Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ನೀರ್ ಮಾರ್ಗ ಗ್ರಾ.ಪಂ. ಗ್ ಪೊಸ ಗುರ್ಕಾರೆ ಆದ್ ಶ್ರೀಧರ್, ಒತ್ತು ಗುರ್ಕಾರ್ದಿ ಆದ್ ಮೋಲಿ ಶಾಂತಿ ಸಾಲ್ದಾನ ಆಯ್ಕೆ

ಕುಡ್ಲ : ನೀರ್ ಮಾರ್ಗ ಗ್ರಾ.ಪಂ ಗ್ ಪೊಸ ಗುರ್ಕಾರೆ ಆದ್ ಶ್ರೀಧರ್ ಅಂಚನೆ ಒತ್ತು ಗುರ್ಕಾರ್ದಿ ಆದ್ ಮೋಲಿ ಶಾಂತಿ ಸಾಲ್ದಾನ ಕಾಂಗ್ರೆಸ್ ದ ಹಿರಿಯ ಮುಖಂಡೆರ್ನ ಸಮ್ಮುಖಡ್ ಆಯ್ಕೆ ಆಯೆರ್.

ಈ ಪಿರಾವ್ ಗ್ ಗುರ್ಕಾರ್ದಿ ಧನವಂತಿ ಅಂಚನೆ ಯಶೋಧರ್ ಒತ್ತು ಗುರ್ಕಾರೆ ಆದ್ ಆಡಳಿತ ಮಲ್ತೊಂದು ಇತ್ತೆರ್. ನನ ರಡ್ಡರೆ ವರ್ಷದ ಆಡಳಿತನ್ ಈ ಪೊಸ ಗುರ್ಕಾರ್ರೆನ ಗುರ್ಕಾರ್ಮೆಡ್ ನಡಪಾಯೆರೆ ಉಲ್ಲೆರ್.

ಈ ಪೊರ್ತುಡು ಧಾರ್ಮಿಕ ದತ್ತಿ ಇಲಾಖೆದ ಸದಸ್ಯೆರ್ ಪದ್ಮನಾಭ್ ಕೋಟ್ಯಾನ್, ಜಿಲ್ಲಾ ಪಂಚಾಯತ್ ದ ಮಾಜಿ ಸದಸ್ಯೆರ್ ಮೆಲ್ವಿನ್ ಡಿಸೋಜ, ಕಾಂಗ್ರೆಸ್ ದ ಪದಾಧಿಕಾರಿಲು ಈ ಪೊರ್ತುಡು ಪಾಲ್ ಪಡೆದಿತ್ತೆರ್.

ಕಿನ್ನಿಗೋಳಿಡ್ ಕಾರ್ ಗ್ ಟಿಪ್ಪರ್ ಗುದ್ದುದು ಒರಿ ತೀರ್ ಪೋಯೆರ್ 5 ಜನಕ್ಕ್ ಪೆಟ್ಟ್

ಕಿನ್ನಿಗೋಳಿ ಕೈತಲ್ ದ ಮೂರುಕಾವೇರಿದಲ್ಪ ರಾಜ್ಯಮಾರ್ಗಡ್ ಟಿಪ್ಪರ್ ಗುದ್ದುದು ಕಾರ್ ಡ್ ಇತ್ತಿನ 5 ಜನಕ್ಕ್ ಮಸ್ತ್ ಪೆಟ್ಟಾತ್ಂಡ್. ನೆರ್ದ್ ಒರಿ ತೀರ್ ಪೋತೆರ್.

ಪೆಟ್ಮಾಯಿನಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಟಿಪ್ಪರ್ ಬೆದ್ರರ್ದ್ ಕಿನ್ನಿಗೋಳಿಗ್ ಪೋವೊಂದು ಇತ್ತಿನ ಪೊರ್ತುಡು ಈ ಘಟನೆ ನಡತ್ಂಡ್. ಅತ್ತಂದೆ ಉಂದು ಗುದ್ದಿನ ಬಿರ್ಸ್ ಗ್ ಕಾರ್ ನಕ್ಕೆ ಆತ್ಂಡ್. ಈ ಘಟನೆದ ಜಾಗೆಗ್ ಕುಡ್ಲ ಉತ್ತರ ಟ್ರಾಫಿಕ್ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ಮಲ್ದೆರ್.

ಪೆರ್ಮರಿ ಪತಿಯೆರ್ ತುಳುನಾಡ ಬಿರ್ಸೆದಿ ನಯನಾ!

