ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 25ನೇ ಸಂಚಿಕೆ ಸೆ.18 ಸೋಮಾರ ಬಯ್ಯಗ್ 4.15ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರಾಯಿನ ಆರ್ ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಸೆ.19 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಡ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಮುಲ್ಕಿ : ಇಂಚೊಗು ದೇವೆರೆ ಪಾದ ಸೇರಿನ ಲಲಿತ್ ಮಹಲ್ ದ ಧಣಿ ಹರಿಶ್ಚಂದ್ರ ವಿ.ಕೋಟ್ಯಾನ್ ಮೆರೆಗ್ ಮುಲ್ಕಿ ಬಿಲ್ಲವ ಸಮುದಾಯ ಭವನಡ್ ಐತಾರ ಸಾರ್ವಜನಿಕೆರೆರ್ದ್ ನುಡಿ ನಮನ ಲೇಸ್ ನಡತ್ಂಡ್.
ಬಿಲ್ಲವ ಸಮಾಜ ಸೇವಾ ಸಂಘ ಮುಲ್ಕಿ ಸಂಘ ದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ ನುಡಿ ನಮನ ಲೇಸ್ ಉದಿಪನ ಮಲ್ತೆರ್.
ಮುಲ್ಕಿ ನಾಲ್ಕು ಪಟ್ಣ ಮೊಗವೀರ ಮಹಾಸಭಾದ ಅಧ್ಯಕ್ಷೆರ್ ಸುಜಿತ್ ಸಾಲ್ಯಾನ್, ಮುಲ್ಕಿ ನಗರ ಪಂಚಾಯತ್ ಮಾಜಿ ಅಧ್ಯಕ್ಷೆರ್ ಅಬ್ದುಲ್ ರಜಾಕ್, ಪ್ರಿಯದರ್ಶಿನಿ ಕೋ ಆಪರೇಟಿವ್ ಸಂಘದ ಅಧ್ಯಕ್ಷೆರ್ ವಸಂತ ವಿ ಬೆರ್ನಾಡ್, ಮುಲ್ಕಿ ಲಯನ್ಸ್ ಅಧ್ಯಕ್ಷೆರ್ ಶೀತಲ್ ಸುಶೀಲ್, ಜೇಸಿಐ ದ ಲೋಕೇಶ್ ಹೆಜಮಾಡಿ, ಬಿಲ್ಲವ ಮಹಾಮಂಡಲದ ಗೌರವ ಪ್ರಧಾನ ಕಾರ್ಯದರ್ಶಿ ಗಂಗಾಧರ ಪೂಜಾರಿ ಚೇಳಾಯಿರು, ನಾರಾಯಣ ಗುರು ಶಿಕ್ಷಣ ಸಂಸ್ಥೆದ ಪ್ರಿನ್ಸಿಪಾಲ್ ಯತೀಶ್ ಪೂಜಾರಿ, ಹರ್ಷರಾಜ್ ಶೆಟ್ಟಿ, ಹಳೆಯಂಗಡಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ಚಂದ್ರಶೇಖರ ನಾನಿಲ್, ಕೆ.ಎಸ್.ರಾವ್ ನಗರ ನಾರಾಯಣ ಗುರು ಸಂಘದ ಜನಾರ್ಧನ ಬಂಗೇರ, ಮುಲ್ಕಿ ರೋಟರಿ ಅಧ್ಯಕ್ಷೆರ್ ಭುಜಂಗ ಕವತಾರ್, ವಾಮನ ಕೋಟ್ಯಾನ್ ನಡಿಕುದ್ರು, ಡಾ. ಹರಿಶ್ಚಂದ್ರ ವಿ. ಸಾಲ್ಯಾನ್, ಪ್ರಕಾಶ್ ಸುವರ್ಣ ಮೊಕುಲು ನುಡಿ ನಮನ ಸಂದಾಯೆರ್.
ಕಡೆಕ್ಕ್ ಎಚ್ ವಿ ಕೋಟ್ಯಾನ್ ರೆನ ಆತ್ಮೊಗು ಶಾಂತಿ ತಿಕ್ಕಡ್ ಪಂದ್ ಮೌನ ಪ್ರಾರ್ಥನೆ ಮಲ್ತ್ ದ್ ಅರೆನ ಭಾವಚಿತ್ರೊಗು ಪುಷ್ಪಾರ್ಚನೆ ಮಲ್ತೆರ್.
