Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ತುಳುನಾಡ ರಕ್ಷಣಾ ವೇದಿಕೆ (ರಿ.) ಮಹಿಳಾ ಘಟಕದ ಮುತಾಲಿಕೆಡ್ “ಆಟಿದ ನೆಂಪು”, ಸಾಧಕೆರೆಗ್ ಸನ್ಮಾನ, ಜಾನಪದ ಸಾಂಸ್ಕೃತಿಕ ಲೇಸ್

ಕುಡ್ಲ: ಹಳ್ಳಿದ ಜನಕ್ಲೆನ ಬೇಸಾಯದ ಬೊಕ್ಕದ ಕಷ್ಟ, ಆನಿದ ಬಂಗೊನು ಇತ್ತೆದ ಪೀಳಿಗೆಗ್ ತೆರಿಪಾವುನ ಈ ಒಂಜಿ ಆಟಿದ ನೆಂಪು ಲೇಸ್ ಅರ್ಥಪೂರ್ಣ ಆತ್ಂಡ್. ದುಂಬು ಊರುದ ನಂಬಿಕೆದ ದಿನಟ್ಟ್ ಆಟಿ ತಿಂಗೊಲ್ಡ್ ಒವ್ವೇ ಎಡ್ಡೆ ಲೇಸ್ ನಡತೊಂದು ಇತ್ತಿಜಿ.‌ ಕಾರಣ ಆ ತಿಂಗೊಲ್ ಒವ್ವೇ ಲೇಸ್ ಹೊಂದಾಣಿಕೆ ಆವೊಂದು ಇಜ್ಜಂಡ್. ದೈಹಿಕವಾದ್, ಮಾನಸಿಕವಾದ್ ಆಟಿ ತಿಂಗೊಲ್ ಒಂಜಿ ತಟಸ್ಥ ಮಾಸ ಆತ್ಂಡ್ ಪಂದ್ ಕೇಮಾರು ಸಂದೀಪನಿ ಮಠತ್ತ ಶ್ರೀ ಈಶ ವಿಠಲದಾಸ ಸ್ವಾಮೀಜೀ ಪಂಡೆರ್.

ಮೇರ್ ಇಂಚಿಪ್ಪ ಕುಡ್ಲ ಉರ್ವ ಸ್ಟೋರ್ ಡ್ ಇಪ್ಪುನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಚಾವಡಿಡ್ ತುಳುನಾಡ ರಕ್ಷಣಾ ವೇದಿಕೆ ಮಹಿಳಾ ಘಟಕದ ಮುತಾಲಿಕೆಡ್ “ಆಟಿದ ನೆಂಪು” ಲೇಸ್ ನ್ ತುಡರ್ ಅರ್ಲಾದ್, ಉದಿಪನ ಮಲ್ತ್ ದ್, ಪಾತೆರಿಯೆರ್.

ಬದಲಾಯಿನ ಬದ್ ಕ್ ಡ್ ಅನಿದ ಬದ್ಕ್ ದ ಆಚಾರ-ವಿಚಾರಲು ಕಟ್ಟುನಿಟ್ಟ್ ದ ಸಂಸ್ಕೃತಿ, ಸಂಪ್ರದಾಯದ ಪಾಲನೆದ ಬಗೆಟ್ಟ್ ನಮ ಇತ್ತೆದ ಜೋಕುಲೆಗ್ ಆಟಿದಂಚಿನ ಲೇಸ್ ದ ಮುಖೇನ ತೆರಿಪಾವೊನೇ ಎಡ್ಡೆ. ಇತ್ತೆದ ಲೇಸ್ ಗ್ ತುಳುನಾಡ ರಕ್ಷಣಾ ವೇದಿಕೆದ ಪೊಂಜೋವುಲೆನ ಸಂಘಟಿತ ಯೋಜನೆ ಯಶಸ್ಸ್ ನ್ ಕನದ್ಂಡ್. ದುಂಬಗ್ಲಾ ಮಾತೆರ್ನ ಸಹಕಾರ ಇಪ್ಪಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಮಾಜಿ ವಿಧಾನ ಪರಿಷತ್‌ ಸದಸ್ಯೆರ್ ಐವನ್‌ ಡಿ’ಸೋಜ ಪಾತೆರ್ದ್, ಆಟಿದ ಲೇಸ್ ಡ್ ಬೇತೆ ಬೇತೆ ತೆನಸ್ ಲೆನ ಪ್ರದರ್ಶನಗ್ ಮಣ್ಣ್ ದ ಬಾಜನೊಗು ಪ್ರಾಮುಖ್ಯತೆ ಕೊರೊಡು ಪಂದ್ ಪಂಡೆರ್.

