ಪುತ್ತೂರು: ತುರ್ತು ಕಾಮಗಾರಿ ಇಪ್ಪುರ್ನೆದಾವೆರ 33/11 ಕೆವಿ ಕ್ಯಾಂಪ್ಕೋ ಕರೆಂಟ್ ಉಪಕೇಂದ್ರರ್ದ್ ಪಿದಾಡುನ ಮುಕ್ರಂಪಾಡಿ ಬೊಕ್ಕ ಮುದ್ದೆ ಲೈನ್ ಡ್ ಇನಿ (ಸೆ.30) ಬೊಲ್ಪುಗು 10 ಗಂಟೆರ್ದ್ ಬಯ್ಯಗ್ 5 ಗಂಟೆ ಮುಟ್ಟ ಕರೆಂಟ್ ಇಜ್ಜಿ.
ಅಂಚಾದ್, 33/11 ಕೆವಿ ಕ್ಯಾಂಪ್ಕೋ ಕರೆಂಟ್ ಉಪಕೇಂದ್ರರ್ದ್ ಪಿದಾಡುನ ಲೈನ್ ರ್ದ್ ಕರೆಂಟ್ ಸರಬರಾಜು ಆಪಿನ ಕೂರ್ನಡ್ಕ, ಕೆಮ್ಮಿಂಜೆ, ಮರೀಲ್, ಮುಕ್ರಂಪಾಡಿ, ಮೊಟ್ಟೆತ್ತಡ್ಕ, ಇಂಡಸ್ಟ್ರಿಯಲ್ ಏರಿಯಾ ಬೊಕ್ಕ ಕಮ್ಮಾಡಿ ಪರಿಸರದ ಕರೆಂಟ್ ಗಲಸುನಕುಲು ಸಹಕಾರ ಮಲ್ಪೊಡು ಪಂದ್ ಮೆಸ್ಕಾಂ ಪ್ರಕಟಣೆ ತೆರಿಪಾದ್ಂಡ್.
ಬೆಂಗಳೂರು : ಚಂದ್ರಯಾನ, ಸೂರ್ಯಯಾನದ ಯಶಸ್ವಿರ್ದ್ ಬೊಕ್ಕ ಇಸ್ರೋ ನನ ಕೆಲವೇ ತಿಂಗೊಲ್ಡ್ ಶುಕ್ರಯಾನ-1 ರಾಕೆಟ್ ಉಡಾವಣೆ ಮಲ್ಪರೆ ತಯಾರಾತ್ಂಡ್.
ಶುಕ್ರ ಗ್ರಹದ ಮೇಲ್ಮೈ, ಅಯಿತ್ತ ವಾತಾವರಣ ಬೊಕ್ಕ ಭೂವೈಜ್ಞಾನಿಕ ಸಂಯೋಜನೆ ಶುಕ್ರಯಾನ-1 ತ್ತ ಮುಖ್ಯ ಉದ್ದೇಶ ಆತ್ಂಡ್.
ಶತಕೋಟಿ ವರ್ಷೊದ ಪಿರವು ಭೂಮಿ ಶುಕ್ರನಲೆಕ್ಕನೇ ಇತ್ತ್ಂಡ್. ಅಂಚಾಂಡ ಶುಕ್ರ ಗ್ರಹದ ಭವಿಷ್ಯ ದಾದ ಪನ್ಪಿನೆನ್ ತೆರಿವೊನಿಯೆರೆ ಈ ಪ್ರಯೋಗ ಮಲ್ಪರೆ ಉಂಡು ಪಂದ್ ಇಸ್ರೊ ತೆರಿಪಾದ್ಂಡ್.
ಭಾರತೀಯ ರಿಸರ್ವ್ ಬ್ಯಾಂಕ್ ಡ್ ಖಾಲಿ ಇಪ್ಪುನ 450 ಬೇಲೆಗ್ ಅಭ್ಯರ್ಥಿಲು ಅರ್ಜಿ ಪಾಡೊಲಿ.
20-30 ವರ್ಷದ ಅಭ್ಯರ್ಥಿಲು ಒವ್ವೇ ಯುಜಿ ಪದವಿ ಆಯಿನಕುಲು ಈ ಬೇಲೆಗ್ ಅರ್ಜಿ ಸಂದಾವೊಲಿ. ತಿಂಗೊಲ್ದ ಸಂಬಳ 20700 ರ್ದ್ 55700 ಮುಟ್ಟ ಉಂಡು. ಅರ್ಜಿ ಸಂದಾಯೆರೆ ಅ.4 ಅಕೇರಿದ ದಿನ ಆತ್ಂಡ್. ಅಭ್ಯರ್ಥಿಲು ಆನ್ ಲೈನ್ ಮುಖೇನ ಅರ್ಜಿ ಸಂದಾವೊಲಿ.
