Tulu News

ಬೆಳುವಾಯಿ: ಯುವಶಕ್ತಿ ವಾಟ್ಸಾಪ್ ಬಳಗದ ದಶಮಾನೋತ್ಸವ

ಬೆಳುವಾಯಿ: ಸಮಾಜಡ್ ಜಾತಿ, ಮತ, ಪಂಥ, ಪ್ರಾಂತ, ಮೇಲ್, ಕೀಳ್ ಪನ್ಪಿನ ಭೇದ ಇಜ್ಜಂದೆ ಒಟ್ಟಾದ್ ಬದ್ಕೊಂದು ಜಾಗ್ರತೆದ ವ್ಯವಸ್ಥೆಗ್ ಬರೊಡು ಪಂದ್ ಇಂಚಿನ ಉಚ್ಚಯ ಮಲ್ಪುವ. ಕಷ್ಟಡ್ ಇಪ್ಪುನಕ್ಲೆನ ಒಟ್ಟಿಗೆ ನಮ ಸಹಕಾರಿ ಆವೊಡಾಂಡ ನಮ್ಮ ಮನಸ್ಸ್ ಲು ಒಂಜಾವೊಡು ಪಂದ್ ಕ್ಯಾಪ್ಟನ್ ಗಣೇಶ್ ಕಾರ್ಣಿಕ್ ಪಂಡೆರ್.

ಮೇರ್ ಬೆಳುವಾಯಿದ ಯುವಶಕ್ತಿ ವಾಟ್ಸಾಪ್ ಬಳಗದ 10ನೇ ವಾರ್ಷಿಕ ಉಚ್ಚಯನ್ ಉದಿಪನ ಮಲ್ತ್ ದ್, ಪತ್ತ್ ಯುವ ಮನಸ್ಸುಲು ಒಂಜೇ ಮಾರ್ಗಡ್ ಸಾಗೊಡಾಂಡ ಬ್ರಹ್ಮ ರಥತ್ತ ಬಲ್ಲ್ ಗ್ ಕೈ ಕೊರ್ದು ಒಯಿತ್ತ್ಂಡ ದೇವೆರೆನ ಮಿತ್ತ್ ದ ನಂಬಿಕೆ ಭಕ್ತಿ ಎಚ್ಚಾಪುಂಡು ಪಂದ್ ಪಂಡೆರ್.

ಉಪನ್ಯಾಸಕೆರ್, ಕಲಾವಿದೆರ್ ಡಾ. ವಾದಿರಾಜ ಕಲ್ಲೂರಾಯ ಪಾತೆರ್ದ್, ಸಮಾಜಡ್ ಯುವಶಕ್ತಿದ ಪಾತ್ರದ ಬಗೆಟ್ಟ್ ಉಪನ್ಯಾಸ ಕೊರಿಯೆರ್. ಯುವಶಕ್ತಿ ಬಳಗದ ದಶಮಾನೋತ್ಸವದ ಲೆಕ್ಕೊಡು ಉದ್ಯಮಿ ನಿರಂಜನ ಮೊಗಸಾಲೆ ಮೆರೆನ ಗುರ್ಕಾರ್ಮೆಡ್ ಕಲಾವಿದೆ ಕಾಂತಾವರ ಮಹಾವೀರ ಪಾಂಡಿ ಮೆರೆಗ್ ಯುವಶಕ್ತಿ ಕಲಾ ಪ್ರಶಸ್ತಿ, ಪೂತ್ತ ವ್ಯಾಪಾರಿ ಸತೀಶ್ ಶೆಟ್ಟಿಗಾರ ಮೆರೆಗ್ ಸನ್ಮಾನ ಬೊಕ್ಕ ಮೂಜಿ ಕಲ್ಪಾರ್ಥಿಲೆಗ್ ವಿದ್ಯಾರ್ಥಿ ಪುರಸ್ಕಾರ ಮಲ್ತೆರ್.

