Tulu News

Feb 3rd: Sri Gejjegiri Kshetra Mahatmay Yakshagana play by Gejjegiri Mela ಫೆ.3: ಅಮ್ಮೇರಕೊಟ್ಯ ಚಾವಡಿಡ್ ಗೆಜ್ಜೆಗಿರಿ ಮೇಳದ ಕಲಾವಿದೆರೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ

ಅಮ್ಮೇರಿ: ಗೆಜ್ಜೆಗಿರಿತ್ತ ಶ್ರೀ ಆದಿ ಧೂಮಾವತಿ ಶ್ರೀ ದೇಯಿಬೈದೆತಿ ಕೃಪಾಪೋಷಿತ ಯಕ್ಷಗಾನ ಮಂಡಳಿದ ಕಲಾವಿದೆರೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ ಅಮ್ಮೇರಕೊಟ್ಯದ ಚಾವಡಿಡ್ ಫೆ.3 ಶುಕ್ರಾರ ರಾತ್ರೆ 9 ಗಂಟೆಗ್ ನಡಪರೆ ಉಂಡು.

ಕಲಾಭಿಮಾನಿಲು ಮಾತೆರ್ಲಾ ಈ ಲೇಸ್ ಗ್ ಬತ್ತ್ ದ್ ಲೇಸ್ ಪೊರ್ಲು ಕೊರೊಡು ಪಂದ್ ಅಧ್ಯಕ್ಷೆರ್ ಪದ್ಮನಾಭ ಅಮ್ಮೇರಿ, ಕಾರ್ಯದರ್ಶಿ ಪವನ್ ಕುಮಾರ್ ಎ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

Feb 3rd: Sri Gejjegiri Kshetra Mahatmay Yakshagana play by Gejjegiri Mela

The Gejjegiri Mela will play Gejjegiri Kshetra Mahatmay Yakshagana play at Ammerikotya in Feb 3rd.

The 13 th annual Jaya Vijaya Jodukambala at Jeppumuger on February 18 th ಫೆ.18: ಜಪ್ಪಿನಮೊಗೆರ್ ಡ್ 13ನೇ ವರ್ಷದ ಜಯ ವಿಜಯ ಜೋಡುಕರೆ ಕಂಬುಲ

ಕುಡ್ಲ: ಜಪ್ಪಿನಮೊಗೆರ್ ಜಯ ವಿಜಯ ಜೋಡುಕರೆ ಕಂಬುಲ ಸಮಿತಿದ ವತಿರ್ದ್ ಜಪ್ಪಿನಮೊಗೆರ್ ಪೇಂಟೆದ ನೇತ್ರಾವತಿ ತುದೆ ಬರಿಟ್ಟ್ ಕೀರ್ತಿಶೇಷ ಜೆ. ಜಯಗಂಗಾಧರ ಶೆಟ್ಟಿ ಮೆರೆನ ನೆಂಪುಗಾದ್ 13ನೇ ವರ್ಷದ ಫ್ಲಡ್ ಲೈಟ್ ಜಯ ವಿಜಯ ಜೋಡುಕರೆ ಕಂಬುಲ ಫೆ‌.18 ಸನಿಯಾರ ನಡಪರೆ ಉಂಡು.