ಶಾಸಕೆರ್ ವೇದವ್ಯಾಸ್ ಕಾಮತ್ ಪಾತೆರ್ದ್, ಪಾಲೆ ಮರ ನಾಶ ಆದ್ ಪೋಪುನ ಈ ಕಾಲಗಟ್ಟಡ್ ಆಯಿನ್ ಸಂರಕ್ಷಣೆ ಮಲ್ಪುನ ಅಗತ್ಯತೆ ಉಂಡು ಪಂದ್ ಪಂಡೆರ್.

ತುಳುನಾಡ ರಕ್ಷಣಾ ವೇದಿಕೆ ಮಹಿಳಾ ಘಟಕ ಕುಡ್ಲ ನೆತ್ತ ಅಧ್ಯಕ್ಷೆರ್ ಆಶಾ ಶೆಟ್ಟಿ ಅತ್ತಾವರ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್.

ಚಾವಡಿಡ್ ಕುಡ್ಲ ದಕ್ಷಿಣ ವಿಭಾಗದ ಶಾಸಕೆರ್ ಡಿ. ವೇದವ್ಯಾಸ ಕಾಮತ್, ಮಾಜಿ ವಿಧಾನ ಪರಿಷತ್‌ ಸದಸ್ಯೆರ್ ಐವನ್‌ ಡಿ’ಸೋಜ, ಕುಡ್ಲ ಪ್ರದೇಶ ಕಥೋಲಿಕ್ ಸಭಾ ಅಧ್ಯಕ್ಷೆರ್ ಆಲ್ವಿನ್ ಡಿ’ಸೋಜ, ಭಾರತೀಯ ಕಮ್ಯುನಿಸ್ಟ್ ಪಕ್ಷದ ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯದರ್ಶಿ ಕೆ ಯಾದವ ಶೆಟ್ಟಿ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಸದಸ್ಯೆರ್ ಕರ್ನೂರ್‌ ಮೋಹನ್‌ ರೈ, ಅಖಿಲ ಭಾರತ ತುಳು ಒಕ್ಕೂಟ ಸಂಘಟನಾ ಕಾರ್ಯದರ್ಶಿ ಡಾ. ರಾಜೇಶ್‌ ಆಳ್ವ ಬದಿಯಡ್ಕ, ಸಮಾಜ ಸೇವಕಿ, ಕಲಾವಿದೆ ವೀಣಾ ಜಯಂತಿ ಶೆಟ್ಟಿ, ಸಮಾಜ ಸೇವಕೆರ್ ಎಂ.ಬಿ. ಖಾನ್‌ ಮುಲ್ಕಿ ಮೊಕುಲು ಇತ್ತ್ ದ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಬೇತೆ ಬೇತೆ ಇಸಯಡ್ ಸಾಧನೆ ಮಲ್ತಿನ ಸಾಧಕೆರಾಯಿನ ಸಮಾಜ ಸೇವಕೆರ್ ಅರ್ಜುನ್ ಭಂಡಾರ್ಕರ್, ಪುಗರ್ತೆದ ವೈದ್ಯೆರ್ ಡಾ. ಸತೀಶ್ ಕಲ್ಲಿಮಾರ್, ತುಳು- ಕನ್ನಡ ಚಿತ್ರ ನಿರ್ದೇಶಕೆರ್ ಇಸ್ಮಾಯಿಲ್ ಮೂಡುಶೆಡ್ಡೆ, ರಿಯಾ ಸಂಸ್ಥೆದ ರೋಹಿತ್ ಸಾಂಕ್ತುಸ್, ಬಹುಮುಖ ಪ್ರತಿಭೆ ಕುಮಾರ್ ಧನ್ವಿತ್, ವೀರೇಂದ್ರ ಸುವರ್ಣ ಮೆರೆಗ್ ಮಾನಾದಿಗೆ ನಡತ್ಂಡ್.

