ಮೆಕ್ಕೆಜೋಳ ತಿನ್ಪುನೆರ್ದ್ ಆರೋಗ್ಯಗ್ ಸುಮಾರ್ ಲಾಭ ಉಂಡು.
ಡಯಾಬಿಟೀಸ್ ಇಪ್ಪುನಕುಲು ನೆನ್ ತಿನ್ಪುನೆರ್ದ್ ಆರೋಗ್ಯಗ್ ಎಡ್ಡೆ ಪಂದ್ ವೈದ್ಯೆರ್ ಪಂತೆರ್. ನೆಟ್ಟ್ ಕಾರ್ಬೋಹೈಡ್ರೇಟ್ ಬೊಕ್ಕ ಪ್ರೋಟೀನ್ಸ್ ಇಪ್ಪುಂಡು.
ದೇಹದ ತೂಕ ಎಚ್ಚಾವೊಡು ಪನ್ಪುನಕುಲು ಒಂತೆ ಒಂತೆನೇ ಮೆಕ್ಕೆಜೋಳನ್ ತಿನೊಡು. ಕರ್ಲ್ ದ ಕ್ಯಾನ್ಸರ್ ಗ್ ಉಂದು ತಡೆಪರೆ ಸಹಕಾರಿ ಆಪುಂಡು.
ಡಯಾಬಿಟೀಸ್ ಇತ್ತಿನಕುಲು ಉಂದೆನ್ ತಿನ್ಪುನ ದುಂಬು ಒರ ವೈದ್ಯೆರೆನ ಸಲಹೆನ್ ದೆತೊನುನೇ ಎಡ್ಡೆ.
ಸಜಿಪಮೂಡ ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವಸ್ಥಾನಡ್ ಮಾ.22, 24, 26 ಕ್ಕ್ ಅಗೇಲ್ ಸೇವೆ ಇಜ್ಜಿ ಪಂದ್ ಪ್ರಕಟಣೆಡ್ ತೆರಿಪಾದೆರ್.
ಈ ಸೇವೆನ್ ಸಜೀಪ ಮಾಗಣೆ ಪಡ್ಡೆರಮಾಡ ಜಾತ್ರೆದ ಲೆಕ್ಕೊಡು ಉಂತಾದೆರ್.
ಬಂಟ್ವಾಳ: ಇಲ್ಲಡ್ ತಿರ್ತ್ ಬೂರ್ದು ಗಂಭೀರ ಸ್ಥಿತಿಟ್ ಇತ್ತಿನ 2ನೇ ಕ್ಲಾಸ್ದ ಪೊಣ್ಣ್ ಚಿಕಿತ್ಸೆ ಫಲಕಾರಿ ಆವಂದೇ ತೀರ್ ಪೋಯಿನ ಘಟನೆ ಬಿ.ಸಿ.ರೋಡ್ ಕೈತಲ್ದ ತಲಪಾಡಿ ಪನ್ಪಿನಲ್ಪ ನಡತ್ಂಡ್.
ತಲಪಾಡಿ ನಿವಾಸಿ ಸಫೀರ್ ಅಹ್ಮದ್ ಮೆರೆನ ಮಗಲ್ ಆಯಿಷಾ ಶೈಮಾ ತೀರ್ ಪೋಯಿನ ಪೊಣ್ಣು. ಆಯಿಷಾ ಶೈಮಾ ಬಂಟ್ವಾಳ ತೌಹೀದ್ ಆಂಗ್ಲ ಮಾಧ್ಯಮ ಶಾಲೆಡ್ 2ನೇ ಕ್ಲಾಸ್ಡ್ ಕಲ್ತೊಂದಿತ್ತೆರ್.
ಆಯಿಷಾ ಇಲ್ಲಡ್ ತಿರ್ತ್ ಬೂರ್ದಿನೆಡ್ದಾವರ ಅರೆನ್ ಕುಡ್ಲದ ಆಸ್ಪತ್ರೆಗ್ ದಾಖಲ್ ಮಲ್ತ್ದಿತ್ತೆರ್. ರಡ್ಡ್ ದಿನ ಕೋಮಾ ಸ್ಥಿತಿಟ್ಟೆ ಇತ್ತಿನ ಆಯಿಷಾ ಚಿಕಿತ್ಸೆ ಫಲಕಾರಿ ಆವಂದೇ ತೀರ್ ಪೋತೆರ್.
