Tulu News

ಸ್ಥಿತ್ಯಂತರಡ್ ಬಂಟೆರ್, ಶಿಕ್ಷಣ ಬೊಕ್ಕ ನಿರುದ್ಯೋಗದ ವಿಚಾರ ಸಂಕಿರಣ

ಒಡಿಪು: ವಿಶ್ವ ಬಂಟ ಸಮ್ಮೇಳನದ ಲೆಕ್ಕೊಡು ಸ್ಥಿತ್ಯಂತರಡ್ ಬಂಟೆರ್, ಶಿಕ್ಷಣ ಬೊಕ್ಕ ನಿರುದ್ಯೋಗದ ಬಗೆಟ್ಟ್ ವಿಚಾರ ಸಂಕಿರಣ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಂಗಣಡ್ ಐತಾರ ನಡತ್ಂಡ್.

ಹೇರಂಬ ಇಂಡಸ್ಟ್ರೀಸ್ ಲಿ. ಸಿಎಂಡಿ ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಲೇಸ್ ಉದಿಪನ ಮಲ್ತೆರ್.
ಗುರ್ಕಾರ್ಮೆನ್ ವಿಶ್ವಾತ್ ಕೆಮಿಕಲ್ಸ್ ದ ಸಿಎಂಡಿ ಬಿ.ವಿವೇಕ ಶೆಟ್ಟಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಒಯಿಸ್ ದಿತ್ತೆರ್.

ಕರ್ನಾಟಕ ಜಾನಪದ ಯಕ್ಷಗಾನ ಬೊಕ್ಕ ತುಳು ಸಾಹಿತ್ಯ ಅಕಾಡೆಮಿ ಮಾಜಿ ಸದಸ್ಯೆರ್ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ ಮೇರ್ ಪಾತೆರ್ದ್, ಇತ್ತೆದ ಶಿಕ್ಷಣ ಒಂಚಿ ಪೋವೊಂದು ಉಂಡು, ನಿರುದ್ಯೋಗನೇ ಸೃಷ್ಟಿ ಮಲ್ಪುನ ಶಿಕ್ಷಣ ಸಂಸ್ಥೆಲು ಉದ್ಯೋಗ ಕೊರ್ಪುನೆ ಎಂಚ? ಮುಲ್ಪ ಕಲ್ತಿನ ಅರ್ಹ ಜವನೆರೆಗ್ ಉದ್ಯೋಗ ತಿಕ್ಕಂದೆ ವಿದೇಶಗ್ ಪೋವೊಡಾಪುಂಡು. ನೆನ್ ಪ್ರತಿಭಾ ಪಲಾಯನ ಪನ್ಪೆರ್ ಪ್ರತಿಭಾವಂತ ಬಂಟ ಸಮುದಾಯದ ಜವನೆರೆನ್ ನಮ್ಮ ಸಮಾಜದ ಅಭಿವೃದ್ಧಿಡ್ ಎಂಚ ಸೇರ್ಸಾವೊಡು ಪನ್ಪುನ ದಿಟ್ಟಿಡ್ ವಿಚಾರ ವಿನಿಮಯ ನಡಪೊಡು ಪಂದ್ ಪಂಡೆರ್.

ಹೇರಂಬ ಇಂಡಸ್ಟ್ರಿಸ್ ಬೊಂಬೈದ ಸಿಎಂಡಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮಹಾದಾನಿ ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಪಾತೆರ್ದ್, ಬಂಟೆರೆಗ್ ಕೃಷಿ ಪ್ರಧಾನ ಆಯಿನ ಹಿನ್ನೆಲೆ ಉಂಡು. ನಮ ಆಸಕ್ತಿ ಇಪ್ಪುನ ಕ್ಷೇತ್ರಡ್ ಉದ್ಯೋಗ ಮಲ್ಪೊಡು. ‌ಎನ್ನ ಕಂಪೆನಿಡ್ 2500 ಜನ ಕೆಲಸ ಮಲ್ತೊಂದು ಉಲ್ಲೆರ್. ಶಿಕ್ಷಣ ಪಡೆಯಿನಕುಲು ನಮ ವಾ ಕ್ಷೇತ್ರಡ್ ಸಾಧನೆ ಮಲ್ಪೊಡು ಅವ್ವೇ ಕ್ಷೇತ್ರಡ್ ಬೇನೊಡು. ಯಾನ್ ಕಾಸ್ ನೇ ಸಾಧನೆ ಪಂದ್ ಪನ್ಪುಜಿ. ಆಂಡ ಜನರ್ದ್ ಗುರುತಿಸಾವುನ ನಿಜವಾಯಿನ ಸಾಧನೆ‌ ಪಂದ್ ಪಂಡೆರ್.