ಪೆರ್ಮರಿ ಇತ್ತೆ ಮಾತಾ ಕಡೆಟ್ಟ್ ಲ ತೋಜಿದ್ ಬರ್ಪುಂಡು. ಅವು ಮನುಷ್ಯೆರೆಗ್ ಅಪಾಯಕಾರಿ ಅತ್ತ್ ಡಲ ಕೋರಿ, ಪುಚ್ಚೆ, ನಾಯಿ, ಕಂಜಿ ಇಂಚ ಎಲ್ಯ ಎಲ್ಯ ಸಾಂಕಣದ ಪ್ರಾಣಿಲೆನ್ ಪತ್ ದ್ ದಿಂಗುವ. ಒರ ಒರ ರಾತ್ರೆಡ್ ಇಲ್ಲಡೆ ಬತ್ತ್ ದ್ ಸೇರೊನುವ. ಆಂಡ ಅವೆನ್ ಪತ್ತರೆ ಮಾತೆರ್ಲ ಪೋಡಿವೆರ್. ಆಂಡ ಮುಲ್ಕಿ ಕೈತಲ್ದ ಗೃಹಿಣಿ ನಯನಾ ಪನ್ಪಿನಾರ್ ಏರ್ನಲ ಇಲ್ಲಡೆಗ್ ಪೆರ್ಮರಿ ಬತ್ತ್ಂಡ ಪೋಡ್ಯಂದೆ ಅವೆನ್ ಪತ್ ದ್ ದೂರ ಕೊನೊದು ಬುಡ್ಪೆರ್.

ಮೇರ್ ಬುಧಾರ (ಆ.9) ಬಯ್ಯಡ್ ಕಾರ್ನಾಡ್ ಬೈಪಾಸ್ ದಲ್ಪ ಬತ್ತಿನ ಮಲ್ಲ ಪೆರ್ಮರಿನ್ ಭಾರಿ ಜಾಗ್ ರ್ತೆಡ್ ಪತ್ ದ್ ಬೇತೆ ಕಡೆಕ್ಕ್ ಕೊನೊದು ಬುಡ್ತೆರ್.

ಮುಲ್ಕಿ ಕಾರ್ನಾಡ್ ಧರ್ಮಸಾನದಲ್ಪದ ಇಲ್ಲದಾರ್ ಆಯಿನ ನಯನಾ ಮೇರ್ ಎಲ್ಯರ್ದಿಂಚಿಲ ಭಾರಿ ಧೈರ್ಯದಾರ್. ಅರೆನ ಪೊಪ್ಪ ಇಲ್ಲ ಬಾಕಿಲ್ ಗ್ ಬರೊಂದಿತ್ತಿನ ಪೆರ್ಮರಿನ್ ಪತ್ತುನೆನ್ ತೂದು ತೂದು ಅವೆನ್ ಪತ್ತುನ ಟ್ರಿಕ್ಸ್ ಕಲ್ತ್ ದಿತ್ತೆರ್. ನಯನಾ ಮೆರೆಗ್ ಕಂಡನಿ ಎಸ್.ಆರ್. ಪ್ರದೀಪ್ ಲ ಪ್ರೋತ್ಸಾಹ ಕೊರೊಂದುಲ್ಲೆರ್. ನಯನಾ ಮೆರೆನ ಧೈರ್ಯೊಗೊಂಜಿ ಸೊಲ್ಮೆ ಸಂದಾಗ.

ಕರ್ಣಾಟಕ ಬ್ಯಾಂಕ್‌ದ ಮಾಜಿ ಆಡಳಿತ ನಿರ್ದೇಶಕೆರ್ ಪಿ.ಜಯರಾಮ ಭಟ್ ದೇವೆರೆ ಪಾದ ಸೇರಿಯೆರ್

ಕರ್ಣಾಟಕ ಬ್ಯಾಂಕ್‌ದ ಮಾಜಿ ಆಡಳಿತ ನಿರ್ದೇಶಕೆರ್ ಬೊಕ್ಕ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿಯಾದ್ ಇತ್ತಿನ ಪಿ.ಜಯರಾಮ ಭಟ್ ದೇವೆರೆ ಪಾದ ಸೇರಿಯೆರ್.

2009 ಡ್ ಕರ್ಣಾಟಕ ಬ್ಯಾಂಕ್ ಡ್ ಅಧಿಕಾರ ವಹಿಸೊನ್ನ ಮೇರ್ ಮೂಜಿ ವರ್ಷ ಬ್ಯಾಂಕ್‌ದ ನಾಯಕತ್ವನ್ ವಹಿಸ್‌ದಿತ್ತೆರ್.

ಮೇರೆನ ಅವಧಿಡ್ ಇ-ಲಾಬಿ, ಮೊಬೈಲ್ ಬ್ಯಾಂಕಿಂಗ್, ಪಿಒಎಸ್, ಆನ್‌ಲೈನ್ ಟ್ರೇಡಿಂಗ್ ಅಕೌಂಟ್, ಟ್ರಾವೆಲ್ ಕಾರ್ಡ್, ಗಿಫ್ಟ್ ಕಾರ್ಡ್ ಇಂಚೆನೆ ಯಶಸ್ವಿ ಯೋಜನೆಲೆನ್ ಜನಕ್ಲೆಗ್ ಪರಿಚಯ ಮಲ್ತ್ ಗ್ರಾಹಕೆರೆರ್ದ್ ಭಾರಿ ಮೆಚ್ಚುಗೆ ದೆತೊಂದಿತ್ತೆರ್.

ಜಯರಾಮ್ ಭಟ್ ಮೇರ್ ಅತ್ಯುತ್ತಮ ಮ್ಯಾನೇಜರ್ ಅವಾರ್ಡ್, ಅತ್ಯುತ್ತಮ ಸಾಧನಾ ಪ್ರಶಸ್ತಿ, ಮಣಿಪಾಲ ವಿವಿರ್ದ್ 2015 ಡ್ ಪೊಸ ವರ್ಷದ ಪ್ರಶಸ್ತಿ ಪಡೆದಿತ್ತೆರ್.

