Tulunaad

ಡಾ. ಆಯಿಷಾ ನಿಶಾದ್ ಗ್ ಮಾನದಿಗೆ

ಕುಡ್ಲ : ವಿಜಯಪುರದ ಅಲ್ ಅಮೀನ್ ಮೆಡಿಕಲ್ ಕಾಲೇಜ್ ಡ್ ಎಂ.ಡಿ. ಅಂತಿಮ ಪರೀಕ್ಷೆಡ್ ಕಾಲೇಜ್ ಗ್ ಟಾಪರ್ ಆದ್ ಅತ್ಯುತ್ತಮ ಶ್ರೇಣಿಡ್ ವೈದ್ಯಕೀಯ ಪದವಿ ಪಡೆಯಿನ ಪೇಂಟೆದ ಮುರ ನಿವಾಸಿ ಡಾ.ಆಯಿಷಾ ನಿಶಾದ್‌ ಮೆರೆಗ್ ಪುತ್ತೂರು ಕಮ್ಯೂನಿಟಿ ಸೆಂಟರ್ ಮುಖೇನ ಮಾನದಿಗೆ ಮಲ್ತೆರ್.

ಒಡಿಪುಡು ಕೊಂಕಣ ರೈಲ್ ನಿಲ್ದಾಣಡ್ ಪ್ಲ್ಯಾಟ್‌ಫಾರಂ ಶೆಲ್ಡರ್‌ ಉದಿಪನ

ಒಡಿಪು : ಇಂದ್ರಾಳಿಡ್ ಉಪ್ಪುನ ಒಡಿಪುದ ರೈಲು ನಿಲ್ದಾಣಡ್ ಒಡಿಪು ಲಯನ್ಸ್ ಕ್ಲಬ್ ಒಟ್ಟು ಸೇರಿಗೆಡ್ ಕಟ್ಟಿನ ಪ್ಲ್ಯಾಟ್‌ಫಾರಂ ಶೆಲ್ಡರ್‌ನ್ ಶನಿವಾರ ಲಯನ್ಸ್ ಕ್ಲಬ್‌ದ ಅಂತಾರಾಷ್ಟ್ರೀಯ ನಿರ್ದೇಶಕ ವಂಶಿಧರ್ ಬಾಬು ಉದಿಪನ ಮಲ್ತೆರ್

ಒಡಿಪು ರೈಲ್ವೆ ನಿಲ್ದಾಣದ ಈ ರಡ್ಡನೆ ಪ್ಲ್ಯಾಟ್‌ಫಾರಂ ಶೆಲ್ಟರ್ ಉದಿಪನದ ಪೊರ್ತುಡು ಜಿಲ್ಲಾ ಗವರ್ನರ್ ವಿಶ್ವನಾಥ ಶೆಟ್ಟಿ, ಮಾಜಿ ಅಂತಾರಾಷ್ಟ್ರೀಯ ನಿರ್ದೇಶಕ ವಿ.ವಿ.ಕೃಷ್ಣಾ ರೆಡ್ಡಿ, ಕೆ.ಸಿ.ವೀರಭದ್ರಪ್ಪ, ಮಾಜಿ ಜಿಲ್ಲಾ ಗವರ್ನರ್ ಜಯಕರ ಶೆಟ್ಟಿ, ಜಿಲ್ಲಾ ಖಜಾಂಚಿ ಜಯಪ್ರಕಾಶ್ ಭಂಡಾರಿ, ಪ್ರಕಾಶ್ ಭಂಡಾರಿ ಪಾಲ್ ಪಡೆದಿತ್ತೆರ್.

ಒಡಿಪು ಸೀರೆ ಪುನಃಶ್ಚೇತನ ಕಾರ್ಲಾದ ಕದಿಕೆ ಟ್ರಸ್ಟ್ಗ್ ನಬಾರ್ಡ್ ಮಾನದಿಗೆ

ಒಡಿಪು : ಕರಿನ ಮೂಜರೆ ವರ್ಷರ್ದ್ ಮಾಜೊಂದು ಉಪ್ಪುನ ಒಡಿಪುದ ಸೀರೆ ನೇಕಾರಿಕೆ ಪುನಶ್ಚೇತನಗ್ ಬಂಗ ಬರೊಂದು ಉಪ್ಪುನ ಕದಿಕೆ ಟ್ರಸ್ಟ್‌ಗ್ ಈ ಸಲದ ನಬಾರ್ಡ್ ಪ್ರಶಸ್ತಿ ಮಾನದಿಗೆ ಮಲ್ದೆರ್.

