Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಪೊಸ ರೇಷನ್ ಕಾರ್ಡ್: ಸರಕಾರರ್ದ್ ಗುಡ್ ನ್ಯೂಸ್

ಪೊಸತ್ ರೇಷನ್ ಕಾರ್ಡ್ ಮಲ್ತ್ ಕೊರಿಯರೆ ರಾಜ್ಯ ಸರಕಾರ ಅಧಿಕಾರಿಲೆಗ್ ಸೂಚನೆ ಕೊರ್ತುಂಡು ಪಂದ್ ಆಹಾರ ಸಚಿವೆರ್ ಕೆ.ಹೆಚ್ ಮುನಿಯಪ್ಪ ತೆರಿಪಾದೆರ್.

ರೇಷನ್ ಕಾರ್ಡ್ ಇಜ್ಜಾಂದಿನಕುಲು ನೆತ್ತ ಪ್ರಯೋಜನ ಪಡೆಯೊನೊಲಿ. ವೋಟುದ ನೀತಿ ಸಂಹಿತೆ ಇತ್ತಿನೆರ್ದಾತ್ರ ರೇಷನ್ ಕಾರ್ಡ್ ಕೊರ್ಪಿನೆನ್ ಉಂತುದಿತ್ತ್ಂಡ್. ಇತ್ತೆ ಪೊಸ ಕಾರ್ಡ್ ಕೊರಿಯೆರೆ ಅಧಿಕಾರಿಲೆಗ್ ಸೂಚನೆ ಕೊರ್ತ ಪಂದ್ ಸಚಿವೆರ್ ತೆರಿಪಾದೆರ್. ನೆತ್ತ ಒಟ್ಟಿಗೆ ಸದಸ್ಯೆರ್ನ ಪುದರ್ ಸೇರ್ಪಡೆ ಮಲ್ಪೆರೆ ಅವಕಾಶ ಉಂಡು.

ಪುತ್ತೂರು ಅಕ್ಷಯ ಕಾಲೇಜ್ ಡ್ ಓರಿಯೆಂಟೇಷನ್ ಲೇಸ್

ಪುತ್ತೂರು: ಅಕ್ಷಯ ಕಾಲೇಜು ಡ್ ಓರಿಯೆಂಟೇಷನ್ ಲೇಸ್ ಇನಿ ಸುಕ್ರವಾರ ಕಾಲೇಜ್ ದ ಆಡಿಟೋರಿಯಂ ಡ್ ನಡತ್ಂಡ್.

 

ಅಕ್ಷಯ ಕಾಲೇಜ್ ದ ಮ್ಯಾನೇಜಿಂಗ್ ಡೈರೆಕ್ಟರ್ ಕಲಾವತಿ ಜಯಂತ್ ಲೇಸ್ ದ ಉದಿಪನನ್ ಮಲ್ತೆರ್.

ಲೇಸ್ ದ ಗುರ್ಕಾಮೆನ್ ಅಕ್ಷಯ ಕಾಲೇಜ್ ದ ಚೇರ್ ಮ್ಯಾನ್ ಜಯಂತ್ ನಡುಬೈಲ್ ಒಯಿಸ್ ದಿತ್ತೆರ್.

ಲೇಸ್ ದ ಮಲ್ಲ ಬಿನ್ನೆರಾದ್ ಎಂ.ಐ.ಎಫ್.ಟಿ ಫ್ಯಾಷನ್ ಡಿಸೈನ್ ಕಾಲೇಜ್ ದ ಚೇರ್ ಮಾನ್ ಎಂ.ಜಿ ಹೆಗ್ಡೆ, ಕುಡ್ಲ ಎಂ.ಐ.ಎಫ್.ಟಿ ಕಾಲೇಜ್ ದ ಅಡ್ಮಿನಿಸ್ಟ್ರೇಟಿವ್ ಆಫೀಸರ್ ಮನೋಹರ್ ಶೆಟ್ಟಿ ಲೇಸ್ ಡ್ ಪಾಲ್ ಪಡೆಯೆರ್.

