Thu. Nov 19th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

Music plays an important role in the mental well being of students- Padmashree Bhat ಜೋಕುಲೆನ ಓದುನ ಸಾಮರ್ಥ್ಯ ಎಚ್ಚಮಲ್ಪೆರೆ ಸಂಗೀತ ಒಂಜಿ ಎಡ್ಡೆ ಮಾರ್ಗ : ಪದ್ಮಶ್ರೀ ಭಟ್

ಸಂಗೀತ ಜೋಕುಲೆನ ಮೆದುಳುದ ಬುಲೆಚ್ಚಿಲ್ ನ್ ಎಚ್ಚ ಮಲ್ಪುಂಡು. ಪಾಠದೊಟ್ಟುಗೆ ಸಂಗೀತಲ ಅಭ್ಯಾಸ ಮಲ್ಪುನೆರ್ದ್ ಜೋಕುಲೆನ ಮೆದ್ ಳ್ ದ ಬುಲೆಚ್ಚಿಲ್ ಸುಧಾರಣೆ ಆಪುಂಡು. ಸಂಗೀತನ್ ಆರಾಮವಾದ್ ಕೇನ್ನಗ ಎಡ್ಡೆ ನರ ಸಂಸ್ಕರಣೆ ಆಪುಂಡು ಪಂದ್ ಅಧ್ಯಯನೊಲು ತೆರಿಪಾದ್ಂಡ್. ಸಂಗೀತಡ್ ಇಪ್ಪುನ ಬೇತೆ ಅಧ್ಯಯನಲು ಜೋಕುಲೆನ ಐಕ್ಯೂ ಪಾಯಿಂಟ್‌ನ್ ಎಚ್ಚ ಮಲ್ಪುಂಡು. ಅತ್ತಂದೆ ಜೋಕುಲೆನ ಓದುನ ಶಕ್ತಿದ ಸಾಮರ್ಥ್ಯನ್ ಎಚ್ಚ ಮಲ್ಪೆರೆ ಸಂಗೀತ ಒಂಜಿ ಎಡ್ಡೆ ಮಾರ್ಗ ಆತ್ಂಡ್. ಮಾತ ಜೋಕುಲೆಗ್ಲಾ ಓದುನೇ ಒಂಜಿ ಪ್ರಮುಖ ಕೌಶಲ ಆತ್ಂಡ್. ಮಾತ ಇಸಯನ್ ಗ್ರಹಿಸೆರೆ ಸಂಗೀತ ಸಹಕಾರ ಮಲ್ಪುಂಡು ಪಂದ್ ವಾಯ್ಸ್ ಆಫ್ ಅರಾಧನದ ನಿರ್ದೇಶಕಿ ಪದ್ಮಶ್ರೀ ಭಟ್ ಪಂಡೆರ್.

ಮೇರ್ ಶಿಮಂತೂರುದ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಡ್ ನಡತಿನ ಈ ಶೈಕ್ಷಣಿಕ ವರ್ಷದ ಧರ್ಮಾರ್ಥ ಸಂಗೀತ ಕ್ಲಾಸ್ ದ ಲೇಸ್ ನ್ ಉದಿಪನ ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್.

ಸಂಗೀತ ಶಿಕ್ಷಣ ಜೋಕುಲೆಗ್ ಸಂಗೀತ ಕೌಶಲನ್ ಬುಲೆಪಾಯೆರೆ ಅವಕಾಶ ಕೊರ್ಪುಂಡು, ಅತ್ತಂದೆ ಜ್ಞಾನದ ಬಗ್ಗೆ ಎಚ್ಚದ ಆಸಕ್ತಿ ಕೊರ್ಪುಂಡು ಪಂದ್ ಶ್ರೀ ಶಾರದಾ ಸೊಸೈಟಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ ಹರಿಕೃಷ್ಣ ಪುನರೂರು ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರಿಯೆರ್.

ಈ ಪೊರ್ತುಡು ಲೇಸ್ ಡ್ ಶ್ರೀ ಶಾರದಾ ಸೊಸೈಟಿದ ಕೋಶಾಧಿಕಾರಿ ಕೊಡೆತ್ತೂರು ಭುವನಾಭಿರಾಮ ಉಡುಪ, ನಿರ್ದೇಶಕೆರ್ ಪಿ.ಎಸ್. ಸುರೇಶ್ ರಾವ್, ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು, ಸಂಗೀತಾ ಗುರು ಆದರ್ಶ್ ಎಸ್. ಜೆ ಇತ್ತೆರ್.

ಶಾಲೆದ ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್ ಎದ್ಕೊನಿಯೆರ್. ಸಹ ಶಿಕ್ಷಕಿ ಪ್ರಜ್ವಲ ಈ ಲೇಸ್ ದ ಸುಧಾರಿಕೆ ಮಲ್ತೆರ್. ಬೊಕ್ಕ ಹೇಮಲತಾ ಸೊಲ್ಮೆ ಸಂದಾಯೆರ್.

Yakshadruva Patla Foundation Trust to organize “Europe Yakshagana Abhiyana” from June 15 th ಜೂ.15 ರ್ದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ದ ಯುರೋಪ್ ಯಕ್ಷಗಾನ ಅಭಿಯಾನ

ಕುಡ್ಲ: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ರ್ದ್ ಜೂನ್ 15 ರ್ದ್ ಯುರೋಪ್ ಯಕ್ಷಗಾನ ಅಭಿಯಾನ ನಡಪರೆ ಉಂಡು ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ದ ಅಧ್ಯಕ್ಷೆರ್ ಸತೀಶ್ ಶೆಟ್ಟಿ ಪಟ್ಲ ಪಂಡೆರ್.

