Fri. Nov 20th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ದಿ.ಪ್ರವೀಣ್‌ ನೆಟ್ಟಾರ್ ನ ಬೊಡೆದಿನ್ ಬೇಲೆ ದೆತ್ತಿನ ಕಾಂಗ್ರೆಸ್ ಸರ್ಕಾರ

ಕುಡ್ಲ: ಸರ್ಕಾರ ಬದಲಾಯಿನ ಬೆರಿಕ್ಕೆ ಬಿಜೆಪಿ ಕಾರ್ಯಕರ್ತೆ ದಿ. ಪ್ರವೀಣ್‌ ನೆಟ್ಟಾರ್ ನ ಬೊಡೆದಿನ್ ಕಾಂಗ್ರೆಸ್ ಸರ್ಕಾರ ಬೇಲೆರ್ದ್ ದೈದ್ಂಡ್.

ಮುಖ್ಯಮಂತ್ರಿಲೆನ ಇಸೇಸ ಅಧಿಕಾರಡ್ ಸರ್ಕಾರಿ ಬೇಲೆಗ್ ತಾತ್ಕಾಲಿಕವಾದ್ ನೇಮಕ ಆದಿತ್ತಿನ ದಿ.ಪ್ರವೀಣ್‌ ನೆಟ್ಟಾರ್‌ ನ ಬೊಡೆದಿ ನೂತನ ಕುಮಾರಿ ಮೆರೆನ ನೇಮಕಾತಿನ್ ಸರ್ಕಾರ ರದ್ದು ಮಲ್ದ್ಂಡ್.

ಅತ್ತಂದೆ ಸರ್ಕಾರ ಬದಲಾನಗ ತಾತ್ಕಾಲಿಕ ನೇಮಕಾತಿ ಪೂರ ಸಹಜವಾದೇ ಬದಲಾಪುಂಡು. ತನನ್ ದುಂಬರಿಯೆರೆ ನೂತನ ಕುಮಾರಿ ಮೇರ್ ಕೇಂಡ ಅವೆನ್ ಸರ್ಕಾರಗ್ ಸಂದಾಯೆರೆ ಆಪುಂಡು ಪಂದ್ ಜಿಲ್ಲಾಧಿಕಾರಿ ರವಿಕುಮಾರ್ ಈ ಬಗೆಟ್ ತೆರಿಪಾದೆರ್.

“ಮಿಸ್ ಟೀನ್ ಇಂಡಿಯಾ 2023 ಸೂಪರ್ ಗ್ಲೋಬ್” ಫಸ್ಟ್ ರನ್ನರ್ ಅಪ್ ಪ್ರಶಸ್ತಿ ಗೆಂದಿನ ಕುಡ್ಲದ ಯಶಸ್ವಿನಿ ದೇವಾಡಿಗ

ಕುಡ್ಲ: ಹೈದರಾಬಾದ್‌ದ ಟೆಕ್ನಾಲಜಿ ಹಬ್‌ಡ್ ಮೇ 21 ತಾರೀಕ್‌ಗ್ ನಡತಿನ ಸೌಂದರ್ಯ ಪಂತೊಡು ಕುಡ್ಲದ ಯುವ ಬೊಕ್ಕ ಭರವಸೆದ ಮಾಡೆಲ್ ಯಶಸ್ವಿನಿ ದೇವಾಡಿಗ ಮೇರ್ “ಮಿಸ್ ಟೀನ್ ಇಂಡಿಯಾ 2023 ಸೂಪರ್ ಗ್ಲೋಬ್” ನೆತ್ತ ಫಸ್ಟ್ ರನ್ನರ್ ಅಪ್ ಪ್ರಶಸ್ತಿ ಗೆಂದ್‌ದೆರ್.

ಥಾಯ್ಲೆಂಡ್‌ಡ್ ನಡಪರೆ ಇಪ್ಪುನ ವಿಶ್ವ ಫೈನಲ್‌ಡ್ ಭಾರತದ ಪ್ರತಿನಿಧಿಯಾದ್ ಯಶಸ್ವಿನಿ ಆಯ್ಕೆ ಆತೆರ್.

ಈ ಬಗೆಟ್ ಕುಡ್ಲಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ಆರ್, ಹೈದರಾಬಾದ್‌ದ ಕೊಂಡಾಪುರದ ಇಸ್ಟೇ ಹೋಟೆಲ್‌ಡ್ ರಡ್ಡ್ ದಿನ ಗ್ರೂಮಿಂಗ್ ಸೆಷನ್ ನಡತ್ಂಡ್. ಯಂಕ್ಲೆನ ಪರಿಚಯ, ಪ್ರತಿಭೆ, ಸಂದರ್ಶನ, ತುತ್ತೈತ, ಗೌನ್ ಸುತ್ತು, ಪ್ರಶ್ನೋತ್ತರ ಇಂಚ ಆಜಿ ರೌಂಡ್‌ಲು ಇತ್ತ್ಂಡ್. ಮಿಸ್ಟರ್ ಬೊಕ್ಕ ಮಿಸ್ ಗ್ಲೋಬ್ ಜೂನಿಯರ್ ಮಾಡೆಲ್ ಇಂಟರ್‌ನ್ಯಾಶನಲ್ ಪನ್ಪಿನ ರಡ್ಡ್ ಪ್ರಶಸ್ತಿಗಾದ್ ಪಂತೊನು ನಡಪಾದಿತ್ತೆರ್. ರಾಜ್ಯದ ಬೇತೆ ಬೇತೆ ಕಡೆರ್ದ್ 50 ರ್ದ್ ಎಚ್ಚದ ಸ್ಪರ್ಧಿಲು ಪಾಲ್ ಪಡೆದಿತ್ತೆರ್. ಗೌನ್ ಸುತ್ತ್‌ರ್ದ್ ಬೊಕ್ಕ ಯಾನ್ “ಮಿಸ್ ಟೀನ್ ಇಂಡಿಯಾ 2023 ಸೂಪರ್ ಗ್ಲೋಬ್” ಪನ್ಪಿನ ಸುರುತ್ತ ರನ್ನರ್ ಅಪ್ ಪ್ರಶಸ್ತಿನ್ ಗೆಂದಿಯೆ.