ಕಾಪು: ಕರ್ನಾಟಕ ಜಾನಪದ ಪರಿಷತ್ ಬೆಂಗ್ಲೂರು ಮಹಾರಾಷ್ಟ್ರ ಘಟಕದ ವಾರ್ಷಿಕ ಜಾನಪದ ವಿಭೂಷಣ ಪ್ರಶಸ್ತಿಗ್ ಮೂಲತಃ ಕಾಪುದ ಇತ್ತೆ ಉದ್ಯೋಗ ನಿಮಿತ್ತ ಬೊಂಬೈಡ್ ಇಪ್ಪುನ ನಾಟಕೆಗಾರೆ, ಜಾನಪದ ರಂಗ ನಿರ್ದೇಶಕೆರ್ ಕರುಣಾಕರ ಕೆ. ಕಾಪು ಆಯ್ಕೆ ಆತೆರ್.
ಮಾ.24 ಕ್ಕ್ ಮಧ್ಯಾಹ್ನ 2 ಗಂಟೆರ್ದ್ ಕುರ್ಲಾ ಪೂರ್ವದ ಬಂಟರ ಭವನದ ಶ್ರೀಮತಿ ರಾಧಾಬಾಯಿ ಟಿ. ಭಂಡಾರಿ ಸಭಾಗೃಹಡ್ ನಡಪರೆ ಇಪ್ಪುನ ಸಂಸ್ಥೆದ ‘ಸಾಂಸ್ಕೃತಿಕ ಜಾನಪದ ಸಿರಿ ಸಿಂಚನ’ ಸಂಭ್ರಮಡ್ ಪ್ರಶಸ್ತಿ ಪ್ರದಾನ ಸಮಾರಂಭ ನಡಪರೆ ಉಂಡು.
ಮೇರ್ ಕಾಪುದ ಕೃಷ್ಣಪ್ಪ ಸಾಲ್ಯಾನ್ ಬೊಕ್ಕ ಗಿರಿಜಾ ಸಾಲ್ಯಾನ್ ದಂಪತಿಲೆನ ಮಗೆ ಆತೆರ್. ಪುಟ್ಟಿನ ಊರುಡು ಪ್ರಾಥಮಿಕ ಶಿಕ್ಷಣ ಮುಗಿತ್ ದ್, ಬೊಂಬೈಗ್ ಬತ್ತ್ ದ್ ಪಗೆಲ್ ಡ್ ಕೆಲಸ ಮಲ್ತ್ ದ್ ಮದರ್ ಇಂಡಿಯಾ ಧರ್ಮಾರ್ಥ ರಾತ್ರೆ ಶಾಲೆಡ್ ಬೊಕ್ಕದ ಶಿಕ್ಷಣ ಪಡೆಯೆರ್.
ಶಾಲಾ ಜೀವನಡೇ ರಂಗಕಲೆತ್ತ ವೈವಿಧ್ಯತೆಗ್ ಮಾರು ಪೋದು ಕಲೆನ್ ಮೈ ದಿಂಜಾವೊಂದು ಬೊಂಬೈಡ್ ಸಮಾನ ಮನಸ್ಕೆರ್ನೊಟ್ಟಿಗೆ ಅಭಿನಯ ಮಂಟಪ ಸಂಸ್ಥೆ ಸ್ಥಾಪನೆ ಮಲ್ತಿನ ಶ್ರೇಯಸ್ಸು ಮೆರೆನವು ಆತ್ಂಡ್.
ಉತ್ತಮ ಲೇಖಕೆ, ರಂಗನಿರ್ದೇಶಕೆರಾದ್ ಬೊಂಬೈ ರಂಗಭೂಮಿಡ್ ತನ್ನನೇ ಆಯಿನ ಸ್ಥಾನ ಪಡೆತೆರ್. ಸಮರ್ಥ ಸಂಘಟಕೆರಾಯಿನ ಮೇರ್ ಜನತಾ ಎಜುಕೇಶನ್ ಸೊಸೈಟಿ ಬೊಂಬೈಡ್ ಪದುಕೆರಾದ್ ಸೇವೆ ಸಂದಾದೆರ್.