ಕುಡ್ಲಡ್ ಬುಧಾರ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ಆರ್, ಯುರೋಪ್ ದೇಶದ ಬೇತೆ ಬೇತೆ ಭಾಗಲೆಡ್ ತುಳಯನಾಡ್ ದ ಗಂಡುಕಲೆ ಯಕ್ಷಗಾನ ಪ್ರದರ್ಶನ ಆಯರೆ ಉಂಡು. ಈ ಯಕ್ಷಗಾನ ಅಭಿಯಾನಡ್ ರಾಜ ವೇಷ, ಬಣ್ಣದ ವೇಷ, ಪಗಡಿ ವೇಷ, ಸ್ತ್ರೀ ವೇಷ, ಹಾಸ್ಯ ವೇಷಲು ರೈಸರೆ ಉಂಡು. ಜೂನ್ ತಿಂಗೊಲ್‌ಡ್ ಲಂಡನ್, ಮಿಡ್ಲ್ಯಾಂಡ್, ದುರಾಅಮ್, ಲೀಡ್ಸ್, ಎಡಿನ್ ಬರ್ಗ್, ಸ್ಕಾಟ್ಲಂಡ್ ಇಂಚಿತ್ತಿನ ಕಡೆಟ್ ಯಕ್ಷಗಾನ ಪ್ರದರ್ಶನ ಆಯರೆ ಉಂಡು. ಅಗೋಸ್ಟ್ ತಿಂಗೊಲ್‌ಡ್ ಫ್ರಾನ್ಸ್, ಪ್ಯಾರಿಸ್, ಫ್ರಾಂಕ್ ಫರ್ಟ್, ಮ್ಯೂನಿಚ್, ಜರ್ಮನಿ, ಬಿಲ್ಲಿಂಗಾಮ್, ದುರಾಹಮ್ ದೇಶಲೆಡ್ ಯಕ್ಷಗಾನ ಪ್ರದರ್ಶನ ಆಯರೆ ಉಂಡು ಪಂದ್ ಪಂಡೆರ್.

ಪ್ರತಿಷ್ಠಿತ ಕನ್ನಡಿಗೆರ್ ಯು.ಕೆ. ಸಂಸ್ಥೆದ ಲೆಪ್ಪು ಅಂಚನೆ ದೇವಿಕಾ ಡ್ಯಾನ್ಸ್ ಥಿಯೇಟರ್ ಮೊಕಲೆನ ಮುತಾಲಿಕೆಡ್ ಯುರೋಪ್ ಯಕ್ಷಗಾನ ಅಭಿಯಾನ ನಡಪರೆ ಉಂಡು. ಯಕ್ಷಗಾನ ಪ್ರದರ್ಶನ ಮಾತ್ರ ಅತ್ತಂದೆ ದುರಾಹಮ್ ಬೊಕ್ಕ ಲೀಡ್ಸ್ ಮಹಾವಿದ್ಯಾಲಯಡ್ ಯಕ್ಷಗಾನದ ಶಿಬಿರಲ ನಡಪರೆ ಉಂಡು.

ಪಣಂಬೂರು ವಾಸು ಐತಾಳ್ ಯುಎಸ್‌ಎ ಮೆರೆನ ನೇತೃತ್ವಡ್ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಭಾಗವತೆರ್‍ನೊಟ್ಟುಗು, ಪ್ರೊ. ಎಂ ಎಲ್ ಸಾಮಗ, ಪದ್ಮನಾಭ ಉಪಾಧ್ಯಾಯ, ಚೈತನ್ಯ ಕೃಷ್ಣ ಪದ್ಯಾಣ, ಚಂದ್ರಶೇಖರ ಪೂಜಾರಿ ಧರ್ಮಸ್ಥಳ, ಮಹೇಶ್ ಮಣಿಯಾಣಿ, ಪ್ರಶಾಂತ್ ನೆಲ್ಯಾಡಿ, ಮೋಹನ್ ಪೂಜಾರಿ ಬೆಳ್ಳಿಪಾಡಿ ಇಂಚಿನ ಮಲ್ಲ ಕಲಾವಿದೆರ್ ಪಾಲ್ ಪಡೆಯರೆ ಉಲ್ಲೆರ್.

ಪತ್ರಿಕಾಗೋಷ್ಠಿಡ್ ಯುರೋಪ್ ಯಕ್ಷಗಾನ ಅಭಿಯಾನದ ರೂವಾರಿ ವಾಸು ಐತಾಳ್, ಪ್ರೊ. ಎಂ.ಎಲ್. ಸಾಮಗ, ಯಕ್ಷಧ್ರುವ ಪಟ್ಲ ಫೌಂಡೇಶನ್ (ರಿ.) ಕುಡ್ಲ ಕೇಂದ್ರಿಯ ಸಮಿತಿದ ಕೋಶಾಧಿಕಾರಿ ಸಿಎ ಸುಜೀತ್ ಕುಮಾರ್ ರೈ, ಟ್ರಸ್ಟ್‌ದ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಇತ್ತೆರ್.

Yakshadruva Patla Foundation Trust to organize “Europe Yakshagana Abhiyana” from June 15 th

This was announced by Satish Shetty Patla President of the Foundation at a press meet in Mangalore .Yakshagana in all its colour and glory will be presented in various countries of Europe.

An anonymous Yakshagana enthusiast donates an amount of fifty lakhs for Yakshagana development to Yakshadruva Patla foundation at ” Vishwa Patla Sambrama” program in UAE ಯುಎಇ ಘಟಕದ ಮುಖೇನ “ವಿಶ್ವ ಪಟ್ಲ ಸಂಭ್ರಮ” ಡ್ ಯಕ್ಷ ಪೋಷಣೆಗ್ 50 ಲಕ್ಷ ರೂ.ದೇಣಿಗೆ ಕೊರಿನ ಅನಾಮಿಕ ಯಕ್ಷ ಕಲಾ ಪೋಷಕೆ

6 ವರ್ಷದ ಜೋಕುಲೆರ್ದ್ ಪತ್ತ್ ದ್ 60 ವರ್ಷ ಮುಟ್ಟದ ಯಕ್ಷಗಾನ ಅಭ್ಯಾಸ ಕೇಂದ್ರದ ಕಲಾವಿದೆರೆರ್ದ್ ಯಕ್ಷಗಾನ ಪ್ರದರ್ಶನ

