Tulu News

ಹಂದಾಡಿ ಹೆಗ್ಗಡೆ ಶ್ರೀ ಗೋಪಾಲಕೃಷ್ಣ ದೇವಸ್ಥಾನದ ಲೆಪ್ಪೋಲೆ ಬುಡುಗಡೆ

ಬ್ರಹ್ಮಾವರದ ಪಿರಾಕ್ ದ ಹಂದಾಡಿ ಹೆಗ್ಗಡೆ ಶ್ರೀ ಸಂತಾನಗೋಪಾಲಕೃಷ್ಣ ದೇವೆರೆನ ಪುನಃಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಪುಣ್ಯೋತ್ಸವ ಮೇ1-5 ಮುಟ್ಟ ನಡಪರೆ ಉಂಡು.

ಈ ಲೇಸ್ ದೇವಸ್ಥಾನದ ತಂತ್ರಿಲು ರಮೇಶ್ ಭಟ್ ನಾಯರ್‌ಬೆಟ್ಟು ಬೊಕ್ಕ ಅರ್ಚಕ ವೃಂದದಕ್ಲೆನ ಮುತಾಲಿಕೆಡ್ ನಡಪರೆ ಉಂಡು.

ಲೆಪ್ಪೋಲೆನ್ ಅರ್ಚಕೆರ್ ವೇ.ಮೂ. ಜೀವನ ಉಡುಪ ದೇವೆರೆಗ್ ಪೂಜೆ ಸಂದಾಯಿನ ಬೊಕ್ಕ ಆಡಳಿತ ಮಂಡಳಿದ ಅಧ್ಯಕ್ಷೆರ್ ಸಂತೋಷ್ ಶೆಟ್ಟಿ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಆಡಳಿತ ಮಂಡಳಿದ ಸದಸ್ಯೆರ್, ಅರ್ಚಕ ವೃಂದದಕುಲು, ಹಂದಾಡಿ ನಾಲ್ ಇಲ್ಲದಕುಲು, ಗ್ರಾಮಸ್ಥೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.

ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿನ ಅನುಗ್ರಹ ಪಡೆಯಿನ ಕಾಂಗ್ರೆಸ್ ಅಭ್ಯರ್ಥಿ ಪದ್ಮರಾಜ್

ದಕ್ಷಿಣ ಕನ್ನಡ ಜಿಲ್ಲೆದ ಲೋಕಸಭೆ ಅಭ್ಯರ್ಥಿ ಪದ್ಮರಾಜ್ ಮೇರ್ ಮುಲ್ಕಿದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಗ್ ಶುಕ್ರಾರ ಬೊಲ್ಪುಗು ಭೇಟಿ ಕೊರ್ದು ಅಪ್ಪೆನ ಅನುಗ್ರಹ ಪಡೆದ್ ಪ್ರಸಾದ ಸ್ವೀಕಾರ ಮಲ್ತೆರ್.

ಈ ಪೊರ್ತುಡು ಮಾಧ್ಯಮದೊಟ್ಟಿಗೆ ಪಾತೆರ್ನ ಪದ್ಮರಾಜ್, ಈ ಸರ್ತಿ ಕಾಂಗ್ರೆಸ್ ಪಕ್ಷನ್ ಅಧಿಕಾರಗ್ ಕನಯೆರೆ ದೈವ ದೇವೆರ್ನ ಅನುಗ್ರಹ ಅಂಚೆನೆ ಜನಕ್ಲೆನ ಆಶೀರ್ವಾದ ಖಂಡಿತಾ ಬೋಡು. ಜಿಲ್ಲೆದ ಅಭಿವೃದ್ಧಿಗಾದ್ ಎಂಕ್ ಬೆಂಬಲ ಕೊರ್ಲೆ ಪಂದ್ ಪಂಡೆರ್.

