ಮ್ಯಾನ್ಮಾರ್ ಡ್ ಕರಿನ ಐತಾರರ್ದ್ ಸುರು ಆಯಿನ ಚಂಡಮಾರುತಡ್ 145 ರ್ದ್ ಎಚ್ಚ ಜನ ತೀರ್ ಪೋಯೆರ್.
ನನಲ ಸಾವುದ ಸಂಖ್ಯೆ ಎಚ್ಚಾಪುನ ಅಂದಾಜಿ ಉಂಡು. ಚಂಡಮಾರುತರ್ದ್ ರಾಖಿನೆ ರಾಜ್ಯಗ್ ಮಾಸ್ತ್ ಪೆಟ್ಟಾತ್ಂಡ್. ತೀರ್ ಪೋಯಿನಕ್ಲೆನೆಟ್ಟ್ ನಾಲ್ ಜನ ಸೈನಿಕೆರ್, 24 ಜನ ಸ್ಥಳೀಯೆರ್ ಬೊಕ್ಕ 117 ಜನ ರೋಹಿಂಗ್ಯನಕುಲು ಇತ್ತೆರ್.
ಬಿಸಿಸಿಐ ಎಂಜಿಎಂ ಮೇ27 ಕ್ಕ್ ನಡಪರೆ ಉಂಡು.
ಅನಿಯೇ ಪೊಸ ಲೈಂಗಿಕ ಕಿರುಕುಳ ತಡೆ ನೀತಿಗ್ ಬಿಸಿಸಿಐ ಸದಸ್ಯೆರ್ ಅನುಮೋದನೆ ಕೊರಿಯೆರೆ ಉಲ್ಲೆರ್ ಪಂದ್ ವರದಿ ಆತ್ಂಡ್. ನೆತ್ತೊಟ್ಟಿಗೆ ಅಕ್ಟೋಬರ್-ನವೆಂಬರ್ ಡ್ ನಡಪುನ ಏಕದಿನ ವಿಶ್ವಕಪ್ ದ ತಯಾರ್ ದ ಬಗೆಟ್ ಮೇಲ್ವಿಚಾರಣೆ ಕೂಟನ್ ರಚನೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.
ಮಹಿಳಾ ಪ್ರೀಮಿಯರ್‌ ಲೀಗ್ ಗ್ ಪೊಸ ಸಮಿತಿ ರಚನೆ ಆತ್ಂಡ್. ಅತ್ತಂದೆ ಆರ್ಥಿಕ ಚಟುವಟಿಕೆಲೆನ ಬಗ್ಗೆಲ ಯೋಜನೆ ರಡಿ ಮಲ್ಪೆರೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಪಾಕಿಸ್ತಾನದ ಕಡೆರ್ದ್ ಭಾರತೀಯ ವಾಯುಪ್ರದೇಶಗ್ ಬತ್ತಿನ ಡ್ರೋನ್ ನ್ ಪಂಜಾಬ್ ದ ಅಮೃತಸರ ಸೆಕ್ಟರ್ ಡ್ ಪುಡಾತ್ ಪಾಡ್ದೆರ್.
ಬಿಎಸ್ ಎಫ್ ಪಡೆಕುಲು ಗುಂಡುದ ದಾಳಿ ನಡಪಾದ್, ಡ್ರೋನ್ ನ್ ವಶಕ್ಕ್ ಪಡೆತೆರ್. ಅಂಚೆನೆ ಈ ಡ್ರೋನ್ ದ ಬಗೆಟ್ ನನತ್ ಕಾರ್ಯಾಚರಣೆ ನಡತೊಂದು ಉಂಡು ಪಂದ್ ಬಿಎಸ್ ಎಫ್ ಪಂಜಾಬ್ ಫ್ರಾಂಟಿಯರ್ ಪೊಲಬು ಕೊರ್ತುಂಡು.
ಬೊಲ್ತೇರ್ ತಾಲೂಕ್ ದ ಶಿಶಿಲ ಗ್ರಾಮದ ಶ್ರೀ ಶಿಶಿಲೇಶ್ವರ ದೇವಲ್ಯದ ವರ್ಷಾಧಿದ ಜಾತ್ರೆ ಉಚ್ಚಯದ ಮಲ್ಲ ತೇರ್ ಉಚ್ಚಯ ಲೇಸ್ ಗ್ ಅರುಣ್ ಕುಮಾರ್ ಪುತ್ತಿಲ ಮೇರ್ ಮೇ19 ಕ್ಕ್ ರಾತ್ರೆ ಭೇಟಿ ಕೊರಿಯೆರ್.
ಈ ಪೊರ್ತುಡು ಮೆರೆನೊಟ್ಟಿಗೆ ಸುಮಾರ್ ಕಾರ್ಯಕರ್ತೆರ್ ಇತ್ತೆರ್.
