾ ಮಂಡಳಿದ ಸರ್ವ ಸದ್ಯಸೆರ್ ಬೊಕ ಬೇತೆ ಬೇತೆ ಭಜನಾ ಮಂಡಳಿದ ಸದಸ್ಯೆರ್ ಸೇರ್ದ್ ದೇವೆರೆಗ್ ಭಜನೆ ಸೇವೆ ನಡಪಾದ್ ಕೊರಿಯೆರ್.

ಅಂಚೆನೇ ಬೆಂಗಳೂರು ಮಹಾನಗರೊಡ್ ಭಜನೆ ಮಲ್ಪರೆ ಆಸಕ್ತಿ ಇತ್ತಿನಕಲು ಮಕರ ಶ್ರೀ ಭಜನಾ ಮಂಡಳಿದ ಸಂಚಾಲಕೆರಾಯಿನ ಸುಕೇಶ್ ಕುಲಾಲ್(+91 7259564910) ಮೆರೆನ ಪೋನ್ ನಂಬರ್ ಗ್ ಪಾತೆರೊಲಿಂದ್ ತೆರಿಪಾದೆರ್.
(ವರದಿ : ಯಾದವ ಶೆಟ್ಟಿಗಾರ್ ಕಲ್ಲಾಪು, ಬೆಂಗಳೂರು)

ಎ.14: ಆಫ್ರಿಕಾ ಬಂಟ್ಸ್ ಸಂಘದ ಮುತಾಲಿಕೆಡ್ ತುಳುವೆರೆ ಪೊಸ ವರ್ಸ ಬಿಸು ಪರ್ಬದ ವನಸ್

ನೈರೋಬಿ-ಕೀನ್ಯ: ಪೂರ್ವ ಆಫ್ರಿಕಾ ಬಂಟ್ಸ್ ಸಂಘದ ತುಳುವೆರೆ ಪೊಸ ವರ್ಸ ಬಿಸು ಪರ್ಬದ ವನಸ್ ಎ.14 ಕ್ಕ್ ನೈರೋಬಿದ ಚೌಪಾಟಿ ವೆಸ್ಟ್ ಪಾರ್ಕ್ ಟವರ್ಸ್, ವೆಸ್ಟ್ಲ್ಯಾಂಡ್ಸ್ ಮೂಲು ನಡಪರೆ ಉಂಡು.

ಈ ಲೇಸ್ ಡ್ ತುಳುನಾಡ ಪೊಸ ವರ್ಷ ಬೊಕ್ಕ ಸುಗ್ಗಿ ಪರ್ಬದ ಇಸೇಸ ತೆನಸ್ ಲು ಇಪ್ಪುಂಡು.

ಎ.14: ಗೋಲ್ಡ್‌ಫಿಂಚ್ ಮೈದಾನಡ್ ಪ್ರಧಾನಿ ಮೋದಿ ಭಾಷಣ

ದೊಂಬುದ ಬೆಚ್ಚದೊಟ್ಟಿಗೆ ಜನಕ್ಲೆಗ್ ಲೋಕಸಭೆ ವೋಟುದ ಬೆಚ್ಚಲ ದಿನರ್ದ್ ದಿನ ಎಚ್ಚಾವೊಂದು ಉಂಡು. ಏಪ್ರಿಲ್ 14 ಕ್ಕ್ ಪ್ರಧಾನಿ ನರೇಂದ್ರ ಮೋದಿ ಮೇರ್ ಕುಡ್ಲಗ್ ಭೇಟಿ ಕೊರಿಯೆರೆ ಉಲ್ಲೆರ್.

