Tulu News

ಮೇ14-22: ಶಿಶಿಲ ಶ್ರೀ ಶಿಶಿಲೇಶ್ವರ ದೇವಲ್ಯಡ್ ವರ್ಷಾಧಿದ ಜಾತ್ರೆ ಉಚ್ಚಯ

ಬೊಲ್ತೇರ್: ಶಿಶಿಲ ಶ್ರೀ ಶಿಶಿಲೇಶ್ವರ ದೇವಲ್ಯಡ್ ವರ್ಷಾಧಿದ ಜಾತ್ರೆ ಉಚ್ಚಯ ಮೇ14-22 ಮುಟ್ಟ ನಂತರ ಉಂಡು.

ಮೇ14 ಐತಾರ ರಾತ್ರೆ ವಾಸ್ತು ಬಲಿ, ವಾಸ್ತು ಪೂಜೆ ಆದ್ ಕೊಡಿ ಏರುಂಡು.

ಮೇ15 ಸೋಮಾರ ಬೊಲ್ಪುಗು ಶಾಂತಿ ಹವನ, ರಾತ್ರೆ ಕುದುರೆಮುಖ ದೈವೊದ ನೇಮ, ಉಗ್ರಾಣ ದಿಂಜಾಯೆರೆ, ದೇವೆರೆನ ಉಚ್ಚಯ ಸುರು ಆಪುಂಡು.

ಮೇ16 ಅಂಗಾರೆ ಬೊಲ್ಪುಗು ಅಂಗಣ ಉಚ್ಚಯ, ರಾತ್ರೆ ದೇವೆರೆನ ಉಚ್ಚಯ, ಬೊಳ್ಳಿಕಟ್ಟೆ ಪೂಜೆ ನಡಪರೆ ಉಂಡು.

ಮೇ17 ಬುಧಾರ ಬೊಲ್ಪುಗು ಅಂಗಣ ಉಚ್ಚಯ, ರಾತ್ರೆ ಉಚ್ಚಯ, ಸವಾರಿ ಮಂಟಪ ಕಟ್ಟೆ ಪೂಜೆ ನಡಪರೆ ಉಂಡು.

ಮೇ18 ಗುರುವಾರ ಬೊಲ್ಪುಗು ಅಂಗಣ ಉಚ್ಚಯ, ದೇವೆರೆನ ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ರಾತ್ರೆ ಬಂಗಾರ್ ದ ಕಟ್ಟೆ ಪೂಜೆ, ಬೊಕ್ಕ ಸರಯೂ ಬಾಲ ಯಕ್ಷ ವೃಂದ ಕೋಡಿಕ್ಕಲ್ಸ್ ಮೊಕ್ಲೆರ್ದ್ ವೀರ ವೀರೇಶ ಆಟ ನಡಪರೆ ಉಂಡು.

ಮೇ19 ಸುಕ್ರಾರ ಬೊಲ್ಪುಗು ಅಂಗಣ ಉಚ್ಚಯ, ರಾತ್ರೆ ಮಲ್ಲ ತೇರ್ ಉಚ್ಚಯ, ಕವಾಟ ಬಂಧನ ನಡಪರೆ ಉಂಡು.

ಮೇ20 ಸನಿಯಾರ ಬೊಲ್ಪುಗು ಕವಾಟ ಉದಿಪನ, ಮಹಾಪೂಜೆ ಬಯ್ಯಗ್ ತೆಪ್ಪ ಉಚ್ಚಯ, ಕಟ್ಟೆಪೂಜೆ, ವಸಂತಕಟ್ಟೆಡ್ ಓಕುಳಿ, ಮೀನಗುಂಡಿಡ್ ಅವಭೃತ ಉಚ್ಚಯ ಆಯಿ ಬೊಕ್ಕ ಕೊಡಿ ಜಾಯೆರೆ ಉಂಡು.‌

ಮೇ21 ಐತಾರ ಬೊಲ್ಪುಗು ಶ್ರೀ ಶಿಶಿಲೇಶ್ವರ ದೇವೆರೆನ ಮೂಲತಾನ ಕುಮಾರಗುಡ್ಡೆಡ್ ರುದ್ರಾಭಿಷೇಕ, ಮಹಾಪೂಜೆ, ಕುಮಾರಾದಿ ದೈವೊಲೆಗ್ ನೇಮ, ರಾತ್ರೆ ಗೋಪುರದ ಬಾಕಿಲ್ ಡ್ ಚಕ್ರವರ್ತಿ ಕೊಡಮಣಿತ್ತಾಯ ಬೊಕ್ಕ ಪರಿವಾರ ದೈವೊಲೆಗ್ ನೇಮ, ವರ್ಷಾಧಿದ ಕಟ್ಟೆದ ಕೈತಲ್ ದೈವೊಲೆನ ನೇಮ ನಡಪರೆ ಉಂಡು.

ಮೇ22 ಸೋಮಾರ ಬೊಲ್ಪುಗು ಮಹಾಪೂಜೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಮೇ 9-12: ಮುಂಡತ್ತಾಯ ಶ್ರೀ ಪಿಲಿ ಚಾಮುಂಡಿ ಬಂಟ ದೈವೊಲ್ಯಡ್ ಬ್ರಹ್ಮಕಲಶ ಉಚ್ಚಯ

ಉಳ್ಳಾಲ: ಕೊಂಡಾಣದ ಮುಂಡತ್ತಾಯ ಶ್ರೀ ಪಿಲಿ ಚಾಮುಂಡಿ ಬಂಟ ದೈವೊಲ್ಯಡ್ ಶ್ರೀ ಪಿಲಿ ಚಾಮುಂಡಿ ಬಂಟ ವೈದ್ಯನಾಥ ಪರಿವಾರ ದೈವೊಲೆನ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶ ಉಚ್ಚಯ ಮೇ9-12 ಮುಟ್ಟ ನಡಪರೆ ಉಂಡು.

ಉಚ್ಚಿಲತ್ತಾಯ ನೀಲೇಶ್ವರ ಪದ್ಮನಾಭ ತಂತ್ರಿಲೆನ ಉಪಸ್ಥಿತಿಡ್, ವಾಸ್ತುಶಿಲ್ಪಿ ಬೆದ್ರಡ್ಕ ರಮೇಶ ಕಾರಂತ ಮೆರೆನ ಮಾರ್ಗದರ್ಶನಡ್, ಬಿ. ಗಂಗಾಧರ ಶಾಂತಿ ತಂತ್ರಿಲೆನ ಮುತಾಲಿಕೆಡ್, ಚರಣ್ ಬೇಬಿ ನಾರಾಯಣ ಪಂಡಿತ್ ಕುಂಪಲ ಮೆರೆನ ಪಾಲ್ವಿಕೆಡ್ ಈ ಲೇಸ್ ದ ವೈದಿಕ ವಿಧಿ ವಿಧಾನಲು ನಡಪರೆ ಉಂಡು.

ಮೇ9 ಅಂಗಾರೆ ಮಧ್ಯಾಹ್ನ ಉಗ್ರಾಣ ಮೂರ್ತ, ಪುದೆಕಾಣಿಕೆ ಕೊನೊಯೆರೆ ಉಂಡು.

