ಬೆಂಗಳೂರುದ ಯುವ ಉದ್ಯಮಿ ಪ್ರಕಾಶ್ ಕುಂಪಲ ಮೆರೆಗ್ “ಗಡಿನಾಡ ರತ್ನ” ಪ್ರಶಸ್ತಿದ ಮಾನಾದಿಗೆ
ಕುಡ್ಲ : ಬೆಂಗಳೂರುದ ಯುವ ಉದ್ಯಮಿ ಪ್ರಕಾಶ್ ಕುಂಪಲ ಮೆರೆಗ್ ಯುನೈಟೆಡ್ ಅರಬ್ ಎಮಿರೇಟ್ಸ್ದ (ಯುಎಇ) ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ (ರಿ) ಮೊಕುಲು “”ಗಡಿನಾಡ ರತ್ನ “” ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್. ಮೆರೆನ ಈ ಸಾಧನೆಗ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆ ಬೊಕ್ಕ ಅಭಿಮಾನಿಲು ಉಡಲ್ ದಿಂಜಿನ ಎಡ್ಡೆಪ್ಪು ಬಯಕ್ದೆರ್.
ಒಡಿಪುದ ಅಷ್ಟಮಠೊಟ್ ಒಂಜಾಯಿನ ಶ್ರೀ ಪುತ್ತಿಗೆ ಮಠದ ಸ್ವಾಮೀಜಿಲಾಯಿನ ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿಲು ಅರೆನ ವಿಶ್ವ ಗೀತಾ ಪರ್ಯಾಯಡ್ ಮಾತಾ ಭಾಷೆದ ಲಿಪಿಟ್ ಭಗವದ್ಗೀತೆ ಬರೆಪಿನ ಸಂಕಲ್ಪ ಮಲ್ದಿತ್ತುದ್ ಅಯಿತ್ತ ಯಜ್ಞದ ಭಾಗವಾದ್ ಕೋಟಿ ಗೀತಾ ಲೇಖನ ಯಜ್ಞ ಪಂಡುದ್ ಪುದರ್ ಕೊರ್ತೆರ್.ಆ ನಿಟ್ಟುಡ್ ತುಳುನಾಡು ಡ್ ತುಳುಭಾಷೆದ ಲಿಪಿಟ್ ಲಾ ಭಗವದ್ಗೀತೆ ಬರೆಯೊಡ್ ಪನ್ಪಿನ ಉದ್ದೇಶೊಡ್ ಜೈ ತುಳುನಾಡ್ ಸಂಘಟನೆ ಅಟ್ಟಣೆ ಮಲ್ದಿತ್ತುದ್ ಇದಮುಟ ಸುಮಾರ್ 200 ಕ್ ಲಾ ಜಾಸ್ತಿ ಜನ ತುಳುಲಿಪಿಟ್ ಭಗವದ್ಗೀತೆ ನ್ ಬರೆತೆರ್.ಅವ್ವೆನ್ ಒಡಿಪುದ ಕೃಷ್ಣ ಗ್ ಸಮರ್ಪಣೆ ಮಲ್ಪುನ ಒಂಜಿ ವಿಶೇಷ ಕಜ್ಜೊ ಉಂದುವೇ ಬರ್ಪಿನ ನವೆಂಬರ್ 16 ತಾರೀಕು ಗ್ ಬಾರಿ ಗೌಜಿಡ್ ನಡಪರೆಗುಂಡ್ ಪಂಡುದ್ ಕೋಟಿ ಗೀತಾ ಲೇಖನ ಯಜ್ಞದ ಪೂರ್ಣಾವಧಿ ಪ್ರಚಾರಕೆರಾಯಿನ ಶ್ರೀ ಕೆ.ವಿ.