ರೈಲ್ವೆ ಇಲಾಖೆ ಬುಡುಗಡೆ ಮಲ್ತಿನ 9144 ಬೇಲೆಗ್ ಅರ್ಜಿ ಸಂದಾಯೆರೆ ಉಂದುವೇ 8 ತಾರೀಕ್ ಅಕೇರಿದ ದಿನ ಆತ್ಂಡ್.
ಟೆಕ್ನಿಷಿಯನ್ ಗ್ರೇಡ್-1 1092, ಗ್ರೇಡ್- 38052 ಬೇಲೆ ಖಾಲಿ ಉಂಡು. ಬಿಇ, ಬಿಟೆಕ್, ಬಿಎಸ್ಸಿ, ಇಂಟರ್, ಪತ್ತನೇ, ಪಾಲಿಟೆಕ್ನಿಕ್ ಓದಿನಕುಲು ಅರ್ಜಿ ಪಾಡೊಲಿ.
ಪ್ರದೇಶವಾರು ಬೇಲೆಲು, ವಯೋಮಿತಿ, ಬೇತೆ ಪೊಲಬುಗಾದ್ ಅರ್ಜಿ ಸಂದಾಯೆರೆ ವೆಬ್ ಸೈಟ್ https://Indian railways.gov.inಗ್ ಭೇಟಿ ಕೊರೊಲಿ.
ಸಸಿಬಿತ್ತ್ ಲ್ದ ಶ್ರೀ ಭಗವತಿ ಅಪ್ಪೆನ ಸಾನಿದ್ಯೊಡು ವರ್ಷದ ಪರ್ವ, ನಡರಿ ಬಾರಿ ವಿಶೇಷವಾಯಿನ ಜಾತ್ರೆ
ಸಸಿಬಿತ್ತಿಲ್ ದ ಊರುದಕಲೆಗ್ ಉಂದು ಗ್ರಾಮದ ಜಾತ್ರೆ. ಜಾತಿ ಬಾಂಧವೆರೆಗ್ ಕುಲದೇವಿನ ಜಾತ್ರೆ. ಭಗವತಿನ್ ನಂಬಿಂಚಿತ್ತಿನ ಭಕ್ತೆರೆಗ್ ಭಗವತಿನ ನಡರಿದ ಜಾತ್ರೆ. ಬಪ್ಪನಾಡ್ ಜಾತ್ರೆದ ಕೊಡಿ ಜಾಯಿನೆ ರಡ್ಡನೇ ದಿನತಾನಿ ನಡಪುಂಡು ಸಸಿಬಿತ್ತ್ಲ್ ದ ಅಪ್ಪೆನ ನಡರಿದ ಪರ್ವ.
ಬಪ್ಪನಾಡ್ ದ ಅಪ್ಪೆ ಜಲದುರ್ಗೆ ಮೆಗ್ದಿಗ್ ಕೊರ್ತಿನ ಭಾಷೆದ ಪ್ರಕಾರ ಪಲ್ದಿ ಭಗವತಿ, ಮೆಗ್ದಿನ ಬಪ್ಪನಾಡ್ ದ ಸಾನಿದ್ಯೊಗು ಪೋಪೆರ್. ಆನಿಡ್ದ್ ಇನಿಕ್ ಲಾ ಈ ಮೆಗ್ದಿ ಪಲ್ದಿನ ಭಾವನಾತ್ಮಕ ಭೇಟಿದ ಐತಿಹಾಸಿಕ ಕ್ಷಣತ ಪೊರ್ಲುನು ತೂವರೆಗ್ ಪಂಡ್ ದೆ ಭಕ್ತೆರ್ ಲಕ್ಷಗಟ್ಟಳೆ ಸಂಖ್ಯೆಡ್ ಒಟ್ಟು ಸೇರುವೆರ್. ಬಪ್ಪನಾಡ್ ದ ಅಪ್ಪೆ ಜಲದುರ್ಗೆನ ವರ್ಷದ ಪರ್ವೊಗು ಹಳೆಯಂಗಡಿ ಕದಿಕೆದ ಭಂಡಾರದ ಇಲ್ಲಡ್ದ್ ಪಲ್ದಿ ಭಗವತೀ ಪರಿವಾರ ಸಮೇತ ಸುಮಾರ್ 8 ಮೈಲ್ ನಡತೊಂದು ಪೋದು ಮೆಗ್ದಿನ ವರ್ಷದ ಪರ್ವೊಡು ಜೊತೆಯಾಪಿನ ಆ ಪೊರ್ಲುನು ತೂಪಿನನೆ ಒಂಜಿ ಭಾಗ್ಯ.
