Tulu News

ಉರ್ವದ ಗಾಂಧಿನಗರ ಶಾಲೆಡ್ ವೋಟು ಪಾಡಿನ ಬಿಜೆಪಿ ಅಭ್ಯರ್ಥಿ ವೇದವ್ಯಾಸ್ ಕಾಮತ್

ಕುಡ್ಲ: ವಿಧಾನಸಭೆ ವೋಟು ಇನಿ ರಾಜ್ಯ ಇಡೀ ಬೊಲ್ಪುರ್ದೆ ನಡತೊಂದು ಉಂಡು.

ಕುಡ್ಲ ದಕ್ಷಿಣ ಬಿಜೆಪಿ ಅಭ್ಯರ್ಥಿ ವೇದವ್ಯಾಸ್ ಕಾಮತ್ ಮೇರ್ ಉರ್ವದ ಗಾಂಧಿನಗರ ಶಾಲೆಡ್ ವೋಟು ಪಾಡಿಯೆರ್.

ತೋಕೂರು ಬ್ರಹ್ಮಕಲಶ ಉಚ್ಚಯೊಗು ಚಾಲನೆ, ಉಗ್ರಾಣ ಮೂರ್ತ, ಪುದೆ ಕಾಣಿಕೆ ಸಮರ್ಪಣೆ

ಶ್ರೀ ಸುಬ್ರಹ್ಮಣ್ಯನ ಶಕ್ತ್ಯಾಯುಧರ್ದ್ ಗ್ರಾಮದ ರಕ್ಷಣೆ : ವಿದ್ಯಾಧೀಶ ತೀರ್ಥ ಸ್ವಾಮೀಜಿ

ತೋಕೂರು : ದೇವೆರ್ನ ಪ್ರಗತಿ ಗ್ರಾಮದ ಅಭಿವೃದ್ಧಿದ ಸಂಕೇತವಾದುಂಡು. ಪತ್ತೆರ್ ಶ್ರದ್ಧೆ ಭಕ್ತಿಡ್ ಸಂದಾವುನ ಸೇವೆರ್ದ್ ಭಗವಂತನ ಕೃಪೆ ಆಯಿನಾತ್ ಬೇಗ ತಿಕ್ಕುಂಡು. ಶ್ರೀ ಸುಬ್ರಹ್ಮಣ್ಯನ ಶಕ್ತ್ಯಾಯುಧ ಗ್ರಾಮದ ರಕ್ಷಣೆಗಾದ್ ಉಪ್ಪುನವು. ಸುಭಿಕ್ಷೆರ್ದ್ ದಿಂಜಿದಿಪ್ಪುನ ಸಮಾಜ ನಿರ್ಮಾಣ ಮಲ್ಪುನ ಜಬದಾರಿ ಧಾರ್ಮಿಕ ಕ್ಷೇತ್ರಲೆರ್ದ್ ನಿರಂತರ ನಡತ್ ಬರೊಡು. ಭಕ್ತೆರ್ ಲ ದೇವಳದ ಪ್ರಗತಿಗ್ ಪ್ರಾಮಾಣಿಕವಾದ್ ಬೇಲೆ ಮಲ್ಪೊಡು ಪಂದ್ ಒಡಿಪು ಪಲಿಮಾರು ಶ್ರೀ ಹೃಷಿಕೇಶ ತೀರ್ಥ ಮೂಲ ಮಹಾ ಸಂಸ್ಥಾನದ ವಿದ್ಯಾಧೀಶ ತೀರ್ಥ ಸ್ವಾಮೀಜಿ ತೆರಿಪಾಯೆರ್.

ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ದೇವಸ್ಥಾನದ ಪುನಃಪ್ರತಿಷ್ಠೆ ಬ್ರಹ್ಮಕುಂಭಾಭಿಷೇಕ ಅಂಚೆನೆ ನಾಗಮಂಡಲ ಉಚ್ಚಯದ ನಿಲೆಟ್ಟ್ ಬುಧಾರ (ಮೇ 10) ನಡತಿನ ತೋರಣ ಮೂರ್ತಗ್ ಚಾಲನೆ ಕೊರ್ದು ಆರ್ ಪಾತೆರಿಯೆರ್.

ಕಟೀಲು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ವೇದಮೂರ್ತಿ ವಾಸುದೇವ ಆಸ್ರಣ್ಣ ಮೇರ್ ಅನ್ನಸಂತರ್ಪಣೆಗ್ ಉಗ್ರಾಣ ಮೂರ್ತ ಮಲ್ತ್ ದ್ ಆಶೀರ್ವಚನ ಕೊರಿಯೆರ್.