ಕಲಾವಿದೆರ್ ಎಂ ದೇವಾನಂದ ಭಟ್ ಮೇರ್ ಸಂಸ್ಥೆ ಪತ್ತ್ ವರ್ಷಲೆಡ್ ನಡತ್ ದ್ ಬತ್ತಿನ ತಾದಿದ ಬಗೆಟ್ಟ್ ಪ್ರಾಸ್ತಾವಿಕ ಭಾಷಣ ಮಲ್ತೆರ್. ಈ ಪೊರ್ತುಡು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಸರೇಶ್ ಕೆ. ಪೂಜಾರಿ, ಉಪಾಧ್ಯಕ್ಷೆರ್ ಜಯಂತಿ, ಯುವಶಕ್ತಿ ವಾಟ್ಸಾಪ್ ಬಳಗದ ಸಂಚಾಲಕೆರ್ ಸಂದೇಶ್ ಭಂಡಾರಿ, ರವೀಂದ್ರ ಪೂಜಾರಿ, ಗಂಗಾದರ ಪೂಜಾರಿ, ಹರೀಶ್ ಬಂಗೇರ, ಚಂದ್ರಹಾಸ ಜೈನ್, ನಿತಿನ್, ವೈಶಾಕ್ ಜೈನ್, ಶ್ರೀರಾಜ್ ಕನ್ನಡ, ಸುದರ್ಶನ್ ಆಚಾರ್ಯ, ಅಣ್ಣಿ ಬಿ. ಪೂಜಾರಿ ಪಾಲ್ ಪಡೆದಿತ್ತೆರ್.

ಬೆಳುವಾಯಿ ಹರಿಪ್ರಸಾದ್ ರಾವ್ ಎದ್ಕೊನಿಯೆರ್. ಗಣೇಶ್ ಬಿ ಅಳಿಯೂರು ಲೇಸ್ ದ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್. ಬೊಕ್ಕ ತೆಂಕುತಿಟ್ಟುದ ಪುಗರ್ತೆದ ಕಲಾವಿದೆರೆರ್ದ್ ಭೃಗು ಲಾಂಛನ ಶ್ರೀನಿವಾಸ ಕಲ್ಯಾಣ ಯಕ್ಷಗಾನ ನಡತ್ಂಡ್.

ಕೆಮ್ರಾಲ್ ಗ್ರಾಮ ಪಂಚಾಯತ್ ಗ್ ಗಾಂಧಿ ಗ್ರಾಮ ಪುರಸ್ಕಾರ

ಮುಲ್ಕಿ: ಕರ್ನಾಟಕ ಸರಕಾರದ ಪಂಚಾಯತ್ ರಾಜ್ ಸಚಿವಾಲಯದ ಮುತಾಲಿಕೆಡ್ 2022-23ನೇ ಸಾಲ್ ದ ಗಾಂಧಿ ಗ್ರಾಮ ಪುರಸ್ಕಾರಗ್ ದಕ್ಷಿಣ ಕನ್ನಡ ಜಿಲ್ಲೆದ ಮುಲ್ಕಿ ತಾಲೂಕ್ ವ್ಯಾಪ್ತಿದ ಕೆಮ್ರಾಲ್ ಗ್ರಾಮ ಪಂಚಾಯತ್ ಆಯ್ಕೆ ಆತ್ಂಡ್.

ಕೆಮ್ರಾಲ್ ಗ್ರಾಮ ಪಂಚಾಯತ್ ಕರಿನ ರಡ್ಡರೆ ವರ್ಷಡ್ ಗ್ರಾಮೀಣ ಮಟ್ಟಡ್ ಸ್ವಚ್ಛತೆ, ಪರ್ಪಿನ ನೀರ್ ದೊಟ್ಟಿಗೆ ಸುಮಾರ್ ಕ್ಷೇತ್ರಡ್ ಅಭಿವೃದ್ಧಿ ಮಲ್ದ್ಂಡ್. ಅಂಚಾದ್ ಪ್ರಶಸ್ತಿಗ್ ಆಯ್ಕೆ ಆತ್ಂಡ್.

