ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಶ್ರೀ ಕೊಂಡೇಲ್ತಾಯ ದೈವೊಲ್ಯಡ್ ಧಾರ್ಮಿಕ ಲೇಸ್ ಸುರು

ಕಟೀಲ್ ಕೈತಲ್ದ ಕೊಂಡೇಲಡ್ ಪೊಸತಾದ್ ನಿರ್ಮಾಣ ಆಯಿನ ಶ್ರೀ ಕೊಂಡೇಲ್ತಾಯ, ಶ್ರೀ ರಕ್ತೇಶ್ವರೀ, ಶ್ರೀ ಪಂಜುರ್ಲಿ ದೈವೊಲ್ಯಡ್ ದೈವೊಲೆನ ಪ್ರತಿಷ್ಠೆ ಕಲಶಾಭಿಷೇಕದ ನಿಲೆಟ್ಟ್ ಧಾರ್ಮಿಕ ವಿಧಿ ವಿಧಾನಲು ಸುರು ಆತ್ಂಡ್.

ಸಿತ್ಲ ರಾಮಚಂದ್ರ ರಾವ್, ವಿನಾಯಕ ಕಾರಂತ ಮೊಕ್ಲೆನ ಪೌರೋಹಿತ್ಯಡ್ ಜಾಗೆಶುದ್ಧಿ, ಆಲಯ ಪರಿಗ್ರಹ ಇಂಚಿನ ಧಾರ್ಮಿಕ ವಿಧಿವಿಧಾನಲು ಸುರು ಆತ್ಂಡ್.

ಕಟೀಲ್-ಕೊಂಡೇಲ ಗ್ರಾಮಸ್ಥೆರೆರ್ದ್ ಪುದೆ ಕಾಣಿಕೆ ಮೆರವಣಿಗೆ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಗ್ ಬತ್ತ್ ದ್ ಸಾಮೂಹಿಕ ಪ್ರಾರ್ತನೆ ಸಂದಾಯಿನ ಬೊಕ್ಕ ರಥಬೀದಿರ್ದ್ ಕೊಂಡೇಲ್ತಾಯ ಕ್ಷೇತ್ರಗ್ ಬತ್ತ್ಂಡ್.

ಕಟೀಲ್ ದೇವಲ್ಯದ ಅರ್ಚಕೆರ್ ಕೆ. ಲಕ್ಷ್ಮೀನಾರಾಯಣ ಆಸ್ರಣ್ಣ ಮೆರವಣಿಗೆಗ್ ಚಾಲನೆ ಕೊರಿಯೆರ್. ಕೊಂಡೇಲ್ತಾಯ ಕ್ಷೇತ್ರಡ್ ತೋರಣ ಮೂರ್ತ, ಉಗ್ರಾಣ ಮೂರ್ತ ನಡತ್ಂಡ್.

ಈ ಪೊರ್ತುಡು ಸಮಿತಿ ಪ್ರಧಾನ ಸಂಚಾಲಕೆರ್ ಕೊಂಡೇಲಗುತ್ತು ಎ. ಜಯರಾಮ ಶೆಟ್ಟಿ, ದೈವೊಲ್ಯದ ಆಡಳಿತ ಸಮಿತಿ ಗುರ್ಕಾರೆ ಲೋಕಯ್ಯ ಸಾಲ್ಯಾನ್ ಕೊಂಡೇಲ, ಈಶ್ವರ ಕಟೀಲ್, ಕಿರಣ್ ಕುಮಾರ್ ಶೆಟ್ಟಿ, ದೊಡ್ಡಯ್ಯ ಶೆಟ್ಟಿ, ಪ್ರಶಾಂತ್ ದೇವಾಡಿಗ, ಅಭಿಲಾಷ್ ಶೆಟ್ಟಿ, ವಿಖೇಶ್ ಕೋಟ್ಯಾನ್, ಜಯಶೀಲ ಶೆಟ್ಟಿ ಪಾಲ್ ಪಡೆದಿತ್ತೆರ್.