ಆ.13: ಕೇಂದ್ರ ಸರಕಾರದ ಸಾಧನೆ ನಿಲೆಟ್ಟ್ ತುಳುನಾಡ ದೈವ ದೇವೆರ್ನ ಚಾಕಿರಿ ಮಲ್ಪುನಕ್ಲೆಗ್ ಗೌರವಾರ್ಪಣೆ

ಕುಡ್ಲ: ದೇಶದ ಪ್ರಧಾನಿ ಮಂತ್ರಿ ಆದ್ ನರೇಂದ್ರ ಮೋದಿ 9 ವರ್ಷ ಪೂರೈಕೆ ಮಲ್ತ್ ದ್ ಅಂಚೆನೆ ನಳಿನ್ ಕುಮಾರ್ ಕಟೀಲ್ ದ.ಕ ಸಂಸದೆರಾದ್ 15 ವರ್ಷ ಆಯಿನ ನಿಲೆಟ್ಟ್ ಕುಡ್ಲದ ಬಿಜೆಪಿದ ನಿರೆಲ್ಡ್ ತುಳುನಾಡ್‌ದ ಮಣ್ಣ್ ಡ್ ದೈವ ದೇವರೆನ ಸೇವೆ ಸಂದಾಯ ಮಲ್ತೊಂದಿಪ್ಪುನ ಕೊಣಾಜೆ ಬೊಕ್ಕ ಮಹಾಶಕ್ತಿ ಕೇಂದ್ರದ 12 ಗ್ರಾಮದ ಪ್ರಮುಖರೆಗ್ ಸೊಲ್ಮೆ ಸಂದಾಯದ ಲೇಸ್ ಆ.13 ದಾನಿ
ಬೋಳಿಯಾರ್ ಸಭಾಂಗಣಡ್ ನಡಪರೆ ಉಂಡು ಪಂದ್ ದಕ್ಷಿಣ ಕನ್ನಡ ಬಿಜೆಪಿ ಉಪಾಧ್ಯಕ್ಷ ಸಂತೋಷ್ ಕುಮಾರ್ ರೈ ಬೋಳಿಯಾರ್ ತೆರಿಪಾದೆರ್.

ಬೋಳಿಯಾರ್ ಡ್ ಸೋಮವಾರ ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್, ಈ ಲೇಸ್‌ಡ್ ನೇಮ ಕಟ್ಟುನಕುಲು, ತಂತ್ರಿವರ್ಯರ್, ಅರ್ಚಕೆರ್, ಗಡಿ ಪತ್ ದಿನಕುಲು, ಭಜನಾ ಮಂದಿರದ ಪ್ರಮುಖೆರ್ ಸೇರಿನಂಚ 200 ರ್ದ್ ಜಾಸ್ತಿ ಜನಕ್ ಗೌರವ ಸಂದಾವುನ ಉದ್ದೇಶನ್ ದೀಯೊಂದ. ಬರ್ಪಿನ ದಿನೊಟ್ ಉಳ್ಳಾಲ ಕ್ಷೇತ್ರದ ಮಾತಾ ಸೇವಕೆರೆಗ್ಲ ಗೌರವ ಸಂದಾಯೆರೆ ಉಲ್ಲ ಪಂದ್ ತೆರಿಪಾಯೆರ್.

ಪ್ರಧಾನಿ ನರೇಂದ್ರ ಮೋದಿ ಪ್ರಧಾನಿ ಆಯಿನ ಬೊಕ್ಕ ಮಲ್ತಿನ ಸಾಧನೆ ಬೊಕ್ಕ ನಳಿನ್ ಸಂಸದೆರಾಯಿನ ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆಗ್ ಕೊರ್ನ ಅನುದಾನ ಅಂಚನೆ ಉಳ್ಳಾಲ ತಾಲೂಕ್‌ಡ್ ಸಂಸದೆರರ್ನ ನಿಧಿಟ್ಟ್ ನಡತಿನ ಅಭಿವೃದ್ಧಿ ಯೋಜನೆನ್ ಜನಕ್ಲೆಗ್ ತೆರಿಪಾವ್‌ನ ಯೋಜನೆನ್ ರೂಪಿಸಾಯೆರೆ ಉಲ್ಲ ಪಂಡೆರ್.

ಕೋಟಿ ಕೋಟಿ ಅನುದಾನ ನಮ್ಮ ಕ್ಷೇತ್ರಗ್ ಬತ್‌ಂಡಲ ಕ್ಷೇತ್ರದ ಸಂಸದರೆರ್ನ ನಿಧಿರ್ದ್ ಅನುದಾನ ಬೈಜಿ ಪಂದ್ ಅಪಪ್ರಚಾರ ಮಲ್ತೊಂದುಲ್ಲೆರ್. ಐಕಾದ್ ಸತ್ಯಾಂಶ ತೆರಿಪಾಯೆರೆ ಈ ಕಾರ್ಯಕ್ರಮ ಮಲ್ತೊಂದುಲ್ಲ ನೆಕ್ ಮಾತೆರ್ಲ ಸಹಕಾರ ಕೊರೊಡ್ ಪಂದ್ ಪಂತೆರ್.

