Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಆ.15: ತೋಕೂರು ಸ್ಪೋರ್ಟ್ಸ್ ಕ್ಲಬ್ ಡ್ ಸ್ವಾತಂತ್ರ್ಯ ದಿನಾಚರಣೆ, ನಿವೃತ್ತ ಯೋಧೆರೆಗ್ ಮಾನಾದಿಗೆ

ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ (ರಿ.) ದ ಮುತಾಲಿಕೆಡ್ ಸ್ವಾತಂತ್ರ್ಯ ದಿನಾಚರಣೆ ಬೊಕ್ಕ ನಿವೃತ್ತ ಯೋಧೆರೆಗ್ ಮಾನಾದಿಗೆ ಲೇಸ್ ಆ.15 ಅಂಗಾರೆ ಬೊಲ್ಪುಗು ತೋಕೂರ್ ಸ್ಪೋರ್ಟ್ಸ್ ಕ್ಲಬ್ ಡ್ ನಡಪರೆ ಉಂಡು.

ಈ ಲೇಸ್ ದೊಟ್ಟಿಗೆ ಸರಕಾರಿ ಹಿರಿಯ ಪ್ರಾಥಮಿಕ ಹಿಂದುಸ್ಥಾನಿ ಶಾಲೆ ತೋಕೂರು ಮುಲ್ಪದ ಕಲ್ಪಾರ್ಥಿಲೆಗ್ ಸ್ಕೂಲ್ ಬ್ಯಾಗ್, ಐಡಿ ಕಾರ್ಡ್ ಬೊಕ್ಕ ಕಂಪಾಸ್ ಬಾಕ್ಸ್ ಪಟ್ಟುನ ಲೇಸ್, ಗೊಬ್ಬುಲೆನ ಪಂತೊದ ಇನಾಮು ಕೊರ್ಪುನ ಲೇಸ್ ನಡಪರೆ ಉಂಡು.

ಈ ಮಾತ ಲೇಸ್ ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ, ನೆಹರು ಯುವ ಕೇಂದ್ರ ಕುಡ್ಲ, ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಕುಡ್ಲ, ಗ್ರಾಮ ಪಂಚಾಯತ್ ಪಡುಪಣಂಬೂರು, ತಾಲೂಕ್ ಬೊಕ್ಕ ಜಿಲ್ಲಾ ಯುವ ಜನ ಒಕ್ಕೂಟ ನೆತ್ತ ಮಾರ್ಗದರ್ಶನಡ್ ನಡಪುಂಡು.

ಅಂಚೆನೆ ಈ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಆರ್ ಕೆ ಟೈಲರ್, ತುಳು ರಂಗಭೂಮಿ ನಿರ್ದೇಶಕೆರ್ ನರೇಂದ್ರ ಕಿರೋಡಿಯನ್ ಒಯಿಸೊನ್ವೆರ್. ನಿವೃತ್ತ ಯೋಧೆರ್ ಹವಾಲ್ದಾರ್ ಚಂದ್ರಶೇಖರ್ ರಾಷ್ಟ್ರದ ಕೊಡಿ ಅರಲ್ಪಾವೆರ್. ಬೊಕ್ಕ ಮೆರೆಗ್ ಸನ್ಮಾನ ನಡಪರೆ ಉಂಡು. ಈ ಲೇಸ್ ಡ್ ಸೂರ್ಯಕಾಂತಿ ಚಾರಿಟೇಬಲ್ ಫೌಂಡೇಶನ್ ದ ಅಧ್ಯಕ್ಷೆರ್, ನವನಿಧಿ ವಿವಿಧೋದ್ದೇಶ ಸಹಕಾರ ಸಂಘದ ನಿರ್ದೇಶಕೆರ್ ವಿದ್ಯಾ ರಾಕೇಶ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕ್ಲಬ್ ದ ಅಧ್ಯಕ್ಷೆರ್ ಜಗದೀಶ್ ಕುಲಾಲ್, ಗೌರವಾಧ್ಯಕ್ಷೆರ್ ಪ್ರಶಾಂತ್ ಕುಮಾರ್ ಬೇಕಲ್, ಗೌರವ ಪ್ರಧಾನ ಕಾರ್ಯದರ್ಶಿ ದೀಪಕ್ ಸುವರ್ಣ, ಕೋಶಾಧಿಕಾರಿ ಪದ್ಮನಾಭ ಶೆಟ್ಟಿ, ಕಾರ್ಯಾಧ್ಯಕ್ಷೆರ್ ಸಂತೋಷ್ ದೇವಾಡಿಗ, ಮಹಿಳಾ ಕಾರ್ಯಾಧ್ಯಕ್ಷೆರ್ ಯಶೋಧ ದೇವಾಡಿಗ ಬೊಕ್ಕ ಗೌರವ ಮಾರ್ಗದರ್ಶಕೆರ್, ಪದಾಧಿಕಾರಿಲು, ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ನನ ಸರ್ಕಾರಿ ಆಸ್ಪತ್ರೆಡ್ ಧರ್ಮಾರ್ಥ ಎಂಅರ್ ಐ, ಸಿಟಿ ಸ್ಕ್ಯಾನಿಂಗ್

