ಸುಂಕದಕಟ್ಟೆ: ವರ್ಕಾಡಿ ಅಯ್ಯಪ್ಪ ಭಕ್ತವೃಂದ ನೆತ್ತ ಇರುಮುಡಿ ಕಟ್ಟುನ ಲೇಸ್, ಮಹಾಪೂಜೆ, ಅನ್ನದಾನ ಸೇವೆ ಜನವರಿ 11 ಬುಧಾರ ಶ್ರೀ ಸೀತಾರಾಮ ಗುರುಸ್ವಾಮಿ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಹೆಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಸುಂಕದಕಟ್ಟೆ, ವರ್ಕಾಡಿ ಅಯ್ಯಪ್ಪ ಭಕ್ತ ವೃಂದದ ಆಡಳಿತ ಮಂಡಳಿದಕುಲು ಕೇನೊಂದೆರ್.
ಕಾರ್ಲ: ಸುಬ್ರಹ್ಮಣ್ಯರ್ದ್ ಕಾರ್ಲದ ಕಡೆಕ್ ಬರೊಂದು ಇತ್ತಿನ ಕಾರ್ ಬೊಕ್ಕ ಕಾರ್ಲರ್ದ್ ಬೊಲ್ತೇರ್ ಕಡೆಕ್ ಪೋವೊಂದು ಇತ್ತಿನ ಖಾಸಗಿ ಬಸ್ ಗುದ್ದುದು ಕಂಡನಿ, ಬೊಡೆದಿ ಬೊಕ್ಕ ಬಾಲೆ ತೀರ್ ಪೋಯಿನ ಘಟನೆ ಕಾರ್ಲ ತಾಲೂಕ್ ದ ಹೊಸ್ಮಾರ್ ಕೈತಲ್ ದ ನೆಲ್ಲಿಕಾರ್ ಡ್ ಶನಿಯಾರ (ಇನಿ) ಬೊಲ್ಪುಗು ನಡತ್ಂಡ್.
ಆಂಧ್ರಪ್ರದೇಶದ ಅನಂತಪುರ ಜಿಲ್ಲೆದಕುಲಾಯಿನ, ಇತ್ತೆ ಬೆಂಗ್ಲೂರ್ ದ ಮಾರತಹಳ್ಳಿಡ್ ಉಪ್ಪುನ ನಾಗರಾಜ್( 40) ಬೊಡೆದಿ ಪ್ರತ್ಯುಷ (32) ಬೊಕ್ಕ ರಡ್ಡ್ ವರ್ಷದ ಪೊಣ್ಣು ಬಾಲೆ ಈ ಘಟನೆಡ್ ತೀರ್ ಪೋಯೆರ್. ಗುದ್ದುದಿನ ಬಿರ್ಸ್ ಗ್ ಮೊಕ್ಲೆನ ಕಾರ್ ನಕ್ಕೆ ಆತ್ಂಡ್. ಈ ಬಗೆಟ್ ಕಾರ್ಲ ಗ್ರಾಮಾಂತರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಒಡಿಪು: ಪುತ್ತೂರ್ ಗ್ರಾಮದ ಎಲ್‌ವಿಟಿ ದೇವಲ್ಯದ ಕೈತಲ್ ತನ್ನ ಅಮ್ಮನೊಟ್ಟಿಗೆ ವಾಸ ಇತ್ತಿನ ಪೂಜಾ ಸಾಲ್ಯಾನ್ ಪನ್ಪುನರೆನ ಇಲ್ಲಲ್ ಏರ್ಲ ಇಜ್ಜಂದಿನ ಪೊರ್ತುಡು ಕಲ್ವೆರ್ ಇಲ್ಲದ ಎದುರು ಬಾಕಿಲ್ ದ ಬೀಗ ಪುಡಾತ್ ದ್ ಬಂಗಾರ್ ಕಂಡಿನ ಘಟನೆ ನಡತ್ಂಡ್.