ಕರಿನ ರಡ್ಡರೆ ವರ್ಷೊದ ಆಡಳಿತದ ಅವಧಿಡ್ ಲೀಲಾ ಕೃಷ್ಣಪ್ಪ ಅಧ್ಯಕ್ಷೆರಾದ್, ಸುರೇಶ್ ಪಂಜ ಉಪಾಧ್ಯಕ್ಷೆರಾದ್, ಆಡಳಿತ ನಡಪಾದೆರ್. ಇತ್ತೆ ಅಧ್ಯಕ್ಷೆರಾದ್ ಮಯ್ಯದ್ಧಿ ಪಕ್ಷಿಕೆರೆ ಬೊಕ್ಕ ಉಪಾಧ್ಯಕ್ಷೆರಾದ್ ಶೋಭಾ, ಅಭಿವೃದ್ಧಿ ಅಧಿಕಾರಿಯಾದ್ ಅರುಣ್ ಪ್ರದೀಪ್ ಡಿಸೋಜಾ, ಕಾರ್ಯದರ್ಶಿಯಾದ್ ಹರಿಚಂದ್ರ, ಲೆಕ್ಕಿಗೆರಾದ್ ಕೇಶವ್ ಸೇವೆ ಸಂದಾವೊಂದು ಉಲ್ಲೆರ್.

ಬಿಜೆಪಿ ಸಿಇಸಿ ಸಭೆ ಸನಿಯಾರ

ನನ ಬರ್ಪುನ 5 ರಾಜ್ಯಲೆನ ವೋಟುದ ಬಗೆಟ್ಟ್ ಸನಿಯಾರ ಬಿಜೆಪಿ ಮುಖ್ಯ ಕಚೇರಿ ಡೆಲ್ಲಿಡ್ ಬಿಜೆಪಿ ಕೇಂದ್ರ ಚುನಾವಣಾ ಸಮಿತಿ ಬಯ್ಯಗ್ ಸಭೆ ನಡಪಾವೊಂಡು.

ಈ ಸಭೆಟ್ಟ್ ಪ್ರಧಾನಿ ಮೋದಿ, ಗೃಹ ಸಚಿವೆರ್ ಅಮಿತ್ ಶಾ ಸೇರಿನಂಚೆನೆ ಸಿಇಸಿ ಸದಸ್ಯೆರ್ ಪಾಲ್ ಪಡೆಯೆರೆ ಉಲ್ಲೆರ್. ಕರ್ನಾಟಕರ್ದ್ ಮಾಜಿ ಸಿಎಂ ಬಿಎಸ್ ಯಡಿಯೂರಪ್ಪ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.

ಕಾಂಡೆದ ತೆನಸ್ ತಿಂದಿಜಿಂಡ ಕ್ಯಾನ್ಸರ್!

ಕಾಂಡೆದ ಚಾತ್ತ ಬಾಯಿಗ್ ತೆನಸ್ ತಿಂದಿಜಿಂಡ ಕ್ಯಾನ್ಸರ್ ಬರ್ಪುಂಡು ಪಂದ್ ಚೀನಾ ಮೆಡಿಕಲ್ ರಿಸರ್ಚ್ ಇನ್ ಸ್ಟಿಟ್ಯೂಟ್ ಅಧ್ಯಯನ ವರದಿ ತೆರಿಪಾದ್ಂಡ್.

ಬೊಲ್ಪುದ ತಿಂಡಿನ್ ಸುಮಾರ್ ಸಮಯರ್ದಿಂಚ ಬುಡುಂಡ 4 ರೀತಿದ ಕ್ಯಾನ್ಸರ್ ಬರ್ಪುನ ಸಾಧ್ಯತೆ ಉಂಡು. ಕರ್ಲ್ ದ ಕ್ಯಾನ್ಸರ್, ಯಕೃತ್ತ್ ದ ಕ್ಯಾನ್ಸರ್, ಪಿತ್ತಕೋಶದ ಕ್ಯಾನ್ಸರ್ ಬೊಕ್ಕ ಗ್ಯಾಸ್ಟ್ರಿಕ್‌ ಕ್ಯಾನ್ಸರ್ ಬರ್ಪುಂಡು.

