Fri. Nov 20th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

Erdogan wins the presidential elections at Turkey ಟರ್ಕಿದ ಅಧ್ಯಕ್ಷೆರಾದ್ ಎರ್ಡೊಗನ್

ಎರ್ಡೊಗನ್ ಮೇರ್ 52.14% ಓಟುಡು ರಡ್ಡನೇ ಚುನಾವಣೆಡ್ ಟರ್ಕಿದ ಅಧ್ಯಕ್ಷೆರ್ನ ತಾನೊನು ಗೆಂದ್‌ದೆರ್ ಪಂದ್ ಉನ್ನತ ಚುನಾವಣಾ ಮಂಡಳಿದ ಮುಖ್ಯಸ್ಥೆರ್ ಅಹ್ಮತ್ ಯೆನರ್ ಮೇರ್ ರಿಸಲ್ಟ್‌ನ್ ಅಧಿಕೃತ ಮಲ್ತ್‌ದೆರ್.

ಮೇ 14 ಕ್ಕ್ ನಡತಿನ ಸುರುತ್ತ ವೋಟುರ್ದ್ ಬೊಕ್ಕ 69 ವರ್ಷದ ಎರ್ಡೊಗನ್ ಈ ವಿಜಯ ಸಾಧಿಸಾದೆರ್.

Electricity failure at the Mangalore international airport ಕುಡ್ಲ ಏರ್ ಪೋರ್ಟ್ ಡ್ ಕೈ ಕೊರಿನ ಕರೆಂಟ್, ಇಮಾನ ಬರ್ಪಿನ ಅಂಚಿಂಚಿ ಆಂಡ್!

ಕುಡ್ಲ: ತಾಂತ್ರಿಕ ಕಾರಣರ್ದಾವರ ಕುಡ್ಲ ಅಂತಾರಾಷ್ಟ್ರೀಯ ಇಮಾನ ನಿಲ್ದಾಣದ ರನ್ ವೇಡ್ ಕರೆಂಟ್ ಕೈ ಕೊರ್ದಿತ್ತ್‌ದ್ ಲ್ಯಾಂಡ್ ಆಯರೆ ಇತ್ತಿನ ಇಮಾನಲೆನ್ ಬೇತೆ ಕಡೆಕ್ಕ್ ತಿರ್ಗಾದೆರ್.

ಪವರ್ ಸಪ್ಲೈದ ಸಮಸ್ಯೆರ್ದ್ ರನ್ ವೇ ಕತ್ತಲೆ ಆತ್ಂಡ್. ಬೊಂಬಾಯಿರ್ದ್ ಬತ್ತಿನ ಇಮಾನ ಎಟಿಸಿ ಸೂಚನೆದ ನಿಲೆಟ್ ಲ್ಯಾಂಡ್ ಆವಂದೆ ಕೇರಳದ ಕಣ್ಣೂರ್‌ಗ್ ವಾಪಾಸ್ ಆತ್ಂಡ್. ತಾಂತ್ರಿಕ ಸಮಸ್ಯೆ ಸರಿ ಆಪಿನ ಮುಟ್ಟ ಕುಡ್ಲಗ್ ಬರ್ಪಿನ ಬೊಕ್ಕ ಪೋಪಿನ ಮಾತ ಇಮಾನಲೆನ್ ಕ್ಯಾನ್ಸಲ್ ಮಲ್ತ್‌ದೆರ್.

Mulki: Fire at a coconut farm causes a lot of damage ಮೂಲ್ಕಿ: ತಾರೆ ತೋಟಗ್ ತೂ ಪೊತ್ತ್‌ದ್ ಮಸ್ತ್ ನಷ್ಟ

ಮೂಲ್ಕಿ: ಕಿನ್ನಿಗೋಳಿ-ಮೂಲ್ಕಿ ಮಾರ್ಗದ ಕೆಂಚನಕೆರೆ ಗ್ಯಾರೇಜ್ ಸರ್ವಿಸ್ ಸೆಂಟರ್ ಕೈತಲ್ ಸಾದಿದ ಕರೆಂಟ್ ಕಂಬದ ವಯರ್‌ಡ್ ಆಯಿನ ಶಾರ್ಟ್ ಸರ್ಕ್ಯೂಟ್‌ರ್ದಾವರ ಮಾಮಲ್ಲ ಮರ ಅಂಚನೆ ಇಲ್ಲದ ಸುತ್ತ ಇತ್ತಿನ ತಾರೆ ತೋಟಗ್ ತೂ ಪೊತ್ತ್‌ದ್ಂಡ್.