ತುಳು ಪಾತೆರ್ಗ ತುಳು ಒರಿಪಾಗ ದುಬೈ ಯುಎಇ ದ 11ನೇ ವರ್ಷದ “ಗೌಜಿ ಗಮ್ಮತ್” ತುಳುನಾಡ ಗೊಬ್ಬುಲೆನ ಲೇಸ್ ದ ಅಟ್ಟಣೆ ಸಭೆ, ಲೆಪ್ಪೋಲೆ ಬುಡುಗಡೆ

ತುಳು ಪಾತೆರ್ಗ ತುಳು ಒರಿಪಾಗ ದುಬೈ ಯುಎಇ ದ 11ನೇ ವರ್ಷದ “ಗೌಜಿ ಗಮ್ಮತ್” ತುಳುನಾಡ ಗೊಬ್ಬುಲೆನ ಲೇಸ್ ದ ಅಟ್ಟಣೆ ಸಭೆ ಬೊಕ್ಕ ಲೆಪ್ಪೋಲೆ ಬುಡುಗಡೆ ಲೇಸ್ ದುಬೈದ ಝಾಬೀಲ್ ಪಾರ್ಕ್ ಡ್ ನಡತ್ಂಡ್.

ಸಂಸ್ಥೆದ ಪೆರಿಯ ಸದಸ್ಯೆರಾಯಿನ ಸತೀಶ್ ಉಳ್ಳಾಲ್, ನೋವೆಲ್ ಡಿ ಅಲ್ಮೇಡ, ಅಜ್ಮಲ್ ದುಬೈ, ಸಂದೀಪ್ ಕೋಟ್ಯಾನ್, ಸುಲೋಚನಾ ಜಯ ಅಮೀನ್, ಸುಶೀಲ ಸಂಜೀವ ಪೂಜಾರಿ ಮೊಕುಲು ಮಾ.3 ಐತಾರ ದುಬೈದ ಝಾಬೀಲ್ ಪಾರ್ಕ್ ಡ್ ನಡಪರೆ ಇಪ್ಪುನ ತುಳುನಾಡ ಗೊಬ್ಬುಲೆನ ಲೇಸ್ ದ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್.

ಬೊಲ್ಪುಗು 10 ಗಂಟೆರ್ದ್ ಬಯ್ಯ 6 ಗಂಟೆ ಮುಟ್ಟ ಆಂಜೋವ್ಲೆಗ್, ಪೊಂಜೋವ್ಲೆಗ್ ಬೊಕ್ಕ ಜೋಕ್ಲೆಗ್, ತುಳುನಾಡ್ ದ ಗೊಬ್ಬುಲಾಯಿನ ಲಗೋರಿ, ಕಬ್ಬಡಿ, ಬಲ್ಲ್ ಒಯಿಪುನ, ಸೈಕಲ್ ಚಕ್ರ ಗಿಡಪೆರೆ ಇಂಚ ಗೊಬ್ಬುಲು ಬೊಕ್ಕ ಬೇತೆ ಬೇತೆ ಕ್ಷೇತ್ರಡ್ ಸಾಧನೆ ಮಲ್ತಿನ ಸಾಧಕೆರೆಗ್ ಸನ್ಮಾನ ಲೇಸ್ ನ್ ಆಯೋಜನೆ ಮಲ್ದ್ಂಡ್ ಪಂದ್ ಸಂಸ್ಥೆದ ಕಾರ್ಯದರ್ಶಿ ರಿತೇಶ್ ಅಂಚನ್ ಮೇರ್ ತೆರಿಪಾಯೆರ್. ದುಬೈಡ್ ಇಪ್ಪುನ ತುಳುವೆರ್ ಮಾತೆರ್ಲಾ ಈ ಲೇಸ್ ಡ್ ಪಾಲ್ ಪಡೆದ್ ಯಶಸ್ವಿ ಮಲ್ಪೊಡು ಪಂದ್ ಆರ್ ಕೇನೊಂಡೆರ್.