ಎಚ್ ವಿ ಕೋಟ್ಯಾನ್ ರೆನ ಮಗೆ ಅವಿನಾಶ್, ಪ್ರಮಲ್ ಕಾರ್ಕಳ ಬೊಕ್ಕ ಇಲ್ಲದಕುಲು ಇತ್ತೆರ್. ಸಂಘದ ಮಾಜಿ ಅಧ್ಯಕ್ಷೆರ್ ರಾಘು ಸುವರ್ಣ, ರಮೇಶ್ ಅಮೀನ್ ಕೊಕ್ಕರಕಲ್, ಪರಮಾನಂದ ಸಾಲ್ಯಾನ್, ಕಿಶೋರ್ ಸಾಲ್ಯಾನ್, ವಿಜಯ ಕುಮಾರ್ ಕುಬೆವೂರು, ಚಿತ್ರಾಪು ವಾಸು ಪೂಜಾರಿ, ಮಾಧವ ಕಿಲ್ಪಾಡಿ ಮೊಕುಲು ಮಾತ ಇತ್ತೆರ್. ಚಂದ್ರಶೇಖರ್ ಸುವರ್ಣ ಮೇರ್ ನುಡಿ ನಮನ ಕೊರ್ದು ಸೊಲ್ಮೆ ಸಂದಾಯೆರ್. ನರೇಂದ್ರ ಕೆರೆಕಾಡು ಸಭೆ ಸುಧಾರಿಕೆ ಮಲ್ತೆರ್.
ಮುಲ್ಕಿ : ಹಿಂದೂ ಯುವ ಸೇನೆ ಬೊಕ್ಕ ಮಹಿಳಾ ಮಂಡಳಿ ಮುಲ್ಕಿ ಘಟಕದ ಮುತಾಲಿಕೆಡ್ ಅಕ್ಟೋಬರ್ 10 ಕ್ಕ್ ಮುಲ್ಕಿಡ್ ನಡಪರೆ ಉಪ್ಪುನ 25 ನೇ ವರ್ಷದ ಸಾರ್ವಜನಿಕ ಶ್ರೀ ಶಾರದಾ ಮಹೋತ್ಸವದ ಲೆಪ್ಪೋಲೆ ಬುಡುಗಡೆ ಲೇಸ್ ಐತಾರ ಪುನರೂರು ಕಾಂಪ್ಲೆಕ್ಸ್ ದ ಚಾವಡಿಡ್ ನಡತ್ಂಡ್.
ಉದ್ಯಮಿ ವಾಸು ಪೂಜಾರಿ ಚಿತ್ರಾಪು ಮೇರ್ ಲೆಪ್ಪೋಲೆ ಬುಡುಗಡೆ ಮಲ್ತೆರ್. ರಂಜನ್ ವಿ. ಶೆಟ್ಟಿ ಮೇರ್ ಲಕ್ಕಿಡಿಪ್ ಬುಡುಗಡೆ ಮಲ್ತೆರ್.
ಲೇಸ್ ಡ್ ಘಟಕದ ಗೌರವ ಸಲಹೆಗಾರೆರಾಯಿನ
ಮಹಿಮ್ ಹೆಗ್ಡೆ, ಹರ್ಷರಾಜ್ ಶೆಟ್ರ್ ಪಾತೆರ್ದ್ ಎಡ್ಡೆಪ್ಪು ಬಯಕಿಯೆರ್. ಹಿಂದೂ ಯುವ ಸೇನೆದ ಅಧ್ಯಕ್ಷೆರ್ ದಿನೇಶ್ ಕೊಲ್ನಾಡ್, ಪಾತೆರ್ದ್ ಈ ವರ್ಷ ಉತ್ಸವದ ಬೊಳ್ಳಿ ಪರ್ಬದ ಆಚರಣೆ ನಿಲೆಟ್ಟ್ ಶೋಭಾಯಾತ್ರೆಡ್ 25 ಟ್ಯಾಬ್ಲೊ ಮಲ್ಪುನ ಉದ್ದೇಶ ಉಂಡು. ಉತ್ಸವೊಗು ಮಾತೆರ್ಲ ಸಹಕಾರ ಮಲ್ಪೊಡು ಪಂದ್ ಬಿನ್ನಾಪು ಮಲ್ತೆರ್.
ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಲತಾ ಶೇಖರ್, ಉಪಾಧ್ಯಕ್ಷೆರ್ ಸುಲತಾ, ಕಾರ್ಯದರ್ಶಿ ಯಶೋದಾ, ಹಿಂದೂ ಯುವ ಸೇನೆದ ಪ್ರಧಾನ ಕಾರ್ಯದರ್ಶಿ ನಿತಿನ್ ದೇವಾಡಿಗ, ಕೋಶಾಧಿಕಾರಿ ಸತೀಶ್ ಬಂಗೇರ ಚಿತ್ರಾಪು, ಕಿಶೋರ್ ಸಾಲ್ಯಾನ್ ಇತ್ತೆರ್.
