Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಅಕ್ಟೋಬರ್‌ಡ್ “ಮಿಸ್ಟರ್ ಮದಿಮೆಯೆ” ಪಿಕ್ಚರ್ ರಿಲೀಸ್

ಕುಡ್ಲ: ಎಮ್ ಎಮ್ ಎಮ್ ಗ್ರೂಪ್ಸ್ ಬ್ಯಾನರ್ ದ ನಿರೆಲ್ಡ್ ನಿರ್ಮಾಣ ಆವೊಂದಿಪ್ಪುನ ಪೊಸ ಸಿನೆಮಾ ಸಿನಿಮಾ ‘ಮಿಸ್ಟರ್ ಮದಿಮಾಯೆ’ ಸಿನಿಮಾದ ಚಿತ್ರೀಕರಣ ಸಂಪೂರ್ಣ ಆದ್ ಸೆನ್ಸಾರ್ ಹಂತಡ್ ಉಂಡು. ಸಿನಿಮಾ ಅಕ್ಟೋಬರ್‌ಡ್ ಕರಾವಳಿ ಜಿಲ್ಲೆಯಾದ್ಯಂತ ನಮ ತೂವೆರೆ ಉಲ್ಲ. ಸಿನೆಮಾಡ್ ಒಂಜೆ ಹಂತಡ್ ಸುಮಾರ್ 20 ದಿನ ಚಿತ್ರೀಕರಣ ಆತ್‌ಂಡ್ ಪಂದ್ ನಿರ್ಮಾಪಕೆರ್ ತೆರಿಪಾದೆರ್.

ಮೂಲ್ ಮುಖ್ಯವಾದ್ ಸಿನಿಮಾಡ್ ಪೊಸ ಕಲಾವಿದೆರೆಗ್ ಅವಕಾಶ ಕೊರ್ತೆರ್. ಪ್ರತಿಭಾವಂತ ತಂಡ ಮೂಲ್ ಸೇರ್ದ್ ಕೆಲಸ ಮಲ್ತ್ ದ್ಂಡ್. ನವೀನ್ ಜಿ.ಪಿ ಅರೆನ ನಿರ್ದೇಶನದ ಈ ಸಿನಿಮಾಡ್ ಹೀರೊ ಆದ್ ಸಾಯಿ ಕೃಷ್ಣ ಕುಡ್ಲ ಮೇರ್ ನಟನೆ ಮಲ್ತ್ ದೆರ್. ಮಲ್ಲ ಪಾತ್ರಡ್ ಶ್ವೇತಾ ಸುವರ್ಣ, ರವಿಕಾಂತ್ ಪೂಜಾರಿ, ಜ್ಯೋತಿಷ್ ಶೆಟ್ಟಿ, ಸುನೀಲ್ ನೆಲ್ಲಿಗುಡ್ಡೆ, ಕಾಮಿಡಿ ಕಿಲಾಡಿಗಳು ಖ್ಯಾತಿದ ಪಿಂಕಿ ರಾಣಿ, ರವಿ ರಾಮಕುಂಜ ಕಾಮಿಡಿ ಗ್ಯಾಂಗ್ ಖ್ಯಾತಿದ ಮನೀಷ್ ಶೆಟ್ಟಿ ಉಪ್ಪಿರ, ಅಕ್ಷಯ್ ಸರಿಪಲ್ಲ, ಸಂದೀಪ್ ಶೆಟ್ಟಿ ರಾಯಿ, ಶರಣ್ ಕೈಕಂಬ, ಪ್ರವೀಣ್ ಮರ್ಕಮೆ, ಸವ್ಯರಾಜ್, ಪೃಥ್ವಿ ಕುಂದರ್ ಪೊಳಲಿ ಮೊಕುಲು ಉಲ್ಲೆರ್.

