ಮಲ್ತಿನ

ಆಸ್ಕರ್ ಅರೋಗ್ಯ ವಿಚಾರಣೆ ಮಲ್ತಿನ ವೀರೇಂದ್ರ ಹೆಗಡೆ ಬೊಕ ಅದಮಾರು ಶ್ರೀ

ಕುಡ್ಲ : ಪೇಂಟೆದ ಯೇನೆಪೋಯ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಉಪ್ಪುನ ಹಿರಿಯ ರಾಜಕಾರಣಿ, ರಾಜ್ಯಸಭಾ ಸದಸ್ಯ ಆಸ್ಕರ್ ಫರ್ನಾಂಡಿಸ್‌ ಮೆರೆನ್ ಶನಿವಾರ ಭೇಟಿ ಮಲ್ತಿನ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ ಮೇರ್ ಆಸ್ಕರ್ ಫರ್ನಾಂಡಿಸ್‌ ಮೆರ್ನ ಯೋಗಕ್ಷೇಮ ವಿಚಾರಣೆ ಮಲ್ತೆರ್.

ಈ ಪೊರ್ತುಡು ಮಾಜಿ ಸಚಿವ ಬಿ.ರಮಾನಾಥ ರೈ, ವಿನಯ ಕುಮಾರ್ ಸೊರಕೆ, ಪಕ್ಷದ ಮುಖಂಡೆರಾಯಿನ ಎಂ.ಎ.ಗಫೂರ್, ಶಶಿಧರ ಹೆಗ್ಡೆ ಇತ್ತೆರ್ .

ಅದಮಾರು ಶ್ರೀ ಭೇಟಿ: ಪರ್ಯಾಯ ಅದಮಾರು ಮಠದ ಪೆರಿಯ ಯತಿಲಾಯಿನ ವಿಶ್ವಪ್ರಿಯ ತೀರ್ಥರು ಶನಿವಾರ ಆಸ್ಪತ್ರೆಗ್ ಭೇಟಿ ಕೊರಿಯೆರ್ .

ಮೂಡುಬಿದಿರೆ: ಮೆಗಾ ಲಸಿಕಾ ಅಭಿಯಾನನ್ ಉದಿಪನ ಮಲ್ತಿನ ಶಾಸಕ ಉಮಾನಾಥ ಕೋಟ್ಯಾನ್

ಮೂಡುಬಿದಿರೆ, ಜೂನ್ 21: ಮುಲ್ಪದ ಸಮುದಾಯ ಆರೋಗ್ಯ ಕೇಂದ್ರಡ್ ನಡತಿನ ಕೊರೊನಾ ಮೆಗಾ ವ್ಯಾಕ್ಸೀನ್ ಡ್ರೈವ್ ಗ್ ಶಾಸಕ ಉಮಾನಾಥ ಕೋಟ್ಯಾನ್ ಉದಿಪನ ಮಲ್ತೆರ್.ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಮೇರ್ ಘೋಷಣೆ ಮಲ್ತಿನ ಪ್ರಕಾರ ಮಾತೆರೆಗ್ಲಾ ಉಚಿತವಾದ್ ಲಸಿಕೆ ಕೊರ್ಪಿನ ಪ್ರಕ್ರಿಯೆ ಜು. 21ರ್ದ್ ಸುರು ಆಯೆರೆ ಉಂಡು . ಖಾಸಗಿಯಾದ್ ರೂ. 150 ಶುಲ್ಕಡ್ ಈ ಲಸಿಕೆ ಪಡೆಯೋಲಿ . ಮಾತೆರ್ಲ ಈ ಲಸಿಕೆ ಪಡೆದ್ ಭಾರತನ್ ಕೊರೊನ ಮುಕ್ತ ದೇಶ ಮಲ್ಪುನಲ್ಪ ಪ್ರಾಮಾಣಿಕವಾದ್ ಬೇಲೆ ಮಲ್ಪೊಡು ಪಂದ್ ಪಂಡೆರ್.

ತಹಶೀಲ್ದಾರ್ ಪುಟ್ಟರಾಜು, ಪುರಸಭಾ ಗುರ್ಲಾಯಿನ ಪ್ರಸಾದ್ ಕುಮಾರ್, ಸಮುದಾಯ ಆರೋಗ್ಯಕೇಂದ್ರದ ಆಡಳಿತ ವೈದ್ಯಾಧಿಕಾರಿ ಡಾ. ಶಶಿಕಲಾ,ಆರೋಗ್ಯ ರಕ್ಷಾ ಸಮಿತಿಯ ಸದಸ್ಯೆರಾಯಿನ ಎಂ. ಬಾಹುಬಲಿಪ್ರಸಾದ್, ಗೀತಾ ಆಚಾರ್ಯ, ಆರೋಗ್ಯ ಶಿಕ್ಷಣಾಧಿಕಾರಿ ಸುಶೀಲಾ, ಪ್ರಮುಖೆರಾಯಿನ ಹರೀಶ್ ಎಂ.ಕೆ, ಗಿರೀಶ್ ಕುಮಾರ್ ಪಾಲ್ ಪಡೆದಿತ್ತೆರ್ .

ಭಕ್ತೆರೆಗ್ ದರ್ಶನ ವ್ಯವಸ್ಥೆ ಮಲ್ತಿನ ದೇವಸ್ಥಾನಲೆಗ್ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿನೆರ್ದ್ ನೋಟೀಸ್

ಕುಡ್ಲ , ಜೂನ್ 20: ಲಾಕ್ ಡೌನ್ ಇತ್ತುಂಡಲ ಪೇಂಟೆದ ಕೆಲ ದೇವಸ್ಥಾನಡ್ ಭಕ್ತೆರೆಗ್ ದೇವೆರ್ನ ದರ್ಶನಗ್ ಅವಕಾಶ ಮಲ್ತಿನ ನೆಲೆಟ್ಟ್ ದೇವಸ್ಥಾನಲೆಗ್ ದ.ಕ ಜಿಲ್ಲಾಧಿಕಾರಿ ಡಾ.ಕೆ.ವಿ ರಾಜೇಂದ್ರ ನೋಟಿಸ್ ಕೊರ್ತೆರ್ .

ಶ್ರೀ ಕ್ಷೇತ್ರ ಧರ್ಮಸ್ಥಳ ಸೇರಿನಂಚ ಕೆಲ ದೇವಸ್ಥಾನಲೆಗ್ ನೋಟಿಸ್ ಕೊರ್ತೆರ್ , ಕಡ್ಡಾಯವಾದ್ ದರ್ಶನ ವ್ಯವಸ್ಥೆನ್ ಉಂತಾವೊಡು ಪಂದ್ ಸೂಚನೆ ಕೊರ್ತೆರ್ .ಆತೆ ಅತ್ತoದೆ ಬೇತೆ ಬೇತೆ ಜಿಲ್ಲೆರ್ದ್ ಬರ್ಪಿನ ಭಕ್ತೆರ್ನ ಗಾಡಿ ಸೀಜ್ ಮಲ್ಪರೆ ಜಿಲ್ಲಾಧಿಕಾರಿ ಸೂಚನೆ ಕೊರ್ತೆರ್ .ಪೆರಿಯಶಾಂತಿ, ಚಾರ್ಮಾಡಿ, ಉಜಿರೆ ಭಾಗಡ್ ಬ್ಯಾರಿಕೇಡ್ ಪಾರ್ದ್ ತಪಾಸಣೆ ಕಠಿಣ ಮಲ್ಪರೆ ಪೊಲೀಸೆರೆಗ್ ಸೂಚನೆ ಕೊರ್ತೆರ್ .