ಮೆಗ್ದಿ ಪಲ್ದಿನ ಭೇಟಿದ ಪೊರ್ತುಡು ಮೆಗ್ದಿ ಜಲದುರ್ಗೆ ಕೈ ಸನ್ನೆ ಕಣ್ಣ್ ಸನ್ನೆದ ಭಾಷೆಡ್ ಅಪ್ಪೆ ಭಗವತೀ ಮಲಯಾಳಿ ಬಾಷೆಡ್ ಪಾತೆರುನ ಮೆಗ್ದಿ ಪಲ್ದಿನ ಮೋಕೆನ್ ತೂಪಿನನೆ ಒಂಜಿ ಸೌಭಾಗ್ಯ. ಮೆಗ್ದಿನ ಜಾತ್ರೆನ್ ಕರಿತೊಂದು ಬಪ್ಪನಾಡ್ ದ ಕೊಡಿ ಜಾಯಿನೆಗೆ ಅಪ್ಪೆ ಭಗವತೀ ಪರಿವಾರ ಸಮೇತ ಪಿರ ಕದಿಕೆದ ಭಂಡಾರದ ಇಲ್ಲಗ್ ಬತ್ತ್ ಸೇರೊನುವೆರ್. ಕುಡ ಬಯ್ಯಗ್ ತನ್ನ ವರ್ಷದ ಪರ್ವ ಕರಿತೊನರೆ ಭಂಡಾರದ ಇಲ್ಲಡ್ದ್ ತುದೆತ ಆಪೆದ ಮೈಟ್ ಉಪ್ಪುನ ತನ್ನ ಆದಿಸ್ಥಳ ಸಸಿಬಿತ್ತ್ ಲ್ ಗ್ ಆವೇಶೊಡು ಪರಿವಾರ ಸಮೇತ ಭಂಡಾರ ಏರೊಂದು ಪಲ್ಲೆಂಕಿಡ್ ಕುಲ್ಲೊಂದು ಅಪ್ಪೆ ಭಗವತೀ ತನ್ನ ಮೂಲ ಜಾಗೆನ್ ಸೇರೊನುವೆರ್.
ಮನದಾನಿ ಸಾನಿದ್ಯದ ನಾಗಗ್ ನಾಗ ತಂಬಿಲದೊಟ್ಟುಗು ಪೂಜೆ ಕರಿತೊಂದು ಬಯ್ಯಡ್ ರಾಶಿ ರಾಶಿ ಮಲ್ಲಿಗೆಡ್ ಸಿರಿ ಸಿಂಗಾರ ಆವೊಂದು ಬತ್ತಿನ ಭಕ್ತರೆಗ್ ಅನ್ನ ಪ್ರಸಾದೊನು ಕೊರೊಂದು ರಾತ್ರೆ 12 ಗಂಟೆಗ್ ಮಹಾಪೂಜೆದ ಒಟ್ಟುಗು ಅಪ್ಪೆ ಭಗವತೀ ಮಲ್ಲಿಗೆಡ್ ಐತ ಆತಿನ ದಂಡಿಗೆನ್ ಏರೊಂದು 64 ಸುತ್ತುದ ಸುತ್ತ ಬಲಿಕ್ ಪಿದಾಡುವೆರ್. ಅಂಚೆನೆ ಅಂಗನೊಡು ನಾಲ್ ಸುತ್ತಲಾ ಕಂಚಿಲ್ ದ ಜೋಕುಲು. ಈ ಕಂಚಿಲ್ ದ ಪರಕೆ ಅಪ್ಪೆಗ್ ಬಾರಿ ಪ್ರೀತಿದ ಸಿರಿ ಪರಕೆ. ಜೋಕುಲು ಬಾಲೆಲೆಗ್ ಸೀಕ್ ಸಂಕಡ ಬನ್ನಗ ಅಪ್ಪೆನ್ ನೆನತೊಂದು “ಜೋಕುಲೆಗ್ ಬೈದಿಂಚಿತ್ತಿನ ದುರಿತೊಲೆನ್ ದೂರ ಮಲ್ಪುಲೆ ಅಪ್ಪೆ ಭಗವತೀ.. ಇರೆಗ್ ಕಂಚಿಲ್ ದ ಪರಕೆ ಸಂದೈತ ಮಲ್ಪುವ” ಪಂದ್ ಕೈ ಮುಗಿದ್ ನಟೊನುವೆರ್. ಸೀಕ್ ಗುಣ ಆಯಿನೆಗೆ ಅಪ್ಪೆ ಭಗವತಿನ ಸನ್ನಿದಾನೊಡು ನಡರಿದ ಪರ್ವದಾನಿ ಜೋಕುಲೆನ್ ಮದ್ಮಯೆ ಮದಿಮಾಲ್ ಐತ ಮಲ್ಪಾವೊಂದು, ಅಪ್ಪೆನ ಮೋಕೆದ ಪರಕೆ ಕಂಚಿಲ್ ಸೇವೆನ್ ಸಂದಾವೆರ್.