ಪೋಸ್ಟರ್ ಬಿಡುಗಡೆ
ತುಳು ಸಿನಿಮಾರಂಗಡ್ ಇತಿಹಾಸಡೆ 75 ಫೀಟ್ ಎತ್ತರದ ಫಸ್ಟ್ ಲುಕ್ ಪೋಸ್ಟರ್ ಆಗೋಸ್ಟ್ 5 ದಾನಿ ಕದ್ರಿ ಮೈದಾನಡ್ ಬಿಡುಗಡೆ ಆಯೆರೆ ಉಂಡು. ಚಿತ್ರರಂಗದ ಖ್ಯಾತ ನಿರ್ದೇಶಕರಾಯಿನ ದೇವದಾಸ್ ಕಾಪಿಕಾಡ್, ಕಿಶೋರ್ ಡಿ ಶೆಟ್ಟಿ, ಪ್ರಕಾಶ್ ಪಾಂಡೇಶ್ವರ್, ಗಂಗಾಧರ ಶೆಟ್ಟಿ ಅಳಕೆ, ಸಾಯಿಕೃಷ್ಣ ಕುಡ್ಲ, ಭೋಜರಾಜ ವಾಮಂಜೂರು, ಬಾಳ ಜಗನ್ನಾಥ ಶೆಟ್ಟಿ, ಕಾರ್ಪೊರೇಟರ್ ಮನೋಹರ ಶೆಟ್ಟಿ, ಪಮ್ಮಿ ಕೊಡಿಯಾಲ್ ಬೈಲ್, ಪ್ರಕಾಶ್ ತುಮಿನಾಡು, ಸುನಿಲ್ ನೆಲ್ಲಿಗುಡ್ಡೆ, ಸ್ವರಾಜ್ ಶೆಟ್ಟಿ, ರೋಶನ್ ಶೆಟ್ಟಿ, ತ್ರಿಶೂಲ್ ಶೆಟ್ಟಿ, ರಾಜೇಶ್ ಈ ಲೇಸ್ ಡ್ ಪಾಲ್ ಪಡೆಯರೆ ಉಲ್ಲೆರ್.

ಮಿಥುನ್ ಕೆ ಎಸ್ ಬೊಕ್ಕ ರಾಜೇಶ್ ಫೆರಾವೊ ನಿರ್ಮಾಣದ ಈ ‘ಮಿಸ್ಟರ್ ಮದಿಮಾಯೆ’ ಸಿನಿಮಾಗ್ ಕೆ ಪಿ ಮಿಲನ್ ಸಂಗೀತ ಬೊಕ್ಕ ಪ್ರಶಾಂತ್ ಧರ್ಮಸ್ಥಳ ಅರೆನ ಛಾಯಾಗ್ರಹಣ ಉಂಡು. ನವೀನ್ ಆರ್ಯನ್ ಬೊಕ್ಕ ವಿನೋದ್ ನೃತ್ಯ ಸಂಯೋಜನೆ ಮಲ್ತ್ ದೆರ್. ಕೌರವ್ ವೆಂಕಟೇಶ್ ಮೇರೆನ ಸಾಹಸ, ಸುಕೇಶ್ ಶೆಟ್ಟಿ ಜಿ.ಎಸ್ ಗುರುಪುರ ಸಾಹಿತ್ಯ, ಸುಜೀತ್ ನಾಯಕ್ ಸಂಕಲನ ಈ ಚಿತ್ರಡ್ ಉಂಡು. ವಸ್ತ್ರಾಲಂಕಾರ ನಿಖಿತಾ ಕೋಟ್ಯಾನ್, ನಿರ್ಮಾಣ ನಿರ್ವಾಹಕೆರ್ : ಶ್ರೇಯಸ್ ಶೆಟ್ಟಿ, ಚಿತ್ರ ಮೇಲ್ವಿಚಾರಕೆರ್: ಹೆರಾಲ್ಡ್ ವಾಲ್ಟರ್, ಸೌಮ್ಯ ಚೇತನ್, ಸೌಜನ್ಯ ಶೆಟ್ಟಿ ಕಾರ್ಯಕಾರಿ ನಿರ್ಮಾಪಕರಾದ್ ಉಲ್ಲೆರ್.

ಮದಿಮೆದ ಲೇಸ್ ದ ಸುತ್ತ ನಡಪುನ ಕಥೆಕ್ಕ್ ಹಾಸ್ಯದ ಲೇಪನ ಪಾರ್ದೆರ್. ಒಟ್ಟಿಗೆ ಸೆಂಟಿಮೆಂಟ್‌ಲ ಉಂಡು. ಪ್ರೇಕ್ಷಕರೆನ ಅಭಿರುಚಿನ್ ತೆರಿದ್ ಸಿನಿಮಾದ ಕತೆ ಉಂಡು. ಕ್ಲೈಮಾಕ್ಸ್ ವಿಭಿನ್ನತೆಲ ಉಂಡು, ಸಿನಿಮಾ ಪ್ರೇಕ್ಷಕರೆಗ್ ಸಂಪೂರ್ಣ ಮನರಂಜನೆ ಕೊರಿಯೆರೆ ಉಂಡು ಪಂದ್ ಸಿನಿಮಾದ ನಿರ್ದೇಶಕ ನವೀನ್ ಪೂಜಾರಿ ತೆರಿಪಾದೆರ್. ಅಕ್ಟೋಬರ್ ತಿಂಗೊಲ್ ಡ್ ಸಿನೆಮಾ ಬಿಡುಗಡೆ ಮಲ್ಪುವ ಪಂದ್ ಚಿತ್ರ ತಂಡ ತೆರಿಪಾದೆರ್.