ಆನಿ ಮಧ್ಯಾಹ್ನ 3 ಗಂಟೆಗ್ ಬಂಗ್ರಕೂಳೂರುದ ಗೋಲ್ಡ್‌ಫಿಂಚ್ ಮೈದಾನಡ್ ಬೃಹತ್ ಸಾರ್ವಜನಿಕ ಸಭೆನ್ ಉದ್ದೇಶಿಸಾದ್ ಪ್ರಧಾನಿ ಮೋದಿ ಪಾತೆರಿಯೆರೆ ಉಲ್ಲೆರ್ ಪಂದ್ ಬಿಜೆಪಿದ ರಾಜ್ಯ ಪ್ರಧಾನ ಕಾರ್ಯದರ್ಶಿ, ರಾಜ್ಯ ಚುನಾವಣಾ ಸಮಿತಿದ ಪ್ರಧಾನ ಸಂಚಾಲಕೆರ್, ಮಾಜಿ ಸಚಿವೆರ್ ವಿ. ಸುನಿಲ್ ಕುಮಾರ್ ಮೇರ್ ಸುದ್ದಿಗೋಷ್ಠಿಡ್ ತೆರಿಪಾರಯೆರ್. ಸುದ್ದಿಗೋಷ್ಠಿಡ್ ಜಿಲ್ಲಾ ಬಿಜೆಪಿ ಅಧ್ಯಕ್ಷೆರ್ ಸತೀಶ್ ಕುಂಪಲ, ವಿಧಾನ ಪರಿಷತ್‌ ಸದಸ್ಯೆರ್ ಪ್ರತಾಪ್ ಸಿಂಹ ನಾಯಕ್, ಚುನಾವಣಾ ಸಂಚಾಲಕೆರ್ ನಿತಿನ್ ಕುಮಾರ್, ಪಕ್ಷದ ನಿಕಟಪೂರ್ವ ಜಿಲ್ಲಾಧ್ಯಕ್ಷೆರ್ ಸುದರ್ಶನ ಬೆದ್ರ, ಪಕ್ಷದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಪ್ರೇಮಾನಂದ ಶೆಟ್ಟಿ ಬೊಕ್ಕ ಯತೀಶ್ ಆರುವರ್ ಪಾಲ್ ಪಡೆದಿತ್ತೆರ್.

ಎ.15: ಇಂಟರ್ ನ್ಯಾಷ್ ನಲ್‌ ಬಂಟ್ಸ್ ವೆಲ್ಫೇರ್ ಟ್ರಸ್ಟ್‌ ದ ಸಂಘಟನಾ ಕಾರ್ಯದರ್ಶಿ ರಾಜ್‌ ಗೋಪಾಲ್‌ ರೈ ಮೆರೆಗ್ ಸಂಘಟನಾ ಮಾಣಿಕ್ಯ ಬಿರ್ದ್

ಕುಡ್ಲ: ಇಂಟರ್ ನ್ಯಾಷ್ ನಲ್‌ ಬಂಟ್ಸ್ ವೆಲ್ಫೇರ್ ಟ್ರಸ್ಟ್‌ದ ಮುತಾಲಿಕೆಡ್ ಎಪ್ರಿಲ್‌ 15 ಕ್ಕ್ ಮಹಿಳಾ ವಿಭಾಗರ್ದ್ ಬಲ್ಮಠದ ಕುಡ್ಲ ಪೆವಿಲಿಯನ್‌ ಡ್ ನಡಪರೆ ಇಪ್ಪುನ ಬಿಸು ಪರ್ಬ 2024 ಲೇಸ್ ಡ್ ಟ್ರಸ್ಟ್‌ ದ ಸಂಘಟನಾ ಕಾರ್ಯದರ್ಶಿ ರಾಜ್‌ ಗೋಪಾಲ್‌ ರೈ ಮೆರೆಗ್ ಸಂಘಟನಾ ಮಾಣಿಕ್ಯ ಬಿರ್ದ್ ಪ್ರದಾನ ಲೇಸ್ ಬಿನ್ನೆರೆನ ಸಮ್ಮುಖಡ್ ನಡಪರೆ ಉಂಡು ಪಂದ್ ಟ್ರಸ್ಟ್‌ ದ ಸ್ಥಾಪಕ ಅಧ್ಯಕ್ಷೆರ್ ಡಾ.ಅತ್ತೂರು ಸದಾನಂದ ಶೆಟ್ಟಿ ಪತ್ರಿಕಾ ಪ್ರಕಟನೆಡ್ ತೆರಿಪಾದೆರ್.