ಮೇ10 ಬುಧಾರ ಬಯ್ಯಗ್ ತಂತ್ರಿಲು ಬರಿಯೆರೆ, ಗರಡಿಡ್ ಪ್ರಸಾದ ಪರಿಗ್ರಹ, ವಾಸ್ತುಬಲಿ ಬೊಕ್ಕ ಧರ್ಮಸಭೆ, ರಾತ್ರೆ ಕರಾವಳಿದ ಪುಗರ್ತೆದ ಹಿನ್ನೆಲೆ ಗಾಯಕಿ ತೃಪ್ತಿ ಉಚ್ಚಿಲ್ ಬೊಕ್ಕ ರಿದಂ ಮ್ಯೂಸಿಕ್ ಬ್ಯಾಂಡ್ ಕೂಟದಕ್ಲೆರ್ದ್ ಭಕ್ತಿ ಗಾನ ಸುಧೆ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಮೇ11 ಗುರುವಾರ ಬೊಲ್ಪುಗು ಗರಡಿಡ್ ಗಣಹೋಮ, ಪೊಸ ಮಂಚ ನ್ಯಾಸ ಕಲಶಾಭಿಷೇಕ, ಬೊಕ್ಕ ಪಿಲಿಚಾಮುಂಡಿ ಸನ್ನಿಧಿಡ್ ಗಣಹೋಮ, ಶಾಂತಿ ಹೋಮ, ಬಯ್ಯಗ್ ಭಂಡಾರ ಇಲ್ಲರ್ದ್ ಪಿಲಿಚಾಮುಂಡಿ ದೈವೊದ ಭಂಡಾರ ಮೆರವಣಿಗೆಡ್ ಬರಿಯೆರೆ ಉಂಡು. ಬೊಕ್ಕ ಪ್ರಜಾಪಿತ ಬ್ರಹ್ಮಕುಮಾರಿ ಈಶ್ವರೀಯ ವಿಶ್ವ ವಿದ್ಯಾಲಯ ತೊಕ್ಕೊಟ್ಟು ನೆತ್ತ ಸದಸ್ಯೆರೆರ್ದ್ ಅಮರನಾಥನ ಅಮರ ಕಥೆ, ರಾತ್ರೆ ಬ್ರಹ್ಮಕಲಶ ಪೂಜೆ, ಪರಿಕಲಶ ಪೂಜೆ ಬೊಕ್ಕ ಪುತ್ತೂರ್ ಜಗದೀಶ್ ಆಚಾರ್ಯ ಬೊಕ್ಕ ಕೂಟದಕ್ಲೆರ್ದ್ ಸಂಗೀತ ಗಾನ ಸಂಭ್ರಮ ನಡಪರೆ ಉಂಡು.

ಮೇ12 ಸುಕ್ರಾರ ಬೊಲ್ಪುಗು ಗಣಹೋಮ, ಬೊಕ್ಕ ಗುಳಿಗ, ಕೊರತಿ ಸಾನಿಧ್ಯಡ್ ಪುನರ್ ಪ್ರತಿಷ್ಠೆ, ಕಲಶಾಭಿಷೇಕ, ಬ್ರಹ್ಮಕಲಶಾಭಿಷೇಕ, ಮಹಾಪೂಜೆ ಬಯ್ಯಗ್ ಆಕಾಶವಾಣಿ ಕಲಾವಿದೆ ಮಂಜುಳಾ ಜಿ. ರಾವ್ ಇರಾ ಮೆರೆರ್ದ್ ಶ್ರೀ ಕೃಷ್ಣ ಕಾರುಣ್ಯ ಹರಿಕಥೆ, ಬೊಕ್ಕ ವಿಠಲ ನಾಯಕ್ ಕಲ್ಲಡ್ಕ ಬೊಕ್ಕ ಕೂಟದಕ್ಲೆರ್ದ್ ಗೀತಾ ಸಾಹಿತ್ಯ ಸಂಭ್ರಮ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ಪಿಲಿಚಾಮುಂಡಿ, ಬಂಟ ಬೊಕ್ಕ ಮುಂಡತ್ತಾಯ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಜಿತೇಂದ್ರ ಶೆಟ್ಟಿ ತಲಪಾಡಿ ಗುತ್ತು, ಗೌರವಾಧ್ಯಕ್ಷೆರ್ ಕುಳೂರು ಸದಾಶಿವ ಕೆ. ಶೆಟ್ಟಿ, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಕೃಷ್ಣ ಶೆಟ್ಟಿ ತಾಮಾರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ರಾಮಣ್ಣ ಶೆಟ್ಟಿ ಬೊಂಬೈ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮೇ12: ಖಂಡೇವು ಬೂಡುದ ಆದಿತ್ಯ ಮುಕ್ಕಾಲ್ದಿ ಮೆರೆಗ್ ಸಾರ್ವಜನಿಕ ಅಭಿನಂದನೆ ಲೇಸ್

ಚೇಳಾಯಿರ್ ಖಂಡಿಗೆ ಬೂಡು ಧರ್ಮರಸು ಶ್ರೀ ಉಳ್ಳಾಯ ದೈವೊಲ್ಯದ ಗಡಿ ಪ್ರಧಾನೆರಾದ್ 30 ವರ್ಷ ಸೇವೆ ಮಲ್ತಿನ ಆದಿತ್ಯ ಮುಕ್ಕಾಲ್ದಿ ಮೆರೆಗ್ ಮೇ12 ಕ್ಕ್ ಸುಕ್ರಾರ ಶ್ರೀ ಧರ್ಮರಸು ಉಳ್ಳಾಯ ಸನ್ನಿಧಾನದ ಖಂಡೆವು ಬೂಡು ಬೂಬ ಮುಕ್ಕಾಲ್ದಿ ವೇದಿಕೆಡ್ ಸಾರ್ವಜನಿಕ ಅಭಿನಂದನೆ ಲೇಸ್ ನಡಪರೆ ಉಂಡು.

ಮೇ12 ಕ್ಕ್ ಬಯ್ಯಗ್ ಖಂಡೇವು ಬೂಡುರ್ದು ಆದಿತ್ಯ ಮುಕ್ಕಾಲ್ದಿನೊಟ್ಟಿಗೆ, ಸ್ವಾಮೀಜಿಲು, ಧಾರ್ಮಿಕ ಮುಖಂಡೆರ್, ಬಿನ್ನೆರ್, ಮತ ಕ್ಷೇತ್ರದ ಗಡಿಪ್ರಧಾನೆರ್ ಬೊಕ್ಕ ಅಭಿಮಾನಿಲು ಮೆರವಣಿಗೆಡ್ ಕ್ಷೇತ್ರದ ಬೂಬ ಮುಕ್ಕಾಲ್ದಿ ವೇದಿಕೆಗ್ ಬರಿಯೆರೆ ಉಲ್ಲೆರ್.