ಈ ಪೊರ್ತುಡು ಸಂಸ್ಥೆದ ಗುರಿಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಪಾಲ್ ಪಡೆದ್ ಲೇಸ್ ದ ವ್ಯವಸ್ಥೆದ ಬಗ್ಗೆ ಚರ್ಚೆ ಮಲ್ತೆರ್.

‌ಜೆಸಿಐ ಕೊಕ್ಕಡ ಕಪಿಲ ಘಟಕದ ಎಲ್ ಡಿಎಂಟಿದ ತರಬೇತಿ

ಜೆಸಿಐ ಕೊಕ್ಕಡ ಕಪಿಲ ಘಟಕದ ಮುತಾಲಿಕೆಡ್ ಫೆ.18 ಕ್ಕ್ ಜೆಸಿಐದ ಸದಸ್ಯೆರೆರ್ದ್ ಆಡಳಿತಾತ್ಮಕ ತರಬೇತಿ ಲೇಸ್ ನ್ ಜೆಸಿಐ ವಲಯದ ಉಪಾಧ್ಯಕ್ಷೆರ್ ಜೆಸಿ ಜೆ ಎಫ್ ಎಂ ಶಂಕರ್ ರಾವ್ ನಡಪಾದ್ ಕೊರಿಯೆರ್.

ಗ್ರಾಮಭ್ಯುದಯ ಕಾರ್ಯಕ್ರಮ ಅನುಷ್ಠಾನ ಸಮಿತಿ (ರಿ.) ಶಿಬರಾಜೆ ಪಾದೆ ಚಾವಡಿಡ್ ಜೆಸಿಐದ ಗುರ್ಕಾರೆ ಜೆಸಿ ಎಚ್ ಜಿ ಎಫ್ ಸಂತೋಷ್ ಜೈನ್, ಯೋಜನಾ ನಿರ್ದೇಶಕೆರ್ ಜೆಸಿಜೆ ಎಫ್ ಮ್ ಕೆ ಶ್ರೀಧರ್ ರಾವ್, ವಲಯದ ಒತ್ತು ಗುರ್ಕಾರೆ ಜೆಸಿ ಜೆ ಎಫ್ ಮ್ ಶಂಕರ್ ರಾವ್, ಕಾರ್ಯದರ್ಶಿ ಜೆಸಿ ಅಕ್ಷತ್ ರೈ, ಲೇಡಿ ಜೆಸಿ ಗುರ್ಕಾರೆ ಜೆಸಿ ಶೋಭಾ ಪಿ, ಜೂನಿಯರ್ ಜೆಸಿ ಗುರ್ಕಾರೆ ಜೆಸಿ ಹರ್ಷಿತ್ ಗೌಡ ಇತ್ತೆರ್.

ಈ ಪೊರ್ತುಡು ಜೆಸಿಐದ ಕೋಶಾಧಿಕಾರಿ ಜೆಸಿ ವಿದ್ಯೆಂದ್ರ ಯಸ್, ಒತ್ತು ಗುರ್ಕಾರೆ ಜೆಸಿ ಪಿಟಿ ಸೆಬಾಸ್ಟಿನ್, ಜೆ ಸಿ ಎಚ್ ಜಿ ಎಫ್ ಜೋಸೆಫ್ ಪಿರೇರ, ಜೆ ಸಿ ವಿಜಯಚಂದ್ರ ಬಲ್ಕಾಜೆ, ಜೆಸಿ ವಿನ್ಸೆಂಟ್ ಸುವಾರಿಸ್, ಪಂಚಾಯತ್ ಸದಸ್ಯೆರ್ ಟಿ ಎಸ್ ನಿತ್ಯಾನಂದ ರೈ, ಅರಣ್ಯ ಸಮಿತಿ ಗುರ್ಕಾರೆ ಧನಂಜಯ ಗೌಡ, ಕ್ರೀಡಾ ಸಮಿತಿ ಗುರ್ಕಾರೆ ಹರೀಶ್ ಗೌಡ, ಪ್ರಗತಿಪರ ಕೃಷಿಕೆರ್ ಬಾಬುಗೌಡ ಬೊಕ್ಕ ಸದಸ್ಯೆರ್, ಕಲ್ಪಾರ್ಥಿಲು ಪಾಲ್ ಪಡೆದಿತ್ತೆರ್.