ರಮಣಾಚಾರ್ಯೆರ್ ತೆರಿಪಾಯೆರ್.ಆರು ಒಡಿಪುದ ಪ್ರೆಸ್ ಕ್ಲಬ್ ಡ್ ನಡತಿನ ಪತ್ರಿಕಾ ಗೋಷ್ಠಿಡ್ ಪಾತೆರಿಯೆರ್.ಪುತ್ತಿಗೆ ಸ್ವಾಮೀಜಿಲೆನ ಕೋಟಿ ಗೀತಾ ಲೇಖನ ಯಜ್ಞೊಡ್ ವಿಶ್ವದ ಮಾತಾ ಕಡೇಟುಲಾ ಬಾರೀ ಪ್ರಶಂಸೆನ್ ಪಡೆದಿತ್ತುದ್ ಇತ್ತೆ ತುಲು ಲಿಪಿಟ್ ಬರೆದ್ ಸಮರ್ಪಣೆ ಮಲ್ಪುನ ಕಜ್ಜೊ ಉಂದುವೇ ಬರ್ಪಿನ ನವೆಂಬರ್ 16 ತಾರೀಕುಗ್ ಐತಾರದಾನಿ ನಡಪುನ ಕಜ್ಜೊಡ್ ಹೆಚ್ಚಿನ ತುಳುವೆರ್ ಪಾಲ್ ಪಡೆದ್ ಶ್ರೀ ಕೃಷ್ಣನ ಅನುಗ್ರಹ ಕ್ ಪಾತ್ರರಾವೊಡ್ ಪಂಡೆರ್.
ಈ ಪತ್ರಿಕಾಗೋಷ್ಠಿಡ್ ಜೈ ತುಲುನಾಡ್ ಒಡಿಪು ಎಗ್ಗೆದ ಗುರ್ಕಾರ್ಲು ಸುಶೀಲ ಜಯಕರ್, ಜೈ ತುಳುನಾಡ್ ಕೇಂದ್ರ ಸಮಿತದ ಸಂಘಟನಾ ಕಾರ್ಯಂತೆರ್ ಸಂತೋಷ್ ಕಟಪಾಡಿ, ಒಡಿಪು ಎಗ್ಗೆದ ಒತ್ತು ಗುರ್ಕಾರ್ಲು ಕಿನ್ನು ಒಡಿಪು, ಒಡಿಪು ಎಗ್ಗೆದ ಒತ್ತು ಕಾರ್ಯಂತೆರ್, ಒಡಿಪು ಎಗ್ಗೆದ ಪಣವುದ ಪಾಲವೆರ್ ಸುಪ್ರಿಯಾ ಅಖಿಲೀಶ್ ದೇವಾಡಿಗ ಬೊಕ್ಕ ಸಂಘಟನೆದ ಪದುಕೆರ್ ಪಾಲ್ ಪಡೆದಿತ್ತೆರ್
ಮುಲ್ಕಿ: ಹಳೆಯಂಗಡಿ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಪಡುಬಿದ್ರೆ ಶಾಖೆಡ್ ಗ್ರಾಹಕರ ದಿನಾಚರಣೆ ನ 11 ತಾನಿ ಪಡುಬಿದ್ರೆ ಸಂಘದ ಸಭಾಭವನದಡ್ ನಡತ್ಂಡ್.
ಕಾರ್ಯಕ್ರಮದ ಗುರ್ಕಾರ್ಮೆನ್ ಸಂಘದ ಗುರ್ಕಾರ್ಲು ಎಚ್ ವಸಂತ್ ಬೆರ್ನಾಡ್ ವಹಿಸೊಂದು ಪಾತೆರ್ದ್ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಅಭಿವೃದ್ಧಿಗ್ ಗ್ರಾಹಕೆರೆನ ಸಹಕಾರ ಕಾರಣವಾದುಂಡು ಆತ್ಮೀಯತೆ ಕರ್ತವ್ಯ ನಿಷ್ಠೆ ಇತ್ತ್ಂಡ ಮಾತ್ರ ಗ್ರಾಹಕೆರೆನ ವಿಶ್ವಾಸ ಸಾಧ್ಯ ಪಂಡೆರ್.
