Times of kudla

ದುಬೈ ಯಕ್ಷ ಯೋಧಾಸ್ ಮುತಾಲಿಕೆಡ್ 2ನೇ ವರ್ಷದ YPL-2022 ಕ್ರಿಕೆಟ್ ಪಂತೊ

ದುಬೈ : ಯಕ್ಷ ಯೋಧಾಸ್ ದುಬೈದ ಮುತಾಲಿಕೆಡ್ ರಡ್ಡನೇ ವರ್ಷದ YPL-2022 ಕ್ರಿಕೆಟ್ ಪಂತೊ ಶಾರ್ಜಾ ಸಿಟಿತ್ತ ಸ್ಕೈ ಲೈನ್ ಯುನಿವರ್ಸಿಟಿ ಕ್ರೀಡಾಂಗಣಡ್ ಗೌಜಿಡ್ ನಡತ್ಂಡ್.

ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಸಂಚಾಲಕೆರಾಯಿನ DUMEC ಸಂಸ್ಥೆದ ರೂವಾರಿ ದಿನೇಶ್ ಶೆಟ್ಟಿ ಕೊಟಿಂಜ, ತರಗತಿದ ಗುರುಕುಲಾಯಿನ ಶೇಖರ ಶೆಟ್ಟಿಗಾರ್ ಬೊಕ್ಕ ಯಕ್ಷ ಯೋಧಾಸ್ ಪದಾಧಿಕಾರಿಲು ತುಡರ್ ಅರ್ಲಾದ್ ಪಂತೊದ ಉದಿಪನ ಮಲ್ತೆರ್. ಯುಎಇಡ್ ಇಪ್ಪುನ 12 ಕರ್ನಾಟಕ ಪರ ತಂಡಲು ಪಂತೊಡ್ ಪಾಲ್ ಪಡೆದಿತ್ಂಡ್. ಪ್ರತಿ ತಂಡ ಮೂಜಿ ಮೂಜಿ ಲೀಗ್ ಪಂತೊ ಮುಗಿತ್ ದ್, ಅಕೇರಿದ ಪಂತೊಗ್ ಕಟೀಲ್ ಫ್ರೆಂಡ್ಸ್ ಎ. ಬೊಕ್ಕ ಎಲಿಗೆಂಟ್ಸ್ ಕುಡ್ಲ ತಂಡ ಬೈದಿತ್ಂಡ್.

ಎಡ್ಡೆ ಫೈಟ್ ಕೊರ್ನ ಈ ತಂಡಡ್ ಕಟೀಲ್ ಫ್ರೆಂಡ್ಸ್ ಎ. ತಂಡ YPL-2022 ರಡ್ಡನೇ ತಾನಗ್ ಖುಷಿ ಆಂಡ, ಎಲಿಗೆಂಟ್ಸ್ ಕುಡ್ಲ ತಂಡ YPL-2022 ಚಾಂಪಿಯನ್ಸ್ ಟ್ರೋಫಿನ್ ಪಡೆತ್ಂಡ್. ಮ್ಯಾನ್ ಆಫ್ ದ ಮ್ಯಾಚ್ ಸಲ್ಮಾನ್ (ಎಲಿಗೆಂಟ್ಸ್), ಸರಣಿ ಶ್ರೇಷ್ಠ ಆದ್ ಸಫ್ವಾನ್ (ಎಲಿಗೆಂಟ್ಸ್), ಎಡ್ಡೆ ಬೌಲರ್ ಆದ್ ನೀಯಝ್ (ಕಟೀಲ್), ಬೆಸ್ಟ್ ಬ್ಯಾಟ್ಸ್ ಮನ್ ವಿಶ್ವ (ಕಟೀಲು) ಬೊಕ್ಕ ಎಡ್ಡೆ ಆಟಗಾರೆರಾದ್ ಹಂದಾನ್ ಒಡಿಪು (ಕಟೀಲು) ಫಲಕನ್ ಪಡೆತೆರ್.