ಮೂಲ್ಕಿ ಸೀಮೆದ ಅರಸೆರ್ ಎಂ. ದುಗ್ಗಣ್ಣ ಸಾವಂತೆರ್ ಗುರ್ಕಾರ್ಮೆ ಒಯಿಸ್ ದಿತ್ತೆರ್.

ಈ ಪೊರ್ತುಡು ಸಾಮೂಹಿಕ ದೇವತಾ ಪ್ರಾರ್ಥನೆ, ಪುಣ್ಯಾಹ ವಾಹನ, ದೇವನಾಂದಿ, ಅಚಾರ್ಯಾದಿ ಋತ್ವಿಗ್ವರಣ, ಅರಣಿಮಥನ, ಭದ್ರದೀಪ ಪ್ರತಿಷ್ಠೆ, ಗಣಯಾಗ, ಕಂಕಣಬಂಧ, ಚತುರ್ವೇದ ನಾರಾಯಣ ಸುರುವಾದ್ , ಮಹಾಪೂಜೆ, ಪ್ರಸಾದ ವಿತರಣೆ ನಡತ್ಂಡ್.

ದೇವಸ್ಥಾನದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲು ಪಾತೆರ್ದ್, ಧಾರ್ಮಿಕ ಚಿಂತಕೆರ್ ವಿದ್ವಾನ್ ಪಂಜ ಭಾಸ್ಕರ ಭಟ್, ಅರ್ಚಕೆರ್ ಮಧುಸೂಧನ ಆಚಾರ್ಯ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಉಪಾಧ್ಯಕ್ಷೆರ್ ಮೋಹನ್‌ದಾಸ್, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾಯಿನ ವಿಜಯಕುಮಾರ್ ರೈ, ಟಿ. ಪುರುಷೋತ್ತಮ ರಾವ್, ಲೋಕಯ್ಯ ಕೆ. ಸಾಲ್ಯಾನ್, ವಿಪುಲ ಡಿ. ಶೆಟ್ಟಿಗಾರ್, ಶಾರದಾ ಜಿ. ಬಂಗೇರ, ವಿಶ್ವನಾಥ್, ಯೋಗೀಶ್ ಆರ್. ಕೋಟ್ಯಾನ್, ಬ್ರಹ್ಮಕಲಶೋತ್ಸವ ಸಮಿತಿದ ಅನಂತರಾಮ ಶಿಮಂತ್ರಾಯ, ಪಿ.ಸಿ.ಕೋಟ್ಯಾನ್, ಆರ್.ಎನ್.ಶೆಟ್ಟಿಗಾರ್, ಗಂಗಾಧರ ಶೆಟ್ಟಿ, ಗುರುರಾಜ್ ಎಸ್. ಪೂಜಾರಿ, ರತ್ನಾಕರ ಶೆಟ್ಟಿಗಾರ್, ಮಧವ ಶೆಟ್ಟಿ, ಪೀತಾಂಬರ ಶೆಟ್ಟಿಗಾರ್, ಸಂಪತ್ ದೇವಾಡಿಗ, ದೀಪಕ್ ಸುವರ್ಣ, ಧನಂಜಯ ಶೆಟ್ಟಿಗಾರ್, ರಮೇಶ್ ದೇವಾಡಿಗ ಇತ್ತೆರ್.
ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ಕುಮಾರ್ ಹೆಗ್ಡೆ ಮಾತೆರೆನ್ಲ ಎದ್ಕೊಂಡೆರ್.

ಪ್ರಧಾನ ಸಂಚಾಲಕೆರ್ ಸೋಂದಾ ಭಾಸ್ಕರ ಭಟ್ ಪ್ರಸ್ತಾವನೆ ಮಲ್ದೆರ್.

ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಸೊಲ್ಮೆ ಸಂದಾಯೆರ್. ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ ಲೇಸ್ ಸುಧಾರಿಕೆ ಮಲ್ತೆರ್.