ಅಲ್ಲಿದ ಬಡ ಜನಕ್ಲೆಗ್ 2 ಎಕರೆ ಜಮೀನ್ ಕೊರ್ಪಿನ “ಸಹಕಾರ ಕೃಷಿ ಯೋಜನೆ’ ಜಾರಿ

ಬೆಂಗ್ಲೂರು: ಅಲ್ಲಿರ್ದ್ ಪೇಂಟೆಗ್ ಜನಕುಲ್ ವಲಸೆ ಪೋಪಿನೆನ್ ತಪ್ಪಾಯೆರೆ ರಾಜ್ಯ ಸರ್ಕಾರ, ವಿನೂತನ ಸಹಕಾರಿ ಕೃಷಿ ಯೋಜನೆ ಜಾರಿಗೆ ಮಲ್ತ್ ದ್ಂಡ್.

ಗ್ರಾಮೀಣ ಪ್ರದೇಶದ ಸರ್ಕಾರಿ ಭೂಮಿ ಗುರ್ತಿಸಾದ್ ಜಮೀನ್ ಇಜ್ಜಂದಿನ ಪರಿಶಿಷ್ಟ ಜಾತಿ ಬೊಕ್ಕ ವರ್ಗದ ಜನಕ್ಲೆಗ್ SCSP/TSP ಇತರೆ ವರ್ಗದಕ್ಲೆಗ್ ವಿವಿಧ ಯೋಜನೆದ ಅನುದಾನ ಒದಗಾದ್ ಯೋಜನೆನ್ ಜಾರಿ
ಮಲ್ಪೆರೆ ಉಂಡು.

ಮೈಸೂರು ಜಿಲ್ಲೆಡ್ ಪ್ರಾಯೋಗಿಕವಾದ್ ಉಂದೆನ್ ಜಾರಿಗೆ ಮಲ್ತ್, ಬೊಕ್ಕ ಬೇತೆ ಜಿಲ್ಲೆಡ್ ಹಂತ ಹಂತವಾದ್ ವಿಸ್ತರಣೆ ಮಲ್ಪೆರೆ ಉಲ್ಲ ಪಂದ್ ಸಮಾಜ ಕಲ್ಯಾಣ ಸಚಿವೆರ್ ಡಾ.ಹೆಚ್.ಸಿ ಮಹದೇವಪ್ಪ ತೆರಿಪಾದೆರ್.

ಸಹಕಾರ ಕೃಷಿ ಗುಂಪು ರಚಿಸಾದ್ ಸಹಕಾರ ಸಂಘದ ಸ್ವರೂಪನ್ ತೆರಿಪಾವೆರ್. ಐನ್ ಜನ ಇತ್ತಿನ ಕುಟುಂಬಗ್ 162 ಎಕರೆ ಜಮೀನ್ ಇತ್‌ಂಡ ಜೀವನ ನಿರ್ವಹಣೆ ಮಲ್ಪೊಲಿ ಪಂದ್ ಕೇಂದ್ರ ಸರ್ಕಾರದ ನಿಯಮ ಪನ್ಪುಂಡ್. ಸರ್ಕಾರಿ ಭೂಮಿ ಇಜ್ಜಾಂದೆ ಕನಿಷ್ಟ 50 ಎಕರೆ ಜಮೀನ್ ಇತ್ತಿನಲ್ಪ ಅವೆನ್ ದೆತೊಂದ್ ಕುಟುಂಬಲೆಗ್ 2 ಎಕರೆ ದಂಚ ಕೊರ್ದ್ ಪರಸ್ಪರ ಸಹಕಾರ ಕೃಷಿ ಮಲ್ಪೆರೆ ಅವಕಾಶ ಕೊರ್ಪುನ ಮೂಲಕ ಜೀವನಮಟ್ಟ ಸುಧಾರಣೆ ಮಲ್ಪೆರೆ ಕ್ರಮ ದೆತೊನೊಡ್ ಪಂದ್ ತೆರಿಪಾದೆರ್.