ಸರ್ಕಾರಿ ಆಸ್ಪತ್ರೆಡ್ ಸಿಟಿ ಸ್ಕ್ಯಾನ್ ಬೊಕ್ಕ ಎಂಆರ್ ಐ ಸ್ಕ್ಯಾನ್ ಸೇವೆನ್ ಮಾತೆರೆಗ್ಲಾ ಧರ್ಮೊಗು ಕೊರಿಯೆರೆ ಸರ್ಕಾರ ದುಂಬಾತ್ಂಡ್.

15 ಜಿಲ್ಲಾಸ್ಪತ್ರೆಡ್ ಎಂಆರ್‌ಐ ಸ್ಕ್ಯಾನ್ ಬೊಕ್ಕ 5 ಜಿಲ್ಲಾ ಆಸ್ಪತ್ರೆಡ್ ಸಿಟಿ ಸ್ಕ್ಯಾನ್ ಸೇವೆನ್ ಕೊರಿಯೆರೆ ಆಪುಂಡು ಪಂದ್ ಸಚಿವೆರ್ ಎಚ್.ಕೆ ಪಾಟೀಲ್ ತೆರಿಪಾದೆರ್.

ಮೈಸೂರ್, ಚಿತ್ರದುರ್ಗ, ಕುಡ್ಲ, ಬೆಂಗ್ಲೂರ್ ದ ಸಿ.ವಿ ರಾಮನ್, ಕೆ.ಸಿ ಜನರಲ್ ಆಸ್ಪತ್ರೆಡ್ ಸಿಟಿ ಸ್ಕ್ಯಾನ್ ಯಂತ್ರನ್ ಪಾಡಿಯೆರೆ ಉಂಡು.

ಕೆ ವಿ ಜಿ ಬ್ಯಾಂಕ್: ರಿಟೇಲ್ ಸಾಲದ ಬೇಗ ವಿಲೇವಾರಿಗ್ ಇಸೇಸ ಘಟಕ

ಕುಡ್ಲ: ಇಲ್ಲ್ ದ ಸಾಲ ಬೊಕ್ಕ ಗಾಡಿದ ಸಾಲ ಇಪ್ಪುನ ರಿಟೇಲ್‌ ಬ್ಯಾಂಕಿಂಗ್ ವ್ಯವಹಾರಗ್ ಎಚ್ಚದ ಒತ್ತು ಕೊರ್ಪುನ ದೃಷ್ಟಿರ್ದ್ ಬೊಕ್ಕ ಶಾಖೆಡ್ ಸಾಲದ ಪ್ರಸ್ತಾವನೆದ ಬೇಗ ವಿಲೇವಾರಿಗ್ ಸಂಬಂಧ ಪಟ್ಟಿನಂಚೆನೆ ಕೆನರಾ ಬ್ಯಾಂಕ್ ಪ್ರವರ್ತಿತ ಸರ್ಕಾರಿ ಸ್ವಾಮಿತ್ವದ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ರಿಟೇಲ್ ಸಾಲದ ಸಂಸ್ಕರಣಾ ಕೇಂದ್ರನ್ ಕುಡ್ಲ ಡ್ ಸುರು ಮಲ್ದ್ಂಡ್.