ಅಧ್ಯಕ್ಷೆರ್ ದಿನೇಶ್ ಕೊಲ್ನಾಡು ಸ್ವಾಗತ ಮಲ್ತೆರ್. ಉಪಾಧ್ಯಕ್ಷೆರ್ ಶಂಕರ ಪಡಂಗ ಲೇಸ್ ಸುಧಾರಿಕೆ ಮಲ್ತೆರ್.
ಬೆಂಗಳೂರು : ಬೆಂಗಳೂರುದ “ಕರ್ನಾಟಕ ಚಲನ ಚಿತ್ರ ಕಲಾವಿದರ ಸಂಘ”ದ “ರಾಜ್ ಕುಮಾರ್ ಭವನಡ್ ಸೆ.3 ಐತಾರ ತುಳು ಸಿನೆಮಾದ ಸುವರ್ಣ ಪಯಣ” ವಿಶೇಷ ಲೇಸ್ ನಡತ್ತ್ಂಡ್.
ತುಳು ಚಿತ್ರರಂಗದ ಸವ್ಯಸಾಚಿ, ಹಿರಿಯ ರಂಗಕರ್ಮಿ ‘ತಮ್ಮಲಕ್ಷ್ಮಣ’ ಮೆರೆನ ಮುತಾಲಿಕೆಡ್, ದೃಶ್ಯಾಲಯ ಮಂಗಳೂರು ಬೊಕ್ಕ ಸ್ವಯಂಪ್ರಭ ಟಾಕೀಸ್ ಯಾಪ್ ಬೆಂಗಳೂರು ಮೊಕಲ್ನ ಕೂಡ್ ಕಟ್ಟ್ ಡ್ 50 ವರ್ಸದ ತುಳು ಸಿನೆಮಾದ ಚರಿತ್ರೆನ್ ಬೊಲ್ಪುಗು ಕನಪಿನ, ಪೊಸ ಪೀಳ್ಯೊಗು ಮುಟ್ಟಾವುನ ಮಹತ್ವಾಕಾಂಕ್ಷೆದ ಕಾರ್ಯಕ್ರಮ ನಡತ್ತ್ಂಡ್.
ಸಿನೆಮಾ ಬೊಕ ಸಾಹಿತ್ಯ ಕ್ಷೇತ್ರದ ದಿಗ್ಗಜೆರಾಯಿನ ಡಾ. ಗಿರೀಶ್ ಕಾಸರವಳ್ಳಿ, ಡಾ. ಜಯಮಾಲ, ಡಾ. ಸತೀಶ್ ಕುಮಾರ್ ಎಸ್. ಹೊಸಮನಿ, ಭಾ.ಮಾ. ಹರೀಶ್, ವಿ. ಮನೋಹರ್ ಮುಖ್ಯ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್. ತುಳುಕೂಟ, ತುಳುವೆರೆಂಕುಲು, ತುಳುವೆರೆ ಚಾವಡಿ, ಐ-ಲೇಸಾ, ತುಳುನಾಡ ಜವನೆರ್, ಜೈ ತುಳುನಾಡ್ ಸಂಘಟನೆದ ಪ್ರಮುಖೆರ್ ಪಾಲ್ ಪಡೆದಿತ್ತೆರ್. ಅಂಚನೆ ಅನೇಕ ಚಲನಚಿತ್ರ ರಂಗದ ಕಲಾವಿದೆರ್, ತಾಂತ್ರಿಕೆರ್ ಪಾಲ್ ಪಡೆದಿತ್ತೆರ್.
ಬೆಂಗಳೂರುದ ಸಂಘಟಕೆ ಪಳ್ಳಿ ವಿಶ್ವನಾಥ್ ಶೆಟ್ಟಿ ಮಾತೆರೆನ್ಲಾ ಮೋಕೆಡ್ ಮಾನಾದಿಗೆಡ್ ಎದುಕೊಂಡೆರ್. ಪ್ರಾಸ್ತಾವಿಕವಾದ್ ಪಾತೆರ್ನ್ಯ ತಮ್ಮಲಕ್ಷ್ಮಣ ಮೇರ್, 50 ವರ್ಸದ ತುಳು ಸಿನೆಮಾ ರಂಗದ ಚರಿತ್ರೆನ್ ಮಹತ್ವಾಕಾಂಕ್ಷೆಡ್ ಪೊಸ ಪೀಳಿಗೆಗ್ ತೆರಿಪಾವುನ ಪ್ರಯತ್ನ ಮಲ್ದೆಂದ್ ತೆರಿಪಾಯೆರ್. ಈ ಸಂದರ್ಬಡ್ ತಮ್ಮಲಕ್ಷ್ಮಣ ಮೇರ್ ಬರೆತಿನ “ತುಳು ಬೆಳ್ಳಿ ತೆರೆಯ ಸುವರ್ಣಯಾನ” ಪುಸ್ತಕೊನು ಮಲ್ಲ ಬಿನ್ನೆರ್ ಬುಡುಗಡೆ ಮಲ್ತೆರ್.