ಪಾಕಿಸ್ತಾನದ ಸಂಸತ್ ವಿಸರ್ಜನೆ

ಅಂತಾರಾಷ್ಟ್ರೀಯ ಮಟ್ಟಡ್ ಆರ್ಥಿಕವಾದ್ ದಿವಾಳಿ ಆದ್ ಮಾತ ದೇಶದಕ್ಲೆನ ಎದುರು ಸಾಲಗ್ ಕೈ ನೀಡುನ ಪರಿಸ್ಥಿತಿದ ನಡುಟ್ ಪಾಕಿಸ್ತಾನ ಸಂಸತ್ ವಿಸರ್ಜನೆಗ್ ಮಹತ್ವದ ಘೋಷಣೆ ಕೊರ್ತುಂಡ್.

ಆಗಸ್ಟ್ 12 ಕ್ಕ್ ಪಾಕಿಸ್ತಾನದ ಹಾಲಿ ಸರ್ಕಾರದ ಅವಧಿ ಮುಗಿಯೊಂದು ಬರ್ಪುಂಡು. ಕೆಲವ್ ದಿನತ ಪಿರ ಸಂಸತ್ ವಿಸರ್ಜನೆದ ಬಗ್ಗೆ ಪಾಕಿಸ್ತಾನದ ಪ್ರಧಾನಿ ಮಾತುಕತೆ ನಡಪಾದ್ ಇತ್ತೆರ್. ಮಾತುಕತೆ ಆಯಿನ ಬೊಕ್ಕ ಕೋಡೆ ರಾತ್ರೆ ದಿಢೀರ್ ಆದ್ ಪಾಕಿಸ್ತಾನದ ಅಧ್ಯಕ್ಷೆರ್ ಆರೀಫ್ ಅಲವಿಗ್ ಪಾಕ್ ಪ್ರಧಾನಿ ಶೆಹಬಾಜ್ ಶರೀಫ್ ಸಂಸತ್ ವಿಸರ್ಜನೆದ ಶಿಫಾರಸ್ ನ್ ಕೊರ್ತೆರ್.

ಕರಿನ ರಾತ್ರೆ ಪಾಕಿಸ್ತಾನಡ್ ಮಹತ್ವದ ಬೆಳವಣಿಗೆ ಆದ್ ಪಾಕಿಸ್ತಾನದ ಪ್ರಧಾನಿ ಶೆಹಬಾಜ್ ಷರೀಫ್ ಸಂಸತ್ ವಿಸರ್ಜನೆಗಾದ್ ಅಧಿಸೂಚನೆ ಕಡಪುರ್ದೆರ್. ಅಂಚಾದ್ ಪಾಕ್‌ದ ಸಂಸತ್ ವಿಸರ್ಜನೆ ಆದ್ 90 ದಿನತ ಉಲಾಯಿ ವೋಟ್ ನಡಪುನ ನಿರೀಕ್ಷೆ ಉಂಡು.

ಪಾಕಿಸ್ತಾನ ಲೋಕಸಭೆ ಒಟ್ಟು ಸದಸ್ಯ ಬಲ 342. ಭಾರತದ ರೀತಿಡೆ ಪಾಕಿಸ್ತಾನಡ್ 5 ವರ್ಷದ ಅಧಿಕಾರವಧಿ ಇಪ್ಪುಂಡ್. ಈ ಅವಧಿ ಆ.12 ಗ್ ಮುಗಿಯೊಡಾಂಡ್, ಆಂಡ ಅವಧಿಗ್ ದುಂಬೆ ಆ.9 ದಾನಿ ಸಂಸತ್ ವಿಸರ್ಜನೆಗ್ ಪಾಕ್ ಪ್ರಧಾನಿ ಶಿಫಾರಸ್ ಕಡಪುರ್ದೆರ್.

ಮಿತ್ತ ಇಲ್ಲ್, ಸುರತ್ಕಲ್ ಮುತಾಲಿಕೆಡ್ ಆಟಿದ ಕೂಟ ಲೇಸ್

ಮಿತ್ತ ಇಲ್ಲ್, ಸುರತ್ಕಲ್ ಮುತಾಲಿಕೆಡ್ ಆಟಿದ ಕೂಟ ಲೇಸ್ ಆ.5 ಸನಿಯಾರ ಬಯ್ಯಗ್ 6.30 ರ್ದ್ ನಡತ್ಂಡ್.