ರಾಜಬೂಡು ಬೆಂಗಲೂರುದ ಅರಮನೆ ಮೈದಾನಡ್ ನಡಪರೆ ಉಂಡು ಕಂಬುಲದ ಗೌಜಿ

ಬೆಂಗ್ಲೂರ್‌: ತುಳುನಾಡ ಕಂಬುಲದ ಇತಿಹಾಸಡೇ ಸುರುತ ಸರ್ತಿ ರಾಜಬೂಡು ಬೆಂಗ್ಲೂರ್‌ದ ಅರಮನೆ ಮೈದಾನಡ್ ನಡಪರೆ ಉಂಡು.

ಈ ಕಂಬುಲದ ಪುದರ್ ರಾಜ ಮಹಾರಾಜ ಜಯಚಾಮರಾಜೇಂದ್ರ ಒಡೆಯರ್ ಜೋಡುಕೆರೆ ಕಂಬಳ ನಡಪೆರೆ ಉಂಡು. ತುಳುನಾಡ್‌ದ ಕಂಬುಲದ ಎರುಕುಲು ಬೆಂಗ್ಲೂರ್ ದಂಚಿ ಪೋಯರೆ ಉಂಡು.

ಪುತ್ತೂರ್ ಶಾಸಕೆರ್ ಅಶೋಕ್ ಕುಮಾರ್ ರೈ ಮುತಾಲಿಕೆಡ್ ನಡಪರೆ ಉಪ್ಪುನ ಈ ಕಂಬುಲಗ್ ಮೈಸೂರು ಅರಸೆರೆರ್ದ್ ಅನುಮತಿ ತಿಕ್‌ದ್‌ಂಡ್.

ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಜನಪ್ರಿಯವಾದ್ ಇಪ್ಪುನ ಈ ಕಂಬುಲ, ಕೃಷಿ ವರ್ಗದಕುಲು ಕೆಯಿ ಕೊಯಿನೆರ್ದ್ ಬೊಕ್ಕ ಮನೋರಂಜನೆಗಾದ್ ತುಳುವೆರ್ ಮಲ್ತೊಂದಿತ್ತಿನ ಒಂಜಿ ಗೊಬ್ಬು ಉಂದು. ಕಾರ್ತಿಕ ಮಾಸದ ದೀಪಾವಳಿ ಪರ್ಬದ ಬೊಕ್ಕ ಚಳಿಗಾಲಡ್ ಶುರು ಆಪಿನ ಈ ಜಾನಪದ ಕ್ರೀಡೆನ್ ಮಾರ್ಚ್ ತಿಂಗೊಲ್ ಮುಟ ಒಡಿಪು, ದ.ಕ ಬೊಕ್ಕ ಕಾಸ್ರೋಡು ಜಿಲ್ಲೆದ ಬೇತೆ ಬೇತೆ ಭಾಗಡ್ ಆಯೋಜನೆ ಮಲ್ಪುವೆರ್.

ಬಡವೆರ್ನ ಸೇವೆಡ್ ಭಗವಂತನ್ ತೂವೊಡು: ಶೇಖರ್ ಕೆ. ಕರ್ಕೇರ

ಮುಲ್ಕಿ : ಸ್ವರ್ಣ ಸೌಹಾರ್ದ ಸಹಕಾರಿ ಸಂಘ(ನಿ) ಬೊಕ್ಕ ಘಾಟ್ಗೆ ಕರ್ಕೇರ ಪವರ್ ಇಂಡಸ್ಟ್ರೀಸ್ ಅಂಚೆನೆ ಶ್ರೀ ನಾರಾಯಣ ಗುರು ಸಮಾಜ ಸೇವಾ ಸಂಘ (ರಿ) ಕೆ. ಎಸ್ ರಾವ್ ನಗರ ಮೊಕ್ಲೆನ ಒಟ್ಟುಸೇರಿಗೆಡ್ ಕುಡ್ಲದ ಎ.ಜೆ. ಆಸ್ಪತ್ರೆದ ವೈದ್ಯೆರೆರ್ದ್ ಧರ್ಮಾರ್ಥ ಆರೋಗ್ಯ ತಪಾಸಣೆ ಬೊಕ್ಕ ದಂತ ಚಿಕಿತ್ಸಾ ಶಿಬಿರ ಆ. 6 ಐತಾರದಾನಿ ನಡತ್ಂಡ್.

ಶಿಬಿರಡ್ ಸಾದಾ ಆರೋಗ್ಯ ತಪಾಸಣೆ, ಕೆಬಿ, ಮೂಂಕು ಬೊಕ್ಕ ದೊಂಡೆ (ENT) ತಪಾಸಣೆ, ಚರ್ಮರೋಗ ತಪಾಸಣೆ, ಕಣ್ಣ್ ಟೆಸ್ಟ್, ಡಯಾಬಿಟೀಸ್, ಬಿಪಿ ತಪಾಸಣೆ, ಹೃದಯ ರೋಗ ತಪಾಸಣೆ (ECG) ಮಲ್ತೆರ್.