ಒಂಜಿ ಅಧ್ಯಯನದ ಪ್ರಕಾರ 63 ಸಾರ ಜವನೆರೆಗ್ ತಿಂಡಿ ಬುಡ್ದ್ ಈ ಕ್ಯಾನ್ಸರ್ ಬೈದ್ಂಡ್. ‌

ಸೆ.28: ಶ್ರೀ ತಾರಕೇಶ್ವರ ದೇವಲ್ಯಡ್ ಗೋಪಾಲ ತ್ರಾಸಿ ಮೆರೆನ ಗಡಿನಾಡು ಕನ್ನಡಿಗನ ಹಾಡುಪಾಡು, ಕಬಿಗೋಷ್ಠಿ

ಅಖಿಲ ಭಾರತ ಶರಣ ಸಾಹಿತ್ಯ ಪರಿಪತ್ತು ಜಿಲ್ಲಾ ಘಟಕ ಹಾವೇರಿ, ಅಖಿಲ ಭಾರತ ಶರಣ ಸಾಹಿತ್ಯ ಪರಿಪತ್ತು ನಗರ ಘಟಕ ಹಾನಗಲ್ಲ, ಕದಳಿ ವೇದಿಕೆ ಹಾನಗಲ್ಲ ಬೊಕ್ಕ ಸಾರಂಗ ಮಂಟಪ ಹಾನಗಲ್ಲದ ಒಟ್ಟುಸೇರಿಗೆಡ್ ಬೊಂಬೈ ಕನ್ನಡಿಗ ಗೋಪಾಲ ತ್ರಾಸಿ ಮೆರೆನ ಗಡಿನಾಡು ಕನ್ನಡಿಗನ ಹಾಡುಪಾಡು ಬೊಕ್ಕ ಕಬಿಗೋಷ್ಠಿ ಸೆ.28 ಗುರುವಾರ ಶ್ರೀ ತಾರಕೇಶ್ವರ ದೇವಲ್ಯಡ್ ನಡಪರೆ ಉಂಡು.

ಈ ಲೇಸ್ ನ್ ಹಾವೇರಿದ ಸಾಹಿತಿ ಸತೀಶ್ ಕುಲಕರ್ಣಿ ಉದಿಪನ ಮಲ್ಪುವೆರ್. ಲೇಸ್ ದ ಗುರ್ಕಾರ್ಮೆನ್ ಹಾವೇರಿ ಅ.ಭಾ.ಶ.ಸಾ.ಪ ಜಿಲ್ಲಾ ಘಟಕದ ಗುರ್ಕಾರೆ ಪ್ರೊ.ಮಾರುತಿ ಶಿಡ್ಲಾಪುರ ಒಯಿಸೊನ್ವೆರ್. ಗೌರವ ಉಪಸ್ಥಿತಿಡ್ ಬೊಂಬೈ ಕನ್ನಡ ಸಾಹಿತಿ ಗೋಪಾಲ ತ್ರಾಸಿ ಉಲ್ಲೆರ್. ಹಾನಗಲ್ಲ ಶಿಕ್ಷಕ ಸಾಹಿತಿ ನಿರಂಜನ ಗುಡಿ ಆಶಯ ನುಡಿನ್ ಕೊರಿಯೆರೆ ಉಲ್ಲೆರ್.

ಈ ಲೇಸ್ ಡ್ ಹಾನಗಲ್ಲ ಅ.ಭಾ.ಶ.ಸಾ.ಪ ನಗರ ಘಟಕದ ಗುರ್ಕಾರೆ ಸಿ ಮಂಜುನಾಥ, ಮಾನಾದಿಗೆದ ಗುರ್ಕಾರೆ ರವಿಬಾಬು ಯು. ಪೂಜಾರ, ತಾಲೂಕ್ ಘಟಕದ ಗುರ್ಕಾರೆ ಎಸ್ ಸಿ ಕಲ್ಲನಗೌಡ್ರ, ಕದಳಿ ಮಹಿಳಾ ವೇದಿಕೆದ ಗುರ್ಕಾರ್ದಿ ಶಿವಗಂಗಕ್ಕ ಪಟ್ಟಣ ಪಾಲ್ ಪಡೆಯೆರೆ ಉಲ್ಲೆರ್.