ಮಿತ್ತ ಇಲ್ಲ್ ದ ಸದಸ್ಯೆರ್ ಮಾತ ಸೇರ್ದ್ ಪೀಳಿಗೆರ್ದಿಂಚ ಕಾಪಾಡೊಂಡು ಬರೊಂದು ಇಪ್ಪುನ ಪಿರಾಕ್ ದ ಕಾಲಡ್ ಪೂರ್ವಜೆರ್ ಗಲಸೊಂದು ಇತ್ತಿನ ಸೊತ್ತುಲೆನ್ ಜೋಡಿಸಾದ್ ಸಾಂಪ್ರದಾಯಿಕ ಶೈಲಿಡ್ ಸಿಂಗಾರ ಮಲ್ದೆರ್.

ಕೈತಲ್ ದ ಹಿರಿಯೆರಾಯಿನ ಸುಹಾಸಿನಿ, ರತ್ನ, ವಾಸಂತಿ, ಯಮುನಾ, ಸರಸು ಮೇರ್ ಆಟಿದ ಆಚರಣೆದ ಬಗ್ಗೆ ತೆರಿಪಾಯೆರ್. ಮೊಕ್ಲೆನ್ ಮಿತ್ತ ಇಲ್ಲ್ ದ ಮುತಾಲಿಕೆಡ್ ಶಾಲ್ ಪೊದೆಪಾದ್, ಪುತ್ತ ಗುಚ್ಛ ಕೊರ್ದು ಮಾನಾದಿಗೆ ಮಲ್ತೆರ್.

ಆವೆರ್ದ್ ಬೊಕ್ಕ ಮಾತ ಸೇರ್ದ್ ತಯಾರ್ ಮಲ್ತಿನ 38 ಬಗೆತ್ತ ಆಟಿ ತಿಂಗೊಲ್ಡ್ ಇಸೇಸವಾದ್ ತಯಾರ್ ಮಲ್ಪುನ ತೆನಸ್ ನ್ ತಿಂದೆರ್.

ಈ ಪೊರ್ತುಡು ಹಿರಿಯೆರಾಯಿನ ಲಕ್ಷ್ಮಿ, ರಾಜೀವಿ, ಯಮುನಾ, ಗೀತಾ, ಶುಭಾ, ವಾರಿಜಾ ಬೊಕ್ಕ ಜೋಕುಲು, ಪುಲ್ಲಿನಕುಲು ಪಾಲ್ ಪಡೆದಿತ್ತೆರ್.

ಆ.13: ವರಕೋಡಿ ಬಾಕಿಮಾರ್ ಕಂಡೊಡು ಕೆಸರ್ ಡ್ ಒಂಜಿ ದಿನ

ಯಕ್ಷಕಲಾ ಸಂಘ (ರಿ.) ಯಕ್ಷಧಾಮ ವರಕೋಡಿ, ಬಡಗಬೆಳ್ಳೂರು ನೆತ್ತ ಮುತಾಲಿಕೆಡ್ ಆ.13 ಐತಾರ ಬೊಲ್ಪುಗು 9 ಗಂಟೆರ್ದ್ ವರಕೋಡಿ ಬಾಕಿಮಾರ್ ಕಂಡೊಡು “ಕೆಸರ್ ಡ್ ಒಂಜಿ ದಿನ ” ಕೆಸರ್ ಕಂಡ ಕ್ರೀಡಾಕೂಟ ನಡಪರೆ ಉಂಡು.

ಇಸೇಸವಾದ್ ಆನ್ ಪೊಣ್ಣು ಜೋಕುಲೆಗ್, ಬೇತೆ ಬೇತೆ ಕ್ರೀಡಾ ಪಂತೊಲು ನಡಪರೆ ಉಂಡು. ಪೊಂಜೋವ್ ಲೆಗ್ ತ್ರೋಬಾಲ್ ಪಂತೊ ಕೆಸರ್ ಕಂಡಡ್ ನಡಪರೆ ಉಂಡು. ಬಯ್ಯಗ್ ಮುಗಿತಲದ ಲೇಸ್ ಗ್ ಬಿನ್ನೆರೆನ ಎದುರುಡ್ ಇನಾಮು ಪಟ್ಟುನ ಲೇಸ್ ನಡಪರೆ ಉಂಡು.