ಈ ಲೇಸ್ ದ ಸುಧಾರಿಕೆನ್ ನಿತೇಶ್ ಶೆಟ್ಟಿ ಎಕ್ಕಾರ್, ಸಾಹಿಲ್ ರೈ, ಅಭಿಷೇಕ್ ಶೆಟ್ಟಿ ಪಡೀಲ್, ಆರ್ ಜೆ ರೇಡಿಯೋ ಸಾರಂಗ್ ಮಲ್ಪೆರೆ ಉಲ್ಲೆರ್. ಈ ಲೇಸ್ ಗ್ ಕಂಬುಲದ ಅಭಿಮಾನಿಲು ಮಾತ ತನ್ನ ಎರ್ಲುದೊಟ್ಟಿಗೆ ಬತ್ತ್ ದ್, ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಅಧ್ಯಕ್ಷೆರ್ ಕಂರ್ಭಿಸ್ಥಾನ ಶ್ರೀ ವೈದ್ಯನಾಥ ದೈವೊಲ್ಯದ ಆಡಳಿತ ಮೊಕ್ತೇಸೆರ್ ಜೆ.ಅನಿಲ್ ಶೆಟ್ಟಿ ಮನ್ಕುತೋಟಗುತ್ತು, ಗೌರವಾಧ್ಯಕ್ಷೆರ್ ಕುಡ್ಲದ ಶಾಸಕೆರ್ ಡಿ. ವೇದವ್ಯಾಸ ಕಾಮತ್, ಮಾರ್ಗದರ್ಶಕೆರ್ ಮಾಜಿ ಉಸ್ತುವಾರಿ ಸಚಿವೆರ್ ಜೆ. ಕೃಷ್ಣ ಪಾಲೆಮಾರ್, ಕಾರ್ಯಾಧ್ಯಕ್ಷೆರ್ ಬೊಂಬೈದ ಎಮ್ ಡಿ ಸುತೇಜ್ ಎಂಟರ್ ಪ್ರೈಸಸ್ ದ ಎಚ್ ಸುಧಾಕರ ಶೆಟ್ಟಿ, ಜಪ್ಪಿನಮೊಗೆರ್ ವಾರ್ಡ್ ದ ಕಾರ್ಪೊರೇಟರ್‌ ವೀಣಾಮಂಗಳ, ಕಂಕನಾಡಿ ಬಿ ವಾರ್ಡ್ ದ ಕಾರ್ಪೊರೇಟರ್ ಟಿ. ಪ್ರವೀಣ್ ಶೆಟ್ಟಿ ಆಳ್ವ, ಕುಡ್ಲದ ಎಮ್ ಡಿ ಪಾಲ್ಕಿ ರೆಸ್ಟೋರೆಂಟ್ ದ ರಾಜೀವ ಶೆಟ್ಟಿ ಮನ್ಕುತೋಟಗುತ್ತು, ಕುಡ್ಲ ಚಾವಡಿ ಹೋಟೆಲ್ ದ ಸಂತೋಷ ಆಳ್ವ ತೋಚಲಗುತ್ತು, ‌ಮರೋಳಿ ಶ್ರೀ ಸೂರ್ಯನಾರಾಯಣ ದೇವಲ್ಯದ ಅಭಿವೃದ್ಧಿ ಸಮಿತಿದ ಕಾರ್ಯದರ್ಶಿ ಸಂದೀಪ್ ಶೆಟ್ಟಿ ಎಕ್ಕೂರು, ಪ್ರಧಾನ ಕಾರ್ಯದರ್ಶಿ ಜೆ‌. ಉಮೇಶ್ ಅತಿಕಾರಿ, ಮುಖ್ಯ ಕಾರ್ಯದರ್ಶಿಲು ಸುಭಾಷ್ ವಿ. ಅಡಪ್ಪ, ಜೆ.‌ ಶ್ರೀಧರ್ ಶೆಟ್ಟಿ ತಾರ್ದೊಲ್ಯ, ಜೆ. ಸುಧಾಕರ್, ರವಿರಾಜ್ ಶೆಟ್ಟಿ ಕಡೆಕಾರ್, ಪ್ರಧಾನ ಕೋಶಾಧಿಕಾರಿ ಜೆ‌. ಬಾಲಕೃಷ್ಣ ಶೆಟ್ಟಿ, ಪ್ರಕಾಶ್ ಮೇಲಾಂಟ, ಕೋಶಾಧಿಕಾರಿ ಶೇಖರ ಕಿಲ್ಲೆ ಪಡುಹಿತ್ಲು, ಗುರುರಾಜ್ ಶೆಟ್ಟಿ ಲೆಪ್ಪೋಲೆಡ್ ತೆರಿಪಾದೆರ್.

Tulu lipi nameplate put up at Sri Poomani, Kinnimani, Dhoomavathi Daivastana,Mukkunja ಮುಕ್ಕುಂಜ ಶ್ರೀ ಪೂಮಾಣಿ ಕಿನ್ನಿಮಾಣಿ, ಧೂಮಾವತಿ ಬೊಕ್ಕ ಪರಿವಾರ ದೈವೊಲೆನ ದೈವೊಲ್ಯಡ್ ತುಲು ಲಿಪಿ ಪುದರ್ ಪಲವೆ ಬುಡುಗಡೆ

ಕಾಸ್ರೋಡು ಜಿಲ್ಲೆ ಬಳ್ಳೂರುದ ಮುಕ್ಕುಂಜ ಶ್ರೀ ಪೂಮಾಣಿ ಕಿನ್ನಿಮಾಣಿ, ಧೂಮಾವತಿ ಬೊಕ್ಕ ಪರಿವಾರ ದೈವೊಲೆನ ದೈವೊಲ್ಯಡ್ ಪೊಸ ಪಾಕ ಶಾಲೆ ಜ.31ಕ್ಕ್ ಉದಿಪನ ಆಂಡ್.

ಅಂಚೆನೆ ನೇಮದ ಪೊರ್ತುಡು ತುಲು ಲಿಪಿ ಪುದರ್ ಪಲವೆನ್ ಮುಕ್ಕುಂಜ ಕ್ಷೇತ್ರದ ಆಡಳಿತಾಧಿಕಾರಿ ಶಂಕರ ಕಡಂಬಳಿತ್ತಾಯ ಮೇರ್ ಬುಡುಗಡೆ ಮಲ್ತೆರ್. ಮಲ್ಲ ಬಿನ್ನೆರಾದ್ ಜೈ ತುಲುನಾಡ್ (ರಿ.) ಸಂಘಟನೆದ ಉಪಾಧ್ಯಕ್ಷೆರ್ ಹರಿಕಾಂತ್ ಸಾಲ್ಯಾನ್ ಕಾಸ್ರೋಡು, ಜೈ ತುಲುನಾಡ್ (ರಿ.) ಕಾಸ್ರೋಡು ಘಟಕದ ಜತೆ ಕಾರ್ಯದರ್ಶಿ ಜಗನ್ನಾಥ್ ಕುಲಾಲ್, ಮುಕ್ಕುಂಜ ಫ್ರೆಂಡ್ಸ್ ಕ್ಲಬ್ ಅಧ್ಯಕ್ಷೆರ್ ಪ್ರದೀಪ್ ಸುವರ್ಣ ಬೊಕ್ಕ ಸದಸ್ಯೆರ್ ಇತ್ತೆರ್.