ವೈದ್ಯಕೀಯ ಶಿಬಿರ ಉದಿಪನದ ಲೇಸ್ ದ ಗುರ್ಕಾರ್ಮೆನ್
ಸ್ವರ್ಣ ಸೌಹಾರ್ದ ಸಹಕಾರಿ ಸಂಘದ ಅಧ್ಯಕ್ಷೆರ್ ಶೇಖರ್ ಕೆ ಕರ್ಕೇರ ಒಯಿಸ್ ದಿತ್ತೆರ್. ಈ ಪೊರ್ತುಡು ಪಾತೆರಿನ ಆರ್, ಬಡವೆರ್ನ ಕಷ್ಟ ಸುಖಕ್ಕ್ ಸ್ಪಂದನೆ ಕೊರ್ದು ಅಕಲ್ನ ಸೇವೆನ್ ನಿರಂತರ ಮಲ್ತ್ಂಡ ಅಯಿಟ್ಟೇ ನಮ ದೇವೆರೆನ್ ತೂವೊಲಿ ಪಂದ್ ಪಂಡೆರ್.

ಶ್ರೀ ನಾರಾಯಣ ಗುರು ಸಮಾಜ ಸೇವಾ ಸಂಘ (ರಿ) ಕೆ ಎಸ್ ರಾವ್ ನಗರದ ಗೌರವಾಧ್ಯಕ್ಷೆರ್ ರಾಘವ ಎ.ಸುವರ್ಣ ತುಡರ್ ಅರ್ಲಾದ್ ಲೇಸ್ ಗ್ ಚಾಲನೆ ಕೊರಿಯೆರ್.

ಈ ಪೊರ್ತುಡು ಕಲ್ಪುನೆಟ್ಟ್ ಎಡ್ಡೆ ಸಾಧನೆ ಮಲ್ತಿನ ಐನ್ ಜನ ವಿದ್ಯಾರ್ಥಿಲೆಗ್ ಸ್ಕಾಲರ್ ಶಿಪ್ ಚೆಕ್ ಪಟ್ಟಿಯೆರ್. ಎಜೆ ಆಸ್ಪತ್ರೆದ ವೈದ್ಯಕೀಯ ತಂಡದ ರಾಜೇಶ್ ಮೆರೆಗ್ ನೆಂಪು ಕಾಣಿಕೆ ಕೊರ್ದು ಗೌರವ ಕೊರಿಯೆರ್.

ಲೇಸ್ಡ್  ಮಲ್ಲ ಬಿನ್ನೆರಾದ್ ಶ್ರೀ ನಾರಾಯಣ ಗುರು ಸಮಾಜ ಸೇವಾ ಸಂಘ (ರಿ) ಕೆ ಎಸ್ ರಾವ್ ನಗರ ಅಧ್ಯಕ್ಷೆರ್ ಮಹಾಬಲ ಎನ್. ಸನಿಲ್ ಬೊಕ್ಕ ಮಹಿಳಾ ವಿಭಾಗದ ಅಧ್ಯಕ್ಷೆರ್ ಚಂದ್ರಾಕ್ಷಿ ಎಸ್. ಸಾಲ್ಯಾನ್ ಬೊಕ್ಕ ಕುಡ್ಲ ಎಜೆ ಆಸ್ಪತ್ರೆ ಮೆಡಿಸಿನ್ ವಿಭಾಗದ ಮುಖ್ಯಸ್ಥೆರ್ ಡಾ. ಹೀರಲ್ ಇತ್ತೆರ್.

ಈ ಶಿಬಿರಡ್ ಒಟ್ಟು 156 ಶಿಬಿರಾರ್ಥಿಲು ಪ್ರಯೋಜನ ದೆತೊಂಡೆರ್.

ಹರಿಶ್ಚಂದ್ರ ಎಸ್. ಕೋಟ್ಯಾನ್ ಬಿನ್ನೆರೆನ್ ಎದ್ಕೊಂಡೆರ್. ಚಂದ್ರಿಕಾ ಅಂಚನ್ ಬೊಕ್ಕ ರಂಜಿತಾ ಹರಿಶ್ಚಂದ್ರ ಎಸ್. ಕೋಟ್ಯಾನ್ ದೇವೆರೆನ್ ಸುಗಿತೆರ್. ಚಂದ್ರಿಕಾ ಅಂಚನ್ ಸೊಲ್ಮೆ ಸಂದಾಯೆರ್. ಸ್ವರ್ಣ ಸೌಹಾರ್ದ ಸಹಕಾರಿ ಸಂಘದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಭಾಸ್ಕರ್ ಅಮೀನ್ ತೋಕೂರು ಲೇಸ್ ಸುಧಾರಿಕೆ ಮಲ್ತೆರ್.