ಈ ಪೊರ್ತುಡು ಕೈತಲ್‌ದ ಜನಕುಲು ತೂ ತೆಕ್ಕಾಯರೆ ಪ್ರಯತ್ನ ಬತ್ತ್‌ದೆರ್. ಇಲ್ಲಡ್ ಏರ್ ಇಜ್ಜಂದಿನ ಪೊರ್ತುಡು ತೂ ಪೊತ್ತ್‌ದ್ಂಡ್. ಕುಡ್ಲರ್ದ್ ಅಗ್ನಿಶಾಮಕ ದಳತ್ತ ಸಿಬ್ಬಂದಿಲು ಜಾಗೆಗ್ ಬತ್ತ್‌ದ್ ತೂ ತೆಕ್ಕಾದೆರ್. ಜಾಗೆಗ್ ಮುಲ್ಕಿ ಮೆಸ್ಕಾ ಇಲಾಖೆದ ಸಿಬ್ಬಂದಿ ಭೇಟಿ ಕೊರ್ದು ಪರಿಶೀಲನೆ ಮಲ್ತ್‌ದೆರ್.

Government plans to include a sweet dish along with mid day meal to school children ಶಾಲೆದ ಜೋಕುಲೆಗ್ ಮಧ್ಯಾಹ್ನದ ವನಸ್‌ದ ಒಟ್ಟುಗು ಚೀಪೆ ಪಟ್ಟರೆ ಸರ್ಕಾರದ ಆದೇಶ

ಬೆಂಗ್ಲೂರ್: ಪೊಸ ಶೈಕ್ಷಣಿಕ ವರ್ಷ ಸುರು ಆಯರೆ ಇತ್ತ್‌ದ್ ಕಲ್ಪಾರ್ಥಿಲು ಮೇ 31 ಸೋಮಾರರ್ದ್ ಶಾಲೆಗ್ ಬರಿಯರೆ ಉಲ್ಲೆರ್. ಈ ನಿಲೆಟ್ಟ್ ಸರ್ಕಾರ ಮಾರ್ಗಸೂಚಿ ಪಾಡ್ದ್ಂಡ್.

ಶಾಲೆ ಸುರು ಆತಿನ ಸುರುತ್ತ ದಿನನೇ ಕಲ್ಪಾರ್ಥಿಲೆಗ್ ಮಧ್ಯಾಹ್ನದ ವನಸ್‌ದ ಒಟ್ಟುಗು ಕಡ್ಡಾಯವಾದ್ ಚೀಪೆ ಪಟ್ಟೊಡು ಪಂದ್ ಮಾತ ಸರ್ಕಾರಿ ಬೊಕ್ಕ ಅನುದಾನಿತ ಶಾಲಾ ಆಡಳಿತ ಮಂಡಳಿಲೆಗ್ ಸರ್ಕಾರ ಸೂಚನೆ ಕೊರ್ತ್ಂಡ್.

“ಯಕ್ಷಧ್ರುವ ಪಟ್ಲ ಸಂಭ್ರಮ”ಗ್ ಗೌಜಿದ ಮುಗಿತಲ; ಎಂ.ಎಲ್ . ಸಾಮಗ ದಂಪತಿಗ್ ಪಟ್ಲ ಪ್ರಶಸ್ತಿ ಸನ್ಮಾನ, ಕಾಂತಾರದ ರಿಷಭ್ ಶೆಟ್ಟಿ ವಿಶೇಷ ಬಿನ್ನೆ

ಕುಡ್ಲ: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಮುತಾಲಿಕೆಡ್ “ಯಕ್ಷಧ್ರುವ ಪಟ್ಲ ಸಂಭ್ರಮ-2023” ದ ಲೇಸ್ ಮೇ 27 ಶನಿಯಾರ ಬೊಕ್ಕ 28 ಐತಾರ ಅಡ್ಯಾರ್ ಗಾರ್ಡನ್ ಡ್ ನಡತ್ಂಡ್.