ಮೊಕುಲು ಬೆಡ್ ರೂಮ್ ದ ಗಾಡ್ರೇಜ್‌ಡ್ ಇತ್ತಿನ 16 ಗ್ರಾಂ ತೂಕದ 1 ಬಂಗಾರ್ ದ ಕಜಿ, 4 ಗ್ರಾಂ ತೂಕದ 1 ಬಂಗಾರ್ ದ ಪೆಂಡೆಂಟ್ ಸೇರ್ದ್ ಒಟ್ಟು 20 ಗ್ರಾಂ ತೂಕ ಇತ್ತಿನ ಸುಮಾರ್ 96,000 ಬಿಲಿತ ಬಂಗಾರ್ ನ್ ಕಂಡ್ ದ್ ಬಲಿತ್ ದೆರ್. ಈ ಬಗೆಟ್ ಒಡಿಪು ಪೇಂಟೆದ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕಿನ್ನಿಗೋಳಿ ಸಾರ್ವಜನಿಕ ಶ್ರೀ ಬಾಲ ಗಣೇಶ ಉಚ್ಚಯ ಸಮಿತಿದ ಮುತಾಲಿಕೆಡ್ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ ಡಿ.10 ಶನಿಯಾರ ಬಯ್ಯಗ್ 4:30 ರ್ದ್ ರಾಜರತ್ನಪುರ ಅಶ್ವಥ ಕಟ್ಟೆಡ್ ನಡಪರೆ ಉಂಡು.
ಬೊಕ್ಕ ರಾತ್ರೆ 8 ಗಂಟೆರ್ದ್ ಬಾಲಗಣಪತಿ ವೇದಿಕೆಡ್ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಕಾಲಮಿತಿ ಆಟ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ನಡಪುಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕೆದಿಲ: ಕರಿಮಜಲು ಶ್ರೀ ಕೃಷ್ಣ ಭಜನಾ ಮಂದಿರ(ರಿ.) ನೆತ್ತ 17 ನೇ ವರ್ಷದ ಸಾಮೂಹಿಕ ಸತ್ಯನಾರಾಯಣ ಪೂಜೆ, ಏಕಾಹ ಭಜನೆ ಬೊಕ್ಕ ಧಾರ್ಮಿಕ ಸಭಾ ಲೇಸ್ ಡಿ.18 ಐತಾರದಾನಿ ಕರಿಮಜಲು ಶ್ರೀ ಕೃಷ್ಣ ಸಭಾಂಗಣಡ್ ನಡಪರೆ ಉಂಡು.
ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಧ್ಯಕ್ಷೆರ್ ಶ್ರೀನಿವಾಸ ಕುದುಂಬ್ಲಾಡಿ, ಗೌರವಾಧ್ಯಕ್ಷೆರ್ ಚಂದ್ರಶೇಖರ ಭಟ್ ಕುಕ್ಕಾಜೆ, ಕಾರ್ಯದರ್ಶಿ ಹರೀಶ್ ಕರಿಮಜಲು ಬೊಕ್ಕ ಶ್ರೀ ಕೃಷ್ಣ ಭಜನಾ ಮಂಡಳಿ (ರಿ.) ಕರಿಮಜಲ್ ದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್: ಮಸ್ತ್ ಆಳಾಯಿನ ಕುಡ್ಲ-ಶಿರಾಡಿ-ಬೆಂಗ್ಲೂರ್ ರಾಜ್ಯ ಮಾರ್ಗ ಕೂಡ್ಲೆ ಸರಿ ಮಲ್ಪೆರೆ ಅನುದಾನ ಕೊರೊಡು ಪಂದ್ ರಾಜ್ಯಸಭಾ ಸದಸ್ಯೆರಾಯಿನ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆ ಮೇರ್ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವೆರ್ ನಿತಿನ್ ಗಡ್ಕರಿ ಮೆರೆಗ್ ಪತ್ರ ಬರೆತೆರ್.
ಹೆಗ್ಗಡೆರ್ ಬರೆಯಿನ ಪತ್ರಗ್ ಕೂಡ್ಲೆ ಸ್ವಂದಿಸಯಿನ ಕೇಂದ್ರ ಸಚಿವೆರ್ ನಿತಿನ್ ಗಡ್ಕರಿ ಈ ಬಗೆಟ್ ಪರಿಶೀಲನೆ ಮಲ್ತ್ ದ್, ಸರಿಯಾಯಿನ ಕ್ರಮ ದೆತೊನೊವ ಪಂದ್ ಪತ್ರದ ಮುಖೇನ ಭರವಸೆ ಕೊರ್ತೆರ್ ಪಂದ್ ತೆರಿದ್ ಬೈದ್ಂಡ್.