ರಂಗಭೂಮಿಗ್ ಕಲಾ ಕಾಣಿಕೆಯಾದ್ ಸುಮಾರ್ ನಾಟಕನ್ ಬರೆದ್, ನಿರ್ದೇಶನ ಮಲ್ದೆರ್. ಮೆರೆನ ಸಾಧನೆನ್ ಸುಮಾರ್ ಸಂಘ ಸಂಸ್ಥೆಲು ಗುರುತಿಸಾದ್ ಮಾನಾದಿಗೆ ಮಲ್ದ್ಂಡ್.
ಬೊಂಬೈ: ಘಾಟ್ ಕೋಪರ್ ಶ್ರೀ ದತ್ತಾತ್ರೇಯ ದುರ್ಗಾಂಬಿಕಾ ದೇವಸ್ಥಾನಡ್ 16ನೇ ವರ್ಷದ ಏಕಾಹ ಭಜನೆ ಮಾ.24 ಐತಾರ ಬೊಲ್ಪುರ್ದ್ ಮಾ.25 ಸೋಮಾರ ಬೊಲ್ಪು ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ತೀರ್ಥ ಪ್ರಸಾದ ದೆತೊಂದು, ದೇವಸ್ಥಾನದ ಶಕ್ತಿಲಾಯಿನ ಶ್ರೀ ದತ್ತಾತ್ರೇಯ, ಶ್ರೀ ಆದಿಮಾತೆ ದುರ್ಗಾಂಬಿಕೆ, ಶ್ರೀ ಅಂಜನೇಯ, ಶ್ರೀ ನಾಗಶೇಷ, ಶ್ರೀ ಚಾಮುಂಡಿ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ದತ್ತಾತ್ರೇಯ ಮಿತ್ರ ಭಜನಾ ಮಂಡಳಿದ ಅಧ್ಯಕ್ಷೆರ್ ಧರ್ಮದರ್ಶಿಲು ದೇವ್ ಬಿ. ಪೂಜಾರಿ, ಗೌರವ ಪ್ರಧಾನ ಕಾರ್ಯದರ್ಶಿ ಶಿವಪ್ಪ ಯು ಪೂಜಾರಿ, ಗೌರವ ಪ್ರಧಾನ ಕೋಶಾಧಿಕಾರಿ ಲತಾ ಎಸ್ ಪೂಜಾರಿ, ಪ್ರಧಾನ ಅರ್ಚಕೆರ್ ಜಗದೀಶ್ ಭಟ್ ಲೆಪ್ಪೋಲೆಡ್ ತೆರಿಪಾದೆರ್.
ಪುಷ್ಪಲತಾ, ಗಣಪತಿ ರಾವ್ ಬೊಕ್ಕ ಶೋಭಾ, ಚಂದ್ರಶೇಖರ್ ಮೊಕ್ಲೆನ ಪರಕೆದ ಆಟ, ಶ್ರೀ ದುರ್ಗಾಪರಮೇಶ್ವರಿ ದಶಾವತಾರ ಯಕ್ಷಗಾನ ಮೇಳ ಬೊಕ್ಕ ಶ್ರೀ ಕ್ಷೇತ್ರ ಮಂದಾರ್ತಿ ರಡ್ಡ್ ಮೇಳದಕ್ಲೆನ ಒಟ್ಟುಸೇರಿಗೆಡ್ ಸಂಪೂರ್ಣ ಶ್ರೀ ದೇವಿ ಮಹಾತ್ಮೆ ಆಟ ಮಾ.21 ಗುರುವಾರ (ಇನಿ) ರಾತ್ರೆ ಉಳ್ಳೂರು ಕಾಡಿನಕೊಂಡ ಶ್ರೀರಾಮ ಮಾರ್ಗದ ಇಲ್ಲದ ಚಾವಡಿಡ್ ನಡಪರೆ ಉಂಡು.
ಅಂಚೆನೆ ಬೊಲ್ಪುಗು ಗಣಹೋಮ, ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ನಡತ್ಂಡ್.