ಬೊಂಬೈ: ನಾಸಿಕ್ ದ ಶ್ಯಾಮ್ ಸುಂದರ್ ಹೊಟೇಲ್ ಡ್ 15 ನೇ ವರ್ಷೊದ ಚೌತಿ ಊರುದಕ್ಲೆನ ಸಮ್ಮುಖಡ್ ಭಾರೀ ಗೌಜಿಡ್ ನಡತ್ಂಡ್.
ಈ ಲೇಸ್ ಡ್ ಹೊಟೇಲ್ ದ ಧಣಿ ರವಿ ಪೂಜಾರಿ, ಧರ್ಣಪ್ಪ ಪೂಜಾರಿ, ಕೃಷ್ಣಪ್ಪ ಪೂಜಾರಿ ಬೊಕ್ಕ ಶ್ಯಾಮ್ ಸುಂದರ್ ಹೋಟೆಲ್ ದ ಮಾತ ಸಿಬ್ಬಂದಿಲು ಭಾರಿ ಶ್ರದ್ಧಾ ಭಕ್ತಿಡ್ ಪೂಜೆಡ್ ಪಾಲ್ ಪಡೆಯೆರ್.
ಕುಡ್ಲ : ಒಡಿಪು ಜಿಲ್ಲೆ ಬಸ್ರೂರುದ ಗೋಲಿದ ಮರತ್ತ ಅಡಿಟ್ಟ್ ಇಪ್ಪುನ ಶ್ರೀ ತುಳುವೇಶ್ವರ ದೇವಲ್ಯದ ಅಭಿವೃದ್ಧಿಗ್ ತುಳುವೆರೆ ಆಯನೊ ಕೂಟ ಕುಡ್ಲ ಸಂಕಲ್ಪ ಮಲ್ದ್ಂಡ್ ಪಂದ್ ಕೂಟದ ಅಧ್ಯಕ್ಷೆರ್ ಶಮಿನಾ ಆಳ್ವ ಪಂಡೆರ್.
ಬುಧಾರ ಪತ್ರಿಕಾಗೋಷ್ಠಿಡ್ ಪಾತೆರ್ನ ಮೇರ್ ಗೋಲಿದ ಮರತ್ತ ತಿರ್ತ್ ಇಪ್ಪುನ ದೇವಲ್ಯದ ಬೇರ್ ದ ಉಲಯಿ ಶಿವಲಿಂಗ ಉಂಡು. ಆಂಡ ಅವುಲು ಏಪಲ ಪೂಜೆ ಆವೊಂದು ಉಂಡು.ಅಯಿತ್ತ ಅಭಿವೃದ್ಧಿ ಅತ್ತಾಂದೆ ಬಸ್ರೂರುದ ಕೂಟದ ಸಮ್ಮೇಳನ ಮಲ್ಪುನ ಯೋಜನೆಲ ಉಂಡು ಪಂದ್ ಪಂಡೆರ್.
ಉಂದುವೇ ಸೆ. 30 ಗು ಮಧ್ಯಾಹ್ನ 3.30 ಕ್ಕ್ ಕೂಟದ ಪಟ್ಟ ಏರುನ (ಪದಗ್ರಹಣ) ಲೇಸ್ ನಡಪರೆ ಉಂಡು. 2 ಗಂಟೆಗ್ ಜೋಕ್ಲೆನ ಮಿನದನ ಲೇಸ್ ಉಂಡು. ಬಯ್ಯಗ್ 4 ಗಂಟೆರ್ದ್ ನಡಪುನ ಲೇಸ್ ಡ್ ವಿಧಾನ ಸಭಾಧ್ಯಕ್ಷೆರ್ ಯು.ಟಿ.ಖಾದರ್‌, ಕಟೀಲ್ ಶ್ರೀ ಕ್ಷೇತ್ರದ ಹರಿನಾರಾಯಣ ಅಸ್ರಣ್ಣೆರ್, ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಕಾಂಗ್ರೆಸ್‌ ಮುಖಂಡೆರ್ ರಮಾನಾಥ ರೈ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್.
