ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಸ್ಯಾಮ್ಸಂಗ್ ಕಂಪೆನಿದ ಪೊಸ ವಿನ್ಯಾಸದ ಗ್ಯಾಲಕ್ಸಿ S24 Family ಮೊಬೈಲ್ ಮಾರ್ಕೆಟ್ ಡ್ ಬುಡುಗಡೆ

ಉಜಿರೆ: ಸ್ಯಾಮ್ಸಂಗ್ ಕಂಪೆನಿದ ಪೊಸ ವಿನ್ಯಾಸದ ಗ್ಯಾಲಕ್ಸಿ S24 Family ಮೊಬೈಲ್ ಜ.24 ಕ್ಕ್ ಉಜಿರೆ ocean ಪಾರ್ಲ್ ದ ಮಾರ್ಕೆಟ್ ಡ್ ಬುಡುಗಡೆ ಆಂಡ್.

ಲೇಸ್ ಡ್ ಝೋನಲ್ ಸೇಲ್ಸ್ ಮ್ಯಾನೇಜರ್ ಇಸ್ಮಾಯಿಲ್ ಶರೀಫ್, ಏರಿಯಾ ಬಿಸಿನೆಸ್ ಮ್ಯಾನೇಜರ್ ನಾಗೇಂದ್ರ ಪ್ರಭು, ಏರಿಯಾ ಬಿಸಿನೆಸ್ ಸೇಲ್ಸ್ ಆಫೀಸರ್ ವಿಜಯ್ ದಾಸ್, ಅಜಯ್ ಬಿ.ಎಂ, ತಾಲೂಕ್ ದ ಅಧಿಕೃತ ವಿತರಕೆರ್ ಕಲ್ಲಾರಿ ಕಮ್ಯುನಿಕೇಶನ್ ಮಾಲಕೆರ್ ಜಗದೀಶ್ ಆಚಾರ್ಯ ಪಾಲ್ ಪಡೆದಿತ್ತೆರ್. ಈ ಲೇಸ್ ಗ್ ತುಡರ್ ಅರ್ಲಾವುನ ಮುಕೇನ ಚಾಲನೆ ಕೊರಿಯೆರ್.

ಮೊಬೈಲ್ ಬುಡುಗಡೆ ಮಲ್ತಿನ ಝೋನಲ್ ಸೇಲ್ಸ್ ಮ್ಯಾನೇಜರ್ ಇಸ್ಮಾಯಿಲ್ ಶರೀಫ್ ಮೇರ್ ಪಾತೆರ್ದ್, ಮೊಬೈಲ್ ದ ವೈಶಿಷ್ಟ್ಯದ ಬಗೆಟ್ಟ್ ಪೊಲಬು ಕೊರಿಯೆರ್.

ಬೊಕ್ಕ ಮೊಬೈಲ್ ದ ಅಡ್ವಾನ್ಸ್ ಕೊರ್ನ ಬೆನಕ ಹಾಸ್ಪಿಟಲ್ ವೈದ್ಯೆರ್ ಗೋಪಾಲಕೃಷ್ಣ, ದಿಶಾ ಫುಡ್ ಕಾರ್ನರ್ ದ ಅಕ್ಷಯ್, ಉದ್ಯಮಿ ಜಗದೀಶ್ ಆಚಾರ್ಯ, ದುಬೈದ ಉದ್ಯಮಿ ಅಕ್ಷಯ್, ದಿಶಾ ಬೇಕರಿದ ದಿನೇಶ್, ಮೊಬೈಲ್ ಶಾಪ್ ದ ಮಾಲಕೆರ್ ರಿಶಾದ್, ಪವರ್ ಆನ್ ಬ್ಯಾಟರಿದ ಮಾಲಕೆರ್ ಶೀತಲ್ ಜೈನ್ ಬೊಕ್ಕ ಲ್ಯಾಡಿಂಗ್ ಡೀಲರ್ ಸಾಹುಲ್ ಹಮೀದ್ ಮೆರೆಗ್ ಪೊಸ ಮೊಬೈಲ್ ನ್ ಕೊರಿಯೆರ್.

