ಒಡಿಪು ಪುತ್ತೂರು ಬೊಲ್ತೆರ್

ಸಪ್ಟೆಂಬರ್ಡ್ ಜೋಕ್ಲೆಗ್ ಕೋವಿಡ್ ಲಸಿಕೆ : ಡಾ. ಪ್ರಿಯಾ ಅಬ್ರಾಹಮ್ 

ನವದೆಹಲಿ : ಜೋಕ್ಲೆಗಾದ್ ಕೋವಿಡ್ ಸೋಂಕುದ ಲಸಿಕೆ ಸಪ್ಟೆಂಬರ್ ಬೊಕ್ಕ ಡಿಸೆಂಬರ್ ಡ್ ಬಳಕೆಗ್ ಬರು ಪಂದ್ ಐಸಿಎಂಆರ್ ದ ನ್ಯಾಶನಲ್ ಇನ್ ಸ್ಟಿಟ್ಯೂಟ್ ಆಫ್ ವೈರಾಲಜಿದ ನಿರ್ದೇಶಕಿ ಡಾ. ಪ್ರಿಯಾ ಅಬ್ರಾಹಮ್ ಪಂಡೆರ್ .

ವಿಜ್ಞಾನ ಬೊಕ್ಕ ತಂತ್ರಜ್ಞಾನ ಇಲಾಖೆದ ಒಟಿಟಿ ಚಾನೆಲ್ ಡ್ ನಡತಿನ ಸಂದರ್ಶನಡ್ ಪಾಲ್ ಪಡೆದ್ ಪಾತೆರಿನ ಆರ್ , 2 ರ್ದ್ 18 ವರ್ಷದ ಉಲಯಿದ ಜೋಕ್ಲೆಗಾದ್ ಕೋವ್ಯಾಕ್ಸಿನ್ ಲಸಿಕೆದ ರಡ್ಡ ನೇ ಬೊಕ್ಕ ಮೂಜನೇ ಹಂತದ ಪ್ರಾಯೋಗಿಕ ಪರೀಕ್ಷೆ ನಡತೊಂದು ಉಂಡು. ಆಯಿನಾತ್ ಬೆಗೋಡೆ ಫಲಿತಾಂಶನ್ ನಿರೀಕ್ಷೆ ಮಲ್ಪೊಲಿ ಪಂದ್ ಪಂಡೆರ್.

ಆಗಸ್ಟ್ 20 ತಾರೀಖ್ ರ್ದ್ ವಾರಾಂತ್ಯ ಕರ್ಫ್ಯೂ : ಡಾ.ರಾಜೇಂದ್ರ

ಕುಡ್ಲ : ಕುಡ್ಲಡ್ ಕೊರೋನ ಪ್ರಕರಣನ್ ಕಮ್ಮಿ ಮಲ್ಪುನ ನೆಲೆಟ್ಟ್ ಈ ಸಲಲ (ಆ.21,22) ವಾರಾಂತ್ಯ ಕರ್ಫ್ಯೂ ಜಾರಿ ಮಲ್ದಾ ಪಂದ್ ದ.ಕ.ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ. ಪಂಡೆರ್ .ಆ.20 ನೇ ಶುಕ್ರವಾರ ರಾತ್ರಿ 9ರಲ್ ಗಂಟೆರ್ದ್ ಸುರು ಆಪಿನ ವೀಕೆಂಡ್ ಕರ್ಫ್ಯೂ ಆ.23 ನೇ ಸೋಮವಾರ ಕಾಂಡೆ 5 ಗಂಟೆ ಮುಟ ಜಾರಿಡ್ ಉಪ್ಪುಂಡು .

ಆ.21ನೇ ಶನಿವಾರ ಬೊಕ್ಕ ಆ.22ನೇ ಐತಾರ ಮಧ್ಯಾಹ್ನ 2 ಗಂಟೆ ಮುಟ ಅಗತ್ಯ ವಸ್ತು ದೆತೊನೆರೆ ಅವಕಾಶ ಉಂಡು .

ಈ ಪೊರ್ತುಡು ಅಂಗಡಿ ದೆಪ್ಪೋಲಿ, ಮಾರ್ಗದ ಬರಿಟ್ ಬೇರ ಮಲ್ಪುನಕ್ಲೆಗ್ ಅವಕಾಶ ಉಂಡು . ರೆಸ್ಟೋರೆಂಟ್, ಹೊಟೇಲ್‌ಡ್ ಕಾಲಿ ಪಾರ್ಸಲ್‌ಗ್ ಮಾತ್ರ ಅವಕಾಶ ಕೊರ್ತೆರ್ ಪಂದ್ ಜಿಲ್ಲಾಧಿಕಾರಿ ಪಂಡೆರ್.