ಬಯ್ಯಡ್ ತುಳುತ್ತ “ಸಿರಿ ದೇವಿ ಮಾತ್ಮೆ” ಬೂಕು ಬುಡುಗಡೆ, ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು ಪಂದ್ ಮೇರ್ ತೆರಿಪಾಯೆರ್. ಕೂಟದ ಉಪಾಧ್ಯಕ್ಷೆರ್ ಗೋಪಾಡ್ಕರ್‌, ಆಶಾ ಶೆಟ್ಟಿ ಅತ್ತಾವರ, ಸಂಚಾಲಕೆರ್ ಸರಪಾಡಿ ಅಶೋಕ್ ಶೆಟ್ಟಿ, ಕಾರ್ಯದರ್ಶಿ ರಾಜೇಶ ಹೆಗ್ಡೆ ಪೊಳಲಿ ಇತ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಡ್ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ ಬೊಕ್ಕ ತಾಲೂಕ್ ಘಟಕದ ಒಟ್ಟುಸೇರಿಗೆಡ್ ಕಥೆ ಕೇಳೋಣ ಸರಣಿ ಲೇಸ್ ದ 74ನೇ ಸಂಚಿಕೆ ಸೆ.30 ಸನಿಯಾರ ಬಯ್ಯಗ್ 4.30ಕ್ಕ್ ಪ್ರಸಾರ ಆಪುಂಡು.
ಈ ಸಂಚಿಕೆಡ್ ಸ್ವರಚಿತ ಕಥೆನ್ ಸೌಜನ್ಯ ಆರ್ ಕಟಪಾಡಿ (ವಿದ್ಯಾರ್ಥಿನಿ) ಓದಿಯೆರೆ ಉಲ್ಲೆರ್. ಅ.1 ಕ್ಕ್ ಮಧ್ಯಾಹ್ನ 12.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ರೇಡಿಯೊಡ್ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಮೇಕನಹಡ್ಲು, ಸೀತೂರು ಗ್ರಾಮದ ನರಸಿಂಹರಾಜಪುರದ ಶ್ರೀ ದುರ್ಗಾಪರಮೇಶ್ವರಿ, ಶ್ರೀ ರಕ್ತೇಶ್ವರಿ, ವೀರಕಲ್ಕುಡ ಬೊಕ್ಕ ಧರ್ಮದೇವತೆಲೆನ ಸನ್ನಿಧಿಡ್ ಅ.27 ಸುಕ್ರಾರ ಸಿರಿಸಿಂಗಾರ ನೇಮೋಚ್ಚಯ ನಡಪರೆ ಉಂಡು.
ಅಂಚೆನೆ ಮಾರ್ನೆಮಿದ ಲೆಕ್ಕೊಡು ಮಧ್ಯಾಹ್ನ ಚಂಡಿಕಾಹೋಮ, ದೈವೊದ ಪಾತ್ರಿಲಾಯಿನ ಸತೀಶ್ ಮೆರೆನ ಧರ್ಮಪತ್ನಿ ಪುಷ್ಪ ಮೆರೆರ್ದ್ ಮುತ್ತೈದೆರೆಗ್ ಬಾಗಿನ ಸೇವೆ ಬೊಕ್ಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಗ್ ದೇಣಿಗೆ ಕೊರ್ಪಿನ ಭಕ್ತಾದಿಲು ಪಿಂಗಾರ, ಬೊಂಡ, ಅರಿ, ತಾರಾಯಿ ಬೊಕ್ಕ ಫಲಸೊತ್ತುಲೆನ್ ಕೊರೊಲಿ. ಅಂಚೆನೆ ಮಾತೆರ್ಲಾ ಈ ಲೇಸ್ ಗ್ ಸಹಕಾರ ಕೊರ್ದು, ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ನಡೂರು: ಮಂದರ್ತಿ ಶ್ರೀ ಮಹಾಗಣಪತಿ ಯಕ್ಷಗಾನ ಮಂಡಳಿ (ರಿ.) ದ ಮುತಾಲಿಕೆಡ್ ಹೊಸನಗರದ ವೀರ ಸಾವರ್ಕರ್ ಮಂಟಪಡ್ ಇನಿ ರಾತ್ರೆ ಶಿವದೂತ ಪಂಜುರ್ಲಿ ಆಟ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಸಾರ್ವಜನಿಕ ಗಣೇಶೋತ್ಸವ ಸಮಿತಿ, ಅಖಿಲ ಭಾರತ ಹಿಂದೂ ಮಹಾಸಭಾ ಹೊಸನಗರ ಘಟಕ ಬೊಕ್ಕ ಈ ಆಟದ ರಚನೆ ಬೊಕ್ಕ ನಿರ್ದೇಶನ ಮಲ್ತಿನ ಸದಾಶಿವ ಅಮೀನ್ ಕೊಕ್ಕರ್ಣೆ ಲೆಪ್ಪೋಲೆಡ್ ತೆರಿಪಾದೆರ್.