ದುಬೈ: ಒಂಜಿ ಕಾಲಡ್ ಆರ್ಥಿಕವಾದ್ ಬಡಪತ್ತ್ ಡ್ ಇತ್ತಿನ ಯಕ್ಷಗಾನ‌ ಕಲಾವಿದೆರೆಗ್ ಆಸರೆಯಾದ್ ಯಕ್ಷಧ್ರುವ ಪಟ್ಲ ಪೌಂಡೇಶನ್ ಮೂಲಭೂತ ಸಹಕಾರನ್ ಕೊರೊಂದು, ಜನಕ್ಲೆನ ಮನಸ್ ಡ್ ನೆಲೆ ಆವೊಂದು ಇಪ್ಪುನ ನಡುಟ್ಟು ಈ ಪ್ರೋತ್ಸಾಹಕ ಸಂಘಟನೆಗ್ ಪೋಷಕವಾದ್ ದಾನಿಲು ತನ್ನ ಕೈಟಾಯಿನ ಕೊಡುಗೆನ್ ಕೊರೊಂದು ಯಕ್ಷ ಕಲೆನ್ ಬುಲೆಪಾವೊಂದು ಇಪ್ಪುನೆನ್ ವರ್ತಮಾನಡ್ ತೂವೊಲಿ.

ನೆಕ್ಕೊಂಜಿ ಸ್ಪಷ್ಟ ನಿದರ್ಶನ ಪಂಡ, ಸುರುತ್ತ ಸರ್ತಿ ಗಲ್ಫ್ ರಾಷ್ಟ್ರಡ್ ನಡತಿನ ವಿಶ್ವ ಪಟ್ಲ ಸಂಭ್ರಮ ಸಾರರ್ದ್ ಎಚ್ಚ ಯಕ್ಷಾಭಿಮಾನಿಲೆನ ಸಮ್ಮುಖಡ್ ಯಶಸ್ವಿಯಾದ್ ನಡತ್ಂಡ್. ‌ಅತ್ತಂದೆ ಬೇತೆ ಬೇತೆ ಕಡೆತ್ತ ಗಣ್ಯೆರೆನ್ ವಿಶ್ವ ಮಟ್ಟಡ್ ಗುರುತಿಸಾಯಿನವು ಈ ಸರ್ತಿ ದುಬೈಡ್ ನಡತಿನ ವಿಶ್ವ ಪಟ್ಲ ಸಂಭ್ರಮದ ಇಸೇಸತೆ ಆತ್ಂಡ್.

ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇ ಬೊಕ್ಕ ಪಟ್ಲ ಘಟಕ ದುಬೈದ ಒಟ್ಟುಸೇರಿಗೆಡ್ ಜೂನ್ 11 ಕ್ಕ್ ದುಬೈದ ಇಂಡಿಯನ್ ಹೈಸ್ಕೂಲ್ ದ ಶೇಖ್ ರಷೀದ್ ಸಭಾಂಗಣಡ್ ನಡತಿನ ದುಬೈ ಯಕ್ಷೋತ್ಸವ 2023 ಬೊಕ್ಕ ವಿಶ್ವ ಪಟ್ಲ ಸಂಭ್ರಮಗ್ ಸಾರರ್ದ್ ಎಚ್ಚ ಜನ ಸಾಕ್ಷಿ ಆತೆರ್ ಅತ್ತಂದೆ ಬೇತೆ ಬೇತೆ ಕೊಡುಗೆ ಕೊರ್ಪಿನೆತ್ತೊಟ್ಟಿಗೆ ಭಾರೀ ಪೊರ್ಲುಡೇ ನಡತ್ಂಡ್.

ಮಧ್ಯಾಹ್ನ 2 ಗಂಟೆದ ಬೊಕ್ಕ ಪುತ್ತಿಗೆ ವೆಂಕಟೇಶ ಶಾಸ್ತ್ರಿಲೆನ ಪೌರೋಹಿತ್ಯಡ್ ರಂಗಸ್ಥಳ ಪೂಜೆ ಬೊಕ್ಕ ಚೌಕಿ ಪೂಜೆದೊಟ್ಟಿಗೆ ಯಕ್ಷಗಾನದ ಪೂರ್ವರಂಗ ಸುರು ಆದ್ ಬೊಕ್ಕ ಗಣ್ಯೆರೆರ್ದ್ ವಿಶ್ವ ಪಟ್ಲ ಸಂಭ್ರಮದ ತುಡರ್ ಅರ್ಲಾವುನ ಮುಖೇನ ಸಂಪ್ರದಾಯಿಕವಾದ್ ಉದಿಪನ ಆಂಡ್.

ಯಕ್ಷ ಸಂಘಟಕೆರ್ ದಿನೇಶ್ ಶೆಟ್ಟಿ ಕೊಟ್ಟಿಂಜ ಮೆರೆನ ಸಂಯೋಜನೆಡ್ “ದಶಾವತಾರ” ಯಕ್ಷಗಾನ ಪ್ರಸಂಗ ಸುರು ಆಂಡ್. ಯಕ್ಷಗಾನಡ್ ಊರುದ ಪುಗರ್ತೆದ ಹಿಮ್ಮೇಳ ಕಲಾವಿದೆರ್ ಬೊಕ್ಕ ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ 6 ವರ್ಷದ ಬಾಲ ಕಲಾವಿದೆರ್ದ್ 60 ವರ್ಷದ ಕಲಾವಿದೆರ್ ಮುಟ್ಟ ಅಭಿನಯ ಮಲ್ತೆರ್. ಶೇಖರ್ ಡಿ.ಶೆಟ್ಟಿಗಾರ್ ಬೊಕ್ಕ ಶರತ್ ಕುಡ್ಲ ನೆತ್ತ ನಿರ್ದೇಶನ ಮಲ್ತೆರ್.