ಸುರುತ ಸಾಲ್ ಸುತ್ತುದ ಬಲಿಕಲ್ಲ್ ಸೇವೆ, ದಾರಿಗಾಸುರನ್ ಸಂಹಾರ ಮಲ್ದಿನ ಸಂಕೇತವಾದ್ ಅಸುರ ಕ್ರಿಯೆಡ್ ಬೊಕ್ಕದ ದೇವತಾ ಕ್ರಿಯೆಡ್ ಬಲಿಕಲ್ಲ್ ಗ್ ಚರ್ವದೊಟ್ಟುಗು ಬಲಿ ಸೇವೆ ನಡಪುಂಡು. ಪುಲ್ಯ ಕಾಂಡೆ ನಡಪುನಂಚಿನ ಮೂರ್ತಿ ದರ್ಶನದ ಪೊರ್ತು. ಈ ಘಳಿಗೆಗೋಸ್ಕರನೇ ಇಡೀ ಊರುಗು ಊರೇ ಸೇರೊಂದು ಅಪ್ಪೆನ ಮೂರ್ತಿ ದರ್ಶನೊಡು ತೋಜಿದ್ ಬರ್ಪೆರ್ . ಬ್ರಾಹ್ಮೀ ಮುರ್ತೊಡು ಅಪ್ಪೆನ ಪ್ರಧಾನ ಅರ್ಚಕೆರಾದುಪ್ಪುನ ಕಾರ್ನವೆರ್ ಪಟ್ಟೆ ಸೀರೆ ತುತ್ತೊಂದು ಸಿರಿ ಸಿಂಗಾರ ಆತಿನ ಭಗವತೀ ಅಪ್ಪೆನ ಮೂರ್ತಿನ್ ಮಂಡೆಡ್ ಏರಾವೊಂದು, ಅಂಗನ ಜಪ್ಪುಂಚಿತ್ತಿನ ಪೊರ್ತು. ಅಂಗನದ ನಾಲ್ ಮೈಟ್ ಲಾ ಕಂಚಿಲ್ದ ಬಾಲೆಲೆನ್ ಪುಗ್ಗೆಲ್ ಡ್ ತುಂಬೊಂದು ಮಡಸ್ತಾನಾದೊಟ್ಟುಗು ಬಾರಿ ಗೌಜಿಡ್ ನಡಪುಂಡು ಮೂರ್ತಿ ದರ್ಶನ ಬಲಿ. ಸೇರ್ದಿಂಚಿತ್ತಿನ ಭಕ್ತೆರ್ ಅಪ್ಪೆನ ಮೂರ್ತಿ ದರ್ಶನದ ಪೊರ್ಲುನು ತೂವರೆಗ್ ಪಂಡ್ ದೆ ಭಕ್ತಿ ಪರವಶೊಡು ಕೈಮುಗಿದು ಅಪ್ಪೆನ್ ಸುಗಿಪುವೆರು. ಮೂರ್ತಿ ದರ್ಶನೊಡ್ದು ಬೊಕ್ಕ ತುಲಾಭಾರ ಸೇವೆ, ಅಪ್ಪೆ ಭಗವತೀ ಪರ್ವತೊಡು ಕುಲ್ಲೊಂದು ಬತ್ತಿನ ಭಕ್ತೆರೆಗ್ ನಂಬೊಲಿಗೆದ ಪ್ರಸಾದೊನು ಕೊರ್ಪೆರ್. ಆನಿ ಮಧ್ಯಾಹ್ನ ಅಪ್ಪೆ ಭಗವತೀ ತನ್ನ ಪರಿವಾರ ಸಮೇತವಾದ್ ಭಂಡಾರ ಏರೊಂದು ಪಿರ ತನ್ನ ಕದಿಕೆದ ಭಂಡಾರದ ಇಲ್ಲ್ ಸೇರೊನುವೆರ್.
