Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಮಾಣಿ: ಶಾಲೆದ ಬಾಕಿಲ್ ದರ್ತ್ ದ್ ಕಂಪ್ಯೂಟರ್ ಮಾನಿಟರ್ ಕಂಡಿನ ಕಲ್ವೆರ್

ವಿಟ್ಲ: ಶಾಲೆದ ಬಾಕಿಲ್ ದರ್ತ್ ದ್ ಕಂಪ್ಯೂಟರ್ ಮಾನಿಟರ್ ಕಂಡಿನ ಬಗೆಟ್ ವಿಟ್ಲ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲಾತ್‌ಂಡ್.

ಬಂಟ್ವಾಳ ತಾಲೂಕು ಮಾಣಿಡ್ ಕರ್ನಾಟಕ ಪ್ರೌಢ ಶಾಲೆ ಬೊಕ್ಕ ಕರ್ನಾಟಕ ಆಂಗ್ಲ ಮಾಧ್ಯಮ ಶಾಲೆಡ್ ಕಲ್ವೆರ್ ಶಾಲೆದ ಕೊಠಡಿ ಬೊಕ್ಕ ಶಾಲೆದ ಆಫೀಸ್ ದ ಬಾಕಿಲ್ ದರ್ತ್ ದ್ ಉಲಾಯಿ ಪೋದು ಅಂದಾಜು 7000/- ಮೌಲ್ಯದ ಕಂಪ್ಯೂಟರ್ ಮಾನಿಟರ್ ಕಂಡ್ ದ್ ಪೋತೆರ್ ಪಂದ್ ಶಾಲೆದ ಸಂಚಾಲಕೆರ್ ಇಬ್ರಾಹಿಂ ಕೆ ದೂರು ಕೊರ್ತೆರ್.

ನೆತ್ತ ಬಗ್ಗೆ ವಿಟ್ಲ ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್‌ಂಡ್.

 

ಪೊಂಜೋವ್ ಮೆದುಳುರ್ದ್ ಜೀವದ ಪುರಿನ್ ಪಿದಯಿ ದೆತ್ತಿನ ಡಾಕ್ಟರ್!

ಸಿಡ್ನಿ: ಹುಷಾರ್ ಇಜ್ಜಂದೆ ಆಸ್ಪತ್ರೆಗ್ ದಾಖಲ್ ಆಯಿನ ಪೊಂಜೋವ್ ಒರ್ತಿನ ಮೆದುಳುರ್ದ್ ಜೀವದ ಪುರಿನ್ ಡಾಕ್ಟರ್ ಪಿದಯಿ ದೆತ್ತಿನ ಘಟನೆ ಆಸ್ಟ್ರೇಲಿಯಾಡ್ ನಡತ್ ದ್ಂಡ್.

ಆಸ್ಟ್ರೇಲಿಯಾದ ನ್ಯೂ ಸೌತ್‌ ವೇಲ್ಸ್‌’ದ 64 ವರ್ಷೊದ ಪೊಂಜೋವ್ ನ ಮೆದುಳುಡು 8 ಸೆಂಮೀ ಉದ್ದದ ಪುರಿವೊಂಜಿ ಪತ್ತೆ ಆತ್ಂಡ್. ಜೀವಂತ ಇಪ್ಪುನ ಈ ಪುರಿ ಮೆದುಳುಡು ಪತ್ತೆ ಆಯಿನವು ಜಗತ್ತ್ ಡೇ ಸುರುತ್ತ ಕೇಸ್ ಪಂದ್ ಡಾಕ್ಟರ್ ಪಂತೆರ್.

ಕಳಿಯ ಗ್ರಾ.ಪಂ ಮುತಾಲಿಕೆಡ್ ಸರಕಾರದ ಗೃಹಲಕ್ಷ್ಮೀ ಯೋಜನೆಗ್ ಚಾಲನೆ

ಗೇರುಕಟ್ಟೆ: ಕಳಿಯ ಗ್ರಾ.ಪಂ ಮುತಾಲಿಕೆಡ್ ಕರ್ನಾಟಕ ಸರಕಾರದ ಯೋಜನೆಡ್ ಒಂಜಿ ಆಯಿನ ಗೃಹಲಕ್ಷ್ಮೀ ಯೋಜನೆ ಆ.30 ಬುಧವಾರ ದಾನಿ ಉದಿಪನ ಆಂಡ್.