ಕರಿನ 50 ವರ್ಸೊಲೆಡ್ ಬೊಳ್ಳಿ ಪರ್ದೆಗ್ ಬತ್ತಿನ ಜನ ಮೆಚ್ಚಿನ ತುಳು ಸಿನೆಮೊಲ್ನ ಬಗ್ಗೆಡ್, ಹಿರಿಯ ನಟ ನಟಿ, ಕಲಾ ವಿದೆರ್, ತಾಂತ್ರಿಕೆರೆನ ಬಗ್ಗೆಡ್ ಮಾಹಿತಿ ಇಪ್ಪುನ ವಿಶೇಷ ಕೃತಿನ್ ಗಣ್ಯೆರ್ ಕೊಂಡಾಡಿಯೆರ್. ತುಳು ರಂಗಭೂಮಿಗಾದ್, ಚಿತ್ರ ರಂಗೊಗಾದ್ ಸುಮಾರ್ 50 ವರ್ಸ ಸೇವೆ ಮಲ್ದಿನ ಶ್ರೀ ‘ತಮ್ಮ ಲಕ್ಷ್ಮಣ’ ಮೇರ್ ಪೊಸ ಪೀಳಿಗೆಗ್ ಆದರ್ಶಂದ್ ಪಂಡೆರ್.
ಕರಿನ 50 ವರ್ಸೊಡ್ದಿಂಚಿ ಬೊಳ್ಳಿ ಪರ್ದೆಗ್ ಬಯ್ದಿನ ತುಳು ಸಿನೆಮೊಲ್ನ ಕಿರು ಸಾಕ್ಷ್ಯ ಚಿತ್ರ “ಸುವರ್ಣ ತುಳು ಚಿತ್ರಮಾಲಾ” ಸಿನೆಮಾ ಪ್ರದರ್ಶನ ಯಶಸ್ ಡ್ ನಡತ್ತ್ಂಡ್. ಮಾನಾದಿಗೆದ ಬಿನ್ನೆರ್ನ ಒಟ್ಟುಗು ಅಪಾರ ಅಭಿಮಾನಿಲು, ತುಳು ಬಂಧುಲು ಚಿತ್ರಮಾಲಾ ಪ್ರದರ್ಶನ ತೂದು ಮೆಚ್ಚಿಗೆ ಕೊರಿಯೆರ್. ಪಳ್ಳಿ ವಿಶ್ವನಾಥ್ ಶೆಟ್ಟಿ ಬೊಕ್ಕ ಶ್ರೀತಿಕಾ ಶೆಟ್ಟಿ ಲೇಸ್ ಸುಧಾರಿಕೆ ಮಲ್ತೆರ್. ಗೋಪಾಲ್ ಪೂಜಾರಿ ಪಟ್ಟೆ, ನಿಧೀಶ್ ಶೆಟ್ಟಿ, ಸದಾನಂದ ಕಾರ್ಲ ಲೇಸ್ ಸುಧಾರ್ಮೆ ಮಲ್ತೆರ್. ತಮ್ಮಲಕ್ಷ್ಮಣ ಮಾತೆರೆಗ್ಲಾ ಸೊಲ್ಮೆ ಸಂದಾಯೆರ್.
*ವರದಿ : ಪಳ್ಳಿ ವಿಶ್ವನಾಥ್ ಶೆಟ್ಟಿ, ಬೆಂಗಳೂರು*
ಬೊಂಬೈ: ಕರ್ನಾಟಕ ಕರಾವಳಿ ಜಿಲ್ಲೆದ ಅಭಿವೃದ್ದಿಗಾದ್ ಕ್ರಿಯಾಶೀಲ ಆದಿಪ್ಪುನ ಸರಕಾರೇತರ ಸಂಘಟನೆ ಜಯಶ್ರೀ ಕೃಷ್ಣ ಪರಿಸರ ಪ್ರೇಮಿ ಸಮಿತಿದ 23ನೇ ವಾರ್ಷಿಕ ಮಹಾಸಭೆ ಸೆ.18 ಕ್ಕ್ ಬಯ್ಯಗ್ ಕುರ್ಲಾ ಪೂರ್ವ ಬಂಟರ ಸಂಘ ಬೊಂಬೈದ ಅನೆಕ್ಸ್ ಸಭಾಗೃಹಡ್ ಸಮಿತಿದ ಸಂಸ್ಥಾಪಕೆರ್ ತೋನ್ಸೆ ಜಯಕೃಷ್ಣ ಎ ಶೆಟ್ಟಿ ಮೆರೆನ ಉಪಸ್ಥಿತಿಡ್, ಗುರ್ಕಾರೆ ಎಲ್. ವಿ. ಅಮೀನ್ ಮೆರೆನ ಗುರ್ಕಾರ್ಮೆಡ್ ನಡಪರೆ ಉಂಡು.