🖋 ಸರಸ್ವತಿ ಅಮಿತ್ ಬಜ್ಪೆ
ಪುತ್ತೂರುದ ಹೃದಯ ಭಾಗಡ್ ಇಪ್ಪುನ ಮಾಯ್ ದೆ ದೇವುಸ್ ಚರ್ಚ್ ಡ್ ಯೇಸುಕ್ರಿಸ್ತನ ಪುನರ್ಜನ್ಮನ್ ತೂಪಾವುನ ಈಸ್ಟರ್ ಪರ್ಬನ್ ಆಚರಣೆ ಮಲ್ತೆರ್.
ಚರ್ಚ್ ವಠಾರದ ಮಾತ ಕರೆಂಟ್ ಬೊಲ್ಪುನ್ ತೆಕ್ಕಾದ್ ಬೊಕ್ಕ ಒಂಜಿ ಮಲ್ಲ ಮೇಣದ ಬತ್ತಿಗ್, ಯೇಸುನ್ ಶಿಲುಬೆಗ್ ಏರಿಸಾನಗ ಹಾಕಿನಂಚಿನ ಆಣಿನ್ ಕುತ್ತುದು, ಬೊಕ್ಕ ಆಶೀರ್ವಾದ ಮಲ್ತಿನ ಪೊಸ ಸೂವುರ್ದ್ ಮೇಣದ ಬತ್ತಿನ್ ಪೊತ್ತಾವೆರ್. ಈ ಮೇಣದ ಬತ್ತಿನ್ ಪತ್ತಿನ ಯಾಜಕೆರ್ ಜನಕ್ಲೆನ ನಡುರ್ದ್ ಪೋನಗ ಉಂದು ಯೇಸಕ್ರಿಸ್ತನ ಜ್ಯೋತಿ ಪಂದ್ ಪನ್ಪೆರ್, ಆಪಗ ಮಾತ ಭಕ್ತೆರ್ ದೇವೆರೆಗ್ ಮಹಿಮೆ ಸಂದಾದ್ ಪಂದ್ ಜೈಕಾರ ಪಾಡೊಂದು ಆ ಜ್ಯೋತಿರ್ದ್ ತನಡ ಇಪ್ಪುನ ಮೇಣದ ಬತ್ತಿನ್ ಪೊತ್ತಾವೆರ್. ಧಾರ್ಮಿಕ ವಿಧಿವಿಧಾನಲು, ಬೈಬಲ್ ದ ಪರ ಒಡಂಬಡಿಕೆದ ಮೂಜಿ ವಚನಲು, ಸ್ತುತಿ ಗೀತೆಲು, ಆಯಿನ ಬೊಕ್ಕ ಪುನರುತ್ಥಾನ ಯೇಸುನ ಪ್ರತಿಮೆ ಅನಾವರಣ ಆಪುಂಡು.
ಅಶೋಕ್ ರಾಯನ್ ಕ್ರಾಸ್ತಾ ಮೇರ್ ತನ್ನ ಪ್ರವಚನಡ್ ಈ ದಿನ ಜಾಗರಣೆದ ರಾತ್ರೆ, ನಮಕ್ ಮಾತೆರೆಗ್ಲಾ ರಕ್ಷಣೆನ್ ಆರ್ ಕೊರ್ತೆರ್. ಪಂಡ ಯೇಸು ಕ್ರಿಸ್ತೆರ್ ಜೀವಂತ ಆದ್ ತನ್ನ ಪೊಪ್ಪನೊಟ್ಟಿಗೆ ಐಕ್ಯರಾಪುನೆತ್ತೊಟ್ಟಿಗೆ ಮಾತ ಕ್ರೈಸ್ತ ಅನುಯಾಯಿಲೆಗ್ ಪುನರುತ್ಥಾನ ಕರುಣಿಸಾಯಿನ ಪವಿತ್ರ ದಿನ ಉಂದು, ಪ್ರತಿಯೊರಿಲ ನೆತ್ತ ಭರವಸೆದೊಟ್ಟಿಗೆ ಜೀವಿಸಾಯೆರೆ ಪಂಡೆರ್.