ಮೈಸೂರುದ ಸಂಸದೆರ್ ರಾಹುಲ್ ಗಾಂಧಿ, ಎ.ಐ.ಸಿ.ಸಿ ಅಧ್ಯಕ್ಷೆರ್ ಮಲ್ಲಿಕಾರ್ಜುನ ಖರ್ಗೆ, ಎ.ಐ.ಸಿ.ಸಿ ಪ್ರಧಾನ ಕಾರ್ಯದರ್ಶಿ ಸುರ್ಜಿವಾಲಾ ಮೊಕ್ಲೆನ ಮಲ್ಲ ಉಪಸ್ಥಿತಿಟ್ ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್, ಉಪಮುಖ್ಯಮಂತ್ರಿ ಡಿ.ಕೆ ಶಿವಕುಮಾರ್, ಮಹಿಳಾ ಬೊಕ್ಕ ಕಲ್ಯಾಣ ಇಲಾಖೆ ಸಚಿವೆರ್ ಲಕ್ಷ್ಮೀ ಹೆಬ್ಬಾಳ್ಕರ್, ಆಹಾರ ಬೊಕ್ಕ ನಾಗರೀಕ ಪೂರೈಕೆ ಸಚಿವೆರ್ ಕೆ.ಎಚ್ ಮುನಿಯಪ್ಪ ಬೊಕ್ಕ ಬೇತೆ ಬೇತೆ ಸಚಿವೆರ್‌ರ್ನ ಎದುರುಡು ಉದಿಪನ ಆಂಡ್. ಈ ಲೇಸ್ ಡ್ ಕಳಿಯ ಗ್ರಾ.ಪಂ ದ ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.

ಅಂಚನೆ ಕಳಿಯ ಗ್ರಾ.ಪಂ ಡ್ ಯೋಜನೆಗ್ ಅರ್ಜಿ ಪಾಡಿನ ಫಲಾನುಭವಿಲೆಗ್ ಮಂಜೂರಾತಿ ಪತ್ರನ್ ವಿತರಣೆ ಮಲ್ತೆರ್. ಕಳಿಯ ಗ್ರಾ.ಪಂ ದ ಗುರ್ಕಾರೆ ಸಭೆತ ಗುರ್ಕಾಮೆನ್ ವಹಿಸಾದ್ ಇತ್ತೆರ್.

ಸೆ.2: ಕುಡ್ಲದ ಕೇರಳ ಸಮಾಜಂ ಕಟ್ವಾನಡ್ 169 ನಾರಾಯಣ ಗುರು ಜಯಂತಿ, ಕಲ್ಪಾರ್ಥಿ ವೇತನ ಪಟ್ಟುನ ಲೇಸ್

ಕುಡ್ಲ ನಾರಾಯಣ ಗುರು ಯುವವೇದಿಕೆ (ರಿ.) ದ ಮುತಾಲಿಕೆಡ್ 169 ನಾರಾಯಣ ಗುರು ಜಯಂತಿದ ಲೆಕ್ಕೊಡು ಕಲ್ಪಾರ್ಥಿಲೆಗ್ ಸ್ಕಾಲರ್ ಶಿಪ್ ಪಟ್ಟುನ ಲೇಸ್ ಸೆ.2 ಕ್ಕ್ ಕುಡ್ಲದ ಕೇರಳ ಸಮಾಜಂ ಕಟ್ವಾನಡ್ ಮಲ್ಪರೆ ಅಟ್ಟಣೆ ಮಲ್ದೆರ್.