ಮಹಾಸಭೆತ್ತ ಕಾರ್ಯಸೂಚಿದಂಚೆನೆ ಸಭೆಟ್ಟ್ ಸಮಿತಿದ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಕೈತಲ್ ದ ಸಮಿತಿ ಸ್ಥಾಪನೆ ಮಲ್ಪುನ ಬಗೆಟ್ಟ್ ಮಂಜೂರು ಮಲ್ಪರೆ ಉಂಡು. ಒಡಿಪು ಜಿಲ್ಲೆದ ಉಳೆಪಾಡಿ ಬೊಕ್ಕ ಕೊಲ್ಲೂರು ಬಳ್ಕುಂಜೆಡ್ 1097 ಎಕರೆ ಭೂ ಕೈಗಾರಿಕೀಕರಣದ ಯೋಜನೆ ಬಗೆಟ್ಟ್ ಚರ್ಚೆ ಮಲ್ಪೆರೆ ಉಂಡು. ಅಂಚೆನೆ ಬೇತೆ ಬೇತೆ ಇಸಯಲೆನ ಬಗೆಟ್ಟ್ ಚರ್ಚೆ ನಡಪರೆ ಉಂಡು.
ಈ ಸಭೆಟ್ಟ್ ಸಮಿತಿದ ಸದಸ್ಯೆರ್ ಮಾತ ಬತ್ತ್ ದ್ ಸಭೆನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಜಯಶ್ರೀ ಕೃಷ್ಣ ಪರಿಸರ ಪ್ರೇಮಿ ಸಮಿತಿದ ಪ್ರಧಾನ ಕಾರ್ಯದರ್ಶಿ ಮುಂಡ್ಕೂರು, ಸುರೇಂದ್ರ ಸಾಲ್ಯಾನ್, ಗೌರವ ಕೋಶಾಧಿಕಾರಿ ತುಳಸಿದಾಸ್ ಅಮೀನ್ ಬೊಕ್ಕ ಪದಾಧಿಕಾರಿಲು ಬಿನ್ನಾಪು ಮಲ್ತೆರ್.
ಕೌಡೂರು ಶ್ರೀ ಉಚ್ಚಂಗಿ ಮಾರಿಯಮ್ಮ ದೇವಲ್ಯಡ್ ಸೆ.17 ಐತಾರ ಮಧ್ಯಾಹ್ನ ಕನ್ಯಾ ಸಂಕ್ರಾಂದಿದ ಲೆಕ್ಕೊಡು ಶ್ರೀ ದೇವಿಗ್ ಮಹಾಪೂಜೆ ಬೊಕ್ಕ ದರ್ಶನ ಸೇವೆ ನಡಪರೆ ಉಂಡು.
ಈ ಲೇಸ್ ಗ್ ಭಕ್ತೆರ್ ಎಚ್ಚದ ಸಂಖ್ಯೆಡ್ ಬತ್ತ್ ದ್ ಶ್ರೀ ದೇವಿನ ಸಿರಿಮುಡಿ ಗಂಧಪ್ರಸಾದ ದೆತೊಂದು, ಶ್ರೀದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕಾರ್ಲ: ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್ ಸೆ.19-23 ಮುಟ್ಟ ಕಾರ್ಲ ಶ್ರೀ ಬಿ. ಪೈ ಸಾಂಸ್ಕೃತಿಕ ಸಭಾಭವನಡ್ ಚೌತಿ ನಡಪರೆ ಉಂಡು.