ಅವೆರ್ದ್ ಬೊಕ್ಕ ಜೈ ತುಲುನಾಡ್ (ರಿ.) ಸಂಘಟನೆದ ಲೆಕ್ಕೊಡು ಶಂಕರ ಕಡಂಬಳಿತ್ತಾಯ ಮೆರೆಗ್ ತಮ್ಮನ ಮಲ್ತೆರ್. ಲೇಸ್ ಗ್ ಬತ್ತಿನ ಬಿನ್ನೆರೆನ್ ಜಾನಪದ ಬೊಕ್ಕ ನಾಟಕ ಕಲಾವಿದೆರಾಯಿನ ಚಂದ್ರಶೇಖರ ಆಚಾರ್ಯ ನಾಟೆಕಲ್ಲು ಎದ್ಕೊನಿಯೆರ್. ಬಳ್ಳೂರು ಗ್ರಾಮ ಪಂಚಾಯತ್ 8 ನೇ ವಾರ್ಡ್ ಮೆಂಬರ್ ಶ್ರೀಪತಿ ಕಡಂಬಳಿತ್ತಾಯ ಸೊಲ್ಮೆ ಸಂದಾಯೆರ್.

Committee formed to work for the procuring status to Tulu language is appreciable- A C Bandari ತುಳು ಭಾಷೆಗ್ ತಾನಮಾನ ಕೊರಿಯೆರೆ, ಸಮಿತಿ ರಚನೆ ಮಲ್ತಿನವು ಎಡ್ಡೆ ಬೇಲೆ: ಎ.ಸಿ. ಭಂಡಾರಿ

ಕುಡ್ಲ: ಅಖಿಲ ಭಾರತ ತುಳು ಒಕ್ಕೂಟ(ರಿ.) ಜಿಲ್ಲೆ, ರಾಜ್ಯಲೆಡ್ ತುಳು ಭಾಷೆ, ಸಂಸ್ಕೃತಿ, ಅಭಿವೃದ್ಧಿ ನೆಲೆಟ್ ಬೇಲೆ ಮಲ್ಪುನಕುಲು ತುಳು ಸಂಘಟನೆದ ಸದಸ್ಯೆರಾದ್ ಬೇಲೆ ಮಲ್ತೊಂದು ಉಲ್ಲೆರ್. ರಾಜ್ಯಡ್ ತುಳು ಭಾಷೆದ ತಾನಮಾನಗಾದ್ ಸುಮಾರ್ ವರ್ಷೋರ್ದಿಂಚ ಬಿನ್ನಾಪು, ಪೊರ್ಂಬಾಟ ಮಲ್ಪುನ ಮುಖೇನ ಸರಕಾರಗ್ ತೆರಿಪಾಯೆರೆ ಪ್ರಯತ್ನ ಮಲ್ತೊಂದು ಉಲ್ಲೆರ್. ಅಕೇರಿಗ್ ಸರಕಾರ ಕೋಟಿಗಟ್ಟಲೆ ತುಳುವೆರೆನ ಸುಮಾರ್ ವರ್ಷದ ಬಿನ್ನಾಪುಗ್ ಬಿಲೆ ಕೊರ್ದು ತುಳು ಭಾಷೆಗ್ ತಾನಮಾನ ಕೊರ್ಪುನ ಸಮಿತಿ ರಚನೆ ಮಲ್ತ್ ದ್, ವರದಿ ಕೊರಿಯೆರೆ ದುಂಬಾಯಿನವು ಎಡ್ಡೆದ ಬುಲೆವಣಿಗೆ ಪಂದ್ ಅಖಿಲ ಭಾರತ ತುಳು ಒಕ್ಕೂಟ (ರಿ.)ದ ಅಧ್ಯಕ್ಷೆರ್ ಎ.ಸಿ. ಭಂಡಾರಿ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