ಯಕ್ಷ ಕಲಾಶ್ರೀ ಪ್ರಶಸ್ತಿ ಪ್ರದಾನ:

ರಾತ್ರೆ 7 ಗಂಟೆಗ್ ವಿಶ್ವ ಪಟ್ಲ ಸಂಭ್ರಮದ ಸಭಾ ಲೇಸ್ ಡ್ ದುಬೈ ಬೊಕ್ಕ ಯುಎಇದ ಕಲಾವಿದೆರೆನ್ ಗುರುತಿಸಾದ್ ಕೊರ್ಪಿನ “ಯಕ್ಷಶ್ರಿ ರಕ್ಷ” ಪ್ರಶಸ್ತಿನ್ ಕಲಾವಿದೆರಾಯಿನ ಪಟ್ಲಗುತ್ತು ಮಹಾಬಲ ಶೆಟ್ಟಿ ಮೆರೆಗ್, “ವಿಶ್ವ ಕಲಾಪೋಷಕ” ಪ್ರಶಸ್ತಿನ್ ಪಟ್ಲ ಫೌಂಡೇಷನ್ ದ ಕೇಂದ್ರೀಯ ಘಟಕದ ಗೌರವಾಧ್ಯಕ್ಷೆರ್ ಕುಳೂರು ಕನ್ಯಾನ ಸದಾಶಿವ ಶೆಟ್ಟಿ ಮೆರೆಗ್ ಕೊರಿಯೆರ್.

ಶೈಲಜಾ ನಿತ್ಯಾನಂದ ಶೆಟ್ಟಿ ಮೇರ್ ತಮ್ಮನ ಆಯಿನಕ್ಲೆನ ಸನ್ಮಾನ ಪತ್ರನ್ ಓದಿಯೆರ್. ಲೇಸ್ ದ ಮಹಾ ಪೋಷಕೆರಾಯಿನ ಉದ್ಯಮಿ ಹರೀಶ್ ಶೇರಿಗಾರ್ ದಂಪತಿಲೆನ್ ಬೊಕ್ಕ ಭೀಮ ಜ್ಯುವೆಲರ್ಸ್ ದ ಯು. ನಾಗರಾಜ ರಾವ್ ಮೆರೆಗ್ ತಮ್ಮನ ನಡತ್ಂಡ್. ಬೊಕ್ಕ ಮಹಾ ಪೋಷಕೆರೆನ್ ಬೊಕ್ಕ ಬೇತೆ ಬೇತೆ ಘಟಕರ್ದ್ ಬತ್ತಿನ ಪದಾಧಿಕಾರಿಲೆನ್ ಗೌರವಿಸಾಯೆರ್.

ಈ ಪೊರ್ತುಡು ಚಾವಡಿಡ್ ಪಟ್ಲ ಘಟಕದ ಯುಎಇದ ಗೌರವಾಧ್ಯಕ್ಷೆರ್ ಪುತ್ತಿಗೆ ವಾಸುದೇವ ಭಟ್, ಪ್ರವೀಣ್ ಕುಮಾರ್ ಶೆಟ್ಟಿ ವಕ್ವಾಡಿ, ಸುಜಾತ ಶೆಟ್ಟಿ, ರಮಾನಂದ ಶೆಟ್ಟಿ, ಸಂದೀಪ್ ರೈ ನಂಜೆ, ದಿವಾಕರ ಶೆಟ್ಟಿ, ಪ್ರದೀಪ್ ಶೆಟ್ಟಿ, ಪಟ್ಲ ಸತೀಶ್ ಶೆಟ್ಟಿ, ಕೇಂದ್ರೀಯ ಘಟಕದ ಕೋಶಾಧಿಕಾರಿ CA ಸುದೇಶ್ ಕುಮಾರ್ ರೈ, ಸಂಘಟನಾ ಕಾರ್ಯದರ್ಶಿ ಪ್ರದೀಪ್ ಆಳ್ವ ಕದ್ರಿ, ಜಗನ್ನಾಥ ಶೆಟ್ಟಿ ಬಾಳ, ಕೇಂದ್ರೀಯ ಮಹಿಳಾ ಘಟಕದ ಗೌರವಾಧ್ಯಕ್ಷೆರ್ ಆರತಿ ರಾಮಚಂದ್ರ ಆಳ್ವ, ಮಹಿಳಾ ಘಟಕದ ಅಧ್ಯಕ್ಷೆರ್ ಪೂರ್ಣಿಮಾ ಯತೀಶ್ ರೈ, ಘಟಕದ ಟ್ರಸ್ಟಿಲಾಯಿನ ರಮಾನಂದ ಶೆಟ್ಟಿ ಓಮಾನ್, ನಿತ್ಯಾನಂದ ಶೆಟ್ಟಿ, ಸುಧಾಕರ ಪೂಂಜ, ಜಯರಾಮ ರೈ ಮಿತ್ರಂಪಾಡಿ ಅಬುಧಾಬಿ, ಕೃಷ್ಣ ಶೆಟ್ಟಿ, ತಾರನಾಥ ಶೆಟ್ಟಿ, ಚಂದ್ರಹಾಸ ಶೆಟ್ಟಿ ರಂಗೋಲಿ, ಅನಿತ ಪಿಂಟೊ, ನಾರಾಯಣ ಶೆಟ್ಟಿ ಸುರತ್ಕಲ್, ಲೀಲಾಧರ ಶೆಟ್ಟಿ ಸುರತ್ಕಲ್, ಯಕ್ಷಗಾನ ಸಂಘಟಕೆರ್ ಭುಜಬಲಿ‌ ಧರ್ಮಸ್ಥಳ ಇತ್ತೆರ್.