ಲೇಸ್ ಡ್ ರಿಟೇಲರ್ ಫಾಲ್ಸ್ ಮೊಬೈಲ್ ಮಾಲಕೆರ್ ರಾಘವೇಂದ್ರ, ಹೈಟೆಕ್ ಮೊಬೈಲ್ ಮಾಲಕೆರ್ ಶರೀಫ್, ಅಯಾನ್ಶ್ ಎಂಟರ್‌ಪ್ರೈಸಸ್ ದ ಮಾಲಕೆರ್ ಅರಿಹಂತ್ ಜೈನ್, ಸ್ಮಾರ್ಟ್ ಮೊಬೈಲ್ ಮಾಲಕೆರ್ ಅಕ್ಷತ್ ಬೊಕ್ಕ ಕಲ್ಲಾರಿ ಕಮ್ಯುನಿಕೇಶನ್ ದ ಸಿಬ್ಬಂದಿಲು ಪಾಲ್ ಪಡೆದಿತ್ತೆರ್. ಬೊಕ್ಕ ಬಿನ್ನೆರೆಗ್ ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಈ ಲೇಸ್ ನ್ ಗಣೇಶ್ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.

ಪುಗರ್ತೆದ ದೈವ ನರ್ತಕೆರ್ ಅಶೋಕ್ ಬಂಗೇರ ಗಂಧಕಾಡು ನನ ನೆಂಪು ಮಾತ್ರ

ಕುಡ್ಲ: ಪುಗರ್ತೆದ ದೈವ ನರ್ತಕೆರ್ ಅಶೋಕ್ ಬಂಗೇರ ಗಂಧಕಾಡು (47) ಮೇರ್ ದೈವೊದ ನೇಮ ಕಟ್ಟ್ ದ್ ಇಪ್ಪುನಗ ತಿಗಲೆ ಬೇನೆ ಬತ್ತ್ ದ್ ದೇವೆರೆ ಪಾದೊ ಸೇರಿಯೆರ್.

ಮೆರೆಗ್ ಕುಡ್ಲ ಪೇಂಟೆದ ಹಳೆಯಂಗಡಿ ಕೈತಲ್ ಲೆಕ್ಕೇಸಿರಿ ದೈವೊದ ನೇಮದ ಸೇವೆಡ್ ಇಪ್ಪುನಗ ತಿಗಲೆ ಬೇನೆ ಬೈದ್ಂಡ್. ಬೊಕ್ಕ ಮೆರೆನ್ ಪೇಂಟೆದ ಖಾಸಗಿ ಆಸ್ಪತ್ರೆಗ್ ಸೇರ್ಸಾನಗ ತಾದಿ ನಡುಟ್ಟ್ ತೀರ್ ಪೋತೆರ್.

ಒಂತೆ ದಿನ ಹುಷಾರ್ ದಾಂತೆ ಇತ್ತಿನ ಮೇರ್ ಈ ಸರ್ತಿರ್ದ್ ನೇಮ ಕಟ್ಟುನೆನ್ ಉಂತಾಯೆರೆ ನಿರ್ಧಾರ ಮಲ್ತ್ ದ್ ಇತ್ತೆರ್. ಆಂಡ ವಿಧಿಯಾಟ ಬೇತೆನೇ ಇತ್ತ್ಂಡ್. ಉಂದುವೇ ಆರೆನ ಅಕೇರಿನ ನೇಮ ಆತ್ಂಡ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 44ನೇ ಸಂಚಿಕೆ ಜ.29 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರ್ ಆರ್. ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಜ.30 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಪುತ್ತೂರು “ಕೋಟಿ – ಚೆನ್ನಯ” ಜೋಡುಕರೆ ಕಂಬುಲಡ್ ಗೆಂದಿನಕುಲು

31ನೇ ವರ್ಷದ ಪುತ್ತೂರು “ಕೋಟಿ – ಚೆನ್ನಯ” ಜೋಡುಕರೆ ಕಂಬುಲ ಜ.27 ಕ್ಕ್ ನಡತ್ಂಡ್.

ಈ ಕಂಬುಲ ಕೂಟಡ್ ಗೆಂದಿನಕ್ಲೆನ ಪೊಲಬು ಇಂಚ ಉಂಡು:

ಕನೆಪಲಯಿ: 6 ಜತೆ
ಅಡ್ಡಪಲಯಿ: 4 ಜತೆ
ಬಲ್ಲ್ ದ ಮಲ್ಲ: 15 ಜತೆ
ನಾಯೆರ್ ದ ಮಲ್ಲ: 40 ಜತೆ
ಬಲ್ಲ್ ದ ಎಲ್ಯ: 25 ಜತೆ
ನಾಯೆರ್ ದ ಎಲ್ಯ: 97 ಜತೆ
ಒಟ್ಟು ಎರ್ಲೆನ ಸಂಖ್ಯೆ: 187 ಜತೆ