ರೂಪೇಶ್ ತಾವ್ರೋ ಮೇರ್ ಪಾತ್ರೆಡ್ ದೀನ ನೀರಗ್ ಮೇಣದ ಬತ್ತಿನ್ ಮುರ್ಕಾವುನೆತ್ತೊಟ್ಟಿಗೆ ಆಶೀರ್ವಾದ ಮಲ್ತ್ ದ್ ಮೇಣದಬತ್ತಿರ್ದ್ ಮಾತ ಭಕ್ತೆರ್ ಯೇಸು ಕ್ರಿಸ್ತೆರ್ ನಮಕ್ ಕೊರ್ನ ಪುನರುತ್ಥಾನನ್ ವಿಶ್ವಾಸ ಮಲ್ಪುವೆ ಪನ್ಪುನ ವಾಗ್ದಾನನ್ ನವೀಕರಿಸಾಯಿನ ಬೊಕ್ಕ ಪವಿತ್ರ ನೀರನ್ ಭಕ್ತೆರೆಗ್ ಸಿಂಪಡಿಸಾದ್ ಮಾತೆರೆನ್ಲಾ ಪಾವನ ಮಲ್ತೆರ್.
ಬಲಿ ಪೂಜೆನ್ ಸ್ಟ್ಯಾನಿ ಪಿಂಟೋ ಮೇರ್ ಮಲ್ತೆರ್. ಈ ಪೊರ್ತುಡು ಲಾರೆನ್ಸ್ ಮಸ್ಕರೇನಸ್, ಲೋಹಿತ್ ಅಜಯ್ ಮಸ್ಕರೇನಸ್ ಪಾಲ್ ಪಡೆದಿತ್ತೆರ್. ಕ್ರಿಸ್ತನ ಪುನರ್ಜನ್ಮದ ಲೆಕ್ಕೊಡು ಸಾರರ್ದ್ ಎಚ್ಚ ಭಕ್ತೆರೆಗ್ ತಿಂಡಿ ಬೊಕ್ಕ ಪಾನೀಯನ್ ಕೊರಿಯೆರ್.
ಕುಂಪಲ: ಗುರುನಗರದ ಮಾರುತಿ ಮಠ ಶ್ರೀ ಕೃಷ್ಣ ಮುಖ್ಯ ದೇವಸ್ಥಾನಡ್ ಶನಿ ಸಪ್ತಾಹ ಪೂಜೆ ಮುಗಿತಲ ಆಂಡ್.
ಈ ಪೂಜೆ ಶ್ರೀ ಬಾಲಯೋಗಿ ಅಮೃತಾನಂದ ಸ್ವಾಮಿಲೆನ ಮುತಾಲಿಕೆಡ್ ನಡತ್ಂಡ್.
ಈ ಪೊರ್ತುಡು ತುಕಾರಾಮ್ ಭಂಡಾರಿ, ಸುಂದರ ಕುಲಾಲ್, ದಯಾನಂದ ಲಕ್ಷ್ಮಿಗುಡ್ಡೆ, ಸಂಜಯ್ ಕೃಷ್ಣನಗರ, ಪ್ರತಾಪ್ ಕೃಷ್ಣ ಆಶ್ರಯ ಕಾಲನಿ ಕಿಶೋರ್ ಕುಜುಮಗದ್ದೆ ಸುಧಾಕರ್ ಶೆಟ್ಟಿ ಪಿಲಾರ್ ಬೊಕ್ಕ ಸಾರರ್ದ್ ಎಚ್ಚ ಭಕ್ತೆರ್ ಪಾಲ್ ಪಡೆದಿತ್ತೆರ್.
ಸುಗ್ಗಿ ಪುಣ್ಣಮೆಗ್ ಮೂಜಿ ದಿನತ್ತ ಕಾಲ ಇಸೇಸ ವೇಷ ಪಾಡ್ದ್ ಇಲ್ಲ ಇಲ್ಲಗ್ ಭೇಟಿ ಕೊರ್ದು ಕದ್ರಿ ಮಂಜುನಾಥನ ತೀರ್ಥ ಕನತ್ ದ್ ರಾಶಿ ಪೂಜೆನ್ ಮಾ.31 ಐತಾರ ಬದ್ಯಾರು ಶ್ರೀ ಲೋಕನಾಥೇಶ್ವರ ದೇವಸ್ಥಾನಡ್ ನಡತ್ಂಡ್.