ಪಟ್ಲ ಫೌಂಡೇಶನ್ ದುಬೈ ಘಟಕದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ ಮೇರ್ ಪ್ರಾಸ್ತಾವಿಕ ಪಾತೆರ್ದ್, ಘಟಕದ ಕಾರ್ಯ ಚಟುವಟಿಕೆನ್ ವಿಶ್ಲೇಷಣೆ ಮಲ್ತೊಂದು, ದುಬೈ ಘಟಕ ಸುರುರ್ದ್ ಇತ್ತೆದ ಲೇಸ್ ಮುಟ್ಟ 93 ಲಕ್ಷ ರೂಪಾಯಿನ್ ಸಂಗ್ರಹ ಮಲ್ದ್ಂಡ್. ಬರ್ಪಿನ ವರ್ಷದ ಪಟ್ಲ ಸಂಭ್ರಮದ ಲೇಸ್ ದ ದುಂಬೇ ದಾನಿಲೆರ್ದ್ ಸಂಗ್ರಹ ಮಲ್ತ್ ದ್ ಒಂಜಿ ಕೋಟಿ ರೂಪಾಯಿನ್ ಕೇಂದ್ರ ಘಟಕಗ್ ಕೊರ್ಪಿನ ಉದ್ದೇಶ ಉಂಡು. ಈ ಸರ್ತಿ ನೆಕ್ಕಾದ್ ಯಕ್ಷ ಕಲಾ ಪೋಷಕೆರ್ ಒರಿ ಯುಎಇ ಘಟಕದ ಮುಖೇನ 50 ಲಕ್ಷ ರೂ.ನ್ ದೇಣಿಗೆಯಾದ್ ಕೊರ್ಪುನೇ ಅತ್ತಂದೆ ಪುದರ್ ನ್ ಏರೆಗ್ಲಾ ಪನಿಯೆರೆ ಬಲ್ಲಿ ಪಂದ್ ಪಂತೆರ್ ಪಂದ್ ಪಂಡೆರ್.

ಈ ಪೊರ್ತುಡು ಯಕ್ಷಗಾನ ಅಭ್ಯಾಸ ಕೇಂದ್ರದ ದಿನೇಶ್ ಶೆಟ್ಟಿ ಕೊಟ್ಟಿಂಜೆ ಪಾಲ್ ಪಡೆದಿತ್ತೆರ್. ಕೇಂದ್ರ ಘಟಕದ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಬೊಕ್ಕ ರಾಜೇಶ್ ಕುತ್ತಾರ್ ಈ ಲೇಸ್ ದ ಸುಧಾರಿಕೆ ಮಲ್ತೆರ್.

ಲೇಸ್ ದ ಅಕೇರಿಗ್ ಊರುರ್ದ್ ಬತ್ತಿನ ಹಿಮ್ಮೇಳ ಕಲಾವಿದೆರ್ ರವಿಚಂದ್ರ ಕನ್ನಡಿಕಟ್ಟೆ, ಚೈತನ್ಯ ಪದ್ಯಾಣ, ಪದ್ಮನಾಭ ಉಪಾಧ್ಯಾಯ, ವಸ್ತ್ರಲಂಕಾರೆರ್ ಗಂಗಾದರ ಶೆಟ್ಟಿಗಾರ್, ನವೀನ್ ಕುಂಪಲ, ಮನೋಜ್ ಕುಮಾರ್ ಬೊಕ್ಕ ಮಾಧ್ಯಮಗಾರೆರೆಗ್ ಸ್ಮರಣಿಕೆ ಕೊರ್ದು ಗೌರವಿಸಾಯೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)

9 persons killed in fresh violence in Manipur, more than 25 persons are seriously hurt ಮಣಿಪುರಡ್ ಕುಡ ದಾಳಿ: 9 ಜನ ತೀರ್ ಪೋಯೆರ್

ಮಣಿಪುರದ ಇಂಫಾಲ್ ಜಿಲ್ಲೆದ ಖಾಮೇಲಾಕ್ ಪ್ರದೇಶಡ್ ಉಗ್ರೆರ್ ನಡಪಾಯಿನ ದಾಳಿಗ್ 9 ಜನ ತೀರ್ ಪೋಯೆರ್.

ಸುಮಾರ್ 25 ರ್ದ್ ಎಚ್ಚ ಜನಕ್ಕ್ ಮಸ್ತ್ ಪೆಟ್ಟಾತ್ಂಡ್. ಪೆಟ್ಟಾಯಿನಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್ ಪಂದ್ ಅಲ್ಪದ ಪೊಲೀಸ್ ಅಧಿಕಾರಿಲು ತೆರಿಪಾದೆರ್. ಈ ಉಗ್ರೆರ್ ಶಸ್ತ್ರ ದೊಟ್ಟಿಗೆ ಅಂಗಾರೆ ರಾತ್ರೆ ಖಾಮೇಲಾಕ್ ಗ್ರಾಮದ ಸುಮಾರ್ ಇಲ್ಲದ ಮಿತ್ತ್ ದಾಳಿ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್. ‌

A Skywalk glass bridge inaugurated in Madikeri ಮಡಿಕೇರಿಡ್ ಉಂಡು ಕನ್ನಡಿದ ಮಿತ್ತ್ ನಡಪುನ ಗ್ಲಾಸ್‌ ಸ್ಕೈ ವಾಕ್ ಸಂಕ!

ಕೊಡಗು: ಜಿಲ್ಲೆದ ಪ್ರವಾಸೋದ್ಯಮ ಕ್ಷೇತ್ರಡ್ ಗ್ಲಾಸ್‌ ಸ್ಕೈ ವಾಕ್ ಬ್ರಿಡ್ಜ್ ಪೊಸತಾದ್ ಸೇರ್ದ್ಂಡ್.

ಖಾಸಗಿಯಾದ್ ಸುರು ಆಯಿನ ಈ ಬ್ರಿಡ್ಜ್ ಇಡೀ ದಕ್ಷಿಣ ಭಾರತದ ಜನಕ್ಲೆನ್ ಬರ್ಪಿಲೆಕ ಮಲ್ತ್ ದ್ಂಡ್. ದಕ್ಷಿಣ ಭಾರತದ ಸುರುತ್ತ ಗ್ಲಾಸ್ ದ ಸಂಕ ಕೇರಳದ ವಯನಾಡ್ ಡ್ ಉಂಡು.