ಕ್ರೀಡಾ ಪ್ರೇಮಿಲು ಈ ಒಂಜಿ ಕ್ರೀಡಾ ಕೂಟಡ್ ಪಾಲ್ ಪಡೆದ್ ಕ್ರೀಡಾ ಕೂಟನ್ ಯಶಸ್ವಿ ಮಲ್ತ್ ದ್ ಕೊರೊಡು ಪಂದ್ ಯಕ್ಷಕಲಾ ಸಂಘ ವರಕೋಡಿ ಬಡಗಬೆಳ್ಳೂರುದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಬಿನ್ನಾಪು ಮಲ್ದೆರ್.

ಅಂಚೆನೆ ಆ.15 ಅಂಗಾರೆ ಯಕ್ಷಧಾಮದ ವಠಾರಡ್ ಸ್ವಾತಂತ್ರ್ಯ ದಿನಾಚರಣೆದ ಲೆಕ್ಕೊಡು ಕೊಡಿ ಏರಿಯೆರೆ ಉಂಡು. ಈ ಕೊಡಿನ್ ಪೃಗತಿ ಪರ ಕೃಷಿಕೆರ್ ವರಕೋಡಿ ಮಹಾಬಲ ಶೆಟ್ಟಿ ರಾಪಾಯೆರೆ ಉಲ್ಲೆರ್.

ಈ ಲೇಸ್ ಗ್ ದೇಶಾಭಿಮಾನಿಲು, ಊರ ಪರವೂರುದ ನಾಗರಿಕೆರ್ ಪಾಲ್ ಪಡೆವೊಡು ಪಂದ್ ಯಕ್ಷಕಲಾ ಸಂಘದ ಪರವಾದ್ ಕೇನೊಂದುಲ್ಲೆ.

ಬರವು:ದಿನೇಶ್ ವರಕೋಡಿ ಬಡಗಬೆಳ್ಳೂರು

ಆ.13: ನಾಲಾಸೋಪಾರ ಹೋಟೆಲ್ ಗ್ಯಾಲಕ್ಸಿದ ಚಾವಡಿಡ್ ಆಟಿಡೊಂಜಿ ದಿನ

ತುಳು ಕೂಟ ಫೌಂಡೇಶನ್ (ರಿ.) ನಾಲಾ ಸೋಪಾರ ನೆತ್ತ ಪೊಂಜೋವುಲ್ನ ಕೂಟದಕ್ಲು ಅಟ್ಟನೆ ಮಲ್ಪುನ “ಆಟಿಡೊಂಜಿ ದಿನ” ಲೇಸ್ ಆ.13 ಕ್ಕ್ ಮಧ್ಯಾಹ್ನ 3 ಗಂಟೆರ್ದ್ ನಾಲಾಸೋಪಾರ ಹೋಟೆಲ್ ಗ್ಯಾಲಕ್ಸಿದ ಚಾವಡಿಡ್ ನಡಪರೆ ಉಂಡು.

ಈ ಲೇಸ್ ದೊಟ್ಟಿಗೆ “ಯಕ್ಷ ಮಾಣಿಕ್ಯ” ಕು‌.ಚಿಂತನಾ ಹೆಗಡೆ ಮಾಳಕೋಡ್ ಮೆರೆನ ಸನ್ಮಾನ ಕಾರ್ಯಕ್ರಮ ಬೊಕ್ಕ “ಯಕ್ಷಚಿಂತನಾನುರಾಗ” ಲೇಸ್ ನಡಪರೆ ಉಂಡು.

ಈ ಲೇಸ್ ತುಳುಕೂಟ ಫೌಂಡೇಶನ್ ನಾಲಾಸೋಪಾರ ನೆತ್ತ ಗುರ್ಕಾರ್ಲು ಶಶಿಧರ.ಕೆ. ಶೆಟ್ಟಿ ಇನ್ನಂಜೆ ಮೆರೆನ ಗುರ್ಕಾರ್ಮೆಡ್, ಪೊಂಜೊವುಲ್ನ ಕೂಟದ ಗುರ್ಕಾರ್ದಿ ಉಮಾ ಸತೀಶ್ ಶೆಟ್ಟಿ ಮೆರೆನ ಮುತಾಲಿಕೆಡ್ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಗೆಜ್ಜೆಗಿರಿ ಮೇಳದ ಪೊಸ ಪ್ರಸಂಗದ ಲೆಪ್ಪೋಲೆ ಬುಡುಗಡೆ