ಅವೆರ್ದ್ ಬೊಕ್ಕ ಬಯ್ಯಗ್ ನಡಪುನ ಸಾರ್ವಜನಿಕ ಅಭಿನಂದನಾ ಲೇಸ್ ಡ್ ಒಡಿಯೂರು ಶ್ರೀ ಗುರುದೇವಾನಂದ ಸ್ವಾಮೀಜಿ, ಬೊಕ್ಕ ವಜ್ರದೇಹಿ ಮಠ ಗುರುಪುರದ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಶ್ರೀ ಕ್ಷೇತ್ರ ಕಟೀಲ್ ದ ಅರ್ಚಕೆರ್ ಅನಂತ ಪದ್ಮನಾಭ ಅಸ್ರಣ್ಣ ಎಡ್ಡೆಪ್ಪು ಬಯಕಿಯೆರೆ ಉಲ್ಲೆರ್. ಗೌರವ ಉಪಸ್ಥಿತಿಡ್ ಚೇಳಾಯಿರ್ ಶ್ರೀಪತಿ ಭಟ್, ಹಳೆಯಂಗಡಿ ರಂಗನಾಥ ಭಟ್ ಉಲ್ಲೆರ್. ಸಭಾಧ್ಯಕ್ಷತೆನ್ ಅಭಿನಂದನಾ ಸಮಿತಿದ ಅಧ್ಯಕ್ಷೆರ್ ಪಣಿಯೂರುಗುತ್ತು ಕರುಣಾಕರ ಶೆಟ್ಟಿ ಒಯಿಸೊನ್ವೆರ್. ಬ್ರಹ್ಮಶ್ರೀ ನಾರಾಯಣಗುರು ಅಧ್ಯಯನ ಪೀಠದ ನಿರ್ದೇಶಕೆರ್ ಡಾ.ಗಣೇಶ್ ಅಮೀನ್ ಸಂಕಮಾರ್ ಅಭಿನಂದನಾ ಭಾಷಣ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಮುಲ್ಕಿ ಸೀಮೆದ ಅರಸು ದುಗ್ಗಣ್ಣ ಸಾವಂತೆರ್, ಕುಡ್ಲ ಬಂಟರ ಯಾನೆ ನಾಡವರ ಮಾತೃಸಂಘದ ಅಧ್ಯಕ್ಷೆರ್ ಅಜಿತ್ ಕುಮಾರ್ ರೈ ಮಾಲಾಡಿ, ಎಂ ಆರ್ ಜಿ ಸಮೂಹ ಸಂಸ್ಥೆದ ಸಿಇಒ ಪ್ರಕಾಶ್ ಶೆಟ್ಟಿ, ಕುಡ್ಲ ಎ ಶ್ಯಾಮರಾಮ್ ಫೌಂಡೇಶನ್ ಬೊಕ್ಕ ಶ್ರೀನಿವಾಸ ಸಮೂಹ ಶಿಕ್ಷಣ ಸಂಸ್ಥೆದ ಸಹ ಕುಲಪತಿ ಡಾ. ಶ್ರೀನಿವಾಸ ರಾವ್, ಖಂಡೇವು ಬೂಡು ಭಾರತಿ ಶೆಟ್ಟಿ, ಜಾಗತಿಕ ಬಂಟರ ಸಂಘ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ಕುಡ್ಲ ದ.ಕ ಜಿಲ್ಲಾ ಸಹಕಾರಿ ಬ್ಯಾಂಕ್ ನಿರ್ದೇಶಕೆರ್ ಡಾ. ದೇವಿಪ್ರಸಾದ್ ಶೆಟ್ಟಿ ಬೆಳಪು, ಮುಲ್ಕಿ ರಾಷ್ಟ್ರೀಯ ಬಿಲ್ಲವ ಮಹಾಮಂಡಲ (ರಿ.) ದ ಅಧ್ಯಕ್ಷೆರ್ ರಾಜಶೇಖರ ಕೋಟ್ಯಾನ್, ಪೆರಿಯ ಜಾನಪದ ವಿದ್ವಾಂಸೆರ್ ಕೆ.ಯಲ್ ಕುಂಡಂತಾಯ, ವಿ.ಕೆ ಸಮೂಹ ಸಂಸ್ಥೆ ಬೊಂಬೈದ ಅಧ್ಯಕ್ಷೆರ್ ಮಧ್ಯಗುತ್ತು ಕರುಣಾಕರ ಶೆಟ್ಟಿ, ಉದ್ಯಮಿ ಸುರೇಶ್ ಶೆಟ್ಟಿ ಗುರ್ಮೆ, ಜಿಲ್ಲಾ ಮೀನುಗಾರಿಕಾ ಫೆಡರೇಶನ್ ದ ಅಧ್ಯಕ್ಷೆರ್ ಯಶಪಾಲ ಸುವರ್ಣ, ಬೆಂಗ್ಲೂರ್ ಶ್ರೀ ಸತ್ಯವಾಣಿ ವಿದ್ಯಾಪೀಠ ಸಮೂಹ ಶಿಕ್ಷಣ ಸಂಸ್ಥೆದ ನಿರ್ದೇಶಕೆರ್ ದೇವಿ ಪ್ರಸಾದ್ ಶೆಟ್ಟಿ ಬಾಳ, ಕುಂದಾಪುರ ಉದ್ಯಮಿ ದಿನೇಶ್ ಅಮೀನ್ ಬರಿಯೆರೆ ಉಲ್ಲೆರ್ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಮೇ10 ಕ್ಕ್ ವಿಧಾನಸಭೆ ವೋಟುದ ಲೆಕ್ಕೊಡು ಸಾರ್ವತ್ರಿಕ ರಜೆ ಘೋಷಣೆ

ಬೆಂಗ್ಲೂರ್: ರಾಜ್ಯ ವಿಧಾನಸಭೆ ವೋಟುದ ಲೆಕ್ಕೊಡು ಮೇ10 ಕ್ಕ್ ಸಾರ್ವತ್ರಿಕ ರಜೆ ಘೋಷಣೆ ಮಲ್ದ್ಂಡ್.

ಮತ ಕೇಂದ್ರ, ರಾಜ್ಯ ಸರ್ಕಾರಿ, ಖಾಸಗಿ ಸಂಸ್ಥೆ, ಶಾಲೆ, ಕಾಲೇಜ್, ರಾಜ್ಯ ಸರ್ಕಾರಿ ಕಚೇರಿ, ಬೇತೆ ಬೇತೆ ಸಂಘ-ಸಂಸ್ಥೆ, ಅನುದಾನಿತ, ಖಾಸಗಿ ಉದ್ಯೋಗಿಲೆಗ್ ರಜೆ ಘೋಷಣೆ ಆತ್ಂಡ್. ಈ ರಜೆ ಸೌಲಭ್ಯ ತುರ್ತು ಸೇವೆಗ್ ಅನ್ವಯ ಆಪುಜಿ.‌ ಅತ್ತಂದೆ ವೋಟುದ ಬೇಲೆಗ್ ನಿಯೋಜನೆ ಮಲ್ತಿನ ಸಿಬ್ಬಂದಿ ಬೇಲೆಗ್ ಹಾಜರ್ ಆವೊಡು.‌

ದೇವೆರೆ ಪಾದ ಸೇರಿಯೆರ್ ಮೈನಾ ಸದಾನಂದ ಶೆಟ್ಟಿ

ಕುಡ್ಲದ ಪುಗರ್ತೆದ ಹೋಟೆಲ್ ಉದ್ಯಮಿ, ಶ್ರೀದೇವಿ ವಿದ್ಯಾ ಸಮೂಹ ಸಂಸ್ಥೆಲೆನ ಮುಖ್ಯಸ್ಥೆರ್, ಇಂಟರ್ ನ್ಯಾಷನಲ್ ಬಂಟ್ಸ್ ವೆಲ್ಫೇರ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಎ. ಸದಾನಂದ ಶೆಟ್ಟಿ ಮೆರೆನ ಧರ್ಮಪತ್ನಿ ಮೂಲ್ಕಿ ಕುಬೆವೂರು ದೊಡ್ಡಮನೆ ಮೈನಾ ಎಸ್ ಶೆಟ್ಟಿ(75 ವರ್ಷ ) ಮೇರ್ ಹುಷಾರ್ ದಾಂತೆ ಬುಧಾರ ದೇವೆರೆ ಪಾದ ಸೇರಿಯೆರ್.

ಮೇರ್ ಶ್ರೀದೇವಿ ಎಜುಕೇಶನ್ ಟ್ರಸ್ಟ್ ದ ಕಾರ್ಯದರ್ಶಿ ಆದಿತ್ತ್ ದ್ ಶ್ರೀದೇವಿ ಸಮೂಹ ಸಂಸ್ಥೆ ಲೆನ್ ಕಟ್ ದ್ ಬುಲೆಪಾದಿನಾರ್. ಕುಡ್ಲದ ಕ್ವಾಲಿಟಿ-ಕುಡ್ಲ ಹೋಟೆಲ್ ಸಮೂಹನ್ ತನ್ನ ಕ್ರಿಯಾಶೀಲತೆಡ್ ಬುಲೆಪಾದ್ ರಾಜ್ಯದ ಪ್ರತಿಷ್ಠಿತ ಕೇಟರಿಂಗ್ ಸಂಸ್ಥೆ ಯಾದ್ ಪರಿವರ್ತನೆ ಮಲ್ದಿನಾರ್. ಬೆಂಗಳೂರು ಬೊಕ್ಕ ಕುಡ್ಲಡ್ ನಡದಿನ ಚಾರಿತ್ರಿಕ ವಿಶ್ವ ಬಂಟರ ಸಮ್ಮೇಳನ ದ ವನಸ್ ತೆನಸ್ ದ ಸಂಪೂರ್ಣ ಜಬದಾರಿ ಒಯಿಸೊಂದು ಯಶಸ್ವಿ ಮಲ್ದೆರ್.

ಮೆರೆಗ್ ಕಂಡನಿ ಬೊಕ್ಕ ರಡ್ಡ್ ಜನ ಆಣ್ ಜೋಕುಲು ಉಲ್ಲೆರ್.