ಇಡೀ ದೇಶಡ್ ತುಳು ಸಂಘಟನೆಲು, ತುಳು ಭಾಷೆದ ಅಭಿಮಾನಿಲು ಮಾತೆರ್ಲಾ ಒಟ್ಟು ಸೇರ್ದ್ ಡಾ. ಮೋಹನ್‌ ಆಳ್ವ ಮೆರೆನ ಗುರ್ಕಾರ್ಮೆದ ಸಮಿತಿದೊಟ್ಟಿಗೆ ಒಗ್ಗಟ್ಟಾದ್ ಬೇಲೆ ಮಲ್ಪೊಡಾಪುಂಡು. ಅತ್ತಂದೆ ದೇಶದ ಬೇತೆ ಬೇತೆ ಭಾಗಡ್ ಇಪ್ಪುನ ಸಾರ ಸಾರ ತುಳುವೆರ್ ತುಳು ಸಂಘಟನೆದ ಮುಖೇನ ತುಳು ಭಾಷೆ ಸಂಸ್ಕೃತಿದ ನಿರಂತರ ಲೇಸ್ ನ್ ಆಯೋಜನೆ ಮಲ್ಪುನೆರ್ದಾವೆರ ತನ್ನ ಮಾತೃಭಾಷೆದ ಭದ್ರತೆಗ್ ಬೆನೊಡಾಪುಂಡು ಪಂದ್ ಪಂಡೆರ್. ಡಾ. ಮೋಹನ್‌ ಆಳ್ವ ಮೆರೆನ ಗುರ್ಕಾರ್ಮೆ ದ ಸಮಿತಿಡ್ ತುಳು ತಜ್ಞೆರ್, ತುಳು ಭಾಷಾ ಅಭಿಮಾನಿಲು, ಸರಕಾರದ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ನಿರ್ದೇಶಕೆರ್ ಉಲ್ಲೆರ್. ಆಯಿನಾತ್ ಬೇಗ ವರದಿ ಒಪ್ಪುವೊಡು ಪಂದ್ ಉಲ್ಲೆರ್. ಅತ್ತಂದೆ ಮೆರೆನೊಟ್ಟಿಗೆ ತುಳುವೆರ್, ಸಂಘಟಿತೆರಾದ್ ಒಟ್ಟಿಗೆ ಇಪ್ಪುನವು ಕತ೯ವ್ಯ ಪಂದ್ ಪಂಡೆರ್. ಅಂಚನೆ ಸರಕಾರ ನನಾಂಡಲ ಪೊರ್ತು ಕಲೆವಂದೆ ತುಳುವೆರೆನ ಬಿನ್ನಾಪುಗ್ ಸ್ಪಂದಿಸಾದ್ ತಾನಮಾನ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.

ವರದಿ: ಮುಲ್ಕಿ ಕರುಣಾಕರ ಶೆಟ್ಟಿ

Committee formed to work for the procuring status to Tulu language is appreciable- A C Bandari

Manglore The Akila Baratha Tulu Okkuta( R) is working on the district and state level for the betterment of Tulu language and it’s cultural development. We have been working for years to get status for Tulu language and the recent move of the government to form a committee to get information about making Tulu the second language of the state,is appreciable. said A.C Bandhari president of Akila Baratha Tulu Okkuta.

Feb 3rd : Bahrain Billavas celebrate 19 th annual celebration ಫೆ.3: ಬೆಹರಿನ್ ಬಿಲ್ಲವಾಸ್ ದ 19ನೇ ವರ್ಷದ ಉಚ್ಚಯ

ಬೆಹರಿನ್ ದ ಅನಿವಾಸಿ ಬಿಲ್ಲವರ ಒಕ್ಕೂಟ ಆಯಿನ ಬೆಹರಿನ್ ಬಿಲ್ಲವಾಸ್ ದ 19 ನೇ ವರ್ಷದ ಉಚ್ಚಯ ಫೆ.3 ಕ್ ಶುಕ್ರಾರ ಮನಾಮಡ್ ಇಪ್ಪುನ ಇಂಡಿಯನ್ ಕ್ಲಬ್ ದ ಔಟ್ ಡೋರ್ ಸ್ಟೇಡಿಯಂಡ್ ಗೌಜಿಡ್ ನಡಪರೆ ಉಂಡು. ‌