ಯಾನ್ ಯನ್ನ ಮಿತ್ತ್ ನಂಬಿಕೆ ದೀದಿತ್ತೆ ಪ್ರಶಸ್ತಿನ್ ಪಡೆಪೆ ಪಂದ್ ಅಂಚನೆ ಯಂಕ್ ತರಬೇತಿ ಕೊರ್ದು ಯನ್ನಡ ಇತ್ತಿನ ಪ್ರತಿಭೆನ್ ಪಿದಯ್ ಕನಯಿನೆಕ್ಕ್ ಯಾನ್ ನಿರ್ದೇಶಕೆರ್ ನವೀನ್ ಬಿಲ್ಲವ ಮೇರೆಗ್ ಸೊಲ್ಮೆ ಸಂದೈತ ಮಲ್ಪುವೆ. ಅಂಚನೆ ಯಂಕ್ ಅವಕಾಶ ಕೊರಿನ ಅರುಣ್ ರತ್ನ ಮೆರೆಗ್ ಸದಾ ಚಿರಋಣಿಯಾದ್ ಇಪ್ಪುವೆ. ಯನ್ನ ಅಕ್ಕ ನಿಶ್ಮಿತಾ ಕುಳಾಯಿ ಅಂಚನೆ ಕುಟುಮದಕುಲು ಯಂಕ್ ಏಪಲಾ ಬೆರಿತಾಂಗ್ ಆದ್ ಇತ್ತೆರ್ ಪಂದ್ ಪಂಡೆರ್.

ಯಶಸ್ವಿನಿ ಮೇರ್ “ಫೇಸ್ ಆಫ್ ಕರ್ನಾಟಕ ೨೦೨೩ ಪನ್ಪಿನ ಸಬ್‌ಟೈಟಲ್‌ನ್ ಪಡೆತ್ತೆರ್. ಅಂಚನೆ ಎನ್ ಬಿ ಗ್ರೂಪ್ ಅಟ್ಟನೆ ಮಲ್ತಿನ “ಮಿಸ್ ಟೀನ್ ಮಂಗಳೂರು ೨೦೨೩” ಸುರುತ್ತ ರನ್ನರ್ ಅಪ್ ಪ್ರಶಸ್ತಿನ್ ಗೆಂದ್‌ದೆರ್.

ಯಶಸ್ವಿನಿ ದೇವಾಡಿಗ ಮೇರ್ ಕುಡ್ಲದ ದೇವದಾಸ್ ಕುಳಾಯಿ ಬೊಕ್ಕ ಮೀನಾಕ್ಷಿ ದೇವದಾಸ್ ದಂಪತಿಲೆನ ಮಗಲ್. ಇತ್ತೆ ಸುರತ್ಕಲ್‌ ಗೋವಿಂದ ದಾಸ ಪದವಿ ಪೂರ್ವ ಕಾಲೇಜಿಡ್ ದ್ವಿತೀಯ ಪಿಯುಸಿನ್ ಕಲ್ತೊಂದುಲ್ಲೆರ್.

ಪತ್ರಿಕಾಗೋಷ್ಠಿಡ್ ನಿಶ್ಮಿತಾ ಕುಳಾಯಿ ಬೊಕ್ಕ ಮೀನಾಕ್ಷಿ ಕುಳಾಯಿ ಇತ್ತೆರ್.

ಯಕ್ಷಧ್ರುವ ಪಟ್ಲ ಸಂಭ್ರಮದ ನಿಲೆಟ್ಟ್ ಹೈಸ್ಕೂಲ್ ಬೊಕ್ಕ ಕಾಲೇಜ್ ವಿದ್ಯಾರ್ಥಿಲೆಗ್ ಯಕ್ಷಗಾನ ಪಂತ ಉದಿಪನ ಭಾರತದ ರಂಗಭೂಮಿಡ್ ಯಕ್ಷಗಾನ ಮಲ್ಲ ಪೆರ್ಮೆದ ಕಲೆ: ಪ್ರಭಾಕರ ಜೋಷಿ

ಕುಡ್ಲ: ಭಾರತದ ರಂಗಭೂಮಿಡ್ ಯಕ್ಷಗಾನ ಭಾರಿ ಮಲ್ಲ ಪೆರ್ಮೆದ ಕಲೆ ಆದ್ ಪುಗರ್ತೆ ಪಡೆತ್ಂಡ್. ಸಂಶೋಧನೆದ ಮುಕೇನ ತೂಂಡಲ ಯಕ್ಷಗಾನ ವಿಶ್ವಪ್ರಸಿದ್ಧಿ ಪಡೆತಿನ ಕಲೆಯಾದುಂಡು. ಈ ಕಲೆನ್ ಬುಲೆಪಾದ್ ಒರಿಪಾವುನ ವಿಚಾರೊಡು ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಮಲ್ಲ ಸಾಧನೆ ಮಲ್ದ್ಂಡ್ ಪಂದ್ ಪೆರಿಯ ಯಕ್ಷಗಾನ ವಿದ್ವಾಂಸೆರ್ ಪ್ರಭಾಕರ ಜೋಷಿ ತೆರಿಪಾಯೆರ್.