ಬಿಜೆಪಿ ಮುಖಂಡೆರ್ ಸತೀಶ್ ಕುಂಪಲ, ಕುಡ್ಲದ ಮಂಡಲ ಅಧ್ಯಕ್ಷೆರ್ ಚಂದ್ರಹಾಸ್ ಪಂಡಿತ್ ಹೌಸ್, ಜಯಂತಿ ಉಪಾಧ್ಯಕ್ಷೆರ್ ಯಶವಂತ್ ಅಮೀನ್, ಪ್ರಧಾನ ಕಾರ್ಯದರ್ಶಿ ನವೀನ್ ಪಾದಲ್ಪಾಡಿ, ಉಪಾಧ್ಯಕ್ಷೆರ್ ರವಿಶಂಕರ್, ಕೊಣಾಜೆ ಶಕ್ತಿ ಕೇಂದ್ರದ ಅಧ್ಯಕ್ಷೆರ್ ನವೀನ್ ಶೆಟ್ಟಿ ಕುರ್ನಾಡು, ಸುರೇಶ್ ದೇರಾಜೆ, ಹೇಮಂತ್ ಶೆಟ್ಟಿ, ಮೊಕುಲ್ ಈ ಪೊರ್ತುಡು ಇತ್ತೆರ್.

BP ಕಮ್ಮಿ ಆಂಡ ಕೂಡ್ಲೆ ಇಂಚ ಮಲ್ಪುಲೆ

ಬ್ಲಡ್ ಪ್ರೆಶರ್ (ರಕ್ತದ ಒತ್ತಡ) ಕಮ್ಮಿ ಆಂಡ ಕೂಡ್ಲೆ ದಾದ ಮಲ್ಪೊಡು ಪನ್ಪಿನ ಎಲ್ಯ ಪೊಲಬು ಇಂಚ ಉಂಡು.

•ಮಸ್ತ್ ನೀರ್ ಪರೊಡು.
•ಉಪ್ಪು ಇಪ್ಪುನಂಚಿನ ತೆನಸ್/ ಉಪ್ಪು ತಿನೊಡು.
•ವಿಟಮಿನ್ B12, B9 ಅಂಶ ಇಪ್ಪುನ ತೆನಸ್ ನ್ ಎಚ್ಚಾದ್ ತಿನೊಡು.
•ವನಸ್ ಮಲ್ಪುನ ಪ್ರಮಾಣನ್ ಕಮ್ಮಿ ಮಲ್ಪೊಡು.
•ಮಧುಮೇಹಿ ಆಯಿಜಿಂಡ, ಸೆಕ್ಕರೆಲ ತಿನೊಲಿ.
•ಎಲೆಕ್ಟ್ರೋಲೈಟ್ ಇಪ್ಪುನ ಪಾನೀಯ ಪಾರ್ಲೆ.
•ಕಮ್ಮಿ ನೆತ್ತೆರ್ ದ ಒತ್ತಡ ಎಚ್ಚ ಮಲ್ಪೆರೆ ಕಾಫಿ ಸಹಾಯ ಮಲ್ಪುಂಡು.

•ನೆತ್ತೆರ್ ಒತ್ತಡ ಕಮ್ಮಿ ಮಲ್ಪರೆ ಒವ್ವೇ ಸಮಸ್ಯೆಲು ತೋಜಿದ್ ಬತ್ತ್ಂಡ ಕೂಡ್ಲೆ ವೈದ್ಯೆರೆಗ್ ತೂಪಾಲೆ.

ಶಿಕ್ಷಣಗ್ ಎಚ್ಚದ ಒತ್ತು ಕೊರೊಡು: ಅರಣ್ಯಾಧಿಕಾರಿ ಪ್ರಭಾಕರ್ ಕುಲಾಲ್

ಶಿಕ್ಷಣಗ್ ಎಚ್ಚದ ಒತ್ತು ಕೊರ್ದು, ಅಯಿಕ್ಕ್ ಬೋಡಾಪಿನ ಪೂರಕ ಸಂಪನ್ಮೂಲನ್ ಸೇರ್ಸಾದ್, ಬಡ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಆಸರೆ ಬೊಲ್ಪು ಕೊರ್ಂಡ ಸಂಘದ ಸಮಾಜ ಮುಖಿ ಕಾರ್ಯ ಅರ್ಥ ಪೂರ್ಣ ಆಪುಂಡು ಪಂದ್ ಕಾರ್ಲ ವಲಯ ಅರಣ್ಯಾಧಿಕಾರಿ ಪ್ರಭಾಕರ್ ಕುಲಾಲ್ ಪಂಡೆರ್.

