ಇಲ್ಲದ ಪಿದಯಿಡಿತ್ತಿನ ನಾಯಿ, ಇಲ್ಲದ ಉಲಯಿಡಿತ್ತಿನ ಪುಚ್ಚೆಡ ಕೇನುಂಡುಗೆ….”ಮಂಗಕ್ಕ… ಮಂಗಕ್ಕ.. ಅಟ್ಟೆಮಿ ಏಪಗೇ..?’ ಪಂದ್ ಅಯಿಕ್ ಪುಚ್ಚೆ ನೆರ್ದ್ ಪುಂಡುಗೆ ಅಟ್ಟೆಮಿ ಆಂಡ ದಾನೆ..ನಿಕ್ ಗುಂಡೆಮಿ ಆಂಡ ದಾನೆ ನಿಕ್, ಈ ಇಲ್ಲದ ಪಿದಯಿ ಉಪ್ಪುನಾ ಪಂದ್ ನಾಯಿಗ್ ಮಕ್ಕರ್ ಮಲ್ಪುಂಡುಗೆ, ಅಟ್ಟೆಮಿ ಬತ್ತಂಡ ನಾಯಿಗ್ಲಾ ಕುಸಿ, ಅಟ್ಟೆಮಿದಾನಿ ಆಂಡಲ ಮಸ್ತ್ ತಿನಿಯರೆ ತಿಕ್ಕುಂಡತ್ತ ಪಂದ್. ಇಂಚಿನ ಕತೆ ಇತ್ತೆ ಹಿರಿಯೆರ್ನಕ್ಲಗ್ ಮಾತ್ರ ಗೊತ್ತು…!
ಅಂದ್.. ಏಪದಲೆಕ್ಕ ಆಂಡ ನಮಕ್ಕೆ ಇತ್ತೆ ಅಟ್ಟೆಮಿ ಬಾರಿ ಗೌಜಿ, ಆಟಿ ಕರಿದ್ ಸೋಣ ಬತ್ತುಂಡ ಪಂಚೆಮಿ,ಅಟ್ಟೆಮಿ, ಚೌತಿ ಸೋಣ ಇಂಚ ಎಡ್ಡೆದಿನೊಕ್ಕುಲು ಸಾಲ್ ಕಟ್ಟಿದ್ ಬರ್ಪ. ಆಂಡ ಇತ್ತೆದ ಕಾಲೊಡು ಕೊರೊನಾ ಸೀಕ್ದನೇ ರಾಪಾಟ. ಸುರುವಾದ್ ರಡ್ಡ ವರ್ಸ ಆವೊಂದು ಬಂಡಲ ಅಯಿತ್ತ ಪೋಡಿಗೆ ಪೋತುಜಿ , ಅಂಚ ಪಂದ್ ತುಳುನಾಡ್ದ ಸಂಪ್ರದಾಯ, ಅಚರಣೆಲೆನ್ ಬುಡಿಯರೆ ಆಪುಂಡಾ?
ಒಡಿಪದ ಪುಣ್ಯ ಮಣ್ಣ್ ಡ್ ಸಿರಿ ಕಿಷ್ಠ ದೇವೆರ್ ಏಪ ನಿಲೆ ಆಯೆರಾ ಅವೆರ್ದ್ ಬೊಕ್ಕ ತುಳುವೆರೆಗ್ ಅಟ್ಟೆಮಿ ಗೌಜಿದ ಪರ್ಬ, ರಾತ್ರಿ ಭಜನೆ ಪಂದ್ ಜಾಗರ ಕುಲ್ಲುದು ರೋಹಿಣಿ ನಕ್ಷತೊಡು ಸಿರಿ ಕಿಷ್ಣ ದೇವೆರ್ ಪುಟ್ಟುನ ಪೊರ್ತುನು, ಪೊರ್ಲುನು ಜೋಕು ತೂವರೆ ಲಕ್ಷ ಲಕ್ಷ ಜನ ಕಾತ್ ಕುಲ್ಲುವೆರ್, ಒಡಿಪು ದಿನೊಕ್ಕು ಮಟೊ ಅತ್ತಾಂದೆ ಬಾಲೆ ಕಿಸ್ನ ದೇವೆರೆಗ್
ಆರಿಗೆ ಕೊರ್ಪಿನ ಕ್ರಮ ಮಾತ ಕಡೆಟ್ಲ ಉಂಡು. ರಾತ್ರೆ ಪದಿರಾಡ್ ಗಂಟೆಗ್ ದೂರದ ದೇವಸ್ಥಾನೊದ ಬೆಡಿ ಕೇಂಡಿ ಪೆಟ್ಟಿಗೆ ಇಲ್ಲದಕುಲು ಮಾತೆರ್ಲ ಮೋನೆ ದೆಕ್ಕದ್ ಸೇಮಯದಡ್ಡೆಲ ಪೇರ್ಲ ತಿನ್ಪಿನವು ತುಳುನಾಡ್ದ ಕಟ್ಟ್.
