ಲೇಸ್

ಕರಾವಳಿ ಚಿತ್ರಕಲಾ ಚಾವಡಿದ ಒಟ್ಟು ಸೇರಿಗೆಡ್ ‘ಚಿತ್ರ ಸಂಜೆ’ ಲೇಸ್

ಕುಡ್ಲ ಎಪ್ರಿಲ್ 06: ಕರಾವಳಿ ಚಿತ್ರಕಲಾ ಚಾವಡಿದ ಒಟ್ಟು ಸೇರಿಗೆಡ್ ‘ಚಿತ್ರ ಸಂಜೆ’ ಲೇಸ್ ಪೇಂಟೆದ ಕೊಡಿಯಾಲ್ಗುತ್ತು ಕಲಾ ಸಂಸ್ಕೃತಿ ಕೇಂದ್ರಡ್ ನಡತ್oಡ್.

ಚಾವಡಿದ ಗುರ್ಕಾರ್ಲಾಯಿನ ಗಣೇಶ ಸೋಮಯಾಜಿ ಲೇಸ್ ಉದಿಪನ ಮಲ್ತೆರ್.ಸದಸ್ಯೆರ್ ಅಕ್ಲೆನ ನೂತನ ಕಲಾಕೃತಿನ್ ತೋಜಾಯೆರ್ .

ವೀರರಾಣಿ ಅಬ್ಬಕ್ಕ ರಾಷ್ಟ್ರೀಯ ಪ್ರತಿಷ್ಠಾನದ ಕಾರ್ಯದರ್ಶಿ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ ಪಾತೆರ್ದ್ ‘ಕುಂಚ ಕಲಾವಿದೆರ್ ಸಂಘಟನಾತ್ಮಕವಾದ್ ಒಟ್ಟು ಸೇರ್ದ್ ಸೃಜನಾತ್ಮಕ ಕಲೆಗಾರಿಕೆಡ್ ಉಪ್ಪುನವು ಉತ್ತಮ ಬೆಳವಣಿಗೆ. ನೆರ್ದಾವರ ಎಲ್ಯ ಕಲಾವಿದೆರೆಗ್ ಮಾರ್ಗದರ್ಶನ ತಿಕ್ಕುನೆ ಅತ್ತoದೆ ಚಿತ್ರರಚನೆಡ್ ಪೊಸ ಕೌಶಲ್ಯ ರೂಡಿಸಾಯರೇ ಪ್ರೇರಣೆ ತಿಕ್ಕುಂಡು ಪಂದ್ ಪಂಡೆರ್.

“ಶ್ರೀರಾಮ ನೃತ್ಯ ನಮನ” ಲೇಸ್

ಕುಡ್ಲ, ಮಾರ್ಚ್ 30: ಬೆಂಗಳೂರುದ ಪ್ರತಿಷ್ಟಿತ ಕಲಾ ಸಂಸ್ಥೆ ಇಂಟರ್‌ನ್ಯಾಶನಲ್ ಆರ್ಟ್ಸ್ ಎಂಡ್ ಕಲ್ಚರಲ್ ಫೌಂಡೇಶನ್ ವತಿರ್ದ್ ಸಂಸ್ಕೃತಿ ಸಚಿವಾಲಯ ಭಾರತ ಸರಕಾರ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಕರ್ನಾಟಕ ಸರಕಾರ ಮೆಕ್ಲೆನ ಒಟ್ಟು ಸೇರಿಗೆಡ್ ಖ್ಯಾತ ಕಲಾ ಪ್ರವರ್ತಕ, ಛಾಯಾಗ್ರಾಹಕ, ಬಹುಮುಖ ಪ್ರತಿಭೆ ಶ್ರೀವತ್ಸ ಶಾಂಡಿಲ್ಯ ಮೆರ್ನ ಮುತಾಲಿಕೆಡ್ “ಶ್ರೀರಾಮ ನೃತ್ಯ ನಮನ” ಲೇಸ್ ಕುಡ್ಲದ ಕುದ್ಮುಲ್ ರಂಗರಾವ್ ಪುರಭವನಡ್ ಐತಾರ ನಡತ್oಡ್.