ಮೈನಾ ಎಸ್. ಶೆಟ್ರೆನ ಅಂತಿಮ ದರ್ಶನ ಇನಿ (ಗುರುವಾರ) ಕಾಂಡೆ 10.30 ರ್ದ್ 11.30 ಮುಟ್ಟ ಕುಡ್ಲದ ಎಮ್. ಜಿ. ಕ್ರಾಸ್ ರಸ್ತೆದ “ಸದಾನಂದ ” ಇಲ್ಲಡ್ ಮಲ್ಪೊಲಿ ಪಂದ್ ಇಲ್ಲದಕುಲು ತೆರಿಪಾದೆರ್.

ಯು.ಎ.ಇ ಬಂಟ್ಸ್ ದ 46 ನೇ ವರ್ಷದ ಯು.ಎ.ಇ ಬಂಟೆರ್ನ ಕೂಡುಕಟ್ಟ್

ದುಬೈ: ಯು.ಎ.ಇ ಬಂಟ್ಸ್ ದ 46 ನೇ ವರ್ಷದ ಯು.ಎ.ಇ ಬಂಟೆರ್ನ ಕೂಡುಕಟ್ಟ್ ( Get Together) ಲೇಸ್ ಎಪ್ರಿಲ್ 30 ಕ್ಕ್ ನಡತ್ಂಡ್.

ಯುಎಇ ದೇಶದ ಮತ ರಾಜ್ಯಡ್ ಇಪ್ಪುನ ಸಾರರ್ದ್ ಎಚ್ಚ ಬಂಟ ಬಾಂಧವೆರೆನ ಸಮ್ಮುಖಡ್, ದುಬೈದ ದೇರಾದ ಬ್ರಿಸ್ಟೊಲ್ ಹೋಟೆಲ್ ದ ಚಾವಡಿಡ್ ವೈವಿಧ್ಯಮಯ ಸಾಂಸ್ಕೃತಿಕ ಲೇಸ್ ದೊಟ್ಟಿಗೆ ನಡತ್ಂಡ್.

ಗಣ್ಯೆರೆಗ್ ಆರತಿ ಮಲ್ತ್ ದ್ ತಿಲಕ ಪಾಡ್ದ್ ಕೇರಳದ ಚೆಂಡೆದ ವಾದನ, ಬೊಕ್ಕ ಸುಮಂಗಲೆಯೆರ್ ಪೂರ್ಣ ಕುಂಭ ಕಲಸ ಪತ್ತ್ ದ್ ಮೆರವಣಿಗೆದ ಮುಖೇನ ಎದ್ಕೊಂದು ಚಾವಡಿಗ್ ಲೆತೊಂದು ಬತ್ತೆರ್.

ಬೊಕ್ಕ ಗಣ್ಯೆರ್ 46ನೇ ವರ್ಷದ ಕೂಡುಕಟ್ಟ್ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಅವೆರ್ದ್ ಬೊಕ್ಕ ಬಂಟ ಗೀತೆ ಪದ್ಯದ ಮುಖೇನ ಸಾಂಸ್ಕೃತಿಕ ಲೇಸ್ ದ ಉದಿಪನ ಮಲ್ತೆರ್. ‌ಬೊಕ್ಕ ಬೊಲ್ಪುಗು 10 ಗಂಟೆರ್ದ್ ಬಯ್ಯ 7 ಗಂಟೆ ಮುಟ್ಟ ಯುಎಇ ಬಂಟರ ಪ್ರತಿಭೆಲೆರ್ದ್ ಸುಮಾರ್ ಸಾಂಸ್ಕೃತಿಕ ಲೇಸ್ ನಡತ್ಂಡ್.

ಅಂಚೆನೆ ಪ್ರತಿ ವರ್ಷ ಕೊರ್ಪುನ “ಬಂಟ ವಿಭೂಷಣ” ಪ್ರಶಸ್ತಿನ್ ಈ ವರ್ಷ ಅಳ್ವಸ್ ಶಿಕ್ಷಣ ಸಂಸ್ಥೆದ ರೂವರಿ ಡಾ.ಮೋಹನ್ ಆಳ್ವ ಮೆರೆಗ್ ಕೊರಿಯೆರ್. ಬೊಕ್ಕ ಮಲ್ಲ ಬಿನ್ನೆರಾದ್ ಊರುರ್ದ್ ಬತ್ತಿನ ನಟೆ, ನಿರ್ದೇಶಕೆ ಶಿವದ್ವಜ್ ಶೆಟ್ಟಿ, ಸಿಐಡಿ ಸ್ಟಾರ್ ಖ್ಯಾತಿದ ದಯಾ ಶೆಟ್ಟಿ, ಹರೀಶ್ ಶೆಟ್ಟಿ, ಬೊಂಬೈದ ರಂಗಕರ್ಮಿ ನಿರೂಪಕೆರ್ ಅಶೋಕ್ ಪಕಳ ಮೆರೆನ್ ಮಾನಾದಿಗೆ ಮಲ್ತೆರ್. ಕೊರೊನಾ ವಾರಿಯರ್ ಆದ್ ಬೇಲೆ ಮಲ್ತ್ ದ್ ಯುಎಇದ ತುಳು ಕನ್ನಡಿಗೆರೆಗ್ ಧೈರ್ಯ ಕೊರೊಂದು ಇತ್ತಿನ ಡಾ. ಪುಷ್ಪರಾಜ್ ಶೆಟ್ಟಿ ದಂಪತಿಲೆನ್ ಬೊಕ್ಕ ಡಾ. ಪೂರ್ಣಿಮಾ ದಂಪತಿಲೆನ್ ಅಭಿನಂದಿಸಾಯೆರ್. ಯುಎಇ ಬಂಟ್ಸ್ ದ ಅಧ್ಯಕ್ಷೆರ್ ಸರ್ವೋತ್ತಮ ಗ್ ಶೆಟ್ರ್ ಮಾನಾದಿಗೆ ಪಡೆತಿನಕ್ಲೆನ ಪೊಲಬು ಮಲ್ತೆರ್ . ಬಿ.ಕೆ.ಗಣೇಶ್ ರೈ ತಮ್ಮನ ಪತ್ರನ್ ಓದಿಯೆರ್.

ಈ ಪೊರ್ತುಡು ಯುಎಇದ ಬಂಟ್ಸ್ ದ ಉಪಾಧ್ಯಕ್ಷೆರ್ ಪ್ರವೀಣ್ ಕುಮಾರ್ ಶೆಟ್ಟಿ ವಕ್ವಾಡಿ, ಕಾರ್ಯದರ್ಶಿ ದಿವೇಶ್ ಆಳ್ವ, ಯುಎಇ ಬಂಟ್ಸ್ ದ ಪೋಷಕೆರ್, ಸಲಹಾ ಸಮಿತಿದ ಸದಸ್ಯೆರ್ ಗುಣಶೀಲ್ ಶೆಟ್ಟಿ, ಪ್ರೇಮ್ ನಾಥ್ ಶೆಟ್ಟಿ, ಸಂದೀಪ್ ರೈ ನಂಜೆ, ಸುಂದರ್ ಶೆಟ್ಟಿ ಅಬುಧಾಬಿ, ದಿನೇಶ್ ಶೆಟ್ಟಿ ಕೊಟ್ಟಿಂಜ, ಸಜನ್ ಶೆಟ್ಟಿ, ಜಯರಾಮ ರೈ ಅಬುಧಾಬಿ, ರಮಾನಂದ ಶೆಟ್ಟಿ, ರತ್ನಾಕರ ಶೆಟ್ಟಿ, ರವಿರಾಜ್ ಶೆಟ್ಟಿ, ಲೇಸ್ ದ ವ್ಯವಸ್ಥಾಪಕ ಸಮಿತಿದ ಸದಸ್ಯೆರ್ ಅಭಿನಂದನ್, ಶರಧಿ ಶೆಟ್ಟಿ, ಸುನಿಲ್, ಹರ್ಷ ಶೆಟ್ಟಿ, ಅತ್ಮ, ತೃಪ್ತಿ ರೈ, ಗಯಾನಂದ, ಪ್ರಮೀತ ಶೆಟ್ಟಿ, ಸುಮೀತ್, ವಿನೀತ ಶೆಟ್ಟಿ, ಶೈಲೇಶ್, ಸುಷ್ಮ ಶೆಟ್ಟಿ, ಸಂದೀಪ್ ಬೊಕ್ಕ ತೃಪ್ತಿ ರೈ ಇತ್ತೆರ್.