ಐತಾರ ಬಯ್ಯಡ್ ನಡತಿನ ಮುಗಿತಲದ ಲೇಸ್ ಡ್ ಪೇಜಾವರ ಮಠದ ವಿಶ್ವ ಪ್ರಸನ್ನ ಸ್ವಾಮೀಜಿ ಆಶೀರ್ವಚನ ಕೊರ್ದು “ಸತೀಶ್ ಪಟ್ಲೆರ್ ಅರೆನ ಎಡ್ಡೆ ಕಂಠಸಿರಿತ್ತ ಮುಕೇನ ಮಾತ್ರ ಸಮಾಜನ್ ರಂಜಿಸಾದಿನತ್ತ್, ಸಾಮಾಜಿಕ ಸಂಘಟನೆ ಸ್ಥಾಪನೆ ಮಲ್ತ್ ದ್ ಆ ಮುಕೇನ ಸಮಾಜಡ್ ಸೋತುದಿನಕಲೆನ ಕಣ್ಣೀರ್ ಒರೆಸೊಂದುಲ್ಲೆರ್. ಕೆಲವೆರೆಗ್ ದಾನ ಮಲ್ಪುನ ಸಾಮರ್ಥ್ಯ ಉಪ್ಪುಂಡು. ನನಲ ಕೆಲವೆರೆಗ್ ದಾನ ಮಲ್ಪುನ ಸಾಮರ್ಥ್ಯ ಇಜ್ಜಿಡಲ ಪತ್ತ್ ಜನರ್ದ್ ದೆಪ್ಪಾದ್ ದಾನ ಕೊರ್ಪೆರ್. ನನಲ ಕೆಲವೆರ್ ಅಕುಲೇ ದಾನ ಮಲ್ಪುವೆರ್, ಬೇತೆಕಲೆರ್ದ್ ಲ ಕೊರ್ಪಾವೆರ್. ನನಲ ಕೆಲವೆರೆಗ್ ಈ ಮಾತಾ ಗುಣ, ಸಾಮರ್ಥ್ಯ ಉಪ್ಪುಂಡು.ಅಂಚಿನ ವಿಶೇಷ ಗುಣ ಪಟ್ಲ ಸತೀಶ್ ಶೆಟ್ರೆಡ ಉಂಡು. ಅರೆನ ಸಮಾಜಮುಖಿ ಬೇಲೆ ನಿರಂತರ ಮುಂದುವರಿಯಡ್” ಪಂಡೆರ್.

ಮಿತ್ತರ್ಮೆಡ್ ಯಕ್ಷಗಾನ ರಂಗಡ್ 50 ವರ್ಷದ ಸಾಧಕೆರ್ ಪ್ರೊ. ಎಂ.ಲಕ್ಷ್ಮೀನಾರಾಯಣ ಸಾಮಗ ಸಾಮಗ-ಪ್ರತಿಭಾ ಸಾಮಗ ದಂಪತಿಗ್ “ಪಟ್ಲ ಪ್ರಶಸ್ತಿ-2023” ಕೊರ್ದುನೀಡಿ ಗೌರವಿಸಾಯೆರ್.

ಸನ್ಮಾನ ಸ್ವೀಕಾರ ಮಲ್ತ್ ದ್ ಪಾತೆರಿನ ಆರ್ , ಎಂಕ್ ಸನ್ಮಾನ, ಗೌರವ ತಿಕ್ಕರೆ ಮುಖ್ಯ ಕಾರಣ ಎನ್ನ ಅಮ್ಮೆರ್ನ ಆಶೀರ್ವಾದ. ದುಂಬುದ ಕಾಲೊಡು ಕಲಾವಿದರೆಗ್ ಆಶ್ರಯ ಕೊರ್ಪಿನ ದಾನಿಗಳ ಸಂಖ್ಯೆ ಕಡಿಮೆ ಇತ್ತ್ಂಡ್. ಆಂಡ ಇತ್ತೆ ಕಲಾವಿದೆರ್ನ ಸಕಾಯೊಗು ಬೋಡಾಯಿನಾತ್ ಸಂಖ್ಯೆಡ್ ದಾನಿಲು ಉಲ್ಲೆರ್. ಪಟ್ಲ ಫೌಂಡೇಶನ್ ದ ಈ ಸಾರ್ಥಕ ಬೇಲೆ ಇಂಚೆನೇ ದುಂಬರಿಯಡ್. ಅಂಚೆನೆ ದುಡ್ಡು ನು ಇಲ್ಲಡ್ ದೆತ್ತ್ ದ್ ದ್ ದೀವರೆ ಬಲ್ಲಿ.ಯೋಗ್ಯರೆಗ್ ಅವೆನ್ ದಾನ ಮಲ್ಪೊಡು. ಆಸ್ತಿನ್ ಒರಿತ್ ದ್ ಸಮಾಜಗ್ ಕೊರೊಡು. ಆಪಗ ಭಗವಂತನ ಅನುಗ್ರಹ ಉಪ್ಪುಂಡು ಪಂಡೆರ್. ಪ್ರಶಸ್ತಿದ ಒಟ್ಟುಗು ಬತ್ತಿನ 1 ಲಕ್ಷ ರೂ.ಡ್ ಯಕ್ಷಗಾನ ಕಲಾ ರಂಗಗ್ ಕೊರ್ದು, ಬಾಕಿದೆನ್ ಪಿರ ಪಟ್ಲ ಫೌಂಡೇಶನ್ ಗ್ ಸಂದಾವೆ ಪಂಡೆರ್.