ಬೊಲ್ಪುಗು ಶ್ರೀ ಗಣೇಶ ವಿಗ್ರಹ ಪ್ರತಿಷ್ಠಾಪನೆ,ಪ್ರತಿ ದಿನಲ ಗಣಹೋಮ, ಮಧ್ಯಾಹ್ನ ಪೂಜೆ, ರಾತ್ರೆ ಪುಷ್ಪಾಲಂಕಾರ ಪೂಜೆ ಬೊಕ್ಕ ಪ್ರಸನ್ನ ಪೂಜೆ ನಡಪರೆ ಉಂಡು ಪಂದ್ ಕಾರ್ಲ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಈ ಸರ್ತಿದ ಸ್ವಾತಂತ್ರ್ಯೋತ್ಸವದ ಭಾಷಣಡ್ ಪ್ರಧಾನಿ ನರೇಂದ್ರ ಮೋದಿ ಮೇರ್ ದೇಶದ ಕರಕುಶಲ ಬೊಕ್ಕ ಕುಶಲಕರ್ಮಿಲೆಗ್ ವರದಾನ ಆಪುನ ದಿಟ್ಟಿಡ್ ಘೋಷಣೆ ಮಲ್ತಿನ “ಪಿಎಂ ವಿಶ್ವಕರ್ಮ” ಯೋಜನೆ ಉಂದುವೇ ಸೆ.17 ಕ್ಕ್ ವಿಶ್ವಕರ್ಮ ಜಯಂತಿಗ್ ಜಾರಿ ಆಪುನವು ವಿಶ್ವಕರ್ಮ ಸಮುದಾಯದ ಬುಲೆವಣಿಗೆಗ್ ಮಸ್ತ್ ಮಹತ್ವ ಆಯಿನವು ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಪಂಡೆರ್.
ನನದ 5 ವರ್ಷೊದ ಅವಧಿಗ್ (2023-2028) ಅನ್ವಯ ಆಪುಲೆಕ್ಕ 13 ಸಾರ ಕೋಟಿ ರೂಪಾಯಿ ಕಾಸ್ ದ ಕರ್ಚಿಡ್ ಜಾರಿ ಆಪುನ ಈ ಯೋಜನೆ ದೇಶ ಸ್ವಾತಂತ್ರ್ಯ ಪಡೆಯಿನ ಬೊಕ್ಕ ಕರಕುಶಲ ಬೊಕ್ಕ ಕುಶಲಕರ್ಮಿಲೆಗ್ ಘೋಷಣೆ ಆಯಿನ ಮಲ್ಲ ಯೋಜನೆ ಆತ್ಂಡ್.
ಸ್ವಾತಂತ್ರ್ಯದ ಅಮೃತ ಮಹೋತ್ಸವ ಕಾಲಡ್ ವಿಶ್ವಕರ್ಮ ಸಮುದಾಯದ ಮೂಲ ಕಸುಬುಲೆನ ಪುನರುತ್ಥಾನಗ್ ಮೈಲಿಗಲ್ಲಾಯಿನ ಯೋಜನೆನ್ ಕೇಂದ್ರಸರ್ಕಾರ ಜಾರಿ ಮಲ್ಪುನೆನ್ ಮೆಚ್ಚೊಡಾಯಿನವು . ಆಧುನಿಕ ಜಗತ್ತ್ ಡ್ ಸಾಂಪ್ರದಾಯಿಕ ವೃತ್ತಿಲು ಆತಂಕಗ್ ತಿಕ್ ದ್ಂಡ್, ಈ ಯೋಜನೆರ್ದ್ ಕುಡ ಕುಲಕಸುಬುಲೆನ ಗತವೈಭವಗ್ ಪೋಯೆರೆ ಈ ಯೋಜನೆ ಸಹಕಾರಿ ಆತ್ಂಡ್.
ಪೇಂಟೆ ಬೊಕ್ಕ ಹಳ್ಳಿ ಪ್ರದೇಶಲೆನ 18 ಸಾಂಪ್ರದಾಯಿಕ ಕುಲಕಸುಬುಲು ಇಪ್ಪುನ ಈ ಯೋಜನೆದಡಿಟ್ಟ್ ಉಪಕರಣ ಸಾಧನಲೆನ ಕಿಟ್ ಪಡೆಯೆರೆ ರೂ. 15 ಸಾರ ಸಹಾಯಧನ, ಕೌಶಲ್ಯವರ್ಧನೆ ತರಬೇತಿ ಪಡೆಪುನಕ್ಲೆಗ್ ಪ್ರತಿ ದಿನೊಲ 500/- ರೂ ಶಿಷ್ಯವೇತನ, ಬೊಕ್ಕ 5 ವರ್ಷೊದ ಮುಟ್ಟ ಒಟ್ಟು 30 ಲಕ್ಷ ಕುಟುಂಬಗ್ ತರಬೇತಿ ಕೊರ್ಪುನ ಯೋಜನೆ ಉಂಡು. ಪಿಎಂ ವಿಶ್ವಕರ್ಮ ಪ್ರಮಾಣ ಪತ್ರ ಬೊಕ್ಕ ಗುರುತುದ ಚೀಟಿ ಕೊರ್ಪೆರ್.