ಉಪೇಂದ್ರ ಶೆಟ್ಟಿ ಮೇರ್ ಪಾತೆರ್ದ್, ಉದ್ಯೋಗಗ್ ಬೋಡಾಯಿನ ಅರ್ಹತೆ ಇಜ್ಜಿಂಡ ನಮ ನಮಡ ಇಪ್ಪುನ ಕೌಶಲ್ಯನ್ ಅಭಿವೃದ್ಧಿ ಮಲ್ಪೊಡು. ನೆಕ್ಕಾದ್ ಬಂಟೆರೆನ ಸಂಘಟನೆಲು ಅಗತ್ಯ ಇಪ್ಪುನ ಆರ್ಥಿಕ ವ್ಯವಸ್ಥೆನ್ ಮಲ್ಪೊಡು ಪಂದ್ ಪಂಡೆರ್.

ಅದಾನಿ ಗ್ರೂಫ್ ದ ಕಿಶೋರ್ ಆಳ್ವ ಪಾತೆರ್ದ್, ನಮ್ಮ ದೇಶಡ್ ಮಸ್ತ್ ಗುಣಮಟ್ಟದ ಶಿಕ್ಷಣ ಸಂಸ್ಥೆಲು ಉಂಡು. ಇಂಚಾದ್ ಉದ್ಯೋಗ ನಾಡಿಯೆರೆ ಕಷ್ಟ ಅಪುಜಿ. ನಮ್ಮ ಜಿಲ್ಲೆಡೇ ಉದ್ಯೋಗ ಸೃಷ್ಟಿ ಮಲ್ಪುನ ಕೆಲಸ ಆವೊಡು. ಜವನೆರ್ ರಾಜಕೀಯಗ್ ಬರೊಡು. ಆಪಗ ಶಿಕ್ಷಣ ಬೊಕ್ಕ ಉದ್ಯೋಗದ ವ್ಯವಸ್ಥೆ ಬದಲಾಪುಂಡು ಪಂದ್ ಪಂಡೆರ್.

ಪ್ರದೀಪ್ ರೈ ಪಾತೆರ್ದ್, ಮಸ್ತ್ ಸ್ಥಿತಿವಂತರಾಯಿನ ಬಂಟೆರ್ ಬಡ ಬಂಟ ಕುಟುಂಬದ ಜೋಕುಲೆನ್ ಶೈಕ್ಷಣಿಕ ಉದ್ದೇಶಕ್ಕಾದ್ ದತ್ತು ಪಡೆವೊಡು. ನೆರ್ದ್ ನನದ ದಿನಟ್ಟ್ ಬಡತನ, ನಿರುದ್ಯೋಗದ ಸಮಸ್ಯೆ ನಿರ್ಮೂಲನೆ ಆಪುಂಡು ಪಂದ್ ಪಂಡೆರ್.

ಪ್ರಾಧ್ಯಾಪಕಿ ಡಾ. ಪೂರ್ಣಿಮಾ ಎಸ್. ಶೆಟ್ಟಿ ಪಾತೆರ್ದ್, ಸುರುಕು ನಮ ಜೋಕುಲೆಗ್ ಎಡ್ಡೆ ಗುಣಮಟ್ಟದ ಶಿಕ್ಷಣ ಕೊರೊಡು. ಜೋಕುಲು ಉದ್ಯೋಗಗಾದ್ ಬೇತೆ ದೇಶಗ್ ಪೋಪುನೆನ್ ತಪ್ಪಾಯೆರೆ ನಮ‌್ಮ ಸಮಾಜದ ಉದ್ಯಮಿಲು ಮನಸ್ ಮಲ್ಪೊಡು ಪಂದ್ ಪಂಡೆರ್.