ಅಡ್ಯಾರ್ ಗಾರ್ಡನ್ ಡ್ ಯಕ್ಷಧ್ರುವ ಪಟ್ಲ ಸಂಭ್ರಮ 2023 ತ್ತ ಹೈಸ್ಕೂಲ್ ಬೊಕ್ಕ ಕಾಲೇಜು ವಿದ್ಯಾರ್ಥಿಲೆನ ಯಕ್ಷಗಾನ ಪಂತೊನು ಉದಿಪನ ಮಲ್ತ್ ದ್ ಆರ್ ಪಾತೆರಿಯೆರ್.

ಪ್ರಾಸ್ತಾವಿಕವಾದ್ ಪಾತೆರ್ನ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ ಶೆಟ್ರ್, ಯಕ್ಷಗಾನದ ಪರಂಪರೆದ ಪೊರ್ಲುನು ಒರಿಪುನ ಪ್ರಯತ್ನನೇ ಯಕ್ಷಗಾನ ಸ್ಪರ್ಧೆ ಮಲ್ಪುನ ಉದ್ದೇಶ ಪಂಡೆರ್.

ಲೇಸ್ ಡ್ ಮಲ್ಲ ಬಿನ್ನೆರಾದ್ ಕಲ್ಕೂರ ಪ್ರತಿಷ್ಠಾನದ ಸ್ಥಾಪಕಾಧ್ಯಕ್ಷೆರ್ ಪ್ರದೀಪ್ ಕುಮಾರ್ ಕಲ್ಕೂರ, ಮಹೇಶ್ ಮೋಟರ್ಸ್ ಮಾಲಕೆರ್ ಜಯರಾಮ ಶೇಖ, ಬಹರೈನ್ – ಸೌದಿ ಘಟಕದ ಅಧ್ಯಕ್ಷೆರ್ ವಿ ರಾಜೇಶ್ ಶೆಟ್ಟಿ ಇತ್ತೆರ್.

ಟ್ರಸ್ಟ್ ನ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್ ಸ್ವಾಗತ ಮಲ್ತೆರ್. ಸಂಘಟನಾ ಕಾರ್ಯದರ್ಶಿ ಕದ್ರಿ ನವನೀತ ಶೆಟ್ಟಿ ಲೇಸ್ ಸುಧಾರಿಕೆ ಮಲ್ತೆರ್.
ಕುಂಬಳೆ ಸುಂದರ ರಾವ್ ವೇದಿಕೆಡ್ ಹೈಸ್ಕೂಲ್ ವಿದ್ಯಾರ್ಥಿಲೆಗ್ ಯಕ್ಷಗಾನ ಬಯಲಾಟ ಸ್ಪರ್ಧೆ ನಡತ್ಂಡ, ಡಾ. ಪುತ್ತೂರು ಶ್ರೀಧರ ಭಂಡಾರಿ ವೇದಿಕೆಡ್ ಕಾಲೇಜು ವಿದ್ಯಾರ್ಥಿಲೆನ ಯಕ್ಷಗಾನ ಬಯಲಾಟ ಪಂತ ನಡತ್ಂಡ್.

ತೀರ್ಪುಗಾರೆರಾದ್ ವಾಟೆಪಡ್ಪು ವಿಷ್ಣು ಶರ್ಮ, ದಿವಿತ್ ಕೋಟ್ಯಾನ್, ಆರತಿ ಪಟ್ರಮೆ, ಕೃಷ್ಣ ಪ್ರಕಾಶ ಉಳಿತ್ತಾಯ ,ಉಬರಡ್ಕ ಉಮೇಶ್ ಶೆಟ್ಟಿ, ಸಂಜಯ್ ಕುಮಾರ್ ಗೋಣಿಬೀಡು ಸಹಕಾರ ಕೊರಿಯೆರ್.

24 ministers from the Congress party to take oath today in the newly formed ministry ಇನಿ ಪ್ರಮಾಣ ವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್ 24 ಸಚಿವೆರ್

ಬೆಂಗ್ಲೂರ್: ಕರ್ನಾಟಕಡ್ ಅಧಿಕಾರಗ್ ಬತ್ತಿನ ಕಾಂಗ್ರೆಸ್ ಕೋಡೆ 24 ಸಚಿವೆರೆನ ಪಟ್ಟಿನ್ ಬುಡುಗಡೆ ಮಲ್ದ್ಂಡ್.

ಮೊಕುಲು ಇನಿ ಸಚಿವೆರಾದ್ ರಾಜಭವನಡ್ ಪ್ರಮಾಣ ವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್ ಪಂದ್ ಪಕ್ಷದ ನಾಯಕೆರ್ ತೆರಿಪಾದೆರ್.