ಅಫ್ಘಾನಿಸ್ತಾನ : ಭಾರತದೋಟ್ಟುಗು ಆಮದು, ರಫ್ತ್ತು ಬೇರ ಉಂತಾಯಿನ ತಾಲಿಬಾನ್

ನವದೆಹಲಿ: ಅಫ್ಘಾನಿಸ್ತಾನನ್ ತಾಲಿಬಾನ್ ದಕುಲು ವಶಕ್ ದೆತೊನಿ ಬೊಕ್ಕ ಭಾರತದ ಒಟ್ಟುಗು ಇತ್ತಿನ ಆಮದು ಬೊಕ್ಕ ರಫ್ತು ಬೇರನ್ ಉಂತಾದೆರ್. ಐತಾರ ತಾಲಿಬಾನ್ ಅಫ್ಘಾನಿಸ್ತಾನದ ಆಡಳಿತನ್ ತನ್ನ ವಶಕ್ ಪಡೆದ್ ಇತ್ತುಂಡು ಅಫ್ಘಾನ್ ಗುರ್ಕಾರ್ಲಾಯಿನ ಅಶ್ರಫ್ ಘನಿ ದೇಶ ಬುರ್ದು ಬಲ್ತೆರ್.

ಫೆಡರೇಶನ್ ಆಫ್ ಇಂಡಿಯನ್ ಎಕ್ಸ್ ಪೋರ್ಟ್ ಆರ್ಗನೈಜೆಷನ್ ದ ಡೈರೆಕ್ಟರ್ ಜನರಲ್ (ಎಫ್ ಐಇಒ) ಡಾ. ಅಜಯ್ ಸಹಾಯ್ ಮೆರ್ನ ಮಾಹಿತಿ ಪ್ರಕಾರ, ಪಾಕಿಸ್ತಾನದ ಮುಖೇನ ಪೋಪಿನ ಸರಕು ಸಾಗಣೆನ್ ತಾಲಿಬಾನ್ ರದ್ದು ಮಲ್ದುಂಡು .

ವಿಧಾನ ಮಂಡಲ ಅಧಿವೇಶನ ತಾರೀಖ್ ನಿಗದಿ : ಸಂಪುಟ ಸಭೆಟ್ ತೀರ್ಮಾನ

ಬೆಂಗ್ಳೂರು: ಪೊಸ ಸಚಿವೆರೆಗ್ ಖಾತೆ ಪಟ್ಟಿ ಬೊಕ್ಕ ಗುರುವಾರ ಸುರುತ ಸಲ ಸಚಿವ ಸಂಪುಟ ಸಭೆ ನಡತುಂಡು . ಈ ಪೊರ್ತುಡು ವಿಧಾನ ಮಂಡಲ ಅಧಿವೇಶನ ತಾರೀಖ್ ನಿಗದಿ ಮಲ್ದೆರ್ .

ಸೆಪ್ಟೆಂಬರ್ 13 ರ್ದ್ 10 ದಿನತ ಕಾಲ ಬೆಂಗ್ಳೂರುಡು ವಿಧಾನ ಮಂಡಲ ಅಧಿವೇಶನ ನಡಪಾಯೆರೆ ಸಂಪುಟ ಸಭೆಟ್ ತೀರ್ಮಾನ ಮಲ್ದೆರ್ .ಆಯಿನಾತ್ ಬೆಗೋಡೆ ವಿಧಾನಮಂಡಲ ಅಧಿವೇಶನ ಲಿಪ್ಪರೆ ವಿಪಕ್ಷಲು ಒತ್ತಡ ಪಾರ್ದ್ ಇತ್ತುಂಡು . ಬೆಳಗಾವಿದ ಸುವರ್ಣಸೌಧಡ್ ಅಧಿವೇಶನ ನಡಪಾವೊಡು ಪಂದ್ ಸೊರ ಲಕ್ಕಿನ ಕೇಂದ್ ಬತ್ತುಂಡು.

