Tulu News

ಅ.15-24: ‌ನಾಗವಲಚ್ಚಿಲ್ ಶ್ರೀ ಚಾಮುಂಡೇಶ್ವರಿ ಕ್ಷೇತ್ರಡ್ ಭಜನೆ, ಮಹಿಷ ಮರ್ದಿನಿ ಆಟ

ಸಜೀಪಮುನ್ನೂರು: ಮಾರ್ನಬೈಲ್ ದ ನಾಗವಲಚ್ಚಿಲ್ ಶ್ರೀ ಚಾಮುಂಡೇಶ್ವರಿ ಕ್ಷೇತ್ರಡ್ ಅ.15-24 ಮುಟ್ಟ ಬೇತೆ ಬೇತೆ ಭಜನೆ ಕೂಟದಕ್ಲೆರ್ದ್ ಭಜನೆ ಲೇಸ್ ಬೊಕ್ಕ ಪೂಜೆ ಪುರಸ್ಕಾರ ಲೇಸ್ ನಡಪರೆ ಉಂಡು.

ಅ.24 ಅಂಗಾರೆ ಮಧ್ಯಾಹ್ನ ನುಪ್ಪು ಪ್ರಸಾದ ಸೇವೆ ಆದ್ ಬಯ್ಯಗ್ ಶ್ರೀ ವಿನಾಯಕ ಶಂಕರನಾರಾಯಣ ದುರ್ಗಾಂಬಾ ಪ್ರಸಾದಿತ ಯಕ್ಷಗಾನ ಮಂಡಳಿ ನಂದಾವರದ ಸಂಯೋಜನೆಡ್ ಕಟೀಲ್ ಮೇಳದ ಕಲಾವಿದೆರೆರ್ದ್ ಮಹಿಷ ಮರ್ದಿನಿ ಆಟ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ನಾಗವಲಚ್ಚಿಲ್ ಶ್ರೀ ಚಾಮುಂಡೇಶ್ವರಿ ಕ್ಷೇತ್ರದ ಧರ್ಮದರ್ಶಿನಿ ಸೌಮ್ಯ ಸುದರ್ಶನ್ ಬೊಕ್ಕ ಜೋಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಬೆಂಗಳೂರುಡು ಭಾರೀ ಬರ್ಸ

ಬೆಂಗ್ಲೂರ್: ರಾಜಬೂಡು ಬೆಂಗ್ಲೂರ್ ಡ್ ಸೋಮಾರ ಬಯ್ಯರ್ದ್ ರಾತ್ರೆ ಇಡೀ ಭಾರೀ ಬರ್ಸ ಬೈದ್ಂಡ್.

ನೆರ್ದ್ ನೀರ್ ಅಲ್ಪಲ್ಪ ದಿಂಜಿದ್ ಗಾಡಿದ ಸವಾರೆರ್ ಸಂಚಾರ ಮಲ್ಪರೆ ಅವೊಂದು ಇಜ್ಜಂಡ್. ಅತ್ತಂದೆ ಬೆಳ್ಳಂದೂರುದ ಕರಿಯಮ್ಮನ ಅಗ್ರಹಾರಡ್ ಬರ್ಸದ ನೀರ್ ಗ್ ಮಾರ್ಗ ಮುರ್ಕುದುಂಡು. ಸುಮಾರ್ 50 ಮೀಟರ್ ಉದ್ದದ ಮಾರ್ಗಡ್ ಬೊಕ್ಕ ರಾಜ ತೋಡುಡ್ ನೀರ್ ದಿಂಜಿದ್ 15 ರ್ದ್ ಎಚ್ಚ ಗಾಡಿಲೆಡ್ ಇತ್ತಿನ ಜನಕುಲು ತೊಂದರೆ ಆಂಡ್ .

ರಾತ್ರೆ ಇಡೀ ಬರ್ಸ ಬತ್ತಿನೆರ್ದಾವೆರ ರಾಜಬೂಡು ಕೆರೆತ್ತಲೆಕ್ಕ ಆದಿತ್ತ್ಂಡ್. ರಕ್ಷಣಾ ಸಿಬ್ಬಂದಿಲು ಕಾರ್ಯಾಚರಣೆ ನಡಪಾದ್ ಜೀವ ಹಾನಿ ಆವಂದಿಲೆಕ್ಕ ತೂವೊಂದೆರ್.

ಅ.15-24: ಉಚ್ಚಿಲ ದಸರಾ

ಉಚ್ಚಿಲ: ಶ್ರೀ ಮಹಾಲಕ್ಷ್ಮಿ ದೇವಲ್ಯಡ್ ಈ ಸರ್ತಿ ಉಚ್ಚಿಲ ದಸರಾ ಅ.15-24 ಮುಟ್ಟ ನಡಪರೆ ಉಂಡು ಪಂದ್ ಕ್ಷೇತ್ರದ ಗೌರವ ಸಲಹೆಗಾರೆ ನಾಡೋಜ ಡಾ| ಜಿ. ಶಂಕರ್ ಪಂಡೆರ್.

ಮೇರ್ ಸೋಮಾರ ಉಚ್ಚಿಲ ಮೊಗವೀರ ಭವನಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿಯೆರ್.