ಈ ಸಾಲ ಬೇಗ ವಿಲೇವಾರಿ ಘಟಕನ್ ಗುರುವಾರ ಬ್ಯಾಂಕ್ ದ ಮಹಾ ಪ್ರಬಂಧಕೆರ್ ಆರ್ ಟಿ ಕಾಂಬ್ಳೆ ಕುಡ್ಲಡ್ ಇಪ್ಪುನ ತನ್ನ ಬ್ಯಾಂಕ್ ದ ಪ್ರಾದೇಶಿಕ ಕಾರ್ಯಾಲಯದ ಪ್ರಾಂಗಣಡ್ ಉದಿಪನ ಮಲ್ತೆರ್.

ಈ ಪೊರ್ತುಡು ಪಾತೆರಿನ ಬ್ಯಾಂಕ್ ದ ಮೇರ್, ಇಲ್ಲದ ಸಾಲ, ಗಾಡಿದ ಸಾಲ, ಶೈಕ್ಷಣಿಕ ಸಾಲ, ಆಸ್ತಿ ಅಡಮಾನ ಸಾಲ ಇಂಚ ರಿಟೇಲ್ ಸಾಲದ ಪ್ರಸ್ತಾವನೆನ್ ತ್ವರಿತವಾದ್ ವಿಲೇವಾರಿ ಮಲ್ತ್ ದ್ ಗ್ರಾಹಕೆರೆಗ್ ಎಚ್ಚದ ಅನುಕೂಲ ಮಲ್ತ್ ದ್ ಕೊರಿಯೆರೆ ಈ ಕೇಂದ್ರನ್ ಸುರು ಮಲ್ದ್ಂಡ್. ಶಾಖೆಲು, ಸುರುತ್ತ ಅವಶ್ಯಕ ಅಗತ್ಯ ದಾಖಲೆನ್ ಗ್ರಾಹಕೆರ್ದ್ ಸಂಗ್ರಹ ಮಲ್ಪುಂಡು. ಬೊಕ್ಕ ಈ ಕೇಂದ್ರಗ್ ರವಾನೆ ಮಲ್ಪುಂಡು.

ಈ ಕೇಂದ್ರಲು ಸಾಲ ಮಂಜೂರಾತಿ ಕಾರ್ಯನ್ ಜಾಸ್ತಿ ಮಲ್ತ್ ದ್ ಗರಿಷ್ಠ 3 ರ್ದ್ 4 ದಿನತ್ತ ಉಲಯಿ ಸಾಲ ಮಂಜೂರು ಕೊರ್ತುಂಡು ಪಂದ್ ಆರ್ ಟಿ ಕಾಂಬ್ಳೆ ತೆರಿಪಾಯೆರ್.

ನೆರ್ದ್ ಗ್ರಾಹಕೆರ್ ಕಾಪುನ ಪೊರ್ತು ಒರಿಪುಂಡು ಅತ್ತಂದೆ ಗ್ರಾಹಕೆರೆಗೆ ಕೂಡ್ಲೆ ಸಾಲ ಪಡೆಯೆರೆ ಅನುಕೂಲ ಆಪುಂಡು ಪಂದ್ ಪಂಡೆರ್. ಬ್ಯಾಂಕ್ ದ ರಿಟೇಲ್ ಸಾಲದ ಬಡ್ಡಿದರ ಮಸ್ತ್ ಸ್ಪರ್ಧಾತ್ಮಕ ಆತ್ಂಡ್. ಸದ್ಯಗ್ ಇಲ್ಲ್ ಸಾಲದ ಮಿತ್ತ್ ದ ಬಡ್ಡಿದರ 8.5 % ಉಂಡು ಪಂದ್ ಪಂಡೆರ್. ಇತ್ತೆ ಈ ಘಟಕದ ಕಾರ್ಯನ್ ತೂದು ನನದ ದಿನಟ್ಟ್ ಮಾತ ಜಿಲ್ಲೆಲು ಆಯ ಕೇಂದ್ರಡ್ ಇಂಚಿನ ಘಟಕ ಸ್ಥಾಪನೆ ಮಲ್ಪುವ ಪಂದ್ ಪಂಡೆರ್.