ಈ ಲೇಸ್ ನ್ ಜೆಸಿ ಎಚ್‌ ಜಿ ಎಫ್ ಜೋಸೆಫ್ ಪಿರೇರ ಸುಧಾರಿಕೆ ಮಲ್ತೆರ್. ಶಂಕರ್ ರಾವ್ ಮೆರೆನ ಪರಿಚಯನ್ ಜೆಸಿ ಹರ್ಷಿತ್ ಗೌಡ ತೆರಿಪಾಯೆರ್. ಪ್ರಿಯ ಜೆ ಅಮೀನ್ ಅಭಿಪ್ರಾಯ ಪಟ್ಟೊಂಡೆರ್. ಜೆಸಿ ವಾಣಿನ್ ಚಂದನ ಜೈನ್ ತೆರಿಪಾಯೆರ್. ಜೆಸಿ ಎಚ್ ಜಿ ಎಫ್ ಸಂತೋಷ್ ಜೈನ್ ಎದ್ಕೊನಿಯೆರ್. ಜೆಸಿ ಅಕ್ಷತ್ ರೈ ಸೊಲ್ಮೆ ಸಂದಾಯೆರ್.

ದಮ್ಮಾಮ್ ಡ್ ವಿಶ್ವ ಕನ್ನಡ ಸಂಸ್ಕೃತಿ ಸಮ್ಮೇಳನದ ಲೆಕ್ಕೊಡು ಕಬಿಗೋಷ್ಠಿ

ದಮ್ಮಾಮ್: 17ನೇ ವಿಶ್ವ ಕನ್ನಡ ಸಂಸ್ಕೃತಿ ಸಮ್ಮೇಳನದ ಲೆಕ್ಕೊಡು ದಮ್ಮಾನ್ ದ ಸಫಾಡ್ ಇಪ್ಪುನ ಅಲ್ ಹಿನಾಬಿಲ್ ಚಾವಡಿಡ್ ಇಂಚಿಪ್ಪ ಬಹುಭಾಷಾ ಕಬಿಗೋಷ್ಠಿ ಲೇಸ್ ಗೌಜಿಡ್ ನಡತ್ಂಡ್.

ಪುಗರ್ತೆದ ಕಬಿ ಹುಸೈನ್ ಕಾಟಿಪಳ್ಳ ಮೆರೆನ ಗುರ್ಕಾರ್ಮೆಡ್ ಈ ಲೇಸ್ ನಡತ್ಂಡ್. ಯಾಕೂಬ್ ಖಾದರ್ ಗುಲ್ವಾಡಿ, ಹಿರಿಯ ಪತ್ರಕರ್ತೆರ್ ಬಶೀರ್ ಅಹ್ಮದ್ ಕಿನ್ಯಾ, ಪ್ರಭಾ ಸುವರ್ಣ ಬೊಂಬೈ, ಶಮೀಮಾ ಕುತ್ತಾರ್, ರೈಹಾನ್ ವಿ.ಕೆ ಸಚ್ಚರಿಪೇಟೆ, ಫೌಝಿಯಾ ಹರ್ಷಾದ್, ಅನಿವಾಸಿ ಕಬಿ ಆರಿಫ್ ಜೋಕಟ್ಟೆ ಮೇರ್ ಕಬಿತೆ ಓದಿಯೆರ್.