ತುಲು ಭಾಷೆಗ್ ರಾಜ್ಯಡ್ ಅಧಿಕೃತ ಮಾನದಿಗೆ ಕೊರೊಡು ಪಂದ್ ಶೋಭಾ ಕರಂದ್ಲಾಜೆಗ್ ಬಿನ್ನಾಪು ಮಲ್ತಿನ ಜೈ ತುಲುನಾಡ್ (ರಿ) ಸಂಘಟನೆ ಒಡಿಪು ಎಗ್ಗೆ

ಒಡಿಪು : ಅಂಬಲಪಾಡಿ ಕಾರ್ತಿಕ್ ಹೋಟೆಲ್‌ಡ್ ನಡತಿನ ಪತ್ರಿಕಾಗೋಷ್ಠಿಡ್ ಜೈ ತುಲುನಾಡ್ (ರಿ) ಸಂಘಟನೆದ ಪರವಾದ್ ಸದಸ್ಯೆರಾಯಿನ ಅಕ್ಷತಾ ಕುಲಾಲ್ ಮೆರೆರ್ದ್ ಕೇಂದ್ರ ಕೃಷಿ ಸಚಿವೆಯಾಯಿನ ಶೋಭಾ ಕರಂದ್ಲಾಜೆ ಮೆರೆಗ್ ತುಲು ಭಾಷೆಗೆ ಕರ್ನಾಟಕ ರಾಜ್ಯಡ್ ಅಧಿಕೃತ ಮಾನದಿಗೆ ಕೊರೊಡು ಅಂಚನೇ ಈ ವಿಷಯನ್ ಆರ್ಟಿಕಲ್ 347 ಪ್ರಕಾರ ಸನ್ಮಾನ್ಯ ರಾಷ್ಟ್ರಪತಿಲೆನ ಗಮನಗ್ ಕನವೊಡು ಪಂದ್ ಬಿನ್ನಾಪು ಮಲ್ತೆರ್ .

ಈ ಪೊರ್ತುಡು ಸಂಘಟನೆದಕ್ಲೆಗ್ ಶೋಭಾ ಕರಂದ್ಲಾಜೆ ಸಕಾರಾತ್ಮಕ ಪ್ರತಿಕ್ರಿಯೆ ಕೊರಿಯೆರ್ .ಅಂಚನೇ ರಘುಪತಿ ಭಟ್ ತುಲು ಭಾಷೆ ರಾಜ್ಯದ ಅಧಿಕೃತ ಭಾಷೆಯಾವೊಡು ಪಂದ್ ಪಂಡೆರ್. ಈ ಪೊರ್ತುಡು ಬಿಜೆಪಿ ಹಿಂದುಳಿದ ವರ್ಗದ ಮೋರ್ಚಾದ ರಾಷ್ಟ್ರೀಯ ಪ್ರಧಾನ ಕಾರ್ಯಂತೆರ್ ಆಯಿನ ಶ್ರೀ ಯಶ್‌ಪಾಲ್ ಎ ಸುವರ್ಣ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಸದಸ್ಯೆರಾಯಿನ ತಾರಾ ಉಮೇಶ್ ಆಚಾರ್ಯ, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರ ಕುಡ್ಲ ನೆತ್ತ ಸದಸ್ಯೆರಾಯಿನ ಕೇಸರಿ ಯುವರಾಜ್, ಜೈ ತುಲುನಾಡ್ (ರಿ) ಸಂಘಟನೆದ ತುಲು ಲಿಪಿ ಮೇಲ್ವಿಚಾರಕೆರಾಯಿನ ಶರತ್ ಕೊಡವೂರು ಬೊಕ್ಕ ನಗರ ಬಿ.ಜೆ.ಪಿ ಉಪಾಧ್ಯಕ್ಷೆ ಸರೋಜ ಶೆಣೈ, ಜಿಲ್ಲಾ ಬಿ.ಜೆ.ಪಿ. ಮಹಿಳಾ ಮೋರ್ಚಾ ಗುರ್ಕಾರ್ಲಾಯಿನ ವೀಣಿ ಎಸ್ ಶೆಟ್ಟಿ, ಜೈ ತುಲುನಾಡ್ (ರಿ) ಸಂಘಟನೆದ ಸದಸ್ಯೆರಾಯಿನ ಸಂತೋಷ್ ಎಸ್ ಎನ್ , ತುಲು ಲಿಪಿ ಶಿಕ್ಷಕಿಯೆರಾಯಿನ ಸ್ವಾತಿ ಸುವರ್ಣ, ಶಿಲ್ಪಾ ಕೇಶವ್, ಸುಶೀಲಾ ಜಯಕರ್‌ರವರು ಪಾಲ್ ಪಡೆದಿತ್ತೆರ್.