ಮಲ್ಲ ಬಿನ್ನೆರಾದ್ ಪಡುಬಿದ್ರಿ ನವಶಕ್ತಿ ಮಹಿಳಾ ಮಂಡಳಿದ ಕಾರ್ಯದರ್ಶಿ ಕಸ್ತೂರಿ ಪಾತೆರ್ದ್ ಸಂಘದ ಪ್ರಿಯದರ್ಶಿನಿ ಪುದರ್ ಮಸ್ತ್ ಪೊರ್ಲು ಉಂಡು ಸಿಬ್ಬಂದಿಲೆನ ತೆಲಿಕೆ ಮೋನೆದ ಸೇವೆ ಎಡ್ಡೆ ಹಣಕಾಸ್ ದ ವಹಿವಾಟ್ ದ ಒರುಟು ಸಂಸ್ಥೆ ಗ್ರಾಹಕೆರೆನ ವಿಶ್ವಾಸ ದೆತೊಂದು ಜನಪ್ರಿಯ ಆತುಂಡ್ ಪಂಡೆರ್.
ಬಿನ್ನೆರಾಯಿನ ಪಡುಬಿದ್ರಿ ಶ್ರೀ ಮಹಾ ಗಣೇಶ್ ಕಾಂಪ್ಲೆಕ್ಸ್ ದ ಮಾಲಕೆರ್ ಸುಶ್ಮಿತಾ ಪಡುಬಿದ್ರೆ ಪಾತೆರ್ದ್ ಗ್ರಾಹಕೆರೆನ ಸಮುದಾಯದ ಬುಲೆಚ್ಚಿಲ್ ಗ್ ಸೊಸೈಟಿ ಲಾ ಕಾರಣವಾದುಂಡು ಗ್ರಾಹಕೆರ್ ಜವಾಬ್ದಾರಿಯುತರಾದ್ ಇಪ್ಪೊಡು. ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ನನಾತ್ ಅಭಿವೃದ್ಧಿಯಾವಡ್ ಪಂಡೆರ್.
ಹಳೆಯಂಗಡಿ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ , ಶಾಕಾ ಪ್ರಬಂಧಕಿ ಅಂಜಲಿ ದೇವಾಡಿಗ ಉಪಸ್ಥಿತರಿತ್ತೆರ್.
ಅಂಜಲಿ ದೇವಾಡಿಗ ಎದ್ಕೊಂಡೆರ್, ,ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ ಸೊಲ್ಮೆ ಸಂದಾಯ ಮಲ್ತೆರ್ ಸಾಲ ವಿಭಾಗದ ಪ್ರಬಂದಕಿ ಅಕ್ಷತಾ ಶೆಟ್ಟಿ ನಿರೂಪಣೆ ಮಲ್ತೆರ್.
ಮಲ್ಲ ಬಿನ್ನೆರಾದ್ ಹಳೆಯಂಗಡಿ ನಾರಾಯಣ ಸನಿಲ್ ಎಲ್. ಕಾಲೇಜಿದ ನಿವೃತ್ತ ಮುಖ್ಯೋಪಾಧ್ಯಾಯೆರ್ ಪ್ರೇಮನಾಥ್ ಶೆಟ್ಟಿಗಾರ್ ಪಾಲ್ ಪಡೆದ್ ಪಾತೆರ್ದ್ , ಗ್ರಾಮೀಣ ಪ್ರದೇಶದ ಆರ್ಥಿಕ ಶಕ್ತಿಕರಣಡ್ ಸಹಕಾರ ಸಂಘದ ಪಾತ್ರ ಮಸ್ತ್ ಮಹತ್ತರವಾದುಂಡು ಪಂದ್ ಪಂಡೆರ್.
ಕಾರ್ಯಕ್ರಮದ ಗುರ್ಕಾರ್ಮೆನ್ ಎಚ್. ವಸಂತ್ ಬೆರ್ನಾಡ್ ವಹಿಸೊಂದಿತ್ತೆರ್.