ತೋನ್ಸೆ ಆನಂದ ಶೆಟ್ಟಿ ಪಾತೆರ್ದ್, ಶಿಕ್ಷಣ ಬೊಕ್ಕ ಉದ್ಯೋಗ ಒಂಜೇ ಪಾವೊಲಿದ ರಡ್ಡ್ ಮೋನೆ ಇತ್ತಿಲೆಕ್ಕ. ಶಿಕ್ಷಣ ಪಡೆಂಡ ಮಾತ್ರ ಉದ್ಯೋಗ ತಿಕ್ಕುಂಡು. ಅವ್ವೇ ರೀತಿ ಭಾಷೆಲ ಮುಖ್ಯ. ಬೇತೆ ಬೇತೆ ಕಡೆಟ್ಟ್ ಪೋನಗ ಅಲ್ಪದ ಭಾಷೆನ್ ಪಾತೆರೊಡಾಪುಂಡು. ಭಾಷೆ ಗೊತ್ತಿಜ್ಜಿಂಡ ಸಮಸ್ಯೆ ಆಪುಂಡು. ಇತ್ತೆ ಕೆಮಿಕಲ್ ಇಂಜಿನಿಯರ್ ಲೆನ ಅವಶ್ಯಕತೆ ಮಸ್ತ್ ಉಂಡು. ಆಂಡ ಅವೆನ್ ಕಲ್ಪುನಕ್ಲೆನ ಸಂಖ್ಯೆ ಮಸ್ತ್ ಕಮ್ಮಿ. ಇಂಚಾದ್ ಅವಕಾಶ ಇಪ್ಪುನ ಕ್ಷೇತ್ರಡ್ ಸಾಧನೆ ಮಲ್ಪೊಡು. ಜೋಕುಲೆಗ್ ಟಿವಿ, ಮೊಬೈಲ್ ಕೊರಿಯೆರೆ ಬಲ್ಲಿ. ಅವು ನಿಕ್ಲೆನ ಜೋಕುಲೆನ್ ಹಾಳ್ ಮಲ್ಪುಂಡು ಪಂದ್ ಪಂಡೆರ್.

ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಬಿನ್ನೆರೆನ್ ಎದ್ಕೊನಿಯೆರ್. ಆರ್ಗಾನಿಕ್ ಗ್ರೂಪ್ ಆಫ್ ಇಂಡಸ್ಟ್ರೀಸ್ ಬೊಂಬೈದ ಸಿಎಂಡಿ ಆನಂದ ಎಂ.ಶೆಟ್ಟಿ ತೋನ್ಸೆ, ಆದಾನಿ ಗ್ರೂಪ್, ದಕ್ಷಿಣಭಾರತದ ಉಪಾಧ್ಯಕ್ಷೆರ್ ಕಿಶೋರ್ ಆಳ್ವ, ಆಸ್ಪೆನ್‌ ಎಸ್‌ ಇಝಡ್ ಸೀನಿಯರ್ ಜನರಲ್ ಮೆನೇಜರ್ ಅಶೋಕ್ ಕುಮಾರ್ ಶೆಟ್ಟಿ, ಇಸ್ಸಾರ್ ಫೈನಾನ್ಸಿಯಲ್ ಸರ್ವೀಸಸ್ ಲಿ. ಬೊಂಬೈದ ಸಿಎಂಡಿ ಡಾ.ಆರ್. ಕೆ. ಶೆಟ್ಟಿ, ಬೆಂಗ್ಲೂರುದ ಯುನಿವರ್ಸಲ್ ಗ್ರೂಫ್ ಆಫ್ ಇನ್ ಸ್ಟಿಟ್ಯೂಷನ್ ಉಪೇಂದ್ರ ಶೆಟ್ಟಿ, ಬೊಂಬೈ ವಿಶ್ವವಿದ್ಯಾನಿಲಯ ಪ್ರಾಧ್ಯಾಪಕಿ ಡಾ. ಪೂರ್ಣಿಮಾ ಎಸ್. ಶೆಟ್ಟಿ ವಿಷಯ ಮಂಡನೆ ಮಲ್ತೆರ್. ಕದ್ರಿ ನವನೀತ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 31ನೇ ಸಂಚಿಕೆ ಅ.30 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರ್. ಅ.31 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ನವೆಂಬರ್ ಡ್ 9 ದಿನ ಬ್ಯಾಂಕ್ ರಜೆ