ಬ್ಯಾಂಕ್ ಈ ಕೇಂದ್ರದ ಮುಖೇನ ಉದಿಪನದ ದಿನನೇ 2.49 ಕೋಟಿ ರೂ. ಸಾಲ ಮಂಜೂರಾತಿ ಮಲ್ತಿನವು ಇಸೇಸ ಆತ್ಂಡ್ ಪಂದ್ ಬ್ಯಾಂಕ್ ದ ಕುಡ್ಲ ಪ್ರಾದೇಶಿಕ ವ್ಯವಸ್ಥಾಪಕೆರ್ ವಿಜಯ ಧೋತಿಹಾಳ ಪ್ರಾಸ್ತಾವಿಕವಾದ್ ಪಾತೆರಿಯೆರ್.

ಈ ಪೊರ್ತುಡು ಬ್ಯಾಂಕ್ ದ ನಿಕಟಪೂರ್ವ ಸಹಾಯಕೆರ್ ಮಹಾ ಪ್ರಬಂಧಕೆರ್ ಬಿ ಶೇಖರ ಶೆಟ್ಟಿ, ತ್ವರಿತ ಸಾಲ ಘಟಕದ ವ್ಯವಸ್ಥಾಪಕೆರ್ ರೋಶನ್‌ ಕುಮಾರ್ ಬೊಕ್ಕ ಅಧಿಕಾರಿಲು ಇತ್ತೆರ್.

ಫೋಟೋ ಶೀರ್ಷಿಕೆ:

ರಿಟೇಲ್ ಸಾಲದ ಪ್ರಸ್ತಾವನೆದ ಬೇಗ ವಿಲೇವಾರಿಗಾದ್ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಕುಡ್ಲಡ್ ಸುರು ಮಲ್ತಿನ ರಿಟೇಲ್ ಸಾಲದ ಸಂಸ್ಕರಣಾ ಕೇಂದ್ರನ್ ಬ್ಯಾಂಕ್ ದ ಮಹಾ ಪ್ರಬಂಧಕೆರ್ ಆರ್ ಟಿ ಕಾಂಬ್ಳೆ ಉದಿಪನ ಮಲ್ತೆರ್.

ದಕ್ಷಿಣ ಕೊರಿಯಾ ಜಾಂಬೂರಿಡ್ ಯಕ್ಷಗಾನ, ಪಿಲಿ ನಲಿಕೆ

ಬೆದ್ರ: ಅಂತಾರಾಷ್ಟ್ರೀಯ ಮಟ್ಟದ ಸ್ಕೌಟ್ಸ್ ಗೈಡ್ಸ್ ಮುತಾಲಿಕೆಡ್ ದಕ್ಷಿಣ ಕೊರಿಯಾದ ಸಿಮನ್ ಗಾಮ್ ದ್ವೀಪಡ್ ನಡತೊಂದು ಇಪ್ಪುನ ವಿಶ್ವ ಜಾಂಬೂರಿಡ್ ಅಂಗಾರೆ ದ.ಕ ಜಿಲ್ಲೆದ 25 ಕಲ್ಪಾರ್ಥಿಲೆನ ತಂಡ ಯಕ್ಷಗಾನ ಬೊಕ್ಕ ಪಿಲಿ ನಲಿಕೆ ಪ್ರದರ್ಶನನ್ ಮಲ್ತೆರ್.