24 ಸಚಿವೆರೆನ ಪಟ್ಟಿ :
1. ಈಶ್ವರ ಖಂಡ್ರೆ ಭಾಲ್ಕಿ (ಲಿಂಗಾಯಿತ)
2.ಲಕ್ಷ್ಮಿ ಹೆಬ್ಬಾಳಕರ್ ಬೆಳಗಾವಿ ಗ್ರಾ. (ಲಿಂಗಾಯಿತ)
3. ಶಿವಾನಂದ ಪಾಟೀಲ್ ಬಸವನ ಬಾಗೇವಾಡಿ (ಲಿಂಗಾಯಿತ)
4.ಶರಣಬಸಪ್ಪ ದರ್ಶನಾಪುರ ಶಹಾಪುರ (ಲಿಂಗಾಯಿತ)
5.ಡಾ.ಎಚ್.ಸಿ ಮಹಾದೇವಪ್ಪ ಟಿ. ನರಸೀಪುರ (ಎಸ್ ಸಿ)
6.ಕೆ. ವೆಂಕಟೇಶ್ ಪಿರಿಯಾಪಟ್ಟಣ (ಕುರುಬ)
7.ಎಸ್ ಎಸ್ ಮಲ್ಲಿಕಾರ್ಜುನ ದಾವಣಗೆರೆ ಉ (ಲಿಂಗಾಯಿತ)
8.ಬೈರತಿ ಸುರೇಶ್ ಹೆಬ್ಬಾಳ (ಕುರುಬ)
9.ಕೃಷ್ಣ ಬೈರೇಗೌಡ ಬ್ಯಾಟರಾಯನಪುರ (ಒಕ್ಕಲಿಗ)
10.ರಹೀಂ ಖಾನ್ ಬೀದರ್ ಉತ್ತರ (ಮುಸ್ಲಿಂ)
11.ಪುಟ್ಟರಂಗ ಶೆಟ್ಟಿ ಚಾಮರಾಜನಗರ (ಉಪ್ಪಾರ)
12.ಸುಧಾಕರ್ ಚಿಂತಾಮಣಿ (ಒಕ್ಕಲಿಗ)
13.ಎಚ್ ಕೆ ಪಾಟೀಲ್ ಗದಗ (ಲಿಂಗಾಯಿತ)
14.ಚೆಲುವರಾಯಸ್ವಾಮಿ ನಾಗಮಂಗಲ (ಒಕ್ಕಲಿಗ)
15.ಕೆ.ಎಸ್ ರಾಜಣ್ಣ ಮಧುಗಿರಿ (ಎಸ್ ಟಿ)
16.ಸಂತೋಷ್ ಲಾಡ್ ಕಲಘಟಗಿ (ಮರಾಠ)
17.ಮಧು ಬಂಗಾರಪ್ಪ ಸೊರಬ (ಈಡಿಗ)
18.ಮಾಂಕಾಳ ವೈದ್ಯ ಭಟ್ಕಳ (ಒಬಿಸಿ)
19.ಶಿವರಾಜ ತಂಗಡಗಿ ಕನಕಗಿರಿ (ಎಸ್ ಸಿ)
20.ಆರ್ ಬಿ. ತಿಮ್ಮಾಪುರ ಮುಧೋಳ (ಎಸ್ ಸಿ)
21.ರುದ್ರಪ್ಪ ಲಮಾಣಿ ಹಾವೇರಿ (ಎಸ್ ಸಿ)
22. ಶರಣ ಪ್ರಕಾಶ್ ಪಾಟೀಲ್ ಸೇಡಂ (ಲಿಂಗಾಯಿತ)
23.ಎನ್ ಎಸ್ ಭೋಸರಾಜು ಮಾನ್ವಿ (ಎಸ್ ಟಿ)
24. ಬಿ ನಾಗೇಂದ್ರ ಬಳ್ಳಾರಿ ಗ್ರಾ. (ಎಸ್ ಟಿ).

“Find a permanent solution to the water problem in Kotekar Nettila area” – Yogesh Shetty Jeppu ಕೋಟೆಕಾರ್ ನೆತ್ತಿಲ ಪ್ರದೇಶಡ್ ನೀರ್ ದ ತೊಂದರೆಗ್ ಶಾಶ್ವತ ಪರಿಹಾರ ಮಲ್ಪುಲೆ : ಯೋಗೀಶ್‌ ಶೆಟ್ಟಿ ಜಪ್ಪು

ಉಳ್ಳಾಲ ಕೋಟೆಕಾರ್ ನೆತ್ತಿಲ ಪರಿಸರದ ವ್ಯಾಪ್ತಿಡ್ ನೀರ್ ದ ಸಮಸ್ಯೆಗ್ ಶಾಶ್ವತ ಪರಿಹಾರ ಒದಗಿಸಾವೊಡು ಪಂದ್ ಕೋಟೆಕಾರ್ ಪಟ್ಟಣ ಪಂಚಾಯತ್‌ ಎದುರು ಭಾಗಡ್ ಕೋಟೆಕಾರ್ ಪರಿಸರದ ನಾಗರಿಕೆರ್ ಬೊಕ್ಕ ತುಳುನಾಡ ರಕ್ಷಣಾ ವೇದಿಕೆ ಕಾರ್ಯಕರ್ತೆರ್ ನೀರ್ ದ ಖಾಲಿ ಕೊಡಪಾನನ್ ದೀದ್ ಪೊರ್ಂಬಾಟ ಮಲ್ತೆರ್.