ದಯಾ ನಾಯಕ್ ಟೀಮ್ ದ ಕುಡೊಂಜಿ ಮಲ್ಲ ಸಾಹಸ

ಬೊಂಬೈ : ಅಂಗಡಿಗ್ ಪೊಗ್ಗುದು ಅಲ್ತ ಸಿಬ್ಬಂದಿಗ್ ಪಿಸ್ತೂಲ್ ತೋಜಾದ್ ದರೋಡೆ ಮಲ್ತಿನ ಆರೋಪಿನ್ ಎನ್ ಕೌಂಟರ್ ಸ್ಪೆಷಲಿಸ್ಟ್ ಪುಗರ್ತೆದ, ಬಾಂದ್ರಾ ಕ್ರೈಮ್ ಬ್ರಾಂಚ್ ದ ಅಧಿಕಾರಿ ದಯಾ ನಾಯಕ್ ಮೆರೆನ ಪೊಲೀಸ್ ಕೂಟದಕುಲು ಘಟನೆ ನಡತಿನ ಕೆಲವೇ ಗಂಟೆಡ್ ಅರೆಸ್ಟ್ ಮಲ್ದೆರ್.

ಜಮ್ಮುಕಾಶ್ಮೀರ ಮೂಲದ ರಿಯಾಜ್ ಅಹಮ್ಮದ್ ಅರೆಸ್ಟ್ ಆಯಿನ ಆರೋಪಿ.

ಅಂಗಡಿದ ಮಾಲೀಕೆರ್ ಕೊರಿನ ದೂರುದ ಆಧಾರೊಡು, ದರೋಡೆ ಮಲ್ತಿನ ಆರೋಪಿನ್ ಬಾಂದ್ರಾ ವೆಸ್ಟ್ ರೈಲ್ವೆ ಸ್ಟೇಷನ್ ದಲ್ಪ ದಯಾ ನಾಯಕ್ ಮೆರೆನ ಮುತಾಲಿಕೆದ ಯುನಿಟ್ 9 ಪೊಲೀಸೆರ್ ಅರೆಸ್ಟ್ ಮಲ್ತ್ ದ್ ಪೊಲೀಸ್ ಸ್ಟೇಶನ್ ಗ್ ಲೆತೊಂದು ಬತ್ತ್ ದಿತ್ತೆರ್. ಆರೋಪಿ ದರೋಡೆ ಮಲ್ದಿನೆನ್ ಒತ್ತೊಂದೆ. ಆಯನ ಕೈರ್ದ್ ಮೊಬೈಲ್ ಸೇರ್ದ್ ಕೆಲವು ಸೊತ್ತುಲೆನ್ ವಶಕ್ಕ್ ದೆತೊಂದೆರ್.

ಚಿತ್ರನಟೆ ವಿಜಯರಾಘವೇಂದ್ರ ಮೆರೆನ ಬೊಡೆದಿ ಹಾರ್ಟ್ ಅಟ್ಯಾಕ್ ಡ್ ತೀರ್ ಪೋಯೆರ್

ಚಿತ್ರ ನಟೆ ವಿಜಯರಾಘವೇಂದ್ರ ಮೆರೆನ ಬೊಡೆದಿ ಸ್ಪಂದನಾ ಮೇರ್ ತಿಗಲೆ ಬೇನೆಡ್ ತೀರ್‌ ಪೋಯೆರ್.

ಬ್ಯಾಂಕಾಕ್ ಪ್ರವಾಸಡ್ ಇಪ್ಪುನಗ ಸ್ಪಂದನಾ ಮೆರೆಗ್ ತಿಗಲೆ ಬೇನೆ ಬತ್ತ್ ದ್ ತೀರ್‌ಪೋಯೆರ್.

ವಿಜಯರಾಘವೇಂದ್ರ ಬೊಕ್ಕ ಸ್ಪಂದನಾ ಮೆರೆಗ್ ಶೌರ್ಯ ಪನ್ಪಿನ ಮಗೆ ಉಲ್ಲೆರ್. 2016 ಟ್ ಬುಡುಗಡೆ ಆಯಿನ “ಅಪೂರ್ವ” ಪಿಚ್ಚರ್‌ಡ್ ಸ್ಪಂದನಾ ಮೇರ್ ಅತಿಥಿ ಕಲಾವಿದೆ ಆದ್ ನಟನೆ ಮಲ್ತ್ ಇತ್ತೆರ್. ಸ್ಪಂದನಾ ಮೇರ್ ಪೊಲೀಸ್ ಅಧಿಕಾರಿ ಶಿವರಾಮ್ ಮೆರೆನ ಮಗಲ್.