ಅಂಚನೆ ಭರತನಾಟ್ಯ, ಕೇರಳದ ಮೋಹಿನಿಯಾಟ್ಯಂ, ಒರಿಸ್ಸಾದ ಒಡಿಸ್ಸಿ, ಗುಜರಾತ್‌ದ ಬಾಂಗ್ಡಾ, ರಾಜಸ್ಥಾನದ ಗಾರ್ಭಾ ನೃತ್ಯ, ಮಣಿಪುರದ ಸ್ಟಿಕ್ ಡ್ಯಾನ್ಸ್ ಪೊರ್ಲುನು ತೂದು ವಿದೇಶದಕುಲು ಖುಷಿ ಪಡೆಯೆರ್. ಡಾ. ಎಂ. ಮೋಹನ್ ಆಳ್ವಾ ಮಾರ್ಗದರ್ಶನಡ್ ರಂಗ ನಿರ್ದೇಶಕ ಜೀವನ್‌ರಾಮ್ ಸುಳ್ಯ ಈ ತಂಡಗ್ ನೃತ್ಯ ನಿರ್ದೇಶನ ಮಲ್ತ್ ದೆರ್.

ಬೊಂಬೈಡ್ ದರೋಡೆಗ್ ಬತ್ತಿನ ಆರೋಪಿಲು ಅರೆಸ್ಟ್

ಬೊಂಬೈಡ್ ದರೋಡೆಗ್ ಬತ್ತಿನ ಇರುವೆರ್ ಆರೋಪಿಲೆನ್ ದಯಾ ನಾಯಕ್ ಮೆರೆನ ಪೊಲೀಸ್ ಟೀಮ್ ಅರೆಸ್ಟ್ ಮಲ್ದ್ಂಡ್.

ಆರೋಪಿಲಾಯಿನ ಅರ್‌ಬಾಜ್ ಇಶ್ರತ್ ಖಾನ್ ಬೊಕ್ಕ ತಬಿಸಹ ಜಾಕೀರ್ ಹುಸೈನ್ ಮೊಕುಲ್ ಬೊಂಬೈಡ್ ಡಿ.ಎನ್.ನಗರ ವ್ಯಾಪ್ತಿಡ್ ದರೋಡೆ ಮಲ್ಪರೆ ಬತ್ತ್ ದ್ ಯುನಿಟ್ 9 ಪೊಲೀಸೆರ್‌ನ ಕೈಕ್ ತಿಕ್ಕ್ ದ್ ಬೂರ್ದೆರ್. ಮೊಕ್ಲೆಡ ಇತ್ತಿನ ಪಿಸ್ತೂಲ್, ಬಿಸತ್ತಿ ಬೊಕ್ಕ ಕೆಲವು ಸೊತ್ತುಲೆನ್ ಪೊಲೀಸೆರ್ ವಶಕ್ಕ್ ದೆತೊಂದೆರ್.

ಬೊಂಬೈ ದ ವೈಎಂಸಿಎ, ನ್ಯೂ ಲಿಂಕ್ ರೋಡ್, ಡಿ. ಎನ್ ನಗರ ಅಂದೇರಿ ಪೊಲೀಸ್ ಸ್ಟೇಷನ್ ಡ್ ಮೊಕ್ಲೆನ ಮಿತ್ತ್ ಕೇಸ್ ದಾಖಲಾತ್‌ಂಡ್.

ಉಸ್ತುವಾರಿ ಸಚಿವೆರ್ ಎಲ್ಲೆ ಕುಡ್ಲಗ್; ಪುತ್ತೂರ್‌ಡ್ ಗೃಹಜ್ಯೋತಿ ಚಾಲನೆ

ದ.ಕ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಆ.11 ದಾನಿ ಕುಡ್ಲಗ್ ಬರಿಯೆರೆ ಉಲ್ಲೆರ್.