ಲೇಸ್ ಡ್ ಸಮ್ಮೇಳನದ ಸ್ವಾಗತ ಸಮಿತಿ ಮಾನಾದಿಗೆದ ಗುರ್ಕಾರೆ ಝಕಾರಿಯಾ ಜೋಕಟ್ಟೆ, ಶೇಕ್ ಕರ್ನಿರೆ, ಶಾಸಕೆರ್ ಅಶೋಕ್ ರೈ, ಪ್ರಧಾನ ಕಾರ್ಯದರ್ಶಿ ರಫೀಕ್ ಸೂರಿಂಜೆ, ಖಜಾಂಚಿ ಅಝಾಝ್ ಕೈಕಂಬ, ಕೋ ಆರ್ಡಿನೇಟರ್ ಫಾರೂಕ್ ಪಾಲ್ ಪಡೆದಿತ್ತೆರ್.

ಬೊಕ್ಕ ಕುಡ್ಲದ ಪುಗರ್ತೆದ ಗಾಯಕೆರ್ ಸಮದ್ ಗಡಿಯಾರ, ಶಮೀರ್ ಮುಲ್ಕಿ, ಫಾಯಿಝ್ ಕಾಟಿಪಳ್ಳ ಪದ್ಯ ಪಂಡೆರ್.

ಫೆ.21: ತಿಬಾರ ಕೊಡಮಣಿತ್ತಾಯ ಕ್ಷೇತ್ರಡ್ ಪೊಸ ಕೊಡಿಮರ ಸ್ಥಾಪನೆ

ಸುರತ್ಕಲ್: ತಿಬಾರ್ ದ ಶ್ರೀ ಕೊಡಮಣಿತ್ತಾಯ ಕ್ಷೇತ್ರಡ್ ಪೊಸ ಕೊಡಿಮರ ಸ್ಥಾಪನೆದ ಲೇಸ್ ಫೆ.21 ಬುದಾರ ಮಧ್ಯಾಹ್ನ 12.21 ಕ್ಕ್ ನಡಪರೆ ಉಂಡು.

ಶಿಬರೂರು ವೇದವ್ಯಾಸ ತಂತ್ರಿಲೆನ ಪೌರೋಹಿತ್ಯಡ್ ಕಟೀಲ್ ದ ಅಸ್ರಣ್ಣ ಬಂಧುಲೆನ ಸಮಕ್ಷಮಡ್ ಪೊಸ ಕೊಡಿಮರ ಸ್ಥಾಪನೆ ಆಪುಂಡು.

ಶ್ರೀ ಕ್ಷೇತ್ರ ಕಟೀಲ್ ದ ಅನುವಂಶಿಕ ಪ್ರಧಾನ ಅರ್ಚಕೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣೆರ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್.

ಈ ಲೇಸ್ ಡ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಶಾಸಕೆರ್ ಉಮಾನಾಥ ಕೋಟ್ಯಾನ್, ಹರಿಕೃಷ್ಣ ಪುನರೂರು, ಅಭಯಚಂದ್ರ ಜೈನ್, ಐಕಳ ಹರೀಶ್ ಶೆಟ್ಟಿ, ಕನ್ಯಾನ ಸದಾಶಿವ ಶೆಟ್ಟಿ, ಶಶಿಧರ ಶೆಟ್ಟಿ ಬರೋಡಾ, ತೋನ್ಸೆ ಆನಂದ ಶೆಟ್ಟಿ, ಕೃಷ್ಣ ಜೆ ಪಾಲೇಮಾರ್, ಮಿಥುನ್ ರೈ, ಬೋಳ ಸುಬ್ಬಯ್ಯ ಶೆಟ್ಟಿ, ದಿವಾಕರ ಶೆಟ್ಟಿ ಕೊಂಜಾಲಗುತ್ತು, ರವಿ ಶೆಟ್ಟಿ ಸಾಯಿರಾಧ, ರಾಮಚಂದ್ರ ಶೆಟ್ಟಿ ಶಿಬರೂರು ಗುತ್ತು, ಸುಧಾಕರ ಎಸ್ ಪೂಂಜ, ಮನೋಜ್ ಸರಿಪಳ್ಳ, ಯದು ನಾರಾಯಣ ಶೆಟ್ಟಿ ಕೆದಿಂಜೆ ಪರಾರಿ, ಬಿವಂಡಿ ಸಂತೋಷ್ ಶೆಟ್ಟಿ, ಸಿಎ ಉದಯ ಕುಮಾರ್ ಶೆಟ್ಟಿ, ಕಿಶೋರ್ ಎಮ್ ಶೆಟ್ಟಿ ಶಿಬರೂರುಗುತ್ತು, ಅಂಕಿತ್ ಬನ್ಸಾಲ್, ಬಾಲಕೃಷ್ಣ ಕೊಟ್ಟಾರಿ, ಲೋಕೇಶ್ ಬೊಳ್ಳಾಜೆ, ಗೀತಾ ಎಸ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಶಿಬರೂರುಗುತ್ತು ಉಮೇಶ್ ಎನ್ ಶೆಟ್ಟಿ, ಎಸ್ ವಾಸುದೇವ ಶಿಬರಾಯೆರ್, ಹರ್ಷವರ್ಧನ್ ಎಸ್ ಜೆ, ಪುರಂದರ ಎಂ ಶೆಟ್ಟಿ, ಪ್ರಭಾಕರ ಶೆಟ್ಟಿ ಕೊಂಜಾಲುಗುತ್ತು ಈ ಲೇಸ್ ಗ್ ಬರಿಯೆರೆ ಉಲ್ಲೆರ್.