ಯಕ್ಷತರಂಗ ಬೆಂಗಳೂರು(ರಿ) ನಿರೆಲ್ಡ್ ಶಾಲೆದ ಜೋಕುಲೆಗ್ ಸಮವಸ್ತ್ರ ಪಟ್ಟುನ ಲೇಸ್

ರಾಜಧಾನಿ ಬೆಂಗಳೂರುದ ತುಳುವ ಜವನೆರ್ನ ಪೆರ್ಮೆದ ಯಕ್ಷಗಾನ ಸಂಘಟನೆ “ಯಕ್ಷತರಂಗ ಬೆಂಗಳೂರು (ರಿ )” ನಿರೆಲ್ಡ್ ತನ್ಕುಲೆಗ್ ಯಕ್ಷಗಾನ ತರಬೇತಿ ನಡಪಾವರೆ ಜಾಗೆದ ಆಶ್ರಯ ಕೊರ್ತಿನ ಬೆಂಗಳೂರುದ ರಘುವನ ಹಳ್ಳಿದ ಶ್ರೀ ಸಿದ್ದಗಂಗಾ ವಿದ್ಯಾ ಕೇಂದ್ರಡ್ ಕಲ್ತೊಂದುಪ್ಪುನ ಕಾರ್ಮಿಕೆರೆನ ಜೋಕುಲೆಗ್ ಸಮವಸ್ತ್ರ ಪಟ್ಟುನ ಲೇಸ್ ನಡತ್ಂಡ್.

ಈ ಪೊರ್ತುಡು ಶಾಲೆದ ಸ್ಥಾಪಕ ಕುಟುಂಬದ ಸದಸ್ಯೆರ್ ಬೊಕ್ ಶಿಕ್ಷಕೆರಾಯಿನ ಸಿ. ಎನ್. ನಾಗರಾಜ್, ಯಕ್ಷ ತರಂಗದ ಗುರ್ಕಾರ್ಲು ಪಳ್ಳಿ ವಿಶ್ವನಾಥ ಶೆಟ್ಟಿ, ಸಂಚಾಲಕೆ ಗೋಪಾಲ್ ಪಟ್ಟೆ, ಕಾರ್ಯಂತೆ ಸುಕೇಶ್ ಶೆಟ್ಟಿ ಮಾಳ, ಪಣವುದ ಗುರ್ಕಾರ್ಲು ನಿರಂಜನ್ ಸುವರ್ಣಪಟ್ಟೆ, ಸಂತೋಷ್ ಶೆಟ್ಟಿ ಕುಚ್ಚೂರು, ಸುರೇಂದ್ರ ಪೂಜಾರಿ, ಪ್ರದೀಪ್ ಶೆಟ್ಟಿ ಮಾಳ, ಚಿದಂಬರ ಶೆಟ್ಟಿ, ಸಿದ್ದಗಂಗಾ ಶಾಲೆದ ಜೋಕುಲು ಪಾಲ್ ಪಡೆದಿತ್ತೆರ್.

ರಾಜಧಾನಿ ಬೆಂಗಳೂರುದ ತುಳುವ ಜವನೆರ್ನ ಪೆರ್ಮೆದ ಸಂಘಟನೆ “ಯಕ್ಷತರಂಗ ಬೆಂಗಳೂರು (ರಿ )” ಕರಿನ 12 ವರ್ಷದಿಂಚಿ ಯಕ್ಷಗಾನ ತರಬೇತಿ, ಪ್ರದರ್ಶನ ಸೇರ್ದ್ ಮಸ್ತ್ ಸಮಾಜ ಸೇವೆದ ಬೇಲೆನ್ ಮಲ್ತೊಂದು ಬೈದ್ಂಡ್. ಮಸ್ತ್ ಜೋಕುಲು, ಜವನೆರ್ ಮೂಲು ತರಬೇತಿ ಪಡೆದ್ ಯಶಸ್ವಿ ಕಲಾವಿದೆರಾದ್ ಮೆಂಚೊಂದುಲ್ಲೆರ್. ಶಾಲೆದ ಜೋಕುಲೆಗ್, ಅನಾಥಾಶ್ರಮದ ಜೋಕುಲೆಗ್ ಮೂಲು ಉಚಿತವಾದ್ ಯಕ್ಷಗಾನ ತರಬೇತಿ ನಡತೊಂದು ಉಂಡು.

ಹಿರಿಯ ನಾಗರಿಕರೆನ್ ಭೇಟಿ ಮಲ್ತಿನ ಕುಡ್ಲ ಪೊಲೀಸೆರ್

ಕುಡ್ಲ : ಕುಡ್ಲ ಪೇಂಟೆದ ಪೊಲೀಸೆರ್ ಇನಿ ಸುಮಾರ್ 438 ಹಿರಿಯ ನಾಗರಿಕೆರ್ನ ಇಲ್ಲಡೆ ಭೇಟಿ ಕೊರ್ದು ಅಕ್ಲೆನ ಸಮಸ್ಯೆಲೆನ್ ತೆರಿಯೊಂದು ಅಕ್ಲೆಗ್ ಸಮಾಧಾನ ಬೊಕ್ಕ ಧೈರ್ಯದ ಪಾತೆರ ಪನ್ತೆರ್.

