Tulunaad

ಡಯನಾ ವಿಠಲ್ ಪೈ ಮುತಾಲಿಕೆದ ಲಯನ್ಸ್ ಕ್ಲಬ್ ಒಡಿಪುದ ಪದಪ್ರಧಾನ

ಒಡಿಪು : ಲಯನ್ಸ್ ಸಂಸ್ಥೆ ಸಾರ್ವಜನಿಕ ಸಂಪರ್ಕ, ಸಮಾಜ ಸೇವೆ ಬೊಕ್ಕ ವ್ಯಕ್ತಿತ್ವ ವಿಕಸನಗ್ ವಿಪುಲ ಅವಕಾಶ ಕೊರ್ಪುಂಡು ಪಂದ್ ಮಾಜಿ ಲಯನ್ಸ್ ಜಿಲ್ಲಾ ಗವರ್ನರ್ ಬೊಕ್ಕ ಲಯನ್ಸ್ ಜಿಲ್ಲೆ 317 ಸಿಯ ಮೆಂಟರ್ ಜಯಕರ್ ಶೆಟ್ಟಿ ಇಂದ್ರಾಳಿ ಪಂಡೆರ್ .

ಪ್ರತಿಷ್ಠಿತ ಲಯನ್ಸ್ ಕ್ಲಬ್ ಒಡಿಪುದ ಪೊಸ ಗುರ್ಕಾರ್ ಲಾಯಿನ ಡಯನಾ ಎಂ.ವಿಠಲ್ ಪೈ, ಕಾರ್ಯಂತೇರಾದ್ ಪಿ. ವಿಷ್ಣುದಾಸ್ ಪಾಟೀಲ್, ಕೋಶಾಧಿಕಾರಿಯಾದ್ ಶ್ರೀಧರ ಭಟ್ ಬೊಕ ಅಕ್ಲೆನ ಕೂಟದ ಪದಪ್ರಧಾನ ಲೇಸ್ ಡ್ ಪದಗ್ರಹಣ ಅಧಿಕಾರಿಯಾದ್ ಪಾತೆರಿಯೆರ್ .

ಪೊಸ ಸದಸ್ಯೆರಾದ್ ಸೇರ್ಪಡೆಯಾಯಿನ ಅತುಲ್ ಎಂ. ಭಕ್ತ, ಅಬ್ದುಲ್ ಇಲಿಯಾಸ್ ಬೊಕ್ಕ ರಾಮದಾಸ್ ಪ್ರಭುಗು ಜಯಕರ್ ಶೆಟ್ಟಿ ಇಂದ್ರಾಳಿ ಪ್ರತಿಜ್ಞಾ ವಿಧಿ ಬೋಧನೆ ಮಲ್ತೆರ್ .

ಒಡಿಪುಡು ಗೌಜಿಡ್ ನಡತಿನ ವಿಟ್ಲಪಿಂಡಿ ಉಚ್ಚಯ

ಒಡಿಪು : ವಿಟ್ಲಪಿಂಡಿ ಉಚ್ಚಯ ಸಾಂಪ್ರದಾಯಿಕ ವಿಧಿ ವಿಧಾನಗದೊಟ್ಟುಗು ಶ್ರೀಕೃಷ್ಣ ಮಠದ ರಥಬೀದಿಡ್ ಅಂಗಾರೆ ಬಾರಿ ಗೌಜಿಡ್ ನಡತುಂಡು.

ಪರ್ಯಾಯ ಅದಮಾರು ಶ್ರೀ ಈಶಪ್ರಿಯತೀರ್ಥ ಶ್ರೀಪಾದೆರ್ನ ಮುತಾಲೀಕೇಡ್ ನಡತಿನ ಲೇಸ್ ಡ್ ಶ್ರೀಕೃಷ್ಣನ ಮೃಣ್ಮಯ ಮೂರ್ತಿನ್ ದೀದ್ ಪೂಜೆ ಮಲ್ತ್ , ಮೆರವಣಿಗೆ ಮಲ್ತೆರ್, ಐರ್ದ್ ಬೊಕ್ಕ ಮೃಣ್ಮಯ ಮೂರ್ತಿನ್ ಮಧ್ವ ತುದೆಟ್ ಜಲಸ್ತಂಭನ ಮಲ್ತೆರ್ .

