ಒಡಿಪುದ ಅಷ್ಟಮಠೊಟ್ ಒಂಜಾಯಿನ ಶ್ರೀ ಪುತ್ತಿಗೆ ಮಠದ ಸ್ವಾಮೀಜಿಲಾಯಿನ ಶ್ರೀ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿಲು ಅರೆನ ವಿಶ್ವ ಗೀತಾ ಪರ್ಯಾಯಡ್ ಮಾತಾ ಭಾಷೆದ ಲಿಪಿಟ್ ಭಗವದ್ಗೀತೆ ಬರೆಪಿನ ಸಂಕಲ್ಪ ಮಲ್ದಿತ್ತುದ್ ಅಯಿತ್ತ ಯಜ್ಞದ ಭಾಗವಾದ್ ಕೋಟಿ ಗೀತಾ ಲೇಖನ ಯಜ್ಞ ಪಂಡುದ್ ಪುದರ್ ಕೊರ್ತೆರ್.ಆ ನಿಟ್ಟುಡ್ ತುಳುನಾಡು ಡ್ ತುಳುಭಾಷೆದ ಲಿಪಿಟ್ ಲಾ ಭಗವದ್ಗೀತೆ ಬರೆಯೊಡ್ ಪನ್ಪಿನ ಉದ್ದೇಶೊಡ್ ಜೈ ತುಳುನಾಡ್ ಸಂಘಟನೆ ಅಟ್ಟಣೆ ಮಲ್ದಿತ್ತುದ್ ಇದಮುಟ ಸುಮಾರ್ 200 ಕ್ ಲಾ ಜಾಸ್ತಿ ಜನ ತುಳುಲಿಪಿಟ್ ಭಗವದ್ಗೀತೆ ನ್ ಬರೆತೆರ್.ಅವ್ವೆನ್ ಒಡಿಪುದ ಕೃಷ್ಣ ಗ್ ಸಮರ್ಪಣೆ ಮಲ್ಪುನ ಒಂಜಿ ವಿಶೇಷ ಕಜ್ಜೊ ಉಂದುವೇ ಬರ್ಪಿನ ನವೆಂಬರ್ 16 ತಾರೀಕು ಗ್ ಬಾರಿ ಗೌಜಿಡ್ ನಡಪರೆಗುಂಡ್ ಪಂಡುದ್ ಕೋಟಿ ಗೀತಾ ಲೇಖನ ಯಜ್ಞದ ಪೂರ್ಣಾವಧಿ ಪ್ರಚಾರಕೆರಾಯಿನ ಶ್ರೀ ಕೆ.ವಿ.ರಮಣಾಚಾರ್ಯೆರ್ ತೆರಿಪಾಯೆರ್.ಆರು ಒಡಿಪುದ ಪ್ರೆಸ್ ಕ್ಲಬ್ ಡ್ ನಡತಿನ ಪತ್ರಿಕಾ ಗೋಷ್ಠಿಡ್ ಪಾತೆರಿಯೆರ್.ಪುತ್ತಿಗೆ ಸ್ವಾಮೀಜಿಲೆನ ಕೋಟಿ ಗೀತಾ ಲೇಖನ ಯಜ್ಞೊಡ್ ವಿಶ್ವದ ಮಾತಾ ಕಡೇಟುಲಾ ಬಾರೀ ಪ್ರಶಂಸೆನ್ ಪಡೆದಿತ್ತುದ್ ಇತ್ತೆ ತುಲು ಲಿಪಿಟ್ ಬರೆದ್ ಸಮರ್ಪಣೆ ಮಲ್ಪುನ ಕಜ್ಜೊ ಉಂದುವೇ ಬರ್ಪಿನ ನವೆಂಬರ್ 16 ತಾರೀಕುಗ್ ಐತಾರದಾನಿ ನಡಪುನ ಕಜ್ಜೊಡ್ ಹೆಚ್ಚಿನ ತುಳುವೆರ್ ಪಾಲ್ ಪಡೆದ್ ಶ್ರೀ ಕೃಷ್ಣನ ಅನುಗ್ರಹ ಕ್ ಪಾತ್ರರಾವೊಡ್ ಪಂಡೆರ್.
ಈ ಪತ್ರಿಕಾಗೋಷ್ಠಿಡ್ ಜೈ ತುಲುನಾಡ್ ಒಡಿಪು ಎಗ್ಗೆದ ಗುರ್ಕಾರ್ಲು ಸುಶೀಲ ಜಯಕರ್, ಜೈ ತುಳುನಾಡ್ ಕೇಂದ್ರ ಸಮಿತದ ಸಂಘಟನಾ ಕಾರ್ಯಂತೆರ್ ಸಂತೋಷ್ ಕಟಪಾಡಿ, ಒಡಿಪು ಎಗ್ಗೆದ ಒತ್ತು ಗುರ್ಕಾರ್ಲು ಕಿನ್ನು ಒಡಿಪು, ಒಡಿಪು ಎಗ್ಗೆದ ಒತ್ತು ಕಾರ್ಯಂತೆರ್, ಒಡಿಪು ಎಗ್ಗೆದ ಪಣವುದ ಪಾಲವೆರ್ ಸುಪ್ರಿಯಾ ಅಖಿಲೀಶ್ ದೇವಾಡಿಗ ಬೊಕ್ಕ ಸಂಘಟನೆದ ಪದುಕೆರ್ ಪಾಲ್ ಪಡೆದಿತ್ತೆರ್