ಮುಂಬೈಡ್ ಮುಖ್ಯ ಕಚೇರಿ ಉಪ್ಪುನ ನಬಾರ್ಡ್ ಈ ಸಲ ಕೈಮಗ್ಗ ಕ್ಷೇತ್ರಡ್ ಎಡ್ಡೆ ಸಾಧನೆ ಮಲ್ದಿನ ಮೂಜಿ ಎನ್‌ಜಿಓಡ್ ಕಾರ್ಲಾದ ಕದಿಕೆ ಟ್ರಸ್ಟ್ ಒಂಜಿ .

ಇಂಚೋಗು ಕಿನ್ನಿಗೋಳಿದ ತಾಳಿಪಾಡಿ ನೇಕಾರ ಸಹಕಾರಿ ಸಂಘಡ್ ನಡತಿನ ರಾಷ್ಟ್ರೀಯ ಕೈಮಗ್ಗ ಸಪ್ತಾಹ ಆಚರಣೆದ ಪೊರ್ತುಡು ದಕ್ಷಿಣ ಕನ್ನಡದ ಜಿಲ್ಲಾಧಿಕಾರಿ ಡಾ.ರಾಜೇಂದ್ರ ಕೆ.ವಿ. ಮೇರ್ ನಬಾರ್ಡ್‌ದ ಡಿಡಿಎಂ ಸಂಗೀತ ಕರ್ತಾ ಮೆರ್ನ ಮುತಾಲಿಕೆಡ್ ಕದಿಕೆ ಟ್ರಸ್ಟ್‌ದ ಗುರ್ಕಾರ್ಲಾಯಿನ ಮಮತಾ ರೈ ಮೆರೆಗ್ ನಬಾರ್ಡ್ ಪ್ರಶಸ್ತಿ ಮಾನದಿಗೆ ಮಲ್ತೆರ್.

ಸರಳವಾದ್ ನಾರಾಯಣ ಗುರುಕ್ಲೆನ ಜಯಂತಿ ಆಚರಣೆ

ಕುಡ್ಲ : ಕೋವಿಡ್-19 ಸೋಂಕು ನೆಲೆಟ್ಟ್ ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಜಯಂತಿನ್ ಆ.23ನೆ ಸೋಮವಾರ ಪೇಂಟೆದ ಜಿಲ್ಲಾಧಿಕಾರಿಲೆನ ಕಚೇರಿಡ್ ಸರಳವಾದ್ ಅಂಚನೇ ಶ್ರದ್ದಾ ಭಕ್ತಿಡ್ ಆಚರಣೆ ಮಲ್ತೆರ್ .

ಸಂಸದೆರಾಯಿನ ನಳೀನ್ ಕುಮಾರ್ ಕಟೀಲ್ ಮೇರ್ ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಭಾವಚಿತ್ರಗ್ ಪೂತರ್ಪಣೆ ಮಲ್ತೆರ್ ಗೌರವ , ಈ ಪೊರ್ತುಡು ಪಾತೆರಿನ ಆರ್ , ಶೋಷಿತೆರ್ ಬೊಕ್ಕ ಹಿಂದುಳಿದ ವರ್ಗದಕ್ಲೆನ ಶ್ರೇಯೋಭಿವೃದ್ಧಿಗ್ ನಾರಾಯಣ ಗುರುಕ್ಲೆನ ಹೋರಾಟ ಅವಿರಸ್ಮರಣೀಯವಾಯಿನವು , ಸಾಮಾಜಿಕ, ಶೈಕ್ಷಣಿಕ ಬೊಕ್ಕ ಧಾರ್ಮಿಕ ಪರಿವರ್ತನೆದ ಹರಿಕಾರೆರಾದ್ ಆರ್ ಸಮಾಜದ ಎಡ್ಡೆಪ್ಪುಗಾದ್ ಬೆನ್ನಿ ಬೆಂತೆರ್ . ಆರ್ನ ಆಚಾರ ವಿಚಾರ ಬೊಕ್ಕ ಆದರ್ಶಲೆನ್ ಪಾಲನೆ ಮಲ್ಪೋಡು ಪಂದ್ ಪಂಡೆರ್.

ಒಂಜೇ ಜಾತಿ, ಒಂಜೇ ಧರ್ಮ ಬೊಕ್ಕ ಒಂಜೇ ದೇವೆರ್ ಪನ್ಪಿನ ತತ್ವನ್ ಕೊರಿನ ಮೆರ್ನ ಸಂದೇಶ ಸಮಾಜಗ್ ಮುಟ್ಟುನ ಕಜ್ಜ ಆವೊಡು ಪಂದ್ ಪಂಡೆರ್.