ಈ ವರ್ಷಡ್ ಅಕೇರಿದ ರಡ್ಡ್ ತಿಂಗೊಲ್ ಮಾತ್ರ ಬಾಕಿ ಒರಿತ್ಂಡ್. ಆಂಡ ಬ್ಯಾಂಕಿಂಗ್ ವಲಯಡ್ ಕೆಲಸ ಮಲ್ಪುನ ರಾಜ್ಯದ ಉದ್ಯೋಗಿಲೆಗ್ ನವೆಂಬರ್ ಡ್ ಒಟ್ಟು 9 ರಜೆ ಉಂಡು.

ನವೆಂಬರ್ 1 ಕ್ಕ್ ಕನ್ನಡ ರಾಜ್ಯೋತ್ಸವ, ನ.5, 12, 19, 26 ಕ್ಕ್ ನಿಯಮದಂಚೆನೆ ಐತಾರ ರಜೆ ಉಂಡು. ನ.11, 25 ರಡ್ಡನೇ ಸನಿಯಾರದ ರಜೆ ಉಂಡು. ನೆತ್ತೊಟ್ಟಿಗೆ ನ.14 ಕ್ಕ್ ಬಲಿಪಾಡ್ಯಮಿ, ನ.30 ಕನಕದಾಸ ಜಯಂತಿದ ಲೆಕ್ಕೊಡು ರಾಜ್ಯಡ್ ಬ್ಯಾಂಕ್ ಲು ಮುಚ್ಚಿದ್ ಇಪ್ಪುಂಡು.

ದೇವೆರೆ ಪಾದೊ ಸೇರಿಯೆರ್ ತೋಡ್ಡಲ ವೆಂಕಪ್ಪ ಚೌಟ

ತೋಡ್ದಲ ವೆಂಕಪ್ಪ ಚೌಟ ಮೇರ್ ಅ.23 ಸೋಮಾರ ದೇವೆರೆ ಪಾದೊ ಸೇರಿಯೆರ್.

ಅರೆನ ಉತ್ತರಕ್ರಿಯೆ ನ.4 ಸನಿಯಾರ ಮಧ್ಯಾಹ್ನ 12:30 ಕ್ಕ್ ಸೋಮೇಶ್ವರದ ಶ್ರೀ ಸೋಮನಾಥ ಚಾವಡಿ ಸಭಾಂಗಣಡ್ ನಡಪರೆ ಉಂಡು.

ಮಿಜಾರು ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ರ್ದ್ ಬಡಪತ್ತ್ ದ ಕುಟುಂಬಲೆಗ್ ಪನವುದ ಸಕಾಯ

ಮಿಜಾರು ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದ ಸೇವಾ ಯೋಜನೆದ ಮುಖೇನ ಬಡಪತ್ತ್ ದ ಕುಟುಂಬದಕ್ಲೆಗ್ ಪನವುದ ಸಕಾಯನ್ ಮಲ್ತೆರ್.