ಆರ್ ಎಸ್ ಎಸ್ ಪ್ರಚಾರಕೆರಾಯಿನ ವಿಕ್ರಮ ವಾರ ಪತ್ರಿಕೆದ ಸಂಪಾದಕೆರಾಯಿನ ನಾ.ನಾಗರಾಜ್ ಲೇಸ್ ದ ಉದಿಪನ ಮಲ್ತೆರ್. ಬಿನ್ನೆರ್ ಆದ್ ಎಬಿವಿಪಿದ ಕುಡ್ಲ ವಿಭಾಗ ಸಂಘಟನಾ ಕಾರ್ಯದರ್ಶಿ ಬಸವೇಶ್ ಪಾಲ್ ಪಡೆದಿತ್ತೆರ್ .

ಕರ್ನಾಟಕ ಕಲಾಶ್ರೀ ವಿದ್ವಾನ್ ಕೆ. ಚಂದ್ರಶೇಖರ್ ನಾವಡ, ವಿದೂಷಿ ಪ್ರತಿಮಾ ಶ್ರೀಧರ್, ವಿದೂಷಿ ಸೌಮ್ಯ ಸುಧೀಂದ್ರ ರಾವ್, ವಿದೂಷಿ ಡಾ.ಶ್ರೀವಿದ್ಯಾ ಮುರಳಿಧರ್, ವಿದೂಷಿ ಶಾರದಾ ಮಣಿ ಶೇಖರ್, ವಿದೂಷಿ ಶ್ರೀಲತಾ ನಾಗರಾಜ್, ವಿದೂಷಿ ವಿದ್ಯಾಶ್ರೀ ರಾಧಕೃಷ್ಣ, ವಿದೂಷಿ ಸುಮಂಗಲಾ ರತ್ನಾಕರ್ ರಾವ್ ಪಾಲ್ ಪಡೆದಿತ್ತೆರ್

ಇಂಟರ್‌ನ್ಯಾಶನಲ್ ಆರ್ಟ್ಸ್ ಎಂಡ್ ಕಲ್ಚರಲ್ ಫೌಂಡೇಶನ್ ಬೆಂಗಳೂರುದ ನಿರ್ದೇಶಕರಾಯಿನ ಶ್ರೀವತ್ಸ ಶಾಂಡಿಲ್ಯ ಎದುಕೊಂಡೆರ್.ಲೇಸ್ ಡ್ ಎನ್ಮ ಪ್ರಸಿದ್ಧ ನೃತ್ಯ ಕೂಟ ರಾಮಾಯಣದ ಎನ್ಮ ಸನ್ನಿವೇಶದ ಬಗ್ಗೆ ನೃತ್ಯ ಪ್ರದರ್ಶನ ಕೊರಿಯೆರ್ . ನಾಲ್ ಬೇತೆ ಕೂಟಲು ರಾಮ ಕೀರ್ತನೆ, ರಾಮ ಗೀತೆ‌, ಭಜನೆ ನಡಪಾದ್ ಕೊರಿಯೆರ್ . ಸುಮಾರ್ ನೂದೆರ್ದ್ ಜಾಸ್ತಿ ನೃತ್ಯ ಕಲಾವಿದೆರ್, ಪದ ಪನ್ಪಿನಕುಲು ಶ್ರೀರಾಮನ ಚಿಂತನ-ಮಂಥನ ಕಲಾ ಪ್ರದರ್ಶನ ಕೊರಿಯೆರ್ . ಶ್ರೀಮತಿ ಮಂಜುಳಾ. ಪಿ. ಶೆಟ್ಟಿ ಲೇಸ್ ದ ನಿರೂಪಣೆ ಮಲ್ತೆರ್ .