ಜೋಕ್ಲೆಗ್ ಮನೋಸ್ಥೈರ್ಯ ಪಂಡಿನ ಒಡಿಪು ಜಿಲ್ಲಾಧಿಕಾರಿ

ಒಡಿಪು : ಜಿಲ್ಲೆಡ್ ಕೊಡೆರ್ದ್ 9 ಬೊಕ್ಕ 10 ನೇ ತರಗತಿ ಅಂಚನೇ ಪದವಿ ಪೂರ್ವ ಕಾಲೇಜು ಸುರು ಆಯಿನ ನೆಲೆಟ್ಟ್ ಒಡಿಪು ಜಿಲ್ಲಾಧಿಕಾರಿ ಎಂ. ಕೂರ್ಮಾ ರಾವ್ ಪೇಂಟೆದ ಬಾಲಕಿಯೆರ್ನ ಪ್ರೌಢಶಾಲೆ ಬೊಕ್ಕ ಪದವಿ ಪೂರ್ವ ಕಾಲೇಜುಗು ಭೇಟಿ ಕೊರ್ದು , ಕೋವಿಡ್ ಮಾರ್ಗ ಸೂಚಿಲೆನ್ ಪಾಲಿಸಾವುನ ಬಗ್ಗೆ ಪರಿಶೀಲನೆ ನಡಪಾದ್ ಜೋಕ್ಲೆಗ್ ಮನೋಸ್ಥೈರ್ಯ ಪಂಡೆರ್ .

ಒಡಿಪುಡು ಕೋವಿಡ್ ಗ್ ರಡ್ಡ್ ಜನ ಬಲಿ

ಒಡಿಪು : ಬುಧವಾರ ಪೇಂಟೆಡ್ ಪೊಸತಾದ್ 91 ಜನಕ್ ಕೊರೋನ ಪಾಸಿಟಿವ್ ಬೈದುಂಡು . ಕೋಡೆ ರಡ್ಡ್ ಜನ ತೀರ್ ಪೋತೆರ್ , ಅಂಚನೇ 171 ಜನ ಹುಷಾರ್ ಆತೆರ್.ಸಕ್ರಿಯರಾಯಿನ ದಿನಟ್ 1432ಕ್ಕ್ ಜೈದುಂಡು ಪಂದ್ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣಾಧಿಕಾರಿ ಡಾ.ನಾಗಭೂಷಣ ಉಡುಪ ಪಂಡೆರ್ .

ಒಡಿಪುದ ಜನಕ್ಲೆನ ಪ್ರೀತಿ, ಆಶೀರ್ವಾದನ್ ಮರಪರೆ ಸಾಧ್ಯ ಇಜ್ಜಿ : ಜಿಲ್ಲಾಧಿಕಾರಿ ಜಿ.ಜಗದೀಶ್

ಒಡಿಪು : ಒಡಿಪು ಜಿಲ್ಲೆದ ಜನತೆ ತೋಜಾಯಿನ ಮೋಕೆ , ಅಭಿಮಾನ ಏಪಲಾ ಮದಪರೆ ಸಾಧ್ಯ ಇಜ್ಜಿ . ಒಡಿಪುದ ಜನಕ್ಲೆನ ಆಶೀರ್ವಾದರ್ದೇ ಮುಖ್ಯಮಂತ್ರಿಲೆನ ಜಂಟಿ ಕಾರ್ಯದರ್ಶಿನ ಉನ್ನತ ಹುದ್ದೆಗ್ ಪೋಯೆರೆ ಸಾಧ್ಯ ಆಂಡ್ ಪಂದ್ ಜಿಲ್ಲಾಧಿಕಾರಿ ಜಿ.ಜಗದೀಶ್ ಪಂಡೆರ್ .

ಅಂಗಾರೆ ರಜತಾದ್ರಿದ ಅಟಲ್ ಬಿಹಾರಿ ವಾಜಪೇಯಿ ಸಭಾಂಗಣಡ್ ಅಟ್ಟನೆ ಮಲ್ದಿನ ಬೀಳ್ಕೊಡುಗೆ ಲೇಸ್ ಡ್ ಆರ್ ಪಾತೆರಿಯೆರ್.

ಲೇಸ್ ಡ್ ಜಿಲ್ಲಾಧಿಕಾರಿ ಜಿ.ಜಗದೀಶ್ ಬೊಡೆದಿ ಸೌಮ್ಯ, ಜೋಕುಲಾಯಿನ ಅನುಷ್ಕಾ ಬೊಕ್ಕ ಅಭಿಘ್ನ, ಒಡಿಪು ನಗರಾಭಿವೃದ್ಧಿ ಪ್ರಾಧಿಕಾರದ ಗುರ್ಕಾರ್ಲಾಯಿನ ಕೆ. ರಾಘವೇಂದ್ರ ಕಿಣಿ, ನಗರಸಭೆ ಗುರ್ಕಾರ್ಲಾಯಿನ ಸುಮಿತ್ರಾ ನಾಯಕ್, ಕರಾವಳಿ ಕಾವಲು ಪಡೆ ಎಸ್ಪಿ ನಿಖಿಲ್, ಕುಂದಾಪುರ ವಲಯದ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಆಶೀಶ್ ರೆಡ್ಡಿ, ಕುಂದಾಪುರ ಉಪ ವಿಭಾಗಾಧಿಕಾರಿ ರಾಜು ಪಾಲ್ ಪಡೆದಿತ್ತೆರ್.