ಕನೆಪಲಯಿ: (6.5 ಕೋಲ್ ನಿಶಾನೆಗ್ ನೀರ್ ರಾಪಾದೆರ್)
ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ

ಅಡ್ಡ ಪಲಯಿ:
ಸುರುತ್ತ ಇನಾಮು: ನಾರಾವಿ ಯುವರಾಜ್ ಜೈನ್
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್
ರಡ್ಡನೇ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ

ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಎ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ
ರಡ್ಡನೇ ಇನಾಮು: ನೂಜಿಪ್ಪಾಡಿ ಡಾ.ಪ್ರವೀಣ್ ಹೊಳ್ಳ “ಬಿ”
ಗಿಡತಿನಾರ್: ಬಾರಾಡಿ ನತೀಶ್

ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ಸುರತ್ಕಲ್ ಪಾಂಚಜನ್ಯ ಯೋಗಿಶ್ ಪೂಜಾರಿ “ಬಿ”
ಗಿಡತಿನಾರ್: ಭಟ್ಕಳ ಶಂಕರ್
ರಡ್ಡನೇ ಇನಾಮು: ನೂಜಿಪ್ಪಾಡಿ ಚಂದ್ರಶೇಖರ ಹೊಳ್ಳ “ಬಿ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ

ನಾಯೆರ್ ದ ಮಲ್ಲ:
ಸುರುತ್ತ ಇನಾಮು: ಇರುವೈಲು ಪಾನಿಲ ಬಾಡ ಪೂಜಾರಿ “ಎ”
ಗಿಡತಿನಾರ್: ಬೈಂದೂರು ಮಂಜುನಾಥ ಗೌಡ
ರಡ್ಡನೇ ಇನಾಮು: ನಕ್ರೆ ಮಹೋಧರ ನಿವಾಸ ಇಶಾನಿ ತುಕ್ರ ಭಂಡಾರಿ
ಗಿಡತಿನಾರ್: ಮಾಳ ಆಧೀಶ್ ಪೂಜಾರಿ

ನಾಯೆರ್ ದ ಎಲ್ಯ:
(ಸಮಾನ ಇನಾಮು)
ಮುನಿಯಾಲ್ ಉದಯ ಕುಮಾರ್ ಶೆಟ್ಟಿ
ಗಿಡತಿನಾರ್: ಮಾಸ್ತಿಕಟ್ಟೆ ಸ್ವರೂಪ್

ಒಡಿಪಿ ಬ್ರಹ್ಮಗಿರಿ ಪ್ರಥಮ ಗಣನಾಥ ಹೆಗ್ಡೆ “ಬಿ”
ಗಿಡತಿನಾರ್: ಉಜಿರೆ ಹೊಸಮನೆ ಸ್ಪಂದನ್ ಶೆಟ್ಟಿ

ಫೆ.11: ಕುಂದಾಪುರ ತಾಲೂಕ್ ಯುವ ಬಂಟರ ಸಂಘದ ಮುತಾಲಿಕೆಡ್ ಭಾವೈಕ್ಯ ಲೇಸ್

ಕುಂದಾಪುರ ತಾಲೂಕ್ ಯುವ ಬಂಟರ ಸಂಘ (ರಿ.) ಮುತಾಲಿಕೆಡ್ ಫೆ.11 ಐತಾರ ಭಾವೈಕ್ಯ ಲೇಸ್ ನಡಪರೆ ಉಂಡು.