ಈ ಪೊರ್ತುಡು ಎಂಆರ್ ಜಿ ಗ್ರೂಪ್ ದ ಸ್ಥಾಪಕೆರ್ ಕೆ.ಪ್ರಕಾಶ್ ಶೆಟ್ಟಿ, ಆಶಾ ಪ್ರಕಾಶ್ ಶೆಟ್ಟಿ ದಂಪತಿನ್ ವಿಶೇಷವಾದ್ ಮಾನಾದಿಗೆ ಮಲ್ತೆರ್.
ಬೊಕ್ಕ ಪಾತೆರ್ನ ಕೆ. ಪ್ರಕಾಶ್ ಶೆಟ್ರ್ “ಉಂದೊಂಜಿ ಪವಿತ್ರವಾಯಿನ ಅರ್ಥಪೂರ್ಣವಾಯಿನ ವೇದಿಕೆ. ಪಟ್ಲ ಸತೀಶ್ ಶೆಟ್ರ್ ಪಾವಂಜೆ ಮೇಳ ಸುರು ಮಲ್ಪುನಗ ದೇವಿನ್ ಕುಲ್ಲಾವರೆ ತೊಟ್ಟಿಲ್ ಬೋಡಿತ್ತ್ಂಡ್ ಪಂದ್ ಕೇಂಡ್ ದೆರ್. ಅವೆನ್ ಕೊರ್ತೆ. ಆನಿರ್ದ್ ಬೊಕ್ಕ ಎಂಕ್ ಲ ಸತೀಶ್ ಪಟ್ಲೆರೆಗ್ ಲ ದೇವಿನ ಸಂಪೂರ್ಣ ಅನುಗ್ರಹವಾತ್ಂಡ್” ಪಂಡೆರ್.

ಮಲ್ಲ ಬಿನ್ನೆರ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ರ್ ಪಾತೆರ್ದ್, “ತಾನ್ ಬೆಂದಿನೆಟ್ಟ್ ಒಂಜಿ ಭಾಗನ್ ಸಮಾಜದ ಬಡವೆರ್ನ ಕಣ್ಣೀರ್ ಒರೆಸರೆ ಗಲಸುನ ಪಟ್ಲ ಸತೀಶ್ ಶೆಟ್ರ್ ಸ್ಥಾಪನೆ ಮಲ್ದಿನ ಪಟ್ಲ ಫೌಂಡೇಶನ್ ಶ್ಲಾಘನೀಯ ಬೇಲೆ ಮಲ್ಪುಂಡು ಪಂಡೆರ್. ಕಲಾವಿದೆರ್ನ ಏಳಿಗೆಗಾದ್ ಕಷ್ಟ ಬರ್ಪಿನ ಈ ಸಂಘಟನೆಗ್ ನನಾತ್ ಬೆರಿಸಾಯ ಕೊರ್ರೆ ದೇವೆರ್ ಶಕ್ತಿ ಕೊರಡ್ ” ಪಂಡೆರ್.
ಉದ್ಯಮಿ ಶಶಿಧರ್ ಶೆಟ್ಟಿ ಬರೋಡಾ ಪಾತೆರ್ದ್ “ಪಟ್ಲ ಫೌಂಡೇಶನ್ ಸಮಾಜದ ಬಡವೆರೆಗ್, ಅಶಕ್ತರೆಗ್, ವಿದ್ಯಾರ್ಥಿಲೆಗ್, ಹುಷಾರ್ ದಾಂತಿನಕ್ಲೆಗ್ ವೈದ್ಯಕೀಯ ನೆರವು ಕೊರೊಂದು ಬೈದ್ಂಡ್. ಈ ಮುಕೇನ ಪಟ್ಲ ಸಂಭ್ರಮಗ್ ಎಚ್ಚ ಬಿಲೆ ಬೈದ್ಂಡ್ ಪಂಡೆರ್.