ಉರ್ವ ಪೊಲೀಸ್ ಠಾಣೆದ ಸಿಬ್ಬಂದಿಲು 100 ಇಲ್ಲಡೆ ಕೊರ್ದು ಹಿರಿಯ ನಾಗರಿಕೆರೆನ್ ಭೇಟಿ ಮಲ್ದೆರ್.

 

ಉದ್ಯಮಿ ಕಟ್ವಾನರ್ದ ಲಾಗಿದ್ ತೀರ್ ಪೋಯೆರ್

ಕುಡ್ಲ : ಉದ್ಯಮಿ ಒರಿ ಕಟ್ವಾನರ್ದ್ ಲಾಗಿದ್ ಆತ್ಮಹತ್ಯೆ ಮಲ್ತಿನ ಘಟನೆ ಬೆಂದೂರ್‌ವೆಲ್ ಕೈತಲ್ ಡ್ ಇನಿ ನಡತ್ಂಡ್.

ಬಿಲ್ಡರ್, ಯುವ ಉದ್ಯಮಿ ಮೋಹನ್ ಅಮೀನ್ (48)ತೀರ್ ಪೋಯಿನಾರ್  ಪಂದ್ ತೆರಿದ್ ಬೈದ್ಂಡ್. ಮೇರ್ ಕಟ್ವಾನದ. 8 ನೇ ಮಾಲಿಗೆರ್ದ್ ಲಾಗಿದ್ ಆತ್ಮಹತ್ಯೆ ಮಲ್ತ್ ದೆರ್. ನೆಕ್ಕ್ ಕಾರಣ ದಾದ ಪಂದ್ ತೆರಿದ್ ಬೈದಿಜಿ.

ಕದ್ರಿ ಪೊಲೀಸೆರ್ ಪರಿಶೀಲನೆ ಮಲ್ತ್ ದ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.

ಇಲ್ಲ ಇಲ್ಲಡ್ ತಾಳಮದ್ದಳೆ ಆವೊಡು : ಹರಿಕೃಷ್ಣ ಪುನರೂರು

ಕಿನ್ನಿಗೋಳಿ: ತಾಳಮದ್ದಳೆದ ಮುಕೇನ ನಮ್ಮ ಜೋಕುಲೆಗ್
ಧಾರ್ಮಿಕ ಪ್ರಜ್ಞೆ ಪುಟ್ಟಾವುನ ಕೆಲಸ ಆವೊಡು. ಇಂಚಿನ ಲೇಸ್ ಗ್ ಹಿರಿಯೆರ್ ಜೋಕುಲೆನ್ ಲೆತೊಂದು ಪೋದು ರಾಮಾಯಣ, ಮಹಾಭಾರತದಂಚಿನ ಕತೆತ್ತ ಪಾತ್ರೊಲೆನ್ ಪರಿಚಯ ಮಲ್ಪೊಡು. ಅಂಚೆನೆ ಪ್ರತಿ ಇಲ್ಲ ಇಲ್ಲಡ್ ಲ ತಾಳಮದ್ದಳೆ ಕೂಟ ನಡಪೊಡು ಪಂದ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು ತೆರಿಪಾಯೆರ್.

ಆರ್ ಯಕ್ಷಲಹರಿ (ರಿ) ಕಿನ್ನಿಗೋಳಿ ಬೊಕ್ಕ ಕರ್ಣಾಟಕ ಬ್ಯಾಂಕ್ ಒಟ್ಟುಸೇರಿಗೆಡ್ ಯುಗಪುರುಷ ದ ಚಾವಡಿಡ್ ನಡತೊಂದುಪ್ಪುನ 5 ನೇ ದಿನತ್ತ ತಾಳಮದ್ದಳೆ ಲೇಸ್ ಡ್ ದಿ.ಬಲಿಪ ನಾರಾಯಣ ಭಾಗವತೆರ್ನ ನೆಂಪು ಲೇಸ್ ಡ್ ಪಾತೆರಿಯೆರ್.

ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಹರಿನಾರಾಯಣ ದಾಸ ಅಸ್ರಣ್ಣ ಆಶೀರ್ವಚನ ಮಲ್ತೆರ್.

ಲೇಖಕೆರ್, ಯಕ್ಷ ಸಂಗಮ ಬೆದ್ರ ನೆತ್ತ ಅಧ್ಯಕ್ಷೆರ್ ಶಾಂತಾರಾಮ್ ಕುಡ್ವ ಮೇರ್ ದಿ. ಬಲಿಪ ನಾರಾಯಣ ಭಾಗವತೆರ್ನ ಸಂಸ್ಮರಣೆದ ಪಾತೆರ ಮದಿತೆರ್.