ಹರೀಶ್ ಪೂಜಾರಿ ಮೆರೆನ ಗುರ್ಕಾರ್ಮೆಡ್ ತುಳುನಾಡ ಉಚ್ಚಯ ದ ನಿಲೆಟ್ಟ್ ತುಳುನಾಡ್ ದ ಪೆರ್ಮೆದ ಸಾಂಸ್ಕೃತಿಕ ಲೇಸ್ ಮುಖೇನ ನಡಪರೆ ಉಂಡು. ಈ ಲೇಸ್ ಡ್ ಬಿಲ್ಲವ ಸಮುದಾಯದ ಸುಮಾರ್ 120 ಕ್ ಎಚ್ಚ ಕಲಾವಿದೆರೆನ ಮುಖೇನ ತುಳುನಾಡ್ ದ ಕಲೆ, ಸಂಸ್ಕೃತಿಲು ವೇದಿಕೆಡ್ ಬುಡುಗಡೆ ಆವರೆ ಉಂಡು. ತುಳುನಾಡ್ ದ ಗರಡಿ, ದೈವ ತಾನಲು, ಸಾಂಪ್ರದಾಯಿಕ ಬೇಸಾಯಲೆಡ್ ಉಪಯೋಗ ಮಲ್ಪುನ ಪುರಾತನ ಸೊತ್ತುಲು, ದೈನಂದಿನ ಜೀವನಡ್ ಉಪಯೋಗ ಮಲ್ತೊಂದು ಇತ್ತಿನ ಸೊತ್ತುಲೆನ ಇಸೇಸ ಆಯಿನ ಸೊತ್ತು ಪ್ರದರ್ಶನ ಈ ಲೇಸ್ ದ ಪ್ರಧಾನ ಆಕರ್ಷಣೆ ಆತ್ಂಡ್. ತುಳುನಾಡ್ ದ ಪುಗರ್ತೆದ ರಂಗಕರ್ಮಿ, ನಿರ್ದೇಶಕೆರ್ ಪರಮಾನಂದ ಸಾಲ್ಯಾನ್ ಮೆರೆನ ನಿರ್ದೇಶನಡ್ ಬಿಲ್ಲವ ಸಮುದಾಯದ 70 ಕ್ ಎಚ್ಚದ ಕಲಾವಿದೆರೆನ ಅಭಿನಯಡ್ “ಬಿರ್ದ್ ಬಿರ್ಸಾದಿಗೆದ ತುಳುನಾಡ್” ಪನ್ಪುನ ಒಂಜಿ ಗಂಟೆ ಕಾಲಾಧಿದ ನೃತ್ಯ ರೂಪಕ ಪ್ರದರ್ಶನ ಆವರೆ ಉಂಡು. ಮಲ್ಲ ಬಿನ್ನೆರಾದ್ ಸಚಿವೆರ್ ಕೋಟ ಶ್ರೀನಿವಾಸ್ ಪೂಜಾರಿ, ಪುಗರ್ತೆದ ನಟೆ ಸುಮನ್ ತಲ್ವಾರ್, ರಾಷ್ಟ್ರೀಯ ಬಿಲ್ಲವ ಮಹಾಮಂಡಲದ ಅಧ್ಯಕ್ಷೆರ್ ಡಾ|ರಾಜ್ ಶೇಖರ್ ಕೋಟ್ಯಾನ್, ಪುಗರ್ತೆದ ನ್ಯಾಯವಾದಿ ಬೊಕ್ಕ ಗೋಕರ್ಣನಾಥೇಶ್ವರ ದೇವಲ್ಯದ ಟ್ರೆಶರರ್ ಪದ್ಮರಾಜ್, ಇಂಡಿಯನ್ ಕ್ಲಬ್ ಬೆಹರಿನ್ ನೆತ್ತ ಅಧ್ಯಕ್ಷೆರ್ ಕೆ.ಎಂ. ಚೆರಿಯನ್, ಬೊಂಬೈ ಬಿಲ್ಲವ ಸಂಘದ ಅಧ್ಯಕ್ಷೆರ್ ಹರೀಶ್ ಜಿ. ಅಮೀನ್, ಒಡಿಪು ಯುವ ಬಿಲ್ಲವ ಅಧ್ಯಕ್ಷೆರ್ ಪ್ರವೀಣ್ ಪೂಜಾರಿ, ಬನ್ನಂಜೆ ಬಿಲ್ಲವ ಸೇವಾ ಸಂಘದ ಅಧ್ಯಕ್ಷೆರ್ ಬಿ. ಮಾಧವ ಪೂಜಾರಿ, ಬೊಂಬೈ ಬಿಲ್ಲವ ಸಂಘದ ಉಪಾಧ್ಯಕ್ಷೆರ್ ಸುರೇಶ್ ಕುಮಾರ್, ಉದ್ಯಮಿ ಹರೀಶ್ ಸಾಲ್ಯಾನ್ ಬರಿಯರೆ ಉಲ್ಲೆರ್.

Feb 3rd: Bahrain Billavas celebrate 19 th annual celebration

The NRI Billava Association,Bharain will hold their 19 th annual program in Friday at Indian club Manama.

The program will be presided by Harish Poojary and the theme of the day will be
‘ Tulunadu ‘.It will celebrate the rich culture, heritage, customs and folk of Tulunadu.More than 120 billawa artists from the island will put up a show presenting the cultural diversity of Tulunadu.A dance drama directed by renowned director Paramanand Salian with 70 artists on the show is another attraction.

The chief guests include minister Kota Srinivas Poojary, actor SumanTalwar, Rajshekhar Kotian president of National Billava Mahamandal and many other dignitaries.

Feb 19: Dubai Sri Satyanarayan Pooja Samithi to hold a collective Sri Satyanarayan Pooja ಫೆ.19: ದುಬೈ ಶ್ರೀ ಸತ್ಯನಾರಾಯಣ ಪೂಜಾ ಸಮಿತಿದ ಮುತಾಲಿಕೆಡ್ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ

ದುಬೈದ ಶ್ರೀ ಸತ್ಯನಾರಾಯಣ ಪೂಜಾ ಸಮಿತಿದ ಮುತಾಲಿಕೆಡ್ 15 ನೇ ವರ್ಷದ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ ಫೆ.19 ಕ್ ದುಬೈದ ಇಂಡಿಯನ್ ಅಕಾಡೆಮಿ ಸ್ಕೂಲ್ ಡ್ ನಡಪರೆ ಉಂಡು.