ಈ ಗ್ಲಾಸ್‌ ಸ್ಕೈ ವಾಕ್ ಬ್ರಿಡ್ಜ್ ಮಡಿಕೇರಿ ಕೈತಲ್ದ ಉಡೋತ್ ಡ್ ಉಂಡು. 31 ಮೀಟರ್ ಉದ್ದದ 2 ಮೀಟರ್ ಅಗಲದ 78 ಅಡಿ ಎತ್ತರಡ್ ಇಪ್ಪುನ ಈ ಗ್ಲಾಸ್ ಸ್ಕೈ ವಾಕ್ ಬ್ರಿಡ್ಜ್ ಮಾತೆರೆನಲ ಗೇನನ್ ಅಂಚಿ ಒಯಿತೊಂದುಂಡು.

ಸುಮಾರ್ 5 ಟನ್ ದುನ್ನನ್ ಪತೊನ್ನ ಸಾಮರ್ಥ್ಯದ ಈ ಬ್ರಿಡ್ಜ್‌ಡ್ ಒರ 40-50 ಜನ ಉಂತುದು ಪ್ರಕೃತಿನ್ ತೂವೊಲಿ. ಈ‌ ಬ್ರಿಡ್ಜ್ ವಿರಾಜಪೇಟೆ ಕ್ಷೇತ್ರದ ಶಾಸಕೆರ್ ಎ ಎಸ್ ಪೊನ್ನಣ್ಣ ಮೆರೆರ್ದ್ ಉದಿಪನ ಆತ್ಂಡ್.

A Skywalk glass bridge inaugurated in Madikeri

Coorg: A 32 meters long, 2 meters wide and 78 meters in height glass Skywalk bridge was inaugurated by Virajpete MLA A S Ponappa near Madikeri in Coorg.

Dead body found of the person who was missing from Kinnigoli from Monday morning..!! ಕಿನ್ನಿಗೋಳಿ: ನಾಪತ್ತೆ ಆಯಿನ ಜವನೆ ಪುನ ಆದ್ ಪತ್ತೆ..!

ಕಿನ್ನಿಗೋಳಿ: ನಾಪತ್ತೆ ಆಯಿನ ಜನ ಒರಿ ಪುನ ಆದ್ ಪತ್ತೆ ಆಯಿನ ಘಟನೆ ಕೈತಲ್‌ದ ಹೊಸಕಾವೇರಿಡ್ ನಡತ್ಂಡ್.

ಹೊಸಕಾವೇರಿ ನಿವಾಸಿ ಚಂದ್ರಕಾಂತ್ (40) ತೀರ್ ಪೋಯಿನ ಜನ. ಚಂದ್ರಕಾಂತ್ ಸೋಮಾರ ಕಾಂಡೆ ನಾಪತ್ತೆ ಆದಿತ್ತ್‌ದ್, ಇನಿ ಮದ್ಯಾಹ್ನ ಕೈತಲ್‌ದ ಪರ ಆಯಿನ ಕಪ್ಪುಕಲ್ಲ್‌ದ ಕೋರೆದ ನೀರ್‌ಗ್ ಬೂರ್ದು ತೀರ್ ಪೋತೆರ್.

ಸರಿ ಆಯಿನ ಬೇಲೆ ಇಜ್ಜಂದೆ ಮಸ್ತ್ ಬೇಜಾರ್‌ಡ್ ಇತ್ತಿನೆಡ್ದಾವರ ಆತ್ಮಹತ್ಯೆ ಮಲ್ತ್‌ದೆರ್ ಪಂದ್ ತೆರಿದ್ ಬೈದ್ಂಡ್.

Tomorrow is a Last date to update Aadhaar for free ಆಧಾರ್‌ ಕಾರ್ಡ್ ನವೀಕರಣದ ಗಡು ಎಲ್ಲೆಗ್ ಅಕೇರಿ

ಆಧಾರ್ ಕಾರ್ಡ್ ದೆತೊಂದು 10 ವರ್ಷ ಕರಿನಕ್ಲೆಗ್ ಆಧಾರ್‌ ಕಾರ್ಡ್ ಕಡ್ಡಾಯ ನವೀಕರಣ ಮಲ್ಪುನ ಗಡು ಎಲ್ಲೆ (ಜೂ.14) ಮುಗಿವುಂಡು.

ಜೂನ್ 14 ತ್ತ ಉಲಯಿ ಮೈ ಆಧಾರ್ ಪೋರ್ಟಲ್‌ಡ್ ವಿವರನ್ ಫ್ರೀ ಆದ್ ನವೀಕರಣ ಮಲ್ಪೊಲಿ. ಆಧಾರ್ ಕಾರ್ಡ್‌ಡ್ ಪುದರ್, ವಿಳಾಸ, ಪುಟ್ಟಿನ ದಿನ, ಲಿಂಗ, ಫೋನ್ ಸಂಖ್ಯೆ, ಇ-ಮೇಲ್ ಇಂಚಿತ್ತಿನೆನ್ ಫ್ರೀ ಆದ್ ಅಪ್‌ಡೇಟ್ ಮಲ್ಪೊಲಿ. ಫೋಟೋ, ಬಯೋಮೆಟ್ರಿಕ್ ವಿವರನ್ ಬದಲ್ ಮಲ್ಪರೆ ಆಧಾರ್ ಕೇಂದ್ರಗ್ ಭೇಟಿ ಕೊರೊಡು. ಜೂ.15 ನೆರ್ದ್ ಬೊಕ್ಕ ಆಧಾರ್ ಅಪ್‌ಡೇಟ್‌ಗ್ 50 ರೂ. ಶುಲ್ಕ ಆಪುಂಡು.