ಈ ಪೊರ್ತುಡು ಹಿರಿಯ ವೇಷಧಾರಿ ರವಿ ಶೆಟ್ಟಿ ಸಂಕಲಕರಿಯ ಮೆರೆಗ್ ಮಾನಾದಿಗೆ ನಡತ್ಂಡ್.

ಮಲ್ಲ ಬಿನ್ನೆರಾದ್ ಭುವನಾಭಿರಾಮ ಉಡುಪ, ಉದ್ಯಮಿ ಎಂ.ಕೆ.ಉಜ್ವಲ್, ನಾಗರಾಜ ಆಚಾರ್ಯ, ರವಿಶಂಕರ ಮಲ್ಯ ಇತ್ತೆರ್. ಎಳತ್ತೂರು ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಸಂತೋಷ್ ಕುಮಾರ್ ಹೆಗ್ಡೆ ಅಧ್ಯಕ್ಷತೆ ಒಯಿಸ್ ದಿತ್ತೆರ್.

ಯಕ್ಷಲಹರಿ ಅಧ್ಯಕ್ಷೆರ್ ರಘುನಾಥ ಕಾಮತ್ ಬಿನ್ನೆರೆನ್ ಎದ್ಕೊಂಡೆರ್. ಕಾರ್ಯದರ್ಶಿ ವಸಂತ ದೇವಾಡಿಗ ಸೊಲ್ಮೆ ಸಂದಾಯೆರ್. ಸುಧಾಕರ ಕುಲಾಲ್ ಲೇಸ್ ಸುಧಾರಿಕೆ ಮಲ್ತೆರ್. ಅಯಿರ್ದ್ ಬೊಕ್ಕ ವಾಮನ ಚರಿತ್ರೆ ಯಕ್ಷಗಾನ ತಾಳಮದ್ದಳೆ ನಡತ್ಂಡ್.

ಆ.5 : ತುಳುವೆರೆ ಬಾಮ ಕುಮಾರೆ ಗೇನದ ಪೊಲಬು

ಕುಡ್ಲ ವಿಶ್ವ ವಿದ್ಯಾಲಯ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠ, ಶ್ರೀ ಸಂಸ್ಥಾನ ಒಡಿಯೂರು ತುಳು ಅಧ್ಯಯನ ಕೇಂದ್ರ, ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ, ವಿಶ್ವ ವಿದ್ಯಾಲಯ ಸಂಧ್ಯಾ ಕಾಲೇಜ್ ಕುಡ್ಲ ಈ ಸಂಸ್ಥೆಲೆನ ಒಟ್ಟು ಸೇರಿಗೆಡ್ ಗೇನ ಪೊಲಬುದ ಪರಪು – ಎಗ್ಗೆ 132 “ತುಲುವೆರೆ ಬಾಮಕುಮಾರೆ” ಲೇಸ್ ಆ.5 ಸನಿವಾರ ಬಯ್ಯಗ್ ವೆಬಿನಾರ್ ಡ್ ನಡಪರೆ ಉಂಡು.

 

ಲೇಸ್ ದ ಗುರ್ಕಾರ್ಮೆ ನ್ ಪೆರ್ಮನ್ನೂರ್ ಹೀರಾ ಮಹಿಳಾ ಕಾಲೇಜ್ ದ ಪ್ರಾಂಶುಪಾಲೆರ್ ಭಾಗೀರಥಿ ಒಯಿಸೊನರೆ ಉಲ್ಲೆರ್.

ತುಳು-ಕನ್ನಡ ಲೇಖಕೆರ್ ಬೊಕ್ಕ ಉಪನ್ಯಾಸಕೆರ್ ಮಣಿ ಎಂ ರೈ ಗೇನದ ಪೊಲಬು ಮಲ್ಪೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ಸರಕಾರಿ ವಕೀಲೆರ್ ಜನಾರ್ಧನ್ ಬಿ., ಮನಾದಿಗೆದ ಬಿನ್ನೆರಾದ್ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಒತ್ತು ಸಂಪಾದಕೆರ್ ಯಶೋಧರ ಕೋಟ್ಯಾನ್ ಈ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್.

 

ಲೇಸ್ ದ ಆಯೋಜಕೆರಾಯಿನ ಡಾ.ಮಾಧವ ಎಂ.ಕೆ,
ವೇದಸ್ಮಿತಾ, ಪ್ರಸಾದ್ ಅಂಚನ್, ಡಾ.ಲಕ್ಷ್ಮೀದೇವಿ ಎಲ್ ಮೋಕುಲು ಲೇಸ್ ಗ್ ಮಾತೆರೆನ್ ಮೋಕೆಡ್ ಎದುಕೊಂದೆರ್.

You Missed