ಬೊಲ್ತೇರ್ : 2023-24ನೇ ಸಾಲ್ ದ ತಿರುಗಾಟಗ್ ತಯಾರ್ ಆವೊಂದಿಪ್ಪುನ ಶ್ರೀ ಗೆಜ್ಜೆಗಿರಿ ಮೇಳದ ಪೊಸ (ಕನ್ನಡ-ಪೌರಾಣಿಕ) ಪ್ರಸಂಗ “ಪ್ರಚಂಡ ಮಹಿಷಾಸುರ” ದ ಲೆಪ್ಪೋಲೆ ಬುಡುಗಡೆ ಇಂಚೊಗು ಕನ್ಯಾಡಿದ ಆಶ್ರಮಡ್ ನಡತ್ಂಡ್.

ಈ ಲೆಪ್ಪೋಲೆನ್ ಕನ್ಯಾಡಿದ ಸ್ವಾಮೀಜಿ ಬುಡುಗಡೆ ಮಲ್ತೆರ್. ಪ್ರಚಂಡ ಮಹಿಷಾಸುರ ಪ್ರಸಂಗೊಡು ನವ ಶಕ್ತಿಯೆರೆನ ವೈಭವನ್ ತೊಜಪಾವುನ ಇಸೇಸ ಕಥೆ ಉಂಡು ಪಂದ್ ಮೇಳದ ಪ್ರಕಟಣೆಡ್ ತೆರಿಪಾದ್ಂಡ್.

ಸೌಜನ್ಯಗ್ ನ್ಯಾಯ ತಿಕ್ಕರೆ ಕದ್ರಿ ದೇವಲ್ಯಡ್ ಪ್ರಾರ್ಥನೆ

ಕುಡ್ಲ: ಸೌಜನ್ಯನ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣದ ವಿರುದ್ಧ ಹೋರಾಟ ನಡತೊಂದೇ ಉಂಡು.ಅಂಚಾದ್ ಇನಿ ಆ.10 ದಾನಿ ಕದ್ರಿ ಶ್ರೀ ಮಂಜುನಾಥ ದೇವಸ್ಥಾನಗ್ ಪೋದು ಸೌಜನ್ಯಗ್ ನ್ಯಾಯ ತಿಕ್ಕೊಡು ಪಂದ್ ಸೌಜನ್ಯನ ಇಲ್ಲದಕುಲು ವಿಶೇಷ ಪೂಜೆ ಸಂದಾಯ ಮಲ್ತೆರ್.

ಈ ಪೊರ್ತುಡು ಸೌಜನ್ಯನ ಅಮ್ಮ ಕುಸುಮಾವತಿ, ಮಾಮು, ಮೆಗ್ದಿ ಅಂಚನೆ ಕುಡ್ಲ ದ ಸೌಜನ್ಯ ಪರ ಹೋರಾಟಗಾರೆರ್ ಈ ಪೊರ್ತುಡು ಇತ್ತೆರ್.

ಕೇರಳ ನನ ಕೇರಳಂ!

ಕೇರಳ ರಾಜ್ಯನ್ ನನ ಕೇರಳಂ ಪಂದ್ ಅಧಿಕೃತವಾದ್ ಪುದರ್ ದೀವರೆ ಕೇರಳ ವಿಧಾನಸಭೆಟ್ ಕೋರಿಕೆ ಮಂಡನೆ ಮಲ್ತ್ ಇತ್ತೆರ್. ಈ ಕೋರಿಕೆಗ್ ಕೇರಳದ ವಿಧಾನಸಭೆ ಸರ್ವಾನುಮತಡ್ ಒಪ್ಪಿಗೆ ಕೊರ್ತುಂಡು.

ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಕೇರಳ ವಿಧಾನಸಭೆ ಕಾರ್ಯವಿದಾನ ಬೊಕ್ಕ ವ್ಯವಹಾರ ನಡವಳಿಕೆದ ನಿಯಮಡ್ 118 ಅಡಿಟ್ ನಿರ್ಣಯದ ವಿಷಯನ್ ಮಂಡನೆ ಮಲ್ತೆರ್.

ಕೇರಳಂ ಪಂದ್ ಸಂವಿಧಾನ ಸೇರ್ದ್ ಮಾತ ಅಧಿಕೃತ ದಾಖಲೆ ಡ್ ಮರುನಾಮಕರಣ ಆವೊಡು ಪಂದ್ ಸರಕಾರ ಆಗ್ರಹ ಮಲ್ತ್ ದ್ಂಡ್.