ಕುಡೊಂಜಿ ಬಿನ್ನೆರಾಯಿನ ಪಿಸಿಎ ಬ್ಯಾಂಕ್ ಹಳೆಯಂಗಡಿದ ನಿವೃತ್ತ ಅಧಿಕಾರಿ ಶಕೀಲ ಶೆಟ್ಟಿ ತನ್ನ ಅನುಭವ ಪಟ್ಟೊಂಡೆರ್.
ಈ ಪೊರ್ತುಡು ಹಳೆಯಂಗಡಿ ಶಾಖೆದ ಶ್ರೀಮತಿ ಅಕ್ಷತಾ ಶೆಟ್ಟಿ ಬೊಕ್ಕ ಕಿನ್ನಿಗೋಳಿ ಶಾಖೆದ ಸಿಬ್ಬಂದಿಲಾಯಿನ ಕ್ಯಾರುಲ್ ಡಿಸೋಜ ಬೊಕ್ಕ ದೀಪಕ್ ಆನಂದ್ ಸಾಲಿಯಾನ್ ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್.
ಸಂಸ್ಥೆದ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ ಸುದರ್ಶನ್ ಸೊಲ್ಮೆ ಸಂದಾಯ ಮಲ್ತೆರ್ .
ಕಿನ್ನಿಗೋಳಿ ಶಾಖೆದ ಪ್ರಬಂಧಕೆರ್ ಮೋಹನ್ ದಾಸ್ ಕಾರ್ಯಕ್ರಮ ಎದ್ಕೊಂದು ಲೇಸ್ ಸುದಾರಿಕೆ ಮಲ್ತೆರ್ .
ಜೋಕುಲೆಗ್ ಗೊಬ್ಬುನವೇ ಪಾಠ, ಗೊಬ್ಬುನೆಟ್ಟೆ ವಿದ್ಯೆ ಇಂಚಿನ ಕ್ರೀಡಾ ಸೌಲಭ್ಯಲು ಜೋಕುಲೆನ ಬೌದ್ಧಿಕ, ದೈಹಿಕ ಬೊಕ್ಕ ಸಾಮಾಜಿಕ ಬುಲೆಚ್ಚಿಲ್ ಗ್ ಮಸ್ತ್ ಅವಶ್ಯಕ.
ಶಾಲೆ ಜೋಕುಲೆನ ಭವಿಷ್ಯ ಕಟ್ಟುನ ಅಪ್ಪೆ ಇಲ್ಲ್ . ಈ ಕ್ರೀಡಾಪಾರ್ಕ್ದ ಒರುಟು, ಪ್ರತಿ ಬಾಲೆದ ತೆಲಿಕೆ, ಕುಸಿ ಬೊಕ್ಕ ಪೊಸತ್ ಕಲ್ಪರೆ ಅವಕಾಶ ಕೊರ್ಪುಂಡು. ಈ ಮಹತ್ವದ ಕಜ್ಜಗ್ ಕೈಜೋಡಾಯಿನೆಕ್ಕ್ ನಮಕ್ ಪೆರ್ಮೆ ಉಂಡು ಪಂದ್ ಮಣಿಪಾಲ್ ಡಾಟ್ ನೆಟ್ ಪ್ರೈ. ಲೀ. ಮಣಿಪಾಲದ ಒತ್ತು ಗುರ್ಕಾರ್ಲು ಅಂಚೆನೆ ಶ್ರೀ ಶಾರದಾ ಹೈಸ್ಕೂಲ್ ದ ಹಿರಿಯ ವಿದ್ಯಾರ್ಥಿ ನಾಗರಾಜ್ ಶೆಟ್ಟಿಗಾರ ತೆರಿಪಾಯೆರ್.