ಈ ಪೊರ್ತುಡು ಕಾಂತು ಅಜಿಲ, ಗುರುವಪ್ಪ ಬಾಯಾರು, ಜಗದೀಶ್ ನಲ್ಕ, ಸಾಧು ಕೊಟ್ಟಾರಿ ಮೊಕ್ಲೆಗ್ ಮರಣೋತ್ತರ 1ಲಕ್ಷ ರೂ.ದಂಚ ಪರಿಹಾರದ ಪನವು ಪಟ್ಟಿಯೆರ್.ಅಂಚೆನೆ ಪಟ್ಲಾಶ್ರಯ ಯೋಜನೆಡ್ ಇಲ್ಲ್ ಕಟ್ಟರೆ 18 ಕಲಾವಿದೆರೆಗ್ ತಲಾ 5 ಲಕ್ಷ ರೂ. ಪಟ್ಟಿಯೆರ್. ಅವ್ವತ್ತಾಂದೆ 13 ಕಲಾವಿದೆರೆಗ್ ಇಲ್ಲ್ ರಿಪೇರಿಗ್ ತಲಾ 25,000 ರೂ. ಪಟ್ಟಿಯೆರ್.

ಪೇಜಾವರ ಯತಿ ಶ್ರೀ ವಿಶ್ವಪ್ರಸನ್ನ ಸ್ವಾಮೀಜಿ, ಒಡಿಯೂರು ಕ್ಷೇತ್ರದ ಶ್ರೀ ಗುರುದೇವಾನಂದ ಸ್ವಾಮೀಜಿ, ಅರೆಸ್ಸೆಸ್ ಪ್ರಮುಖೆರ್ ಕಲ್ಲಡ್ಕ ಪ್ರಭಾಕರ ಭಟ್, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಗೌರವಾಧ್ಯಕ್ಷೆರ್ ಕುಳೂರು ಕನ್ಯಾನ ಸದಾಶಿವ ಶೆಟ್ಟಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ಉದ್ಯಮಿ ಶಶಿಧರ್ ಶೆಟ್ಟಿ ಬರೋಡಾ, ಅನಿವಾಸಿ ಉದ್ಯಮಿ ಪ್ರವೀಣ್ ಶೆಟ್ಟಿ ವಕ್ವಾಡಿ, ಅನಿವಾಸಿ ಉದ್ಯಮಿ ಹರೀಶ್ ಶೇರಿಗಾರ್, ಕಾಂತಾರದ ನಟೆ ರಿಷಭ್ ಶೆಟ್ಟಿ, ಬಂಟ್ವಾಳ ಶಾಸಕೆರ್ ರಾಜೇಶ್ ನಾಯ್ಕ್ ಉಳೆಪಾಡಿ ಗುತ್ತು, ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಆದರ್ಶ್ ಶೆಟ್ಟಿ, ನಾರಾಯಣ ಶೆಟ್ಟಿ ಪುಣೆ, ಪಟ್ಲ ಫೌಂಡೇಶನ್ ಸ್ಥಾಪಕ ಸತೀಶ್ ಶೆಟ್ಟಿ ಪಟ್ಲ, ಅಶೋಕ್ ಶೆಟ್ಟಿ ಬೆಳ್ಳಾಡಿ, ಸಿಎ ಸುಭಾಷ್ಚಂದ್ರ, ವಸಂತ ಶೆಟ್ಟಿ, ವೇಣುಗೋಪಾಲ್ ಶೆಟ್ಟಿ ಮುಂಬೈ, ಪ್ರವೀಣ್ ಭೋಜ ಶೆಟ್ಟಿ, ಅಡ್ಯಾರ್ ದಿವಾಕರ್ ಶೆಟ್ಟಿ, ಪಟ್ಲಗುತ್ತು ಮಹಾಬಲ ಶೆಟ್ಟಿ, ವಸಂತ ಗಿಳಿಯಾರ್, ವಸಂತ ಶೆಟ್ಟಿ ದೆಹಲಿ, ಪ್ರದೀಪ್ ಆಳ್ವ ಕದ್ರಿ, ರವಿಚಂದ್ರ ಶೆಟ್ಟಿ ಅಶೋಕನಗರ, ಮಹಿಳಾ ಘಟಕದ ಆರತಿ ಆಳ್ವ, ಟ್ರಸ್ಟ್ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್, ಕೇಂದ್ರೀಯ ಘಟಕದ ಸಂಘಟನಾ ಕಾರ್ಯದರ್ಶಿ ಜಗನ್ನಾಥ ಶೆಟ್ಟಿ ಬಾಳ ಮೊಕುಲು ಮಾತ ಇತ್ತೆರ್.

ಪಟ್ಲ ಫೌಂಡೇಶನ್ ಸ್ಥಾಪಕಾಧ್ಯಕ್ಷ ಪಟ್ಲ ಸತೀಶ್ ಶೆಟ್ಟಿ ಬಿನ್ನೆರೆನ್ ಮೋಕ್ಯೆಡ್ ಎದ್ಕೊಂಡೆರ್. ಕದ್ರಿ ನವನೀತ್ ಶೆಟ್ಟಿ ಲೇಸ್ ಸುಧಾರಿಕೆ ಮಲ್ತೆರ್.