ಈ ಪೊರ್ತುಡು ಪಾತೆರಿನ ತುಳುನಾಡ ರಕ್ಷಣಾ ವೇದಿಕೆ ಸ್ಥಾಪಕಾಧ್ಯಕ್ಷೆರ್ ಯೋಗೀಶ್‌ ಶೆಟ್ಟಿ ಜಪ್ಪು, ನೀರ್ ಪ್ರಕೃತಿದ ನೈಸರ್ಗಿಕ ಕೊಡುಗೆಡ್ ಪ್ರಮುಖ ಆಂಡ್. ಆಯಿನೇರ್ದ್ ಆಯಿತ್ತ ಸದ್ಬಳಕೆ ಇತ್ತೆದ ಕಾಲಘಟ್ಟಡ್ ಮಸ್ತ್ ಅವಶ್ಯಕ ಆತ್ಂಡ್. ಕೋಟೆಕಾರ್ ನೆತ್ತಿಲ ಪ್ರದೇಶ ಉಳ್ಳಾಲ ತಾಲೂಕ್ ದ ಮಸ್ತ್ ವೇಗವಾದ್ ಬುಲೆವೊಂದು ಇಪ್ಪುನ ಪ್ರದೇಶಡ್ ಒಂಜಿ. ಮುಲ್ಪ ಖಾಸಗಿ ಬಡಾವಣೆಲು ನಿರ್ಮಾಣ ಆತ್ಂಡ್. ಬೊಕ್ಕ ಎಲ್ಯ ಗಾತ್ರದ ಕೈಗಾರಿಕೆಲು ನಡತೊಂದುಂಡು. ಸಹಜವಾದ್ ಅರೆಗಲಡ್ ಮಾರ್ಚ್ ತಿಂಗೊಲ್ ರ್ದ್ ಮುಲ್ಪ ನೀರ್ ಗಾದ್ ಜನಕುಲು ಕಷ್ಟ ಅನುಭವಿಸಾವೊಂದುಲ್ಲೆರ್.ಅಯಿಟ್ ಕರಿನ ಕೆಲವು ವರ್ಷೊದಿಂಚ ಇಲ್ಲದ ಗುವೆಲ್ ಲು ಅರೆಗಲಡ್ ನೀರ್ ಇಜ್ಜಂದೆ ಆಜಿದ್ ಪೋವೊಂದು ಇಪ್ಪುನವೇ ಪೋಡಿಗೆದ ಇಸಯ. ಜನಕುಲು ತನ್ನ ಮೂಲಭೂತ ಅವಶ್ಯಕತೆ ಆಯಿನ ಶೌಚಾಲಯ ಬೊಕ್ಕ ಅಟಿಲ್ದ ಬೇಲೆಗ್ ನೀರ್ ಇಜ್ಜಂದೆ ಬಂಗ ಬರೊಂದುಲ್ಲೆರ್. ಕೋಟೆಕಾರ್ ಪಟ್ಟಣ ಪಂಚಾಯತ್‌ ರ್ದ್ 2 ಅತ್ತಂಡ 3 ದಿನಕ್ಕ್ ಟ್ಯಾಂಕರ್ ಮುಖೇನ ನೀರ್ ಸರಬರಾಜು ಮಲ್ಪುವೆರ್. ಆಂಡ ಅವು ಲೆಕ್ಕಗ್ ಇಜ್ಜಿ ಪನ್ಪುಲೆಕ್ಕ ಆತ್ಂಡ್.

ಎಲ್ಯ ಕೈಗಾರಿಕೆಲೆಗ್ ನೀರ್ ಕೊರೊಡಾಯಿನರ್ದಾವರ ಇಲ್ಲ್ ಗ್ ನೀರ್ ಪೂರೈಕೆ ಕಷ್ಟ ಆತ್ಂಡ್. ಕುಡ್ಲ ಪೇಂಟೆಗ್ ತುಂಬೆ ವೆಂಟಡ್‌ಡ್ಯಾಂ ಮುಖೇನ ಅರೆಗಲೊಡು ನೀರ್ ಸರಬರಾಜು ಮಲ್ಪೆರೆ ಆಪುಂಡು. ಆಂಡ ಹೊರವಲಯಡ್ ಇಪ್ಪುನ ನೆತ್ತಿಲ ಕೋಟೆಕಾರ್ ಪ್ರದೇಶದ ಜನಕುಲು ಈ ಸೌಲಭ್ಯರ್ದ್ ವಂಚಿತೆರಾತೆರ್. ಕೋಟೆಕಾರ್ ನೆತ್ತಿಲ ಪ್ರದೇಶದ ಜನಕುಲು ಆಸ್ತಿ ತೆರಿಗೆ ಸೇರಿನಂಚೆನೆ ಬೇತೆ ಬೇತೆ ತೆರಿಗೆನ್ ಕೈತಲ್ ದ ಪಂಚಾಯಿತಿಗ್ ಪಾವತಿ ಮಲ್ತಿರ್ನೆದಾವೆರ ವರ್ಷ ಇಡೀ ನೀರು ಪೂರೈಕೆ ಮಲ್ಪುನೇ ಪಟ್ಟಣ ಪಂಚಾಯತ್‌ ಕರ್ತವ್ಯ ಪನ್ಪುನವು ಹಕ್ಕೊತ್ತಾಯ ಆತ್ಂಡ್ ಪಂಡೆರ್.

“ಬೋಡೇ ಬೋಡೇ ನೀರ್ ಬೋಡು” ‌”ಒದಗಿಸಲೇ ಒದಗಿಸಾಲೇ ಮೂಲ ಸೌಕರ್ಯ ಒದಗಿಸಾಲೇ” ಪಂದ್ ಘೋಷಣೆ ಪಾಡಿಯೆರ್. ಕೋಟೆಕಾರ್ ಪಟ್ಟಣ ಪಂಚಾಯತ್ ಮುಖ್ಯಾಧಿಕಾರಿ ತುಕರಾಮ್ ಮೇರ್ ಬಿನ್ನಾಪುದ ಓಲೆನ್ ದೆತೊಂಡೆರ್.