ಆರ್ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್, ಶಿಮಂತೂರುದ ಮಣಿಪಾಲ್ ಡಾಟ್ ನೆಟ್ ಪ್ರೈ. ಲೀ. ಕೊಡುಗೆಯಾದ್ ಕೊರ್ನ ಒನ್ ಗುಡ್ ಸ್ಟೆಪ್ ಬೆಂಗಳೂರು ಕಾರ್ಯಗತ ಮಲ್ತಿನ ಪೊಸತ್ ಎಲ್ಯ ಜೋಕುಲೆನ ಕ್ರೀಡಾ ಪಾರ್ಕ್ ದ ಉದಿಪನಡ್ ಪಾಲ್ ಪಡೆದ್ ಕಾರ್ಯಕ್ರಮಗ್ ಎಡ್ಡೆಪ್ಪುಲು ಬಯಕಿಯೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಶಿಮಂತೂರುದ ಶ್ರೀ ಶಾರದಾ ಸೊಸೈಟಿಯ ಗುರ್ಕಾರ್ಲು ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು ವಹಿಸೊಂದು, ಇತ್ತೆದ ಜೋಕುಲು ಎಲ್ಯ ಪ್ರಾಯನ್ ರಂಗ್ ಮಲ್ಪುನ ನಮ್ಮ ಜವಾಬ್ದಾರಿ. ಮೊಬೈಲ್ ಬೊಕ್ಕ ಟೆಕ್ನಾಲಜಿದ ಜಗತ್ತ್ ಡ್ ಜೋಕುಲು ಪಿದಾಯಿ ಗೊಬ್ಬು ಗೊಬ್ಬುಲೆರ್ದ್ ದೂರ ಆಪುನ ಪೊರ್ತುಡು ಇಂಚಿನ ಉಪಕ್ರಮಲು ಜೋಕುಲೆನ್ ಪ್ರಕೃತಿದೊಟ್ಟು ಸೇರಾವುಂಡು ಪಂಡೆರ್.
ಕಾರ್ಯಕ್ರಮಡ್ ಒನ್ ಗುಡ್ ಸ್ಟೆಪ್ ಬೆಂಗಳೂರುದ ನಿರ್ದೇಶೆಕೆರ್ ಭಾಸ್ಕರ್ ಸಿಎನ್, ಯೋಜನಾ ನಿರ್ದೇಶಕಿ ಕು. ಅಲ್ಕ ಪೈ, ಶ್ರೀ ಶಾರದಾ ಸೊಸೈಟಿದ ಕೋಶಾಧಿಕಾರಿ ಭುವನಾಭಿರಾಮ ಉಡುಪ ಕೆ, ನಿರ್ದೇಶೆಕೆರ್ ಸುರೇಶ್ ರಾವ್ ನೀರಳಿಕೆ, ಶಿಕ್ಷಕರಕ್ಷಕ ಸಂಘದ ಅಧ್ಯಕ್ಷೆರ್ ಸುಮನ ಉಪಸ್ಥಿತರಿತ್ತೆರ್.
ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು ಪ್ರಾಸ್ತಾವಿಕ ಪಾತೆರದೊಟ್ಟು ಎದ್ಕೊಂಡೆರ್, ಪ್ರಾಚಾರ್ಯ ಜಿತೇಂದ್ರ ವಿ ರಾವ್ ಹೆಜಮಾಡಿ ಸೊಲ್ಮೆ ಸಂದಾಯ ಮಲ್ತೆರ್, ಸಹ ಶಿಕ್ಷಕಿ ಅಮಿತಾ ಕುಮಾರಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.
ಬೊಲ್ತೇರ್ಡ್ ಸಿರಿ ಕೇಂದ್ರ ಕಚೇರಿ ಆವರಣಡ್ ಕೆನರಾ ಬ್ಯಾಂಕ್ ಪೊಸ ಎ.ಟಿ.ಎಂ ಉದಿಪನ – ಭವೇಂದ್ರ ಕುಮಾರ್ ಉದಿಪನ ಮಲ್ತ್ದ್, ಸ್ಥಳೀಯ ನಿವಾಸಿಲೆಗ್ ಬೊಕ್ಕ ಸಿರಿ ಸಿಬ್ಬಂದಿಲೆಗ್ ಹಿತದೃಷ್ಟಿಡ್ ಸೇವೆ ಆರಂಭ.