ಫೆ.21: ನಡಿಕುದ್ರು ಧರ್ಮದೈವ ಜಾರಂದಾಯ ದೈವೊಲ್ಯಡ್ ನೇಮ

ಮುಲ್ಕಿ: ಪೆಜಮಾಡಿ ಕೋಡಿದ ನಡಿಕುದ್ರು ಧರ್ಮದೈವ ಜಾರಂದಾಯ ದೈವೊಲ್ಯಡ್ ವರ್ಷಾಧಿದ ನೇಮ ಫೆ‌.21 ಬುದಾರ ನಡಪರೆ ಉಂಡು.

ಆನಿ ಬೊಲ್ಪುಗು ನವಕ ಕಲಶಾಭಿಷೇಕ, ನಾಗದೇವೆರೆಗ್ ಪೇರ್ ದ ಅಭಿಷೇಕ, ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ಭಂಡಾರ ಜಪ್ಪೆರೆ, ಅನ್ನ ಪ್ರಸಾದ ಸೇವೆ, ಮೈಸಂದಾಯ ನೇಮ, ಧರ್ಮದೈವ ಜಾರಂದಾಯ, ಬಂಟ ಪರಿವಾರ ದೈವೊಲೆನ ಗಡಿನಾಡು ನೇಮ ನಡಪರೆ ಉಂಡು.

ಫೆ.17 ಸನಿಯಾರ ಬೊಲ್ಪುಗು ಪಂಚಕಜ್ಜಾಯ ಸೇವೆ, ಶ್ರೀ ಜಾರಂದಾಯ ಸೇವಾ ಯುವಕ ವೃಂದದ 46ನೇ ಭಜನಾ ಮಂಗಳ ನಡತ್ಂಡ್.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು, ಶ್ರೀ ಧರ್ಮದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಅರ್ಚಕೆರ್ ಗಂಗೆ ಬೈದೆತಿ ನಟ್ಟಿ ಸಾನದಮನೆ, ನಡಿಕುದ್ರು ಗ್ರಾಮದ ಗುರಿಕಾರೆರ್, ಪತ್ತ್ ಸಮಸ್ತೆರ್, ಶ್ರೀ ಜಾರಂದಾಯ ಸೇವಾ ಸಮಿತಿ, ಶ್ರೀ ಜಾರಂದಾಯ ಸೇವಾ ಯುವಕ ವೃಂದ, ಮಹಿಳಾ ವೃಂದ ಲೆಪ್ಪೋಲೆಡ್ ತೆರಿಪಾದೆರ್.