ಸಂಘದ ಮಾನಾದಿಗೆದ ಗುರ್ಕಾರೆಯಾದ್ ಬಿ.ಉದಯ ಕುಮಾರ ಶೆಟ್ಟಿ ಉಲ್ಲೆರ್. ಮಹಾಸಮಾಗಮದ ಮಹಾದಾನಿಲಾದ್ ಬೊಂಬೈ ಹೇರಂಬ ಆಗ್ರೋ ಇಂಡಸ್ಟ್ರೀಸ್ ದ ಸಿಎಂಡಿ ಕುಳೂರು ಕನ್ಯಾನ ಸದಾಶಿವ ಶೆಟ್ಟಿ, ಬೆಂಗ್ಲೂರು ಸೌತ್ ಫೀಲ್ಸ್ ಪೈಂಟ್ಸ್ ಸಿಎಂಡಿ ಎಸ್ ಎಸ್ ಹೆಗ್ಡೆ, ದುಬೈ ಫಾರ್ಚೂನ್ ಗ್ರೂಪ್ ಆಫ್ ಹೋಟೆಲ್ಸ್ ದ ವಕ್ವಾಡಿ ಪ್ರವೀಣ್ ಕುಮಾರ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ ತಾರಾ ಮೆರೆಗ್ ಆದ್ ನಟೆ ರಿಷಭ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಈ ಲೇಸ್ ದೊಟ್ಟಿಗೆ ಬಂಟೆರೆನ ನನದ ರಾಜಕೀಯ, ಸಾಂಸ್ಕೃತಿಕ, ಆರ್ಥಿಕ ಸವಾಲ್ ಲು ಮಾತು ಮಂಥನ, 18 ಬಂಟೆರ ಸಂಘಲೆನ ನಡುಟ್ಟ್ ಸಮೂಹ ನೃತ್ಯ ಪಂತೊ, ರೂರಲ್ ಆಯುರ್ವೇದ ಕಾಲೇಜ್ ದಕ್ಲೆನ ಆಯುರ್ವೇದ ಶಿಬಿರ, ರಾಜೇಶ್ ಕೃಷ್ಣನ್, ಎಂ.ಡಿ ಪಲ್ಲವಿ, ಮಾನಸ ಹೊಳ್ಳ ಮೊಕ್ಲೆರ್ದ್ ಸಂಗೀತ ಸಂಜೆ, ರಾಜ್ಯ ಬೊಕ್ಕ ರಾಷ್ಟ್ರ ಮಟ್ಟದ ಯುವ ಸಾಧಕೆರೆಗ್ ಅಭಿನಂದನೆ, ಇಸೇಸ ಚೇತನೆರೆಗ್ ಪ್ರೋತ್ಸಾಹಧನ, ವಿದ್ಯಾರ್ಥಿ ವೇತನ ವಿತರಣೆ, ಎಜೆ ಹಾಸ್ಪಿಟಲ್ ಬೊಕ್ಕ ಸಂಶೋಧನಾ ಕೇಂದ್ರ ಕುಡ್ಲ ಮೊಕ್ಲೆರ್ದ್ ಉಚಿತ ಆರೋಗ್ಯ ತಪಾಸಣೆ, ಪ್ರಸಾದ್ ನೇತ್ರಾಲಯ ಮೆರೆರ್ದ್ ಧರ್ಮೊಗು ಕಣ್ಣ್ ದ ಪರೀಕ್ಷೆ, ಚಿತ್ರ ಬುಡ್ಪಾವುನ ಪಂತೊ, ರಂಗೋಲಿ ಪಂತೊ, ಧ್ಯೇಯ ವಾಕ್ಯ ರಚನೆ ನಡಪರೆ ಉಂಡು ಪಂದ್ ಗುರ್ಕಾರೆ ಡಾ| ಅಂಪಾರು ನಿತ್ಯಾನಂದ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ನಿತೀಶ್ ಶೆಟ್ಟಿ ಬಸ್ರೂರು, ಕೋಶಾಧಿಕಾರಿ ಅಕ್ಷಯ್ ಹೆಗ್ಡೆ ಮೊಳಹಳ್ಳಿ, ಲೇಸ್ ದ ಸಂಯೋಜಕೆರ್ ಪ್ರತಾಪ್ ಚಂದ್ರ ಶೆಟ್ಟಿ ಹಳ್ನಾಡು ಲೆಪ್ಪೋಲೆಡ್ ತೆರಿಪಾದೆರ್.

ತೋಕೂರುದ 5ನೇ ವರ್ಷೊದ ಯಕ್ಷಗಾನ ಬಯಲಾಟದ ಲೆಪ್ಪೋಲೆ ಬುಡುಗಡೆ

ಯಕ್ಷ ದೇಗುಲದ ಪತ್ತ್ ಸಮಸ್ತೆರ್ 10ನೇ ತೋಕೂರುದ 5ನೇ ವರ್ಷೊದ ಯಕ್ಷಗಾನ ಬಯಲಾಟದ ಲೆಪ್ಪೋಲೆ ಬುಡುಗಡೆ ಲೇಸ್ ಜ.28 ಐತಾರ ಓಂಕಾರೇಶ್ವರಿ ಮಂದಿರಡ್ ನಡತ್ಂಡ್.