ಬೊಕ್ಕ ಸಾಂಸ್ಕೃತಿಕ ಲೇಸ್ ಡ್ ಆಕರ್ಷಕ ನೃತ್ಯವಾಯಿನ ಕುಟುಂಬ ನೃತ್ಯ ಪಂತೊಡು 9 ಕೂಟಲು ಪಾಲ್ ಪಡೆದಿತ್ತ್ಂಡ್.‌ ಈ ಪಂತೊಡು ಸುರುತ್ತ ಇನಾಮು ನಿವೇದಿತಾ ಬೊಕ್ಕ ಇಶಾನ್ವಿ ಹೆಗ್ಡೆ, ರಡ್ಡನೇ ಇನಾಮು ಅಕ್ಷತ, ಅನ್ವಿ ಬೊಕ್ಕ ರವಿ ಶೆಟ್ಟಿ, ಮೂಜಿನೇ ಇನಾಮು ಸಮ್ಯಕ್ ಬೊಕ್ಕ ಸಮರ್ಥ ಸುರೇಶ್ ಶೆಟ್ಟಿ ಆಯ್ಕೆ ಆದ್ ಗೆಂದಿಯೆರ್.

ಲೇಸ್ ತೀರ್ಪುಗಾರೆರಾದ್ ದಯಾ ಶೆಟ್ಟಿ, ಶಮಾ ರಾಣಿ ಶೆಟ್ಟಿ, ನತಾಶ ಶೆಟ್ಟಿ ಸಹಕಾರ ಮಲ್ತೆರ್.

ಸಂಗೀತ ಶೆಟ್ಟಿ ಬೊಕ್ಕ ಕೂಟದಕ್ಲೆರ್ದ್ ಸ್ವಾಗತ ಗೀತೆ, ಗೋಲ್ಡನ್ ಸ್ಟಾರ್ ಆಂಡ್ ಮ್ಯೂಸಿಕ್ ಫೈನ್ ಆರ್ಟ್ಸ್ ಶಾರ್ಜಾದಕ್ಲೆರ್ದ್ ಸ್ವಾಗತ ನೃತ್ಯ, ದಿಶಾ ಶೆಟ್ಟಿ ಮೆರೆರ್ದ್ ಭರತನಾಟ್ಯ, ಡಿವೈನ್ ಡ್ಯಾನ್ಸರ್ ಮುಸಾಷ, ಬಾಲಿವುಡ್ ಡ್ಯಾನ್ಸ್ ಡೀವಾಸ್ ದುಬೈ, ಸ್ಟಾರ್ ಸ್ಟೆಪ್ಪಾರ್ಸ್ ರಾಡಿಕಲ್ ಡ್ಯಾನ್ಸ್ ದುಬೈ, ನೈನ್ ಜುವೆಲ್ಸ್ ರಾಡಿಕಲ್ ಡ್ಯಾನ್ಸ್ ಕೂಟದಕ್ಲೆರ್ದ್ ಬಾಲಿವುಡ್ ಶೈಲಿದ ನೃತ್ಯ, ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇ ಕೂಟದ ಜೋಕುಲೆರ್ದ್ ಯಕ್ಷಗಾನ ನಾಟ್ಯ ವೈಭವ, ಮೆಲೋಡಿ ಮೇಕರ್ಸ್ ದುಬೈ ಕೂಟದಕ್ಲೆರ್ದ್ ಸಂಗೀತ ರಸಮಂಜರಿ, ಡೆಜ್ಲಿಂಗೆ ದೀವಾಸ್ ಅಬುಧಾಬಿ ಕೂಟದಕ್ಲೆರ್ದ್ ಕ್ಲಾಸಿಕಲ್ ನೃತ್ಯ, ವೈಷ್ಣವಿ ಶೆಟ್ಟಿ ದುಬೈ ಕೂಟದಕ್ಲೆರ್ದ್ ಗ್ರೂಪ್ ಪದ್ಯ, ರೈಸಿಂಗ್ ಸ್ಟಾರ್ ಬಂಟ್ಸ್ ದುಬೈ ಕೂಟದಕ್ಲೆರ್ದ್ ಕರ್ನಾಟಕ‌ ಕಲ್ಚರಲ್ ನೃತ್ಯ ಬೊಕ್ಕ ಸಿಐಡಿ ಪುಗರ್ತೆದ ದಯಾ ಶೆಟ್ಟಿ ಬೊಕ್ಕ ಹರೀಶ್ ಶೆಟ್ಟಿ ಮೊಕ್ಲೆರ್ದ್ ಹಾಸ್ಯ ನಡತ್ಂಡ್.

ಬೊಂಬೈದ ಪುಗರ್ತೆದ ನಿರೂಪಕೆ ಅಶೋಕ್ ಪಕ್ಕಳ ಬೊಕ್ಕ ಸರ್ವೋತ್ತಮ ಶೆಟ್ರ್ ಲೇಸ್ ದ ಸುಧಾರಿಕೆ ಮಲ್ತೆರ್, ಬೊಕ್ಕ ಸರ್ವೋತ್ತಮ ಶೆಟ್ರ್ ಸೊಲ್ಮೆ ಸಂದಾಯೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)

ಶ್ರೀ ದೈಬಿತ್ತಿಲ್ ಭಗವತೀ ತೀಯಾ ಸಂಘ ಬೊಂಬೈ ನೆತ್ತ 68ನೇ ವಾರ್ಷಿಕ ಮಹಾಪೂಜೆ

ಕಾರ್ಯಕರ್ತೆರೆನ ಸಹಕಾರರ್ದ್ ಸಂಘ ಗಟ್ಟಿ ಆತ್ಂಡ್: ಚಂದ್ರಹಾಸ್ ಕೆ‌.ಪಾಲನ್

ಬೊಂಬೈ: ಎಕ್ಲೆನ ಸಂಘ ಇನಿ 68ನೇ ವರ್ಷದ ವಾರ್ಷಿಕ ಮಹಾಪೂಜೆನ್ ಆಚರಣೆ ಮಲ್ತೊಂದು ಉಂಡು. ಈ ಪೆರಿಯ ಸಂಸ್ಥೆದ ಅಧ್ಯಕ್ಷೆರೆ ತಾನನ್ ಒಯಿಸೊಂದು ದುಂಬು ಕೊನೊಪುನ ಯೋಗ ಭಾಗ್ಯ ಎನ್ನಂಡಲ ಈ ಸಂಸ್ಥೆದ ವತಿರ್ದ್ ನಡಪುನ ಗೌಜಿದ ಧಾರ್ಮಿಕ ಲೇಸ್ ದ ಯಶಸ್ವಿದ ಪಿರವು ನಮ್ಮ ಸಂಘದ ಮಾತ ಹಿರಿಯ-ಕಿರಿಯೆರ್ ತನ್ನೊಟ್ಟಿಗೆ ಇಪ್ಪುನ ಪದಾಧಿಕಾರಿಲು, ಕಾರ್ಯಕರ್ತೆರ್, ಸರ್ವಸದಸ್ಯ ಬಾಂಧವೆರೆನ ಯೋಗದಾನ, ಶ್ರಮನ್ ನೆಂಪೊಡಾಯಿನವು. ಅತ್ತಂದೆ ಎಕ್ಲೆನ ಸಂಘದ ಮತ ಕಾರ್ಯಕರ್ತೆರೆನ ಶ್ರಮರ್ದ್ ಎಂಕ್ಲೆನ ಸಂಸ್ಥೆ ಗಟ್ಟಿ ಆತ್ಂಡ್ ಪಂದ್ ಶ್ರೀ ದೈಬಿತ್ತಿಲ್ ಭಗವತೀ ತೀಯಾ ಸಂಘ (ರಿ.) ಬೊಂಬೈ ನೆತ್ತ ಅಧ್ಯಕ್ಷೆರ್ ಚಂದ್ರಹಾಸ್ ಕೆ‌.ಪಾಲನ್ ಪಂಡೆರ್.