“ಜಿನರಾತ್ರಿ ಉತ್ಸವ”: ವೃಷಭನಾಥ ಚರಿತಂ ಕಥಾಮೃತ ಲೇಸ್

ಕುಡ್ಲ ಮಾರ್ಚ್ 13: ಕಡಲ ಪುಡೆತ ಮಹಾ ನಗರಿ ಕುಡ್ಲಡ್ ವೀರ ರಾಣಿ ಅಬ್ಬಕ್ಕ ಜೈನ ಮಹಿಳಾ ಸಂಘ ಮುತಾಲಿಕೆದ ಬಜಿಲಕೇರಿ ಭ.ಆದೀಶ್ವರ ಸ್ವಾಮಿ ಬಸದಿ  ಕುಡ್ಲ ಮುಲ್ಪ ನಡಪುನ “ಜಿನರಾತ್ರಿ ಉತ್ಸವ” ವೃಷಭನಾಥ ಚರಿತಂ ಕಥಾಮೃತ ಲೇಸ್ ತಾರೀಖ್ 11 -3 -2021 ದಾನಿ ಬೈಯ್ಯ 7 ಗಂಟೆಗ್ ಬಾರಿ ಗೌಜಿ ಡ್ ನಡತ್oಡ್.

ಗುರ್ಕಾರ್ಲಾಯಿನ ಶ್ರೀಮತಿ ಸುಮನಾ ಪೂವಣಿ ,ಕಾರ್ಯದರ್ಶಿ ಶ್ರೀಮತಿ ಅಕ್ಷತಾ ಆದರ್ಶ್ ಬೊಕ್ಕ ಸಂಘದ ಬೇತೆ ಪದಾಧಿಕಾರಿಲು ಕುಡ್ಲ ಜೈನ್ ಮಿಲನ್ ಸದಸ್ಯೆರ್ ಪಾಲ್ ಪಡೆದ್ ಇತ್ತೆರ್.. ಶ್ರೀಮತಿ ಕೇಸರಿ ರತ್ನ ರಾಜಯ್ಯ ಮೇರ್ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆಯೆರ್.

ಕಥಾಮೃತ ಕಾರ್ಯಕ್ರಮನ್ ಸುಕುಮಾರ ಬಲ್ಲಾಳ್, ಸ್ವಾತಿ ಆಶಿಕ್ , ಶಾಶ್ವತಿ ಸಚಿನ್ ಮೆಕುಲು ನಡಪಾದ್ ಕೊರಿಯೆರ್ .ಡಾಕ್ಟರ್ ಬಾಲಿಕಾ ಪ್ರಶಾಂತ್ ಲೇಸ್ ನಡಪಾದ್ ಕೊರಿಯೆರ್.

ಸಾಂಕಿನ ನಾಯಿಲೆಗ್ ಉಚಿತ ರೇಬಿಸ್ ರೋಗ ನಿರೋಧಕ ಲಸಿಕಾ ಲೇಸ್

ದ.ಕ.ಜಿಲ್ಲಾ ಪಂಚಾಯತ್ ಪಶು ಪಾಲನಾ ಬೊಕ್ಕ ಪಶು ವೈದ್ಯಕೀಯ ಸೇವಾ ಇಲಾಖೆ ಬಂಟ್ವಾಳ,ವಾಮದಪದವು ವ್ಯವಸಾಯ ಸೇವಾ ಸಹಕಾರಿ ಸಂಘ, ಗ್ರಾಮ ಪಂಚಾಯತ್ ಚೆನ್ನೈತೋಡಿ ಮೆಕ್ಲೆನ ಒಟ್ಟು ಸೇರಿಗೆಡ್ ಚೆನ್ನತ್ತೋಡಿ ಗ್ರಾಮ ಪಂಚಾಯತ್ ವ್ಯಾಪ್ತಿದ ಬೇತೆ ಬೇತೆ ಕಡೆಟ್ ಸಾಂಕ್ ದಿನ ನಾಯಿಲೆಗ್ ಉಚಿತ ರೇಬಿಸ್ ರೋಗ ನಿರೋಧಕ ಲಸಿಕಾ ಲೇಸ್ ನ್ ತಾರೀಖ್ 12-02-2021 ನೇ ಶುಕ್ರವಾರ ನಡಪಾಯೆರ್.