ಈ ಪೊರ್ತುಡು ಮಾಜಿ ಸಚಿವೆರ್ ಕೆ.ಅಭಯ ಚಂದ್ರ ಜೈನ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಮುಲ್ಕಿ, ಬೆದ್ರ ವಿಧಾನಸಭಾ ಕ್ಷೇತ್ರದ ವೀಕ್ಷಕೆರ್ ವಸಂತ್ ಬರ್ನಾಡ್, ಬೆದ್ರ ಬ್ಲಾಕ್ ಕಾಂಗ್ರೆಸ್ ವ್ಯಾಪ್ತಿದ ವೀಕ್ಷಕೆರ್ ಗುರುರಾಜ್ ಎಸ್ ಪೂಜಾರಿ, ಮುಲ್ಕಿ ನಪಂ ಸದಸ್ಯೆರ್ ಪುತ್ತು ಭಾವ, ಯೋಗೀಶ್ ಕೋಟ್ಯಾನ್, ಮಂಜುನಾಥ ಕಂಬಾರ, ಕಾಂಗ್ರೆಸ್ ಪಕ್ಷದ ನಾಯಕೆರ್ ಪ್ರಕಾಶ್ ಕಿನ್ನಿಗೋಳಿ, ಶರತ್ ಕಾರ್ನಾಡ್, ಧರ್ಮಾನಂದ ಶೆಟ್ಟಿಗಾರ್, ರಕ್ಷಿತ್ ಕೊಳಚಿಕಂಬಳ, ಚಂದ್ರಶೇಖರ್ (ಕೆಂಚ) ಮೊಕುಲು ಮಾತ ಇತ್ತೆರ್.

ಎ.14: ವಿಟ್ಲ ಶ್ರೀ ಪಂಚಲಿಂಗೇಶ್ವರ ದೇವೆರೆನ ಪ್ರಧಾನ ದೈವ ಶ್ರೀ ಅರಸು ಮುಂಡಾಲತ್ತಾಯದ ನೇಮ

ವಿಟ್ಲ: ವಿಟ್ಲ ಶ್ರೀ ಪಂಚಲಿಂಗೇಶ್ವರ ದೇವೆರೆನ ಪ್ರಧಾನ ದೈವ ಬೊಕ್ಕ ವಿಟ್ಲ ಪೊಸ ಇಲ್ಲದ ಜೈನ ಕುಟುಂಬಸ್ಥೆರೆನ ಆರಾಧ್ಯ ದೈವ ಶ್ರೀ ಅರಸು ಮುಂಡಾಲತ್ತಾಯ ನೇಮ ಎ.14 ಐತಾರ ನಡಪರೆ ಉಂಡು.

ಈ ಲೇಸ್ ವಿಟ್ಲ ಪೊಸ ಇಲ್ಲ್ ದ ಜೈನ ಕುಟುಂಬಸ್ಥೆರೆರ್ದ್, ವೇದಮೂರ್ತಿ ಕೀರ್ತನ್ ಕೆದಿಲಾಯೆರ್ ಬೊಕ್ಕ ವಿಟ್ಲ ಅರಮನೆ ಬಂಗಾರು ಅರಸರ ಉಪಸ್ಥಿತಿಡ್ ದೇವಸ್ಯಬೈಲ್ ದ ಮುಂಡಾಲತ್ತಾಯೆರೆನ ಸನ್ನಿಧಿಡ್ ನಡಪರೆ ಉಂಡು.

ಬೊಲ್ಪುಗು ಗಣಹೋಮ, ಭಂಡಾರ ದೆಪ್ಪೆರೆ, ನೇಮ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಕೆ. ಸುಮತಿ ಮನೋಹರ ಶೆಟ್ಟಿ ಬೊಕ್ಕ ವಿಟ್ಲ ಪೊಸ ಇಲ್ಲದ ಜೈನ ಕುಟುಂಬಸ್ಥೆರ್, ಅಧ್ಯಕ್ಷೆರ್/ಪದುಕೆರ್, ಸರ್ವಸದಸ್ಯೆರ್ ಬೊಕ್ಕ ಶ್ರೀ ಅರಸು ಮುಂಡಾಲತ್ತಾಯ ಸೇವಾ ಸಮಿತಿದಕುಲು ಪ್ರಕಟಣೆಡ್ ತೆರಿಪಾದೆರ್.

ಕುಡ್ಲ : ಅಡ್ಯಾರ್ ದ ಬೊಂಡ ಫ್ಯಾಕ್ಟರಿ ತಾತ್ಕಾಲಿಕ ಬಂದ್

ಬೊಂಡದ ನೀರ್ ಪರ್ದ್ 100 ರ್ದ್ ಎಚ್ಚ ಜನ ಹುಷಾರ್ ತತ್ತಿನೆರ್ದಾದವರ ಕುಡ್ಲದ ಅಡ್ಯಾರ್ ದ ಬೊಂಡ ಫ್ಯಾಕ್ಟರಿಗ್ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣಾಧಿಕಾರಿಲೆನ ಮುತಾಲಿಕೆದ ಆಹಾರ ಸುರಕ್ಷತಾ ಕೂಟದಕುಲು ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್.