ಒಡಿಪು ಶಾಂತರಾಜ ಐತಾಳ್ರೆಗ್ ‘ಮನೆಯಂಗಳದಲ್ಲಿ’ ಮಾನದಿಗೆ

ಒಡಿಪು : ಬೆಂಗ್ಳೂರುದ “ಹಾಸ್ಯ ದರ್ಶನ” ಪತ್ರಿಕೆದ ಸಂಪಾದಕ ಎಸ್.ಎಸ್. ಪಡಶೆಟ್ಟಿ ಒಡಿಪುದ ಎಚ್. ಶಾಂತರಾಜ ಐತಾಳ್ರೆಗ್ ಅಂಗಾರೆ “ಮನೆಯಂಗಳದಲ್ಲಿ’ ಪ್ರಶಸ್ತಿ ಮಾನದಿಗೆ ಮಲ್ತೆರ್.

ಮಲ್ಲ ಬಿನ್ನೆರ್ ಆದ್ ಪ್ರದೀಪ್ ಕುಮಾರ ಕಲ್ಕೂರ, ಬೀಡು ರಮೇಶ ರಾವ್, ಡಾ.ರವೀಂದ್ರನಾಥ, ಪಾಲ್ ಪಡೆದಿತ್ತೆರ್.

ಕುಂಬ್ರಡ್ ಪೊಸತಾದ್ ಸುರು ಆಯಿನ ಶ್ರೀದೇವಿ ಎಂಟರ್ಪ್ರೈಸಸ್ ಗ್ ಭೇಟಿ ಕೊರಿನ ಗುಣರಂಜನ್ ಶೆಟ್ಟಿ

ಪುತ್ತೂರು: ಇಂಚೋಗು ಕುಂಬ್ರ ಮಂದಾರ ಸಂಕಿರ್ಣಡ್ ಉದಿಪನ ಆಯಿನ ಶ್ರೀದೇವಿ ಎಂಟರ್ಪ್ರೈಸಸ್ ಗೆ ಜಯ ಕರ್ನಾಟಕ ಜನಪರ ವೇದಿಕೆದ ಯುವ ಸಂಸ್ಥಾಪಕ ರಾಜ್ಯ ಗುರ್ಕಾರ್ಲಾಯಿನ ಗುಣರಂಜನ್ ಶೆಟ್ಟಿ ಭೇಟಿ ಕೊರ್ದು ಎಡ್ಡೆಪ್ಪುನು ಬಯಕಿಯೆರ್.

ಕೃಷಿಕೆರೇ ಜಾಸ್ತಿ ಉಪ್ಪುನ ಈ ಪ್ರದೇಶಡ್ ಇಂಚಿನ ಒಂಜಿ ರಸಗೊಬ್ಬರ ಮಾರಾಟ ಕೇಂದ್ರ ಸುರು ಮಲ್ದಿನವು ಎಡ್ಡೆ ನಿರ್ಧಾರ ಪಂದ್ ಗುಣರಂಜನ್ ಶೆಟ್ಟಿ ಸಂಸ್ಥೆದ ಗುರ್ಕಾರ್ಲೆಗ್ ಸೊಲ್ಮೆ ಸಂದೈತ ಮಲ್ತೆರ್ .

ಈ ಪೊರ್ತುಡು ಸಂತೋಷ್ ಕುಮಾರ್ ರೈ ಕೈಕಾರ, ರಾಜ್ಯ ಸಂಚಾಲಕೆರಾಯಿನ ರಾಮದಾಸ್ ಶೆಟ್ಟಿ, ಪ್ರವೀಣ್ ಶೆಟ್ಟಿ ತಿಂಗಳಾಡಿ, ಸುಂದರ್ ರೈ ಮಂದಾರ, ಪುರಂದರ ರೈ, ಪ್ರಜ್ವತ್ ರೈ, ಜಯಂತ್ ಕುಂಬ್ರ, ಧಕ್ಷತ್ ರೈ, ನವೀನ್ ಭಂಡಾರಿ ಕುತ್ಯಾಡಿ ಪಾಲ್ ಪಡೆದಿತ್ತೆರ್.