Muhurtha fixed for Kantara 2 Movie ಕಾಂತಾರ 2 ಪಿಚ್ಚರ್‌ಗ್ ಮೂರ್ತ ಫಿಕ್ಸ್

ಪುಗರ್ತೆದ ನಟೆ ರಿಷಬ್ ಶೆಟ್ಟಿ ನಿರ್ದೇಶನ ಬೊಕ್ಕ ನಟನೆ ಮಲ್ತಿನ ಕಾಂತಾರ ಪಿಚ್ಚರ್ ದೇಶ ಮಾತ್ರ ಅತ್ತಂದೆ ವಿದೇಶಡ್‌ಲ ಪುಗರ್ತೆ ಪಡೆತ್ಂಡ್.

ಇತ್ತೆ ಕಾಂತಾರ 2 ಪಿಚ್ಚರ್ ಸದ್ಯಗೆ ಬುಡುಗಡೆ ಆಯರೆ ಇತ್ತ್‌ದ್ ಉಂದೆತ್ತ ಮೂರ್ತ ಆಗಸ್ಟ್ ೨೭ನೇ ತಾರೀಕ್‌ಗ್ ನಡಪರೆ ಉಂಡು. ಸ್ಕ್ರಿಪ್ಟ್ ತಯಾರ್ ಆದಿತ್ತ್‌ದ್ ಶೂಟಿಂಗ್‌ಗ್ ಬೋಡಾದಿನ ಜಾಗೆನ್ ನಾಡೊಂದುಲ್ಲೆರ್.

Kulashekara: AlupasTulu Shasana reinstalled ಕುಲಶೇಖರ: ಆಳುಪ ಅರಸೆರೆನ ತುಳು ಶಾಸನಗ್ ಸರಿಯಾಯಿನ ನಿಲೆ

ಕುಡ್ಲ: ಕುಲಶೇಖರದ ಶ್ರೀ ವೀರನಾರಾಯಣ ದೇವಲ್ಯಡ್ ಇತ್ತಿನ 12ನೇ ಶತಮಾನಗ್ ಸೇರಿನ ತುಳು ಬರವು ಬೊಕ್ಕ ತುಳು ಭಾಷೆದ ಶಾಸನಗ್ ಇತ್ತೆ ಸರಿಯಾಯಿನ ನಿಲೆ ತಿಕ್ ದ್ಂಡ್.

ಅಳುಪ ಅರಸೆರೆನ ಕಾಲಡ್ ತುಳು ಆಡಳಿತ ಭಾಷೆ ಆದಿತ್ತ್ಂಡ್ ಪನ್ಪುನೆಕ್ಕ್ ಈ ತುಳು ಶಾಸನನೇ ಸಾಕ್ಷಿ ಆತ್ಂಡ್. ಇಂಚಿಪ್ಪ ದೇವಲ್ಯದ ಜೀರ್ಣೋದ‍್ಧಾರದ ಪೊರ್ತುಡು ನೆನ್ ದೆತ್ತ್ ದ್ ಬರಿಕ್ಕ್ ದೀದಿತ್ತೆರ್.

ತುಳು ಶಾಸನ ಒರಿಪಾದ್ ತುಳು ಸಂಸ್ಕೃತಿ, ಪರಪೋಕುನು ಬುಲೆಪಾವೊಡು. ಉಂದು ಸಾರ ವರ್ಷದ ಇತಿಹಾಸ ಇಪ್ಪುನ ಶಾಸನ ಅತ್ತಂದೆ ತುಳು ಲಿಪಿ ಒರಿಪಾಯೆರೆ ಆಧಾರ ಆತ್ಂಡ್ ಪನ್ಪಿನ ನಿಲೆಟ್ಟ್ ದೇವಲ್ಯದ ಆಡಳಿತ ಮಂಡಳಿದಕುಲು ನೆಕ್ಕ್ ಒಂಜಿ ಸರಿತ್ತ ಜಾಗೆನ್ ಕೊರ್ದು ಗೌರವ ಕೊರ್ತೆರ್.

ಶಾಸನನ್ ಸಂರಕ್ಷಣೆ ಮಲ್ಪೊಡು ಪನ್ಪಿನ ತುಳುವೆರ್ನ ಬಿನ್ನಾಪುಗು ಬಿಲೆ ಕೊರ್ನ ಆಡಳಿತ ಮಂಡಳಿ ಬೊಕ್ಕ ತುಳುವೆರ್ ಒಟ್ಟಾದ್ ಒಂಜಿ ಕಟ್ಟೆ ನಿರ್ಮಾಣ ಮಲ್ತ್ ದ್ ಶಾಸನನ್ ಒರಿಪಾವುನ ಬೇಲೆ ಮಲ್ದೆರ್. ಆತೆ ಅತ್ತಂದೆ ಅಯಿತೊಟ್ಟಿಗೆ ಒಂಜಿ ಕನ್ನಡ ಶಾಸನನ್ ಲ ಒರಿಪಾದೆರ್.

Dr D Veerendra Heggade receives the renewed Global Accreditation certificate for PGDBM course for SDM institute of Management ಜಾಗತಿಕ ಮಾನ್ಯತೆ ನವೀಕರಣ ಪ್ರಮಾಣಪತ್ರ ಸ್ವೀಕಾರ ಮಲ್ತಿನ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್

ಉಜಿರೆ: ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಶಿಕ್ಷಣ ಸಂಸ್ಥೆಲೆನ ಆಡಳಿತಡ್ ಮೈಸೂರ್ ಡ್ ನಡತೊಂದು ಇಪ್ಪುನ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಇನ್‌ಸ್ಟಿಟ್ಯೂಟ್ ಆಫ್ ಮೆನೇಜ್‌ಮೆಂಟ್ ಡೆವೆಲಪ್‌ಮೆಂಟ್ (ಎಸ್.ಡಿ.ಎಂ.ಐ.ಎಂ.ಡಿ.) ಸಂಸ್ಥೆದ ಪಿ.ಜಿ.ಡಿ.ಎಂ. ಕೋರ್ಸ್ ಗ್ ರಡ್ಡನೇ ಸರ್ತಿ ಯುರೋಪಿಯನ್ ಫೆಡರೇಶನ್ ಆಫ್ ಮೆನೇಜ್‌ಮೆಂಟ್ ಡೆವೆಲಪ್‌ಮೆಂಟ್ (ಇ.ಎಫ್.ಎಂ.ಡಿ.) ಸಂಸ್ಥೆದ ಜಾಗತಿಕ ಮಾನ್ಯತೆ ಕೊರ್ದು ಗೌರವಿಸಾದ್ಂಡ್.