ಅ.15 ಕ್ಕ್ ಶಾಲಿನಿ ಡಾ| ಜಿ.ಶಂಕರ್ ಸಭಾಂಗಣಡ್ ನವದುರ್ಗೆಯೆರೆನ ಬೊಕ್ಕ ಶಾರದಾ ದೇವಿನ ಪ್ರತಿಷ್ಠಾಪನೆದೊಟ್ಟಿಗೆ ಉಚ್ಚಿಲ ದಸರಾಗ್ ಒಡಿಪು ಜಿಲ್ಲಾಧಿಕಾರಿ ವಿದ್ಯಾಕುಮಾರಿ ಚಾಲನೆ ಕೊರ್ಪೆರ್. ಅನಿ ಮಹಾಲಕ್ಷ್ಮಿ ಅನ್ನಛತ್ರ ಕಟ್ವಾನ, ಅತಿಥಿಗೃಹ ಉದಿಪನ ನಡಪರೆ ಉಂಡು. ಬೊಕ್ಕ ಬಿನ್ನೆರೆನ ಪಾಲ್ವಿಕೆಡ್ ದೇವಿಗ್ ಭೂತಾಯಿ ಮೀನ್ ದ ಬಂಗಾರದ ಮಾಲೆ, ಬೊಳ್ಳಿದ ಕಿರೀಟ, ಬೊಳ್ಳಿ ಲದ ವೀಣೆ ಸಮರ್ಪಣೆ ನಡಪರೆ ಉಂಡು. ಈ ಸರ್ತಿ ದಸರಾ ಇಸೇಸ ಆಕರ್ಷಣೆಯಾದ್ ಫಲಪುಷ್ಪ ಪ್ರದರ್ಶನ, ಬೂಕು ಮೇಳ, ಮೀನುಗಾರಿಕೆ ಯೋಜನೆಲೆನ ಪೊಲಬು, ಮೀನುಗಾರಿಕಾ ಪರಿಕರಲೆನ ಪ್ರದರ್ಶನ, ಯುವ ದಸರಾ ಸಾಂಸ್ಕೃತಿಕ ಲೇಸ್, ಶತವೀಣಾವಲ್ಲರಿ, ಧಾರ್ಮಿಕ ಲೇಸ್, ಬೊಕ್ಕ ಬೇತೆ ಬೇತೆ ಪಂತೊಲು ನಡಪರೆ ಉಂಡು.

ಶೋಭಾಯಾತ್ರೆ ದೇವಲ್ಯರ್ದ್ ಸುರು ಆದ್ ರಾಜ್ಯ ಮಾರ್ಗದ ಮುಖೇನ ಎರ್ಮಾಳ್ ಜನಾರ್ಧನ ದೇವಲ್ಯ ಮುಟ್ಟ ಪೋದು ಅಲ್ಪರ್ದ್ ಕೊಪ್ಪಲಂಗಡಿ ಮುಖೇನ ಕಾಪು ದೀಪಸ್ತಂಭದ ಕಡಲ ಬರಿಟ್ಟ್ ನವದುರ್ಗೆ, ಶಾರದಾ ಮೂರ್ತಿನ ನಡಪರೆ ಉಂಡು. ಅಂಚೆನೆ ಶೋಭಾಯಾತ್ರೆಡ್ ಇಸೇಸ ಆಕರ್ಷಣೆಯಾದ್ ಅಂಬಾರಿ ದೆರ್ಪುನ ಒಂಜಿ ಆನೆ, ಭಜನಾ ತಂಡಲು, ಪಿಲಿಏಸ, ಬೇತೆ ಬೇತೆ ಏಸಭೂಷಣ ಉಂಡು. ಕಡಲ್ ದ ಬರಿಟ್ಟ್ ಕಾಶಿದ ಅರ್ಚಕೆರ್ದ್ ಗಂಗಾರತಿ ಬೆಳಗುನ ಲೇಸ್ ನಡಪರೆ ಉಂಡು.

ಸುದ್ದಿಗೋಷ್ಠಿಡ್ ಮೊಗವೀರ ಮಹಾಜನ ಸಂಘದ ಗುರ್ಕಾರೆ ಜಯ ಸಿ ಕೋಟ್ಯಾನ್ ಬೆಳ್ಳಂಪಳ್ಳಿ, ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ಗುಂಡು ಬಿ ಅಮೀನ್, ಕ್ಷೇತ್ರಾಡಳಿತ ಸಮಿತಿದ ಗುರ್ಕಾರೆ ವಾಸುದೇವ ಸಾಲ್ಯಾನ್, ಮಹಿಳಾ ಘಟಕದ ಗುರ್ಕಾರ್ದಿ ಉಷಾ ರಾಣಿ, ಕಾಪು ನಾಲ್ಕು ಪಟ್ಣ ಗುರ್ಕಾರ್ದಿ ಸುಗುಣ ಕರ್ಕೇರ, ಉಪಾಧ್ಯಕ್ಷೆರ್ ಸುಭಾಶ್ಚಂದ್ರ, ಕಾರ್ಯದರ್ಶಿ ಸುಧಾಕರ್ ಕುಂದರ್, ಅನಿಲ್ ಕುಮಾರ್, ಶಂಕರ್ ಸಾಲ್ಯಾನ್, ದಿನೇಶ್ ಮೂಳೂರು, ದಿನೇಶ್ ಎರ್ಮಾಳು, ಸತೀಶ್ ಬಾರ್ಕೂರು, ಮನೋಜ್ ಕಾಂಚನ್, ರವೀಂದ್ರ ಶ್ರೀಯಾನ್, ಸತೀಶ್ ಅಮೀನ್ ಬಾರ್ಕೂರು, ದೇವಲ್ಯದ ಮುಖ್ಯ ಪ್ರಬಂಧಕೆರ್ ಸತೀಶ್ ಅಮೀನ್ ಮಟ್ಟು ಪಾಲ್ ಪಡೆದಿತ್ತೆರ್.