ಒಡಿಪು

ದೇರಾಜೆಬೆಟ್ಟ ಕ್ಷೇತ್ರ: ಪುನರ್‌ ಪ್ರತಿಷ್ಠೆ : ಇನಿರ್ದ್ ಬ್ರಹ್ಮ ಕುಂಭಾಭಿಷೇಕ

ಬೊಲ್ತೆರ್ : ಪಶ್ಚಿಮಘಟ್ಟದ ನೆಲೆಟ್ಟ್ ಪಚ್ಚೆ ಪಜಿರ್ದ ಐಸಿರೊಡು ನಡುಟು ಮೆನ್ಕೊಂದು ಉಪ್ಪುನ ಕ್ಷೇತ್ರ ಮರೋಡಿ ದೇರಾಜೆಬೆಟ್ಟ ದೈವ– ಕೊಡಮಣಿತ್ತಾಯ ದೈವಸ್ಥಾನ. 800 ವರ್ಷದ ಪರಪೋಕು ಉಪ್ಪುನ ಕ್ಷೇತ್ರ 250 ವರ್ಷದ ಪಿರವು ಪಾಳು ಬೂರ್ದು ಇತ್ತುಂಡು . ಭಕ್ತೆರ್ನ ಸಾಕಾರೊಡು ₹ 30 ಲಕ್ಷರ್ದ್ ಜಾಸ್ತಿ ಪಣವುಡು ಕ್ಷೇತ್ರ ಭವ್ಯವಾದ್ ಜೀರ್ಣೋದ್ಧಾರ ಆದ್ , ಬ್ರಹ್ಮ ಕುಂಭಾಭಿಷೇಕಗ್ ತಯಾರ್ ಆದ್ ಉಂಡು .

ಮರೋಡಿ ಗ್ರಾಮೊಡು ಇತ್ತೇ ಪರ್ವದ ಗೌಜಿ ಅವ್ವೆತೋ ಭಕ್ತೆರ್ ಪ್ರತಿನಿತ್ಯ ಶ್ರಮದಾನಡ್ ಪಾಲ್ ಪಡೆದ್ ತನ್ನನೇ ಆಯಿನ ಸೇವೆನ್ ಮಲ್ತೊಂದು ಉಲ್ಲೆರ್ . ಕ್ಷೇತ್ರೊಡು ಮಾಮಲ್ಲ ಚಪ್ಪರ ಬಾರಿ ಪೊರ್ಲುಡು ಕಟ್ಟ್ ದೆರ್ . ಪ್ರಮುಖ ಮಾರ್ಗಡ್ ಸ್ವಾಗತ ಕಮಾನುಲೆನ್ , ಬಂಟಿಂಗ್ಸ್‌, ಫ್ಲೆಕ್ಸ್‌, ಬ್ಯಾನರ್‌ಲೆನ್ ಭಕ್ತೆರೆನ್ , ಗಣ್ಯೆರೆನ್ ಕೈ ಬೀಜಾದ್ ಲೆತ್ತೊಂದು ಉಂಡು . ಬೇತೆ ಬೇತೆ ಸಮಿತಿದ ಪದಾಧಿಕಾರಿಲು , ಸದಸ್ಯೆರ್ ತನ್ನ ಜವಾಬ್ದಾರಿನ್ ಅಚ್ಚುಕಟ್ಟಾದ್ ಬೇಲೆ ಮಲ್ತೊಂದು ಉಲ್ಲೆರ್ .

ಜೀರ್ಣೋದ್ಧಾರ ಸಂಕಲ್ಪ: ಮರೋಡಿ ಪೊಸರಡ್ಕ ದೈವ ಕೊಡಮಣಿತ್ತಾಯ ಬೊಕ್ಕ ಬೈದರ್ಕಳ ಗರಡಿ ಜೀರ್ಣಾವಸ್ಥೆಡ್ ಉಂಡು , ಅವೆನ್ ಜೀರ್ಣೋದ್ಧಾರ ಮಲ್ಪುನ ಸಂಕಲ್ಪದೊಟ್ಟುಗು ಭಕ್ತೆರ್ನ ಸಮ್ಮುಖಡ್ ಅಷ್ಟಮಂಗಳ, ಆರೂಢಪ್ರಶ್ನೆ ಮಲ್ತ್ ಇತ್ತೆರ್ . ಐರ್ದ್ ದುಂಬು ದೇರಾಜೆಬೆಟ್ಟದ ದೈವಸ್ಥಾನ ಕಟ್ಟ್ ದ್ , ನೇಮೋಚ್ಚಯರ್ದ್ ಬೊಕ್ಕ ಪೊಸರಡ್ಕ ಕ್ಷೇತ್ರನ್ ಜೀರ್ಣೋದ್ಧಾರ ಮಲ್ಪೊಡು ಪಂದ್ ಪ್ರಶ್ನೆಡ್ ಗೋಚರವಾಯಿಲಕ ದೇರಾಜೆಬೆಟ್ಟ ಕ್ಷೇತ್ರನ್ ಜೀರ್ಣೋದ್ಧಾರ ಮಲ್ದೆರ್ .