ಮೇರ್ ಎ.22 ಸನಿಯಾರ ಬಯ್ಯಗ್ ಭಾಂಡುಪ್ ಪಶ್ಚಿಮ, ಎಲ್.ಬಿ.ಎಸ್ ಮಾರ್ಗ, ಬಿಸ್ಕೇಟ್ ಕಂಪೆನಿದ ಎದುರು ಇಪ್ಪುನ ಸ್ವಾಮಿ ನಿತ್ಯಾನಂದ ಮಂದಿರದ ಚಾವಡಿಡ್ ಇಪ್ಪುನ ಮೈದಾನಡ್ ಗೌಜಿಡ್ ಬೊಕ್ಕ ಇಸೇಸವಾದ್ ನಡತಿನ ಬಲಿ ಉಚ್ಚಯ, ತಮ್ಮನ ಲೇಸ್, ಬೊಕ್ಕ ಶ್ರೀ ದೈಬಿತ್ತಿಲ್ ಭಗವತೀ ತೀಯಾ ಸಂಘ (ರಿ.) ಬೊಂಬೈ ನೆತ್ತ 68 ನೇ ವಾರ್ಷಿಕ ಮಹಾಪೂಜೆದ ಪೊರ್ತುಡು ನಡತಿನ ಧರ್ಮ ಸಭೆತ್ತ ಅಧ್ಯಕ್ಷೆರೆ ತಾನನ್ ಒಯಿಸೊಂದು ಪಾತೆರಿಯೆರ್.

ಬೊಕ್ಕ ಕರಿನ 35 ವರ್ಷೊರ್ದಿಂಚ ಸಂಘದ ಪ್ರಧಾನ ಅರ್ಚಕೆರಾದ್ ಸೇವೆ ಸಂದಾವೊಂದು ಬತ್ತಿನ ಸದಾಶಿವ ಡಿ. ಕುಂದರ್ ಮೆರೆಗ್ ಬೊಡೆದಿ ಸವಿತಾ ಕುಂದರ್, ಮಗೆ ಬೊಕ್ಕ ಮಗಲೆನ ಎದುರುಡ್ ಸಾಲ್ ಪೊದೆಪಾದ್, ಪೇಟ ದೀದ್, ಫಲ-ಪುಷ್ಪ ನೆಂಪುದ ಕಾಣಿಕೆ, ತಮ್ಮನ ಪತ್ರ ಕೊರ್ದು ಮಾನಾದಿಗೆ ಮಲ್ತೆರ್.

ಅವೆರ್ದ್ ಬೊಕ್ಕ ತಮ್ಮನ ಸ್ವೀಕಾರ ಮಲ್ತಿನ ಮೇರ್ ತನ್ನ ಅನಿಸಿಕೆಡ್ ಅರೆಗ್ ತಮ್ಮನ ಮಲ್ತಿನೆಕ್ಕ್ ಕೃತಜ್ಞತೆ ಸಂದಾಯೆರ್.

ಈ ಧರ್ಮ ಸಭೆತ್ತ ಲೇಸ್ ಡ್ ದೈಬಿತ್ತಿಲ್ ಶ್ರೀ ಭಗವತೀ ತೀಯಾ ಸಂಘ ಬೊಂಬೈ ನೆತ್ತ ಗೌರವಾಧ್ಯಕ್ಷೆರ್ ಲಾಜರ್ ಟಿ. ಎಂ ಕೋಟ್ಯಾನ್, ಉಪಾಧ್ಯಕ್ಷೆರ್ ಆನಂದ ಜೆ. ಬಂಗೇರ, ಗೌ. ಕೋಶಾಧಿಕಾರಿ ರಮೇಶ್ ಬಿ ಸಾಲ್ಯಾನ್, ಜತೆ ಕಾರ್ಯದರ್ಶಿ ಸದಾಶಿವ ಕೆ ಸಾಲ್ಯಾನ್, ಜತೆ ಕೋಶಾಧಿಕಾರಿ ಮೃತ್ಯುಂಜಯ ಎಂ. ಬೆಳ್ಚಡ, ಪೂಜಾ ಸಮಿತಿದ ಅಧ್ಯಕ್ಷೆರ್ ವಸಂತ್ ಬಿ. ಕರ್ಕೇರ, ಮಹಿಳಾ ವಿಭಾಗದ ಅಧ್ಯಕ್ಷೆರ್ ರೋಹಿಣಿ ಎಸ್ ಬಂಗೇರ ಇತ್ತೆರ್.

ಬೊಕ್ಕ ಇಸೇಸ ಬಿನ್ನೆರಾದ್ ಪಾಲ್ ಪಡೆದಿತ್ತಿನ ತೀಯಾ ಸಮಾಜ ಬೊಂಬೈದ ಮಾಜಿ ಅಧ್ಯಕ್ಷೆರ್ ಚಂದ್ರಶೇಖರ್ ಬೆಳ್ಚಡ, ಬೇತೆ ಬೇತೆ ಸಂಘ ಸಂಸ್ಥೆದ ಪದಾಧಿಕಾರಿಲು, ಸಂಘದ ಪೆರಿಯ ಸದಸ್ಯೆರೆನ್, ಸೇವಾಕರ್ತೆರೆನ್ ಅಧ್ಯಕ್ಷೆರ್ ಚಂದ್ರಹಾಸ್ ಕೆ ಪಾಲನ್ ಶಾಲ್ ಪೊದೆಪಾದ್ ಪೂವು ಗುಚ್ಚ ಕೊರ್ದು ಗೌರವಿಸಾಯೆರ್. ಕಾರ್ಯಕ್ರಮ ಸಮಿತಿ, ಪ್ರಚಾರ ಸಮಿತಿದ ಅಧ್ಯಕ್ಷೆರ್ ರಾಜ ತುಂಬೆ ಈ ಲೇಸ್ ದ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.

ಈ ಧರ್ಮಸಭೆ ಲೇಸ್ ದ ಸುರುಕು ಬೊಲ್ಪುಗು ಗಣಹೋಮರ್ದ್ ರಾತ್ರೆ ಮುಟ್ಟ ನಡತಿನ 68ನೇ ವಾರ್ಷಿಕ ಪೂಜೆದ ಧಾರ್ಮಿಕ ಲೇಸ್ ಉದಿಪನ ಆಂಡ್. ಬಯ್ಯಗ್ ಸಂಸ್ಥೆದ ಪ್ರಧಾನ ಅರ್ಚಕೆರ್ ಸದಾಶಿವ ಡಿ‌.‌ಕುಂದರ್ ಮುತಾಲಿಕೆಡ್ ಬಲಿ ಉಚ್ಚಯ ನಡತ್ಂಡ್.