ವಾಮದಪದವು ವ್ಯವಸಾಯ ಸೇವಾ ಸಹಕಾರಿ ಸಂಘದ ಗುರ್ಕಾರ್ ಲಾಯಿನ ಕಮಲ್ ಶೆಟ್ಟಿ ಬೊಳ್ಳಾಜೆ ತುಡರ್ ಅರ್ಲಾದ್ ಲೇಸ್ ನ್ ಉದಿಪನ ಮಲ್ತೆರ್.ಬಂಟ್ವಾಳ ಪಶು ವೈದ್ಯ ಸೇವಾ ಇಲಾಖೆದ ಪ್ರಭಾರ ಸಹಾಯಕ ನಿರ್ದೇಶಕರಾಯಿನ ಡಾ|| ಅವಿನಾಶ್ ಭಟ್, ಸೇವಾ ಸಹಕಾರಿ ಸಂಘದ ನಿರ್ದೇಶಕರಾಯಿನ ಯಶೋಧರ ಶೆಟ್ಟಿ, ವೆಂಕಟೇಶ್ ಭಟ್,ಸುಧೀರ್‌ಕುಮಾರ್ ಕೊರಗು , ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿ
ಆಲ್ಬರ್ಟ್ ಡಿ ಸೋಜಾ, ಗ್ರಾಮ ಪಂಚಾಯತ್ ಸದಸ್ಯೆರಾಯಿನ ವಿನೋದ್ ಸಾಲ್ಯಾನ್, ಡಾ| ಉಮೇಶ್ ಕಿರಣ್, ಜಾನುವಾರು ಅಭಿವೃದ್ಧಿ ಅಧಿಕಾರಿ ಶ್ರೀಧರ್‌ ಶೆಟ್ಟಿ, ಸಹಾಯಕ ಕಾಂತಪ್ಪ.ವಾಮದಪದವು ಪೇರ್ ಉತ್ಪಾದಕರ ಸಂಘದ ನಿರ್ದೇಶಕೆರಾಯಿನ ದಿನೇಶ್ ಸಾಲ್ಯಾನ್ ಕಾರ್ಯನಿರ್ವಹಣಾಧಿಕಾರಿ ನಾರಾಯಣ ಶೆಟ್ಟಿ ವಸಂತ ಶೆಟ್ಟಿ, ಅಕ್ಷತಾ ಪಾಲ್ ಪಡೆದಿತ್ತೆರ್.

ವಾಮದಪದವು ಪಶು ಚಿಕಿತ್ಸಾಲಯದ ಪಶು ವೈದ್ಯಾಧಿಕಾರಿ ಡಾ|| ಅಶೋಕ ಶೆಟ್ಟಿ ಎದುಕೊಂಡೆರ್ ಅಂಚನೇ ಲೇಸ್ ದ ನಿರೂಪಣೆ ಮಲ್ತ್ ದ್ ಸೊಲ್ಮೆ ಸಂದೈಯ್ತ ಮಲ್ತೆರ್.