ಮಧ್ಯಾಹ್ನ ಕಲ್ಪಾರ್ಥಿಲೆಗ್ ಭಾಷಣ ಪಂತೊ ಬೊಕ್ಕ ರಸಪ್ರಶ್ನೆ ಪಂತೊ ನಡಪರೆ ಉಂಡು. ಬಯ್ಯಗ್ ಸಭಾ ಲೇಸ್ ನಡಪರೆ ಇತ್ತ್ ದ್ ಕಲ್ಪಾರ್ಥಿ ವೇತನ ಬೊಕ್ಕ ಇನಾಮು ಪಟ್ಟುನ ಲೇಸ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ನಾರಾಯಣ ಗುರು ಯುವ ವೇದಿಕೆದ ಗುರ್ಕಾರ್ರೆ ಬ್ರಜೇಶ್ ಅಂಚನ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಹಿಂದುಳಿದ ವರ್ಗಲೆನ ಆಯೋಗದ ಸದಸ್ಯೆರ್ ಕೆ.ಟಿ ಸುವರ್ಣ, ಮುಲ್ಕಿ ಜೆ.ಕೆ ಮೊಸೈಕ್ಸ್ ದ ಧಣಿ ಲೋಕನಾಥ್ ಕೆ, ಕುಡ್ಲ ಕೇರಳ ಸಮಾಜಂದ ಗುರ್ಕಾರ್ರೆ ಟಿ.ಕೆ ರಾಜನ್, ಕೋಡಿಕಲ್ ಬೃಂದಾವನ ಕನ್ ಸ್ಟ್ರಕ್ಷನ್ಸ್ ದ ಧಣಿ ಚಂದ್ರಹಾಸ ಪೂಜಾರಿ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕುಡ್ಲ ನಾರಾಯಣ ಗುರು ಯುವ ವೇದಿಕೆದ ಸಲಹಾ ನಿರ್ದೇಶಕೆರ್ ಬೊಕ್ಕ ಸದಸ್ಯೆರ್ ತೆರಿಪಾದೆರ್.

ಚಂದ್ರನ ದಕ್ಷಿಣ ಧ್ರುವದ ಮಿತ್ತ್  ಗಂಧಕ ಪತ್ತೆ

ಬೆಂಗ್ಲೂರ್: ಚಂದ್ರನ ದಕ್ಷಿಣ ಧ್ರುವದ ಮಿತ್ತ್ ಗಂಧಕ ಇಪ್ಪುನೆನ್ ಚಂದ್ರಯಾನ-3ತ್ತ ರೋವರ್ (ಪ್ರಜ್ಞಾನ್) ಪತ್ತೆ ಮಲ್ದ್ಂಡ್.

ನಿರೀಕ್ಷೆದಂಚೆನೆ ಅಲ್ಯುಮಿನಿಯಂ(ಎಎಲ್), ಕ್ಯಾಲ್ಸಿಯಂ, ಕರ್ಬ, ಕ್ರೋಮಿಯಂ, ಟೈಟೆನಿಯಂ, ಮ್ಯಾಂಗನೀಸ್, ಸಿಲಿಕಾನ್ ಬೊಕ್ಕ ಆಮ್ಲಜನಕ ಧಾತುಲು ಪತ್ತೆ ಆತ್ಂಡ್. ಜಲಜನಕ ಧಾತುದ ಪತ್ತೆ ಕಾರ್ಯ ನಡತೊಂದು ಉಂಡು ಪಂದ್ ಇಸ್ರೋ ತೆರಿಪಾದ್ಂಡ್.