ಲ್ತೇರ್ : ಶ್ರೀ ಧರ್ಮಸ್ಥಳ ಸಿರಿ ಗ್ರಾಮೋದ್ಯೋಗ ಸಂಸ್ಥೆದ ಕೇಂದ್ರ ಕಚೇರಿ ಆವರಣಡ್ ಕೆನರಾ ಬ್ಯಾಂಕ್ ಸ್ಥಾಪನೆ ಮಲ್ದಿನ ಪೊಸ ಎ.ಟಿ.ಎಂದ ಉದಿಪನದ ಲೇಸ್ ನ.5 ಗುರುವಾರ ನಡತ್ಂಡ್.
ಕೆನರಾ ಬ್ಯಾಂಕ್ ಕಾರ್ಯ ನಿರ್ವಾಹಕ ನಿರ್ದೇಶಕೆರಾಯಿನ ಭವೇಂದ್ರ ಕುಮಾರ್ ಪೊಸ ಎ.ಟಿ.ಎಂ ಕೇಂದ್ರನ್ ಉದಿಪನ ಮಲ್ತ್ದ್ ಎಡ್ಡೆಪ್ಪು ಬಯಕಿಯೆರ್.
ಸಿರಿ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರಾಯಿನ ಕೆ.ಎನ್ ಜನಾರ್ಧನ್ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸ್ದ್ ಪಾತೆರ್ದ್ ಸಿರಿ ಅಧ್ಯಕ್ಷೆರ್, ಧರ್ಮಸ್ಥಳ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಅಂಚೆನೆ ಮಾತೃಶ್ರೀ ಹೇಮಾವತಿ ವೀ. ಹೆಗ್ಗಡೆರೆನ ಆಶಯದಂಚ ಸಿರಿ ಸಂಸ್ಥೆಡ್ ಕೆಕಸ ಮಲ್ಪುನ ಸಾರಸಾರ ಸಿಬ್ಬಂದಿಲೆಗ್ ಅಂಚೆನೆ ಬೆಳ್ತಂಗಡಿ–ರೆಂಕೆದಗುತ್ತು-ಗೇರುಕಟ್ಟೆ-ಉಪ್ಪಿನಂಗಡಿ ಮಾರ್ಗವಾದ್ ಸಂಚಾರ ಮಲ್ಪುನ ಗಾಡಿದಕ್ಲೆಗ್, ಸ್ಥಳೀಯ ನಿವಾಸಿಲೆಗ್ ದುಡ್ಡು ವೈವಾಟ್ ಮಲ್ಪರೆ ಸಹಕಾರಿ ಆಪುನ ಹಿತದೃಷ್ಠಿಡ್, ಸಿರಿ ಕೇಂದ್ರ ಕಚೇರಿದ ಜಾಲ್ಡ್ ಒಂಜಿ ಎ.ಟಿ.ಎಂ ಕೇಂದ್ರ ಸ್ಥಾಪನೆ ಮಲ್ಪರೆ ಕೆನರಾ ಬ್ಯಾಂಕ್ ಮುಖ್ಯಸ್ಥೆರೆಡ ವಿನಂತಿ ಮಲ್ತಿ ಪೆಟ್ಟಿಗೆ ಪೊರ್ಲುದ ಎ.ಟಿ.ಎಂ ಮಲ್ತ್ ಕೊರ್ತೆರ್. ಈ ಎ.ಟಿ.ಎಂ ಸೇವೆನ್ ಉಪಯೋಗ ಮಲ್ಪುನ ಒಟ್ಟುಗು ಕೆನರಾ ಬ್ಯಾಂಕ್ ವತಿರ್ದ್ ಗ್ರಾಹಕೆರೆಗ್ ಆರ್ಥಿಕ ಭದ್ರತೆ, ಆರೋಗ್ಯ ಭದ್ರತೆ ಕೊರೊಂದುಂಡು ಪಂದ್ ಪಂಡೆರ್.