The 28 th annual Paniyadi Kadambari Awards presentation tomorrow ಒಡಿಪುಡು ಎಲ್ಲೆ ಪಣಿಯಾಡಿ ಕಾದಂಬರಿ ಪ್ರಶಸ್ತಿ ಕೊರ್ಪಿನ ಲೇಸ್

ಒಡಿಪು: ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಒಟ್ಟುಸೇರಿಗೆಡ್ 28ನೇ ವರ್ಷೊದ ಪಣಿಯಾಡಿ ಕಾದಂಬರಿ ಪ್ರಶಸ್ತಿ ಕೊರ್ಪಿನ ಲೇಸ್ ಮೇ28 ಐತಾರ ಬಯ್ಯಗ್ 4 ಗಂಟೆಗ್ ಒಡಿಪು ಕಿದಿಯೂರ್ ಹೋಟೆಲ್ ದ ಪವನ್ ರೂಫ್ ಟಾಪ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಒಡಿಪು ತುಳುಕೂಟ (ರಿ.)ದ ಗುರ್ಕಾರ್ಲು ಬಿ ಜಯಕರ ಶೆಟ್ಟಿ ಇಂದ್ರಾಳಿ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಒಡಿಪು ಕ್ಷೇತ್ರದ ಶಾಸಕೆರ್ ಯಶ್ ಪಾಲ್ ಸುವರ್ಣ, ರಾಜ್ಯಪ್ರಶಸ್ತಿ ಗೆಂದಿನ ಚಲನಚಿತ್ರ ನಟಿ ಹರಿಣಿ, ಒಡಿಪು ಕನ್ನಡ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕೆರ್ ಪೂರ್ಣಿಮಾ, ಉದ್ಯಮಿ ಬೊಕ್ಕ ಸಮಾಜಸೇವಕೆರ್ ಯು.‌ ವಿಶ್ವನಾಥ ಶೆಣೈ ಬರಿಯೆರೆ ಉಲ್ಲೆರ್. ಅಂಚೆನೆ ಕನ್ನಡ ತುಳು ಸಾಹಿತಿ ಯಶೋದಾ ಮೋಹನ್ ಮೇರ್ ಬರೆಯಿನ “ದೇರಮಾಮುನ ದೂರನೋಟೊಲು” ಪನ್ಪಿನ ಬೂಕುಗು ಪಣಿಯಾಡಿ ಕಾದಂಬರಿ ಪ್ರಶಸ್ತಿ-2022 ನ್ ಗೆಂದ್ ದ್ಂಡ್.

ಈ ಬೂಕುನು ಜಾನಪದ ವಿದ್ವಾಂಸೆರ್, ನಿವೃತ್ತ ಪ್ರಾಂಶುಪಾಲೆರ್ ಡಾ. ಗಣನಾಥ ಎಕ್ಕಾರ್ ಪರಿಚಯ ಮಲ್ಪುವೆರ್. ಈ ಲೇಸ್ ಗ್ ನಿಕ್ಲೆನ್ ಮಾತೆರೆನ್ಲಾ ಸ್ಥಾಪಕ ಗುರ್ಕಾರ್ಲು ಡಾ. ಭಾಸ್ಕರಾನಂದ ಕುಮಾರ್, ಗುರಿಕಾರೆ ಬಿ ಜಯಕರ ಶೆಟ್ಟಿ ಇಂದ್ರಾಳಿ, ಪ್ರಧಾನ ಕಾರ್ಯಂತೆರ್ ಗಂಗಾಧರ ಕಿದಿಯೂರ್, ಪಣಿಯಾಡಿ ಕಾದಂಬರಿ ಪ್ರಶಸ್ತಿ ಸಮಿತಿದ ಸಂಚಾಲಕೆರ್ ಶಿಲ್ಪಾ ಜೋಶಿ, ಪನವುದ ಪಾಲವೆರ್ ಚೈತನ್ಯ ಎಮ್.ಜಿ ಬೊಕ್ಕ ಸರ್ವಸದಸ್ಯೆರ್ ಎದ್ಕೊಂದೆರ್.

Senior Congress leader resigns ಪೆರಿಯ ಕಾಂಗ್ರೆಸ್ ನಾಯಕೆ ರಾಜೀನಾಮೆ?

ಪೊಸ ಸಚಿವೆರೆನ ಪಟ್ಟಿ ಬುಡುಗಡೆ ಆವೊಂದಿತ್ತಿಲೆಕ್ಕನೇ ಕಾಂಗ್ರೆಸ್ ಪೆರಿಯ ನಾಯಕೆ ಬೊಕ್ಕ ಪರಿಷತ್ ಪಕ್ಷದ ನಾಯಕೆ ಬಿಕೆ ಹರಿಪ್ರಸಾದ್ ಗ್ ಮಂತ್ರಿ ತಾನ ತಿಕ್ಕಂದಿನ ನಿಲೆಟ್ಟ್ ಮೇರ್ ವಿಪಕ್ಷ ಬೊಕ್ಕ MLC ತಾನಗ್ ರಾಜೀನಾಮೆ ಕೊರ್ಪಿನ ಮಲ್ಲ ನಿರ್ಧಾರನ್ ದೆತೊಂದೆರ್ ಪಂದ್ ವರದಿ ಆತ್ಂಡ್.

ದ.ಕ ಮೂಲದ ಹರಿಪ್ರಸಾದ್ ಗ್ ಸುರುತ್ತ ಪಟ್ಟಿಡೇ ಸಚಿವ ತಾನ ತಿಕ್ಕುನ ನಿರೀಕ್ಷೆ ಇತ್ಂಡ್. ಬಿಲ್ಲವ ಸಮುದಾಯದ ಸ್ವಾಮೀಜಿಲ ಮೆರೆಗ್ ಮಂತ್ರಿ ತಾನ ಕೊರಿಯೆರೆ ಒತ್ತಾಯ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.