ಸಾಹಿತಿ ಶಿವಾನಂದ ಕ್ಯಾಲಕೊಂಡ ಬೊಕ್ಕ ದೇವರಾಜ ಹುಣಸಿಕಟ್ಟಿ ಬೂಕು ಬುಡುಗಡೆ ಮಲ್ಪುವೆರ್. ಈ ಲೇಸ್ ನ್ ದೀಪಾ ಗೋನಾಳ ಸುಧಾರಿಕೆ ಮಲ್ಪರೆ ಉಲ್ಲೆರ್ ಪಂದ್ ಹಾವೇರಿ ಅ.ಭಾ.ಶ.ಸಾ.ಪ ಜಿಲ್ಲಾ ಘಟಕ, ಹಾನಗಲ್ಲ ಅ.ಭಾ.ಶ.ಸಾ.ಪ ನಗರ ಘಟಕ, ಕದಳಿ ವೇದಿಕೆ ಬೊಕ್ಕ ಸಾರಂಗ ಮಂಟಪದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಸೆ.30 ಕ್ಕ್ ಡೆಲ್ಲಿಡ್ ಯಕ್ಷಧ್ರುವ ಪಟ್ಲ ಸಂಭ್ರಮ-2023

ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ಡೆಲ್ಲಿ ಘಟಕ ಬೊಕ್ಕ ನಿನಾದ ಸಾಂಸ್ಕೃತಿಕ ಕೇಂದ್ರ ತಂಟೆಪ್ಪಾಡಿ ಬೆಳ್ಳಾರೆದ ಒಟ್ಟುಸೇರಿಗೆಡ್ ಯಕ್ಷಧ್ರುವ ಪಟ್ಲ ಸಂಭ್ರಮ-2023 ಸೆ.30 ಕ್ಕ್ ಡೆಲ್ಲಿದ ಕರ್ನಾಟಕ ಸಂಘದ ಸಭಾಂಗಣಡ್ ನಡಪರೆ ಉಂಡು.

ನೆತ್ತ ಸಭಾ ಲೇಸ್ ದ ಗುರ್ಕಾರ್ಮೆನ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಪ್ರಧಾನ ಸಂಚಾಲಕೆರ್ ಶಶಿಧರ ಶೆಟ್ಟಿ ಬರೋಡಾ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ CID ಧಾರಾವಾಹಿದ ನಟೆ ದಯಾನಂದ ಶೆಟ್ಟಿ ಬರಿಯೆರೆ ಉಲ್ಲೆರ್. ಮಾನಾದಿಗೆದ ಬಿನ್ನೆರಾದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಗುರ್ಕಾರೆ ಪಟ್ಲ ಸತೀಶ್ ಶೆಟ್ಟಿ, ಡೆಲ್ಲಿ ಘಟಕದ ಮಾನಾದಿಗೆದ ಗುರ್ಕಾರೆ ಟಿ. ಶಿವಪ್ರಸಾದ್ ಶೆಟ್ಟಿ, ಡೆಲ್ಲಿ ಕರ್ನಾಟಕ ಸಂಘದ ಗುರ್ಕಾರೆ ಸಿ.ಎಂ ನಾಗರಾಜ, ಪ್ರಧಾನ ಕಾರ್ಯದರ್ಶಿ ಆರ್ ರೇಣುಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್.