ಈ ಸಂದರ್ಭಡ್ ಕೆನರಾ ಬ್ಯಾಂಕ್ ಮಂಗಳೂರು ಸರ್ಕಲ್ ಆಪೀಸ್ ಜನರಲ್ ಮ್ಯಾನೇಜರ್ ಮಂಜುನಾಥ್ ಸಿಂಗೈ, ಬೆಂಗಳೂರು ಬ್ರಾಂಚ್ದ ಚೀಫ್ ಜನರಲ್ ಮ್ಯಾನೇಜರ್ ಶಂಭುಲಾಲ್, ಪುತ್ತೂರು ಬ್ರಾಂಚ್ ರಿಜೀನಲ್ ಆಫೀಸ್ ಅಸಿಸ್ಟೆಂಟ್ ಜನರಲ್ ಮ್ಯಾನೇಜರ್ ರಂಜನ್ ಕುಮಾರ್, ಬೆಳ್ತಂಗಡಿ ಬ್ರಾಂಚ್ ಸೀನಿಯರ್ ಮ್ಯಾನೇಜರ್ ಪ್ರತಾಪ್, ಮಂಗಳೂರು ಬ್ರಾಂಚ್ ಸರ್ಕಲ್ ಆಫೀಸ್ ಅಸಿಸ್ಟೆಂಟ್ ಜನರಲ್ ಮ್ಯಾನೇಜರ್ ನರೇಶ್, ಪುತ್ತೂರು ಡಿವಿಜಿನಲ್ ಮ್ಯಾನೇಜರ್ ಅಜಿತ್ ಕುಮಾರ್, ರುಡ್ ಸೆಟ್ ಎಕ್ಸಿಕ್ಯುಟಿವ್ ಡೈರೆಕ್ಟರ್ ವಿಜಯ್ ಕುಮಾರ್, ರುಡ್ ಸೆಟ್ ನಿರ್ದೇಶಕೆರಾಯಿನ ಅಜಯ್, ಪುತ್ತೂರು ರೀಜನಲ್ ಆಫೀಸ್ ಮಾರ್ಕೆಟಿಂಗ್ ಮ್ಯಾನೇಜರ್ ಹರೀಶ್ ನಾಯ್ಕ್, ಸಿರಿ ಸಂಸ್ಥೆದ ಮುಖ್ಯ ನಿರ್ವಹಣಾಧಿಕಾರಿ ಪ್ರಸನ್ನ, ರಾಜೇಶ್ ಪೈ, ಸಿರಿ ಸಂಸ್ಥೆದ ವಿವಿಧ ವಿಭಾಗದ ಮೇಲಾಧಿಕಾರಿಲು, ಮೇಲ್ವಿಚಾರಕೆರ್ ಅಂಚೆನೆ ಸಿಬ್ಬಂದಿವರ್ಗದಕುಲು ಲೇಸ್ ಡ್ ಪಾಲ್ ಪಡರದಿತ್ತೆರ್.
ಸಹಕಾರ ಕ್ಷೇತ್ರಡ್ ವಿಶಿಷ್ಟ ಸಾಧಕೆರೆಗ್ ಮಾನ್ಯತೆ – ತುಳುನಾಡ ರಕ್ಷಣಾ ವೇದಿಕೆ ಬೊಕ್ಕ ತುಳುನಾಡ ಸೂರ್ಯ ಪತ್ರಿಕಾ ಸಂಸ್ಥೆರ್ “ತೌಳವ ಸಹಕಾರ ಮಾಣಿಕ್ಯ” ಮತ್ “ತೌಳವ ಸಹಕಾರ ರತ್ನ” ಪ್ರಶಸ್ತಿ ಘೋಷಣೆ ಮಲ್ಪುನಾ ಕಾರ್ಯಕ್ರಮ.