 

ಮೇರ್ ಆ.6 ಐತಾರ ಕುಲಾಲ ಸಂಘ ನಾನಿಲ್ತಾರ್ ಮುತಾಲಿಕೆಡ್ ನಡತಿನ ಪ್ರತಿಭಾ ಪುರಸ್ಕಾರ, ಸನ್ಮಾನ, ಆಟಿಡೊಂಜಿ ಕೂಟ ಲೇಸ್ ದ ಉದಿಪನ ಮಲ್ತ್ ದ್ ಪಾತೆರಿಯೆರ್. ಬೊಕ್ಕ ಸಂಘದ ವಿದ್ಯಾಸಿರಿ ಯೋಜನೆಗ್ ಸುರುತ್ತ ದೇಣಿಗೆನ್ ಈ ಪೊರ್ತುಡು ಘೋಷಣೆ ಮಲ್ತೆರ್.

ಲೇಸ್ ದ ಗುರ್ಕಾರ್ಮೆನ್ ಸಂಘದ ಅಧ್ಯಕ್ಷೆರ್ ಕುಶ ಆರ್ ಮೂಲ್ಯ ಒಯಿಸೊಂದಿತ್ತೆರ್. ನಿವೃತ್ತ ಯೋಧೆ ಜಯ ಮೂಲ್ಯ ಕಾರ್ಲ ದಂಪತಿಲೆಗ್ ಸನ್ಮಾನ ಮಲ್ತೆರ್. ಸಂಗೀತಾ ಕುಲಾಲ್ ಬೋಳ ಅಭಿನಂದನೆದ ಪಾತೆರ ಪಾತೆರಿಯೆರ್. ಈ ಲೇಸ್ ಗ್ ಉದ್ಯಮಿ ಅಶೋಕ್ ಕುಲಾಲ್ ಕುಡ್ಲ, ತೋಕೂರು ಕುಲಾಲ ಸಂಘದ ಅಧ್ಯಕ್ಷೆರ್ ಶ್ರೀಧರ್ ಬಂಗೇರ ಬೋಳ, ಕುಲಾಲ್ ಸಂಘದ ಅಧ್ಯಕ್ಷೆರ್ ಗಣೇಶ್ ಕುಲಾಲ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.

ಕರಿನ ವರ್ಷ SSLC ಬೊಕ್ಕ puc ಡ್ 80/- ಮಿತ್ತ್ ಮಾರ್ಕ್ಸ್ ಪಡೆಯಿನ ಕಲ್ಪಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಕೊರಿಯೆರ್.

ಚಾವಡಿಡ್ ಸಂಘದ ಮಾಜಿ ಅಧ್ಯಕ್ಷೆರ್ ಮಂಜಪ್ಪ ಮೂಲ್ಯ, ಕಾರ್ಯದರ್ಶಿ ಆಶಾ ವರದರಾಜ್, ಕೋಶಾಧಿಕಾರಿ ಸುಧಾಕರ ಕುಲಾಲ್, ಮಹಿಳಾ ಘಟಕ ಅಧ್ಯಕ್ಷೆರ್ ಪ್ರತಿಮಾ ಶ್ರೀಧರ್, ಯುವ ವೇದಿಕೆ ಅಧ್ಯಕ್ಷೆರ್ ದೀಪಕ್ ಬೆಳ್ಮಣ್ ಇತ್ತೆರ್.

ಈ ಲೇಸ್ ನ್ ಕುಮಾರಿ ಹರ್ಷಿತಾ ಬೊಕ್ಕ ಶಿಕ್ಷಕೆರ್ ಶ್ರೀಕಾಂತ್ ಸುಧಾರಿಕೆ ಮಲ್ತೆರ್. ಸುಧಾಕರ್ ಕುಲಾಲ್ ಸೊಲ್ಮೆ ಸಂದಾಯೆರ್. ಈ ಪೊರ್ತುಡು ಬೊಗ್ಗು ಮೂಲ್ಯ ಬೇಲಾಡಿ ಜಗನ್ನಾಥ ಮೂಲ್ಯ, ಬೆಲ್ಮಣ್ ಸಾಂತೂರ್ ರಾಜೇಶ್ ಕುಲಾಲ್, ಲೋಕೆಶ್ ಕುಲಾಲ್, ಸಂತೋಷ ಕುಲಾಲ್ ಅಗರಟ್ಟ, ಪವಿತ್ರ ಅಶೋಕ್ ಕುಲಾಲ್, ಸುಧಾಕರ್ ಸಾಲಿಯಾನ್ ಚೈತ್ರೇಶ್, ಅರುಣಾ ಕುಲಾಲ್ ಸಹಕಾರ ಕೊರಿಯೆರ್.

ಫೋಟೊ: ಅಶೋಕ್ ಫಲ್ಗುಣಿ ಡಿಜಿಟಲ್ ಮುಂಡೇರ್

ತಾರೆರ್ದ್ ಬೂರ್ದು ತೀರ್‌ಪೋಯಿನ ಪೊಂಜೊವು..!

ಪುತ್ತೂರು: ತಾರೆಗ್ ಬರ್ತ್ ದ್ ತಾರಾಯಿ ದೆಪ್ಪುನ ಬೇಲೆ ಮಲ್ತೊಂದಿತ್ತಿನ ಸುಚಿತ್ರ (30ವ) ಮೇರ್ ತಾರೆರ್ದ್ ಬೂರ್ದು ತೀರ್‌ಪೋಯಿನ ಘಟನೆ ಸವಣೂರು ಸಮೀಪದ ಪುಣ್ಚಪ್ಪಾಡಿ ಗ್ರಾಮಡ್ ನಡತ್‌ಂಡ್.