ಮಿರಾ ರೋಡ್ ಶ್ರೀ ಶನೀಶ್ವರ ಮಂದಿರ : ಶ್ರವಣ ಶನಿವಾರ ವಿಶೇಷ ಪೂಜೆ

ಬೊಂಬಾಯಿ : ಮಿರಾ ರೋಡ್ ಶ್ರೀ ಶನೀಶ್ವರ ಮಂದಿರಡ್ ತಾರೀಖ್ 21-08-2021 ಕ್ಕ್  ಶ್ರವಣ ಶನಿವಾರದ ವಿಶೇಷ ಪೂಜೆ ನಡಪರೆ ಉಂಡು ಆನಿ ಕಾಂಡೆ ಶ್ರೀ ಶನೀಶ್ವರ ದೇವೆರೆಗ್ ಅಭಿಷೇಕ ಐರ್ದ್ ಬೊಕ್ಕ ಶ್ರೀ ಶನೀಶ್ವರ ಬೊಕ್ಕ ಹನುಮಾನ್ ಚಾಲಿಸ್ ಪಠಣ. ಬೈಯ್ಯಗ್ 4:30ರ್ದ್ ಶ್ರೀ ಶನೀಶ್ವರ ಗ್ರಂಥ ಪರಾಯಣ. 6 ಗಂಟೆರ್ದ್ ಮಂದಿರದ ಮಿರಾರೋಡ್‌ ಶ್ರೀ ಶನೀಶ್ವರ ಭಜನಾ ಸಮಿತಿದಕ್ಲೆನೆರ್ದ್ ಭಜನೆ ಐರ್ದ್ ಬೊಕ್ಕ 7 ಗಂಟೆರ್ದ್ 8 ಗಂಟೆ ಮುಟ ವಿಠ್ಠಲ ಭಜನಾ ಮಂಡಳಿ ಮಿರಾ ಭಯಿಂದರ್‌ದ ಸದಸ್ಯೆರೆರ್ದ್ ಭಜನೆರ್ದ್ ಬೊಕ್ಕ ಮಹಾ ಮಂಗಾಳಾರತಿ,ತೀರ್ಥ ಪ್ರಸಾದ,ಲಘ ಉಪಾಹಾರದೊಟ್ಟುಗು ನಡಪರೆ ಉಂಡು.ಈ ವಿಶೇಷ ಧಾರ್ಮಿಕ ಲೇಸ್ ಕುಮಾರಿ.ಮಂಗಳಾ .ಜಿ.ಶೆಟ್ಟಿ ಮೆರ್ನ ಪುಟ್ಟು ಪರ್ಬದ ಪರವಾದ್ ನಡಪರೆ ಉಪ್ಪುನ ವಿಶೇಷ ಶ್ರವಣ ಶನಿವಾರ ಪವಿತ್ರ ದಿನತಾನಿ ಕುಮಾರಿ ಮಂಗಳಾ ಜಿ ಶೆಟ್ಟಿ ಮೇರ್ ಪುಟ್ಟು ಪರ್ಬನ್ ಮಂದಿರಡ್ ಆಚರಣೆ ಮಲ್ಪುನ ಶುಭ ಪೊರ್ತುಡು ಮಾತೆರ್ಲ ಸೇರ್ದ್ ಮಂಗಳಾ ಜಿ. ಶೆಟ್ಟಿ ಮೆರೆಗ್ ಆಶೀರ್ವದ ಮಲ್ಪೊಡು ಪಂದ್ ಗುಣಕಾಂತ್ ಶೆಟ್ಟಿ ಕರ್ಜೆ ಬಿನ್ನಾಪು ಮಲ್ದೆರ್.

ಅಂಚಾದ್ ಈ ಮಾತಾ ಧಾರ್ಮಿಕ ಲೇಸ್ ಡ್ ಪಾಲ್ ಪಡೆದ್ ಆರಾಧ್ಯ ದೇವೆರಾಯಿನ
ಶ್ರೀ ಶನೀಶ್ವರ. ಬೊಕ್ಕ ಗಣೇಶ, ನಾಗ ದೇವೆರ್ನ ಅಂಚನೇ ಹನುಮಾನ್ ದೇವೆರ್ನ ಮಹದಾನುಗ್ರಹಕ್ ಪಾತ್ರರಾವೊಡು ಪಂದ್ ಬಿನ್ನಾಪು ಮಲ್ಪುನ ಮ್ಯಾನೇಜ್ಮೆಂಟ್ ಕಮಿಟಿ ಬೊಕ್ಕ ಸರ್ವ ಸದಸ್ಯೆರ್
ಶ್ರೀ ಶನೀಶ್ವರ ಸೇವಾ ಚಾರಿಟೇಬಲ್ ಟ್ರಸ್ಟ್ (ರಿ)
ಮೀರಾ ರೋಡ್

