Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಒಡಿಪುಡು ರಾಷ್ಟ್ರದ ಕೊಡಿನ್ ರಾಪಾಯಿನ ಸಚಿವೆರ್ ಲಕ್ಷ್ಮಿ ಹೆಬ್ಬಾಳ್ಕರ್

ಒಡಿಪು: ಜಿಲ್ಲಾಡಳಿತದ ಮುತಾಲಿಕೆಡ್ ಸ್ವಾತಂತ್ರ್ಯ ದಿನಾಚರಣೆ ಅಜ್ಜರಕಾಡುದ ಮಹಾತ್ಮಾ ಗಾಂಧಿ ಕ್ರೀಡಾಂಗಣಡ್ ಗೌಜಿಡ್ ನಡತ್ಂಡ್.

ಒಡಿಪು ಜಿಲ್ಲಾ ಉಸ್ತುವಾರಿ ಸಚಿವೆರ್, ರಾಜ್ಯದ ಮಹಿಳಾ ಬೊಕ್ಕ ಮಕ್ಕಳ ಅಭಿವೃದ್ಧಿ, ವಿಕಲಚೇತನ ಹಿರಿಯ ನಾಗರಿಕರ ಸಬಲೀಕರಣ ಸಚಿವೆರ್ ಲಕ್ಷ್ಮಿ ಹೆಬ್ಬಾಳ್ಕರ್ ದೇಶದ ಕೊಡಿ ಅರಳಾದ್ ಮಾನಾದಿಗೆ ಸ್ವೀಕಾರ ಮಲ್ತೆರ್.

ಬೊಕ್ಕ ಮೇರ್ ಪಾತೆರ್ದ್, “ದೇಶ ಇಡೀ ಇನಿ ಆಚರಣೆ ಮಲ್ತೊಂದು ಇಪ್ಪುನ 77 ನೇ ಸ್ವಾತಂತ್ರ್ಯ ದಿನಾಚರಣೆದ ಈ ಶುಭ ಪೊರ್ತುಡು, ಅತ್ಯಮೂಲ್ಯವಾಯಿನ ಈ ನಮ್ಮ ಸ್ವಾತಂತ್ರ್ಯನ್ ಕಾಪಾಡುನ ದಿನ ಉಂದಾತ್ಂಡ್. ಭಾರತ ಸ್ವಾತಂತ್ರ್ಯ ಸಂಗ್ರಾಮದ ಇತಿಹಾಸಡ್, ನಮ್ಮ ದೇಶದ ಸ್ವಾತಂತ್ರ್ಯ ಪಂಡ ತ್ಯಾಗ, ಬಲಿದಾನದ ಫಲ. ಇಡೀ ಭಾರತನೇ ಬ್ರಿಟಿಷೆರೆನ ಮಿತ್ತ್ ಹೋರಾಟ ಮಲ್ತ್ ದ್ ಸ್ವಾತಂತ್ರ್ಯನ್ ಪಡೆತ್ಂಡ್. ನಮ ಮಾತ ಇನಿ ದೇಶದ ಉಜ್ವಲ ಭವಿಷ್ಯಗಾದ್ ಕನ ಕಟ್ಟಿಯೆರೆ ಮುಲ್ಪ ಸೇರ್ದ. ನಮ್ಮ ಕನತ್ತೊಟ್ಟಿಗೆ ನಮ್ಮ ಮಹಾತ್ಮರ ಕನನ್, ಆಶಯನ್ ನನಸ್ ಮಲ್ಪರೆ ನಮ ಮಾತ ಇನಿ ಸಂಕಲ್ಪ ಮಲ್ಪೊಗ ಪಂದ್ ಪಂಡೆರ್.

ಈ ಪೊರ್ತುಡು ಒಡಿಪು ಶಾಸಕೆರ್ ಯಶ್ ಪಾಲ್ ಸುವರ್ಣ, ಜಿಲ್ಲಾಧಿಕಾರಿ ವಿದ್ಯಾಕುಮಾರಿ, ಅಪರ ಜಿಲ್ಲಾಧಿಕಾರಿ ಮಮತಾ ದೇವಿ, ಜಿಲ್ಲಾ ಪಂಚಾಯತ್ ಸಿಇಒ ಪ್ರಸನ್ನ ಎಚ್, ಪೋಲಿಸ್ ವರಿಷ್ಟಾದಿಕಾರಿ ಹಾಕೆ ಅಕ್ಷಯ್ ಮಚೇಂದ್ರ ಇತ್ತೆರ್.

