ಕೆ.ಕೆ ಗಟ್ಟಿ ನಾಟಕಡ್ ಸಾಮಾಜಿಕ ಮೌಲ್ಯ : ಶರವು ರಾಘವೇಂದ್ರ ಶಾಸ್ತ್ರಿ

ಕೆ.ಕೆ ಗಟ್ಟಿಗ್ ತುಳು ಅಕಾಡೆಮಿ ಚಾವಡಿ ತಮ್ಮನ

ಕುಡ್ಲ : ಕೆ.ಕೆ ಗಟ್ಟಿ ಮೆರೆನ ನಾಟಕಡ್ ಎಡ್ಡೆ ಸಾಮಾಜಿಕ ಮೌಲ್ಯದ ಸಂದೇಶ ಉಂಡು. ಆರ್ ಕೆಲವು ಪೊಸ ಕಲಾವಿದೆರೆನ್ ರಂಗಗ್ ಕನದೆರ್. ಅರವಿಂದ ಬೋಳಾರ್ ನಂಚಿನ ಪ್ರಸಿದ್ಧ ನಟೆರೆನ್ ರಂಗಭೂಮಿಗ್ ಕನತಿನ ಹೆಗ್ಗಳಿಕೆ ಕೆ.ಕೆ. ಗಟ್ಟಿ ಮೇರ್ನವು ಪಂದ್ ಶ್ರೀ ಕ್ಷೇತ್ರ ಶರವು ಮಹಾಗಣಪತಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಬೊಕ್ಕ ಪ್ರಧಾನ ಅರ್ಚಕೆರಾದ್ ಶರವು ರಾಘವೇಂದ್ರ ಶಾಸ್ತ್ರಿ ತೆರಿಪಾಯೆರ್.
ಆರ್ ಶ್ರೀ ಶರವು ಮಹಾಗಣಪತಿ ದೇವಸ್ಥಾನದ ಸಭಾಂಗಣಡ್ ಆಯೋಜನೆ ಮಲ್ದಿನ ಕಾರ್ಯಕ್ರಮಡ್ ನಾಟಕಕಾರೆರ್ ಕೆ.ಕೆ.ಗಟ್ಟಿ ಮೆರೆಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಚಾವಡಿ ತಮ್ಮನ ಗೌರವ ಪ್ರದಾನ ಮಲ್ತ್‌ದ್ ಪಾತೆರಿಯೆರ್.
ಕೆ.ಕೆ. ಗಟ್ಟಿ ಎನ್ನ ಗುರು : ಅರವಿಂದ ಬೋಳಾರ್
ಸಮಾರಂಭಡ್ ಖ್ಯಾತ ನಟ ಅರವಿಂದ ಬೋಳಾರ್ ಪಾತೆರ್ದ್,ಯಾನ್ ರಂಗಭೂಮಿಡ್ ಪ್ರಸಿದ್ಧಿ ಪಡೆಯರೆ ಮೂಲ ಕಾರಣ ಶ್ರೀ ಶರವು ಕ್ಷೇತ್ರ ಬೊಕ್ಕ ಉಂದುವೇ ಕ್ಷೇತ್ರಡ್ ಎನನ್ ನಾಟಕರಂಗಗ್ ಪರಿಚಯ ಮಲ್ದಿನಾರ್ ಕೆ.ಕೆ.ಗಟ್ಟಿ ಎನ್ನ ರಂಗಭೂಮಿದ ಸುರುತ್ತ ಗುರು ಪಂದ್ ಪಂಡೆರ್.
ಕಾರ್ಯಕ್ರಮದ ಅಧ್ಯಕ್ಷತೆನ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷೆರ್ ತಾರಾನಾಥ ಗಟ್ಟಿ ಕಾಪಿಕಾಡ್ ಪಾತೆರ್ದ್, 49 ವರ್ಷದ ಪಿರವುಡು ಶ್ರೀ ಸೋಮನಾಥ ಕಲಾ ಭೂಮಿ ರಂಗಸಂಸ್ಥೆ ಸುರು ಮಲ್ತ್‌ದ್ 50 ಗುಲ ಹೆಚ್ಚ ನಾಟಕಲೆನ್ ಬರೆದ್ ನಿರ್ದೇಶನ ಮಲ್ದಿನ ಕೆ.ಕೆ ಗಟ್ಟಿ ಮೆರೆನ ರಂಗಭೂಮಿ ಸೇವೆ ಅನನ್ಯವಾಯಿನವು ಪಂದ್ ತೆರಿಪಾಯೆರ್.
ಅಖಿಲ ಭಾರತ ತುಳು ಒಕ್ಕೂಟದ ಅಧ್ಯಕ್ಷೆರ್ ಎ. ಸಿ ಭಂಡಾರಿ, ಶ್ರೀ ಸೋಮನಾಥ ಸೇವಾ ಸಮಿತಿದ ಅಧ್ಯಕ್ಷೆರ್ ಜಯರಾಮ ಗಟ್ಟಿ ಪಿಲಾರ್ ಪಾತೆರ್ದ್ ಎಡ್ಡೆಪ್ಪು ಬಯಕಿಯೆರ್.
ರಂಗ ನಿರ್ದೇಶಕ ಜಗನ್ ಪವಾರ್ ಬೇಕಲ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಕಲಾವಿದ ವಸಂತ ರೈ ಬಿ.ಕೆ ಸ್ವಾಗತ ಮಲ್ತ್‌ದ್ ಸೊಲ್ಮೆ ಸಂದಾಯೆರ್.