ಈ ಪೊರ್ತುಡು ಹಿರಿಯ ಯಕ್ಷಗಾನ ಕಲಾವಿದೆರ್ ಅರುವ ಕೊರಗಪ್ಪ ಶೆಟ್ಟಿ, ಉದ್ಯಮಿ ಜಯರಾಮ ಬನಾನ್, ಡೆಲ್ಲಿ ಕನ್ನಡ ಶಾಲೆದ ದೈಹಿಕ ಶಿಕ್ಷಣ ಶಿಕ್ಷಕಿ ಡೇರೆಲ್ ಜೆಸ್ಸಿಕಾ ಫೆರ್ನಾಂಡಿಸ್ ಮೊಕ್ಲೆಗ್ ಸನ್ಮಾನ ನಡಪರೆ ಉಂಡು.

ಅಂಚೆನೆ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಕುಡ್ಲ ಮೊಕ್ಲೆರ್ದ್ ಮಾಯಾ ಮೋಹಿನಿ, ವೀರ ಭಾರ್ಗವ ಆಟ ಬೊಕ್ಕ ನಿನಾದ ಸಾಂಸ್ಕೃತಿಕ ಕೇಂದ್ರ ತಂಟೆಪ್ಪಾಡಿ ಬೆಳ್ಳಾರೆ ಮೊಕ್ಲೆರ್ದ್ ಪಜ್ಜೆ ಗೆಜ್ಜೆ ತುಳು ಕನ್ನಡ ಜಾನಪದ ಬೊಕ್ಕ ಶಾಸ್ತ್ರೀಯ ನೃತ್ಯ ನಡಪರೆ ಉಂಡು. ಈ ಲೇಸ್ ಗ್ ಡೆಲ್ಲಿ ಬಂಟ್ಸ್ ಕಲ್ಚರಲ್ ಅಸೋಸಿಯೇಶನ್ ಸಹಕಾರ ಕೊರ್ಪುಂಡು ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಡೆಲ್ಲಿ ಘಟಕದ ಗುರ್ಕಾರೆ ವಸಂತ ಶೆಟ್ಟಿ ಬೆಳ್ಳಾರೆ, ಪ್ರಧಾನ ಕಾರ್ಯದರ್ಶಿ ಪೃಥ್ವಿ ಕಾರಿಂಜೆ, ಸಂಚಾಲಕೆರ್ ಕಾರ್ತಿಕ್ ರೈ ಲೆಪ್ಪೋಲೆಡ್ ತೆರಿಪಾದೆರ್.

ಉಬಾರ್ ದ ಮೇಸ್ತ್ರಿಗ್ ಕೇರಳ ಲಾಟರಿಡ್ ತಿಕ್ಂಡ್ 50 ಲಕ್ಷ ರೂ.!

ಉಬಾರ್: ಕೇರಳ ರಾಜ್ಯ ಲಾಟರಿಡ್ ಉಬಾರ್ ದ ಇಳಂತಿಲ ನಿವಾಸಿ ಚಂದ್ರಯ್ಯ ಮೇರ್ 50 ಲಕ್ಷ ರೂ. ಇನಾಮು ಗೆಂದ್ ದೆರ್.

ಮೇಸ್ತ್ರಿ ಆಯಿನ ಚಂದ್ರಯ್ಯ ಮೇರ್ ಕಾನತ್ತೂರು ದೇವಲ್ಯಗ್ ಪೋಯಿನ ಪೊರ್ತುಡು ಕಾಸ್ರೋಡುಡ್ ಇಪ್ಪುನ ಬೊಲ್ಪು ಲಕ್ಕಿ ಲಾಟರಿ ಏಜೆನ್ಸಿಡ್ 500 ರೂ.ದ ಓಣಂ ಬಂಪರ್ ಲಾಟರಿ ಟಿಕೆಟ್ ದೆತೊಂದೆರ್. ಇತ್ತೆ ಮೇರ್ ದೆತೊನ್ನ ಟಿಕೆಟ್‌ಗ್ ಬಂಪರ್ ಇನಾಮು 50ಲಕ್ಷ ರೂ. ಬೈದ್ಂಡ್.