ಈ ಧಾರ್ಮಿಕ ಲೇಸ್ ದ ಯಶಸ್ಸ್ ಗ್ ಸಲಹಾ ಸಮಿತಿದ ಪ್ರಕಾಶ್ ಕೆ. ಅಮಿನ್, ಸದಸ್ಯ ನೊಂದಾವಣಿ ಸಮಿತಿದ ಟಿ. ಆರ್ ಸಾಲ್ಯಾನ್ ಬೊಕ್ಕ ರೋಹಿಣಿ ಎಸ್ ಬಂಗೇರ, ಕಾರ್ಯಕ್ರಮ ಬೊಕ್ಕ ಪ್ರಚಾರ ಸಮಿತಿದ ರಾಜ ಆರ್ ತುಂಬೆ, ಶಿಕ್ಷಣ ಸಮಿತಿದ ಪ್ರವೀಣ್ ಎಲ್ ಕೋಟ್ಯಾನ್, ಕಾರ್ಯನಿರ್ವಾಹಕಿ ಕವಿತಾ ಪಿ. ಕೋಟ್ಯಾನ್, ಮಹಿಳಾ ವಿಭಾಗದ ಅಧ್ಯಕ್ಷೆರ್ ರೋಹಿನಿ ಎಸ್ ಬಂಗೇರ, ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಎಚ್. ಶ್ರೀಧರ್, ಜಯ ಎಂ ಕೋಟ್ಯಾನ್, ಅಚ್ಚುತ ಎ. ಕೋಟ್ಯಾನ್, ಯಜ್ಞೇಶ್ವರ ಕೆ. ಕೋಟ್ಯಾನ್, ಸದಾಶಿವ ಬಿ. ಕೋಟ್ಯಾನ್, ಮೋಹನ್ ಬಿ. ಕೋಟ್ಯಾನ್, ಬಾಲಕೃಷ್ಣ ಎಂ ಬಂಗೇರ, ಪುರಂದರ ಸಾಲ್ಯಾನ್, ಹರೀಶ್ ಕೋಟ್ಯಾನ್, ಶಶಿಕಲಾ ಜಿ. ಬಂಗೇರ, ಲೀಲಾವತಿ ಯು ಬೋಳಾರ್, ಪ್ರೀತಿ ಎಸ್ ಮಂಜೇಶ್ವರ, ಶಶಿಕಲಾ ಎಸ್ ಪಾಲನ್, ಆಶಾ ಎಸ್ ಸಾಲ್ಯಾನ್, ಸವಿತಾ ಪುತ್ರನ್, ನಯನಾ ಬಂಗೇರ, ಅನಸೂಯಾ ಆರ್ ತುಂಬೆ, ತುಳಸಿ ಕೋಟ್ಯಾನ್ ಮೊಕುಲು ಇತ್ತ್ ದ್ ಶ್ರಮ ಪಡೆತೆರ್.

ಆಮ್ ಆದ್ಮಿ ಪಕ್ಷಗ್ ವೋಟು ಪಾಡ್ಲೆ: ವಿಜಯನಾಥ ವಿಠಲ ಶೆಟ್ಟಿ

ಬೆದ್ರ: ಇಡೀ ಕ್ಷೇತ್ರಡ್ ಆಮ್ ಆದ್ಮಿ ಪಕ್ಷಗ್ ಭಾರೀ ಬೆಂಬಲ ತಿಕ್ಕೊಂದು ಉಂಡು. ಜನಕುಲು ಬದಲಾವಣೆ ಬಯಸೊಂದು ಉಲ್ಲೆರ್. ಪೊಸ ಚಿಂತನೆಲು, ಪೊಸ ಯೋಜನೆಲು ಇಪ್ಪುನ ಆಮ್ ಆದ್ಮಿ ಪಾರ್ಟಿಗ್ ವೋಟು ಪಡ್ಲೆ ಪಂದ್ ಆಮ್ ಆದ್ಮಿ ಪಕ್ಷದ ಬೆದ್ರ ವಿಧಾನಸಭೆ ಕ್ಷೇತ್ರದ ಅಭ್ಯರ್ಥಿ ವಿಜಯನಾಥ ವಿಠಲ ಶೆಟ್ಟಿ ಪಂತೆರ್.

ಕ್ಷೇತ್ರ ವ್ಯಾಪ್ತಿಡ್ ಸಂಚಾರ ನಡಪಾಯಿನ ಮೇರ್ ಮಾಧ್ಯಮದೊಟ್ಟಿಗೆ ಪಾತೆರ್ದ್, ಕ್ಷೇತ್ರಡ್ ನನದ 25 ವರ್ಷದ ದೂರದೃಷ್ಟಿ ಚಿಂತನೆದೊಟ್ಟಿಗೆ ಲೇಸ್ ಅನುಷ್ಠಾನ ಮಲ್ಪುನ ಬಗೆಟ್ ಆಮ್ ಆದ್ಮಿ ಯೋಜನೆ ಸುರು ಮಲ್ತ್ ದೇ ಪಂದ್ ಪಂಡೆರ್.

ಬೆದ್ರನ್ ಮಾದರಿ ಕ್ಷೇತ್ರವಾದ್ ಪರಿವರ್ತಿನೆ ಮಲ್ಪರೆ ಆಪುಂಡು. ಜನಕುಲೆನ ಅವಶ್ಯಕತೆಗ್ ಬೊಡಾಯಿನ ಪರ್ಪಿನ ನೀರ್, ಕರೆಂಟ್ ಅಂಬ್ಯುಲೆನ್ಸ್ ಸೇವೆ, ಆರೋಗ್ಯ ಸೇವೆ ದಿನತ್ತ 24 ಗಂಟೆಲ ತಿಕ್ಕುಲೆಕ್ಕ ಮಲ್ಪುವ, ನನದ 25 ವರ್ಷನ್ ಗುರಿಯಾದ್ ದೀವೊಂದು ಕಾರ್ಯ ಯೋಜನೆ ಮಲ್ಪರೆ ಆಪುಂಡು ಪಂದ್ ಪಂಡೆರ್.

ಇಡೀ ಕ್ಷೇತ್ರಡ್ ಆಮ್ ಆದ್ಮಿ ಪಕ್ಷದ ಕಾರ್ಯಕರ್ತೆರ್ ಇಲ್ಲ ಇಲ್ಲಗ್ ಪೋದು ಪ್ರಚಾರ ಮಲ್ತೊಂದು ಉಲ್ಲೆರ್. ಜನಕುಲೆನ ಎಡ್ಡೆ ಸ್ವಂದನೆ ತಿಕೊಂದು ಉಂಡು ಪಂದ್ ಪಂಡೆರ್.

Aim to bring Karnataka state to number one position” – PM Narendra Modi ಕರ್ನಾಟಕ ನಂ.1ತಾನೊಗು ಕನಪಿನ ಸಂಕಲ್ಪ: ನರೇಂದ್ರ ಮೋದಿ

ಮುಲ್ಕಿಡ್ ಬಿಜೆಪಿ ಪ್ರಚಾರ ಸಭೆಟ್ಟ್ ಪ್ರಧಾನಿ
ಘೋಷಣೆ

ಮುಲ್ಕಿ : ಕರ್ನಾಟಕ ರಾಜ್ಯೊನು ಅಭಿವೃದ್ಧಿ ಡ್ ನಂ.1 ಮಲ್ಪುನ ಸಂಕಲ್ಪೊನು ಬಿಜೆಪಿ ಮಲ್ದ್ಂಡ್ ಪಂದ್ ಪ್ರಧಾನಮಂತ್ರಿ ನರೇಂದ್ರ ಮೋದಿ ಘೋಷಣೆ ಮಲ್ತೆರ್.

ಮುಲ್ಕಿ ಕೈತಲ್ದ ಗುಂಡಾಲ್ ಮೈದಾನಡ್ ಬುಧಾರ ಕಾಂಡೆ ನಡತಿನ ಬಿಜೆಪಿ ಪ್ರಚಾರ ಸಭೆಟ್ಟ್ ಆರ್ ಪಾತೆರಿಯೆರ್.

ಮೂಲಸೌಕರ್ಯಡ್ ನಂ. 1, ಉತ್ಪಾದನೆ ಕ್ಷೇತ್ರೊಡು ಸೂಪರ್ ಪವರ್ ಮಲ್ಪುನ ಸಂಕಲ್ಪೊನು ಬಿಜೆಪಿ ಸರ್ಕಾರ ಮಲ್ದ್ಂಡ್. ಉಂದು ಆವೊಡ್ಡ ನಿಕುಲು ಕರ್ನಾಟಕೊಡು ಬಿಜೆಪಿದ ಸ್ಥಿರ ಸರ್ಕಾರೊಗು ಅವಕಾಶ ಕೊರೊಡು ಪಂಡೆರ್.

“ಈ ಬಾರಿಯ ನಿರ್ಧಾರ ಬಹುಮತದ ಬಿಜೆಪಿ ಸರ್ಕಾರ’ ಪನ್ಪಿನ ಘೋಷಣೆದ ಒಟ್ಟುಗು ಪಾತೆರಿನ ಮೋದಿ ಜನಕ್ಲೆನ ಮನಸ್ ಗೆಂದಿಯೆರ್.