ರಾತ್ರೆ ನಡಪುನ ಈ ಪರಕೆದ ಆಟಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಉಳ್ಳೂರು, ಕಾಡಿನಕೊಂಡ ಶ್ರೀ ರಾಮ ಮಾರ್ಗದ ಶ್ರೀ ಬ್ರಹ್ಮಲಿಂಗೇಶ್ವರದ ರಾಜಶ್ರೀ ಬೊಕ್ಕ ದಿನಕರ (ಬಳ್ಳೂರು) ಬೊಕ್ಕ ದಿಶಾನ್ ಲೆಪ್ಪೋಲೆಡ್ ತೆರಿಪಾದೆರ್.
ರೇಡಿಯೋ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲ ಬೊಕ್ಕ ಮಣಿಪಾಲ್ ಇನ್ ಸ್ಟಿಟ್ಯೂಟ್ ಆಫ್ ಕಮ್ಯೂನಿಕೇಶನ್ ದ ಒಟ್ಟುಸೇರಿಗೆಡ್ ಆರೋಗ್ಯ ದರ್ಶನ ಸರಣಿ ಲೇಸ್ ಮಾ.20 ಬುದಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಂಡ್.
ಈ ಲೇಸ್ ಡ್ ಮಣಿಪಾಲ ಕೆ.ಎಂ.ಸಿದ ಗ್ಯಾಸ್ಟ್ರೋಎಂಟಾಲಜಿ ಆಂಡ್ ಹೆಪೆಟಾಲಜಿ ವಿಭಾಗಡ್ ಸಹಪ್ರಾಧ್ಯಾಪಕೆರಾಯಿನ ಡಾ.ಬಾಲಾಜಿ ಮುಸುನೂರಿ ಫ್ಯಾಟಿ ಲಿವರ್ ಬಗೆಟ್ಟ್ ಪೊಲಬು ಕೊರಿಯೆರ್. ಮಾ.21 ಗುರುವಾರ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಂಡ್.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಬೊಂಬೈ: ಬೊರಿವಲಿ ತುಳು ಸಂಘದ 13ನೇ ವಾರ್ಷಿಕ ಉಚ್ಚಯ ಲೇಸ್ ಮಾ.23 ಸನಿಯಾರ ಬಯ್ಯಗ್ ಬೊಂಬೈದ ಬೊರಿವಲಿ ಸಂಸ್ಕೃತಿ ಕೇಂದ್ರಡ್ ಸಂಘದ ಗೌರವ ಅಧ್ಯಕ್ಷೆರ್ ವಿರಾರ್ ಶಂಕರ್ ಬಿ. ಶೆಟ್ಟಿ ಮೆರೆನ ಗುರ್ಕಾರ್ಮೆಡ್ ನಡಪರೆ ಉಂಡು.
ಮಲ್ಲ ಬಿನ್ನೆರಾದ್ ಉದ್ಯಮಿ, ಬೊಂಬೈ ಬಂಟರ ಸಂಘ ಮಹಿಳಾ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಉಮಾ ಕೃಷ್ಣ ಶೆಟ್ಟಿ, ಉತ್ತರ ಬೊಂಬೈದ ಸಂಸದೆರ್ ಗೋಪಾಲ್ ಸಿ. ಶೆಟ್ಟಿ, ಮಾನಾದಿಗೆದ ಬಿನ್ನೆರಾದ್ ಕನ್ನಡ ಸಂಘ ಸೂರತ್ ದ ಮಾಜಿ ಅಧ್ಯಕ್ಷೆರ್, ಉದ್ಯಮಿ ರಾಧಾಕೃಷ್ಣ ಶೆಟ್ಟಿ ಬೊಕ್ಕ ಭಾರತ್ ಬ್ಯಾಂಕ್ ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ ಪಾಲ್ ಪಡೆಯೆರೆ ಉಲ್ಲೆರ್.
ಬೊರಿವಲಿ ಪಶ್ಚಿಮ ಜಯರಾಜ್ ನಗರದ ಮಹಿಷ ಮರ್ಧಿನಿ ದೇವಸ್ಥಾನದ ಆಡಳಿತ ಟ್ರಸ್ಟಿಲು ಪ್ರದೀಪ್ ಸಿ. ಶೆಟ್ಟಿ ಬೊಕ್ಕ ಬಹುಬಾಷಾ ಸಾಹಿತಿ, ಕವಿ ಸೀಮಂತೂರು ಚಂದ್ರಹಾಸ ಸುವರ್ಣ ಮೊಕ್ಲೆಗ್ ಸನ್ಮಾನ ನಡಪರೆ ಉಂಡು.