ದೇವೆರೆ ಪಾದ ಸೇರಿಯೆರ್ ಉದ್ಯಮಿ ಪ್ರಕಾಶ್ ಎನ್ ಶೆಟ್ಟಿ

ಹಳೆಯಂಗಡಿ : ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್, ಉದ್ಯಮಿ ಪ್ರಕಾಶ್ ಎನ್ ಶೆಟ್ಟಿ(82ವ) “ಸುಮಾ ನಿಲಯ”, ಮೇರ್ ದೇವೆರೆ ಪಾದ ಸೇರಿಯೆರ್.

ಮೇರ್ ಧಾರ್ಮಿಕ, ಸಾಮಾಜಿಕ ಕ್ಷೇತ್ರಡ್ ಸಕ್ರಿಯವಾದ್ ಸೇವೆ ಮಲ್ತೊಂದು ಇತ್ತೆರ್. ಅರೆಗ್ ಬುಡೆದಿ ಬೊಕ್ಕ ಮಗಲ್ ಉಲ್ಲೆರ್.

ಪುದೀನಾ ಇರೆಟ್ಟ್ ಉಂಡು ಮೋನೆದ ಪೊರ್ಲು

ಅಟಿಲ್ ಗ್ ಗಲಸುನ ಪುದಿನಾ ಇರೆಟ್ಟ್ ಚರ್ಮಗ್ ಪೊಸ ತಾಜಾತನ ಕೊರ್ಪಿನ ಶಕ್ತಿ ಉಂಡು. ಆತೆ ಅತ್ತ್ ಕುಜಲ್ ದ ಸೌಂದರ್ಯಲ ನೆಟ್ಟ್ ತಿಕುಂಡು.

ಪುದೀನಾರ್ದ್ ಎಂಚ ಸೌಂದರ್ಯ ರಕ್ಷಣೆ ಮಲ್ಪೊಲಿ.

ಕುಜಲ್ ಪೊರ್ಲಾವರೆ ದಾದ ಮಲ್ಪೊಡು?

ಸುರುಕು 1 ಚಮಚ ಕಡೆದಿನ ಪುದೀನಾ ಪೇಸ್ಟ್ ನ್ ಅರ್ಧ ಕಪ್ ಕೊಜಪುಡ್ ಮಿಕ್ಸ್ ಮಲ್ಪುಲೆ. ಬೊಕ್ಕ ತರೆಕ್ಕ್ ಪಾಡ್ಲೆ. 10 ನಿಮಿಷ ಬೊಕ್ಕ ದೆಕ್ಕೊಡು. 1-5 ದಿನಕೊರ ಈ ಅಭ್ಯಾಸ ಮಲ್ತ್ಂಡ ತರೆತ್ತ ಹೊಟ್ಟು ಸಮಸ್ಯೆ ನಿವಾರಣೆ ಆಪುಂಡು.

ಮೋನೆದ ಪೊರ್ಲುಗು

ಸಮಪ್ರಮಾಣಡ್ ಪುದೀನಾ ಬೊಕ್ಕ ಮುಲ್ತಾನಿ ಮಿಟ್ಟಿನ್ ಮಿಕ್ಸ್ ಮಲ್ತ್ ದ್ ನೀರ್ ಡ್ ಬೆರೆಸ್ ಲೆ.‌ ಬೊಕ್ಕ ಮೋನೆಡ್ ಇಪ್ಪುನ ಮುದ್ದನಗ್ ಪೂಜಿಲೆ‌. ನುಂಗಿನ ಬೊಕ್ಕ ಮೋನೆ ದೆಕ್ಕೊಡು. ಅಪಗಪಗ ಇಂಚ ಮಲ್ಪೊಲಿ. ಆಂಡ ಎಚ್ಚ ಪೊರ್ತು ಬುಡಿಯೆರೆ ಬಲ್ಲಿ. ಹೀಟ್ ಬಾಡಿದಕ್ಲೆಗ್ ಉಂದು ಆಪುಜಿ. ಅಂಚಾದ್ ಅಕುಲು ಇಂಚ ಮಲ್ಪಂದೆ ಇತ್ತ್ಂಡನೇ ಎಡ್ಡೆ.

ಬಂಗಾರ್ ಕಂಡಿನ ಕಲ್ವೆರ್..!