ಪ್ರಜ್ಞಾನ್‌ ಡ್ ಇಪ್ಪುನ ಲಿಬ್ ಉಪಕರಣ ಈ ಧಾತುನ್ ಪತ್ತೆ ಮಲ್ದ್ಂಡ್, ಚಂದ್ರನ ದಕ್ಷಿಣ ಧ್ರುವಡ್ ರೋವರ್ ಜತ್ತ್ ದ್ ಬುಧಾರಗ್ ಒಂಜಿ ವಾರ ಆಪುಂಡು. ನನ 7 ದಿನತ್ತ ಕಾಲ  ಪ್ರಯೋಗ ದುಂಬರಿಯೆರೆ ಉಂಡು. ಆಂಡ ಸೆ.5 ಕ್ಕ್ ಚಂದ್ರನಲ್ಪ ಕತ್ತಲೆ ಆಯೆರೆ ಉಂಡು. ಅಲ್ಪ ಬೊಲ್ಪು ತೂಜಿಯೆರೆ ನನ 14 ದಿನ ಕಾಪೊಡು. ಆವೆರ್ದ್ ಬೊಕ್ಕ ಲ್ಯಾಂಡರ್ ಬೊಕ್ಕ ರೋವರ್‌ ಗ್ ಕುಡ ಜೀವ ಕೊರಿಯೆರೆ ಸಾಧ್ಯನಾ ಪನ್ಪುನೆನ್ ಇಸ್ರೋ ಪ್ರಯತ್ನ ಮಲ್ಪುನ ಸಾಧ್ಯತೆ ಉಂಡು ಪಂದ್ ಮೂಲಲು ತೆರಿಪಾದ್ಂಡ್.

ಇನಿ ಕುದ್ರೋಳಿ ದಾಮೋದರ್ ಆರ್ ಸುವರ್ಣ ಸಭಾಂಗಣಡ್ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169 ಪುಟ್ಟು ದಿನತ್ತ ಆಚರಣೆ

ಅಖಿಲ ಭಾರತ ಬಿಲ್ಲವರ ಯೂನಿಯನ್ (ರಿ.) ಕುಡ್ಲ ಬೊಕ್ಕ ನಾರಾಯಣ ಗುರು ವಿದ್ಯಾಸಂಸ್ಥೆಲು ಕುದ್ರೋಳಿ ನೆತ್ತ ಒಟ್ಟುಸೇರಿಗೆಡ್ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169 ಪುಟ್ಟು ದಿನತ್ತ ಆಚರಣೆ (ಆ.31) ಇನಿ ಕುದ್ರೋಳಿ ದಾಮೋದರ್ ಆರ್ ಸುವರ್ಣ ಸಭಾಂಗಣಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಅಖಿಲ ಭಾರತ ಬಿಲ್ಲವರ ಯೂನಿಯನ್ ಬೊಕ್ಕ ನಾರಾಯಣ ಗುರು ವಿದ್ಯಾಸಂಸ್ಥೆಲು ಕುದ್ರೋಳಿದ ಗುರ್ಕಾರ್ಲು ನವೀನ್ ಚಂದ್ರ ಸುವರ್ಣ ಒಯಿಸೊನ್ವೆರ್. ಶಿಕ್ಷಕಿ, ಬರವುಗಾರ್ತಿ ರೇಣುಕಾ ಕಣಿಯೂರು ಗುರುಸಂದೇಶ ಕೊರಿಯೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಕುಡ್ಲ ಶಾಸಕೆರ್ ಡಿ‌.ವೇದವ್ಯಾಸ ಕಾಮತ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಅಖಿಲ ಭಾರತ ಬಿಲ್ಲವರ ಯೂನಿಯನ್ ದ ಪ್ರಾಂಶುಪಾಲೆರ್, ಮುಖ್ಯೋಪಾಧ್ಯಾಯಿನಿ, ಅಧ್ಯಾಪಕೆರ್, ಬೊಕ್ಕ ಕಲ್ಪಾರ್ಥಿಲು ನಾರಾಯಣ ಗುರು ವಿದ್ಯಾಸಂಸ್ಥೆದ ಗುರ್ಕಾರ್ಲು, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.

ಹಾರ್ಟ್ ಅಟ್ಯಾಕ್ ಡ್ ತೀರ್ ಪೋಯಿನ ಮಿತ್ರಾ ಶೆಟ್ಟಿ

ಬಿ ಸಿ ರೋಡ್ ದ ಖಾಸಗಿ ಕಂಪನಿ ಡ್ ಬೇಲೆಡ್ ಇತ್ತಿನ ಪೊಣ್ಣು ಮಿತ್ರಾ ಶೆಟ್ಟಿ (19) ಹಾರ್ಟ್ ಅಟ್ಯಾಕ್ ಅದ್ ತೀರ್ ಪೋಯಿನ ಘಟನೆ ವರದಿ ಆತ್ಂಡ್.