ಕಾಪು: ಸುರುತ್ತ ಹಂತಡ್ ಸಂಪೂರ್ಣ ಇಳಕಲ್ ಕೆಂಪು ಶಿಲೆ ಗಲಸುನೆರ್ದ್ ಸುಮಾರ್ 30 ಕೋಟಿ ರೂಪಾಯಿ ಖರ್ಚಿಡ್ ಜೀರ್ಣೋದ್ಧಾರ ಆವೊಂದು ಇಪ್ಪುನ ಕಾಪು ಶ್ರೀ ಹೊಸ ಮಾರಿಗುಡಿ ದೇವಲ್ಯಗ್ ಕಾಪು ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್ 99,999 ರೂ. ಬಿಲೆತ್ತ 99 ಶಿಲೆನ್ ಸಮರ್ಪಣೆ ಮಲ್ತೆರ್.
ಕಾಪು ಶ್ರೀ ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಮಾಧವ ಆರ್. ಪಾಲನ್, ಗೌರವಾಧ್ಯಕ್ಷೆರ್ ಶಶಿಧರ ಶೆಟ್ಟಿ ಮಲ್ಲಾರು ಬೊಕ್ಕ ಸದಸ್ಯೆರ್ ಒಟ್ಟುಸೇರ್ದ್ ಶ್ರೀ ಪೊಸ ಮಾರಿಗುಡಿ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಕೆ. ವಾಸುದೇವ ಶೆಟ್ಟಿ ಬೊಕ್ಕ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ರಮೇಶ ಹೆಗ್ಡೆ ಕಲ್ಯ ಮೊಕ್ಲೆಗ್ ದೇಣಿಗೆನ್ ಕೊರಿಯೆರ್. ಸಾಧ್ಯ ಆಯಿನಾತ್ ಸದಸ್ಯೆರ್ ತಲಾ 9 ಶಿಲೆನ್ ಸಮರ್ಪಣೆ ಮಲ್ತ್ ದ್, ಕಾಪುದ ಅಮ್ಮನ ಜೋಕುಲು ಕೂಟಗ್ ಸೇರ್ಪಡೆ ಆಪುನ ಬಗೆಟ್ಟ್ ಸಂಕಲ್ಪ ಸ್ವೀಕಾರ ಮಲ್ತೆರ್.
ಈ ಪೊರ್ತುಡು ಗಣೇಶೋತ್ಸವ ಸಮಿತಿದ ಉಪಾಧ್ಯಕ್ಷೆರ್ ಅಶೋಕ್ ಶೆಟ್ಟಿ, ವೆಂಕಟೇಶ್‌ ಕುಮಾರ್, ಪ್ರಧಾನ ಕಾರ್ಯದರ್ಶಿ ರಾಜೇಶ್ ಕಾಂಚನ್, ಕಾರ್ಯದರ್ಶಿ ಭವಿಷ್ ಕುಮಾರ್, ಪ್ರಧಾನ ಕೋಶಾಧಿಕಾರಿ ಗಣೇಶ್ ಕೆ., ಕೋಶಾಧಿಕಾರಿ ರಿತೇಶ್‌, ಪದಾಧಿಕಾರಿ ಜಗದೀಶ್ ಮೆಂಡನ್, ರಾಘವೇಂದ್ರ ಶೆಟ್ಟಿ, ಮೋಹನ್ ಕಲ್ಯ, ರವೀಂದ್ರ ಎಂ., ಉದಯ್‌ ಶಂಕರ್, ಅನಿಲ್ ಕುಮಾರ್, ಸಖೇಂದ್ರ ಸುವರ್ಣ, ಲೀಲಾಧರ ಶೆಟ್ಟಿ, ಮೋಹನ್ ದಾಸ್ ಕಾಮತ್, ನವೀನ್‌ ಚಂದ್ರ ಜೋಗಿ ಬೊಕ್ಕ ಕಾರ್ಯಕಾರಿ ಸಮಿತಿ ಸದಸ್ಯೆರ್, ಸಾರ್ವಜನಿಕೆರ್ ಪಾಲ್ ಪಡೆದಿತ್ತೆರ್.