ನೆರ್ದ್ ದುಂಬು ಉಂದುವೇ ಬೊಲ್ಪು ಲಕ್ಕಿ ಲಾಟರಿ ಏಜೆನ್ಸಿದ ಮುಖೇನ ಟಿಕೆಟ್ ದೆತೊನ್ನ ಉಬಾರ್ ಕೆಂಪಿಮಜಲುದ ಆನಂದ ಟೈಲರ್ (72) ಗ್ 80 ಲಕ್ಷ ರೂ. ಇನಾಮು ಬತ್ತ್ ದ್ ಇತ್ತ್ಂಡ್. ಅಂಚಾದ್ ಉಂದು ರಡ್ಡನೇ ಸರ್ತಿ ಉಬಾರ್ ಗ್ ಅದೃಷ್ಟ ಲಕ್ಷ್ಮೀ ಒಲಿದ್ಂಡ್.

SBI ಡ್ 2 ಸಾರ ಬೇಲೆ

SBI (ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ) ಡ್ ಖಾಲಿ ಇಪ್ಪುನ 2 ಸಾರ ಪ್ರೊಬೇಷನರಿ ಆಫೀಸರ್ ಬೇಲೆಗ್ ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಅರ್ಜಿ ಪಾಡೊಲಿ.

ಅರ್ಜಿ ಪಾಡಿಯೆರೆ ಮಾನ್ಯತೆ ಪಡೆಯಿನ ವಿಶ್ವವಿದ್ಯಾಲಯರ್ದ್ ಪದವಿ ಆದಿಪ್ಪೊಡು. ಬೊಕ್ಕ 21-30 ವರ್ಷ ಆದಿಪ್ಪೊಡು. ಅರ್ಜಿ 750 ರೂ. ಕಟ್ಟೊಡು. ಅರ್ಜಿ ಸಂದಾವುನ ಅಭ್ಯರ್ಥಿಲು ಆನ್ ಲೈನ್ ಮುಖೇನ ಸೆ.27 ರ್ದ್ ಸಂದಾವೊಲಿ. ಎಚ್ಚದ ಪೊಲಬುಗಾದ್ ನೆತ್ತ ವೆಬ್ ಸೈಟ್ sbi.co.in ಗ್ ಭೇಟಿ ಕೊರೊಲಿ.

ಸೆ.29: CWMA ದ ಮಹತ್ವದ ಸಭೆ

ಕರ್ನಾಟಕರ್ದ್ ತಮಿಳ್ ನಾಡ್ ಗ್ ಸೆ.29 ರ್ದ್ ಅ.19 ಮುಟ್ಟ ದಿನೊಲ 3 ಸಾರ ಕ್ಯೂಸೆಕ್ ಕಾವೇರಿ ನೀರ್ ಬುಡೊಡು ಪಂದ್ ಕಾವೇರಿ ನೀರ್ ನಿಯಂತ್ರಣ ಸಮಿತಿದ ಆದೇಶ ಕೊರ್ತುಂಡು.

ಈ ಆದೇಶಗ್ ರಡ್ಡ್ ರಾಜ್ಯಲು ವಿರೋಧ ಮಲ್ದ್ಂಡ್. ಈ ಬಗೆಟ್ಟ್ ಕಾವೇರಿ ನೀರ್ ನಿರ್ವಹಣಾ ಪ್ರಾಧಿಕಾರ ಸೆ.29 ಕ್ಕ್ ಮಧ್ಯಾಹ್ನ 2 ಗಂಟೆಗ್ ಇಸೇಸ ಸಭೆ ಲೈದ್ಂಡ್. ಸಭೆಟ್ಟ್ ರಡ್ಡ್ ರಾಜ್ಯದ ವಾದನ್ ಕೇಂದ್ ತನ್ನ ತೀರ್ಪುದ ಬಗೆಟ್ಟ್ ನಿರ್ಧಾರ ಮಲ್ಪುಂಡು. ಅತ್ತಂದೆ ಅನಿಯೇ ಕರ್ನಾಟಕ ಬಂದ್ ಲ ಉಂಡು.