ಆನಿ ಬೊಲ್ಪುಗ್ 11 ಗಂಟೆಗ್ ಕುಡ್ಲದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್‌ದ್, 11.15 ಕ್ಕ್ ಪುತ್ತೂರ್‌ಗ್ ಬರಿಯೆರೆ ಉಲ್ಲೆರ್. ಮಧ್ಯಾಹ್ನ 12.30ಕ್ಕ್ ಪುತ್ತೂರು ಪುರ ಭವನಡ್ ಗೃಹಜ್ಯೋತಿ ಯೋಜನೆಗ್ ಚಾಲನೆ ಕೊರಿಯೆರೆ ಉಲ್ಲೆರ್. 3 ಗಂಟೆಗ್ ಪುತ್ತೂರು ಸಾರ್ವಜನಿಕ ಆಸ್ಪತ್ರೆಗ್ ಭೇಟಿ ಕೊರ್ದ್ ರಾತ್ರೆ 8.30 ಕ್ಕ್ ಕುಡ್ಲದ ಸರ್ಕೀಟ್ ಹೌಸ್‌ಗ್ ಪೋಯೆರೆ ಉಲ್ಲೆರ್ ಪಂದ್ ತೆರಿಪಾದೆರ್.

ಆ.27 : ಬಿಲ್ಲವರ ಗುತ್ತು‌ ಮನೆತನದ ಸಂಶೋಧನಾ ಗ್ರಂಥ‌ ಬುಡುಗಡೆ

ಸುಮಾರ್ 7 ವರ್ಷದ ಸಂಶೋಧನೆದ ಫಲವಾದ್ ರಚನೆ ಆಯಿನ ಬಿಲ್ಲವರ ಪ್ರತಿಷ್ಠಿತ ಮನೆತನದ ಅಪೂರ್ವ ಇತಿಹಾಸ”ದ ಬೂಕು ಬುಡುಗಡೆ ಲೇಸ್ ಆಗಸ್ಟ್ 27 ದಾನಿ ಐತಾರ ಬೊಲ್ಪುಗು 9:30 ಕ್ಕ್ ಕುದ್ರೋಳಿ ಶ್ರೀ ಗೋಕರ್ಣನಾಥ ದೇವಲ್ಯದ ಶ್ರೀ ಕೊರಗಪ್ಪ ಕಲ್ಯಾಣ ಮಂಟಪದ ವೇದಿಕೆಡ್ ನಡಪರೆ ಉಂಡು.

ಮುಂಬಯಿ ಬಾಬು ಶಿವ ಪೂಜಾರಿ ಮೆರೆನ ಮುತಾಲಿಕೆಡ್ ರಚನೆ ಆಯಿನ ಬಿಲ್ಲವರ ಗುತ್ತು (ಬರ್ಕೆ, ಬೀಡು, ಬಾವ, ಜನನ, ಗುರಿಕಾರ‌ಮನೆ, ಭಂಡಾರ ಮನೆ ನಟ್ಟಿಲ್ಲು ಬೊಕ್ಕ ಸಾನದ‌ ಮನೆ) ಪನ್ಪುನ ಸಂಶೋಧನಾ ಗ್ರಂಥ ಈ ಪೊರ್ತುಡು ಬುಡುಗಡೆ ಆವರೆ ಉಂಡು.

ಈ ಲೇಸ್ ಡ್ ಅಪೂರ್ವ ಇತಿಹಾಸ ಬೊಕ್ಕ ಪರಂಪರೆ ಇತ್ತಿನ ಇಪ್ಪುನ ಬಿಲ್ಲವೆರ್ನ ಪ್ರತಿಷ್ಠಿತ ಮನೆತನದ ದಾಖಲೀಕರಣ ಆದ್ ಇಪ್ಪುನ ಈ ಪುಸ್ತಕನ್ ದುಂಬುದ ಪೀಳಿಗೆಗ್ ಮುಟ್ಟಾವುನ ಬೇಲೆ ಆವರೆ ಉಂಡು ಪಂದ್ ಅಧ್ಯಯನ ಮಲ್ದಿನಕುಲು ತೆರಿಪಾದೆರ್.