ಬೊಲ್ಪುಗು ಸಂಕಲ್ಪ, ಕಲಶ ಪ್ರತಿಷ್ಠಾಪನೆ, ಪೂಜಾ ವಿಧಿ ವಿಧಾನಲು ಸುರು, ಸತ್ಯನಾರಾಯಣ ಕಥಾಸಾರ, ಮಹಾಪೂಜೆ, ಮಹಾ ಮಂಗಳಾರತಿ ಆದ್ ಪ್ರಸಾದ ಕೊರಿಯೆರೆ ಉಂಡು. ‌ಅಂಚನೆ ಶ್ರೀ ರಾಜರಾಜೇಶ್ವರಿ ಭಜನಾ ತಂಡ ದುಬೈ ಬೊಕ್ಕ ಮೊಗವೀರ್ಸ್ ಭಜನಾ ಮಂಡಳಿ ದುಬೈ ಮೊಕ್ಲೆರ್ದ್ ಭಕ್ತಿ ಸಂಗೀತ ನಡಪರೆ ಉಂಡು. ಈ ಮಾತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು ಶ್ರೀ ಸತ್ಯನಾರಾಯಣ ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

Feb 19: Dubai Sri Satyanarayan Pooja Samithi to hold a collective Sri Satyanarayan Pooja

The Satyanarayan Pooja Samithi of Dubai will organise a collective 15th annual Sri Satyanarayan Pooja on February 19th at Indian Academy School, Dubai.

Along with the pooja rituals bajans will be organised by Sri Rajarajeshwari Bajana group and Mogaveer’s
Bajana mandal Dubai.

Feb 4-7: 79 th annual Shani Mahapooja and annual celebration – Kote Charitable trust ಫೆ.4-7: ಶ್ರೀ ಶನಿ ಮಹಾತ್ಮಾ ಪೂಜಾ ಸಮಿತಿ ಕೋಟೆ ಚಾರಿಟಬಲ್ ಟ್ರಸ್ಟ್ ನೆತ್ತ ಮುತಾಲಿಕೆಡ್ 79ನೇ ವರ್ಷದ ಶನಿ ಮಹಾಪೂಜೆ, ವಾರ್ಷಿಕ ಉಚ್ಚಯ

ನಾಲಾಸೋಪಾರ : ಶ್ರೀ ಶನಿ ಮಹಾತ್ಮಾ ಪೂಜಾ ಸಮಿತಿ ಕೋಟೆ ಚಾರಿಟಬಲ್ ಟ್ರಸ್ಟ್ ನೆತ್ತ ಮುತಾಲಿಕೆಡ್ 79ನೇ ವರ್ಷದ ಶನಿ ಮಹಾಪೂಜೆ ಬೊಕ್ಕ ವಾರ್ಷಿಕ ಉಚ್ಚಯ ಶ್ರೀಪ್ರಸ್ಥ 4ನೇ ಮಾರ್ಗ, ನಾಲಾಸೋಪಾರ ವಿರಾರ್ ಲಿಂಕ್ ಮಾರ್ಗದಲ್ಪ ಇಪ್ಪುನ ಮಂದಿರದ ಚಾವಡಿಡ್ ಫೆ.4 ರ್ದ್ 7 ಮುಟ್ಟ ನಡಪರೆ ಉಂಡು.

ಕೊಯ್ಯೂರು ನಂದಕುಮಾರ್ ತಂತ್ರಿಲೆನ ಮುತಾಲಿಕೆಡ್ ಧಾರ್ಮಿಕ ವಿಧಿ ನಡಪರೆ ಉಂಡು.
ಫೆ.4 ಸನಿಯಾರ ದೇವತಾ ಪ್ರಾರ್ತನೆ, ತೋರಣ ಮೂರ್ತ, ನವಕ ಪ್ರಧಾನ, (ಅಭಿಷೇಕ) ಗಣಪತಿ ಹೋಮ, ಕೊಡಿ ಏರ್ರೆ ಉಂಡು. ಬೊಕ್ಕ ಶನೀಶ್ಚರ ಮಂತ್ರ ಹೋಮ, ನಾಗದೇವ ಆಶ್ಲೇಷ ಪೂಜೆ, ಮಹಾಪೂಜೆ, ತೀರ್ಥ ಪ್ರಸಾದ ಕೊರಿಯೆರೆ, ಬೊಕ್ಕ ಶನಿಗ್ರಹಣಂತ ಪಾರಾಯಣ, ಬೊಕ್ಕ ಅನ್ನಸಂತರ್ಪಣೆ ನಡಪರೆ ಉಂಡು. ಬಯ್ಯಗ್ ಉಚ್ಚಯ, ರಾತ್ರೆ ಪೂಜೆ, ರಂಗಪೂಜೆ, ನಾಲ್ತ್ಯ ಚೆಂಡ್ ಆದ್ ಅನ್ನಸಂತರ್ಪಣೆ ನಡಪರೆ ಉಂಡು.
ಫೆ‌.5 ಐತಾರ ತುಡರ್ ಚೆಂಡ್, ದುರ್ಗಾ ಹೋಮ, ಮಹಾಪೂಜೆ, ತೀರ್ಥ ಪ್ರಸಾದ ಆದ್ ಅನ್ನಸಂತರ್ಪಣೆ ನಡಪರೆ ಉಂಡು. ಬೊಕ್ಕ ಉಚ್ಚಯ, ಪೂಜೆ, ಶ್ರೀ ಭೂತ ಚೆಂಡ್, ಶಯನ ಉಚ್ಚಯ, ಕವಾಟ ಬಂಧನ ಆದ್ ಅನ್ನಸಂತರ್ಪಣೆ ನಡಪರೆ ಉಂಡು. ಫೆ.6 ಸೋಮಾರ ಕವಾಟ ಉದಿಪನ, ಅಭಿಷೇಕ, ಮಹಾಪೂಜೆ, ಚೂರ್ಣ ಉಚ್ಚಯ, ಅನ್ನಸಂತರ್ಪಣೆ ನಡಪರೆ ಉಂಡು. ಬೊಕ್ಕ ಅವಭೃತ ಉಚ್ಚಯ, ದೇವೆರೆನ ದರ್ಶನ, ಕೊಡಿ ಜಾವರೆ ಉಂಡು. ಬೊಕ್ಕ ರಾತ್ರೆ ಪೂಜೆ ಆದ್ ಅನ್ನಸಂತರ್ಪಣೆ ನಡಪರೆ ಉಂಡು. ಫೆ.7 ಅಂಗಾರೆ ಸಂಪ್ರೋಕ್ಷಣೆ, ಮಂತ್ರಾಕ್ಷತೆ ನಡಪರೆ ಉಂಡು.
ಈ ಮಾತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ಶನೀಶ್ವರ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಟ್ರಸ್ಟಿಲು, ವ್ಯವಸ್ಥಾಪಕ ಸಮಿತಿ, ಪೂಜಾ ಸಮಿತಿ, ಮಹಿಳಾ ವಿಭಾಗ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