ವೃತ್ತಿಪರ ಕೋರ್ಸ್ ದ ಪ್ರವೇಶಗಾದ್ ಸಿಇಟಿ ಪರೀಕ್ಷೆ ಇನಿ ಬೊಕ್ಕ ಎಲ್ಲೆ ನಡಪರೆ ಉಂಡು.
ಇನಿ ಜೀವ ವಿಜ್ಞಾನ, ಗಣಿತ, ಎಲ್ಲೆ ಭೌತ ವಿಜ್ಞಾನ, ರಸಾಯನ ವಿಜ್ಞಾನ ವಿಷಯದ ಪರೀಕ್ಷೆ ನಡಪರೆ ಉಂಡು. ಮೇ22 ಕ್ಕ್ ಬೆಂಗ್ಲೂರ್, ಬೀದರ್, ವಿಜಯಪುರ, ಬಳ್ಳಾರಿ, ಬೆಳಗಾವಿ, ಕುಡ್ಲ ಕೇಂದ್ರಡ್ ಬೊಲ್ಪುಗು 11.30 ರ್ದ್ 12.30 ಮುಟ್ಟ ಹೊರನಾಡ್ ಬೊಕ್ಕ ಗಡಿನಾಡ್ ಕನ್ನಡ ಕಲ್ಪಾರ್ಥಿಲೆಗ್ ಕನ್ನಡ ಭಾಷಾ ಪರೀಕ್ಷೆ ನಡಪರೆ ಉಂಡು.
ಕೊಲಂಬಿಯಾದ ಅಮೆಜಾನ್ ಅರಣ್ಯಡ್ ಮೇ1 ಕ್ಕ್ ಪೈಲಟ್ ನೊಟ್ಟಿಗೆ 6 ಜನ ಪ್ರಯಾಣಿಕೆರ್ ಇತ್ತಿನ ಎಲ್ಯ ಇಮಾನವೊಂಜಿ ಪತನ ಆಂಡ್.
ಆಕ್ಸಿಡೆಂಟ್ ದ ಬೊಕ್ಕ ಅಧಿಕಾರಿಲು ಆಪರೇಷನ್ ಹೋಪ್ ಪುದರ್ ದ ರಕ್ಷಣಾ ಕಾರ್ಯಾಚರಣೆ ಸುರು ಮಲ್ದೆರ್. 17 ದಿನತ್ತ ಬೊಕ್ಕ ಆಕ್ಸಿಡೆಂಟ್ ದ ಪ್ರದೇಶನ್ ಗುರುತಿಸಾಯೆರ್. ಪೈಲಟ್ ಬೊಕ್ಕ ಬೇತೆ ರಡ್ಡ್ ಜನ ತೀರ್ ಪೋತೆರ್. 11 ತಿಂಗೊಲ್ದ ಎಲ್ಯ ಬಾಲೆ ಬೊಕ್ಕ 4,9 ಬೊಕ್ಕ 13 ವರ್ಷದ ಜೋಕುಲು ಬದ್ಕ್ ಒರಿಯೆರ್. ಇತ್ ದಿನ ಜೋಕುಲು ಬದ್ಕಿನಿ ಎಂಚ ಪನ್ಪುನ ಬಗ್ಗೆ ವಿವರಲು ತಿಕ್ಕಿಜಿ.
ಕೇಂದ್ರ ಸರ್ಕಾರ ದೇಶಡ್ 8 ಪೊಸ ಪೇಂಟೆ ಸ್ಥಾಪನೆ ಮಲ್ಪೆರೆ ಯೋಜನೆ ಮಲ್ತೊಂದು ಉಂಡು ಪಂದ್ ನಗರ ವ್ಯವಹಾರಲೆನ ಇಲಾಖೆದ ಜಿ20 ವಸತಿ ಘಟಕದ ನಿರ್ದೇಶಕೆರ್ ತೆರಿಪಾದೆರ್.
ಅಸ್ತಿತ್ವಡ್ ಇಪ್ಪುನ ನಗರದ ಮಿತ್ತ್ ಎಚ್ಚಾವೊಂದು ಇಪ್ಪುನ ಹೊರೆನ್ ಕಮ್ಮಿ ಮಲ್ಪುನ ಉದ್ದೇಶಡ್ ನೆನ್ ಕಾರ್ಯರೂಪಗ್ ಕನಯೆರೆ ಆಪುಂಡು ಪಂದ್ ಪಂಡೆರ್.
ಹಣಕಾಸು ಆಯೋಗದ ಶಿಫಾರಸ್ಸ್ ದ ಬೊಕ್ಕ ಸುಮಾರ್ ರಾಜ್ಯಲು ಪೊಸ ಪೇಂಟೆದ ಸ್ಥಾಪನೆಗ್ ಪ್ರಸ್ತಾವನೆನ್ ಕಡಪಾದ್ಂಡ್. ಆಂಡ 8 ನಗರದ ರಚನೆನ್ ಪರಿಗಣಿಸಾಯೆರೆ ಆಪುಂಡು ಪಂದ್ ಪಂಡೆರ್.