ಅಖಿಲ ಭಾರತ ತುಳು ಒಕ್ಕೂಟದ ಮುತಾಲಿಕೆಡ್ ಪುತ್ತೂರು ‘ತುಳು ಅಪ್ಪೆ ಕೂಟ’ದ ಸಮಿತಿ ರಚನೆ; ಗುರ್ಕಾರ್ರ್ ಹರಿಣಾಕ್ಷಿ ಜೆ ಶೆಟ್ಟಿ, ಕಾರ್ಯಂತೆರ್ ವಿದ್ಯಾಶ್ರೀ ಎಸ್.

ಪುತ್ತೂರು: ಅಖಿಲಭಾರತ ತುಳು ಒಕ್ಕೂಟದ ಮುತಾಲಿಕೆಡ್ ಅಯಿತ್ತ ಗುರ್ಕಾರ್ರ್ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ದುಂಬುದ ಗುರ್ಕಾರ್ರ್ ಆಯಿನ ಎ. ಸಿ. ಭಂಡಾರಿಲೆನ ತಾದಿತುಡರ್‌ಡ್ ಪುತ್ತೂರುಡು ಪೊಂಜೋವುಲೆನ ತುಳುಕೂಟ ‘ತುಳು ಅಪ್ಪೆ ಕೂಟ’ದ ಸಮಿತಿ ರಚನಾ ಸಭೆ ಶನಿವಾರ ವಕೀಲೆರ್ ಹರಿಣಾಕ್ಷಿ ಜೆ ಶೆಟ್ರೆನ ಆಫೀಸ್‌ಡ್ ನಡತ್ಂಡ್.

ತುಳು ಅಪ್ಪೆ ಕೂಟದ ಮಾನಾದಿಗೆದ ಗುರ್ಕಾರ್ದಿಯಾದ್ ಪ್ರೇಮಲತಾ ರಾವ್, ಮಾನಾದಿಗೆದ ಮದಿಪುದಾರ್ ಆದ್ ವಸಂತಲಕ್ಷ್ಮೀ ಪುತ್ತೂರು, ಕವಿತಾ ಅಡೂರು, ವೀಣಾ ತಂತ್ರಿ, ಸವಿತಾ ಎ ರೈ ಮದಕ, ಗುರ್ಕಾರ್ದಿಯಾದ್ ಹರಿಣಾಕ್ಷಿ ಜೆ ಶೆಟ್ಟಿ, ಒತ್ತು ಗುರ್ಕಾರ್ದಿಯಾದ್ ಮಲ್ಲಿಕಾ ಜೆ ರೈ, ಪ್ರಧಾನ ಕಾರ್ಯಂತೆರ್ ಆದ್ ವಿದ್ಯಾಶ್ರೀ ಎಸ್, ಒತ್ತು ಕಾರ್ಯಂತೆರ್ ಆದ್ ಮಲ್ಲಿಕಾ ಗೌಡ ಅರಿಯಡ್ಕ, ಹರ್ಷಿತಾ ರೈ ಕುತ್ಯಾಡಿ, ಸಂಘಟನಾ ಗುರ್ಕಾರ್ದಿಯಾದ್ ಶಾಂತ ಕುಂಟಿನಿ, ಸಂಘಟನಾ ಕಾರ್ಯಂತೆರ್ ಆದ್ ಸ್ಮಿತಾ ಹಣಿಯೂರು, ಅಶ್ವಿನಿ ಗೌಡ, ಪಣವುದ ಪಾಲವೆರ್ ಆದ್ ಭಾರತಿ ವಸಂತ್, ಸಾಂಸ್ಕೃತಿಕ ಕಾರ್ಯಂತೆರ್ ಆದ್ ಡಾ. ಶೋಭಿತಾ ಸತೀಶ್, ಆಂತರಿಕ ಲೆಕ್ಕ ಪರಿಶೋಧಕೆರ್ ಆದ್ ಶಾರದಾ ಕೇಶವ ನಾಯ್ಕ್ ಅಂಚನೇ ಪದುಕೆರ್ ಆದ್ ವಿಜಯಭಾರತಿ ಅರಿಯಡ್ಕ, ಪುಷ್ಪಾವತಿ ರೈ ಅರೆಪ್ಪಾಡಿ, ಶ್ರುತಿ ರೈ, ಗೀತಾ ಗಂಗಾಧರ ಆಚಾರ್ಯ, ರಂಜಿನಿ ಶೆಟ್ಟಿ, ಸುಮನಾ ಬಲ್ಲಾಳ್, ಶಕುಂತಳ, ಲತಾ ರೈ, ಸುಪ್ರೀತಾ ರೈ, ರಕ್ಷಾ ಕುಲಾಲ್ ಸರ್ವೆರೆ ಒತ್ತೊರ್ಮೆದ ಒಂಬುಗೆಡ್ ಅಜಪ್ಪವೊಂಡೆರ್.