ಪೈಪ್ ಬೂರ್ದು ಸೈತಿನ ಬಾಲೆ

ಮೂಲ್ಕಿ: ಮುಲ್ಪದ ಲಿಂಗಪ್ಪಯ್ಯಕಾಡಿನ ಆಶ್ರಯ ಕಾಲೊನಿದ ಕೈತಲ್ ದಾಸ್ತಾನು ದೀತಿನ ಸಿಮೆಂಟ್ ಪೈಪ್ ಬುಧವಾರ ಬೂರ್ನೆರ್ದಾವರ ಬಾಲೆ ತೀರ್ ಪೋಯಿನ ಘಟನೆ ನಡತುಂಡು. ಲಿಂಗಪ್ಪಯ್ಯ ಕಾಡ್ದ ನಿವಾಸಿ ರಾಮು ಪನ್ಪಿನರ್ನ ಬಾಲೆ ಯುವರಾಜ (4) ತೀರ್ ಪೋಯಿನ ಬಾಲೆ.

ನಾಗರಾಜ್ ಪನ್ಪಿನರೆನ ಕಂಪನಿದ ಸಿಮೆಂಟ್ ಪೈಪ್‌ಲೆನ್ ದಾಸ್ತಾನು ದೀದ್ ಇತ್ತೆರ್ . ಅಲ್ಪನೇ ಗೊಬ್ಬೊoದು ಇತ್ತಿನ ಬಾಲೆದ ತರೆತ ಮಿತ್ತ್ ಪೈಪ್ ಬೂರ್ದುಂಡು. ಮೂಲ್ಕಿ ಠಾಣೆಡ್ ಪ್ರಕರಣ ದಾಖಲಾತುಂಡು .

ಸೆಪ್ಟೆಂಬರ್ 4ಕ್ಕ್ ಕುಕ್ಕುಂದೂರು ಗ್ರಾಮ ಪಂಚಾಯತ್ ಗ್ರಾಮಸಭೆ

ಕಾರ್ಕಳ : ಕುಕ್ಕುಂದೂರು ಗ್ರಾಮ ಪಂಚಾಯತ್‌ದ ಪ್ರಥಮ ಹಂತದ ಗ್ರಾಮ ಸಭೆ ಸೆ. 4ರಂದು ತಾಲೂಕು ಪಂಚಾಯತ್ ಸಭಾಭವನಡ್ ನಡಪರೆ ಉಂಡು ಪಂದ್ ಪಂಚಾಯತ್ ಗುರ್ಕಾರ್ಲಾಯಿನ ಶಶಿಮಣಿ, ಒತ್ತು ಗುರ್ಕಾರ್ಲಾಯಿನ ಅನಿಲ್ ಪೂಜಾರಿ, ಪಿಡಿಒ ಪ್ರಮೀಳಾ ನಾಯಕ್ ಪ್ರಕಟನೆಡ್ ತೆರಿಪಾದೆರ್.

ಅಣ್ಣಿ. ಸಿ. ಶೆಟ್ಟಿ ಗುಂಡ್ಯಡ್ಕ ಮೆರೆಗ್ ಸಮಾಜ ರತ್ನ ಪ್ರಶಸ್ತಿ

ಕುಡ್ಲ : ನವೀ ಮುಂಬಯಿ ಶ್ರೀ ಮೂಕಾಂಬಿಕಾ ದೇವಸ್ಥಾನ ಟ್ರಸ್ಟ್ ಗುರ್ಕಾರ್ಲಾಯಿನ ಧರ್ಮದರ್ಶಿ ಅಣ್ಣಿ ಸಿ. ಶೆಟ್ಟಿ ಗುಂಡ್ಯಡ್ಕ ಮೇರ್ ಕರ್ನಾಟಕ ಜಾನಪದ ಪರಿಷತ್ ಕೇರಳ ಘಟಕ ಕೊರ್ಪಿನ ಸಮಾಜ ರತ್ನ ಮಾನದಿಗೆ ಪಡೆತೆರ್ . ಕುಡ್ಲಡ್ ನಡತಿನ ಲೇಸ್ ಡ್ ವಿಧಾನ ಪರಿಷತ್ ಸದಸ್ಯ ಕೆ. ಹರೀಶ್ ಕುಮಾರ್ ಪ್ರಶಸ್ತಿ ಪ್ರದಾನ ಮಲ್ತೆರ್ .