ಫ್ರಾನ್ಸ್ ದೇಶದ ಲಿಯೋನ್‌ಡ್ ಜೂ.12 ಕ್ಕ್ ನಡತಿನ ಇಸೇಸ ಲೇಸ್ ಡ್ ಸಂಸ್ಥೆದ ಆಡಳಿತ ಮಂಡಳಿ ಅಧ್ಯಕ್ಷೆರ್, ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ ಮೇರ್ ಜಾಗತಿಕ ಮಾನ್ಯತೆ ನವೀಕರಣ ಪ್ರಮಾಣಪತ್ರನ್ ಸ್ವೀಕಾರ ಮಲ್ತೆರ್.

ಈ ಪೊರ್ತುಡು ಆಡಳಿತ ಮಂಡಳಿ ಉಪಾಧ್ಯಕ್ಷೆರ್ ಡಿ. ಸುರೇಂದ್ರ ಕುಮಾರ್ ಬೊಕ್ಕ ಎಸ್.ಡಿ.ಎಂ. ಐ.ಎಂ.ಡಿ. ನಿರ್ದೇಶಕೆರ್ ಡಾ. ಎನ್. ಆರ್. ಪರಶುರಾಮನ್ ಇತ್ತೆರ್.

ಇ.ಎಫ್.ಎಂ.ಡಿ. ಅಧ್ಯಕ್ಷೆರ್ ಎರಿಕ್‌ಕೋರ್ನ್‌ವೆಲ್, ನಿರ್ದೇಶಕೆರ್ ಆಲ್ಫೋನ್ಸ್ ಸಾಕ್ವೆಟ್ ಬೊಕ್ಕ ಬರ್ಬರಾ ಸ್ಪೋರ್ನ್ ಬೊಕ್ಕ ಮಾರ್ಗದರ್ಶಕ ಅಧಿಕಾರಿ ನಿಶಿತ್ ಜೈನ್ ಮಾನ್ಯತೆ ನವೀಕರಣ ಪತ್ರ ಕೊರ್ದು ಹೆಗ್ಗಡೆ ಮೆರೆನ್ ಗೌರವಿಸಾಯೆರ್.

ಜಾಗತಿಕ ಮಟ್ಟಡ್ ಸಂಸ್ಥೆದ ಆಡಳಿತ ನಿರ್ವಹಣೆದ ಉತ್ಕೃಷ್ಟತೆನ್ ಮನ್ನಿಸಾದ್ ಸಂಸ್ಥೆಗ್ ರಡ್ಡನೇ ಸರ್ತಿ ಜಾಗತಿಕ ಮಾನ್ಯತೆ ನವೀಕರಣ ಪ್ರಮಾಣಪತ್ರನ್ ಕೊರಿಯೆರ್. ಭಾರತಡೇ ಸುರುತ್ತ ಸರ್ತಿ 2017ಟ್ಟ್ ಸಂಸ್ಥೆಗ್ ಜಾಗತಿಕ ಮಾನ್ಯತೆ ತಿಕ್ಕ್ ದ್ಂಡ್. ಬೊಕ್ಕ 2020 ಟ್ಟ್, ರಡ್ಡನೇ ಸರ್ತಿ 2023 ಟ್ಟ್ ಜಾಗತಿಕ ಮಾನ್ಯತೆ ನವೀಕರಣ ಪ್ರಮಾಣಪತ್ರ ಕೊರ್ದು ಗೌರವಿಸಾಯೆರ್.

ನೇರ್ದ್ ಎಸ್.ಡಿ.ಎಂ.ಐ.ಎಂ.ಡಿ. ಜಗತ್ತ್ ದ 17 ಪುಗರ್ತೆದ ಮೆನೇಜ್‌ಮೆಂಟ್ ಸಂಸ್ಥೆದ ವಿಶ್ವವಿದ್ಯಾಲಯದೊಟ್ಟಿಗೆ ಅಧ್ಯಯನಕ್ಕಾದ್ ಸಂಪರ್ಕ ಬೊಕ್ಕ ಮಾನ್ಯತೆರ್ದ್ ಉಂಡು. ಆಯಿತ್ತ ಮುತಾಲಿಕೆಡ್ ಜಂಟಿಯಾದ್ ಇಸೇಸ ಅಧ್ಯಯನ ಬೊಕ್ಕ ಸಂಶೋಧನೆ ನಡಪಾಯೆರೆ ಮುಕ್ತ ಅವಕಾಶ ಉಂಡು. ಇತ್ತೆದ ಎಸ್.ಡಿ.ಎಂ.ಐ.ಎಂ.ಡಿ.ದ 32 ಕಲ್ಪಾರ್ಥಿಲು ಅಮೇರಿಕಾ, ಮಧ್ಯಪೂರ್ವ ಬೊಕ್ಕ ಯುರೋಪಿಯನ್ ದೇಶದ ವಿಶ್ವವಿದ್ಯಾಲಯಡ್ ಇಸೇಸ ಅಧ್ಯಯನ ಬೊಕ್ಕ ಸಂಶೋಧನಾ ಕಾರ್ಯಡ್ ಉಲ್ಲೆರ್.

Dr D Veerendra Heggade receives the renewed Global Accreditation certificate for PGDBM course for SDM institute of Management

The certificate was issued from the European Federation of Management development