ಬೇತೆ ಬೇತೆ ಹಂತಡ್ ಕೇವಲ ಶೇ. 5 ದಾತ್ ಬಡ್ಡಿ ದರಟ್ಟ್ ಸಬ್ಸಿಡಿದೊಟ್ಟಿಗೆ 1 ಲಕ್ಷ ರೂ. ಬೊಕ್ಕ 2 ಲಕ್ಷ ರೂ. ಮುಟ್ಟ ಸಾಲ ಸೌಲಭ್ಯ ಕೊರ್ಪುನೆತ್ತೊಟ್ಟಿಗೆ ಡಿಜಿಟಲ್ ವೈವಾಟ್ ಗ್ ಉತ್ತೇಜನ ಬೊಕ್ಕ ಮಾರ್ಕೆಟ್ ಗ್ ಬೆಂಬಲದಂಚಿನ ಸಕಾಯನ್ ಕೊರ್ಪುಂಡು.
ವಿಶ್ವ ಕರ್ಮ ಸಮುದಾಯದ ಔದ್ಯೋಗಿಕ ಬೊಕ್ಕ ಆರ್ಥಿಕ ಬುಲೆವಣಿಗೆಗ್ ಪೂರಕ ಆಯೆರೆ ಇಪ್ಪುನ ಈ ಯೋಜನೆ ಬಯೋಮೆಟ್ರಿಕ್ ಮುಖೇನ ನೋಂದಣಿ ಮಲ್ಪುನೆತ್ತೊಟ್ಟಿಗೆ ಅರ್ಹ ಫಲಾನುಭವಿಲು CSC ಕೇಂದ್ರಗ್ ಭೇಟಿ ಕೊರ್ಪುನ ಮುಖೇನ ಯೋಜನೆದ ಸದುಪಯೋಗ ಪಡೆಲೆ ಪಂದ್ ಕಾಮತ್ ಪಂಡೆರ್.
ಸುಬ್ರಹ್ಮಣ್ಯ: ಕುಕ್ಕೆ ಸುಬ್ರಮಣ್ಯದ ಆದಿಸುಬ್ರಮಣ್ಯ ಸರ್ಪಸಂಸ್ಕಾರ ಯಾಗ ಶಾಲೆದ ಕೈತಲ್ ಉಂತಾದಿತ್ತಿನ ಕಾರ್ ಡ್ ತೂ ಪೊತ್ತಿನ ಘಟನೆ ಇನಿ ಬೊಲ್ಪುಗು ನಡತ್ಂಡ್.
ಬೆಂಗ್ಲೂರ್ ರ್ದ್ ಸರ್ಪಸಂಸ್ಕಾರಗ್ ಪಂದ್ ಕುಕ್ಕೆ ಸುಬ್ರಮಣ್ಯಗ್ ಬತ್ತಿನ ಒಂಜಿ ಕುಟುಂಬದಕ್ಲೆನ ಕಾರ್ ಉಂದಾತ್ಂಡ್. ಈ ಕಾರ್ ಪೊತ್ತ್ ನೆನ್ ತೂಯಿನ ಸುಬ್ರಮಣ್ಯದ ಗಣೇಶ್ ಭಟ್ ಬೊಕ್ಕ ಕೈತಲ್ ದಕುಲು ಕೂಡ್ಲೆ ತನ್ನ ಸಮಯ ಪ್ರಜ್ಞೆರ್ದ್ fire extinguisher ನ್ ಗಲಸ್ ದ್ ತೂ ತೆಕ್ಕಾದೆರ್. ಅತ್ತಂದೆ ಈ ಕಾರ್ ದ ಪಿರವು ಸಾಲಾದ್ ಉಂತುದು ಇತ್ತಿನ ಸುಮಾರ್ 30 ರ್ದ್ ಎಚ್ಚ ಗಾಡಿಲು ತೂಟ್ಟ್ ಪೊತ್ತುನೆನ್ ತಪ್ಪಾದೆರ್.
ವರದಿ: ಗೋಪಿಚಂದನ್ ಕೆಎಸ್
ಬೊಂಬೈದ ಪುಗರ್ತೆದ ಸಂಘಟನೆ ಆದಿಪ್ಪುನ ತೀಯಾ ಸಮಾಜ ಬೊಂಬೈದ ಮುತಾಲಿಕೆಡ್ ಪ್ರತಿ ವರ್ಷ ಆಚರಣೆ ಮಲ್ತೊಂದು ಬರ್ಪುನ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169 ನೇ ಪುಟ್ಟುದಿನ ದಿನತ್ತ ಆಚರಣೆ ಸೆ.10 ಐತಾರ ಬಯ್ಯಗ್ ಸಂಘದ ಕಚೇರಿಡ್ ಅಧ್ಯಕ್ಷೆರ್ ಕೃಷ್ಣ ಎನ್ ಉಚ್ಚಿಲ್ ಮೆರೆನ ಮುತಾಲಿಕೆಡ್ ನಡತ್ಂಡ್.