ಶಾಸಕೆರಾಯಿನ ವೇದವ್ಯಾಸ್ ಕಾಮತ್, ಮೂಡ ಗುರ್ಕಾರ್ಲಾಯಿನ ಬೊಕ್ಕ ಕುದ್ರೋಳಿ ಗೋಕರ್ಣನಾಥೇಶ್ವರ ದೇವಸ್ಥಾನದ ಟ್ರಸ್ಟಿ ರವಿಶಂಕರ್ ಮಿಜಾರು, ಮಂಗಳೂರು ಮಹಾನಗರಪಾಲಿಕೆದ ಮೇಯರ್ ಪ್ರೇಮಾನಂದ ಶೆಟ್ಟಿ, ದಿ. ಮೈಸೂರು ಎಲೆಕ್ಟ್ರಿಕಲ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ ಗುರ್ಕಾರ್ಲಾಯಿನ ಸಂತೋಷ್ ರೈ ಬೋಳಿಯಾರ್, ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ, ಅಪರ ಜಿಲ್ಲಾಧಿಕಾರಿ ಪ್ರಜ್ಞಾ ಅಮ್ಮೆಂಬಳ ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಭಾವಚಿತ್ರಗ್ ಪುಷ್ಪ ನಮನ ಮಲ್ತೆರ್ .

ಬೇತೆ ಬೇತೆ ಇಲಾಖೆದ ಅಧಿಕಾರಿಲು , ಬಿರುವೆರೆ ಸಂಘ ಬೊಕ್ಕ ಯುವ ವಾಹಿನಿದ ಪದುಕೆರ್, ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಅನುಯಾಯಿಯಿಲು ಈ ಪೊರ್ತುಡು ಪಾಲ್ ಪಡೆದಿತ್ತೆರ್.ಕನ್ನಡ ಬೊಕ್ಕ ಸಂಸ್ಕøತಿ ಇಲಾಖೆದ ಸಹಾಯಕ ನಿರ್ದೇಶಕ ರಾಜೇಶ್ ಎದುಕೊಂದು ಸೊಲ್ಮೆ ಸಂದೈತ ಮಲ್ತೆರ್.

ಕುದ್ರೋಳಿ ಆಟೋ ರಿಕ್ಷಾ ಪಾರ್ಕ್ ಪೊಸ ಪದುಕೆರ್ನ ಆಯ್ಕೆ

ಕುಡ್ಲ : ಕುದ್ರೋಳಿ ಆಟೋ ರಿಕ್ಷಾ ಚಾಲಕರ ಮಹಾಸಭೆ ಗುರ್ಕಾರ್ಲಾಯಿನ ಅಬ್ದುಲ್ ರಹ್ಮಾನ್ ಮೆರ್ನ ಮುತಾಲಿಕೆಡ್ ನಡತುಂಡು .ಸಭೆಟ್ ಅವ್ವೆತೋ ವಿಚಾರದ ಬಗ್ಗೆ ಪಾತೆರಕತೆ ನಡಪಾದ್ ಆಟೋ ಪಾರ್ಕ್ ಡ್ ಸಾರ್ವಜನಿಕೆರೇಗ್ ಪರ್ಪಿನ ನೀರ್ ದ ವ್ಯವಸ್ಥೆನ್ ಮಲ್ಪರೆ ಬಿನ್ನಾಪು ಮಲ್ತೆರ್.

ಸಭೆಟ್ ದುಂಬುದ 2021-2022ರ ಪೊರ್ತುಗು ಪೊಸ ಸಮಿತಿನ್ ರಚನೆ ಮಲ್ತೆರ್ . ಪೊಸ ಗುರ್ಕಾರ್ಲಾದ್ ಝುಬೈರ್ ಮೆರೆನ್ ಆಯ್ಕೆ ಮಲ್ತೆರ್ . ಒತ್ತು ಗುರ್ಕಾರ್ಲಾದ್ ಅಬ್ದುಲ್ ರಹ್ಮನ್, ಪ್ರಧಾನ ಕಾರ್ಯಂತೆರ್ ಆದ್ ಅಮಿರುದ್ದೀನ್, ಖಜಾಂಜಿಯಾದ್ ಹನೀಫ್ ಕುದ್ರೋಳಿ ಮೆರೆನ್ ನೇಮಕ ಮಲ್ತೆರ್.