ಚಾರ್ ಧಾಮ್ ಯಾತ್ರೆಗ್ ಭೇಟಿ ಕೊರ್ನ ಭಕ್ತೆರೆನ ಸಂಖ್ಯೆ 10 ಲಕ್ಷರ್ದ್ ಎಚ್ಚಾತ್ಂಡ್ ಪಂದ್ ಉತ್ತರಾಖಂಡ ಪೊಲೀಸೆರ್ ತೆರಿಪಾದೆರ್.
ಭಕ್ತೆರೆಗ್ ಒವ್ವೇ ತೊಂದರೆ ಆವಂದಿಲೆಕ ದರ್ಶನಗ್ ವ್ಯವಸ್ಥೆ ಮಲ್ತೊಂದು ಉಲ್ಲ ಪಂದ್ ಸಿಎಂ ಪುಷ್ಕರಸಿಂಗ್ ಧಾಮಿ ತೆರಿಪಾದೆರ್. ರಾಜ್ಯ ಸರ್ಕಾರದ ವತಿರ್ದ್ ಯಾತ್ರಾರ್ಥಿಲೆಗ್ ಮಾತ ರೀತಿದ ಸೌಲಭ್ಯ ಕೊರಿಯೆರೆ ಪ್ರಯತ್ನ ಮಲ್ಪುವ ಪಂದ್ ಸಿಎಂ ತೆರಿಪಾದೆರ್. ಕರಿನ 22 ಕ್ಕ್ ಚಾರ್ ಧಾಮ್ ಯಾತ್ರೆ ಸುರು ಆತ್ಂಡ್.
ಬೆಂಗಳೂರು : ಪುಗರ್ತೆದ ಕಣ್ಣ್ ದ ತಜ್ಞೆರ್ , ನಾರಾಯಣ ನೇತ್ರಾಲಯದ ಸ್ಥಾಪಕೆರ್, ತುಳುನಾಡ್ ದಾರ್ ಡಾ. ಭುಜಂಗ ಶೆಟ್ಟಿ (69) ಮೇರ್ ಮೇ 19 ಗು ಬಯ್ಯಡ್ ತಿಗಲೆಬೇನೆಡ್ ದೇವೆರೆ ಪಾದ ಸೇರಿಯೆರ್.
ಆರ್ ಇನಿ ಕಣ್ಣ್ ದ ಆಸ್ಪತ್ರೆಗ್ ಬತ್ತ್ ದ್ ರೋಗಿಲೆಗ್ ಚಿಕಿತ್ಸೆ ಕೊರ್ದು ಪೋದಿತ್ತೆರ್. ಇಲ್ಲಗ್ ಪೋಯಿ ಬೊಕ್ಕ ಬಯ್ಯಡ್ 6 ಗಂಟೆಗ್ ತಿಗಲೆ ಬೇನೆ ಬೈದ್ಂಡ್. ಇಲ್ಲದಕುಲು ಕೂಡ್ಲೆ ಯಶವಂತಪುರತ್ತ ಕೊಲಂಬಿಯಾ ಏಷ್ಯಾ ಆಸ್ಪತ್ರೆಗ್ ದಾಖಲ್ ಮಲ್ತಿತ್ತೆರ್. ಆಂಡಲ ಪ್ರಯೋಜನ ಆಯಿಜಿ ಪಂದ್ ತೆರಿದ್ ಬೈದ್ಂಡ್.
ಸೆ.30 ಮುಟ್ಟ ವಿನಿಮಯ ಮಲ್ಪೆರೆ ಅವಕಾಶ
ರಡ್ಡ್ ಸಾರ ರೂಪಾಯಿ ಬಿಲೆತ್ತ ನೋಟುಲೆನ್ ಚಲಾವಣೆರ್ದ್ ಪಿರದೆಪ್ಪರೆ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ ಬಿಐ) ನಿರ್ಧಾರ ಮಲ್ದ್ಂಡ್.
ಈ ಕರೆನ್ಸಿ ನೋಟುಲು ಕಾನೂನಾತ್ಮಕವಾದ್ ಸಿಂಧುವಾದ್ ದುಂಬರಿಯೆರೆ ಉಂಡು ಪಂದ್ ಆರ್ ಬಿಐ ಸುಕ್ರಾರ ಪಂತ್ಂಡ್.
ನನ 2 ಸಾರ ರೂ. ನೋಟು ಇತ್ತಿನಕುಲು ಅವೆನ್ ಪಿರ ಮಲ್ಪರೆ ಸಮಯಾವಕಾಶ ಕೊರ್ತುಂಡು. ಆರ್ ಬಿಐ ಕೊರ್ನ ಪೊಲಬು ಪ್ರಕಾರ 2023 ಸೆಪ್ಟೆಂಬರ್‌ 30ದ ಉಲಯಿ 2 ಸಾರ ಮುಖಬಿಲೆತ್ತ ನೋಟುನ್ ವಾಪಸ್ ಕೊರ್ದು ವಿನಿಮಯ ಮಲ್ಪೊಲಿ.