ಗಂಗಾಧರ ಕನ್ಯಾಡಿ ಮೆರೆನ ಮುತಾಲಿಕೆಡ್ ಪೂಜೆದ ವಿಧಿವಿಧಾನಲು ನಡತ್ಂಡ್. ಈ ಪೊರ್ತುಡು ಉಪಾಧ್ಯಕ್ಷೆರ್ ರಾಜೇಂದ್ರ ಕುಮಾರ್, ವಿಶ್ವಸ್ಥೆರ್ ಬಾಬು ಟಿ ಬಂಗೇರ, ಗೌರವ ಪ್ರಧಾನ ಕಾರ್ಯದರ್ಶಿ ಬಾಬು ಕೆ ಬೆಳ್ಚಡ, ಗೌರವ ಕೋಶಾಧಿಕಾರಿ ಅಶ್ವಿನ್ ಬಂಗೇರ, ತೀಯಾ ಮುಖವಾಣಿ ಸಂಪಾದಕೆರ್ ವಿವೇಕ್ ಚಂದ್ರಶೇಖರ್, ಆರೋಗ್ಯ ನಿಧಿ ಕಾರ್ಯಾಧ್ಯಕ್ಷೆರ್ ಕೇಶವ ಸುವರ್ಣ, ಮಹಿಳಾ ಕಾರ್ಯಾಧ್ಯಕ್ಷೆ ಶಶಿಪ್ರಭಾ ಬಂಗೇರ, ಸಮಾಜದ ಹಿರಿಯ ಸದಸ್ಯೆರ್ ಇತ್ತೆರ್.
ರಘು ಪದವು, ರತ್ನಾವತಿ ರಘು ಪದವು, ದಂಪತಿಲು ಬೊಕ್ಕ ಮಹಿಳಾ ಸದಸ್ಯೆರ್ ಭಜನೆ ಲೇಸ್ ನೇರವೇರಿಸಾಯೆರ್. ಕೇಶವ ಸುವರ್ಣ, ರಮೇಶ್ ಸುವರ್ಣ, ವೃಂದಾ ದಿನೇಶ್, ಯತೀಶ್ ಸುವರ್ಣ, ಶೈಲೇಶ್ ಬಂಗೇರ, ಜಗದೀಶ್ ಸಾಲ್ಯಾನ್ ಬೊಕ್ಕ ಸದಸ್ಯೆರ್ ಸಹಕಾರ ಕೊರಿಯೆರ್. ಜತೆ ಕಾರ್ಯದರ್ಶಿ ವಿವೇಕ್ ಚಂದ್ರಶೇಖರ್, ಸಮಿತಿದ ಸದಸ್ಯೆರ್ ರವಿ ಕಾಸ್ರೋಡು, ಶ್ರೀಧರ್ ಸುವರ್ಣ, ದಾನಿಲು ಸಾವಿತ್ರಿ ಚಂದ್ರಶೇಖರ್, ದಿನೇಶ್ ಬೆಳ್ಚಡ, ಕೃಷ್ಣ ಕೋಟೆಕಾರ್, ಹಿರಿಯೆರ್ ಸುಂದರ್ ಬಂಗೇರ, ಉಮೇಶ್ ಮಂಜೇಶ್ವರ, ನಾರಾಯಣ ಮಂಜೇಶ್ವರ, ಪದ್ಮಿನಿ ಕೋಟೆಕ್ಕಾರ್, ಆಶಾಲತಾ ಕೆ. ಉಳ್ಳಾಲ್, ಸುಜಾತಾ ಕೆ ಸುವರ್ಣ, ಶ್ರೀಮತಿ ಎ. ಅಮೀನ್, ಮಹಿಳಾ ಸಮಿತಿದ ಸದಸ್ಯೆರ್ ಬೊಕ್ಕ ಸಮುದಾಯ ಬಾಂಧವೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ತೀರ್ಥಪ್ರಸಾದ ಸ್ವೀಕಾರ ಮಲ್ತೆರ್. ಗೌರವ ಪ್ರಧಾನ ಕಾರ್ಯದರ್ಶಿ ಬತ್ತಿನ ಗುರು ಭಕ್ತೆರೆಗ್ ಎಡ್ಡೆಪ್ಪು ಬಯಕಿಯೆರ್.