ಈ ಪೊರ್ತುಡು ಬಿಜೆಪಿದ ಮುಖಂಡೆರ್ ಪ್ರಧಾನಿಲೆಗ್ ಶ್ರೀ ಕ್ಷೇತ್ರ ಕಟೀಲ್, ಬಪ್ಪನಾಡ್, ಧರ್ಮಸ್ಥಳ ಅಂಚೆನೆ ಮುಲ್ಕಿ ನರಸಿಂಹ ದೇವೆರ್ನ ಪ್ರಸಾದ ಕೊರ್ದು ನೆಂಪು ಕಾಣಿಕೆ ಕೊರ್ದು ಎದುಕೊನಿಯೆರ್.

ಭಾಷಣದ ನಡು ನಡುಟ್ಟು ‘ಸಹೋದರ್ ಸಹೋದರಿಯರೇ ?” ಸ್ನೇಹಿತೆರೇ, ಬಂಧು ಭಗಿಣಿಯರೇ ಪಂದ್ ಕನ್ನಡೊಡು ಪಾತೆರ್ದ್ ಜನಕ್ಲೆನ ಮೆಚ್ಚಿಗೆ ದೆತೊಂಡೆರ್.

ನೆರ್ದ್ ದುಂಬು ಕೇಂದ್ರ ಸಚಿವೆರ್ ಶೋಭಾ ಕರಂದ್ಲಾಜೆ ಪಾತೆರ್ದ್, ಭಜರಂಗ ದಳನ್ ನಿಷೇಧ ಮಲ್ಪುವೆಂದ್ ಪನ್ತಿನ ಕಾಂಗ್ರೆಸ್ ಗ್ ಮತದಾರೆರ್ ಸರಿಯಾಯಿನ ಪಾಠ ಕಲ್ಪಾವೊಡು ಪಂಡೆರ್.

ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಪಾತೆರ್ದ್, ಪ್ರಧಾನಿ ನರೇಂದ್ರ ಮೋದಿ ಕಾಂಗ್ರೆಸ್ ದಕುಲು ತಾಕತ್ತ್ ಇತ್ತ್ಂಡ ಭಜರಂಗ ನಿಷೇಧ ಮಲ್ಪಡ್. ದ.ಕ. ಒಡಿಪು ಜಿಲ್ಲೆಡ್ 13 ಕ್ಕೆ 13 ಸೀಟ್ ಗೆಂದಾದ್ ಕೊರ್ಪ ಪಂಡೆರ್.

ಮುಲ್ಕಿ ಬೆದ್ರ ಕ್ಷೇತ್ರದ ಅಭ್ಯರ್ಥಿ ಉಮಾನಾಥ ಕೋಟ್ಯಾನ್ ಪಾತೆರ್ದ್, ಈ ಸರ್ತಿಲ ಬಿಜೆಪಿಗ್ ಸ್ಪಷ್ಟ ಬಹುಮತ ಕೊರ್ದು ಗೆಂದಾವರೆ ಬಿನ್ನಾಪು ಮಲ್ತೆರ್.

ಕಾರ್ಲ ಕ್ಷೇತ್ರದ ಸುನಿಲ್ ಕುಮಾರ್, ಬೈಂದೂರುದ ಬಿಜೆಪಿ ಅಭ್ಯರ್ಥಿ ಗುರುರಾಜ್ ಗಂಟಿಹೊಳಿ, ಕುಂದಾಪುರ ಕ್ಷೇತ್ರದ ಕಿರಣ್ ಕೊಡ್ಗಿ, ರಘುಪತಿ ಭಟ್, ಗುರ್ಮೆ ಸುರೇಶ್ ಶೆಟ್ಟಿ, ಯಶ್ ಪಾಲ್ ಸುವರ್ಣ, ಡಾ.ಭರತ್ ಶೆಟ್ಟಿ, ಹರೀಶ್ ಪೂಂಜ, ರಾಜೇಶ್ ನಾಯ್ಕ್ ವೇದವ್ಯಾಸ ಕಾಮತ್, ಸತೀಶ್ ಕುಂಪಲ ಮೊಕುಲು ಮಾತ ಪಾತೆರಿಯೆರ್.

ಹಿರಿಯೆರಾಯಿನ ಗಣೇಶ್ ಕಾರ್ಣಿಕ್, ಪ್ರತಾಪಸಿಂಹ ನಾಯಕ್, ಸುದರ್ಶನ ಬೆದ್ರ, ಕಸ್ತೂರಿ ಪಂಜ, ಸುರೇಶ್ ನಾಯಕ್ ಮೊಕುಲು ಮಾತ ಇತ್ತೆರ್. ಭಾರಿ ಸಂಖ್ಯೆಡ್ ಲಕ್ಷಾಂತರ ಮೋದಿ ಅಭಿಮಾನಿಲು ಸೇರ್ದಿತ್ತೆರ್.

” Aim to bring Karnataka state to number one position” – PM Narendra Modi

Mulki: ” We aim to develop Karnataka in all aspects and bring it to number one position industrially,economically fisheries and port” He was taking part in the BJP convention at Mulki today.

For all this he requested the people of Karnataka to bring in a stable government in the state.

PM Narendra Modi begins his speech in Tulu ತುಳುಟ್ಟು ಭಾಷಣ ಸುರು ಮಲ್ತಿನ ಪ್ರಧಾನಿ ಮೋದಿ

ಮುಲ್ಕಿ: ಇನಿ ಮುಲ್ಕಿ ಕೊಲ್ನಾಡ್ ಡ್ ನಡತೊಂದು ಇಪ್ಪುನ ಬಿಜೆಪಿ ನವ ಕರ್ನಾಟಕ ಸಂಕಲ್ಪ ಸಮಾವೇಶಗ್ ಬತ್ತಿನ ಪ್ರಧಾನಿ ನರೆಂದ್ರ ನರೇಂದ್ರ ಮೋದಿನ್ ಬಿಜೆಪಿದ ಮಾತ ಪ್ರಮುಖೆರ್ ಎದ್ಕೊನಿಯೆರ್.

ಬೊಕ್ಕ ನಳಿನ್‌ ಕುಮಾರ್‌ ಕಟೀಲ್‌, ಶೋಭಾ ಕರಂದ್ಲಾಜೆ ಶಾಲ್ ಪೊದೆಪಾದ್, ಕಟೀಲ್ ದುರ್ಗಾಪರಮೇಶ್ವರಿನ ಮೂರ್ತಿ ಕೊರ್ದು ಎದ್ಕೊನಿಯೆರ್. ಅವೆರ್ದ್ ಬೊಕ್ಕ ಬಿಜೆಪಿ ಜಿಲ್ಲಾಧ್ಯಕ್ಷೆರ್ ಸುದರ್ಶನ್‌ ಎಂ., ಗಣಪತಿ ಮೂರ್ತಿ, ಹರೀಶ್‌ ಪೂಂಜಾ ಮೇರ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಪ್ರಸಾದನ್ ಮೋದಿಗ್ ಕೊರಿಯೆರ್.

ಬೊಕ್ಕ ಮೋದಿ ಭಾರತ್‌ ಮಾತಾಕಿ ಜೈ ಪಂದ್ ಸುರುಕು ಘೋಷಣೆ ಪಾಡ್ದ್, ಅವೆರ್ದ್ ಬೊಕ್ಕ “ಪರಶುರಾಮ ಕ್ಷೇತ್ರದ, ಯೆನ್ನ ಮೋಕೆದ ತುಳುವಪ್ಪೆ ಜೋಕುಲೆ ಸೊಲ್ಮೆಲು” ಪಂದ್ ತುಳುಟ್ಟ್ ಭಾಷಣ ಸುರು ಮಲ್ತೆರ್.

PM Narendra Modi begins his speech in Tulu

Mulki: At the BJP Samaveshan being held at Kolnad in Mulki, PM Narendra Modi was welcomed by all prominent leaders of the BJP.

He was offered ‘ Prasad ‘from Durgaparameshwari temple Kateel and Sri Dharmasthala Manjunatheshwara temple.

Later he addressed the audience first with salutations to Bharat Mata and begun his speech in Tulu language with greetings to the people of Tulunadu.