ಹೈದರಾಬಾದ್: ತನ್ನ16ನೇ ವರ್ಷಡ್ ಸ್ನಾತಕೋತ್ತರ ಪದವಿ ಪಡೆಪುನ ಮುಖೇನ ಹೈದರಾಬಾದ್ ದ ಕಲ್ಪಾರ್ಥಿ ಅಗಸ್ತ್ಯ ಜೈಸ್ವಾಲ್ ಪೊಸ ದಾಖಲೆ ಬರೆತೆರ್.
ಮೇರ್ ಭಾರತದ ಮಸ್ತ್ ಎಲ್ಯ ಪ್ರಾಯದ ಎಂ ಎ ಪದವೀಧರೆ ಪನ್ಪುನ ಖ್ಯಾತಿಗ್ ಪಾತ್ರರಾತೆರ್. ಮೇರ್ ಉಸ್ಮಾನಿಯ ವಿಶ್ವವಿದ್ಯಾಲಯರ್ದ್ ಸಾಮಾಜಿಕ ಶಾಸ್ತ್ರಡ್ ಎಂ ಎ ಪದವಿ ಪಡೆತೆರ್.
ನೆರ್ದ್ ದುಂಬು 2020ಟ್ ಡಿಗ್ರಿ ಪಡೆದಿತ್ತೆರ್. ಮೆರೆನ ಸಾಧನೆಗ್ ಪ್ರಶಂಸೆಲು ಬರೊಂದು ಉಂಡು.
ಕುಡ್ಲ: ಶಾಸಕೆರ್ ಯು ಟಿ ಖಾದರ್ ಮೆರೆನ ಕಾರ್ ಬ್ರೇಕ್ ಫೈಲ್ ಆಯಿನ ಘಟನೆ ಬಿ ಸಿ ರೋಡ್ ರ್ದ್ ಕುಡ್ಲಗ್ ಬರೊಂದು ಇತ್ತಿನ ಪೊರ್ತುಡು ಪಡೀಲ್ ಡ್ ನಡತ್ಂಡ್.
ಕಾರ್ ಬ್ರೇಕ್ ಫೈಲ್ ಆಯಿನ ಪೊರ್ತುಡು ಡ್ರೈವರ್ ಕೂಡ್ಲೆ ಉಂತಾಯಿರ್ನೇದಾವೆರ ಶಾಸಕೆರ್ ಅಪಾಯರ್ದ್ ಪಾರಾತೆರ್. ಬೊಕ್ಕ ಮೇರ್ ಬೇತೆ ಕಾರ್ ಡ್ ಕುಡ್ಲಗ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.
ಕುಡ್ಲ: ಕೊರಗಜ್ಜನ ಆದಿಸ್ಥಳ ಕುತ್ತಾರ್ ಕ್ಷೇತ್ರಗ್ ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ತನ್ನ ಕುಟುಂಬದಕ್ಲೆನೊಟ್ಟಿಗೆ ಭೇಟಿ ಕೊರ್ದು ಪೂಜೆ ಸಂದಾಯೆರ್.
ಈ ಪೊರ್ತುಡು ಶಿವರಾಜ್ ಕುಮಾರ್ ಮೆರೆನ ಬೊಡೆದಿ ಗೀತಾ ಬೊಕ್ಕ ಜೋಕುಲು ಇತ್ತೆರ್.
ಕುಡ್ಲ: ಇನಿ ಸಿಎಂ ಬಸವರಾಜ ಬೊಮ್ಮಾಯಿ ಮೇರ್ ಕಲ್ಲಡ್ಕ ಶ್ರೀರಾಮ ವಿದ್ಯಾಕೇಂದ್ರಗ್ ಭೇಟಿ ಕೊರಿಯೆರೆ ಉಲ್ಲೆರ್.
ಮೇರ್ ಬಯ್ಯಗ್ 6.05 ಕ್ ಮೈಸೂರ್ ರ್ದ್ ವಿಮಾನಡ್ ಕುಡ್ಲಗ್ ಬತ್ ದ್ ಎತ್ತಿಯೆರೆ ಉಲ್ಲೆರ್. ಬೊಕ್ಕ ಬಂಟ್ವಾಳ, ಕಲ್ಲಡ್ಕ ಶ್ರೀರಾಮ ವಿದ್ಯಾ ಟ್ರಸ್ಟ್ ಆಯೋಜನೆ ಮಲ್ತಿನ ಕ್ರೀಡಾ ಉಚ್ಚಯ ಬೊಕ್ಕ ಸಾಂಸ್ಕೃತಿಕ ಉಚ್ಚಯನ್ ಉದಿಪನ ಮಲ್ತ್ ದ್, ರಾತ್ರೆ 9.05 ಕ್ ಕುಡ್ಲ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್ ದ್, ಇಸೇಸ ವಿಮಾನದ ಮುಖೇನ ಬೆಂಗ್ಲೂರ್ ಗ್ ಪೋಯೆರೆ ಉಲ್ಲೆರ್.