ಲೆಪ್ಪೋಲೆನ್ ವಿಶ್ವಬ್ಯಾಂಕ್ ಪರ್ಪಿನ ನೀರ್ ಬೊಕ್ಕ ಪರಿಸರ ನೈರ್ಮಲ್ಯ ಸಮಿತಿದ ಗುರ್ಕಾರೆ ಗಣೇಶ್ ಜಿ. ಬಂಗೇರ ಮೇರ್ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಮಂದಿರದ ಗುರ್ಕಾರೆ ಸದಾಶಿವ ಕುಂದರ್, ಅರ್ಚಕೆರ್ ಕೃಷ್ಣಕುಮಾರ್, ಯಕ್ಷ ದೇಗುಲದ ಪತ್ತ್ ಸಮಸ್ತೆರ್ 10ನೇ ತೋಕೂರುದ ಗುರ್ಕಾರೆ ಸದಾಶಿವ ಸಾಲ್ಯಾನ್, ಒತ್ತು ಗುರ್ಕಾರೆ ಸಂಪತ್ ಜೆ. ಶೆಟ್ಟಿ ಬೊಕ್ಕ ಪದ್ಮರಾಜ ಕರ್ಕೇರ, ಜತೆ ಕಾರ್ಯದರ್ಶಿ ಪ್ರೇಮಲತಾ ಯೋಗೀಶ್, ಮಾನಾದಿಗೆದ ಸಲಹೆಗಾರೆ ಗೋಪಾಲಕೃಷ್ಣ ಸಾಲ್ಯಾನ್, ಸಂಜೀವ ಕರ್ಕೇರ, ಸುರೇಶ್ ಬಿ ದೇವಾಡಿಗ ಬೊಕ್ಕ ದಿನಕರ ಸಾಲ್ಯಾನ್, ಸೀತಾರಾಮ ಸಾಲ್ಯಾನ್, ರಾಜೇಶ್, ಹಿಮಕರ್ ಕೋಟ್ಯಾನ್, ಶ್ರೀನಿವಾಸ, ಉದಯ್ ಕುಮಾರ್ ಪಾಲ್ ಪಡೆದಿತ್ತೆರ್. ಲೇಸ್ ನ್ ಪ್ರಧಾನ ಕಾರ್ಯದರ್ಶಿ ಭಾಸ್ಕರ್ ಅಮೀನ್ ತೋಕೂರು ಸುಧಾರಿಕೆ ಮಲ್ತೆರ್.

ಜ.29-31: ಕುಪ್ಪೆಟ್ಟು ಪಂಜುರ್ಲಿ ಧರ್ಮ ಚಾವಡಿಡ್ ಕೋಲ ಬಲಿ ಸೇವೆ

ಕುಪ್ಪೆಟ್ಟು ಪಂಜುರ್ಲಿ ಧರ್ಮ ಚಾವಡಿ ಕಾಂಜಿರ್ಕೋಡಿ ಗೋಕುಲ ನಿವಾಸಡ್ ಕೋಲ ಬಲಿ ಸೇವೆ ಜ.29-31 ಮುಟ್ಟ ನಡಪರೆ ಉಂಡು.

ಜ.29 ಸೋಮಾರ ಕಾಂಜಿರ್ಕೋಡಿ ಇಲ್ಲಡ್ ಬೊಲ್ಪುಗು ಗಣಹೋಮ, ನಾಗತಂಬಿಲ, ದೈವೊಲೆನ ಶುದ್ಧಿ, ನವಗ್ರಹ ಶಾಂತಿ, ಮೃತ್ಯುಂಜಯ ಶಾಂತಿ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ದುರ್ಗಾನಮಸ್ಕಾರ ಪೂಜೆ, ಭಜನಾ ಸಂಕೀರ್ತನೆ ನಡಪರೆ ಉಂಡು.

ಜ.30 ಅಂಗಾರೆ ಬೊಲ್ಪುಗು ಶ್ರೀ ಸತ್ಯನಾರಾಯಣ ಪೂಜೆ, ಜುಮಾದಿ ಹೋಮ ಪಂಚಕಜ್ಜಾಯ, ಮಧ್ಯಾಹ್ನ ಭಂಡಾರ ಬರಿಯೆರೆ, ಎಣ್ಣೆಬೂಳ್ಯ, ಅನ್ನ ಪ್ರಸಾದ ಸೇವೆ, ಮೈಸಂದಾಯ, ರಕ್ತೇಶ್ವರೀ, ಜುಮಾದಿ-ಬಂಟ, ಸತ್ಯದೇವತೆ, ಹಿರಿಯಜ್ಜ, ಮಂತ್ರದೇವತೆ, ಕಲ್ಲುರ್ಟಿ, ಕುಪ್ಪೆಟ್ಟು ಪಂಜುರ್ಲಿ, ಕುಟುಂಬದ ಕಲ್ಲುರ್ಟಿ ಪಂಜುರ್ಲಿ, ಚಾಮುಂಡಿ-ಗುಳಿಗ, ರಾಹು ಬೊಕ್ಕ ಕೊರಗಜ್ಜ ದೈವೊದ ಕೋಲ-ಬಲಿ ಸೇವೆ ನಡಪರೆ ಉಂಡು.