ಕಂದಾವರ ಗ್ರಾಮ ಪಂಚಾಯತ್ ದ ರಡ್ಡನೇ ಅವಧಿದ ಅಧ್ಯಕ್ಷೆರಾದ್ ಶಾಲಿನಿ ಎಸ್, ಉಪಾಧ್ಯಕ್ಷೆರಾದ್ ಉದಯ ಆರ್ ರಾವ್ ಆಯ್ಕೆ

ಕಂದಾವರ ಗ್ರಾಮ ಪಂಚಾಯತ್ ದ ರಡ್ಡನೇ ಅವಧಿದ ಅಧ್ಯಕ್ಷೆರಾದ್ ಶಾಲಿನಿ ಎಸ್ ಬೊಕ್ಕ ಉಪಾಧ್ಯಕ್ಷೆರಾದ್ ಉದಯ ಆರ್ ರಾವ್ ಆಯ್ಕೆ ಆತೆರ್.

ಮೊಕ್ಲೆನ ಅವಧಿಡ್ ಗ್ರಾಮದ ಅಭಿವೃದ್ಧಿ ನನಾತ್ ಎಡ್ಡೆ ಅವಡ್ ಪಂದ್ ಗ್ರಾಮಸ್ಥೆರ್ ಅಭಿನಂದನೆ ಸಂದಾದೆರ್.

ತುಳಸಿ ನೀರ್ ರ್ದ್ ಆರೋಗ್ಯಗ್ ಆಪಿನ ಪ್ರಯೋಜನಲು

ತುಳಸಿ ನೀರ್ ನ್ ಒಂತೆ ಒಂತೆ ಪರ್ಪಿನೆರ್ದ್ ಜೀರ್ಣಕ್ರಿಯೆನ್ ಸುಧಾರಣೆ, ಗ್ಯಾಸ್ ಬೊಕ್ಕ ಬಂಜಿ ಉಬ್ಬೆರ್ನೆನ್ ತಡೆಯೆರೆ ಸಕಾಯ ಮಲ್ಪುಂಡು.

ಶೀತ, ತೆಮ್ಮ ಬೊಕ್ಕ ಅಸ್ತಮಾದಂಚಿನ ಕೆಲವು ಉಸುಲ್ ದ ಸೀಕ್ ನ್ ಕಮ್ಮಿ ಮಲ್ಪೆರೆ ತುಳಸಿ ನೀರ್ ಎಡ್ಡೆ. ಮಧುಮೇಹ ಇಪ್ಪುನಕುಲು ತುಳಸಿ ನೀರ್ ನ್ ಪರ್ಪಿನೆರ್ದಾವೆರ ಮಸ್ತ್ ಪ್ರಯೋಜನಕಾರಿ ಆಪುಂಡು. ಉಂದು ಎಚ್ಚ ಇನ್ಸುಲಿನ್ ಬುಡುಗಡೆ ಮಲ್ಪುನೆರ್ದಾವೆರ ನೆತ್ತೆರ್ ಡ್ ಇಪ್ಪುನ ಸೆಕ್ಕರೆ ಮಟ್ಟನ್ ಕಮ್ಮಿ ಮಲ್ಪೆರೆ ಸಕಾಯ ಮಲ್ಪುಂಡು.

ಆ.13: ಬೊಲ್ತೇರ್ ಡ್ 3ನೇ ವರ್ಷದ ಚೆನ್ನೆಮಣೆ ಗೊಬ್ಬು ಪಂತೊ

ತುಳುನಾಡ್ ಒಕ್ಕೂಟ ಸಂಘಟನೆದ ಮುತಾಲಿಕೆಡ್ 3ನೇ ವರ್ಷದ ಚೆನ್ನೆಮಣೆ ಗೊಬ್ಬು ಪಂತೊ ಆ.13 ಐತಾರ ಬೊಲ್ಪುಗು 10 ಗಂಟೆರ್ದ್ ಬಯ್ಯಗ್ 4 ಗಂಟೆ ಮುಟ್ಟ ಬೊಲ್ತೇರ್ ದ ಡಾ.ಬಿ ಆರ್ ಅಂಬೇಡ್ಕರ್ ಭವನಡ್ ನಡಪರೆ ಉಂಡು.