ನನದ ಲೇಸ್ ಗ್ ಜಗದೀಶ್ ಅಧಿಕಾರಿಗ್ ಲೆಪ್ಪೋಲೆ ಕೊರ್ರೆ ಬಲ್ಲಿ ಪಂಡ್ ದ್ ಮೂಲ್ಕಿ ಬಿರುವೆರ್ನ ಸಂಘ ನಿರ್ಣಯ

ಮೂಲ್ಕಿ: ತುಳುನಾಡ್ದ ಆರಾಧ್ಯ ಶಕ್ತಿಲು ಕೋಟಿ ಚೆನ್ನಯೆರ್ ಅಂಚೆನೇ ಬಿರುವೆರ್ನ ಸಮುದಾಯದ ನಾಯಕೆರೆನ್ ನಿಂದನೆ ಮಲ್ದಿನ ಬೆದ್ರದ ಜಗದೀಶ್ ಅಧಿಕಾರಿಗ್ ಬಿರುವೆರ್ನ ಸಮಾಜದ ಪ್ರತಿಯೊರಿಲ ಅಂಚೆನೇ ಮಾತ ಬಿರುವೆರ್ನ ಸಂಘಟನೆಲು ಒವ್ವೇ ಒಂಜಿ ವ್ಯಕ್ತಿಗತ ಅತ್ತ್ ಡ ಸಾರ್ವಜನಿಕ ಸಭೆ- ಸಮಾರಂಭೊಲೆಗ್ ನನ ದುಂಬಗ್ ಲೆಪ್ಪೋಲೆ ಕೊರ್ರೆ ಬಲ್ಲಿ ಪನ್ಪಿನ ಬಾರಿ ಮಲ್ಲ ನಿರ್ಣಯೊನು ದೆತೊಂದೆರ್.