ಕುಡ್ಲ: ಗುರುಪುರ ಗ್ರಾಮ ಪಂಚಾಯತ್ ವೋಟುಡು ಗೆಂದಿನ ಎಸ್ಡಿಪಿಐ

ಕುಡ್ಲ: ಕುಡ್ಲ ತಾಲೂಕ್ ದ ಗುರುಪುರ ಗ್ರಾಮ ಪಂಚಾಯತ್ ದ ರಡ್ಡನೇ ಅವಧಿಗ್ ಅಧ್ಯಕ್ಷೆರೆನ ಬೊಕ್ಕ ಉಪಾಧ್ಯಕ್ಷೆರೆನ ವೋಟು ಆ.9 ಕ್ಕ್ ನಡತ್ಂಡ್.

ಗುರುಪುರ ಗ್ರಾಮ ಪಂಚಾಯತ್ ಪೊಸ ಅಧ್ಯಕ್ಷೆರಾದ್ ಎಸ್ಡಿಪಿಐ ಅಭ್ಯರ್ಥಿ ಸಫಾರ ನಾಸೀರ್ ಬೊಕ್ಕ ಉಪಾಧ್ಯಕ್ಷೆರಾದ್ ಪಕ್ಷೇತರ ಅಭ್ಯರ್ಥಿ ದಾವೂದ್ ಆಯ್ಕೆ ಆತೆರ್.

ಗುರುಪುರ ಗ್ರಾಮ ಪಂಚಾಯತ್ ಒಟ್ಟು 28 ತಾನಡ್ ಎಸ್ ಡಿಪಿಐ ಬೆಂಬಲದ 10 ಸದಸ್ಯೆರ್, ಕಾಂಗ್ರೆಸ್ ಬೆಂಬಲದ 11 ಸದಸ್ಯೆರೆಡ್ 2 ಜನ ಸದಸ್ಯೆರ್ ಕಾಂಗ್ರೆಸ್ ಬುಡ್ದು ಬಿಜೆಪಿ ಸೇರಿನೆರ್ದಾವರ ಬಿಜೆಪಿ ಸದಸ್ಯೆರೆನ ಸಂಖ್ಯೆ 8 ಆತ್ಂಡ್. ಒರಿ ಪಕ್ಷೇತರ ಸದಸ್ಯೆ ಇಪ್ಪುನ ಗುರುಪುರ ಗ್ರಾಮ ಪಂಚಾಯತ್ ಡ್ ಇನಿ ನಡತಿನ ವೋಟುಡು ಒರಿ ಪಕ್ಷೇತರ ಅಭ್ಯರ್ಥಿನ ಬೆಂಬಲದೊಟ್ಟಿಗೆ ಎಸ್ ಡಿಪಿಐ ಪಕ್ಷ ಅಧಿಕಾರದ ಪತ್ ದ್ಂಡ್.

ಅಧ್ಯಕ್ಷೆರಾದ್ ಆಯ್ಕೆ ಆಯಿನ ಎಸ್ ಡಿಪಿಐ ಬೆಂಬಲಿತ ಅಭ್ಯರ್ಥಿ ಸಫಾರ 11 ವೋಟುಡು, ಕಾಂಗ್ರೆಸ್ ಬೆಂಬಲಿತ ಅಭ್ಯರ್ಥಿ ಶೋಭಾ 9 ವೋಟುನ್ ಪಡೆತೆರ್. ಉಪಾಧ್ಯಕ್ಷೆರೆ ತಾನಗ್ ಆಯ್ಕೆ ಆಯಿನ ಪಕ್ಷೇತರ ಅಭ್ಯರ್ಥಿ ದಾವೂದ್ 11 ವೋಟು, ಕಾಂಗ್ರೆಸ್ ಬೆಂಬಲಿತ ಅಭ್ಯರ್ಥಿ ಎ.ಕೆ.ಅಶ್ರಫ್ 9 ವೋಟುನ್ ಪಡೆತೆರ್. ಬಿಜೆಪಿ ಬೆಂಬಲಿತ ಸದಸ್ಯೆರ್ ವೋಟು ಪ್ರಕ್ರಿಯೆಡ್ ಗೈರು ಹಾಜರಾತೆರ್.

You Missed