ಕೂಟೊ ಕಟ್ಟುನ ಕಜ್ಜೊನು ಚುನಾವಣಾಧಿಕಾರಿಯಾದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ದುಂಬುದ ಪದುಕೆರ್ ಪ್ರೇಮಲತಾ ರಾವ್ ಮಲ್ತೆರ್. ಅಂಚನೇ ಕೂಟೊ ಕಟ್ಟುನ ಲೇಸ್‌ನ್ ತುಳು ಲಿಪಿ ಶಿಕ್ಷಕಿ, ತುಳು ಸಾಹಿತ್ಯ ಅಕಾಡೆಮಿ ದುಂಬುದ ಪದುಕೆರ್ ವಿದ್ಯಾಶ್ರೀ ಎಸ್ ನಡಪಾದ್ ಕೊರಿಯೆರ್. ಹರಿಣಾಕ್ಷಿ ಜೆ ಶೆಟ್ಟಿ ಎದ್ಕೊಂದು ಸೊಲ್ಮೆ ಸಂದಾಯೆರ್.

ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಡ್ 240 ಬೇಲೆ

ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಡ್ ಖಾಲಿ ಇಪ್ಪುನ 240 ಇಸೇಸ ಅಧಿಕಾರಿ ಬೊಕ್ಕ ಮ್ಯಾನೇಜರ್ ಬೇಲೆಗ್ ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಆನ್ ಲೈನ್ ಡ್ ಅರ್ಜಿ ಪಾಡೊಲಿ.

ಅಭ್ಯರ್ಥಿಲೆನ್ ಲಿಖಿತ ಪರೀಕ್ಷೆ, ಆನ್ ಲೈನ್ ಪರೀಕ್ಷೆ, ಸಂದರ್ಶನದ ಆಧಾರದ ಮಿತ್ತ್ ಆಯ್ಕೆ ಮಲ್ಪೆರೆ ಆಪುಂಡು. ಅರ್ಜಿ ಸಂದಾಯೆರೆ ಜೂನ್ 11 ಅಕೇರಿದ ತಾರೀಕ್ ಆತ್ಂಡ್. ‌ನೆತ್ತ ವೆಬ್‌ಸೈಟ್: https://www.pnbindia.in

ರಾಜ್ಯಡ್ ನನ 4 ದಿನ ಬರ್ಸ ಬರ್ಪಿನ ಅಂದಾಜಿ

ರಾಜ್ಯದ ಕರಾವಳಿ ಬೊಕ್ಕ ದಕ್ಷಿಣ ಒಳನಾಡ್ ಡ್ ನನದ 4 ದಿನ ಭಾರೀ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ತೆರಿಪಾದ್ಂಡ್.

ಮೇ30 ಬೊಕ್ಕ 31 ಕ್ಕ್ ಮಸ್ತ್ ಪ್ರಮಾಣದ ಬರ್ಸ ಬರ್ಪುಂಡು. ಮೇ31 ಕ್ಕ್ ಉತ್ತರ ಒಳನಾಡ್ ಡ್ ಬರ್ಸ ಸುರು ಆಪುಂಡು. ಅಂಚಾದ್ ಕಡಲ್ ದ ಕೈತಲ್ ವಾಸ ಇಪ್ಪುನ ಬೊಕ್ಕ ಅಪಾಯದ ಪ್ರದೇಶಡ್ ಇಪ್ಪುನ ಜನ ಮುನ್ನೆಚ್ಚರಿಕೆ ವಹಿಸೊಡು ಪಂದ್ ಸಲಹೆ ಕೊರ್ತುಂಡು. ನನ ಜೂ‌.9 ರ್ದ್ ಮುಂಗಾರ್ ಬರ್ಸ ಸುರು ಆವೆರೆ ಉಂಡು.