ಜ.31 ಬುಧಾರ ಕುಪ್ಪೆಟ್ಟು ಪಂಜುರ್ಲಿ ದೈವೊದ ಅಗೆಲ್ ಸೇವೆ, ಶಶಿಕಲಾ ಬೊಕ್ಕ ಹೊನ್ನಪ್ಪ ಪೂಜಾರಿ, ಮನ್ವಿತ್‌ ಸನ್ವಿತ್‌ ಮೊಕ್ಲೆನ ಪರಕೆದ ಲೆಕ್ಕೊಡು ರಾತ್ರೆ ಕೊರಗಜ್ಜ ದೈವೊದ ಕೋಲ ಬಲಿ ಸೇವೆ ನಡಪರೆ ಉಂಡು.

ಪುಗರ್ತೆದ ಸಿನೆಮಾ ನಟೆ, ಸಿರಿ ಬ್ರ್ಯಾಂಡ್ ರಾಯಭಾರಿ ರಮೇಶ್ ಅರವಿಂದ್ ಸಿರಿ ಸಂಸ್ಥೆದ ಪ್ರಧಾನ ಕಚೇರಿಗ್ ಭೇಟಿ

ಪ್ರತಿಯೊಂಜಿ ಸಿರಿ ಉತ್ಪನ್ನಲೆಡ್ ಭಾವನಾತ್ಮಕ ಸಂಬಂಧ ಉಂಡು: ರಮೇಶ್ ಅರವಿಂದ್

ಬೊಲ್ತೇರ್: ಪುಗರ್ತೆದ ಚಿತ್ರ ನಟೆ, ಶ್ರೀ ಧರ್ಮಸ್ಥಳ ಸಿರಿ ಗ್ರಾಮೋದ್ಯೋಗ ಸಂಸ್ಥೆದ ಉತ್ಪನ್ನಲೆನ ರಾಯಭಾರಿ ರಮೇಶ್ ಅರವಿಂದ್ ಮೇರ್ ಸಿರಿ ಸಂಸ್ಥೆದ ಪ್ರಧಾನ ಕಚೇರಿ ಉಜಿರೆಗ್ ಜ.26 ಕ್ಕ್ ಭೇಟಿ ಕೊರಿಯೆರ್.