ಪ್ರವೀಣ್ ಬೊಳ್ಳಾಜೆ ಮೇರ್ನ ಬುಡೆದಿ ಸುಚಿತ್ರ ತಾರೆಗ್ ಬರ್ತ್ ದ್ ತಾರಾಯಿ ದೆಪ್ಪುನ ಬೇಲೆಡ್ ಪುದರ್  ಪಡೆದ್ ಇತ್ತೆರ್. ಸುಚಿತ್ರಾ ಮೇರ್‌ನ ಈ ಬೇಲೆಗ್ ಸಂಘ-ಸಂಸ್ಥೆಲು ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ದಿತ್ತೆರ್.

ಅಕ್ಟೋಬರ್ 28,29 ಒಡಿಪುಡು ನಡಪರೆ ಉಂಡು ವಿಶ್ವ ಬಂಟರ ಸಮ್ಮೇಳನ

ಮುಲ್ಕಿ: ಜಾಗತಿಕ ಬಂಟರ ಸಂಘಗಳ ಒಕ್ಕೂಟ (ರಿ) ಕುಡ್ಲ ನೆತ್ತ ಮುತಾಲಿಕೆಡ್ ಅಕ್ಟೋಬರ್ 28 ಬೊಕ್ಕ 29 ದಾನಿ ಒಡಿಪುಡು ವಿಶ್ವ ಬಂಟರ ಸಮ್ಮಿಲನ ನಡಪರೆ ಉಂಡು ಪಂದ್ ಜಾಗತಿಕ ಬಂಟರ ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ತೆರಿಪಾದೆರ್.
ಆರ್ ಮುಲ್ಕಿದ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣದ ಪ್ರವೀಣ್ ಭೋಜ ಶೆಟ್ಟಿ ಆಡಳಿತ ಕಚೇರಿಡ್ ನಡತಿನ ಒಕ್ಕೂಟದ ಸಭೆಟ್ ಅಧ್ಯಕ್ಷತೆ ಒಯಿಸೊಂದು ಪಾತೆರಿಯೆರ್.

ಅಕ್ಟೋಬರ್ 28 ದಾನಿ ಒಡಿಪುದ ಅಜ್ಜರಕಾಡ್ ಮೈದಾನಡ್ ವಿಶ್ವ ಬಂಟರ ಕ್ರೀಡಾಕೂಟ ಬೊಕ್ಕ ಅಕ್ಟೋಬರ್ 29 ದಾನಿ ಒಡಿಪುದ ಅಂಬಾಗಿಲು ಅಮೃತ ಗಾರ್ಡನ್‌ಡ್ ವಿಶ್ವ ಬಂಟರ ಸಾಂಸ್ಕೃತಿಕ ವೈಭವ ನಡಪೆರೆ ಉಂಡು ಪಂದ್ ತೆರಿಪಾದೆರ್.

ಈ ಲೇಸ್‌ದ ಸಾಂಸ್ಕೃತಿಕ ಸಮಿತಿ ಸಂಚಾಲಕೆರಾದ್ ಚಂದ್ರಹಾಸ ಶೆಟ್ಟಿ ರಂಗೋಲಿ, ಉಪ ಸಂಚಾಲಕೆರಾದ್ ಕರ್ನೂರು ಮೋಹನ್ ರೈ, ಬೊಕ್ಕ ಕ್ರೀಡಾ ಸಮಿತಿದ ಸಂಚಾಲಕೆರಾದ್ ಗಿರೀಶ್ ಶೆಟ್ಟಿ ತೆಳ್ಳಾರ್, ಉಪ ಸಂಚಾಲಕೆರಾದ್ ರೋಶನ್ ಕುಮಾರ್ ಶೆಟ್ಟಿ ಮೊಕ್ಲೆನ್ ಸಭೆಟ್ ಆಯ್ಕೆ ಮಲ್ತೆರ್. ಚೆನೆ ಉಪಸಮಿತಿಲೆನ್ ರಚನೆ ಮಲ್ಪೆರೆ ತೀರ್ಮಾನ ಮಲ್ತೆರ್.

ಊಟೋಪಚಾರದ ಸಮಿತಿ ಸಂಚಾಲಕೆರಾದ್ ಒಡಿಪು ಸಂತೋಷ್ ಶೆಟ್ಟಿ, ಮಾಧ್ಯಮ ಸಮಿತಿ ಸಂಚಾಲಕೆರ್ ಬಾಳ ಜಗನ್ನಾಥ ಶೆಟ್ಟಿ ಬೊಕ್ಕ ರಾಜೇಶ್ ಶೆಟ್ಟಿ ಒಡಿಪು ಮೊಕ್ಲೆನ್ ಆಯ್ಕೆ ಮಲ್ತೆರ್. ಈ ಲೇಸ್‌ಡ್ ಸಾಧಕರೆಗ್ ಗೌರವ, ಯಕ್ಷಗಾನ ಮೇಳದ ಯಜಮಾನೆರೆಗ್ ಮಾನಾದಿಗೆ ಅಂಚನೆ ರಾಜಕಾರಣಿಲು, ಸಿನಿಮಾ ನಟೆರೆನ್ ಲೇಸ್ ಗ್ ಲೆಪ್ಪೆರೆ ತೀರ್ಮಾನ ಮಲ್ತೆರ್.

ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ ಪಾತೆರ್ದ್ ವಿಶ್ವ ಬಂಟರ ಸಮ್ಮಿಲನ ಕಾರ್ಯಕ್ರಮ ಯಶಸ್ವಿ ಆವರೆ ಮಾತಾ ವಲಯ, ತಾಲೂಕು ಬಂಟರ ಸಂಘ ಕೈ ಜೋಡಿಸಾದ್ ಕೆಲಸ ಮಲ್ಪೊಡು ಪಂಡೆರ್.

ವೇದಿಕೆಡ್ ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಪುರುಷೋತ್ತಮ ಶೆಟ್ಟಿ, ಬಂಟ್ವಾಳ ಬಂಟರ ಸಂಘದ ಅಧ್ಯಕ್ಷೆರ್ ಚಂದ್ರ ಹಾಸ ಶೆಟ್ಟಿ ರಂಗೋಲಿ, ಬೊಲ್ತೆರ್ ಬಂಟರ ಸಂಘದ ಅಧ್ಯಕ್ಷೆರ್ ಜಯರಾಮ ಶೆಟ್ಟಿ, ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಮುಂಚೂರು, ಸಾಲೆತ್ತೂರು ಬಂಟರ ಸಂಘದ ಅಧ್ಯಕ್ಷೆರ್ ದೇವಪ್ಪ ಶೇಖ, ಗುರುಪುರ ಬಂಟರ ಮಾತೃಸಂಘದ ಅಧ್ಯಕ್ಷೆರ್ ಸಂತೋಷ್ ಶೆಟ್ಟಿ, ಕುಕ್ಕುಂದೂರು ಬಂಟರ ಸಂಘದ ಅಧ್ಯಕ್ಷೆರ್ ರವಿ ಶೆಟ್ಟಿ, ತೋನ್ಸೆ ಬಂಟರ ಸಂಘದ ಅಧ್ಯಕ್ಷೆರ್ ಮನೋಹರ ಶೆಟ್ಟಿ, ಒಡಿಪು ಜಿಲ್ಲಾ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಅಧಿಕಾರಿ ರೋಶನ್ ಕುಮಾರ್ ಶೆಟ್ಟಿ ಮೊಕುಲ್ ಪಾಲ್ ಪಡೆಯೆರ್.


ಸುರತ್ಕಲ್ ಬಂಟರ ಸಂಘದ ನಿಕಟಪೂರ್ವ ಅಧ್ಯಕ್ಷೆರ್ ಸುಧಾಕರ ಪೂಂಜ, ಸುದರ್ಶನ್ ಶೆಟ್ಟಿ ಗುರುಪುರ, ಮೋಹನ್ ಶೆಟ್ಟಿ ಒಡಿಪು, ಪ್ರಕಾಶ್ ಶೆಟ್ಟಿ ಪಡುಬಿದ್ರೆ, ಸತ್ಯ ಪ್ರಕಾಶ್ ಶೆಟ್ಟಿ ಜಪ್ಪು, ಪುಷ್ಪರಾಜ ಶೆಟ್ಟಿ ಕುಡುಂಬೂರು, ಶಮೀನಾ ಆಳ್ವ, ಕೊಲ್ಲಾಡಿ ಬಾಲಕೃಷ್ಣ ರೈ, ಬಾಳ ಜಗನ್ನಾಥ ಶೆಟ್ಟಿ, ಜೀವನ್ ಮುಲ್ಕಿ, ಸಾಯಿನಾಥ ಶೆಟ್ಟಿ, ಸಚ್ಚಿದಾನಂದ ಹೆಗ್ಡೆ ಕೊಳ್ಕೆಬೈಲು, ರವಿ ಶೆಟ್ಟಿ ಜತ್ತಬೆಟ್ಟು, ಶರತ್ ಶೆಟ್ಟಿ ಕಿನ್ನಿಗೋಳಿ, ನಿಶಾಂತ್ ಶೆಟ್ಟಿ ಕಿಲೆಂಜೂರು, ರೋಹಿನಿ ಶೆಟ್ಟಿ, ಅಮೂಲ್ಯ ಶೆಟ್ಟಿ ಕಟೀಲು, ಭಾರತಿ ಶೆಟ್ಟಿ ಮೊಕುಲ್ ಮಾತಾ ಸಲಹೆ ಸೂಚನೆ ಕೊರಿಯೆರ್.

ಆಗಸ್ಟ್ 11 ದಾನಿ ಬಯ್ಯಗ್ 4 ಗಂಟೆಗ್ ಒಡಿಪುದ ಅಂಬಾಗಿಲು ಅಮೃತ ಗಾರ್ಡನ್ ಡ್ ವಿಶ್ವ ಬಂಟರ ಸಮ್ಮೇಳನದ ಬಗ್ಗೆ ಸಭೆ ನಡಪೆರೆ ಉಂಡು, ಸಮಾಜ ಬಾಂಧವೆರ್ ಹೆಚ್ಚಿನ ಸಂಖ್ಯೆಡ್ ಭಾಗವಹಿಸುವೊಡ್ ಪಂದ್ ತೆರಿಪಾದೆರ್.

