ಕುಡ್ಲ: ಬಂಗ್ರ ಕೂಳೂರ್ 16ನೇ ವಾರ್ಡ್ ಮೊಕ್ಲೆನ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಲುನಾಡ್ ( ರಿ. ) ಕುಡ್ಲ ಎಗ್ಗೆ ಒಟ್ಟು ಸೇರಿಗೆಡ್ ಧರ್ಮಾರ್ಥ ” ಬಲೆ ತುಲು ಲಿಪಿ ಕಲ್ಪುಗ” ಕಜ್ಜ ಕೊಟ್ಯದ ಉದಿಪನ ಲೇಸ್ ಕೋಡಿಕಲ್ದ SNDP ಮಂದಿರಡ್ 13/2/22ನೇ ಐತಾರದಾನಿ ನಡತ್ಂಡ್.
ಬಂಗ್ರ ಕೂಳೂರ್ 16ನೇ ವಾರ್ಡ್ದ ಕಾರ್ಪೊರೇಟರ್ ಬೊಕ್ಕ ಮ. ನ. ಪಾ ಸದಸ್ಯೆರ್ ಆಯಿನ ಶ್ರೀ ಕಿರಣ್ ಕುಮಾರ್ ಕೋಡಿಕಲ್ ಮೆರೆನ ಗುರ್ಕಾರ್ಮೆಡ್ ನಡತಿನ ಈ ಲೇಸ್ನ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾಲಾಯಿನ ದಯಾನಂದ ಜಿ ಕತ್ತಲ್ಸಾರ್ ತುಡರ್ ಅರ್ಲಾದ್ ಉದಿಪನ ಮಲ್ತ್ದ್, ತುಲು ಲಿಪಿಟ್ ಬರೆಪಿನ ಮುಕೇನ ಕಜ್ಯ ಕೊಟ್ಯಗ್ ಚಾಲನೆ ಕೊರ್ಯೆರ್.
ಲೇಸ್ದ ಬಗೆಟ್ ಪಾತೆರ್ನ ದಯಾನಂದ್ ಜಿ ಕತ್ತಲ್ಸಾರ್ ಶ್ರೇಷ್ಠ ಸಮಾಜ ಸುಧಾರಕೆರ್ ಮಾರ್ಗದರ್ಶಿಲು ಪೂಜ್ಯೆರ್ ಆಯಿನ ನಾರಾಯಣ ಗುರುಕುಲೆನ ಮಟ್ಟೆಲ್ಡ್ ಅವುಲಾ ಈತ್ ನೊಟ್ಟ ತುಲುನಾಡ್ದ ಒವ್ವೆ ಜನಪ್ರತಿನಿಧಿನಕುಲು ಮಲ್ಪಂದಿನ ಬೇಲೆನ್ 16ನೇ ವಾರ್ಡ್ದ್ ಪ್ರತಿನಿಧಿ ಮಲ್ತೊಂದುಪ್ಪುನ ಬಾರಿ ವಿಶೇಷ ಪಂದ್ ಕುಸಿನ್ ಪಟ್ಟಿಯೆರ್. ಅಂಚೆನೇ ನಮ್ಮ ತುಲುನಾಡ್ದ ಸಂಸ್ಕೃತಿ ಒರಿಯೊಡಾಂಡ ಬಾಸೆ ಬುಲೆಯೊಡು ಐತ ಒಟ್ಟುಗು ಲಿಪಿನ್ಲಾ ಮಾತೆರ್ಲಾ ಕಲ್ಪೊಡು ಪಂಡೆರ್. ಆಯಿನಾತ್ ಮಾತೆರ್ಲಾ ಇಲ್ಲದ ಬೊಕ ಕಛೇರಿದ ವಿಳಾಸ ಬರೆನಗ ಅಕೇರಿಡ್ ತುಲುನಾಡ್ ಸೇರಿಸಾಲೆ ಪಂದು ಲೆಪ್ಪು ಕೊರಿಯೆರ್.
ಬಾರಿ ಪುಗಾರ್ತೆದ ನಿರೂಪಕೆರಾಯಿನ ನವೀನ್ ಶೆಟ್ಟಿ ಎಡ್ಮೆಮಾರ್ ಪಾತೆರ್ದ್ ನಮ ಅವೆತೋ ತುಲು ಶಬ್ದೊಲೆನ್ ಮದತ್ದ್ ಬುಡ್ತ ಅವೆನ್ ಪೂರ ಕುಡೊರ ಕಲ್ತ್ದ್ ಗಲಸ್ಗ ಪಂಡೆರ್.