ಸಿರಿ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಕೆ.ಎನ್ ಜನಾರ್ದನ ಮೆರೆನ ಗುರ್ಕಾರ್ಮೆಡ್ ನಡತಿನ ಸಭಾ ಲೇಸ್ ಡ್ ಮೇರ್ ಪಾತೆರ್ದ್, ವೀರೇಂದ್ರ ಹೆಗ್ಗಡೆರೆನ, ಮಾತೃಶ್ರೀ ಹೇಮಾವತಿ ಅಮ್ಮನ ಮಾರ್ಗದರ್ಶನಡ್ ಬೊಕ್ಕ ಸಿರಿ ಎಂ.ಡಿ ಕೆ.ಎನ್ ಜನಾರ್ಧನ ಮೆರೆನ ದುಂಬಾತ್ತಿಗೆಡ್ ನಡತೊಂದು ಇಪ್ಪುನ ಈ ಸಿರಿ ಸಂಸ್ಥೆಡ್ ಉತ್ಪಾದನೆ ಆವೊಂದು ಇಪ್ಪುನ ಸಿರಿ ಉತ್ಪನ್ನಲೆಗ್ ರಾಯಭಾರಿಯಾದ್ ಕೆಲಸ ಮಲ್ತೊಂದು ಇಪ್ಪುನವು ಮಸ್ತ್ ಪೆರ್ಮೆ ಆವೊಂದು ಉಂಡು.‌ ಸಿರಿ ಸಂಸ್ಥೆದ ಪ್ರತಿಯೊಂಜಿ ಉತ್ಪನ್ನಲೆಡ್ ಭಾವನಾತ್ಮಕ ಸಂಬಂಧ ಉಂಡು. ದಾಯೆ ಪಂಡ ಈ ಸಂಸ್ಥೆಡ್ ಉತ್ಪಾದನೆ ಆವೊಂದು ಇಪ್ಪುನ ಪ್ರತೀ ಉತ್ಪನ್ನಲೆಡ್ ಬಡಪತ್ತ್ ದ ಪೊಣ್ಣು ಜೋಕ್ಲೆನ ಪರಿಶ್ರಮ ಉಂಡು. ನಮ ಮಾತ ನಮ್ಮ ದಿನೊಲ ಗಲಸೆರೆ ಸಿರಿ ಉತ್ಪನ್ನಲೆನ್ ಉಪಯೋಗ ಮಲ್ತ್ಂಡ ನಮ್ಮ ಸಿರಿ ಸಂಸ್ಥೆಡ್ ಬೆನೊಂದು ಇಪ್ಪುನ ಪ್ರತಿಯೊಂಜಿ ಪೊಣ್ಣು ಜೋಕ್ಲೆನ ಬಾಳ್ ಡ್ ಏಪಲ ತೆಲಿಕೆ, ನೆಮ್ಮದಿನ್ ತೂಯೆರೆ ಸಹಕಾರಿ ಆಪುಂಡು. ಅಂಚಾದ್ ಪೂಜ್ಯೆರ್ ಬೊಕ್ಕ ಮಾತೃಶ್ರೀ ಅಮ್ಮನ ಆಸರೆಡ್ ಬೆನೊಂದು ಇಪ್ಪುನ ಮಾತ ಸಿರಿ ಸಿಬ್ಬಂದಿಲು ಏಪಲ ತೆಲಿಕೆಡ್ ಪರಸ್ಪರ ಪ್ರೀತಿ, ನಂಬಿಕೆ, ವಿಶ್ವಾಸ ದೀದ್ ಶ್ರದ್ಧೆರ್ದ್, ಇಷ್ಟಪಟ್ಟ್ ಡ್ ಸಂಸ್ಥೆದ ಕೆಲಸ ಕಾರ್ಯನ್ ಮಲ್ತ್ಂಡ ಖಂಡಿತವಾದ್ಲಾ ಯಶಸ್ಸ್ ನಮ್ಮಡೇ ಬರ್ಪುಂಡು ಪಂದ್ ಸಿರಿ ಸಿಬ್ಬಂದಿಲೆಗ್ ಸ್ಪೂರ್ತಿ ಕೊರಿಯೆರ್. ನೆತ್ತೊಟ್ಟಿಗೆ ಗಣರಾಜ್ಯೋತ್ಸವ ಸಂಭ್ರಮಾಚರಣೆದ ಬಗೆಟ್ಟ್ ತನ್ನ ವಿದ್ಯಾರ್ಥಿ ಜೀವನದ ಕುಸಿತ್ತ ಅನುಭವನ್ ಪಟ್ಟೊನಿಯೆರ್.

ಸಿರಿ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಕೆ.ಎನ್ ಜನಾರ್ದನ ಮೇರ್ ಪಾತೆರ್ದ್, ಪೂಜ್ಯೆರ್, ಅಮ್ಮನ ಬೊಕ್ಕ ಸಿರಿ ಸಂಸ್ಥೆದ ಮಿತ್ತ್ ಮಸ್ತ್ ಪ್ರೀತಿ, ಅಭಿಮಾನ ಇಪ್ಪುನ ರಮೇಶ್ ಅರವಿಂದ್ ಮೇರ್ ತನ್ನ ಜೀವನಡ್ ಅಳವಡಿಸಾಯಿನ ಸರಳತೆ, ಸಜ್ಜನಿಕೆ ಬೊಕ್ಕ ಮೌಲ್ಯಯುತ ಜೀವನ ಶೈಲಿದ ಬಗೆಟ್ಟ್ ಮೆಚ್ಚಿದ್, ಮಾತ ಸಿರಿ ಸಿಬ್ಬಂದಿಲೆನ ಪರವಾದ್ ರಮೇಶ್ ಅರವಿಂದ್ ಮೆರೆಗ್ ಶಾಲ್ ಪೊದೆಪಾದ್, ಸ್ಮರಣಿಕೆ ಕೊರ್ದು ಸನ್ಮಾನ ಮಲ್ತ್ ದ್ ಮಾನಾದಿಗೆ ಮಲ್ತೆರ್.

ಲೇಸ್ ಡ್ ಸಿರಿ ಸಂಸ್ಥೆದ ಆಡಳಿತ ಮಂಡಳಿದ ನಿರ್ದೇಶಕೆರ್ ರಾಜೇಶ್ ಪೈ, ಸಿರಿ ಸಂಸ್ಥೆದ ಆಡಳಿತ ಬೊಕ್ಕ ಲೆಕ್ಕಪತ್ರ ವಿಭಾಗದ ನಿರ್ದೇಶಕೆರ್ ಪ್ರಸನ್ನ ಯು ಬೊಕ್ಕ ಮಾತ ಸಿಬ್ಬಂದಿ ವರ್ಗದಕುಲು ಪಾಲ್ ಪಡೆದಿತ್ತೆರ್. ಸಿರಿ ಗೋಡೌನ್ ಮ್ಯಾನೇಜರ್ ಜೀವನ್ ಕುಮಾರ್ ಲೇಸ್ ದ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.