ಕುಡ್ಲ : ತುಳುನಾಡ ರಕ್ಷಣಾ ವೇದಿಕೆ ಅಂಚೆನೆ ತುಳುನಾಡ ಸೂರ್ಯ ಪತ್ರಿಕಾ ಸಂಸ್ಥೆದ ನಿರೆಲ್ಡ್ ಉರ್ವ ಸ್ಟೋರ್ ಕೈತಲ್ದ ತುಳು ಭವನಡ್ ನ. 16 ತಾರೀಕ್ಗ್ ನಡಪುನ “ಸಹಕಾರ ಸಪ್ತಾಹ” ಲೇಸ್ಡ್ ಸಹಕಾರ ಕ್ಷೇತ್ರಡ್ ವಿಶಿಷ್ಟ ಸೇವೆ ಸಂದಾಯಿನ ಸಾಧಕೆರೆನ್ ನಾಡ್ಪತ್ದ್ ಮಾನಾದಿಗೆ ಮಲ್ಪರೆ ಉಂಡು.
ಸಹಕಾರ ಕ್ಷೇತ್ರಡ್ ಅಸಾಧಾರಣ ಸೇವೆ ಬೊಕ್ಕ ಸಾಧನೆ ಮಲ್ದಿನಕ್ಲೆಗ್ “ತೌಳವ ಸಹಕಾರ ಮಾಣಿಕ್ಯ ಪ್ರಶಸ್ತಿ” ಅಂಚೆನೆ “ತೌಳವ ಸಹಕಾರ ರತ್ನ ಪ್ರಶಸ್ತಿ” ಕೊರ್ದು ಸನ್ಮಾನ ಮಲ್ಪರೆ ಉಂಡು. ಅಯಿತೊಟ್ಟುಗೆ ಬೇತೆ ಬೇತೆ ಕ್ಷೇತ್ರಡ್ ಸೇವೆ ಸಂದಾವುನ ಸಾಧಕೆರೆಗ್ಲ ಸನ್ಮಾನ ನಡಪರೆ ಉಂಡು.
ಅಂಚಾದ್ ಆಸಕ್ತೆರ್ ಬೊಕ್ಕ ಅರ್ಹ ವ್ಯಕ್ತಿಲೆನ ಪುದರ್, ಪತ್ತೆ ಬೊಕ್ಕ ವೈಯಕ್ತಿಕ ವಿವರನ್ ನವೆಂಬರ್ 10 ಸೋಮವಾರರ್ದ್ ಕಡಪುಡ್ದು ಕೊರ್ರೆ ವಿನಂತಿ ಮಲ್ದೆರ್. ಶಿಫಾರಸು ಬತ್ತಿನಕ್ಲೆನ ಪೈಕಿ ಆಯ್ಕೆ ಮಲ್ತ್ದ್ ಪ್ರಶಸ್ತಿ ಮತ್ತು ಸನ್ಮಾನಗ್ ಆಯ್ಕೆ ಮಲ್ಪುವ. ಅರ್ಜಿ ಕಡಪಾವರೆ ಅಕೇರಿದ ದಿನ 10-11-2025.
ಎಚ್ಚ ಪೊಲಬು ಬೋಡಾಂಡ ತುಳುನಾಡ ರಕ್ಷಣಾ ವೇದಿಕೆ ಅತ್ತ್ಡ ತುಳುನಾಡ ಸೂರ್ಯ ಪ್ರತಿಕೆ ಕಚೇರಿದ 9019501165 , 6362876286 ನಂಬರ್ಗ್ ಫೋನ್ ಮಲ್ಪೊಲಿ ಪಂದ್ ವೇದಿಕೆದ ಸ್ಥಾಪಕ ಅಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜಪ್ಪು ಪ್ರಕಟಣೆಡ್ ತೆರಿಪಾದೆರ್.