ಕಾಸ್ರೋಡುಡ್ ಶಾಲೆಡ್ ತುಲು ಲಿಪಿ ಪರೀಕ್ಷೆ

ಕಾಸ್ರೋಡುಡ್ ಸುರುತ್ತ ಸರ್ತಿ ಶಾಲೆಡ್ ತುಲು ಲಿಪಿ ಕಲ್ಪಾದ್ ಬೊಕ್ಕ ತುಲು ಲಿಪಿ ಪರೀಕ್ಷೆನ್ ಮಲ್ತಿನ ಪುಗರ್ತೆ ಪೆರಡಾಲ ನೀರ್ಚಾಲು ಮಹಾಜನ ಸಂಸ್ಕೃತ ಕಾಲೇಜ್ ಗ್ ಸಂದ್ ದ್ಂಡ್.

ಜೈ ತುಲುನಾಡ್ (ರಿ.) ಸಂಘಟನೆ ಕಾಸ್ರೋಡು ವಲಯ ಸಮಿತಿ ಬೊಕ್ಕ ಕರ್ನಾಟಕ ತುಲು ಸಾಹಿತ್ಯ ಅಕಾಡೆಮಿದ ಒಟ್ಟುಸೇರಿಗೆಡ್ ಮಹಾಜನ ಸಂಸ್ಕೃತ ಕಾಲೇಜ್ ನೀರ್ಚಾಲು ಮುತಾಲಿಕೆಡ್ ಶಾಲೆದ ಜೋಕ್ಲೆಗ್ ತುಲು ಲಿಪಿ ಕಲಿಕಾ ಕಾರ್ಯಾಗಾರನ್ ಇಂಚಿಪ್ಪ ಸುರು ಮಲ್ದ್ಂಡ್.

ಸುಮಾರ್ ನಾಲ್ ತಿಂಗೊಲ್ ಕಲ್ತಿನ ಬೊಕ್ಕ ಕರಿನ ಸನಿಯಾರ ಫೆ.17 ಕ್ಕ್ ಜೋಕುಲು ಮಾಸ್ತ್ ಆಸಕ್ತಿರ್ದ್ ತುಲು ಲಿಪಿ ಪರೀಕ್ಷೆ ಬರೆಯೆರ್.

ಈ ಪೊರ್ತುಡು ಜೈ ತುಲುನಾಡ್ ಕಾಸ್ರೋಡು ವಲಯದ ಲಿಪಿ ಕಲ್ಪಾದಿ ವಿನೋದ ಪ್ರಸಾದ್ ರೈ ಕಾರಿಂಜ, ಕೇಂದ್ರ ಸಮಿತಿದ ತುಲು ಲಿಪಿ ಕಲಿಕಾ ಮೇಲ್ಪಿಚಾರಕೆರ್ ಪ್ರಶಾಂತ್ ಪೂಜಾರಿ ನಂದಳಿಕೆ, ಶಾಲೆದ ಮುಖ್ಯೋಪಾಧ್ಯಾಯೆರ್ ಶಿವಪ್ರಕಾಶ್ ಎಂ.ಕೆ. ಬೊಕ್ಕ ಶಿಕ್ಷಕಿ ಶೈಲಜಾ ಟೀಚರ್ ಪಾಲ್ ಪಡೆದಿತ್ತೆರ್.