Senior Congress leader resigns

Senior Congress leader B K Hariprasad resigns in the backdrop of the list of ministerial candidates being released. His name has not been included in the list of ministers.

May 28 th : The new Parliament House to be inaugurated ಮೇ28: ಪೊಸ ಸಂಸತ್ ಭವನ ಉದಿಪನ

ಪೊಸ ಸಂಸತ್ ಭವನದ ಉದಿಪನ ಮೇ28 ಐತಾರ ನಡಪರೆ ಉಂಡು. ‌

ನೆತ್ತ ಉದಿಪನನ್ ಪ್ರಧಾನಿ ಮೋದಿ ಮಲ್ಪೆರೆ ಉಲ್ಲೆರ್. ‌ಆನಿ ಬೊಲ್ಪುಗು 7:30ಕ್ಕ್ ಪೂಜೆ ಬೊಕ್ಕ ಹವನ ನಡಪರೆ ಉಂಡು. 8:30-9 ಗಂಟೆ ಮುಟ್ಟ ಸೆಂಗೋಲ್ ನ್ ನೋಟ ಸಭೆಟ್ಟ್ ದೀಯೆರೆ ಉಂಡು. 9:30ಕ್ಕ್ ಸಂಸತ್ ದ ಲಾಬಿಡ್ ಸರ್ವಧರ್ಮ ಪ್ರಾರ್ತನೆ ಮಲ್ಪೆರೆ ಉಂಡು.

12 ಗಂಟೆಗ್ ಸಂಸತ್ ದ 2 ಕಿರುಚಿತ್ರದ ಪ್ರದರ್ಶನ ಆದ್ ಭಾಷಣಲು ನಡಪರೆ ಉಂಡು. ಬೊಕ್ಕ ಮಧ್ಯಾಹ್ನ 1 ಗಂಟೆಗ್ ಇಸೇಸವಾದ್ 75 ರೂ. ದ ಪಾವೊಲಿ ಬೊಕ್ಕ ಅಂಚೆಚೀಟಿ ಬುಡುಗಡೆ ಅವೆರೆ ಉಂಡು. ಅವೆರ್ದ್ ಬೊಕ್ಕ 1:10ಕ್ಕ್ ಪ್ರಧಾನಿ ಮೋದಿ ಭಾಷಣ ಮಲ್ಪೆರೆ ಉಲ್ಲೆರ್.

May 28 th : The new Parliament House to be inaugurated

The new Parliament House will be inaugurated on Sunday the 28 th of May.

The inauguration honours will be done by PM Narendra Modi. The Senagol will be installed. A special rupees 75 denomination coin and a postage stamp will also be released

ಬೊಲ್ತೇರ್: ಹರೀಶ್ ಪೂಂಜೆರ್‍ನ ಬಗೆಟ್ ಪ್ರಚಾರ, ಗ್ರಾಮ ಪಂಚಾಯತ್ ಸಿಬ್ಬಂದಿ ಅಮಾನತು

ಬೊಲ್ತೇರ್: ವೋಟುದ ಪ್ರಚಾರ ಅಂಚನೆ ಬಿಜೆಪಿ ಶಾಸಕೆರ್ ಹರೀಶ್ ಪೂಂಜಾ ವಿಜಯೋಚ್ಚಯದ ಲೆಕ್ಕೊಡು ಪಾಲ್ ಪಡೆಯಿನ ಆರೋಪದ ಮಿತ್ತ್ ಉಜಿರೆ ಗ್ರಾಮ ಪಂಚಾಯತ್ ಸಿಬ್ಬಂದಿನ್ ಸೇವೆರ್ದ್ ಅಮಾನತು ಮಲ್ತ್‌ದೆರ್.

ಗ್ರಾಮ ಪಂಚಾಯತ್ ಸಿಬ್ಬಂದಿ ನಾಗೇಶ್ ಪನ್ಪಿನರೆನ್ ಅಮಾನತು ಮಲ್ತ್‌ದ್ ಉಜಿರೆ ಪಂಚಾಯತ್ ಪಿಡಿಒ ಪ್ರಕಾಶ್ ಶೆಟ್ಟಿ ಆದೇಶ ಮಲ್ತ್‌ದೆರ್.

ಸರ್ಕಾರಿ ಬೇಲೆಡ್ ಇಪ್ಪುನಕುಲು ಒವ್ವೇ ರಾಜಕೀಯ ಪಕ್ಷದ ಪರವಾದ್ ಪೋಯರೆ ಬಲ್ಲಿ ಪಂದ್ ನಿಯಮ ಇತ್ತ್ಂಡಲ ಅವೆನ್ ಮೀರ್ದ್ ಬಿಜೆಪಿ ಪಕ್ಷದ ಅಭ್ಯರ್ಥಿಯ ಪರವಾದ್ ಮತಯಾಚನೆ ಬೊಕ್ಕ ವಿಜಯೋಚ್ಚಯಡ್ ಪಾಲ್ ಪಡೆಯಿನೆಕ್ಕ್ ಈ ಕ್ರಮ ದೆತೊಂದೆರ್.