ತೀರ್ ಪೋಯಿನಾರ್ ಕಾವಳಪಡೂರು ಗ್ರಾಮದ ಮಧ್ಯಗುತ್ತು ರಾಜೀವ ಶೆಟ್ಟಿ ಮೀನಾ ದಂಪತಿಲೆನ ಮಗಲ್.

ಮಿತ್ರಾ ಶೆಟ್ಟಿ ದೊಡ್ಡಮ್ಮನ ಇಲ್ಲಲ್ ಅಪ್ಪೆನ ಒಟ್ಟಿಗೆ ಇತ್ತೆರ್. ಏಪದಲೆಕ ರಾತ್ರೆ ವನಸ್ ಮಲ್ತ್ ಅಪ್ಪೆನ ಒಟ್ಟಿಗೆ ಜೆತ್ತಿನಾಲ್ ಬೊಲ್ಪುಗು ಲಕ್ಕಿನೆ ಇಜ್ಜಿ.

ಪೋಡಿಗೆ ಆಯಿನ ಅಪ್ಪೆ ಲಕ್ಕಾನಗ, ಪೊಣ್ಣು ತೀರ್ ಪೋಯಿನ ತೆರಿದ್ ಬೈದುಂಡು.

ಬಂಟ್ವಾಳ ಸರಕಾರಿ ಆಸ್ಪತ್ರೆ ಡ್ ಮರಣೋತ್ತರ ಪರೀಕ್ಷೆ ಮಲ್ತ್ ದ್, ಹಾರ್ಟ್ ಅಟ್ಯಾಕ್ ಪಂದ್ ಡಾಕ್ಟರ್ ಪಂತೆರ್. ಮಿತ್ರಾ ಶೆಟ್ಟಿ ಗ್ ಪೊಪ್ಪ ಅಪ್ಪೆ, ಬೊಕ್ಕ ಅಣ್ಣೆ ಉಲ್ಲೆರ್.

ವಾಟ್ಸಾಪ್ ಡ್ ವೀರೇಂದ್ರ ಹೆಗ್ಡೆರ್ನ ವಿರುದ್ಧ ಬರಹ; ಸೌಜನ್ಯನ ಅಪ್ಪೆನ ಬಗ್ಗೆ ಕಾಮೆಂಟ್; 2 ಜನತ ಮಿತ್ತ್ ಕೇಸ್ ದಾಖಲ್

ಬೊಲ್ತೆರ್ ಬೊಕ್ಕ ಬಂಟ್ವಾಳ್ ಡ್ ಸೌಜನ್ಯ ಕೇಸ್ ದ ವಿಚಾರವಾದ್ ಬೊಲ್ತೆರ್ ಬೊಕ್ಕ ಬಂಟ್ವಾಳ ಗ್ರಾಮಾಂತರ ಠಾಣೆಡ್ ಪ್ರಕರಣ ದಾಖಲಾತ್ಂಡ್.

ಸುರೇಶ್ ರಾಜ್ ಪನ್ಪುನ ವ್ಯಕ್ತಿ ವಾಟ್ಸಾಪ್ ಗ್ರೂಪ್ ಡ್ ವೀರೇಂದ್ರ ಹೆಗ್ಡೆ ಬೊಕ್ಕ ಅರೆನ ಕುಟುಂಬದ ಸದಸ್ಯೆರ್ನ ಬಗ್ಗೆ ಅಕ್ಷೇಪಾರ್ಹ ಬರವಣಿಗೆ ಬರೆತಿನೆಕ್ಕ್ ಆ.29 ದಾನಿ ಬೊಲ್ತೆರ್ ಪೊಲೀಸ್ ಠಾಣೆ ಡ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.