ಶ್ರೀ ಲೋಕನಾಥೇಶ್ವರ ದೇವೆರೆಗ್ ಮಹಾಪೂಜೆ ಬೊಕ್ಕ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ನಡತ್ಂಡ್. ಶ್ರೀ ಲೋಕನಾಥೇಶ್ವರ ಭಜನಾ ಮಂಡಳಿ ಬೊಕ್ಕ ಶ್ರೀದೇವಿ ಮಹಿಳಾ ಕೇಂದ್ರದ ಸದಸ್ಯೆರ್ ಊರುದ ಪರವೂರುದ ಭಕ್ತೆರ್ ಪಾಲ್ ಪಡೆದ್ ಪ್ರಸಾದ ದೆತೊಂಡೆರ್.
ಭಾರತೀಯ ಜನತಾ ಪಾರ್ಟಿ ಬೊಲ್ತೇರ್ ಮಂಡಲದ ಮಂಡಲ ಪದುಕೆರೆನ, ಬೇತೆ ಬೇತೆ ಮೋರ್ಚಾ, ಮಹಾಶಕ್ತಿ ಕೇಂದ್ರ, ಶಕ್ತಿಕೇಂದ್ರ ಬೊಕ್ಕ ಬೂತ್ ಸಮಿತಿ ಪದುಕೆರೆನ ಪದಗ್ರಹಣ ಬೊಕ್ಕ ಕಾರ್ಯಕರ್ತೆರೆನ ಸಮಾವೇಶ ಎಲ್ಲೆ (ಎ.2) ಬೊಲ್ಪುಗು 10 ಗಂಟೆಗ್ ಗುರುವಾಯನಕೆರೆ ಕಿನ್ಯಮ್ಮ ಯಾನೆ ಗುಣವತಿಯಮ್ಮ ಸಭಾಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಮಂಗಳೂರು ಲೋಕಸಭಾ ಬಿಜೆಪಿ ಅಭ್ಯರ್ಥಿ ಕ್ಯಾಪ್ಟನ್ ಬ್ರಿಜೇಶ್ ಚೌಟ, ರಾಜ್ಯ ಬಿಜೆಪಿ ಯುವಮೋರ್ಚಾ ಪ್ರಧಾನ ಕಾರ್ಯದರ್ಶಿ ಶಾಸಕೆರ್ ಹರೀಶ್ ಪೂಂಜ, ವಿಧಾನಪರಿಷತ್ ಸದಸ್ಯೆರ್ ಪ್ರತಾಪಸಿಂಹ ನಾಯಕ್, ಬಿಜೆಪಿ ಜಿಲ್ಲಾಧ್ಯಕ್ಷೆರ್ ಸತೀಶ್ ಕುಂಪಲ ಸೇರಿನಂಚೆನೆ ರಾಜ್ಯ ಬೊಕ್ಕ ಜಿಲ್ಲೆದ ಪ್ರಮುಖೆರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಬಿಜೆಪಿ ಮಂಡಲಾಧ್ಯಕ್ಷೆರ್ ಶ್ರೀನಿವಾಸ್ ರಾವ್, ಪ್ರಧಾನ ಕಾರ್ಯದರ್ಶಿ ಜಯಾನಂದ ಗೌಡ, ಪ್ರಶಾಂತ್ ಪಾರೆಂಕಿ ಪ್ರಕಟಣೆಡ್ ತೆರಿಪಾದೆರ್.
ಪೊಸ ಹಣಕಾಸು ವರ್ಷದ ಸುರುತ್ತ ದಿನನೇ ದೇಶಡ್ ಇನಿರ್ದ್ 19 ಕೆಜಿದ ಎಲ್ ಪಿಜಿ ಸಿಲಿಂಡರ್ ಕಿರಯ 30.50 ರೂ. ಕಮ್ಮಿ ಆತ್ಂಡ್.
ಕರ್ನಾಟಕಡ್ 19 ಕೆಜಿ ಎಲ್ ಪಿಜಿ ಸಿಲಿಂಡರ್ 1821.50 ರೂ. ಗ್ ತಿಕ್ಕುಂಡು. ಸುರುಕು 1851 ರೂ. ಇತ್ತ್ಂಡ್.