ಉಬಾರ್: ನೆಕ್ಕಿಲಾಡಿ ಗ್ರಾಮದ ಶೀಲಾ ಪನ್ಪುನಾರ್ನ ಇಲ್ಲಗ್ ಕಲ್ವೆರ್ ಬತ್‌ದ್ 2.5 ಲಕ್ಷ ರೂ ಬಂಗಾರ್‌ನ್ ಕಂಡಿನ ಘಟನೆ ನಡತ್‌ಂಡ್.

ಶೀಲಾ ಮೇರ್ನ ಕಂಡಿನ ಹುಷಾರ್‌ದಾಂತೆ ಇತ್ತಿನೆದಾತ್ರ ಆಸ್ಪತ್ರೆಗ್ ಲೇತ ಪೋದ್ ಮದ್ಯಾಹ್ನ ಪಿರ ಬನ್ನಗ ಇಲ್ಲದ ಬಾಕಿಲ್ ದೆತ್‌ದ್ ಇತ್ತ್ಂಡ್. ಇಲ್ಲದ ಉಲಾಯಿ ಪೋದ್ ತೂನಗ ಕಬಾಟ್ ದ  ಬಾಕಿಲ್ ದೆತ್‌ದ್ ಅವೆಟ್ ಇತ್ತಿನ ಎನ್ಮರೆ ಪವನ್ ಬಂಗಾರ್‌ನ ಪತೊಂದು ಕಲ್ವೆರ್ ಪರಾರಿ ಆದ್ ಇತ್ತೆರ್.

ನೆತ್ತ ಬಗ್ಗೆ ಉಬಾರ್ ಪೊಲೀಸ್ ಠಾಣೆಡ್ ದೂರು ದಾಖಲಾತ್‌ಂಡ್.

ಆ.30, 31: ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘಡ್ ನಾರಾಯಣಗುರು ಜಯಂತಿ, ಪ್ರತಿಭಾ ಪುರಸ್ಕಾರ

ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169 ನೇ ಪುಟ್ಟು ದಿನತ್ತ ಪರ್ಬ ಆ.30 ಬುಧಾರ ಬೊಲ್ಪುಗು ನಡಪರೆ ಉಂಡು.

ಈ ದಿನ ಭಜನೆದ ತುಡರ್ ನ್ ಪೆಜಮಾಡಿ ಬಿಲ್ಲವ ಸಂಘ (ರಿ.) ದ ಗುರ್ಕಾರ್ಲು ಲೋಕೇಶ್ ಅಮೀನ್ ಅರ್ಲಾಯೆರೆ ಉಲ್ಲೆರ್. ಬೊಕ್ಕ ಬೇತೆ ಬೇತೆ ಭಜನಾ ಮಂಡಳಿದಕ್ಲೆರ್ದ್ ಭಜನಾ ಲೇಸ್ ರಾತ್ರೆ ಭಜನೆದ ಮಂಗಳ ನಡಪರೆ ಉಂಡು.

ಅಂಚೆನೆ ಆ.31 ಗುರುವಾರ ಬೊಲ್ಪುಗು ಸಭಾ ಲೇಸ್ ಬೊಕ್ಕ ವಿದ್ಯಾರ್ಥಿವೇತನ ಪಟ್ಟುನ ಲೇಸ್ ನಡಪರೆ ಉಂಡು. ಈ ಲೇಸ್ ದ ಸಭಾಧ್ಯಕ್ಷೆತೆನ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ದ ಗುರ್ಕಾರ್ಲು ಎಂ ಪ್ರಕಾಶ್ ಸುವರ್ಣ ಒಯಿಸೊನ್ವೆರ್. ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ ಕೋಟ್ಯಾನ್ ವಿದ್ಯಾರ್ಥಿ ವೇತನನ್ ಪಟ್ಟುವೆರ್. ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ ಹರಿಪ್ರಸಾದ್ ಉನ್ನತ ಶಿಕ್ಷಣಗ್ ವಿದ್ಯಾರ್ಥಿವೇತನ ಕೊರಿಯೆರೆ ಉಲ್ಲೆರ್. ಮುಲ್ಕಿ ಅಶೋಕ್ ಟೈಲರ್ ದ ಧಣಿ ಶಶಿಧರ್ ಕೋಟ್ಯಾನ್ ಎನ್ ಆರ್ ಮುಲ್ಕಿದ ನೆಂಪುದ ಪ್ರಶಸ್ತಿನ್ ಪ್ರದಾನ ಮಲ್ಪರೆ ಉಲ್ಲೆರ್. ಮುಲ್ಕಿ ಸರ್ಕಾರಿ ಪದವಿ ಪೂರ್ವ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ.ವಾಸುದೇವ ಬೆಳ್ಳೆ ಇಸೇಸ ಉಪನ್ಯಾಸ ಕೊರಿಯೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ವಿಧಾನ ಪರಿಷತ್ ಸದಸ್ಯೆರ್ ಕೋಟ ಶ್ರೀನಿವಾಸ ಪೂಜಾರಿ, ಹರೀಶ್ ಕುಮಾರ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಹರ್ಷರಾಜ್ ಶೆಟ್ಟಿ ಜಿ ಎಂ ಪಾಲ್ ಪಡೆಯೆರೆ ಉಲ್ಲೆರ್. ಬೊಕ್ಕ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಮಾನಾದಿಗೆ ಆದ್ ಮಧ್ಯಾಹ್ನ ಸಾಮೂಹಿಕ ಅನ್ನಸಂತರ್ಪಣೆ ನಡಪರೆ ಉಂಡು.