Little Flower School Puttur- closing ceremony of ‘ Kalarava’ summer camp held ಲಿಟ್ಲ್ ಫ್ಲವರ್ ಶಾಲೆಡ್ ಕಲರವ ಜೋಕುಲೆನ ಬೇಸಿಗೆ ಶಿಬಿರದ ಸಮಾರೋಪ ಲೇಸ್

ಪುತ್ತೂರ್: ದರ್ಬೆಡ್ ಇಪ್ಪುನ ಮೇಘ ಕಲಾ ಆರ್ಟ್ಸ್ ಮೇಘ ಡಾನ್ಸ್ ಸ್ಟುಡಿಯೋ ಬೊಕ್ಕ ಮುರಳಿ ಬ್ರದರ್ಸ್ ಡಾನ್ಸ್ ಕ್ರೂ ಪುತ್ತೂರ್ ನೆತ್ತ ಒಟ್ಟುಸೇರಿಗೆಡ್ 7 ದಿನತ್ತ ಕಾಲ ದರ್ಬೆ ಲಿಟ್ಲ್ ಫ್ಲವರ್ ಶಾಲೆಡ್ ನಡತಿನ `ಕಲರವ’ ಜೋಕುಲೆನ ಬೇಸಿಗೆ ಶಿಬಿರದ, ಸಮಾರೋಪ ಸಮಾರಂಭ ಲೇಸ್ ಮೇ.20ಕ್ಕ್ ನಡತ್ಂಡ್.

ಈ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತಿನ ನಗರ ಠಾಣೆದ ಎಸ್.ಐ ಸರಸ್ವತಿ ಪಾತೆರ್ದ್, ಸಾಮಾಜಿಕ ಜಾಲತಾಣದ ಸಾಧಕ, ಬಾಧಕದ ಬಗ್ಗೆ ವಿವರಿಸಾಯಿನ ಮೇರ್ ಜೋಕುಲೆಡ ಮೊಬೈಲ್ ಗಲಸುನ ಬಗ್ಗೆ ಪೋಷಕೆರ್ ಮುಂಜಾಗ್ರತೆ ದೆತೊನೊಡು ಪಂದ್ ಪಂಡೆರ್.

ಬೊಕ್ಕ ಲೇಸ್ ದ ಸಂಪನ್ಮೂಲ ವ್ಯಕ್ತಿ ಚೇತನಾ ಹಾಸ್ಪಿಟಲ್ ದ ವೈದ್ಯೆರ್ ಡಾ.ಜೆ.ಸಿ ಅಡಿಗ ಪಾತೆರ್ದ್, ಡಾನ್ಸ್ ಸಂಗೀತರ್ದ್ ಪ್ರತಿಯೊರಿನ ಆರೋಗ್ಯನ್ ಕಾಪಾಡೊಲಿ. ಆರೋಗ್ಯ ರಕ್ಷಣೆನೇ ಪ್ರಾಮುಖ್ಯವಾಯಿನವು. ಸಕ್ಕರೆ ಸೀಕ್ ನ್ ಆಯಿನಾತ್ ನಿಯಂತ್ರಣಡ್ ದೀವೊಲಿ ಪಂದ್ ಪಂಡೆರ್.

ಸಮ್ಮರ್ ಕ್ಯಾಂಪ್‌ದ ಸಂಪನ್ಮೂಲ ವ್ಯಕ್ತಿ ದಿನೇಶ್ ರೈ ಕಡಬ ಪಾತೆರ್ದ್, ಸಮ್ಮರ್ ಕ್ಯಾಂಪ್‌ದ ವಿಶೇಷತೆದ ಬಗ್ಗೆ ತೆರಿಪಾಯೆರ್.

ಎಸ್.ಐ ಸರಸ್ವತಿ ಪಾತೆರ್ದ್, ಸುರುತ್ತ ಸರ್ತಿ ನಮ್ಮ ಶಾಲೆಡ್ ಇಂಚಿನ ಲೇಸ್ ನಡತಿನವು ಅರ್ಥಪೂರ್ಣವಾದ್ ನಡತ್ಂಡ್. ಕ್ಯಾಂಪ್ ಮುಖೇನ ಜೋಕುಲೆಗ್ ಎಡ್ಡೆ ಸಂದೇಶ ದೆತೊನೊಲೆಕ್ಕ ಆಂಡ್ ಪಂದ್ ಪಂಡೆರ್.

ಈ ಪೊರ್ತುಡು ಎಎಸ್‌ಐ ಕೃಷ್ಣಪ್ಪ, ಮುರಳಿ ಟೀಮ್ ಮೇಘ ಕಲಾ ಆರ್ಟ್ಸ್‌ದ ಶಾರದಾ ದಾಮೋದರ್ ಚಾವಡಿಡ್ ಇತ್ತೆರ್. ಅತ್ತಂದೆ ಟೈಮ್ಸ್ ಆಫ್ ಕುಡ್ಲ ಸುದ್ದಿ ನ್ಯೂಸ್ ಬೊಕ್ಕ ಡಿ.ಕೆ ಟಿವಿ ಐ ಟ್ಯೂಬ್ ಚಂದನ್ ಇತ್ತೆರ್. ಈ ಲೇಸ್ ಡ್ ಹರೀಶ್ ಪಿ ಪಡುಮಲೆ ಬೊಕ್ಕ ಸಂದೇಶ್ ರೈ ಕೊಸ್ಟ್ ಲ್ ಹೋಮ್ ಮೊಕುಲು ಶಿಬಿರಡ್ ಪಾಲ್ ಪಡೆಯಿನ ಜೋಕುಲೆಗ್ ಪ್ರಶಸ್ತಿ ಪ್ರಧಾನ ಮಲ್ತೆರ್. ಶಿಕ್ಷಕೆರ್ ಬಾಲಕೃಷ್ಣ ರೈ ಪೊರ್ದಾಳ್ ಲೇಸ್ ದ ಸುಧಾರಿಕೆ ಮಲ್ತೆರ್.

You Missed