ಇನಿತ ಲೇಸ್ :
ದೈವದ ಪುನರ್ ಪ್ರತಿಷ್ಠೆ, 108 ಕಲಶ ಸಹಿತ ಬ್ರಹ್ಮ ಕುಂಭಾಭಿಷೇಕ ಬೊಕ್ಕ ನೇಮೋಚ್ಚಯ ಫೆ.19, 20 ಗ್ ಕೇಳ ಅನಂತ ಆಸ್ರಣ್ನೆರ್ಣ ಪೌರೋಹಿತ್ಯಡ್ ನಡಪರೇ ಉಂಡು. 19 ಗ್ ದೇವತಾ ಪ್ರಾರ್ಥನೆ, ತೋರಣ ಮಹೂರ್ತ, ಉಗ್ರಾಣ ಮಹೂರ್ತ, ಹೊರಕಾಣಿಕೆ ಸಮರ್ಪಣೆ, ಮರೋಡಿ ಶಾಂತಿನಗರ ಅರುಣೋದಯ ಮಂದಿರದಿಂದ ಪುದೆಕಾಣಿಕೆ ಮೆರವಣಿಗೆ ನಡಪರೇ ಉಂಡು . 20 ಗ್ ದೈವ ಬೊಕ್ಕ ಕೊಡಮಣಿತ್ತಾಯ ದೈವದ ಮಂಚ ಪ್ರತಿಷ್ಠಾಪನೆ, ಕಲಶಾಭಿಷೇಕ, ಪರ್ವ ಸಂಕ್ರಾಂತಿ, ದರ್ಶನ, ಸಂಜೆ ಭಂಡಾರ ಆಗಮನ, ರಾತ್ರಿ ದೈವ ಕೊಡಮಣಿತ್ತಾಯ ದೈವದ ನೇಮೋಚ್ಚಯ ನಡಪರೇ ಉಂಡು .

20 ತಾರೀಖ್ ಗ್ ಕಾಂಡೆ 11.30ಕ್ ಅಳದಂಗಡಿ ಅರಮನೆದ ಪದ್ಮಪ್ರಸಾದ್ ಅಜಿಲ ಮೆರೆನ ಗುರ್ಕಾರ್ಮೆಡ್ ಸಭಾ ಕಾರ್ಯಕ್ರಮ ನಡಪೆರೆ ಉಂಡು . ಶಾಸಕ ಹರೀಶ್ ಪೂಂಜ, ವಿಧಾನ ಪರಿಷತ್ ಸದಸ್ಯ ಕೆ. ಹರೀಶ್ ಕುಮಾರ್, ಆಳ್ವಾಸ್ ಶಿಕ್ಷಣ ಸಂಸ್ಥೆದ ಗುರ್ಕಾರ್ಲಾಯಿನ ಡಾ.ಎಂ.ಮೋಹನ್ ಆಳ್ವ, ಜಿಲ್ಲಾ ಧಾರ್ಮಿಕ ಪರಿಷತ್‌ದ ಸದಸ್ಯ ದೇವೇಂದ್ರ ಹೆಗ್ಡೆ, ಮರೋಡಿ ಗ್ರಾಮ ಪಂಚಾಯಿತಿ ಗುರ್ಕಾರ್ಲಾಯಿನ ಪದ್ಮಶ್ರೀ ಜೈನ್ ಪಾಲ್ ಪಡೆಯೆರೆ ಉಲ್ಲೆರ್ . ರಾತ್ರಿ 8ಕ್ ಬ್ರಹ್ಮ ಕುಂಭಾಭಿಷೇಕ ಸಮಿತಿ ಗುರ್ಕಾರ್ಲಾಯಿನ ಕೆ. ಹೇಮರಾಜ್ ಬೆಳ್ಳಿಬೀಡು ಗುರ್ಕಾರ್ಮೆಡ್ ಧಾರ್ಮಿಕ ಸಭೆ ನಡಪರೇ ಉಂಡು . ಕಟೀಲ್ದ ಪ್ರಧಾನ ಅರ್ಚಕೆರಾಯಿನ ಅನಂತ ಪದ್ಮನಾಭ ಅಸ್ರಣ್ಣೆರ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್ . ಬೆಳ್ತಂಗಡಿ ಬೆಸ್ಟ್ ಫೌಂಡೇಷನ್‌ದ ಗುರ್ಕಾರ್ಲಾಯಿನ ರಕ್ಷಿತ್ ಶಿವರಾಂ, ಅಳಗಂಗಡಿ ಸತ್ಯದೇವತಾ ದೈವಸ್ಥಾನದ ಆಡಳಿತ ಮೊಕ್ತೇಸರ ಶಿವಪ್ರಸಾದ್ ಅಜಿಲ ಪಾಲ್ ಪಡೆಯೆರೆ ಉಲ್ಲೆರ್ . ಹೈಕೋರ್ಟ್‌ ವಕೀಲ ಪ್ರಜ್ವಲ್‌ ಬಂಗೇರ ಧಾರ್ಮಿಕ ಉಪನ್ಯಾಸ ಕೊರಿಯೆರೆ ಉಲ್ಲೆರ್ .