ಇನ್‌ಸ್ಟಾಗ್ರಾಮ್ ಡ್ ದೇವೆರ್ನ ಮಿತ್ತ್ ಬೊಡ್ಚಾಂದಿನ ಕಮೆಂಟ್: ಆರೋಪಿ ಪೊಲೀಸೆರ್ನ ಕೈಕ್ಕ್

ಇನ್‌ಸ್ಟಾಗ್ರಾಮ್‌ ಡ್ ದೇವರ್ನ ಬಗೆಟ್ಟ್ ಬೊಡ್ಚಾಂದಿನ ಕಮೆಂಟ್ ಮಲ್ತಿನ ಕೇಸ್ ದ ಆರೋಪಿನ್ ಪೊಲೀಸೆರ್ ಕುಡ್ಲ ಡ್ ಪತ್ ದೆರ್.

ಬಿಕರ್ನಕಟ್ಟೆದ ಹಿಲ್‌ರೋಡ್ ನಿವಾಸಿ ಸಲ್ಮಾನ್ (22) ಆರೋಪಿ.

ಸೆನ್ ಪೊಲೀಸ್ ಠಾಣೆ ಡ್ ಹಿಂದೂ ದೇವೆರ್ನ ಮಿತ್ತ್ ಅಶ್ಲೀಲ ಕಮೆಂಟ್ ಪಾಡ್ದಿನ ಬಗೆಟ್ಟ್ ದೂರು ದಾಖಲಾದ್, ಕಾರ್ಯಾಚರಣೆ ಮಲ್ತಿನ ಪೊಲೀಸೆರ್ ಆರೋಪಿನ್ ಪತ್ ದ್ ಕೋರ್ಟ್ ಗ್ ಹಾಜರ್ ಮಲ್ದೆರ್.

ಬಲ್ಲ್ ಪಾಡೊಂದು ತೀರ್ ಪೋಯಿನ ಡಿಪ್ಲೊಮಾ ಕಲ್ಪಾರ್ಥಿ

ಕುಡ್ಲದ ಕೆಪಿಟಿ ಡ್ ಡಿಪ್ಲೊಮಾ ಕಲ್ಪರೆ ಸೇರ್ನೆತ್ತ ಮನದಾನಿಯೇ ಇಲ್ಲದಕುಲ್ ಕರ್ಚಿಗ್ ಕಾಸ್ ಕೊರ್ಜೆರ್ ಪಂದ್ ಇಲ್ಲದ ಉಲಾಯಿ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ಕುತ್ತಾರ್ ದ ಸುಭಾಷನಗರ ಡ್ ನಡತ್ಂಡ್.

ಸುಭಾಷನಗರದ ಭಾಸ್ಕರ್ ಪೂಜಾರಿ ಬೊಕ್ಕ ದಾಕ್ಷಾಯಿಣಿ ಮೊಕ್ಲೆನ ಮಗೆ ಸುಶಾಂತ್ (17) ಬಲ್ಲ್ ಪಾಡೊಂದಿನಾಯೆ.

ಕೆಪಿಟಿ ಡ್ ಮೆಕ್ಯಾನಿಕಲ್ ಡಿಪ್ಲೊಮಾ ಕಲ್ಪರೆ ಆಯನ್ ಇಲ್ಲದಕುಲ್ ಆ.2 ತಾರೀಕ್ ಗ್ ಕಾಲೇಜ್ ಗ್ ಸೇರ್ಪಾದೆರ್ . ಆನಿ 500 ರೂ. ಕರ್ಚಿಗ್ ಕೊರ್ದು ಕಾಲೇಜಿಗ್ ಕಡಪುರ್ದ್ ಇತ್ತೆರ್.

ಗುರುವಾರಲ ಬೊಲ್ಪುಗ್ ಪಿರ 500 ರೂ. ಕೇನ್ನಗ ಇಲ್ಲಲ್ ಕಾಸ್ ಕೊರ್ಪುಜಿ ಪಂಡೆರ್. ಅಯಿಕ್ಕ್ ಆಯೆ ಕೋಪಡ್ ಇಲ್ಲಲೆ ಕುಲ್ದಿತ್ತೆ. ಸುಶಾಂತ್ ನ ಅಪ್ಪ ಇಲ್ಲರ್ದ್ ಪಿದಾಯಿ ಪೋದಿತ್ತೆರ್. ಅಮ್ಮ ಅಟಿಲ್ದ ಕೋಣೆ ಡ್ ಇತ್ತಿನ ಪೊರ್ತುಡು ಕೋಣೆದ ಉಲಾಯಿ ಪಕ್ಕಾಸ್ ಗ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆ ಪಂದ್ ತೆರಿದ್ ಬೈದ್ಂಡ್. ಉಳ್ಳಾಲ ಸ್ಟೇಶನ್ ಡ್ ಕೇಸ್ ದಾಖಲಾತ್ಂಡ್. .