ಬೊಲ್ಪುಗು ನಡಪುನ ಉದಿಪನ ಲೇಸ್ ದ ಉದಿಪನನ್ ತುಳುನಾಡ್ ಒಕ್ಕೂಟ ಸಂಸ್ಥಾಪಕೆರ್ ಶೈಲೇಶ್ ಆರ್ ಕೆ ಮಲ್ಪುವೆರ್. ಈ ಲೇಸ್ ದ ಗುರ್ಕಾರ್ಮೆನ್ ತುಳುನಾಡ್ ಒಕ್ಕೂಟದ ಗುರ್ಕಾರ್ಲು ಶೇಖರ್ ಗೌಂಡತಿಗೆ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್ ಪತ್ರಕರ್ತೆರ್ ಶಿಬಿ ಧರ್ಮಸ್ಥಳ, ಬೋಲ್ತೇರ್ ತಾಲೂಕು ಮೂಲ್ಯರ ಯಾನೆ ಕುಂಬಾರರ ಸಂಘದ ಗುರ್ಕಾರ್ಲು ಹರೀಶ್ ಕಾರಿಂಜ, ಬೊಲ್ತೇರ್ ನೋಟರಿ ವಕೀಲೆರ್ ಬಿ.ಮುರಳಿ, ಕುಡ್ಲ ಯುವವಾಹಿನಿ ಕೇಂದ್ರ ಸಮಿತಿದ ಪನವುದ ಪಲವೆರ್ ಯಂ.ಕೆ ಪ್ರಸಾದ್, ಲಾಯಿಲ ಗ್ರಾ.ಪಂ ಸದಸ್ಯೆರ್ ಪ್ರಸಾದ್ ಶೆಟ್ಟಿ ಎಣಿಂಜೆ ಮೊಕುಲು ಪಾಲ್ ಪಡೆಯೆರೆ ಉಲ್ಲೆರ್.

ಬಯ್ಯಗ್ ನಡಪುನ ಮುಗಿತಲದ ಲೇಸ್ ದ ಗುರ್ಕಾರ್ಮೆನ್ ಬೊಲ್ತೇರ್ ತಾಲೂಕ್ ಕೂಟ, ತುಳುನಾಡ್ ಒಕ್ಕೂಟದ ಗುರ್ಕಾರ್ಲು ರಾಜೇಶ್ ಕುಲಾಲ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್ ಜೂ. ಕಾಲೇಜ್ ಉಪನ್ಯಾಸಕೆರ್ ಶೀನ ನಾಡೋಳಿ, ಬೊಲ್ತೇರ್ ಟೈಲರ್ ಸ್ ಅಸೋಸಿಯೇಷನ್ ದ ಗುರ್ಕಾರ್ಲು ಸಿರಿಮತಿ ವೇದಾವತಿ ಜನಾರ್ಧನ್, ಬೊಲ್ತೇರ್ ರಾಜಕೇಸರಿ ಸಂಸ್ಥಾಪಕೆರ್ ದೀಪಕ್ ಜಿ, ಬೆಂಗ್ಲೂರ್ ಸಿನೆಮ ಬೊಕ್ಕ ಜಾಹೀರಾತ್ ಚಿತ್ರೊಲೆನ ನಿರ್ದೇಶಕೆರ್ ಕೃಷ್ಣ ಬೊಲ್ತೇರ್, ಶ್ರೀ ಕ್ಷೇತ್ರ ಗ್ರಾ.ಆ.‌ಯೋಜನೆ ಧರ್ಮಸ್ಥಳದ ಯೋಜನಾಧಿಕಾರಿಲು ಪ್ರವೀಣ್ ಎ.ಜಿ ಬರಿಯೆರೆ ಉಲ್ಲೆರ್ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

You Missed