ಶಿವಮೊಗ್ಗ: ಇಲ್ಲಲ್ ಹೋಲ್ಡರ್‌ಗ್ ಬಲ್ಬ್ ಪಾಡ್ನಗ ಕರೆಂಟ್ ತಾಗ್ ದ್ ರೂಪ್ ಸಿಂಗ್(33) ಪನ್ಪುನಾರ್ ತೀರ್ ಪೋಯಿನ ಘಟನೆ ಶಿವಮೊಗ್ಗ ಜಿಲ್ಲೆದ ಸಾಗರದ ಶಾಂತಿ ನಗರಡ್ ನಡತ್ಂಡ್.
ಮೆರೆಗ್ ಕರೆಂಟ್ ತಾಗಿನ ಕೂಡ್ಲೆ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಆಂಡ ಮೇರ್ ಆತಾನಗನೇ ತೀರ್ ಪೋತೆರ್ ಪಂದ್ ಡಾಕ್ಟರ್ ತೆರಿಪಾದೆರ್. ಈ ಘಟನೆದ ಜಾಗೆಗ್ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್. ಸಾಗರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ವಿಟ್ಲ: ಖಾಸಗಿ ಬಸ್ ತ್ತ ಚಾಲಕೆರಾಯಿನ ಮಣಿಕಂಠ ಬೊಕ್ಕ ಮಹೇಶ್ ಪೆಟ್ಟ್ ಮಲ್ತೊನ್ನ ಘಟನೆ ವಿಟ್ಲ ಸಾರ್ವಜನಿಕ ಬಸ್ ಸ್ಯಾಂಡ್ ಡ್ ನಡತ್ಂಡ್.
ಮೊಕುಲು ಬಸ್ ತ ಟೈಮಿಂಗ್ಸ್ ಇಚಾರಗ್ ಗಲಾಟೆ ಮಲ್ತೊಂದೆರ್ ಪಂದ್ ತೆರಿದ್ ಬೈದ್ಂಡ್. ಈ ಘಟನೆದ ಜಾಗೆಗ್ ವಿಟ್ಲ ಪೊಲೀಸೆರ್ ಬತ್ ದ್, ರಡ್ಡ್ ಜನನ್ಲಾ ವಶಕ್ ಪಡೆತೆರ್ ಪಂದ್ ವರದಿ ಆತ್ಂಡ್.
ಬೆಂಗ್ಲೂರ್: ದೇಶಡ್ ನಿಷೇಧ ಮಲ್ತಿನ ಪಾಪ್ಯುಲರ್‌ ಫ್ರಂಟ್‌ ಆಫ್ ಇಂಡಿಯಾ(ಪಿಎಫ್ಐ) ಕಾರ್ಯಕರ್ತೆರೆನ ಇಲ್ಲ್ ದ ಮಿತ್ತ್ ರಾಷ್ಟ್ರೀಯ ತನಿಖಾ ದಳ(ಎನ್ಐಎ) ಗುರುವಾರ ರಾಜ್ಯದ ಕಲಬುರಗಿ ಬೊಕ್ಕ ಕೇರಳದ ಕೋಝಿಕ್ಕೋಡ್‌ದ ಮೂಜಿ ಜಾಗೆಲೆಗ್ ರೈಡ್ ಮಲ್ದ್ಂಡ್.
ರೈಡ್ ಮಲ್ತಿನ ಪೊರ್ತುಡು ಡಿಜಿಟಲ್‌ ಸಾಧನಲು ಬೊಕ್ಕ ಬೇತೆ ಬೇತೆ ದಾಖಲೆನ್ ವಶಕ್ ಪಡೆತ್ಂಡ್. ಈ ಬಗೆಟ್ ಡೆಲ್ಲಿ ದ ಎನ್ಐಎ ಕೇಸ್ ದಾಖಲ್ ಮಲ್ದ್ಂಡ್ ಪಂದ್ ಎನ್ಐಎ ತೆರಿಪಾದ್ಂಡ್.
ಕುಡ್ಲ: ಬುರ್ಕಾ ಪಾಡ್ದ್ ಡ್ಯಾನ್ಸ್ ಮಲ್ತಿನ ನಾಲ್ ಜನ ಮುಸ್ಲಿಂ ಕಲ್ಪಾರ್ಥಿಲೆನ್ ಸಸ್ಪೆಂಡ್ ಮಲ್ತಿನ ಘಟನೆ ಕುಡ್ಲದ ವಾಮಂಜೂರ್ ದ ಖಾಸಗಿ ಇಂಜಿನಿಯರಿಂಗ್ ಕಾಲೇಜ್ ಡ್ ನಡತ್ಂಡ್.
ಈ ಘಟನೆದ ವೀಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.