ಬಯ್ಯಗ್ ಕೊಳಚಿಕಂಬಳ ಗ್ರಾಮಸ್ಥೆರೆನ ಒಟ್ಟುಸೇರಿಗೆಡ್ ಶಾಂತ ಸಹದೇವ ಕರ್ಕೇರ ಮೆರೆನ ಇಲ್ಲ್ ಸಾಯಿಪಾದಡ್ ಗುರುಪೂಜೆಯಾದ್ ಕಟ್ಟದಂಗಡಿ, ಒಡೆಯರಬೆಟ್ಟು, ಹೊಸಪೇಟೆ, ಬಪ್ಪನಾಡ್ ದೇವಲ್ಯ, ಪಂಚಮಹಲ್, ಕೆನರ ಬ್ಯಾಂಕ್ ಮಾರ್ಗ ಆದ್ ಮುಲ್ಕಿ ಬಸ್ ಸ್ಯಾಂಡ್ ಆದ್ ಸಂಘಗ್ ಶ್ರೀ ನಾರಾಯಣ ಗುರುಕುಲೆನ ಭಾವಚಿತ್ರದ ಶೋಭಾಯಾತ್ರೆ ನಡಪರೆ ಉಂಡು ಪಂದ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.), ಬೊಂಬೈ ಸಮಿತಿ, ಶ್ರೀ ನಾರಾಯಣಗುರು ಮಹಿಳಾ ಮಂಡಳಿ, ಶ್ರೀ ನಾರಾಯಣಗುರು ಸೇವಾದಳ ಲೆಪ್ಪೋಲೆಡ್ ತೆರಿಪಾದೆರ್.

ಬೊಲ್ತೆರ್: ತಾಲೂಕು ಆಡಳಿತ ಸೌಧಡ್ ಸ್ವಾತಂತ್ರ್ಯ ದಿನಾಚರಣೆ

ಬೊಲ್ತೆರ್ ತಾಲೂಕ್ ರಾಷ್ಟ್ರೀಯ ಪರ್ಬದ ಆಚರಣಾ ಸಮಿತಿದ ಮುತಾಲಿಕೆಡ್ 76 ವರ್ಷದ ಸ್ವಾತಂತ್ರ್ಯ ದಿನಾಚರಣೆ ತಾಲೂಕು ಆಡಳಿತ ಸೌಧಡ್ ನಡತ್‌ಂಡ್.

ಧ್ವಜರೋಹಣನ್ ಬೊಲ್ತೆರ್‌ದ ತಹಶೀಲ್ದಾರ್ ಡಿ ಸುರೇಶ್ ಕುಮಾರ್ ಕೆ.ಎ.ಎಸ್ ನಡಪಾಯೆರ್. ಶಾಸಕೆರ್ ಹರೀಶ್ ಪೂಂಜ ಲೇಸ್‌ದ ಗುರ್ಕಾಮೆನ್ ವಹಿಸಾದ್ ಇತ್ತೆರ್.