ನನೊಂಜಿ ಪ್ರಕರಣ: ರಾಘವೇಂದ್ರ ಭಟ್ ಪನ್ಪುನಾರ್ ಸಾಮಾಜಿಕ ಜಾಲತಾಣ( ಫೇಸ್ಬುಕ್) ಡ್ ಸೌಜನ್ಯ ನ ಅಪ್ಪೆನ ಮಿತ್ತ್ ಅಕ್ಷೇಪಾರ್ಹ ಬರವಣಿಗೆನ್ ಕಾಮೆಂಟ್ ಮಲ್ತಿನೆಕ್ಕ್ ಆ.28 ದಾನಿ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಠಾಣೆ ಡ್ ಕೇಸ್ ದಾಖಲ್ ಮಲ್ತ್ ತನಿಖೆ ಮಲ್ತೊಂದು ಉಲ್ಲೆರ್.

ಸೆ.17: ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರದ ಕೂಟಕ್ಕಳ ಆಡಿಟೋರಿಯಂಡ್ ವಿದ್ಯಾರ್ಥಿವೇತನ ಪಟ್ಟುನ ಲೇಸ್

ಕುಡ್ಲ: ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಬೊಕ್ಕ ಭಾರತೀಯ ತೀಯಾ ಸಮಾಜ (ರಿ.) ಕುಡ್ಲ ವಲಯದ ಒಟ್ಟುಸೇರಿಗೆಡ್ ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿದ ಲೆಕ್ಕೊಡು ವಿದ್ಯಾರ್ಥಿವೇತನ ಪಟ್ಟುನ ಲೇಸ್ ಸೆ.17 ಐತಾರ ಶ್ರೀ ಕ್ಷೇತ್ರದ ಕೂಟಕ್ಕಳ ಆಡಿಟೋರಿಯಂಡ್ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಕುದ್ರೋಳಿ ಶ್ರೀ ಭಗವತೀ ಕ್ಷೇತ್ರ ಬೊಕ್ಕ ಭಾರತೀಯ ತೀಯಾ ಸಮಾಜ (ರಿ.) ಕುಡ್ಲ ವಲಯದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಸೆ.11: ಉಪ್ಪಳ ಶ್ರೀ ಭಗವತೀ ಕ್ಷೇತ್ರಡ್ ಸುತ್ತುಗೋಪುರದ ಪುನರ್ ನಿರ್ಮಾಣಗ್ ಕೆಸರ್ ಕಲ್ಲ್ ಪಾಡುನ ಲೇಸ್

ಉಪ್ಪಳ ಶ್ರೀ ಭಗವತೀ ಕ್ಷೇತ್ರಡ್ ಸುತ್ತುಗೋಪುರದ ಪುನರ್ ನಿರ್ಮಾಣಗ್ ಕೆಸರ್ ಕಲ್ಲ್ ಪಾಡುನ ಲೇಸ್ ಸೆ.11 ಸೋಮಾರ ನಡಪರೆ ಉಂಡು.

ಈ ಲೇಸ್ ಶ್ರೀ ನಿತ್ಯಾನಂದ ಯೋಗಾಶ್ರಮ ಕೊಂಡೆವೂರುದ ಶ್ರೀ ಯೋಗಾನಂದ ಸರಸ್ವತೀ ಸ್ವಾಮೀಜಿಲೆನ ಆಶೀರ್ವಾದಡ್, ಬೂಡುಮನೆ ನಾರಾಯಣ ಪದಕಣ್ಣಾ ತಂತ್ರಿಲೆನ ಉಪಸ್ಥಿತಿಡ್, ಬ್ರಹ್ಮಶ್ರೀ ಉಚ್ಚಿಲತ್ತಾಯ ನೀಲೇಶ್ವರ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್, ಪುಗರ್ತೆದ ಉದ್ಯಮಿ, ಕೊಡುಗೈದಾನಿ ಸದಾನಂದ ಶೆಟ್ಟಿ ಕುಳೂರು ಕನ್ಯಾನ ಮೆರೆನ ಕೈಟ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಉಪ್ಪಳ ಶ್ರೀ ಭಗವತೀ ಕ್ಷೇತ್ರಗ್ ಸಂಬಂಧಪಟ್ಟಿನಕುಲು, ಗುರಿಕಾರೆರ್, ಮಾನಾದಿಗೆದ ಗುರಿಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

You Missed