ತುಳು ಭಾಷೆದ ಬುಲೆಚ್ಚಿಲ್ ಗ್ ಮಾತೆರ್ಲ ಒಗ್ಗಟ್ಟಾದ್ ಬೇಲೆ ಮಲ್ಪೊಡು: ಎ.ಸಿ.ಭಂಡಾರಿ

ತುಳು ಭಾಷೆ, ಸಂಸ್ಕೃತಿ, ಅಭಿವೃದ್ಧಿ ಬೊಕ್ಕ ಮಾನ್ಯತೆಗ್ ನಮ ಮಾತ ಸಮಾನೆರೆನ ಮನಸ್ಕೆರೆನ ಕೂಟವಾದ್ ಒಕ್ಕೂಟಡ್ ಬೇಲೆ ಮಲ್ಪೊಡು. ಅಖಿಲ ಭಾರತ ತುಳು ಒಕ್ಕೂಟಡ್ ದೇಶದ ಇಡೀ ಸುಮಾರ್ 46 ತುಳು ಭಾಷೆದ ಸಂಘಟನೆ ಸದಸ್ಯೆರ್ ಉಲ್ಲೆರ್. ಉಂದು 100 ರ್ದ್ ಎಚ್ಚಾಪುನ ಪ್ರಯತ್ನನ್ ನಮ ಮಲ್ಪೊಡು ಪಂದ್ ಅಖಿಲ ಭಾರತ ತುಳು ಒಕ್ಕೂಟದ ಅಧ್ಯಕ್ಷೆರ್ ಎ.ಸಿ. ಭಂಡಾರಿ ಪಂಡೆರ್.

ಮೇರ್ ಕಾವೂರು ಗಾಂಧಿನಗರ ಮುಗ್ರೋಡಿ ಎನ್‌ಕ್ಲೇವ್‌ಡು ಉಪ್ಪುನ ಒಕ್ಕೂಟದ ಕಚೇರಿದ ಚಾವಡಿಡ್ ನಡತಿನ ಕಾರ್ಯಕಾರಿ ಸಮಿತಿದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರಿಯೆರ್.

ನನದ ದಿನಟ್ಟ್ ದೇಶದ ಮಲ್ಲ ಮಲ್ಲ ಪೇಂಟೆಡ್ ತುಳು ಸಮ್ಮೇಳನ ಮಲ್ಪುನ ಮುಖೇನ ಸಂಘಟನೆನ್ ಬುಲೆಪಾವುನ ಕಾರ್ಯಕಾರಿ ನಿರ್ಧಾರನ್ ಸಮಿತಿಡ್ ದೆತೊನೊಡು ಪಂದ್ ಪಂಡೆರ್.

ಉಪಾಧ್ಯಕ್ಷೆರ್ ಇಂದ್ರಾಳಿ ಜಯಕರ ಶೆಟ್ಟಿ ಪಾತೆರ್ದ್, ಅಖಿಲ ಭಾರತ ತುಳು ಒಕ್ಕೂಟದ ನನದ ಕಾರ್ಯಕಾರಿ ಸಮಿತಿ ಸಭೆನ್ ಮಲ್ತ್ ದ್ ಬೇತೆ ಬೇತೆ ಜಿಲ್ಲೆ ಬೊಕ್ಕ ಒಕ್ಕೂಟಡ್ ಸದಸ್ಯೆರ್ ಪೇಂಟೆ, ಗ್ರಾಮೀಣ ಪ್ರದೇಶಡ್ ಸಂಘಟನೆನ್ ಬುಲೆಪಾವೊಡು ಪಂದ್ ಪಂಡೆರ್.‌