ಮನೋರಂಜನೆದ ಅಂಗವಾದ್ ಅಭಿನಯ ಮಂಟಪದ ಕಲಾವಿದೆರೆರ್ದ್, ಕರುಣಾಕರ ಕೆ. ಕಾಪು ನಿರ್ದೇಶನದ ಕಲ್ಕುಡ– ಕಲ್ಲುರ್ಟಿ, ತುಳು ನಾಟಕ, ಸಂಘದ ಮಹಿಳಾ ಸದಸ್ಯೆರ್ದ್, ಜೋಕ್ಲೆರ್ದ್ ನೃತ್ಯ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಈ ಮಾತ ಲೇಸ್ ಡ್ ತುಳು– ಕನ್ನಡಿಗೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಪ್ರೋತ್ಸಾಹ ಮಲ್ಪೊಡು ಪಂದ್ ತುಳು ಸಂಘ ಬೊರಿವಲಿ ಪರವಾದ್ ಅಧ್ಯಕ್ಷೆರ್ ಕರುಣಾಕರ ಎಂ. ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ರಜಿತ್ ಸುವರ್ಣ, ಉಪಾಧ್ಯಕ್ಷೆರ್ ಹರೀಶ್ ಮೈಂದನ್, ಕೋಶಾಧಿಕಾರಿ ಚಂದ್ರಹಾಸ ಬೆಳ್ಚಡ, ಜತೆ ಕಾರ್ಯದರ್ಶಿ ಈಶ್ವರ ಎಂ. ಐಲ್, ಜತೆ ಕೋಶಾಧಿಕಾರಿ ಸವಿತ ಶೆಟ್ಟಿ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ತಿಲೋತ್ತಮ ವೈದ್ಯ, ಉಪ ಕಾರ್ಯಾಧ್ಯಕ್ಷೆರ್ ಶೋಭಾ ಎಸ್ ಶೆಟ್ಟಿ, ಕಾರ್ಯದರ್ಶಿ ಲಕ್ಷ್ಮಿ ದೇವಾಡಿಗ, ಸಾಂಸ್ಕೃತಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಕುಸುಮ ಬಿ. ಶೆಟ್ಟಿ, ಉಪ ಕಾರ್ಯಾಧ್ಯಕ್ಷೆರ್ ಕಸ್ತೂರಿ ಎಸ್. ಶೆಟ್ಟಿ, ಕಾರ್ಯದರ್ಶಿ ಸುನಂದ ಶೆಟ್ಟಿ, ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಪ್ರವೀಣ್ ಅರ್. ಶೆಟ್ಟಿ ಶಿಮಂತೂರು, ಸದಸ್ಯತನ ನೋಂದಣಿ ಸಮಿತಿದ ಕಾರ್ಯಾಧ್ಯಕ್ಷೆರ್ ಜಯಂತಿ ಶೆಟ್ಟಿ, ಸಂಘದ ಸಲಹಾ ಸಮಿತಿದ ಪರವಾದ್ ಮುಂಡಪ್ಪ ಪಯ್ಯಡೆ, ಬಾಬು ಶಿವ ಪೂಜಾರಿ, ಶ್ರೀನಿವಾಸ ಸಾಫಲ್ಯ, ವಾಸು ಪುತ್ರನ್, ಪ್ರಕಾಶ್ ಶೆಟ್ಟಿ ಪೇಟೆಮನೆ, ಕಾರ್ಯಕಾರಿ ಸಮಿತಿದ ಪರವಾದ್ ಕೃಷ್ಣರಾಜ್ ಸುವರ್ಣ, ಎಂ. ಜಿ. ಶೆಟ್ಟಿ, ಪ್ರಭಾಕರ ಶೆಟ್ಟಿ, ನ್ಯಾ. ರಾಘವ ಎಂ. ದಿವಾಕರ ಕರ್ಕೇರ, ಯಶವಂತ ಪೂಜಾರಿ, ವಿಜಯಕುಮಾರ್ ಮುಲ್ಕಿ, ಟಿ. ವಿ. ಪೂಜಾರಿ, ಅಶೋಕ್ ಪೂಜಾರಿ, ರಾಜೇಶ್ವರಿ ಸುವರ್ಣ, ಸರಸ್ವತಿ ರಾವ್, ಸುಮತಿ ಸಾಲ್ಯಾನ್, ವೇದ ಶೆಟ್ಟಿ, ಪೂರ್ಣಿಮ ಪೂಜಾರಿ, ವೇದಾ ಪೂಜಾರಿ, ಸುನಿತಾ ಶೆಟ್ಟಿ, ಉಷಾ ಶೆಟ್ಟಿ, ಹರಿಣಿ ಶೆಟ್ಟಿ ಬೊಕ್ಕ ಉಪಸಮಿತಿಲೆನ ಸದಸ್ಯೆರ್ ಬಿನ್ನಾಪು ಮಲ್ದೆರ್.
ಒಂತೆ ಒಂತೆನೇ ಪಿಸ್ತಾ ತಿಂದ್ಂಡ ಕೋಎಂಜೈಮ್ Q10 ದೇಹದ ಜೀವಕೋಶಡ್ ಶಕ್ತಿನ್ ಎಚ್ಚ ಮಲ್ಪುಂಡು.
ಪಿಸ್ತಾಡ್ ಇಪ್ಪುನ ಆರೋಗ್ಯಕರ ಕೊಬ್ಬು ಹೃದ್ರೋಗದ ಅಪಾಯನ್ ಕಮ್ಮಿ ಮಲ್ಪುಂಡು. ಪಾರ್ಶ್ವವಾಯು ಬೊಕ್ಕ ಬೇತೆ ಸುಮಾರ್ ಹೃದಯ ಸಮಸ್ಯೆದ ಅಪಾಯನ್ ತಡೆಪುಂಡು.
ಅತ್ತಂದೆ ಪಿಸ್ತಾ ತಿನ್ಪುನೆರ್ದ್ ದೇಹದ ಪ್ರತಿರೋಧನ್ ಎಚ್ಚ ಮಲ್ಪೆರೆ, ಜೀರ್ಣಕ್ರಿಯೆ ಬೊಕ್ಕ ಸಾಮಾನ್ಯ ಆರೋಗ್ಯನ್ ಸುಧಾರಿಸಾಯೆರೆ ಸಹಾಯ ಆಪುಂಡು. ನೆತ್ತ ಬಗೆಟ್ಟ್ ಆಹಾರ ತಜ್ಞೆರೆನ ಸಲಹೆ ದೆತೊನುನೇ ಎಡ್ಡೆ.
ಕುಡ್ಲ: ಲೋಕಸಭಾ ಚುನಾವಣೆದ ನೀತಿ ಸಂಹಿತೆ ಜಾರಿಯಾಯಿನ ದಿನರ್ದ್ ಮಾರ್ಚ್ 20 ಮುಟ್ಟ 12,300 ರೂಪಾಯಿ ಬಿಲೆತ್ತ 21.34 ಲೀಟರ್ ಗಂಗಸರ ಜಪ್ತಿ ಮಲ್ತ್ದೆರ್. 3,13,500ರೂಪಾಯಿ ಬಿಲೆತ್ತ 1.65 ಕೆಜಿ ಡ್ರಗ್ಸ್ನ್ ವಶಕ್ಕ್ ದೆತೊಂದೆರ್ ಪಂದ್ ಜಿಲ್ಲಾಧಿಕಾರಿಲೆನ ಕಚೇರಿ ತೆರಿಪಾದೆರ್.
2024 ಲೋಕಸಭಾ ಚುನಾವಣೆಗ್ ಸಂಬಂಧಿಸಾದ್ ಚುನಾವಣಾ ಅಕ್ರಮನ್ ತಡೆಯೊನರೆ ಜಿಲ್ಲೆಡ್ ಒಟ್ಟು 8 ಕರ್ಚಿ ವೆಚ್ಚದ ಪರೀವೀಕ್ಷಕೆರೆನ್, 72 ಪ್ಲೈಯಿಂಗ್ ಸ್ಟ್ಯಾಡ್ (ಎಫ್.ಎಸ್.ಟಿ), 69 ಎಸ್.ಎಸ್.ಟಿ ಕೂಟಲು ಬೊಕ್ಕ 8 ಅಬಕಾರಿ ತಂಡಲೆನ್ ಜಿಲ್ಲೆಡ್ ನಿಯೋಜನೆ ಮಲ್ತ್ದೆರ್.