ವೇಣೂರು ಮಹಾಮಸ್ತಕಾಭಿಷೇಕದ ನಿಲೆಟ್ಟ್ ಚಾರುಕೀರ್ತಿ ಭಟ್ಟಾರಕ ಸ್ವಾಮೀಜಿ ಸಮಾಲೋಚನೆ

ಉಜಿರೆ: ವೇಣೂರುಡು ಭಗವಾನ್ ಬಾಹುಬಲಿ ಸ್ವಾಮಿನ ಮೂರ್ತಿಗ್ ಫೆ.22 ರ್ದ್ ಮಾ.1 ಮುಟ್ಟ ಮಹಾಮಸ್ತಕಾಭಿಷೇಕ ನಡಪರೆ ಉಂಡು. ಈ ನಿಲೆಟ್ಟ್ ಬೆದ್ರ ಜೈನ ಮಠತ್ತ ಪೂಜ್ಯ ಚಾರುಕೀರ್ತಿ ಭಟ್ಟಾರಕ ಸ್ವಾಮೀಜಿ ಮೇರ್ ಫೆ‌.17 ಕ್ಕ್ ವೇಣೂರುದ ಯಾತ್ರಿನಿವಾಸಡ್ ಬೇತೆ ಬೇತೆ ಸಮಿತಿಲೆನೊಟ್ಟಿಗೆ ಸಮಾಲೋಚನೆ ನಡಪಾದ್ ಸಕಾಲಿಕ ಮಾರ್ಗದರ್ಶನ ಕೊರಿಯೆರ್. ಮಾತೆರೆನ ಸಹಕಾರಡ್ ಮಹಾಮಸ್ತಕಾಭಿಷೇಕ ಯಶಸ್ವಿಯಾದ್ ಧರ್ಮ ಬೆಳಗಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ಅಭಿಷೇಕ ಸಮಿತಿ, ಪೂಜಾ ಸಮಿತಿ, ಆಹಾರ ಸಮಿತಿ, ಮಹಿಳಾ ಸಮಿತಿ ಇಂಚ ಬೇತೆ ಬೇತೆ ಸಮಿತಿಲೆನೊಟ್ಟಿಗೆ ಸಮಾಲೋಚನೆ ನಡಪಾದ್ ಪೂಜ್ಯ ಸ್ವಾಮೀಜಿಲು ಸರಿಯಾಯಿನ ಮಾರ್ಗದರ್ಶನ ಕೊರಿಯೆರ್.

ಮಸ್ತಕಾಭಿಷೇಕಗ್ ಬೋಡಾಯಿನ ಪೂಜ್ಯ ದ್ರವ್ಯಲೆನ್ ಕೊಡುಗೆಯಾದ್ ಕೊರ್ನ ತುಮಕೂರುದ ಉದ್ಯಮಿ ರಾಜೇಂದ್ರ ಕುಮಾರ್ ಮೆರೆನ್ ಸ್ವಾಮೀಜಿ ಮೇರ್ ಮಾನಾದಿಗೆ ಕೊರ್ದು ಅಶೀರ್ವಾದ ಮಲ್ತೆರ್.

ಮಸ್ತಕಾಭಿಷೇಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಅಳದಂಗಡಿ ಅರಮನೆ ತಿಮ್ಮಣ್ಣರಸೆರ್ ಡಾ. ಪದ್ಮಪ್ರಸಾದ ಅಜಿಲ ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್.

ಈ ಪೊರ್ತುಡು ಸರ್ಕಾರದ ಮುತಾಲಿಕೆಡ್ ಮಾರ್ಗದರ್ಶಿ ಅಧಿಕಾರಿ ಬೆದ್ರದ ಮಾಣಿಕ್ಯೆ, ಎಂ. ಮಸ್ತಕಾಭಿಷೇಕ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪ್ರವೀಣ ಕುಮಾರ್ ಇಂದ್ರ, ಕೋಶಾಧಿಕಾರಿ ಜಯರಾಜ ಕಂಬಳಿ, ವಿಕಾಸ್ ಜೈನ್ ಪೆರಿಂಜೆ ಪಾಲ್ ಪಡೆದಿತ್ತೆರ್.

ಸಾಮೂಹಿಕ ಪಂಚ ನಮಸ್ಕಾರ ಮಂತ್ರ ಪಠಣದೊಟ್ಟಿಗೆ ಸುರು ಆಯಿನ ಸಭೆಟ್ಟ್ ಮಹಾವೀರ ಜೈನ್ ಮೂಡುಕೋಡಿಗುತ್ತು ಲೇಸ್ ದ ಸುಧಾರಿಕೆ ಮಲ್ತೆರ್.