ಶ್ರೀ ಕ್ಷೇತ್ರ ಧರ್ಮಸ್ಥಳರ್ದ್ ಕಾಪು ಮಾರಿಗುಡಿ ಜೀರ್ಣೋದ್ಧಾರಗ್ 15 ಲಕ್ಷ ರೂ. ಕಾಣಿಕೆ

ಕಾಪು: ಸುಮಾರ್ 30 ಕೋಟಿ ರೂ. ಕರ್ಚಿಡ್ ಬಾಗಲಕೋಟೆದ ಇಳ್ಕಲ್ ಶಿಲೆಟ್ಟ್ ನಿರ್ಮಾಣ ಆವೊಂದಿಪ್ಪುನ ಇತಿಹಾಸ ಪ್ರಸಿದ್ಧ ಕಾಪು ಪೊಸ ಮಾರಿಗುಡಿತ್ತ ಜೀರ್ಣೋದ್ಧಾರಗ್ ಶ್ರೀ ಕ್ಷೇತ್ರ ಧರ್ಮಸ್ಥಳರ್ದ್ 15 ಲಕ್ಷ ರೂ ದೇಣಿಗೆನ್ ಕೊರ್ತೆರ್.

ಕ್ಷೇತ್ರದ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಕೆ ವಾಸುದೇವ ಶೆಟ್ಟಿ ಮೇರ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ದಿ ಯೋಜನೆದ ಒಡಿಪು ಜಿಲ್ಲಾ ನಿರ್ದೇಶಕೆರ್ ಡಿ. ಶಿವಾನಂದ ಪ್ರಭು ಮೇರೆಗ್ ನಡತೊಂದಿಪ್ಪುನ ಕಾಮಗಾರಿದ ಬಗ್ಗೆ ಬೊಕ್ಕ ಸಮಗ್ರ ಜೀರ್ಣೋದ್ಧಾರದ ಬಗೆಟ್ಟ್ ಮಾಹಿತಿ ಕೊರಿಯೆರ್.

ಈ ಪೊರ್ತುಡು ದೇವಳ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ರಮೇಶ್ ಹೆಗ್ಡೆ ಕಲ್ಯಾ, ಕ್ಷೇತ್ರದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಶ್ರೀನಿವಾಸ ತಂತ್ರಿ ಕಲ್ಯಾ, ವ್ಯವಸ್ಥಾಪನಾ ಸಮಿತಿದ ಮಾಜಿ ಅಧ್ಯಕ್ಷೆರ್ ಬೊಕ್ಕ ಗೌರವ ಸಲಹೆಗಾರೆರ್ ರತ್ನಾಕರ ಶೆಟ್ಟಿ ನಡಿಕೆರೆ, ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರ್ ಗಂಗಾಧರ ಸುವರ್ಣ, ದೇವಿಪ್ರಸಾದ್ ಶೆಟ್ಟಿ ಬೆಳಪು, ಮಾಧವ ಆರ್ ಪಾಲನ್, ಮನೋಹರ ಶೆಟ್ಟಿ, ಆರ್ಥಿಕ ಸಮಿತಿದ ಪ್ರಧಾನ ಸಂಚಾಲಕೆರ್ ಉದಯ ಸುಂದರ್ ಶೆಟ್ಟಿ, ಪ್ರಚಾರ ಸಮಿತಿದ ಪ್ರಧಾನ ಸಂಚಾಲಕೆರ್ ಯೋಗೀಶ್ ವಿ ಶೆಟ್ಟಿ ಬಾಲಾಜಿ, ಗ್ರಾಮ ಸಮಿತಿದ ಪ್ರಧಾನ ಸಂಚಾಲಕೆರ್ ಅರುಣ್ ಶೆಟ್ಟಿ ಪಾದೂರು, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾಯಿನ ಚಂದ್ರಶೇಖರ್ ಅಮೀನ್, ರವೀಂದ್ರ ಎಂ, ಬಾಬು ಮಲ್ಲಾರ್, ಕಾಪು ಪುರಸಭಾ ಸದಸ್ಯೆರ್ ಅನಿಲ್ ಕುಮಾರ್, ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಕಾಪು ತಾಲೂಕ್‌ದ ಯೋಜನಾಧಿಕಾರಿ ಜಯಂತಿ, ಕಾಪು ವಲಯದ ಮೇಲ್ವಿಚಾರಕೆರ್ ಸರಿತಾ, ಸಿದ್ದಿದಾತ್ರಿ ತಂಡದ ಸಂಚಾಲಕೆರಾಯಿನ ಜಗದೀಶ್ ಮೆಂಡನ್, ಬೊಕ್ಕ ಪ್ರಬಂಧಕೆರ್ ಗೋವರ್ಧನ್ ಸೇರಿಗಾರ್ ಲೇಸ್ ಡ್ ಪಾಲ್ ಪಡೆಯೆರ್.

You Missed