ರಾಜ್‌ ಗೋಪಾಲ್‌ ರೈ ಮೇರ್ ಪುಗರ್ತೆದ ಅಂತರಾಷ್ಟ್ರೀಯ ರೋಟರಿ ಸೇವಾಸಂಸ್ಥೆದ ಮಾಜಿ ಉಪ ಗರ್ವನರಾದ್, ಭಾರತೀಯ ಜನತಾ ಪಕ್ಷದ ಜಿಲ್ಲಾ ವಕ್ತಾರೆರಾದ್, ರಾಷ್ಟ್ರೀಯ ಸ್ವಯಂ ಸೇವಾ ಸಂಘದ ಶ್ರದ್ಧಾವಂತ ಸ್ವಯಂ ಸೇವಕೆರಾದ್, ಭಗವಾ ಕ್ಯಾಟರರ್ಸ್ ಸಂಸ್ಥೆದ ಸಂಸ್ಥಾಪಕೆರಾದ್, ಕ್ಯಾಟರಿಂಗ್‌ ಅಸೋಸಿಯನ್‌ದ ಮಾಜಿ ಅಧ್ಯಕ್ಷೆರಾದ್ ಬೊಕ್ಕ ವಿಶೇಷವಾದ್ ಧಾರ್ಮಿಕ, ರಾಜಕೀಯ, ಸಾಂಸ್ಕೃತಿಕ, ಕ್ರೀಡೆ ಸೇವಾ ವಿಭಾಗಡ್ ಸುಮಾರ್ ವರ್ಷೊದಿಂಚ ಸೇವೆ ಸಂದಾಯಿರ್ನೆದಾವೆರ ಈ ಬಿರ್ದ್ ನ್ ಕೊರೊಂದು ಉಂಡು ಪಂದ್ ಪ್ರಕಟನೆಡ್ ತೆರಿಪಾದೆರ್.

ವರದಿ : ಮುಲ್ಕಿ ಕರುಣಾಕರ ಶೆಟ್ಟಿ
ಮೊ.:9880425265

ದಕ್ಷಿಣಕನ್ನಡ ಎಂಪಿ ವೋಟುದ ಕಲೊಟ್ಟು 9 ಅಭ್ಯರ್ಥಿಲು

ಕುಡ್ಲ: ಲೋಕಸಭೆ ವೋಟುಗು ದಕ್ಷಿಣ ಕನ್ನಡ ಲೋಕಸಭೆ ಕ್ಷೇತ್ರಡ್ ಒರಿ ಅಭ್ಯರ್ಥಿ ನಾಮಪತ್ರ ಪಿರ ದೆತೊಂದೆರ್. ಒಟ್ಟು ಒರ್ಂಭ ಅಭ್ಯರ್ಥಿಲು ಕಣಟ್ಟ್ ಉಲ್ಲೆರ್.

ವೋಟುಡು ಸ್ಪರ್ಧೆ ಮಲ್ಪೆರೆ ನಾಮಪತ್ರ ಸಂದಾಯಿನ 11 ಜನಟ್ಟ್ 10 ಅಭ್ಯರ್ಥಿಲೆನ ನಾಮಪತ್ರಲು ಕ್ರಮಬದ್ಧ ಆದಿತ್ತ್ಂಡ್. ಪಕ್ಷೇತರ ಅಭ್ಯರ್ಥಿ ಆದಿತ್ತಿನ ಫ್ರಾನ್ಸಿಸ್ ಲ್ಯಾನ್ಸಿ ಮಾಡ್ತಾ ಮೆರೆನ ನಾಮಪತ್ರ ತಿರಸ್ಕೃತ ಆತ್ಂಡ್. ಇನಿ ನಾಮಪತ್ರ ವಾಪಸ್ ಪಡೆಯೆರೆ ಅಕೇರಿದ ದಿನ ಆತ್ಂಡ್. ಅಂಚೆನೆ ಪಕ್ಷೇತರ ಅಭ್ಯರ್ಥಿ ಸತೀಶ್ ಬೂಡುಮಕ್ಕಿ ನಾಮಪತ್ರ ವಾಪಸ್ ಪಡೆತೆರ್.