ಬೆಂಗ್ಲೂರ್: ಬೆಂಗ್ಲೂರ್ ದ ಎಚ್ಎಲ್ ಕುಂದನಹಳ್ಳಿ ಗೇಟ್ ಕೈತಲ್ ಇಪ್ಪುನ ಬ್ರಹ್ಮಲಿಂಗೇಶ್ವರ ಬೇಕರಿಡ್ ಒಡಿಪು ಜಿಲ್ಲೆದ ಬೈಂದೂರುದ ಜವನೆರ್ ಕೆಲಸ ಮಲ್ತೊಂದು ಇತ್ತಿನ ಪೊರ್ತುಡು ರೌಡಿಲೆನ ಗುಂಪೊಂಜಿ ಪೆಟ್ಟ್ ಹಾಕ್ ದಿನ ಘಟನೆ ನಡತ್ಂಡ್.
ಈ ಘಟನೆದ ದೃಶ್ಯ ಸಿಸಿ ಕ್ಯಾಮರಡ್ ತೋಜಿದ್ ಬೈದ್ಂಡ್. ನೆತ್ತ ಬಗೆಟ್ ತುಳುನಾಡ ರಕ್ಷಣಾ ವೇದಿಕೆ ಸ್ಥಾಪಕಾಧ್ಯಕ್ಷೆರ್ ಯೋಗೀಶ್‌ ಶೆಟ್ಟಿ ಮೇರ್ ಬೆಚ್ಚ ಆತೆರ್. ನನ ಇಂಚಿನ ಘಟನೆಲು ಅವಂದಿಲೆಕ್ಕ ಗೃಹ ಮಂತ್ರಿಲು ಕೂಡ್ಲೆ ಈ ಬಗೆಟ್ ಕ್ರಮ ದೆತೊನೊಡು, ಅತ್ತಂದೆ ತಪ್ಪಿತಸ್ಥೆರೆನ್ ಕೂಡ್ಲೆ ಅರೆಸ್ಟ್ ಮಲ್ಪೊಡು ಪಂದ್ ತುಳುನಾಡ ರಕ್ಷಣಾ ವೇದಿಕೆ ಒತ್ತಾಯ ಮಲ್ದ್ಂಡ್. ನೆಟ್ ಪೆಟ್ಟಾಯಿನಕುಲು ಬೈಂದೂರು ಮೂಲದ ನವೀನ್ ಬೊಕ್ಕ ಪ್ರಜ್ವಲ್ ಪಂದ್ ತೆರಿದ್ ಬೈದ್ಂಡ್. ಮೊಕುಲು ಖಾಸಗಿ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಈ ಬಗೆಟ್ ಎಚ್ಎಎಲ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಅಂಚನೆ ಆರೋಪಿಲೆನ ಮಿತ್ತ್ ಸರಿಯಾಯಿನ ಕ್ರಮ ದೆತೊನಿಯೆರೆ ಬೆಂಗ್ಲೂರ್ ಪೋಲಿಸ್ ಕಮೀಷನರ್ ಪ್ರತಾಪ್ ರೆಡ್ಡಿ ಮೆರೆಡ ಪಾತೆರ್ದ್ ಬಿನ್ನಾಪು ಮಲ್ದ ಪಂದ್ ಬೈಂದೂರ್ ಶಾಸಕೆರ್ ಬಿ.ಎಮ್. ಸುಕುಮಾರ ಶೆಟ್ಟಿ ಪಂಡೆರ್.
ಕುತ್ತಾರ್: ಶ್ರೀ ಪಂಜಂದಾಯ, ಬಂಟ, ವೈದ್ಯನಾಥ ದೈವೊಲ್ಯ, ಶ್ರೀ ಕೊರಗತನಿಯ ದೈವದ ಆದಿಸ್ಥಳ ಕುತ್ತಾರ್ ಡ್ ಡಿ.25 ಐತಾರದಾನಿ ಪುದ್ವಾರ್ ದ ಮೆಚ್ಚಿ ನೇಮ ನಡಪರೆ ಉಂಡು.