ನನ ಗೃಹಬಳಕೆದ ಸಿಲಿಂಡರ್ ಕಿರಯಡ್ ಒವ್ವೇ ಬದಲಾವಣೆ ಆತಿಜಿ. ಇತ್ತೆ ರಾಜ್ಯಡ್ ಗೃಹಬಳಕೆದ ಎಲ್ ಪಿಜಿ ಸಿಲಿಂಡರ್ ಕಿರಯ 807.5 ರೂ. ಉಂಡು.
ರಾಜ್ಯಡ್ ದೊಂಬುದ ತಾಪಮಾನ ಎಚ್ಚಾವೊಂದುಂಡು. ಉಷ್ಣ ಗಾಳಿಗ್ ರಡ್ಡ್ ಜನ ತೀರ್ ಪೋತೆರ್ ಪಂದ್ ಸಂಶಯ ಬೈದ್ಂಡ್.
ರಾಯಚೂರು ಜಿಲ್ಲೆ ಮಾನ್ವಿ ತಾಲೂಕ್ ದ ಶ್ರೀಶೈಲಗ್ ಪಾದೆಯಾತ್ರೆದ ಮುಕೇನ ಪೋವೊಂದು ಇತ್ತಿನ ಬಾಗಲಕೋಟೆ ಚಿಮ್ಮುಡ್ ಗ್ರಾಮದ ಶ್ರೀಶೈಲ (21) ತೀರ್ ಪೋತೆರ್.
ಅಂಚೆನೆ ಆಳಂದ ತಾಲೂಕ್ ದ ದಣ್ಣೂರು ಗ್ರಾಮಡ್ ಐತಾರದಾನಿ ಕೂಲಿ ಕೆಲಸ ಮಲ್ತೊಂದು ಇಪ್ಪುನ ಬುರ್ದು ಶರಣಪ್ಪ ಸಮಗಾರ (42) ತೀರ್ ಪೋತೆರ್. ಮರಣೋತ್ತರ ಪರೀಕ್ಷೆದ ಬೊಕ್ಕ ನಿಜಾಂಶ ಗೊತ್ತಾವೊಡಾತೆ.
ವೋಟುದ ಕೆಲಸಗ್ ನಿಯೋಜನೆಯಾದಿತ್ತ್ ದ್ ಬೊಕ್ಕ ನಾಪತ್ತೆ ಆಯಿನ ಬಂಟ್ವಾಳದ ಅಮ್ಮಾಡಿ ಗ್ರಾಮ ಪಂಚಾಯತ್ ಕಾರ್ಯದರ್ಶಿ ಲಕ್ಷ್ಮೀನಾರಾಯಣ ಪುನ ಆದ್ ಪತ್ತೆ ಆತೆರ್.
ಧರ್ಮಸ್ಥಳ ಕೈತಲ್ದ ಪಟ್ರಮೆ ತುದೆಟ್ಟ್ ಐತಾರ ಮೆರೆನ ಪುನ ಪತ್ತೆ ಆತ್ಂಡ್. ಮಡಂತ್ಯಾರ್ ಮಾಲಾಡಿ ಗ್ರಾಮದ ವಿದ್ಯಾನಗರ ನಿವಾಸಿ, 6 ವರ್ಷೊದಿಂಚ ಬಂಟ್ವಾಳ ತಾಲೂಕ್ ಅಮ್ಮಾಡಿ ಗ್ರಾಮ ಪಂಚಾಯತ್ ಡ್ ಕಾರ್ಯದರ್ಶಿಯಾದ್ ಕೆಲಸ ಮಲ್ತೊಂದು ಇತ್ತಿನ ಲಕ್ಷ್ಮೀನಾರಾಯಣ (52) ಮಾ.27 ಕ್ಕ್ ಬೊಲ್ಪುಗು ಕೆಲಸಗ್ ಪೋಪೆ ಪಂದ್ ಪೋತಿನಾರ್ ನಾಪತ್ತೆ ಆದಿತ್ತೆರ್. ಪಟ್ರಮೆ ಸಂಕದಲ್ಪ ಮೆರೆನ ಬೈಕ್ ತಿಕ್ ದಿತ್ತ್ಂಡ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 53ನೇ ಸಂಚಿಕೆ ಎ.1 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರಾಯಿನ ಆರ್ ಶಿವಕುಮಾರ್ ಪಾಲ್ ಪಡೆಯೆರ್. ಎ.2 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