ಬಿಜೆಪಿದ ಕ್ಯಾ.ಬ್ರಿಜೇಶ್ ಚೌಟ, ಕಾಂಗ್ರೆಸ್‌ದ ಆ‌ರ್.ಪದ್ಮರಾಜ್, ಬಹುಜನ ಸಮಾಜ ಪಕ್ಷದ ಕಾಂತಪ್ಪ ಅಲಂಗಾರ್, ಕರ್ನಾಟಕ ರಾಷ್ಟ್ರ ಸಮಿತಿದ ರಂಜಿನಿ ಎಂ, ಉತ್ತಮ ಪ್ರಜಾಕೀಯ ಪಕ್ಷದ ಕೆ.ಇ.ಮನೋಹರ, ಕರುನಾಡ ಸೇವಕ ಪಕ್ಷದ ದುರ್ಗಾಪ್ರಸಾದ್, ಪಕ್ಷೇತರ ಆದ್ ದೀಪಕ್ ರಾಜೇಶ್ ಕುವೆಲ್ಲೊ, ಮೆಕ್ಸಿಂ ಪಿಂಟೊ ಬೊಕ್ಕ ಸುಪ್ರೀತ್ ಕುಮಾರ್ ಪೂಜಾರಿ ವೋಟುದ ಕಲೊಟ್ಟ್ ಉಲ್ಲೆರ್. ‌

ಏ.12, 14, 16: ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವಸ್ಥಾನಡ್ ಆಗೇಲ್ ಸೇವೆ ಇಜ್ಜಿ

ಬಂಟ್ವಾಳ ತಾಲೂಕ್ ಸಜೀಪಮೂಡ ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವಸ್ಥಾನಡ್ ಏ.12, 14, 16 ಕ್ಕ್ ಆಗೇಲ್ ಸೇವೆ ಇಜ್ಜಿ.

ಸಜೀಪ ಮಾಗಣೆ ಮಿತ್ತಮಜಲು ಕ್ಷೇತ್ರದ ವಾರ್ಷಿಕ ವಿಸು ಜಾತ್ರೆದ ಲೆಕ್ಕೊಡು ಮುಲ್ಪ ಆಗೇಲ್ ಸೇವೆ ಇಜ್ಜಿ. ಏ.19 ರ್ದ್ ಆಗೇಲ್ ಸೇವೆ ನಡಪುಂಡು. ಬೊಕ್ಕ ಕುಡ ಏ.21 ಕ್ಕ್ ಆಗೇಲ್ ಸೇವೆ ಇಜ್ಜಿ ಪಂದ್ ಪ್ರಕಟಣೆಡ್ ತೆರಿಪಾದೆರ್.

ಸಮಾಜ ಸೇವೆಡ್ “ವೀರ ಕೇಸರಿ” ಮಲ್ಲ ಪುದರ್ : ಬಾಳ ಜಗನ್ನಾಥ ಶೆಟ್ಟಿ

ಸುರತ್ಕಲ್: ವೀರ ಕೇಸರಿ ಸಮಾಜ ಸೇವೆಡ್ ದುಂಬು ಇಪ್ಪುನ ಸೇವಾ ಸಂಸ್ಥೆ. ಕರಿನ 45 ವರ್ಷೊದಿಂಚ ತಡಂಬೈಲ್ ಪರಿಸರಡ್ ವೀರಕೇಸರಿ ಸೇವಾ ಸಂಸ್ಥೆ ಕ್ರೀಡೆ, ಸಾಂಸ್ಕೃತಿಕ ಬೊಕ್ಕ ಸಮಾಜ ಸೇವೆಡ್ ಇತ್ತ್ ದ್ ಸಮಾಜಪರ ಕೆಲಸ ಮಲ್ತ್ ದ್ ಮೆಚ್ಚೊಗೆಗ್ ಪಾತ್ರ ಆತ್ಂಡ್ ಪಂದ್ ಕರ್ನಾಟಕ ಮಾಧ್ಯಮ ಅಕಾಡೆಮಿದ ನಿಕಟಪೂರ್ವ ಸದಸ್ಯೆರ್ ಬಾಳ ಜಗನ್ನಾಥ ಶೆಟ್ಟಿ ಪಂಡೆರ್.