ವರದಿ :- ಸದಾನಂದ್ ಕಾರ್ಕಳ

ತುಳುವೆರ್ ಕುಡ್ಲ (ರಿ). ಪೊಸ ಸಂಘಟನೆದ “ಲೊಗೊ” ಉದಿಪನ ಮಲ್ತಿನ ಸಿಎಂ

ಬೆಂಗ್ಳೂರು : ಕರ್ನಾಟಕ ರಾಜ್ಯದ ಮುಖ್ಯಮಂತ್ರಿಯಾಯಿನ ಶ್ರೀಮಾನ್ ಬಸವರಾಜ್ ಬೊಮ್ಮಾಯಿ ಮೇರ್ ಇನಿ ವಿಧಾನಸೌಧದ ಮುಖ್ಯಮಂತ್ರಿ ಕಚೇರಿಡ್ ತುಳುವೆರ್ ಕುಡ್ಲ (ರಿ). ನೂತನ ಸಂಘಟನೆದ “ಲೊಗೊ”ನು ಉದಿಪನ ಮಲ್ತೆರ್ ಅಂಚನೇ ತುಳುಭಾಷೆನ್ ಕರ್ನಾಟಕ ರಾಜ್ಯದ ಅಧಿಕೃತ ರಾಜ್ಯಭಾಷೆಯಾದ್ ಮಲ್ಪರೆ ಅರಿಕೆ ಮಲ್ತೆರ್. ಅಂಚನೇ “ತುಳು ಕೆಳಿಂಜ ಭಾರತ” ಪನ್ಪಿನ ತುಳುನಾಡ್ ಗ್ ಸಂಬಂಧಪಟ್ಟಿನ ಬೂಕು ಕೊರ್ದು ಮಾನ್ಯ ಮುಖ್ಯಮಂತ್ರಿಲೆಗ್ ಮಾನದಿಗೆ ಮಲ್ತೆರ್.

ಈ ಪೊರ್ತುಡು ಮಂಗಳೂರು ದಕ್ಷಿಣ ವಿಧಾನಸಭಾ ಕ್ಷೇತ್ರದ ಶಾಸಕೇರಾಯಿನ ಶ್ರೀ ಡಿ ವೇದವ್ಯಾಸ ಕಾಮತ್ ಬೊಕ್ಕ ಮುಲ್ಕಿ-ಮೂಡಬಿದ್ರೆ ಕ್ಷೇತ್ರದ ಶಾಸಕೆರಾಯಿನ ಶ್ರೀ ಉಮಾನಾಥ್ ಕೋಟ್ಯಾನ್, ಪಾಲ್ ಪಡೆದಿತ್ತೆರ್ ಅಂಚನೇ ಸಂಘಟನೆದ ಗುರ್ಕಾರ್ಲಾಯಿನ ಪ್ರತೀಕ್ ಯು ಪೂಜಾರಿ, ಕೋಶಾಧಿಕಾರಿಯಾಯಿನ ಚರಿತ್ ಪೂಜಾರಿ, ಒತ್ತು ಕಾರ್ಯಂತೆರ್ ಆಯಿನ ಪ್ರತೀಕ್ ರಾವ್, ಸಂಘಟನಾ ಸಂಚಾಲಕ ರೋಶನ್ ರೇನೊಲ್ಡ್, ಸಹ ಸಂಚಾಲಕ ಕುಷಿತ್, ವರುಣ್ ಆಚಾರ್ಯ ಪಾಲ್ ಪಡೆದಿತ್ತೆರ್ .
ಈ ಲೇಸ್ ಗ್ ವಿಶೇಷವಾದ್ ಸಾಕಾರ ಕೊರಿನ ಶಾಸಕೆರಾಯಿನ ಶ್ರೀ ಡಿ ವೇದವ್ಯಾಸ ಕಾಮತ್ ಮೆರೆಗ್ ಕೂಟದ ಪರವಾದ್ ಸೊಲ್ಮೆ ಸಂದೈತ ಮಲ್ತೆರ್.