ಭಾರಿ ಗೌಜಿಡ್ ಪುದೆ ಕಾಣಿಕೆ ಸಮರ್ಪಣೆ

ದೇವಸ್ಥಾನಡ್ ನಡಪುನ ಅನ್ನಸಂತರ್ಪಣೆಗ್ ತೋಕೂರು ಗ್ರಾಮಸ್ಥೆರೆರ್ದ್ ಮಲ್ಲ ಮಟ್ಟ್ ದ ಪುದೆ ಕಾಣಿಕೆದ ಸಂದಾಯೆರ್. ಮಲ್ಲ ಸಂಖ್ಯೆಡ್ ಬತ್ತಿನ ಭಕ್ತೆರ್ 3.5 ಕ್ವಿಂಟಾಲ್ ಅರಿ, ಒಂಜಿ ಕ್ವಿಂಟಾಲ್ ಬೆಲ್ಲ, 1700 ತಾರಾಯಿ, 100 ಕೆ.ಜಿ. ಸಕ್ಕರೆ, 150 ಕೆ.ಜಿ ತೊಗರಿ ಬೇಳೆ ಅತ್ತಾಂದೆ ಗುಜ್ಜೆ, ಬಾರೆದ ಇರೆ, ಬಾರೆದ ಪರ್ಂದ್, ಕರ್ ಕುಂಬುಡ, ಕೆರೆಂಗ್ , ಸಿಹಿ ಕುಂಬಳ,ತುರೆ, ಬದನೆ, ಪದೆಂಗಿ ಬೇಳೆ, ದ್ರಾಕ್ಷಿ, ಗೋಡಂಬಿ, ದೀಪದ ಎಣ್ಣೆ,ಉಪ್ಪು ಇಂಚ ಬೇತೆ ಬೇತೆ ಬಗೆತ್ತ ಪುದೆ ಕಾಣಿಕೆನ್ ಗೌಜಿದ ಮೆರವಣಿಗೆಡ್ ಕನತ್ ಕೊರಿಯೆರ್.

ದಕ್ಷಿಣ ಕನ್ನಡ ಜಿಲ್ಲೆಡ್ ಶೇ.57.48%,ವೋಟು

ಕುಡ್ಲ: ಇನಿ ವೋಟುದ ಪ್ರಕ್ರಿಯೆ ಬೊಲ್ಪುಗೇ ಸುರು ಆತ್ಂಡ್. ರಾಜ್ಯದ 224 ವಿಧಾನಸಭೆ ಕ್ಷೇತ್ರಡ್ ವೋಟು ನಡತೊಂದು ಉಂಡು.

ದಕ್ಷಿಣಕನ್ನಡಡ್ ಮಧ್ಯಾಹ್ನ 3 ಗಂಟೆ ಮುಟ್ಟ ಶೇ.57.48% ದಾತ್ ವೋಟು ಪಾಡ್ದೆರ್ ಪಂದ್ ಚುನಾವಣಾ ಆಯೋಗ ಪೊಲಬು ಕೊರ್ತುಂಡು.

ಬೊಲ್ತೇರ್-59.26%, ಕುಡ್ಲ-57.32%, ಕುಡ್ಲ ಉತ್ತರ- 55.15%, ಕುಡ್ಲ ದಕ್ಷಿಣ 49.29%, ಬೆದ್ರ-57.12%, ಬಂಟ್ವಾಳ- 61.63%, ಸುಳ್ಯ-59.95%, ಪುತ್ತೂರ್-61.45% ದಾತ್ ಮತದಾನ ಆತ್ಂಡ್.

ಮೇ18: ಗೋಸ್ಮರಿ ಫ್ಯಾಮಿಲಿ ಪಿಕ್ಚರ್ ರಿಲೀಸ್

ಗೋಸ್ಮರಿ ಫ್ಯಾಮಿಲಿ ತುಳು ಪಿಕ್ಚರ್ ಮೇ18 ಕ್ಕ್ ರಿಲೀಸ್ ಅವೆರೆ ಉಂಡು.

ಸಾಯಿಕೃಷ್ಣ ಕುಡ್ಲ ನಿರ್ದೇಶನದ ಈ ಪಿಕ್ಚರ್ ಡ್ ನಾಯಕೆಯಾದ್ ಅರ್ಜುನ ಕಾಪಿಕಾಡ್, ನಾಯಕಿಯಾದ್ ಸಮಂತ ಅಮಿನ್ ಅಭಿನಯ ಮಲ್ದೆರ್. ಅತ್ತಂದೆ ಕಲಾವಿದೆರಾದ್ ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರ್, ದೇವದಾಸ್ ಕಾಪಿಕಾಡ್, ನವೀನ್ ಡಿ ಪಾಡೀಲ್ ಸೇರಿನಂಚನೆ ಸುಮಾರ್ ಕಲಾವಿದೆರ್ ನಟನೆ ಮಲ್ದೆರ್. ಅಂಚೆನೆ ಈ ಪಿಕ್ಚರ್ ನ್ ಶಕುಂತಲಾ ಅಂಚನ್ ನಿರ್ಮಾಣ ಮಲ್ದೆರ್.