ಈ ಲೇಸ್ ಡ್ ನಿಕುಲು ಮಾತ ಪಾಲ್ ಪಡೆದ್, ಶ್ರೀ ದೈವೊಲೆನ ಸಿರಿಮುಡಿ ಗಂಧ-ಪುರ್ಸಾದ ದೆತೊಂದು ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಪಂಜಂದಾಯ, ಬಂಟ, ವೈದ್ಯನಾಥ ದೈವೊಲ್ಯ ಕುತ್ತಾರ್ ದ ಆಡಳಿತ ಮೊಕ್ತೇಸೆರ್ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕಾಸ್ರೋಡು: ಚೆರುಗೋಳಿ ಶ್ರೀ ಧೂಮಾವತಿ ಕೋಮಾರು ಚಾಮುಂಡಿ ದೈವೊಲ್ಯಡ್ ಶ್ರೀ ಉಳ್ಳಾಲ್ತಿ ಧೂಮಾವತಿ ಕೋಮಾರು ಚಾಮುಂಡಿ ಬಂಟ ದೈವೊಲೆನ ವರ್ಷಾಧಿದ ಚೆರುಗೋಳಿ (ಸೊರೋಲ್) ಜಾತ್ರೆ ಉಚ್ಚಯ ಡಿ.16ರ್ದ್ 24 ಮುಟ್ಟ ನಡಪರೆ ಉಂಡು.
ಡಿ.16 ಕ್ ಕೋರಿ ಕುಂಟ ಮೂರ್ತ, ಡಿ.22 ಕ್ ಗಣಹೋಮ, ಶುದ್ಧಿ ಕಲಶ ದೈವೊಲ್ಯಡ್, ಬಲಿವಾಡು ಕೂಟ-ಸಮಾರಾಧನೆ, ಸಾಮೂಹಿಕ ಪ್ರಾರ್ತನೆ ಅಂಬಾರ್ ಶ್ರೀ ಸದಾಶಿವ ದೇವಲ್ಯಡ್, ಭಜನೆ ಶ್ರೀ ಸತ್ಯನಾರಾಯಣ ಭಜನಾ ಸಂಘ ಚೆರುಗೋಳಿ ಮೊಕ್ಲೆರ್ದ್, ಶ್ರೀ ಐವರ್ ದೈವಂಗಳ ದರ್ಶನ ಕೂಟ, ಪ್ರಸಾದ ಕೊರಿಯೆರೆ, ನಂದ್ರಾಡಿ ಬಾರಿಕೆ ಶ್ರೀ ಧೂಮಾವತಿ ದೈವೋಲ್ಯ ಬೊಕ್ಕ ಇಚ್ಲಂಗೋಡು ಶ್ರೀ ನಾಗಬ್ರಹ್ಮ ಕೋಮಾರ್ ಚಾಮುಂಡೇಶ್ವರೀ ದೈವೊಲ್ಯರ್ದ್ ಶ್ರೀ ದೈವೊಲೆನ ಭಂಡಾರ ಪಿದಡುಂಡು. ಬೊಕ್ಕ ಶ್ರೀ ದೈವೊಲೆನ ಭಂಡಾರ ಶ್ರೀ ಸದಾಶಿವ ದೇವೆರೆನ ಸನ್ನಿಧಿಗ್ ಬತ್ ದ್, ದರ್ಶನ, ಬೊಕ್ಕ ದೈವೊಲ್ಯಡ್ ಭಂಡಾರ ಏರುಂಡು. ಬೊಕ್ಕ ಡಿ.23 ಕ್ ಶ್ರೀ ಜುಮಾದಿ ದೈವದ ನೇಮ, ಪರಕೆ, ಪ್ರಸಾದ ಕೊರಿಯೆರೆ, ಬೊಕ್ಕ ಓಲಸರಿ ಕಟ್ಟೆಗ್ ಶ್ರೀ ದೈವೊಲೆನ ವರ್ಷಾವಧಿ ಓಲಸರಿ, ಬೊಕ್ಕ ನಿಶ್ಮಿತಾ ಕೃಷ್ಣ ಕೂಟ ಕುಂಬಳೆ ಬಳಗರ್ದ್ ಸೊರೋಲ್ ಫೆಸ್ಟ್-2022 ನಡಪುಂಡು. ಬೊಕ್ಕ ಡಿ.24 ಕ್ ಶ್ರೀ ಬಬ್ಬರ್ಯ ದೈವದ ಕೋಲ, ಕೋಮಾರು ಚಾಮುಂಡಿ ಬಂಟ ದೈವದ ನೇಮ, ಪರಕೆ, ಪ್ರಸಾದ ಕೊರಿಯೆರೆ, ಓಲಸರಿ ಕಟ್ಟಿಗೆ ಶ್ರೀ ದೈವದ ವರ್ಷಾವಧಿ ಓಲಸರಿ, ಬೊಕ್ಕ ಉತ್ಸಾಹಿ ತರುಣ ವೃಂದ (ರಿ.) ಕಲ್ಲಡ್ಕ ನೆತ್ತ ಉತ್ಸಾಹಿ ಕಲಾವಿದೆರೆರ್ದ್ ಭೈರನ ಕನ ತುಳು ಹಾಸ್ಯಮಯ ನಾಟಕ ನಡಪರೆ ಉಂಡು. ಡಿ.25 ಕ್ ಶ್ರೀ ಉಳ್ಳಾಲ್ತಿ ದೈವದ ಕಟ್ಟೆಡ್ ತಂಬಿಲ, ದರ್ಶನ, ಬೊಕ್ಕ ಭಂಡಾರ ಜಪ್ಪೆರೆ. ಅಯಿರ್ದ್ ಬೊಕ್ಕ ದೈವೊಲ್ಯಡ್ ಶುದ್ಧಿ ಕಲಶ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕೋಡಿ ಶ್ರೀ ರಕ್ತೇಶ್ವರಿ ಬೊಕ್ಕ ಪರಿವಾರ ದೈವೋಲೆನ ಸೇವಾ ಸಮಿತಿ (ರಿ.) ನೆತ್ತ ಮುತಾಲಿಕೆಡ್ ಡಿ.11 ಐತಾರದಾನಿ ಬೊಲ್ಪುಗು 10 ಗಂಟೆಗ್ ಸರಿಯಾದ್ ಶ್ರೀ ಕ್ಷೇತ್ರದ ತಂತ್ರಿಲಾಯಿನ ವೇ.ಮೂ. ಬೋಳಂತಕೋಡಿ ಶ್ರೀ ರಾಮಭಟ್ ಮೆರೆನ ಕೈರ್ದ್, ಕೋಡಿ ಶ್ರೀ ಶಂಕರ ಭಟ್ ಮೆರೆನ ಪಾಲ್ವಿಕೆಡ್ ಸಾರ್ವಜನಿಕ ಗಣಪತಿ ಹೋಮ ಬೊಕ್ಕ ಶ್ರೀ ಸತ್ಯನಾರಾಯಣ ಪೂಜೆ ನಡಪರೆ ಉಂಡು.
ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೋಡಿ ಶ್ರೀ ರಕ್ತೇಶ್ವರಿ ಬೊಕ್ಕ ಪರಿವಾರ ದೈವೊಲೆನ ಸೇವಾ ಸಮಿತಿ ಬೇರಿಕೆಗೋಳಿ ಬೊಕ್ಕ ಬಂಗೇರ ಕುಟುಂಬಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಚೆನ್ನೈ: ಬಂಗಾಳ ಕೊಲ್ಲಿಡ್ ಮ್ಯಾಂಡಸ್ ಚಂಡ ಮಾರುತರ್ದ್ ಚೆನ್ನೈ ಸೇರ್ದ್ ತಮಿಳುನಾಡ್ ದ ಸುಮಾರ್ ಕಡೆಟ್ ಭಾರೀ ಬರ್ಸ ಬರೊಂದು ಉಂಡು.
ಚೆನ್ನೈದ ಎಗ್ಮೋರ್ ಪ್ರದೇಶಡ್ ಭಾರೀ ಗಾಳಿರ್ದ್ ಸುಮಾರ್ ಮರಕುಲು ನೆಲಕ್ ಬೂರ್ದುಂಡು. ಆಂಧ್ರಪ್ರದೇಶಡ್ ಚಂಡ ಮಾರುತ ಬೈದ್ಂಡ್. ತಿರುಪತಿಡ್ ಲ ಬರ್ಸ ಬರೊಂದು ಉಂಡು. ಭಕ್ತೆರ್ ಎಚ್ಚರಿಕೆಡ್ ಇಪ್ಪೊಡು ಪಂದ್ ಸೂಚನೆ ಕೊರ್ತೆರ್.
ಬೊಲ್ತೇರ್: ಧರ್ಮಸ್ಥಳದ ಶ್ರೀ ಮಂಜುನಾಥನ ಸನ್ನಿಧಾನಗ್ ಕನ್ನಡ ಚಿತ್ರ ನಟೆ ಶಿವರಾಜ್ ಕುಮಾರ್ ಮೇರ್ ಕುಟುಂಬದೊಟ್ಟಿಗೆ ಡಿ.9 ದಾನಿ ಬಯ್ಯಗ್ ಭೇಟಿ ಕೊರ್ದು ದೇವೆರೆನ ದರ್ಶನ ಪಡೆಯೆರ್.
ಈ ಪೊರ್ತುಡು ಬೊಡೆದಿ ಗೀತಾ ಶಿವರಾಜ್ ಕುಮಾರ್, ಜೋಕುಲು ನಿರುಪಮ ರಾಜ್ ಕುಮಾರ್, ನಿವೇದಿತ ರಾಜ್ ಕುಮಾರ್ ಇತ್ತೆರ್.