ಬಂಟ್ವಾಳದ ಭಂಡಾರಿಬೆಟ್ಟುಡು ‘ಬಲೆ ತುಳು ಲಿಪಿ ಕಲ್ಪುಗ ಕಜ್ಜ ಕೊಟ್ಯದ ಉದಿಪನ

ಬಂಟ್ವಾಳ: ಬಂಟ್ವಾಳ ಪೇಂಟೆದ ಯುವಜನ ವ್ಯಾಯಮಶಾಲೆ ಭಂಡಾರಿಬೆಟ್ಟುಡು ಆಗಸ್ಟ್ 22ನೆ ಐತಾರದಾನಿ ಕಾಂಡೆ 10 ಗಂಟೆಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಜೈ ತುಳುನಾಡ್ ಬೊಕ್ಕ ತುಳುನಾಡ ಯುವಸೇನೆ ಬಂಟ್ವಾಳ ಮೆಕ್ಲೆನ ಒಟ್ಟು ಸೇರಿಗೆಡ್ ಬಲೆ ತುಳು ಲಿಪಿ ಕಲ್ಬುಗ ಕಜ್ಜ ಕೊಟ್ಯದ ಉದಿಪನದ ಲೇಸ್ ನಡತುಂಡು.

ಜೈ ತುಲುನಾಡ್ (ರಿ.) ಗುರ್ಕಾರ್ಲಾಯಿನ ಸುದರ್ಶನ್ ಸುರತ್ಕಲ್ ಮೆರ್ನ ಗುರ್ಕಾರ್ಮೆಡ್ ನಡತಿನ ತುಳು ಲಿಪಿ ಕಲ್ಪುನ ಕಜ್ಜ ಕೊಟ್ಯನ್ ಚೇತನ್ ಮುಂಡಾಜೆ ತುಡರ್ ಅರ್ಲಾವುನ ಮುಖೇನ ಉದಿಪನ ಮಲ್ತೆರ್.ತುಳು ಲಿಪಿ ಶಿಕ್ಷಕೆರಾಯಿನ ಜಗದೀಶ ಗೌಡ ಕಲ್ಕಳ ಮೇರ್ ತುಳು ಲಿಪಿ ಬರೆಪಿನ ಮುಖೇನ ಕಜ್ಜ ಕೊಟ್ಯನ್ ಚಾಲನೆ ಕೊರಿಯೆರ್ .

ಜೈ ತುಳುನಾಡ್ (ರಿ) ಸಂಘಟನೆದ ಗುರ್ಕಾರ್ಲಾಯಿನ ಸುದರ್ಶನ್ ಸುರತ್ಕಲ್ ಪಾತೆರ್ದ್ , ಸಂಘಟನೆ ಸಾಮಾಜಿಕ ಜಾಲತಾಣಡ್ ಬೇಲೆ ಮಲ್ಪುನ ದಿನರ್ದ್ ಇನಿ ಮುಟಲ ತುಳುತ ಸ್ಥಾನಮಾನಗಾದ್ ಶಕ್ತಿಮೀರಿ ಪ್ರಯತ್ನ ಮಲ್ತೊಂದು ಉಲ್ಲ. ಅಕಾಡೆಮಿದೊಟ್ಟುಗು ಸಂಘಟನೆ ಸಾಕಾರ ಕೊರೊಂದು ಉಂಡು . ತುಳುನಾಡ್ ದ ಮಾತಾ ಅಂಗಡಿ, ಶಾಲೆ, ಕಚೇರಿಡ್ ತುಳು ಲಿಪಿತ ಪುದರ್ ಪಲವೆ ಪಾಡೊಡು ಪಂದ್ ಪಂಡೆರ್ .

ಈ ಲೇಸ್ ಡ್ ಗ್ರಾಮ ಪಂಚಾಯತ್ ಸದಸ್ಯೆರಾಯಿನ ಸೀತಾರಾಮ ಸಜಿಪ, ಜೈ ತುಳುನಾಡ್ (ರಿ.) ಒತ್ತು ಗುರ್ಕಾರ್ಲಾಯಿನ ಉದಯ್ ಪೂಂಜ, ಉಪ ಸಂಘಟನಾ ಕಾರ್ಯದರ್ಶಿ ಅಶ್ರಫ್ ಭಸ್ಥಿಕೋಡಿ, ತುಳು ಲಿಪಿ ಕಲ್ಪಾರ್ತಿಲಾಯಿನ ಪೂರ್ಣಿಮಾ ಬಂಟ್ವಾಳ ಬೊಕ್ಕ ಪೃಥ್ವಿ ತುಳುವೆ ಪಾಲ್ ಪಡೆದಿತ್ತೆರ್ . ಧೀರಜ್ ಬತ್ತಿ ಬಿನ್ನೆರೆನ್ ಎದುಕೊಂಡೆರ್ ಮಹೇಶ್ ಸೊಲ್ಮೆ ಸಂದೈತ ಮಲ್ತೆರ್. ಲಿಖಿತ್‌ರಾಜ್ ಸೆರ್ಕಳ ಲೇಸ್ ನಡಪಾದ್ ಕೊರಿಯೆರ್.