Aryaveer Adyantaya bags 99.40% in ICSE exams ಐಸಿಎಸ್ಇ ಪರೀಕ್ಷೆಡ್ 99.40 % ಮಾರ್ಕ್ ಪಡೆಯಿನ ಆರ್ಯವೀರ್ ಅಡ್ಯಂತಾಯ

ಬೊಂಬೈ: 2022-23ನೇ ಸಾಲ್ ದ ಐಸಿಎಸ್ಇ 10ನೇ ಕ್ಲಾಸ್ ದ ಪರೀಕ್ಷೆಡ್ ಬೊಂಬೈ ಕಾಂದಿವಲಿ ಪೂರ್ವದ ಅಶೋಕ್ ನಗರ ಚಿಲ್ಡ್ರನ್ಸ್ ಅಕಾಡೆಮಿ ಶಾಲೆದ ಕಲ್ಪಾರ್ಥಿ ಆರ್ಯವೀರ್ ಅಡ್ಯಂತಾಯ ಮೇರ್ 99.40% ಮಾರ್ಕ್ ಪಡೆದ್ ದೇಶಡೇ 3ನೇ ತಾನ ಪಡೆದ್ ಎಡ್ಡೆ ಶ್ರೇಣಿಡ್ ಉತ್ತೀರ್ಣರಾತೆರ್.

ಈತ ಕಾಂದಿವಲಿ ಪೂರ್ವದ ಅಶೋಕ ನಗರದ ಸುದರ್ಶನ್ ಸೊಸೈಟಿದ ನಿವಾಸಿ ಸುಜೀರ್ ಗುತ್ತು ರವಿರಾಜ್ ಅಡ್ಯಂತಾಯ ಬೊಕ್ಕ ಪೆಜಮಾಡಿ ಗರಡಿಮನೆ ವಿಂದ್ಯಾ ಅಡ್ಯಂತಾಯ ದಂಪತಿಲೆನ ಮಗೆ ಆತೆರ್.

Aryaveer Adyantaya bags 99.40% in ICSE exams

Mumbai: In the ICSE exams for the year 2022-23 , Aryaveer Adyantaya Children’s Akademy gets 99.40% and the third position in the country.

ಧರ್ಮಸ್ಥಳಡ್ ಪತ್ತನಾಜೆ ಉಚ್ಚಯ

ಉಜಿರೆ: ಧರ್ಮಸ್ಥಳಡ್ ಪತ್ತನಾಜೆದ ಲೆಕ್ಕೊಡು ಗುರುವಾರ ದೇವಲ್ಯಡ್ ರಂಗಪೂಜೆ, ಬಲಿ ಉಚ್ಚಯ, ವಸಂತ ಪೂಜೆ, ಅಷ್ಟಾವಧಾನ ಸೇವೆ ನಡತ್ಂಡ್.

ಬೊಕ್ಕ ಕೊಡಿ ಜಾಯೆರ್. ನನ ತುಡರ್ ಪರ್ಬ ಮುಟ್ಟ ದೇವಲ್ಯಡ್ ರಂಗಪೂಜೆ, ಉಚ್ಚಯ ಬೊಕ್ಕ ಇಸೇಸ ಸೇವೆ ನಡಪುಜಿ. ಧರ್ಮಸ್ಥಳ ಯಕ್ಷಗಾನ ಮೇಳದ ಶ್ರೀ ಮಹಾಗಣಪತಿ ದೇವೆರೆನ ಮೂರ್ತಿನ್ ಗುರುವಾರ ಬಯ್ಯಗ್ ಬಿಡಾರದ ಮಣೆಗಾರೆರೆನ ಇಲ್ಲಲ್ ರ್ದ್ ಭವ್ಯ ಮೆರವಣಿಗೆಡ್ ಕನತೆರ್. ಅತ್ತಂದೆ ಕ್ಷೇತ್ರದ ಆನೆಲು, ಬಸವೆ, ಪೂತ್ತ ಕೋಲ್, ವಾದ್ಯ ಮೇಳ, ಚೆಂಡೆ ಮೇಳ, ಶಂಖ-ಜಾಗಟೆ ವಾದನ ಮೆರವಣಿಗೆ ಇತ್ಂಡ್.

ದೇವಲ್ಯದ ಎದುರು ದರ್ಶನ ಸೇವೆ ನಡಪಾಯಿನ ಬೊಕ್ಕ ಛತ್ರದ ಶ್ರೀ ಮಹಾಗಣಪತಿ ಗುಡಿಕ್ಕ್ ಮೆರವಣಿಗೆಡ್ ಕನದೆರ್. ಈ ಪೊರ್ತುಡು ಧರ್ಮಾಧಿಕಾರಿ ಡಿ.ವೀರೇಂದ್ರ ಹೆಗ್ಗಡೆ ಮೇರ್, ಡಿ.ಹರ್ಷೇಂದ್ರ ಕುಮಾರ್ ಬೊಕ್ಕ ಕುಟುಂಬಸ್ಥೆರ್, ನೌಕರೆರ್ ಬೊಕ್ಕ ಭಕ್ತೆರ್ ಇತ್ತೆರ್.

You Missed