ನೆತ್ತ 31ನೇ ಸೇವಾ ಯೋಜನೆದ ಮುಖೇನ ಕಾರ್ಲ ತಾಲೂಕ್ ದ ನಲ್ಲೂರು ಗ್ರಾಮದ ಕಲತ್ರಪಾದೆ ನಿವಾಸಿ ಆಯಿನ ಸುಗುಣ ಪೂಜಾರ್ತಿ ಮೆರೆಗ್ ರಡ್ಡ್ ಕಿಡ್ನಿದ ಸಮಸ್ಯೆ ಆದಿತ್ತ್ಂಡ್. ನೆತ್ತ ಚಿಕಿತ್ಸೆಗ್ ಬೊಕ್ಕ ಒಂಜಿ ಕಿಡ್ನಿ ಪಾಡಿಯೆರೆ ಸುಮಾರ್ 7 ಲಕ್ಷದ ಅವಶ್ಯಕತೆ ಉಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಮೆರೆಗ್ ರಡ್ಡ್ ವರ್ಷದ ಎಲ್ಯ ಬಾಲೆ ಉಂಡು. ಆರ್ಥಿಕವಾದ್ ಮಸ್ತ್ ಬಡಪತ್ತ್ ದ ಕುಟುಂಬ ಆಯಿನೆರ್ದಾವರ, ಆರೆನ ನನದ ಚಿಕಿತ್ಸೆಗ್ ಬೊಕ್ಕ ಜೀವನ ನಿರ್ವಹಣೆಗ್ ಸಕಾಯ ಮಲ್ಪುಲೆ ಪಂದ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ಗ್ ಬಿನ್ನಾಪು ಮಲ್ತಿತ್ತೆರ್.

ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟದ ಲೆಕ್ಕೊಡು 15000/- ರೂ.ದ ಚೆಕ್ ನ್ ಬೆದ್ರದ ಪರ ಮಾರಿಗುಡಿಟ್ಟ್ ಪುರಸಭೆ ಸದಸ್ಯೆರ್ ನಾಗರಾಜ್ ಪೂಜಾರಿ ಕೊರಿಯೆರ್.

32ನೇ ಸೇವಾ ಯೋಜನೆನ್ ಬಂಟ್ವಾಳ ತಾಲೂಕ್ ದ ಮೊಡಂಕಾಪು ಕುಪ್ಪಿಲ ನಿವಾಸಿ ಆಯಿನ ಸುರೇಶ್ ಕುಲಾಲ್ ಮೆರೆನ ಬೊಡೆದಿ ಯೋಗಿನಿ ಕುಲಾಲ್ ಮೇರ್ ಸುಮಾರ್ 8 ವರ್ಷೊದಿಂಚ ಕ್ಯಾನ್ಸರ್ ಸೀಕ್ ಡ್ ಇತ್ತೆರ್. ಮೆರೆನ ಚಿಕಿತ್ಸೆಗ್ ಸುಮಾರ್ 10 ಲಕ್ಷ ರೂ. ಖರ್ಚಾತ್ಂಡ್. ನನದ ಚಿಕಿತ್ಸೆಗ್ ಎಚ್ಚದ ಕಾಸ್ ದ ಅವಶ್ಯಕತೆ ಉಂಡು. ಮೇರ್ ಕೂಲಿ ಕೆಲಸ ಮಲ್ತ್ ದ್ ಜೀವನ ಕರಿಪುನ ಬಡಪತ್ತ್ ದ ಸಂಸಾರ ಆಯಿನೆರ್ದಾವರ ನನದ ಚಿಕಿತ್ಸೆಗ್ ಆತೊಂಜಿ ಕಾಸ್ ಇಜ್ಜಾಂಡ್. ಅಂಚಾದ್ ಯೋಗಿನಿ ಕುಲಾಲ್ ಮೆರೆನ ನನದ ಚಿಕಿತ್ಸೆಗ್ ಸಕಾಯ ಮಲ್ಪರೆ ಕೂಟಗ್ ಬಿನ್ನಾಪು ಮಲ್ತ್ ದ್ ಇತ್ತೆರ್.

ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟದ ಲೆಕ್ಕೊಡು 15000/- ರೂ.ದ ಚೆಕ್ ನ್ ಪಿರಾಕ್ ದ ಆದಿಶಕ್ತಿ (ಮಾರಿಗುಡಿ) ದೇವಲ್ಯ ಬೆದ್ರಡ್ ಕೂಟದ ಗುರ್ಕಾರೆ ಸಂದೀಪ್ ಪುತ್ರನ್ ಮೆರೆನ ಮುಖೇನ ಕೊರಿಯೆರ್. ಈ ಪೊರ್ತುಡು ಪದುಕೆರ್ ಬೊಕ್ಕ ಸೇವೆ ಮಲ್ತಿನ ದಾನಿಲು ಇತ್ತೆರ್.