ಮಲ್ಲ ಬಿನ್ನೆರಾದ್ ವಿಧಾನ ಪರಿಷತ್ ಶಾಸಕೆರ್ ಪ್ರತಾಪಸಿಂಹ ನಾಯಕ್, ಪ್ರಧಾನ ಭಾಷಣಗಾರೆರಾದ್ ಪ್ರೊ. ಗಣಪತಿ ಭಟ್ ಕುಳಮರ್ವ ಪಾಲ್ ಪಡೆದ್ ಇತ್ತೆರ್. ಅಂಚನೆ ಗೌರವ ಉಪಸ್ಥಿತಿಟ್ ಪಟ್ಟಣ ಪಂಚಾಯತ್ ಸದಸ್ಯೆರ್, ತಾಲೂಕುದ ಗ್ರಾ,ಪಂ ಅಧ್ಯಕ್ಷೆರ್, ಉಪಾಧ್ಯಕ್ಷೆರ್, ಸದಸ್ಯೆರ್, ವಿವಿಧ ಸಂಘ ಸಂಸ್ಥೆದ ಪದಾಧಿಕಾರಿಲು ಪಾಲ್ ಪಡೆದ್ ಇತ್ತೆರ್.

ಇಲಾಖಾ ಅಧಿಕಾರಿ, ಪೊಲೀಸೆರ್, ಗೃಹರಕ್ಷಕ ದಳ, ಎಸ್.ಸಿ.ಸಿ, ಸ್ಕೌಟ್ಸ್, ಗೈಡ್ಸ್, ಬುಲ್ ಬುಲ್ಸ್, ಕಬ್ಸ್ ಶಾಲೆದ ಜೊಕುಲ್ ಚರ್ಚ್ ರೋಡ್ ರ್ದ್ ಬೊಲ್ತೆರ್ ಮುಟ ಮೆರವಣಿಗೆದ ಮುಖೇನ ತಾಲೂಕು ಕಚೇರಿ ಮುಟ ಬತ್‌ದ್, ಬೊಕ್ಕ ಶಾಲೆದ ಜೊಕ್ಲೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್‌ಂಡ್.

ಪುತ್ತೂರ್‌ಡ್ ಚರುಂಬುರಿ ಪರ್ಬ

ಪುತ್ತೂರ್: “ಪ್ರಭು ಚರುಂಬುರಿ” ಮುತಾಲಿಕೆಡ್ ಕೊಂಬೆಟ್ಟು ಬಂಟರ ಭವನದ ಕೈತಲ್ ಜಿ.ಎಲ್ ಟ್ರೇಡ್ ಸೆಂಟರ್‌ದ ಕಟ್ವಾನಡ್ ” ಚರುಂಬುರಿ ಪರ್ಬ” ಗ್ ಚಾಲನೆ ಕೊರಿಯೆರ್. ಆ.12-16 ಮುಟ ಬಯ್ಯ 4 ಗಂಟೆರ್ದ್ 10 ಗಂಟೆ ಮುಟ ಚರುಂಬುರಿ ಪರ್ಬ ನಡಪೆರೆ ಉಂಡು.

ಈ ಲೇಸ್ ಗ್ ಭಟ್ ಆಂಡ್ ಭಟ್ ಯೂಟ್ಯೂಬ್ ವಾಹಿನಿದ ಸ್ಥಾಪಕೆರ್ ಸುದರ್ಶನ್ ಭಟ್ ಕಾರ್ಯಕ್ರಮದ ಬಿನ್ನೆರಾದ್ ಬತ್ ಇತ್ತೆರ್. ಈ ಪೊರ್ತುಡು ಪುತ್ತೂರ್‌ದ ಡಾ. ಶಿವರಾಮ ಭಟ್ ಕ್ಲಿನಿಕ್‌ದ ಕಂಪೌಂಡರ್ ನರಸಿಂಹ ಭಟ್ ಮೇರೆಗ್ ಮಾನಾದಿಗೆ ಮಲ್ತೆರ್.

15 ಬಗೆತ ಚರುಂಬುರಿ
ಜಿಂಜರ್ ಗಾರ್ಲಿಕ್, ರಾಕೆಟ್, ನಾರ್ಮಲ್, ಗರಿಗರಿ, ರಾಜಾ ಸ್ಪೆಷಲ್ ಇಂಚನೆ 15 ಬಗೆತ ಚರುಂಬುರಿ , 20 ರೂ- 50 ರೂ ಮುಟದ ಚರುಂಬುರಿ ಮೂಲ್ ತಿಕ್ಕುಂಡು.

