ಕರಾಟೆ

ಕರಾಟೆ ಡ್ ಬಂಗಾರ್ದ ಪದಕ ಪಡೆಯಿನ ಕುಡ್ಲ ದ ಪೆರ್ಮೆದ ಪೊಣ್ಣು ಕುಮಾರಿ ಅಂಜಲಿ ಜೋಗಿ

ಪೊಣ್ಣುಲೆಗೆ ಆವಡ್ ಆಣುಲೆಗೆ ಆವಡ್ ಅಕ್ಲೆನ್ ಅಕುಲು ರಕ್ಷಿಸಾವುನ ಭಾರಿ ಮುಖ್ಯ ಆದುಂಡು. ಒರ್ತಿಯೇ ಅತ್ತುಂಡ ಒರಿಯೆ ಒಲ್ಲಾ ಪೋನಗ ಅತ್ತುಂಡ ಓಲ್ಆಂಡಲಾ ನಮನ್ ನಮ ರಕ್ಷಿಸಾವುನ ಸಂದರ್ಭ ಬರ್ಪುಂಡು ಪಂದೆ ಪೋಷಕೆರ್ ಅಕ್ಲೆನ ಜೋಕ್ಲೆಗ್ , ಕರಾಟೆ, ಮಾರ್ಷಲ್ ಆರ್ಟ್ಸ್​ ನಂಚಿನ ವಿದ್ಯೆಲೆನ್ ಕಲ್ಪಾದ್ ಅಕ್ಲೆನ್ ಸಭಲೆರ್ ನಾದ್ ಮಲ್ಪುವೆರ್.ಆಂಡ ಕೆಲವೆರ್ ಮಾತ್ರ ಅಕ್ಲೆನ ಪೊಣ್ಣು ಜೋಕುಲುಲಾ ಇಂಚಿನ ವಿದ್ಯೆ ಕಲ್ಪಡ್ ಪಂದ್ ಅಕ್ಲೆಗ್ ಅಂಚಿನ ವಿದ್ಯೆ ಕಲ್ಪಾವೆರ್.

ಅಂದ್ ತನ್ನ ಪೊಣ್ಣು ಮಗಲ್ ಲಾ ಕರಾಟೆ, ಮಾರ್ಷಲ್ ಆರ್ಟ್ಸ್ ಕಲ್ಪೊಡು ಪಂದ್ ತನ್ನ ಮಗಲೆಗ್ ಬೆರಿ ಬೊಟ್ಟುದು ಪ್ರೋತ್ಸಾಹ ಕೊರಿನಕುಲು ಕುಡ್ಲದ ವಾಮಂಜೂರು ಮೂಡುಶೆಡ್ಡೆದ ಕೃಷ್ಣ ಜೋಗಿ ಬೊಕ್ಕ ಸುಮನ ದಂಪತಿಲು. ತನ್ನ ಕಡೀರ್ದ ಮಗಲಾಯಿನ ಕುಮಾರಿ ಅಂಜಲಿ.ಕೆ.ಜೋಗಿ ಮೆರೆಗ್ ಕಿನ್ಯ ಪ್ರಾಯೋಡೆ ಕರಾಟೆ ಕಲ್ಪಾದ್ ಇತ್ತೆ ಆರ್ ರಾಜ್ಯ ಮಟ್ಟೊಡು ಬಂಗಾರ್ದ ಪದಕ ಗೆಂದ್ದ್ ಕುಡ್ಲದ ಪೆರ್ಮೆಗ್ ಪೊಸ ಪೊಲಬು ಕೊರ್ತೆರ್.

ತಾನ್ ನಾಲನೇ ತರಗತಿದ ವಿದ್ಯಾಭ್ಯಾಸ ಮಲ್ತೊಂದು ಉಪ್ಪುನಗನೆ ಕುಡ್ಲದ ಇನ್ಸ್ಟಿಟ್ಯೂಟ್ ಆಫ್ ಕರಾಟೆ ಆಂಡ್ ಮಾರ್ಷಲ್ ಆರ್ಟ್ಸ್ ( IKMA) ಮುಲ್ಪ ನಿತಿನ್.ಎನ್. ಸುವರ್ಣ ಮೇರ್ಡ ಕರಾಟೆ ಕಲ್ಪರೆ ಸುರು ಮಲ್ತಿನ ಕುಮಾರಿ. ಅಂಜಲಿ ನ್ಯಾಷನಲ್ ಲೆವೆಲ್ ಡ್ ಮೂಜಿ ಸಲ ಗೊಬ್ಬುದು ಬಂಗಾರ್ದ ಪದಕ ಗೆಂದ್ ದ್ ತನ್ನ ಚಾತುರ್ಪುನು ತೋಜಾದೆರ್. ಶುಭೋದಯ ವಿದ್ಯಾಲಯ ಡ್ ತನ್ನ ಪ್ರಾಥಮಿಕ ಶಿಕ್ಷಣನ್ ಮಲ್ತಿನ ಮೇರ್ ತನ್ನ ಉನ್ನತ ವ್ಯಾಸಂಗನ್ ಪೇಂಟೆದ ಶಕ್ತಿ ಪದವಿ ಪೂರ್ವ ಕಾಲೇಜ್ ಡ್ ಮಲ್ತ್ದ್ ತನ್ನ ವಿದ್ಯಾ ಸಂಸ್ಥೆದ ಪುದರ್ನ್ ಬಾನೆತ್ತರಗ್ ಕಂದೆರ್. ಕರಾಟೆ ಮಾತ್ರ ಅತ್ತಂದೆ ಸಂಗೀತ ಕ್ಷೇತ್ರಡ್ ಲಾ ತನ್ನ ಚಾತುರ್ಪುನು ಮೆರೆಪಾದೆರ್. ವಾಮಂಜೂರ್ ದ ಮಮತಾರಾಮ್ ಮೆರೆಡ ಸಂಗೀತ ಅಭ್ಯಾಸ ನ್ ಲಾ ಮಲ್ತೊಂದು ಉಲ್ಲೆರ್.