ಮೂಲ್ಕಿ ಬಿರುವೆರ್ನ ಸಮಾಜ ಸೇವಾ ಸಂಘದ ಸಭಾಂಗಣೊಡು ಐತಾರ ಸಂಘದ ಗುರ್ಕಾರ್ಲು ರಮೇಶ್ ಅಮೀನ್ ಕೊಕ್ಕರ್‌ಕಲ್ ಮೆರೆನ ಗುರ್ಕಾರ್ಮೆ ಡ್ ನಡತಿನ ಸಭೆಟ್ಟ್ ಈ ನಿರ್ಣಯ ದೆತೊಂಡೆರ್.ತುಳುನಾಡ್ದ ಸರ್ವಧರ್ಮ ದಕುಲುಲ ನಂಬೊಂದು ಬೈದಿನ ಕೋಟಿ ಚೆನ್ನಯರೆಗ್ ಗರೊಡಿ ಅಂಚೆನೆ ಬೇತೆ ದೈವ ಸಾನ್ನಿಧ್ಯದ ಒರುಟ್ಟು ವಿಶೇಷ ಮಾನಾದಿಗೆ ಕೊರೊಂದುಲ್ಲೆರ್. ಆಂಡ ಜಗದೀಶ್ ಅಧಿಕಾರಿ ಅಕ್ಲೆನ್ಲ ಅವಮಾನ ಮಲ್ದೆರ್. ಅಂಚಾದ್ ಜಗದೀಶ್ ಅಧಿಕಾರಿನ ನಿಂದನೆದ ಪಾತೆರೊನು ಮಾತೆರ್ಲ ಖಂಡಿಸಾಯೆರ್. ಆರ್ ಕೇಂಡ್ ದಿನ ಕ್ಷಮೆ ಕಾಲ್ಪನಿಕ ಬೊಕ್ಕ ಆಧಾರದಾಂತಿನವು. ಮನಸ್ಸ್ ಡ್ ದುಷ್ಟ ಬುದ್ದಿ ದೀದ್ ಏರ್ನನಾ ಒತ್ತಾಯೊಗು ಬಗ್ಗ್ ದ್ ಕ್ಷಮೆ ಕೇಂಡೆರ್ಡಲ ಸಮಾಜ ಅರೆನ್ ಕ್ಷಮಿಸುಜಿ.
ಸಭೆತ್ತ ನಿರ್ಣಯದಂಚ ಜಗದೀಶ್ ಅಧಿಕಾರಿನ್ ಸಮಾಜದಕುಲು ಏರ್ಲಾ ಲೆಪ್ಪರೆ ಬಲ್ಲಿ ಪನ್ಪಿನ ನಿರ್ಣಯೊನು ಪಾಲನೆ ಮಲ್ಪೊಡು. ಜಗತ್ತ್ ದ ಮಾತ ಬಿರುವೆರ್ನ ಸಂಘಟನೆಲು ಉಂದೆಕ್ಜ್ ಬಲ ಕೊರೊಡು ಪಂಡ್ ದ್ ಮಾತ ಬಿರುವೆರ್ನ ಸಂಘದಕ್ಲೆನ ಒಕ್ಕೂಟ ಆಯಿನ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲೊಗು ಬಿನ್ನೈತ ಮಲ್ಪರೆ ನಿರ್ಣಯ ಮಲ್ತೆರ್. ಸಮಾಜೊಡು ತಪ್ಪು ಸಂದೇಶ ಕೊರ್ಪಿನ ಅಂಚೆನೆ ಉದ್ಧಟತನ ತೋಜಾಯಿನ ಅಧಿಕಾರಿನ್ ರಾಜಕೀಯ ಪಕ್ಷೊರ್ದು ಶಾಶ್ವತವಾದ್ ನಿವೃತ್ತಿ ಮಲ್ಪಾವೊಡು ಪಂಡ್ ದ್ ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್‌ಕುಮಾರ್ ಕಟೀಲು ಅಂಚೆನೇ ಜಿಲ್ಲಾಧ್ಯಕ್ಷೆರ್ ಸುದರ್ಶನ್ ಅರೆಡ ಬಿನ್ನೈತ ಮಲ್ತ್ ದ್ ಹಕ್ಕೊತ್ತಾಯ ಮಲ್ಪುನು ಪಂಡ್ ದ್ ತೀರ್ಮಾನ ಮಲ್ತೆರ್.
ಸಭೆಟ್ಟ್ ಬಿರುವೆರ್ನ ಸಂಘದ ಮಾಜಿ ಅಧ್ಯಕ್ಷೆರ್ ಆಯಿನ ರಾಘು ಸುವರ್ಣ ಕೊಳಚಿಕಂಬಳ, ಯದೀಶ್ ಅಮೀನ್ ಕೊಕ್ಕರ್‌ಕಲ್, ಡಾ.ಹರಿಶ್ಚಂದ್ರ ಪಿ. ಸಾಲಿಯಾನ್, ಮೂಲ್ಕಿ ನಗರ ಪಂಚಾಯತ್‌ ಉಪಾಧ್ಯಕ್ಷೆರ್ ಸತೀಶ್ ಅಂಚನ್ ಬಾಳೆಹಿತ್ಲು, ಬಿರುವೆರ್ ಕುಡ್ಲದ ಮೂಲ್ಕಿ ಘಟಕದ ಅಧ್ಯಕ್ಷೆರ್ ಕಿಶೋರ್ ಸಾಲ್ಯಾನ್, ಶ್ರೀ ನಾರಾಯಣಗುರು ಸೇವಾದಳದ ಪರವಾದ್ ಉಮೇಶ್ ಮಾನಂಪಾಡಿ, ಶ್ರೀ ನಾರಾಯಣಗುರು ಮಹಿಳಾ ಮಂಡಳಿದ ಗೌರವಾಧ್ಯಕ್ಷೆ ಸರೋಜಿನಿ ಸುವರ್ಣ, ಸಾಮಾಜಿಕ ಚಿಂತಕೆರ್ ದಿನೇಶ್ ಬಪ್ಪನಾಡು ಮೊಕುಲು ಮಾತ ಪಾತೆರಿಯೆರ್.
ಸಂಘದ ಮಲ್ಲ ಕಾರ್ಯಂತೆರ್ ಕಮಲಾಕ್ಷ ಬಡುಗುಹಿತ್ಲು ನಿರ್ಣಯ ಮಂಡನೆ ಮಲ್ತ್ ದ್ ಸಭೆ ಸುಧಾರಿಕೆ ಮಲ್ತೆರ್.