ಬಾಲೆ ಸಿರಿ ಕಿಷ್ಣ ದೇವೆರ್ ಪಂಡ ಜೋಕುಲಾಟಿಕೆದ ಸಾಕ್ಷಾತ್ ರೂಪ. ಪೋಕಿರಿದ ಕಾಲೊಡು – ದಿನೊಕ್ಕುಲು, ಎಲ್ಯ ಉಪ್ಪುನಗ ತುಂಟಾಟ, ಪೋಕಿರಿಲೆನ್ ನೆಂಪು ಮಲ್ತ್ ಆಚರಣೆ ಉಪ್ಪುಂಡು ಉಂದುವೇ ಮಸುಲುಡಿಕೆ. ಕನ್ನಡೊಡು ವಿಟ್ಲ ಪಿಂಡಿ ಅತ್ತುಂಡ ಶ್ರೀ ಕೃಷ್ಣ ಲೀಲೋತ್ಸವ ಪನ್ಪರ್ .
ಮದತ್ತ್ ಪೋಪುಜಿ ಮಸುಲುಡಿಕೆದ ಗೌಜಿ ಗಮತ್ತ್
ದುಂಬುದ ಕಾಲೊಡು ವಿಟ್ಲ ಪಿಂಡಿದ ದಿನತ್ತಾನಿ ಒಡಿಪುದ ಮರೊಟ್ಟು ಅತ್ತoದೆ ಬೇತೆ ಬೇತೆ ಕಡೆಟ್ ಮಸುಲುಡಿಕೆ ನಡತೊಂದಿತ್ತಂಡ್, ಅವೆತ್ತ ಉದ್ದೇಸ ಮನಸ್ಗೆ ರಂಜನೆ ಕೊರ್ಪಿನಿವು. ಆ ಕಾಲೊಡು ಇತ್ತೆದ ಲೆಕ್ಕ ಮೊಬೈಲ್, ಟಿವಿದ ಕಾಲ ಅತ್ತೆ, ಮನರಂಜನೆಗ್ ಇಂಚಿನನೇ ಕಾರ್ಯಕ್ರಮ ಉಪ್ಪುಂಡು. ಅಯಿಕ್ ಬಾರಿ ಸಂಖ್ಯೆಡ್ ಜನಸೇರೊಂದಿತ್ತೆರ್. ಬೆನ್ನಿದ ಕೆಲಸ, ಕೂಲಿ ಕೆಲಸ ಮಲ್ಕ್ ಬತ್ತಿನಕ್ಲಗ್ ಆನಿದ ದಿನೊಟ್ಟು ಮಸುಲುಡಿಕೆ ತೂದೆ ಖುಷಿ ಪಡೆವೊಂದಿತ್ತೆರ್.
ಪ್ರಾಯದಕುಲು, ಜವನೆರ್, ಜೋಕುಲು ಇಂಚ ಮಾತೆರ್ಲ ಏಸ ಪಾಡ್ದ್ ವೇದಿಕೆಗ್ ತಮಾಸೆ ಪಾತೆರ್ದಾ, ಕೋಂಗಿ ಕಟ್ಟಿದಾ, ಪದ್ಯ ಪಂದಾ, ನಾಲ್ ಜನೊಕ್ಲನ್ ತೆಲಿಪಾವೊಂದಿತ್ತೆರ್. ಪೊಂಜೊವುಲು ವೇದಿಕೆ ಬರೊಂದಿತ್ತಿಜೆರ್ಡಲ ಮಸುಲುಡಿಕೆ ತೂವರೆ ಬರೊಂದಿತ್ತೆರ್. ಪಿಲಿ, ಸಿಮ್ಮ, ಕರಡಿ, ಕರಿ ಏಸ ಇಂಚ ಮಾತಾ ರೂಪೋದಲ ಏಸ ಪಾರ್ದ್ ಮನರಂಜನೆ ಕೊರೊಂದಿತ್ತೆರ್.
ಬದಲಾವಣೆದ ಕಾಲ ಬನ್ನಗ ಮಸುಲುಡಿಕೆದ ಸುರ್ಪ ಬದಲಾಂಡ್, ಒಡಿಪುದ ಗೋಪಾಲಕೆರ್ ಪೇರ್ ಕಡ್ಯ ಪಡಪುನ ಪದ್ಧತಿ ಇಂಚ ಮಾತ ಸಾಂಪ್ರದಾಯಿಕ ಕ್ರಮೊಕ್ಕುಲು ಒರಿದ್ ಬೈದ್ಂಡ್. ಆಂಡ ಕುಡ್ಲ ತಾಲೂಕುದ ಸಸಿಹಿತ್ಲು , ತೆಲಾರಪದವು ಇಂಚಿನ ಮಾತಾ ಕೆಲವು ಕಡೆಟ್ಟ್ ಮಸುಲುಡಿಕೆ ಉಂತುದೇ ಪೋತುಂಡು, ತೊರ್ತಲ್, ಪಾವಂಜ, ಪುನರ್, ಬೆದ್ರ, ಕೊಟ್ಟಾರ, ಕದ್ರಿ ಇಂಚಿನ ಮಾತ ಕಡೆಟ್ಟ್ ಮಸುಲುಡಿಕೆ ಪೊಸ ರೂಪೊಡು ಆಚರಣೆಡ್ ಉಂಡು. ಎಂಚಿನನೇ ಆವಡ್ ತುಳುನಾಡ್ ಸಂಪ್ರದಾಯ, ಆಚರಣೆ ಆದುಪ್ಪುನ ಮಸುಲುಡಿಕೆ ಒರಿದ್ ಬರೊಡು, ನನದ ಜೋಕುಲೆಗ್ ಅಯಿತ ಪೊಲಬು ಆವೊಡು ಪನ್ನಿನವು ನಮ್ಮ ಆಸೆ.
ಬರವು : ಯಶೋಧರ ಕೋಟ್ಯಾನ್