ಬೊಲ್ತೇರ್ ಯುವವಾಹಿನಿಗ್ ನಲಿಪು ಭಜನೆ ಪಂತೊಡು ರಡ್ಡನೇ ಇನಾಮು

ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಯುವ ವಾಹಿನಿ(ರಿ) ಕೇಂದ್ರ ಸಮಿತಿ ಕುಡ್ಲ ನೆತ್ತ ನಿರೆಲ್ಡ್ ಕುಡ್ಲ ಮಹಿಳಾ ಘಟಕ ಬೊಕ್ಕ ಶ್ರೀ ಗೋಕರ್ಣನಾಥ ಕ್ಷೇತ್ರ ಕುದ್ರೋಳಿ ನೆತ್ತ ಮುತಾಲಿಕೆಡ್ ಯುವವಾಹಿನಿ ಅಂತರ್ ಘಟಕ ಕುಣಿತ ಭಜನಾ ಸ್ಪರ್ಧೆದ ಕುಣಿದು ಭಜಿಸಿರೋ ಲೇಸ್ ಆ.13 ಐತಾರದಾನಿ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಸಭಾಭವನಡ್ ನಡತ್‌ಂಡ್.

ಈ ಲೇಸ್‌ಡ್ ಒಟ್ಟು 18 ಭಜನಾ ಕೂಟದಕುಲು ಪಾಲ್ ಪಡೆದಿತ್ತೆರ್. ಬೊಲ್ತೆರ್ ಯುವವಾಹಿನಿ(ರಿ) ಬೆಳ್ತಂಗಡಿ ಘಟಕ ದ್ವಿತೀಯ ಸ್ಥಾನನ್ ಪಡೆಯೊಂದುಂಡು. ಉತ್ತಮ ಭಜಕ್ ಮಾನಾದಿಗೆನ್ ಘಟಕದ ಸದಸ್ಯೆ ಸಚಿನ್ ಮೇರ್ ಪಡೆಯೊಂದೆರ್.

 

ತುಳುನಾಡ್ ದ ಆಚರಣೆಲು ನಿಜ ಜೀವನಡ್ ಇಪ್ಪೊಡು: ವಸಂತ ದೇವಾಡಿಗ

ಹಳೆಯಂಗಡಿ: ತುಳುನಾಡ್ ದ ತಿಂಗೊಲ್ಡ್ ಆಟಿ ಮಸ್ತ್ ಕಷ್ಟದ ಕಾಲ. ಆ ಕಾಲದ ಆಚರಣೆಲು ಇತ್ತೆಲ ಉಂಡು. ಅಂಚಿನ ಆಚರಣೆಲು ಚಾವಡಿಡ್ ಮಾತ್ರ ಸೀಮಿತ ಆವಂದೆ, ನಿಜ ಜೀವನಡ್ಲಾ ಇಪ್ಪೊಡು ಪಂದ್ ಯಕ್ಷಲಹರಿ ಕಿನ್ನಿಗೋಳಿದ ಸದಸ್ಯೆರ್, ಕಲ್ಲಮುಂಡ್ಕೂರುದ ನಿವೃತ್ತ ಪ್ರಾಧ್ಯಾಪಕೆರ್ ವಸಂತ ದೇವಾಡಿಗ ಪಂಜ ಮೇರ್ ಪಂಡೆರ್.

ಮೇರ್ ದೇವಾಡಿಗ ಸಮಾಜ ಸೇವಾ ಸಂಘ (ರಿ.) ಪಾವಂಜೆದ ಮುತಾಲಿಕೆಡ್, ದೇವಾಡಿಗ ಯುವ ವೇದಿಕೆ ಪಾವಂಜೆ ಬೊಕ್ಕ ದೇವಾಡಿಗ ಸೇವಾ ಟ್ರಸ್ಟ್ (ರಿ.) ಪಾವಂಜೆದ ಒಟ್ಟುಸೇರಿಗೆಡ್, ದೇವಾಡಿಗ ಮಹಿಳಾ ವೇದಿಕೆ ಪಾವಂಜೆ ನೆತ್ತ ದುಂಬಾತ್ತಿಗೆಡ್ ನಡತಿನ ಆಟಿಡೊಂಜಿ ಐತಾರ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಬೆನೆಟ್ ಜಿ.ಅಮ್ಮಣ್ಣ ಮೇರ್ ಪಾತೆರ್ದ್, ಆಟಿ ಆಚರಣೆಲು ಬೊಕ್ಕ ಗಿಡಮೂಲಿಕೆದ ಬಗೆಟ್ಟ್ ಇಸೇಸ ಪೊಲಬು ಕೊರಿಯೆರ್.

ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲದ ಮಾಜಿ ಅಧ್ಯಕ್ಷೆರ್ ಸುಧಾಕರ ಆರ್.ಅಮೀನ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.

ದೇವಾಡಿಗ ಮಹಿಳಾ ವೇದಿಕೆದ ಪ್ರಧಾನ ಕಾರ್ಯದರ್ಶಿ ಮಂಜುಳಾ ಶುಭ್ರತ್ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ಆಟಿದ ಅಟಿಲ್ ನ್ ತಯಾರ್ ಮಲ್ತಿನ ಪೊಂಜೋವ್ ನಕ್ಲೆಗ್ ಅಭಿನಂದನೆ ಸಂದಾಯೆರ್.

ಅತಿಕಾರಿಬೆಟ್ಟು ಗ್ರಾಮ ಪಂಚಾಯತ್ ದ ಪೊಸ ಅಧ್ಯಕ್ಷೆರಾದ್ ಶಶಿಕಲಾ, ಉಪಾಧ್ಯಕ್ಷೆರಾದ್ ಮನೋಹರ ಕೋಟ್ಯಾನ್ ಆಯ್ಕೆ

ಮುಲ್ಕಿ ತಾಲೂಕ್ ವ್ಯಾಪ್ತಿದ ಪುಗರ್ತೆದ ಅತಿಕಾರಿಬೆಟ್ಟು ಗ್ರಾಮ ಪಂಚಾಯತ್ ದ ರಡ್ಡನೇ ಅವಧಿಗ್ ಪೊಸ ಅಧ್ಯಕ್ಷೆರಾದ್ ಬಿಜೆಪಿ ಅಭ್ಯರ್ಥಿ ಶಶಿಕಲಾ ಬೊಕ್ಕ ಉಪಾಧ್ಯಕ್ಷೆರಾದ್ ಮನೋಹರ ಕೋಟ್ಯಾನ್ ಅವಿರೋಧವಾದ್ ಆಯ್ಕೆ ಆತೆರ್.

ಅತಿಕಾರಿಬೆಟ್ಟು ಗ್ರಾಮ ಪಂಚಾಯತ್ ಡ್ ಒಟ್ಟು 10 ವಾರ್ಡ್ ಉಂಡು. ಕರಿನ ವೋಟುಡು 9 ವಾರ್ಡ್ ಡ್ ಬಿಜೆಪಿ ಸದಸ್ಯೆರ್ ಬೊಕ್ಕ 1 ವಾರ್ಡ್ ಡ್ ಕಾಂಗ್ರೆಸ್ ಅಭ್ಯರ್ಥಿಲು ಗೆಂದ್ ದೆರ್.

ಈ ಸರ್ತಿದ ರಡ್ಡನೇ ಅವಧಿದ ವೋಟುಡು ಸರ್ಕಾರದ ನಿಯಮದಂಚೆನೆ ಅಧ್ಯಕ್ಷೆರೆ ಪಟ್ಟ ಪರಿಶಿಷ್ಟ ಜಾತಿ ಬೊಕ್ಕ ಉಪಾಧ್ಯಕ್ಷೆರೆನ ಹಿಂದುಳಿದ ವರ್ಗ ಎ ಗ್ ಮೀಸಲಾತ್ಂಡ್. ಅಧ್ಯಕ್ಷೆರ್, ಉಪಾಧ್ಯಕ್ಷೆರ್ ಬೇಲೆಗ್ ಒವ್ವೇ ಗೊಂದಲ ಇಜ್ಜಂದೆ ಅವಿರೋಧವಾದ್ ಆಯ್ಕೆ ಆತೆರ್. ಆಯ್ಕೆ ಪ್ರಕ್ರಿಯೆ ವೋಟುಡು ಕಾಂಗ್ರೆಸ್ ದ ಒಂಜೇ ಒಂಜಿ ಸದಸ್ಯೆರ್ ಗೈರ್ ಹಾಜರಾತೆರ್. ವೋಟುದ ಅಧಿಕಾರಿಯಾದ್ ಕೃಷಿ ಇಲಾಖೆ ಅಧಿಕಾರಿ ವೀಣಾ ರೈ ಕರ್ತವ್ಯ ನಿರ್ವಹಿಸಾದೆರ್.

You Missed