ಅವೆರ್ದ್ ಬೊಕ್ಕ ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಭೇಟಿ ಕೊರ್ನ ರಮೇಶ್ ಅರವಿಂದ್ ಮೇರ್ ಶ್ರೀ ಮಂಜುನಾಥ ಸ್ವಾಮಿನ ದರ್ಶನ ಪಡೆಯೆರ್. ಬೊಕ್ಕ ಡಾ| ವೀರೇಂದ್ರ ಹೆಗ್ಗಡೆರೆನ್ ಭೇಟಿ ಮಲ್ತ್ ದ್ ಆರೆನ ಆಶೀರ್ವಾದ ಪಡೆದ್, ಸಿರಿ ಸಂಸ್ಥೆದ ಅಭಿವೃದ್ಧಿ ಬಗೆಟ್ಟ್ ಚರ್ಚೆ ಮಲ್ತೆರ್. ಈ ಪೊರ್ತುಡು ರಮೇಶ್ ಅರವಿಂದೆರೆನ ರಾಯಭಾರಿಡ್ ಸಿರಿ ಸಂಸ್ಥೆ ಸಮಗ್ರ ಏಳಿಗೆ ಆವೊಂದು ಇಪ್ಪುನೆಕ್ಕ್ ಮೆರೆನ ಬಗ್ಗೆ ಪ್ರಶಂಸೆ ಕೊರಿಯೆರ್.

ಮೂಡುಮಟ್ಟಾರು ಶ್ರೀ ಬಬ್ಬರ್ಯ ದೈವೊಲ್ಯಡ್ ಸಾನ್ನಿಧ್ಯ ಸಂಕೋಚ, ದೈವ ಸಂದರ್ಶನ- ಬಾಲಾಲಯ ಪ್ರತಿಷ್ಠೆ

ಕಾಪು: ಮೂಡುಮಟ್ಟಾರು ಶ್ರೀ ಬಬ್ಬರ್ಯ ದೈವೊಲ್ಯಡ್ ಜೀರ್ಣೋದ್ಧಾರದ ಲೆಕ್ಕೊಡು ಜ.29 ಸೋಮಾರ (ಇನಿ) ಸಾನ್ನಿಧ್ಯ ಸಂಕೋಚ, ದೈವ ಸಂದರ್ಶನ- ಬಾಲಾಲಯ ಪ್ರತಿಷ್ಠೆ ನಡಪರೆ ಉಂಡು.

ಈ ಲೇಸ್ ಕುತ್ಯಾರು ಕೇಂಜ ಶ್ರೀಧರ ತಂತ್ರಿಲೆನ ಮಾರ್ಗದರ್ಶನಡ್, ವೇ.ಮೂ. ಶಿರ್ವ ರಘಪತಿ ಗುಂಡುಭಟ್ ಮೆರೆನ ಮುತಾಲಿಕೆಡ್ ಸಂಪ್ರದಾಯದಂಚೆನೆ ಸಂಪನ್ನ ಆಪುಂಡು.

ಈ ಲೇಸ್ ಡ್ ಊರುದ ಬೊಕ್ಕ ಪರವೂರುದ ಭಕ್ತೆರ್ ಬತ್ತ್ ದ್, ಶ್ರೀ ಬಬ್ಬರ್ಯ ಪರಿವಾರ ಶಕ್ತಿಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಮೂಡುಮಟ್ಟಾರು ಶ್ರೀ ಬಬ್ಬರ್ಯ ದೈವೊಲ್ಯದ ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ನಿತ್ಯಾನಂದ ಹೆಗ್ಡೆ ನಡಿಬೆಟ್ಟು, ಕಾರ್ಯಾಧ್ಯಕ್ಷೆರ್ ಮಟ್ಟಾರು ರತ್ನಾಕರ ಹೆಗ್ಡೆ, ಆಡಳಿತ ಮೊಕ್ತೇಸರೆರ್ ಭಗವಾನ್ ದಾಸ್ ಶೆಟ್ಟಿ, ಹಳೆಮನೆ, ಪದುಕೆರ್, ಸದಸ್ಯೆರ್ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.