ಒಡಿಪು: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮುತಾಲಿಕೆಡ್ ಒಡಿಪುಡ್ ನಡಪರೆ ಇಪ್ಪುನ ವಿಶ್ವ ಬಂಟರ ಕ್ರೀಡಾಕೂಟ ಬೊಕ್ಕ ವಿಶ್ವ ಬಂಟರ ಸಾಂಸ್ಕೃತಿಕ ವೈಭವದ ತಯಾರಿದ ಅಟ್ಟಣೆದ ಸಭೆ ಒಡಿಪುದ ಓಶಿಯನ್ ಪರ್ಲ್ ಹೊಟೇಲ್ ದ ಸಭಾಂಗಣಡ್ ಬುಧಾರ ಬಯ್ಯಗ್ ನಡತ್ಂಡ್.
ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ಮೆರೆನ ಸಾರಥ್ಯಡ್ ವಿಶ್ವ ಬಂಟರ ಕ್ರೀಡಾಕೂಟ ಅಕ್ಟೋಬರ್ 28 ಕ್ಕ್ ಒಡಿಪು ಅಜ್ಜರಕಾಡು ಮೈದಾನದ ಶ್ರೀಮತಿ ನಳಿನ ಭೋಜ ಶೆಟ್ಟಿ ವೇದಿಕೆಡ್ ಬೊಕ್ಕ ವಿಶ್ವ ಬಂಟರ ಸಾಂಸ್ಕೃತಿಕ ವೈಭವ ಅ.29 ಕ್ಕ್ ಶ್ರೀ ಕನ್ಯಾನ ಸದಾಶಿವ ಶೆಟ್ಟಿ ವೇದಿಕೆಡ್ ನಡಪರೆ ಉಂಡು.
ಸಭೆಟ್ಟ್ ವಿಶ್ವ ಬಂಟರ ಸಮ್ಮೇಳನದ ಲೆಕ್ಕೊಡು ನಡಪರೆ ಇಪ್ಪುನ ಲೇಸ್ ದ ತಯಾರಿದ ಬಗೆಟ್ಟ್ ಚರ್ಚೆ ನಡತ್ಂಡ್. ಸಮಿತಿಲೆನ ಸಂಚಾಲಕೆರ್ ಬೊಕ್ಕ ಸಹಸಂಚಾಲಕೆರ್ ಲೇಸ್ ನ್ ನಡಪಾವುನ ಬಗೆಟ್ಟ್ ಅಕ್ಲೆನಕ್ಲೆನ ಅಭಿಪ್ರಾಯನ್ ತೆರಿಪಾಯೆರ್. ಸಭೆಟ್ಟ್ ಅಕೇರಿಗ್ ವಿಶ್ವ ಬಂಟರ ಸಮ್ಮೇಳನ ನಡಪಾವುನ ಅಜ್ಜರಕಾಡು ಮೈದಾನದ ಜಾಗೆ ತೂದು ಸೂಚನೆನ್ ಕೊರಿಯೆರ್.
ಈ ಪೊರ್ತುಡು ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ್ ಶೆಟ್ಟಿ, ಗೌರವ ಕಾರ್ಯದರ್ಶಿ ಜಯಕರಶೆಟ್ಟಿ ಇಂದ್ರಾಳಿ, ಜತೆ ಕಾರ್ಯದರ್ಶಿ ಬೊಕ್ಕ ಸಾಂಸ್ಕೃತಿಕ ಸಮಿತಿದ ಸಂಚಾಲಕೆರ್ ಚಂದ್ರಹಾಸ್ ಡಿ.ಶೆಟ್ಟಿ, ಕ್ರೀಡಾ ಸಮಿತಿದ ಸಹಸಂಚಾಲಕೆರ್ ರೋಷನ್ ಕುಮಾರ್ ಶೆಟ್ಟಿ ಬೊಕ್ಕ ಬೇತೆ ಸಮಿತಿಲೆನ ಮತ ಸಂಚಾಲಕೆರ್ ಬೊಕ್ಕ ಸಹ ಸಂಚಾಲಕೆರ್ ಇತ್ತೆರ್.