ಒಡಿಪು ಅಜ್ಜರಕಾಡು ಲಾಲ್ ಬಹದ್ದೂರ್ ಶಾಸ್ತ್ರಿ ಮಾರ್ಗಡ್ ಉಪ್ಪುನ ವಯೋಲೆಟ್ ತೀರ್ಥ ಸಂಕೀರ್ಣಡ್ ಪೊಸ ದಂತ ಸ್ಕಾನಿಂಗ್ ಸೌಲಭ್ಯ ಕೇಂದ್ರದ ಉದಿಪನ

ಒಡಿಪು : ಒಡಿಪು ಅಜ್ಜರಕಾಡು ಲಾಲ್ ಬಹದ್ದೂರ್ ಶಾಸ್ತ್ರಿ ಮಾರ್ಗಡ್ ಉಪ್ಪುನ ವಯೋಲೆಟ್ ತೀರ್ಥ ಸಂಕೀರ್ಣಡ್ ಪೊಸ ಸುಸಜ್ಜಿತ ದಂತ ಸ್ಕಾನಿಂಗ್ ಸೌಲಭ್ಯ ಕೇಂದ್ರದ ಉದಿಪನ ತಾರೀಖ್ 22.08.2021 ಕ್ಕ್ ನಡತುಂಡು .

ಉದಿಪನನ್ ಒಡಿಪುದ ಪೆರಿಯ ದಂತವೈದ್ಯರಾಯಿನ ಡಾ. ರಾಮಾನಂದ ಸೂಡಾ, ಕಾರ್ಕಳದ ಪೆರಿಯ ದಂತವೈದ್ಯರಾಯಿನ ಡಾ. ರಮೇಶ್ ಶೆಣೈ, ಅಖಿಲ ಭಾರತೀಯ ದಂತವೈದ್ಯ ಸಂಘದ ಒಡಿಪುದ ಗುರ್ಕಾರ್ಲಾಯಿನ ,ಕುಂದಾಪುರದ ಪೆರಿಯ ದಂತವೈದ್ಯರಾಯಿನ ಡಾ.ಪ್ರಮೋದ್ ಶೆಟ್ಟಿ ನಡಪಾದ್ ಕೊರಿಯೆರ್ .
ಬ್ರಹ್ಮಾವರದ ಡಾ. ಮನೋಜ್ ಡಿಲಿಮಾ, ಶಿರ್ವದ ಡಾ. ಗುರುರಾಜ್, ಮಲ್ಪೆಯ ಡಾ. ಸುಧೀರ್ ರಾವ್, ಬ್ರಹ್ಮಾವರದ ಡಾ. ಕಿರಣ್ ಶೆಟ್ಟಿ, ಮುಂಬಯಿದ ಡಾ. ನವೀನ್ ಶೆಟ್ಟಿ, ಕಾರ್ಲಾದ ಡಾ. ಮುರಳೀಧರ ಭಟ್, ಒಡಿಪುದ ಡಾ.ಸೈಯದ್ ಫಯಾಜ್ , ಪೆರ್ಡೂರುದ ಶ್ರೀ ಸುಧೀರ್, ಡಾ. ನಿತೇಶ್ ಶೆಟ್ಟಿ, ಡಾ. ಮನೋಜ್ ಶೆಟ್ಟಿ, ಡಾ. ಪ್ರಕೃತಿ ಶೆಟ್ಟಿ, ಡಾ.ಅನಿತಾ ಸೂಡಾ ಪಾಲ್ ಪಡೆದಿತ್ತೆರ್.

ಒಡಿಪುಡು ಪ್ರಪ್ರಥಮವಾದ್ ಆಧುನಿಕ ತಂತ್ರಜ್ಞಾನದ Dental – CBCT (Cone Beam Computed Tomography System) Scanning Centre ಆತುಂಡು ,ಮುಲ್ಪ OPG, Lateral Cephalogram ದಂಚಿನ 2D/ 3D ಸ್ಕಾನಿಂಗ್ ದ ಸೌಲಭ್ಯ ಉಂಡು. ಒಡಿಪುದ ಜನಕುಲು ಈ ಸೌಲಭ್ಯದ ಉಪಯೋಗ ಪಡೆಯೋಲಿ.