ಮಾರಿಪೂಜೆ ಮಹೋಚ್ಚಯದ ಲೆಕ್ಕೊಡು ಮಾರಿಗುಡಿ ಶ್ರೀ ಮಹಮ್ಮಾಯಿ ದೇವಸ್ಥಾನದ ವಠಾರಡ್ ನಡತಿನ ವೀರಕೇಸರಿದ ವಾರ್ಷಿಕ ಉಚ್ಚಯಡ್ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.

ಲೇಸ್ ಡ್ ಮುಕ್ಕ ಶ್ರೀನಿವಾಸ ಆಸ್ಪತ್ರೆದ ವೈದ್ಯಾಧಿಕಾರಿ ಡಾ ಶಶಿಧರ ಪಡ್ಡೆದ್ರ ಪಾತೆರ್ದ್, ವೀರ ಕೇಸರಿ ಸಂಸ್ಥೆರ್ದ್ ಆರೋಗ್ಯ ವಿಚಾರಗ್ ಸಂಬಂಧಪಟ್ಟಿನ ಲೇಸ್ ನಡತ್ ಇಪ್ಪುರ್ನೆದಾವೆರ ಪರಿಸರದ ನಾಗರಿಕೆರೆಗ್ ಅನುಕೂಲ ಆತ್ಂಡ್. ಇಂಚಿನ ಸಮಾಜಮುಖಿ ಲೇಸ್ ನಿರಂತರವಾದ್ ನಡಪಾಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಲೇಸ್ ಡ್ ಉದ್ಯಮಿ ರಮೇಶ್ ರಾವ್, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಟ್ರಸ್ಟಿಲು ಸಹನಾ ರಾಜೇಶ್ ರೈ, ಸಮಾಜಸೇವಕಿ ಶಾಂತಾ, ಮಹಾಬಲ ಪೂಜಾರಿ ಕಡಂಬೋಡಿ, ಲಕ್ಷ್ಮೀನಾರಾಯಣ ಭಟ್, ಸುರತ್ಕಲ್ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕ್ ದ ಅಧ್ಯಕ್ಷೆರ್ ಅಶೋಕ್ ಶೆಟ್ಟಿ ತಡಂಬೈಲ್, ಮಾಜಿ ಅಧ್ಯಕ್ಷೆರ್ ಸುಧಾಕರ ತಡಂಬೈಲ್, ಅಧ್ಯಕ್ಷೆರ್ ಸುಕುಮಾರ್ ತಡಂಬೈಲ್, ಕೈಲಾಸ್ ತಡಂಬೈಲ್, ಪದ್ಮನಾಭ ತಡಂಬೈಲ್ ರಾಘವೇಂದ್ರ ತಡಂಬೈಲ್ ಪಾಲ್ ಪಡೆದಿತ್ತೆರ್.

ಲೇಸ್ ಡ್ ಬೇತೆ ಬೇತೆ ಕ್ಷೇತ್ರಡ್ ಸಾಧನೆ ಮಲ್ತಿನ ಜಯಂತ ಶೆಟ್ಟಿ ತಡಂಬೈಲ್, ಸುಧಾಕರ್ ಸುರತ್ಕಲ್, ಸಹನಾ ಆರ್ ರೈ ಮೆರೆಗ್ ಸನ್ಮಾನ ನಡತ್ಂಡ್. ಅಶೋಕ್ ಶೆಟ್ಟಿ ತಡಂಬೈಲ್ ಪ್ರಸ್ತಾವಿಕವಾದ್ ಪಾತೆರಿಯೆರ್. ರಾಮಚಂದ್ರ ಶೆಟ್ಟಿ ತಡಂಬೈಲ್ ಎದ್ಕೊಂದು, ಸೊಲ್ಮೆ ಸಂದಾಯೆರ್. ಮನೋಜ್ ಶೆಟ್ಟಿ ಚೇಳಾರ್ ಲೇಸ್ ನ್ ಸುಧಾರಿಕೆ ಮಲ್ತೆರ್.