ಜೈ ತುಲುನಾಡ್ ಸಂಘಟನೆದ ದುಂಬುದ ಗುರ್ಕಾಲಾಯಿನ ಸುದರ್ಶನ್ ಸುರತ್ಕಲ್ ಪಾತೆರ್ದ್ ನಮ್ಮ ಅಪ್ಪೆ ಬಾಸೆ ಒರಿಯೊಡಾಂಡ ಐಕ್ ನನೊರಿ ದಾದ ಮಲ್ಪುವೆ ಪಂದ್ ಕಾಪುನು ಆತ್ತ್ ನಮಡ್ದ್ ದಾದ ಮಲ್ಪರೆ ಆಪುಂಡು ಅವೆನ್ ನಮ ಮಲ್ಪುಗ ಪಂದ್ ಲೆಪ್ಪು ಕೊರಿಯೆರ್.
ಕಿರಣ್ ಕುಮಾರ್ ಕೋಡಿಕಲ್ ಮೇರ್ ಪಾತೆರ್ದ್ ಸಮಾಜ ಸೇವೆ ಮಲ್ಪುನ ಎಂಕ್ಲೆಗ್ ಇಲ್ಲಡ್ದೇ ಬೈದಿನ ಪಾಠ, ತುಲು ಬಾಸೆ ಲಿಪಿ ಸಂಸ್ಕೃತಿದ ಬುಲೆಚ್ಚಿಲ್ ಗ್ ಎನಡ್ದ್ ಆಪಿನ ಪೂರ ಸಕಾಯನ್ ಕೊರ್ಪೆ ಪಂಡೆರ್.ಲೇಸ್ಡ್ ಮಾನಾದಿಗೆದ ಬಿನ್ನೆರಾದ್ ಸುಧೀಕ್ಷಾ ಕಿರಣ್ MA (ತುಳು) ಕೋಶಾಧಿಕಾರಿ ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ ಕುಡ್ಲ ಮೇರ್ ಪಾಲ್ ಪಡೆದಿತ್ತೆರ್. ಅಶ್ವಥ್ ತುಲುವೆ (ಜೈ ತುಲುನಾಡ್ ಸಂಘಟನೆದ ದುಂಬುದ ಗುರ್ಕಾಲು) ಬೊಕ್ಕ SNDP ಮಂದಿರದ ಗುರ್ಕಾರೆ ಆಯಿನ ಪುರುಷೋತ್ತಮ ಪೂಜಾರಿ ಮಾನಾದಿಗೆದ ಒತ್ತು ಪಾಲ್ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಬಂಗ್ರ ಕೂಳೂರ್ 16ನೇ ವಾರ್ಡ್ ದ ಸರ್ವ ಕಾರ್ಯಕರ್ತೆರ್, ಜೈ ತುಲುನಾಡ್ (ರಿ.) ಪದುಕೆರ್ ,ತುಲು ಲಿಪಿ ಕಲ್ಪಾದಿ ಗೀತಾ ಲಕ್ಷ್ಮೀಶ್ ಲೇಸ್ಡ್ ಪಾಲ್ ಪಡೆದಿತ್ತೆರ್. ಜೈ ತುಲುನಾಡ್ ಸಂಘಟನೆದ ಸ್ಥಾಪಕ ಸದಸ್ಯೆ ಆಯಿನ ಅವಿನಾಶ್ ಮುಕ್ಕ ಲೇಸ್ ಸುದಾರಿಕೆ ಮಲ್ತ್ದ್ ಕೊರಿಯೆರ್.ನನ ಐನ್ ಐತಾರ ಕಾಂಡೆ10 ರ್ದ್ 12 ಗಂಟೆ ಮುಟ ತುಲು ಲಿಪಿ ಕಲ್ಪಾವುನ ಕಜ್ಜ ನಡಪರೆ ಉಂಡು ಮಾತೆರ್ಲಾ ಆಯಿನಾತ್ ಸಂಕ್ಯೆಡ್ ಪಾಲ್ ಪಡೆಯೊಡು ಪಂದು ಪತ್ರಿಕಾ ಪ್ರಕಟನೆಡ್ ತೆರಿಪಾದೆರ್.