ಈ ಪೊರ್ತುಡು ನಿಕಟಪೂರ್ವ ಅಧ್ಯಕ್ಷೆರ್ ಧರ್ಮಪಾಲ ಯು. ದೇವಾಡಿಗ, ವಿಜಯಲಕ್ಷ್ಮೀ ಬಿ. ಶೆಟ್ಟಿ ಜಯಂತಿ ಬಂಗೇರ, ಗಂಗಾಧರ ಕಿದಿಯೂರು, ಮೋಹನ್‌ದಾಸ್ ಹಿರಿಯಡ್ಕ, ಪ್ರದೀಪ್ ಆಳ್ವ ಕದ್ರಿ, ರಾಜೇಶ್ ಆಳ್ವ ಇತ್ತೆರ್. ಪ್ರಧಾನ ಕಾರ್ಯದರ್ಶಿ ಮುಲ್ಕಿ ಕರುಣಾಕರ ಶೆಟ್ಟಿ ದುಂಬುದ ಸಭೆತ್ತ ನಡಾವಳಿ, ನಿರ್ಣಯನ್ ತೆರಿಪಾಯೆರ್. ಚಂದ್ರಶೇಖರ್ ಸುವರ್ಣ ಲೆಕ್ಕ ಪತ್ರನ್ ಪರಿಶೀಲನೆ ಮಲ್ತೆರ್. ಕೋಶಾಧಿಕಾರಿ ಚಂದ್ರಹಾಸ ದೇವಾಡಿಗ ಓದಿಯೆರ್. ಜತೆ ಕಾರ್ಯದರ್ಶಿ ಪಿ.ಎ.ಪೂಜಾರಿ ಸೊಲ್ಮೆ ಸಂದಾಯೆರ್.

9 ನೇ ಕ್ಲಾಸ್ ಗ್ ಸೇರಿನ 78 ವರ್ಷದ ಜನ

ಎಲ್ಯ ಇಪ್ಪುನಗನೇ ಅಮ್ಮೆರೆನ್ ಕಳೆವೊಂದು ಶಾಲೆ ಬುಡ್ದ್ ಕೆಲಸಗ್ ಪೋವೊಂದು ಇತ್ತಿನ ಮಗೆ ಇತ್ತೆ 78 ವರ್ಷಗ್ 9ನೇ ಕ್ಲಾಸ್ ಗ್ ಸೇರ್ದೆರ್.‌

ಭದ್ರತಾ ಸಿಬ್ಬಂದಿಯಾದ್ ಬೇಲೆ ಮಲ್ತೊಂದು ಇತ್ತಿನ ಮಿಜೋರಾಂದ ಹ್ರುಕಾನ್ ಗ್ರಾಮದ ಲಾಲ್ ರಿಂಗ್ತಾರ ಪನ್ಪುನಾರ್ ಶಾಲೆಗ್ ಸೇರ್ಪಡೆ ಆತೆರ್. ಶಿಕ್ಷಣದ ಮಿತ್ತ್ ಮೆರೆಗ್ ಇಪ್ಪುನ ಪ್ರೀತಿನೇ ಮೆರೆನ್ ಶಾಲೆಗ್ ಸೇರುಲೆಕ್ಕ ಮಲ್ದ್ಂಡ್. ಸಮವಸ್ತ್ರ ಪಾಡ್ದ್, ಮೂಜಿ ಕಿ.ಮೀ ನಡತ್ ದ್ ಶಾಲೆಗ್ ಬರೊಂದು ಉಲ್ಲೆರ್.

ರೇಡಿಯೋ ಮಣಿಪಾಲಡ್ ವಿಶ್ವ ಸ್ತನ್ಯಪಾನ ಸಪ್ತಾಹದ ಲೆಕ್ಕೊಡು ಇಸೇಸ ಪೊಲಬು ಕೊರ್ಪುನ ಲೇಸ್

ಮಣಿಪಾಲ: ರೇಡಿಯೋ ಮಣಿಪಾಲ ಸಮುದಾಯ ಬಾನುಲಿ ಕೇಂದ್ರಡ್ ಆಗಸ್ಟ್ 1-7 ಮುಟ್ಟ ವಿಶ್ವ ಸ್ತನ್ಯಪಾನ ಸಪ್ತಾಹದ ಲೆಕ್ಕೊಡು ಇಸೇಸ ಪೊಲಬು ಕೊರ್ಪುನ ಲೇಸ್ ಆಗಸ್ಟ್ 3 ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಮಣಿಪಾಲ್ ಕಾಲೇಜ್ ಆಫ್ ನರ್ಸಿಂಗ್ ಸಂಸ್ಥೆದ ಜೋಕುಲೆನ ಶುಶ್ರೂಷಾ ವಿಭಾಗದ ಸಹಾಯಕ ಪ್ರಾಧ್ಯಾಪಕೆರ್ ಡಾ.ಯಶೋದ ಸತೀಶ್ ಮೇರ್ ಪಾಲ್ ಪಡೆದ್ ಇಸೇಸ ಪೊಲಬು ಕೊರಿಯೆರೆ ಉಲ್ಲೆರ್. ಉಂದು ಸುಕ್ರಾರ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು

ತಿರುಪತಿ ದೇವಲ್ಯಗ್ 7 ತಿಂಗೊಲ್ಡ್ 827 ಕೋಟಿ ರೂ.‌ ಕಾಣಿಕೆ

ತಿರುಪತಿ ವೆಂಕಟೇಶ್ವರ ದೇವಲ್ಯಗ್ ಕರಿನ 7 ತಿಂಗೊಲ್ಡ್ ಭಾರೀ ಕಾಣಿಕೆ ಬೈದ್ಂಡ್.

ಕಾಣಿಕೆದ ಬಿಲೆ 827 ಕೋಟಿ ರೂ. ಆತ್ಂಡ್. ಜುಲೈ ತಿಂಗೊಲ್ ಒಂಜೇಟ್ ಸುಮಾರ್ 23 ಲಕ್ಷ ಭಕ್ತೆರ್ ಈ ದೇವಲ್ಯಗ್ ಬೈದೆರ್ ಪಂದ್ ವರದಿ ಆತ್ಂಡ್. ಈ ದೇವಲ್ಯನ್ ಪ್ರಪಂಚದ ಮಾಸ್ತ್ ಮಲ್ಲ ಶ್ರೀಮಂತ ದೇವಲ್ಯ ಪಂದ್ ಲೆಪ್ಪೋಲಿ. ಈ ದೇವಲ್ಯಗ್ ಪ್ರತಿ ವರ್ಷ ಕಾಸ್ ದ ಕಾಣಿಕೆ ಬೊಕ್ಕ ಲಡ್ಡು ಮಾರುನೆರ್ದ್ ಆದಾಯ ಬರ್ಪುಂಡು.

ತುಳು ಲಿಪಿಟ್ ಭಗವದ್ಗೀತೆ ಬುಡುಗಡೆ

ಹಿಂದೂ ಧರ್ಮಗ್ರಂಥವಾಯಿನ ‘ಮಹಾಭಾರತ’ದ ಭಾಗ ಆತಿನ ‘ಭಗವದ್ಗೀತೆ’ನ್ ತುಳು ಲಿಪಿನ್ ಬಳಸಾದ್ ಅನುವಾದ ಮಲ್ತ್ ದೆರ್.. ಈ ಪುಸ್ತಕನ್ ಶ್ರೀ ಕ್ಷೇತ್ರ ನರಸಿಂಹ ಸುಬ್ರಹ್ಮಣ್ಯ ಮಠದ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮಿಲು, ವಿದ್ವಾಂಸ ಲಕ್ಷ್ಮೀಶ ತೋಳ್ಪಾಡಿ ಬೊಕ್ಕ ಸುಬ್ರಹ್ಮಣ್ಯ ಮಠದ ವೇದವ್ಯಾಸ ಸಂಶೋದನಾ ಕೇಂದ್ರದ ಆನಂದತೀರ್ಥ ಸಗ್ರಿ ಅರೆನ ಸಮ್ಮುಖಡ್ ಪುಸ್ತಕ ಬಿಡುಗಡೆ ಮಲ್ತ್ ದೆರ್.

ಕೋವಿಡ್ ಸಮಯಡ್ ಇಲ್ಲಲೆ ಇತ್ತಿನ ಪೊರ್ತುಡ್ ಅಪರ್ಣಾ ಕೊಡಂಕೇರಿ ತನ್ನ ಅಣ್ಣೆ ಮುಕುಂದ ಕಲ್ಪಾದ್ ಕೊರ್ನ ತುಳು ಲಿಪಿನ್ ಅಭ್ಯಾಸ ಮಲ್ತ್ ಬರೆಯೆರೆ ಶುರು ಮಲ್ತೆರ್.