ಬೊಲ್ತೆರ್ ಬಿಜೆಪಿ ಯುವ ಮೋರ್ಚಾ ವತಿರ್ದ್ ವೀರ ಯೋಧೆರೆಗ್ ಅಭಿನಂದನಾ ಲೇಸ್

ಬೊಲ್ತೆರ್ : ಬಿಜೆಪಿ ಯುವಮೋರ್ಚಾ ಬೊಲ್ತೆರ್ ನೆತ್ತ ವತಿರ್ದ್ 75 ನೇ ವರ್ಷದ ಸ್ವಾತಂತ್ರೋತ್ಸವದ ಪ್ರಯುಕ್ತ 75 ವೀರ ಯೋದೇರೆಗ್ ಅಭಿನಂದನಾ ಲೇಸ್ ಅಟ್ಟನೆ ಮಲ್ತೆರ್. ವಿಶೇಷವಾದ್ ಇಂದಬೆಟ್ಟು ಮಹಾಶಕ್ತಿ ಕೇಂದ್ರ, ನಡ, ನಾವೂರು, ಇಂದಬೆಟ್ಟು, ಮಿತ್ತಬಾಗಿಲು, ಮಲವಂತಿಗೆ, ಕಡಿರುದ್ಯವರ, ಮುಂಡಾಜೆ, ಗ್ರಾಮದ ಮಾಜಿ ಸೈನಿಕೆರ್ನ ಇಲ್ಲಗ್ ಭೇಟಿ ಕೊರ್ದು ಮಾನದಿಗೆ ಮಲ್ತೆರ್.

ಈ ಪೊರ್ತುಡು ಮಂಡಲ ಒತ್ತು ಗುರ್ಕಾರ್ಲಾಯಿನ ಪ್ರಮೋದ್ ದಿಡುಪೆ, ಯುವ ಮೋರ್ಚಾ ಜಿಲ್ಲಾ ಸದಸ್ಯ ಪ್ರಶಾಂತ್, ಮಂಡಲ ಸದಸ್ಯ ರಾಜೇಶ್ ಕುಕ್ಕಾವ್, ಯುವಮೋರ್ಚ್ ಮಹಾಶಕ್ತಿ ಕೇಂದ್ರದ ಪ್ರಶಾಂತ್ ಕಾಣರ್ಪ ಪಾಲ್ ಪಡೆದಿತ್ತೆರ್.

ರಾಜ್ಯ ಮಟ್ಟದ ಭಾಷಣ ಪಂಥ : ಫಲಿತಾಂಶ ಪ್ರಕಟ

ಕುಡ್ಲ : ಈ ಸಲದ ಸ್ವಾತಂತ್ರ್ಯೋತ್ಸವ 75ನೇ ವರ್ಷಾಚರಣೆದ ನೆಲೆಟ್ಟ್ ಭಾರತೀಯೆರೆಗ್ಲಾ ಪರ್ಬದ ವಾತಾವರಣ. ಸ್ವಾತಂತ್ರ್ಯೋತ್ಸವದ ಪರವಾದ್ ಛಾತ್ರಾ ಯುವ ಸಂಘರ್ಷ ಸಮಿತಿ ಕರ್ನಾಟಕ ವತಿರ್ದ್ ಜೋಕ್ಲೆಗಾದ್ ರಾಜ್ಯಮಟ್ಟದ ಭಾಷಣ ಪಂಥನ್ ಅಟ್ಟನೆ ಮಲ್ತ್ ಇತ್ತೆರ್ . ರಾಜ್ಯದ ಬೇತೆ ಬೇತೆ ಮೂಲೆರ್ದ್ ಜೋಕುಲು ಈ ಪಂಥಡ್ ಪಾಲ್ ಪಡೆದಿತ್ತೆರ್ ಪಂಥದ ಯಶಸ್ಸಿಗ್ ಕಾರಣ ಆಂಡ್ .

ಈ ಭಾಷಣ ಪಂಥಡ್ ಉಲ್ಲಾಸ್ ಧರ್ಮಸ್ಥಳ ಮೇರ್ ಸುರುತ ಇನಾಮು , ರಕ್ಷಾ ಕೋಟ್ಯಾನ್ ರಡ್ಡನೇ ಇನಾಮು ಬೊಕ್ಕ ಸಮ್ಯಕ್ತ್ ಜೈನ್ ಕಡಬ ಮೇರ್ ಮೂಜನೆ ಇನಾಮು ಪಡೆತೆರ್.