ಕುಟುಂಬ ಸಮೇತೆರಾದ್ ವೋಟು ಪಾಡಿನ ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆ

ವಿಧಾನಸಭೆ ವೋಟು ಇನಿ ಬೊಲ್ಪುಗು ಸುರು ಆತ್ಂಡ್.

ಧರ್ಮಸ್ಥಳದ ಧರ್ಮಾಧಿಕಾರಿ ಡಿ.ವೀರೇಂದ್ರ ಹೆಗ್ಗಡೆ ಮೇರ್, ಬೊಡೆದಿ ಹೇಮಾವತಿ ಹೆಗ್ಗಡೆ, ಬೊಕ್ಕ ಹರ್ಷೇಂದ್ರ ಕುಮಾರ್ ಮೆರೆನ ಬೊಡೆದಿ ಸುಪ್ರಿಯಾ ಮೇರ್ ಶ್ರೀ ಮಂಜುನಾಥೇಶ್ವರ ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆ ಧರ್ಮಸ್ಥಳಡ್ ಕುಟುಂಬ ಸಮೇತೆರಾದ್ ಬತ್ತ್ ದ್ ಇನಿ ಯಕ್ಷಗಾನ ಬೂತ್ ಡ್ ವೋಟು ಪಾಡಿಯೆರ್.

ವೋಟು ಪಾಡುನ ದುಂಬು ಮಠಂತಬೆಟ್ಟು ಶ್ರೀ ಮಹಿಷಮರ್ದಿನಿ ದೇವಲ್ಯಗ್ ಭೇಟಿ ಕೊರ್ನ ಕಾಂಗ್ರೆಸ್ ಅಭ್ಯರ್ಥಿ ಅಶೋಕ್ ಕುಮಾರ್ ರೈ

ಪುತ್ತೂರ್: ರಾಜ್ಯ ಇಡೀ ವಿಧಾನಸಭೆ ವೋಟು ಪ್ರಕ್ರಿಯೆ ಸುರು ಆತ್ಂಡ್.

ಇನಿ ಪುತ್ತೂರ್ ವಿಧಾನಸಭೆ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಅಶೋಕ್ ಕುಮಾರ್ ರೈ ಕೋಡಿಂಬಾಡಿ ಮೇರ್ ವೋಟು ಪಾಡುನ ದುಂಬು ಮಠಂತಬೆಟ್ಟು ಶ್ರೀ ಮಹಿಷಮರ್ದಿನಿ ದೇವಲ್ಯಗ್ ಕುಟುಂಬ ಸಮೇತೆರಾದ್ ಭೇಟಿ ಕೊರ್ದು, ಇಸೇಸ ಪ್ರಾರ್ತನೆ, ಪೂಜೆ ಸಂದಾಯೆರ್. ಬೊಕ್ಕ ಕೋಡಿಂಬಾಡಿದ ಬೂತ್ ಡ್ ವೋಟು ಪಾಡಿಯೆರ್.

ಬೂತ್ ನಂಬರ್ 186 ಟ್ಟ್ ವೋಟು ಪಾಡಿನ ಬಂಟ್ವಾಳ ಶಾಸಕೆರ್ ರಾಜೇಶ್ ನಾಯ್ಕ್

ಬಂಟ್ವಾಳ: ವಿಧಾನಸಭೆ ಕ್ಷೇತ್ರದ ವೋಟು ನಡತೊಂದು ಉಂಡು.

ಕುಡ್ಲ ಉತ್ತರ ವಿಧಾನಸಭೆ ಕ್ಷೇತ್ರದ ಸ್ವಾಮಿ ವಿವೇಕಾನಂದ ಪದವಿ ಪೂರ್ವ ಕಾಲೇಜ್ ತೆಂಕ ಎಡಪಡವುಡ್ ಬಂಟ್ವಾಳ ಕ್ಷೇತ್ರದ ಶಾಸಕೆರ್ ರಾಜೇಶ್ ನಾಯ್ಕ್ ಬೂತ್ ನಂಬರ್ 186 ಟ್ಟ್ ವೋಟು ಪಾಡಿಯೆರ್.

ಬೋಳಿಯಾರ್ ಗ್ರಾಮದ ಜಾರದಗುಡ್ಡೆ ಶಾಲೆಡ್ ವೋಟು ಪಾಡಿನ ಶಾಸಕೆರ್ ಯು.ಟಿ.ಖಾದರ್

ಉಳ್ಳಾಲ: ರಾಜ್ಯ ವಿಧಾನಸಭೆ ವೋಟು ಇನಿ ನಡತೊಂದು ಉಂಡು.