ಪುಸ್ತಕದ ಪ್ರತೀ ಪುಟಟ್ ಎಡ ಭಾಗಡ್ ಸಂಪೂರ್ಣ ತುಳು ಲಿಪಿನ್ ಬಳಕೆ ಮಲ್ತ್ ಶ್ಲೋಕ ಬೊಕ್ಕ ಸಾರನ್ ಬರೆತೆರ್. ಬಲ ಭಾಗಡ್ ಕನ್ನಡ ಲಿಪಿ ಬಳಕೆ ಮಲ್ತ್ ತುಳುಟ್ ಶ್ಲೋಕದ ಅರ್ಥನ್ ಬರೆತೆರ್. ತುಳು ಲಿಪಿಟ್ ಭಗವದ್ಗೀತೆನ್ ಬರೆತಿನ ಉಂದುವೆ ಫಸ್ಟ್. ತುಳು ಭಾಷೆದ ಬೆಳವಣಿಗೆಗ್ ಅಪರ್ಣಾ ಕೊಡಂಕೇರಿ ಈ ಸಾಧನೆದ ಮೂಲಕ ಕೊಡುಗೆ ಕೊರ್ತೆರ್.

ಪಂಜ ಲಯನ್ಸ್ ಕ್ಲಬ್ ಮುತಾಲಿಕೆಡ್ ನೇಜಿ ನಾಟಿ ಪ್ರಾತ್ಯಕ್ಷಿತೆ ಬೊಕ್ಕ ಮಾಹಿತಿ ಕಾರ್ಯಗಾರ ಲೇಸ್

ಲಯನ್ಸ್ ಕ್ಲಬ್ ಪಂಜ ನೆತ್ತ ಮುತಾಲಿಕೆಡ್ ನೇಜಿ ನಾಟಿ ಬೊಕ್ಕ ಮಾಹಿತಿ ಕಾರ್ಯ ಲೇಸ್ ಸುರೇಶ್ ಕುಮಾರ್ ನಡ್ಕ ನೆರೆನ ಕಂಡಡ್ ಆ.2 ತಾರೀಕ್‌ಗ್ ನಡತ್ಂಡ್.

ಸಂಪನ್ಮೂಲ ವ್ಯಕ್ತಿಯಾದ್ ಜೆ.ಸಿ.ಐ ದ ವಲಯ ತರಬೇತುದಾರರಾಯಿನ ಜೇಸಿ ತೀರ್ಥನಂದ ಕೊಡಂಕಿರಿ ಮಾಹಿತಿ ಕೊರಿಯೆರ್. ಪ್ರಕೃತಿ ಯುವತಿ ಮಂಡಲ ಸದಸ್ಯೆರ್ ಪಾಲ್ ಪಡೆದ್ ಈ ಮಾಹಿತಿದ ಪ್ರಯೋಜನನ್ ಪಡೆಯೊಂಡೆರ್. ಶಾಲೆದ ಸ್ಕೌಟ್ ಬೊಕ್ಕ ಗೈಡ್ ಜೋಕ್ಲೆಗ್ ವಿಶೇಷ ತರಬೇತಿ ಬೊಕ್ಕ ಪ್ರಾತ್ಯಕ್ಷಿಕೆ ಕೊರಿಯೆರ್.

ಲೇಸ್‌ದ ಗುರ್ಕಾರ್ಮೆನ್ ಲಯನ್ಸ್ ದಿಲೀಪ್ ಬಾಬ್ಲುಬೆಟ್ಟು ವಹಿಸೊಂಡೆರ್. ಬಿನ್ನೆರಾದ್ ವಲಯಧ್ಯಕ್ಷೆರ್ ಸಂತೋಷ್ ಜಾಕೆ, ತರಬೇತುದಾರರಾದ್ ಜೇಸಿ ತೀರ್ಥನಂದ ಕೊಡಂಕಿರಿ, ಪ್ರಕೃತಿ ಯುವತಿ ಮಂಡಲ ಉಪಾಧ್ಯಕ್ಷೆರ್ ರಾಜೀವಿ ರೈ, ಲೇಸ್‌ದ ಪ್ರಯೋಜಕೆರ್ ಆಯಿನ ಲಯನ್ ಸುರೇಶ್ ಕುಮಾರ್ ನಡ್ಕ ಬೊಕ್ಕ ಖಜಾಂಜಿ ಲ|| ಆನಂದ ಗೌಡ ಜಳಕದಹೊಳೆ, ವಾಸುದೇವ ಮೇಲ್ಪಾಡಿ ಲೇಸ್‌ಡ್ ಪಾಲ್ ಪಡೆದ್ ಇತ್ತೆರ್.

ಲ|| ಕುಸುಮಾಧರ ಕೆಮ್ಮೂರು ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಲ|| ವಾಸುದೇವ ಮೇಲ್ಪಾಡಿ ಸೊಲ್ಮೆ ಸಂದೈತ ಮಲ್ತೆರ್.

You Missed