ಎಲ್ಯ ಪ್ರಾಯೋಡೆ ತಿಕ್ಕಿನ ಬೆರಿ ಸಹಾಯ ,ಮಾರ್ಗದರ್ಶನ , ತರಬೇತಿ ಅಪ್ಪ – ಅಮ್ಮ ನ ಅಂಚನೇ ಕುಟುಂಬದ ಬೆರಿ ಸಾಯ ತನ್ನ ಈ ಸಾಧನೆದ ಪಿರವು ಉಪ್ಪುನ ಬೆರಿಸಹಾಯ ಪಂದ್ ಅಂಜಲಿ ಪನ್ಪೆರ್.

ಪ್ರಸ್ತುತ ಶಕ್ತಿ ಪದವಿ ಪೂರ್ವ ಕಾಲೇಜ್ ಡ್ ವ್ಯಾಸಂಗ ಮಲ್ಪುನ ಮೆರೆಗ್ ಇತ್ತೆ ಅವ್ವೆತೋ ಪದಕೊಲು ಕೈ ಸೇರ್ದುಂಡು. ಆತೇ ಅತ್ತಂದೆ ಕರಾಟೆ ಕ್ಷೇತ್ರಡ್ ನನಾತ್ ಸಾಧನೆ ಮಲ್ಪುನ ಛಲನ್ ಕೈ ಬುಡಂದೆ , ಉನ್ನತ ಶಿಕ್ಷಣ ಪಡೆದ್ ಎಡ್ಡೆ ವೃತ್ತಿ ಜೀವನ ನಡಪಾವೊಡು ಪಂದ್ ಆಸೆ ದೀತೆರ್.

ಕುಮಾರಿ. ಅಂಜಲಿ ಜೋಗಿ 2016 ನೇ ಇಸವಿಡ್ ಉತ್ತರ ಪ್ರದೇಶದ ಮೀರತ್ ಡ್ ನಡತಿನ ನ್ಯಾಷನಲ್ ಲೆವೆಲ್ ಕರಾಟೆ ಚಾಂಪಿಯನ್ ಶಿಪ್, 2016-17 ನೇ ಇಸವಿಡ್ ಮಧ್ಯ ಪ್ರದೇಶದ ಇಂಡೋರ್ ಡ್ ನಡತಿನ SGFI ( ಸ್ಕೂಲ್ ಗೇಮ್ಸ್ ಫೆಡರೇಷನ್ ಆಫ್ ಇಂಡಿಯಾ ) ಒಟ್ಟು ಸೇರಿಗೆಡ್ ನಡತಿನ ಚಾಂಪಿಯನ್ ಶಿಪ್,2018 ನೇ ಇಸವಿಡ್ ಮಧ್ಯ ಪ್ರದೇಶದ ದೇವಸ್ ಡ್ ನಡತಿನ ನ್ಯಾಷನಲ್ ಲೆವೆಲ್ ಕರಾಟೆ ಚಾಂಪಿಯನ್ ಶಿಪ್, ಅಂಚನೇ 2019-20 ನೇ ಇಸವಿಡ್ ಮಧ್ಯ ಪ್ರದೇಶದ ಜಬಲ್ ಪುರ್ ಡ್ ನಡತಿನ 65ನೇ ನ್ಯಾಷನಲ್ ಸ್ಕೂಲ್ ಗೇಮ್ಸ್ ಕರಾಟೆ ಚಾಂಪಿಯನ್ ಶಿಪ್ ಡ್ ಪಾಲ್ ಪಡೆತೆರ್.
ಒವ್ವೆ ಕ್ಷೇತ್ರ ಆವಡ್, ಒವು ವಿಭಾಗನೇ ಆವಡ್, ಜೀವನೊಡು ದಾಲ ಸಾಧನೆ ಮಲ್ಪುವೆ ಪನ್ಪಿನ ಅಚಲವಾಯಿನ ಛಲ ಇತ್ತುಂಡ ಒವುಲಾ ಅಸಾಧ್ಯ ಅತ್ತ್ ಪನ್ಪಿನೆನ್ ಕುಮಾರಿ ಅಂಜಲಿ ಕೆ ಜೋಗಿ ಮೆರೆನ ಸಾಧನೆ ತೋಜಾವುಂಡು.

ಇಂಚಿನ ಪ್ರತಿಭೆಲೆನ ಪ್ರೋತ್ಸಾಹಗ್ ನನಾತ್ ಸಂಘ ಸಂಸ್ಥೆಲು , ವ್ಯಕ್ತಿಲು ದುಂಬು ಬರಡ್. ಎಲ್ಯ ಪ್ರಾಯೋಡೆ ಪ್ರತಿಭೆಲೆನ ಪ್ರದರ್ಶನಗ್ ಸೂಕ್ತ ಮಾರ್ಗದರ್ಶನ ಬೊಕ್ಕ ವೇದಿಕೆ ತಿಕ್ಕಡ್ ಪ್ರತಿಭೆಲೆನ ಸಾಧನೆದ ಸಾದಿ ಸುಗಮ ಆವಡ್ ಪಂದ್ ಎಡ್ಡೆಪ್ಪುನು ಬಯಕ್ ಗ.

✍🏻 : ಶ್ರೀನಿಧಿ ಶೆಟ್ಟಿ