Feb 4-7: 79 th annual Shani Mahapooja and annual celebration – Kote Charitable trust

Nalasopara: Sri Shani Mahatmay Pooja Samithi; Kote Charitable trust will organise the 79 th annual Shani Mahapooja and annual celebration at Nalasopara from the 4 th of February to 7th.

The rituals will be under the guidance of Koiyuer Nanda Kumar Tanthri .

Feb 4-11: Premier show of the movie ‘Pili’ in Abudhabi ಫೆ.4-11: ದುಬೈ, ಅಬುದಾಭಿಡ್ “ಪಿಲಿ” ಪಿಕ್ಚರ್ ದ ಪ್ರೀಮಿಯರ್‌ ಶೋ

ದುಬೈ: ಎನ್ಎನ್ಎಮ್ ಪ್ರೊಡಕ್ಷನ್ಸ್ ದಡಿಟ್ ತಯಾರ್ ಆಯಿನ ದುಬೈದ ಭರತ್ ರಾಮ್ ರೈ ನಿರ್ಮಾಣದ, ಆತ್ಮಾನಂದ ರೈ ಸಹ ನಿರ್ಮಾಣದ ಪಿಲಿ ಪಿಕ್ಚರ್ ದ ಪ್ರೀಮಿಯರ್‌ ಪ್ರದರ್ಶನ ದುಬೈದ ದೇರಾದ ಗ್ಯಾಲರಿದ ಸಿನಿಮಾ ಹಯಾತ್ ರೀಜೆನ್ಸ್ ಡ್ ಫೆ.4 ರಾತ್ರೆ 7.30 ಕ್ ಬೊಕ್ಕ ಫೆ.11 ಕ್ 8 ಗಂಟೆಗ್ ಅಬುಧಾಬಿಡ್ ಪ್ರದರ್ಶನ ಆಪುಂಡು.

ಈ ಪಿಕ್ಚರ್ ಡ್ ನಾಯಕೆಯಾದ್ ಭರತ್ ಭಂಡಾರಿ ಬೊಕ್ಕ ನಾಯಕಿಯಾದ್ ಸ್ವಾತಿ ಶೆಟ್ಟಿ ಅಭಿನಯ ಮಲ್ದೆರ್. ನೆಕ್ಕ್ ಪಿಲಿಬೈಲ್ ಯಮುನಕ್ಕ ಪಿಕ್ಚರ್ ದ ಮಯೂರ್ ಆರ್ ಶೆಟ್ಟಿ ನಿರ್ದೇಶನ ಮಲ್ದೆರ್. ತುಳುನಾಡ್ ದ ಮಾತ ಪುಗರ್ತೆದ ಹಾಸ್ಯ ಕಲಾವಿದೆರ್ ಈ ಪಿಕ್ಚರ್ ಡ್ ಅಭಿನಯ ಮಲ್ದೆರ್. ವಿಜಯಕುಮಾರ್ ಕೊಡಿಯಾಲ್ ಬೈಲ್ ಪ್ರಮುಖ ಪಾತ್ರಡ್ ಅಭಿನಯ ಮಲ್ದೆರ್. ಈ ಪಿಕ್ಚರ್ ದ ಪ್ರೀಮಿಯರ್‌ ಪ್ರದರ್ಶನನ್ ಓವರ್ಸೀಸ್ ಗಲ್ಫ್ ಮೂವೀಸ್ ತಂಡ ಮಲ್ತೊಂದುಂಡು. ನೆತ್ತ ಟಿಕೆಟ್ ಗಾದ್ ಈ ನಂಬರ್ ಗ್ ತೆರಿಪಾವೊಲಿ ಪಂದ್ ಪಿಕ್ಚರ್ ದ ನಿರ್ಮಾಪಕೆರ್ ಮಾಧ್ಯಮ ಪ್ರಕಟಣೆಡ್ ತೆರಿಪಾದೆರ್.
ಗೋಕುಲ್:0582538652,
ಮಂಜುನಾಥ್: 0557220264,
ಸಚಿನ್ ಭಂಡಾರಿ:0509436639