ನನದ ಆದೇಶದ ಮುಟ್ಟ ಬೊಂಡ ಬೊಕ್ಕ ಬೇತೆ ಆಹಾರ ಮಾರಾಟ ಮಲ್ಪಂದಿಲೆಕ್ಕ ಸೂಚಿಸಾದ್ಂಡ್. ನ್ಯಾಚುರಲ್ಸ್ ಐಸ್ ಕ್ರೀಂ ತಯಾರ್ ಮಲ್ಪುನ ಈ ಬೊಂಡ ಫ್ಯಾಕ್ಟರಿಡ್ ಮಾರಾಟ ಮಲ್ತಿನ ಬೊಂಡ ಪರ್ದ್ ತುಂಬೆ ಪರಿಸರದ 137 ಜನ ನಿವಾಸಿಲು ವಾಂತಿ-ಬೇಧಿರ್ದ್ ಹುಷಾರ್ ಇಜ್ಜಂದೆ ಆತೆರ್. ಕೂಟ ಆಸ್ಪತ್ರೆಗ್ ಭೇಟಿ ಕೊರ್ದು ದಾಖಲಾಯಿನಕ್ಲೆನ ಆರೋಗ್ಯ ವಿಚಾರಿಸಾದ್ಂಡ್.

ಎ.11-13: ಬಪ್ಪನಾಡ್ ಕುದುರೊಂಟನ ಕುಟುಂಬದ ಇಲ್ಲಲ್ ದೈವ ಪ್ರತಿಷ್ಠೆ, ದೈವದರ್ಶನ

ಮುಲ್ಕಿ: ಬಪ್ಪನಾಡ್ ಬಡಗುಹಿತ್ಲು ಕೈತಲ್ದ ಕುದುರೊಂಟನ ಪೊಸ ದೈವ ಸಾನಿಧ್ಯ ಕುಟುಂಬದ ಇಲ್ಲಲ್ ದೈವ ಪ್ರತಿಷ್ಠೆ, ದೈವದರ್ಶನ, ವರ್ಷದ ತಂಬಿಲ ಸೇವೆ ಎ.11-13 ಮುಟ್ಟ ನಡಪರೆ ಉಂಡು.

ಎ.11 ಗುರುವಾರ ಬಯ್ಯಗ್ ರಾಕ್ಷೋಘ್ನ ಹೋಮ, ವಾಸ್ತುಪೂಜೆ, ವಾಸ್ತು ಹೋಮ, ವಾಸ್ತು ಬಲಿ ನಡತ್ಂಡ್.

ಎ.12 ಸುಕ್ರಾರ ಬೊಲ್ಪುಗು ಗಣಯಾಗ, ತುಳಸೀ ಪ್ರತಿಷ್ಠೆ, ದೈವೊಲೆನ ಕಲಶಾಭಿಷೇಕ, ದೈವದರ್ಶನ, ದೈವ ಪ್ರತಿಷ್ಠೆ, ಮುಡಿಪು ಕಟ್ಟೆರೆ, ಪಲ್ಲಪೂಜೆ, ಅನ್ನ ಪ್ರಸಾದ ಸೇವೆ, ದೈವ ಪ್ರತಿಷ್ಠೆದ ತಂಬಿಲ ಸೇವೆ ನಡಪರೆ ಉಂಡು.

ಎ.13 ಸನಿಯಾರ ಮಧ್ಯಾಹ್ನ ಪೊಸ ದೈವ ಪ್ರತಿಷ್ಠೆದ ತಂಬಿಲ ಸೇವೆ ಬೊಕ್ಕ ಕುಟುಂಬದ ವಾರ್ಷಿಕ ತಂಬಿಲ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಅಧ್ಯಕ್ಷೆರ್ ಕಿಶೋರ್ ಸಾಲ್ಯಾನ್, ಕಾರ್ಯದರ್ಶಿ ನರೇಂದ್ರ ಕೆರೆಕಾಡು, ಧರ್ಮದರ್ಶಿಲು ಸುಧಾಕರ ಪೂಜಾರಿ ಬೊಕ್ಕ ಕುಟುಂಬಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.