ಬೋಳಿಯಾರ್ ಗ್ರಾಮದ ಜಾರದಗುಡ್ಡೆ ಶಾಲೆಡ್ ಕುಡ್ಲ ವಿಧಾನಸಭೆ ಕ್ಷೇತ್ರದ ಬೂತ್ ನಂಬರ್ 103 ಟ್ಟ್, ಶಾಸಕೆರ್ ಯು.ಟಿ.ಖಾದರ್ ಮೇರ್ ವೋಟು ಪಾಡಿಯೆರ್.

ಬೊಕ್ಕ ಮಾಧ್ಯಮದೊಟ್ಟಿಗೆ ಪಾತೆರ್ದ್, ಈ ಸರ್ತಿದ ವೋಟುಡು ಜನಕುಲೆನ ಬೇನೆ, ಸಮಸ್ಯೆನ್ ಮತದಾರೆರ್ ಮತಪತ್ರದ ಮುಖೇನ ತೂಪಾಯೆರೆ ಉಲ್ಲೆರ್. ಕ್ಷೇತ್ರಡ್ ಮತ ಧರ್ಮದಕುಲುಲ ಸೌಹಾರ್ದತಯುತವಾದ್ ವೋಟು ಮಲ್ತ್ ದ್, ಒಟ್ಟಾರ್ದ್ ಈ ಸರ್ತಿ ಕಾಂಗ್ರೆಸ್ ಬರೊಡು ಪನ್ಪುನ ಉದ್ದೇಶ ದೀವೊಂದು ವೋಟು ಪಾಡ್ದೆರ್. 15 ದಿನತ್ತ ಕಾರ್ಯಕರ್ತೆರೆನ ಶ್ರಮಕ್ಕ್ ಸೊಲ್ಮೆ ಸಂದಾಯೆರ್.

ಬೊಡೆದಿ ಮಗಲೆನೊಟ್ಟಿಗೆ ಬತ್ತ್ ದ್ ವೋಟು ಪಾಡಿನ ಬಿಜೆಪಿ ಅಭ್ಯರ್ಥಿ ಸತೀಶ್ ಕುಂಪಲ

ಉಳ್ಳಾಲ: ರಾಜ್ಯ ವಿಧಾನಸಭೆ ವೋಟು ಪ್ರಕ್ರಿಯೆ ನಡತೊಂದು ಉಂಡು.

ಮುಲ್ಪ ಕುಡ್ಲ (ಉಳ್ಳಾಲ) ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಸತೀಶ್ ಕುಂಪಲ ಮೇರ್ ಕುಂಪಲ ಬೂತ್ ಸಂಖ್ಯೆ 127 ಟ್ಟ್ ಬೊಡೆದಿ ಬೊಕ್ಕ ಮಗಲೆನೊಟ್ಟಿಗೆ ಬತ್ತ್ ದ್ ವೋಟು ಪಾಡಿಯೆರ್.

Arun Kumar Puttila candidate from Puttur constituency casts vote at Mundoor booth ಮುಂಡೂರು ಬೂತ್ ಡ್ ವೋಟು ಪಾಡಿಯೆರ್ ಪುತ್ತೂರ್ ಪಕ್ಷೇತರ ಅಭ್ಯರ್ಥಿ ಅರುಣ್ ಕುಮಾರ್ ಪುತ್ತಿಲ

ಪುತ್ತೂರ್: ರಾಜ್ಯ ಇಡೀ ವಿಧಾನಸಭೆ ವೋಟುದ ಪ್ರಕ್ರಿಯೆ ಸುರು ಆತ್ಂಡ್.

ಪುತ್ತೂರ್ ವಿಧಾನಸಭೆ ಕ್ಷೇತ್ರದ ಪಕ್ಷೇತರ ಅಭ್ಯರ್ಥಿ ಅರುಣ್ ಕುಮಾರ್ ಪುತ್ತಿಲ ಮೇರ್ ಬೊಲ್ಪು ಬೊಲ್ಪುಗು ಮುಂಡೂರು ದ.ಕ.ಜಿ.ಪಂ. ಹಿರಿಯ ಪ್ರಾಥಮಿಕ ಶಾಲೆದ ಬೂತ್ ಡ್ ವೋಟು ಪಾಡಿಯೆರ್.