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)

Feb 4-11: Premier show of the movie ‘Pili’ in Abudhabi

Dubai: The premier show of the movie
‘Pili’ provided by Bharatram Rai under
N N M Productions will be held on February 4-11 th at Abudhabi.

Feb 1-3: Sri Atmaram Bajana Mandira,Kanakamajal- Golden celebration of annual Bajana program ಫೆ.1-3: ಕನಕಮಜಲು ಶ್ರೀ ಆತ್ಮಾರಾಮ ಭಜನಾ ಮಂದಿರ (ರಿ.)ದ ಸುವರ್ಣ ಸಂಭ್ರಮ ಭಜನೆ ಉಚ್ಚಯ

ಸುಳ್ಯ: ಕನಕಮಜಲು ಶ್ರೀ ಆತ್ಮಾರಾಮ ಭಜನಾ ಮಂದಿರ (ರಿ.) ನೆತ್ತ ಸುವರ್ಣ ಸಂಭ್ರಮ ಭಜನೆ ಉಚ್ಚಯ, ಅಖಂಡ ಭಜನಾ ಮಂಗಳ ಉಚ್ಚಯ ಫೆ.1 ರ್ದ್ 3 ಮುಟ್ಟ ನಡಪರೆ ಉಂಡು.

ಈ ಭಜನಾ ಮಂಗಳ ಉಚ್ಚಯಗ್ ಬತ್ತ್ ದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಸುವರ್ಣ ಸಂಭ್ರಮ ಭಜನೆ ಉಚ್ಚಯ ಸಮಿತಿದ ಅಧ್ಯಕ್ಷೆರ್, ಸದಸ್ಯೆರ್, ಆಡಳಿತ ಮಂಡಳಿದ ಅಧ್ಯಕ್ಷೆರ್ ಬೊಕ್ಕ ಸದಸ್ಯೆರ್, ಕನಕಮಜಲು ಶ್ರೀ ಆತ್ಮಾರಾಮ ಭಜನಾ ಮಂದಿರ (ರಿ.) ನೆತ್ತ ಊರುದ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

Udyavara Mada – Mass marriage ceremony invitation released ಉದ್ಯಾವರ ಮಾಡ : ಸಾಮೂಹಿಕ ಮದಿಮೆ ಲೇಸ್ ದ ಲೆಪ್ಪೋಲೆ ಬುಡುಗಡೆ

ಉದ್ಯಾವರ ಮಾಡ : ಸಾಮೂಹಿಕ ಮದಿಮೆ ಲೇಸ್ ದ ಲೆಪ್ಪೋಲೆ ಬುಡುಗಡೆ ಲೇಸ್ ಕೋಡೆ ಬಯ್ಯಗ್ (ಜ.31) ಕೊಡುಗೈ ದಾನಿ ಹೇರಂಭ ಇಂಡಸ್ಟ್ರೀಸ್ ದ ಡೈರೆಕ್ಟರ್ ಸದಾಶಿವ ಶೆಟ್ಟಿ ಮೆರೆನ ಇಲ್ಲಲ್ ಸರಳವಾದ್ ನಡತ್ಂಡ್.

ಸಂಸ್ಥೆದ ಪೂಜ್ಯನೀಯ ಗುರುಕುಲಾಯಿನ ರಾಜ ಬೆಲ್ಚಪ್ಪಾಡೆರ್ ಸದಾಶಿವ ಶೆಟ್ಟಿ ಮೆರೆಗ್ ಶಾಲ್ ಪಾಡ್ದ್ ತಮ್ಮನ ಮಲ್ತೆರ್. ಬೊಕ್ಕ ಲೀಲಾವತಿ ಅಮ್ಮ ಮೆರೆಗ್ ಪ್ರೇಮಲತಾ ರಾಜ ಬೆಲ್ಚಪ್ಪಾಡ ಮೇರ್ ಶಾಲ್ ಪಾಡ್ದ್ ತಮ್ಮನ ಮಲ್ತೆರ್.

ಈ ಪೊರ್ತುಡು ಸಂಸ್ಥೆದ ಪ್ರಧಾನ ಕಾರ್ಯದರ್ಶಿ ಜಯರಾಜ ಶೆಟ್ಟಿ, ಕಾರ್ಯದರ್ಶಿಲಾಯಿನ ತುಳಸಿದಾಸ್ ಮಂಜೇಶ್ವರ ಬೊಕ್ಕ ಯೋಗಿತ ಅಶೋಕ ಉದ್ಯಾವರ ಮಾಡ ಇತ್ತೆರ್.