ಇನಾಮು ಕೊರ್ಪುನ ಬೊಕ್ಕ ಸಮಾರೋಪ ಲೇಸ್ ಡ್ ಪಂತೊದ ಮಹಾಪೋಷಕೆರಾಯಿನ ಅಕ್ಮೇ ಬಿಲ್ಡಿಂಗ್ ಮೆಟೀರಿಯಲ್ಸ್ ದ ಹರೀಶ್ ಶೇರಿಗಾರ್, ಭೀಮಾ ಜ್ಯುವೆಲ್ಲರ್ಸ್ ದ ಯು. ನಾಗರಾಜ ರಾವ್, ದುಬೈ ಸೋರ್ಸ್ ದ ಹರೀಶ್ ಬಂಗೇರ, ಮೋಸೊಕೋ ಶಿಫಿಂಗ್ ದ ಫ್ರಾಂಕ್ ಫೆರ್ನಾಂಡೀಸ್, ನಂಜೆ ಯಾಟ್ಚ್ ದ ಸಂದೀಪ್ ರೈ ನಂಜೆ, ದುಮೆಕ್ ದ ದಿನೇಶ್ ಶೆಟ್ಟಿ ಕೊಟಿಂಜ, ಉದ್ಯಮಿ ರಶ್ಮಿಕಾಂತ್ ಶೆಟ್ಟಿ, ಬ್ರಿಟಾನಿಯಾದ ದುಬೈದ ವಾಸು ಕುಮಾರ್ ಶೆಟ್ಟಿ, ಕನ್ನಡ ಚಿತ್ರ ನಿರ್ದೇಶಕೆರ್ ಸೌರಭ್ ಕುಲಕರ್ಣಿ, ಯಕ್ಷಗಾನ ತರಗತಿದ ಗುರುಕುಲುಲಾಯಿನ ಶೇಖರ್ ಶೆಟ್ಟಿಗಾರ್ ಮೊಕುಲು ಗೆಂದಿನ ತಂಡಲೆಗ್ ಇನಾಮ್ ಕೊರ್ದು ಪಂತೊಗ್ ಬೊಕ್ಕ ಕ್ರೀಡಾಪಟುಲೆಗ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಯಕ್ಷ ಯೋಧಾಸ್ ದ ಬಾಲಕೃಷ್ಣ ಶೆಟ್ಟಿ, ಪ್ರಕಾಶ್ ಪಕಳ, ಸಂದೀಪ್ ಶೆಟ್ಟಿ ಕೊಟಿಂಜ, ಶರತ್ ಕುಡ್ಲ, ಬಾಲಕೃಷ್ಣ ಶೆಟ್ಟಿಗಾರ್, ರಮಾನಂದ, ಪ್ರಖ್ಯತ್ ಶೆಟ್ಟಿ, ವಿಕೇಶ್ ಶೆಟ್ಟಿ, ಗಗನ್ ಶೆಟ್ಟಿ, ಕೌಶಿಕ್, ಸಚ್ಚು ಕುಲಾಲ್, ಪ್ರವೀಣ್, ಜೀವನ್, ಚೆರಿ, ಪ್ರೀತೇಶ್, ಶ್ರೇಯಸ್ ಆಚಾರ್ಯ, ಪ್ರಥೀತ್, ಅವಿನಾಶ್, ಶೇಖರ್ ಶೆಟ್ಟಿ, ಭಾಸ್ಕರ್, ಸತೀಶ್, ಕಿಶನ್, ಜೀವನ್ ಕುಲಾಲ್, ಸೀತಾರಾಮ ಶೆಟ್ಟಿ, ಸಂಪತ್ ಶೆಟ್ಟಿ, ಶಿವ ಕುಮಾರ್, ಬಾಲರಾಜ್ ಶೆಟ್ಟಿ, ಪ್ರಥ್ವೀನ್ ಬೊಕ್ಕ ಯಕ್ಷಗಾನ ಅಭ್ಯಾಸ ಕೇಂದ್ರ ಯುಎಇದ ಜೋಕುಲು ಬೊಕ್ಕ ಪೋಷಕೆರ್ ಇತ್ತೆರ್. ರಾಜೇಶ್ ಕುತ್ತಾರ್, ಗಿರೀಶ್ ನಾರಾಯಣ ಬೊಕ್ಕ ಶೇಖರ ಶೆಟ್ಟಿಗಾರ್ ಲೇಸ್ ನ್ ಸುಧಾರಿಕೆ ಮಲ್ತೆರ್. ಬಾಲಕೃಷ್ಣ ಶೆಟ್ಟಿ ಎದ್ಕೊನಿಯೆರ್. ದಿನೇಶ್ ಶೆಟ್ಟಿ ಕೊಟಿಂಜ ಸೊಲ್ಮೆ ಸಂದಾಯೆರ್.

✒️ ವಿಜಯಕುಮಾರ್ ಶೆಟ್ಟಿ
ಗಾಣದಮೂಲೆ ಮಜಿಬೈಲ್ (ದುಬೈ)

Cricket match YPL -2022 under the auspices of Dubai Yaksha Yodhas

Dubai: The second annual YPL -2022 cricket match under the auspices of Yaksha Yodhas Dubai was held at Sharjah in Dubai

Yaksha Abyasa Kendra UAE correspondent Dinesh Shetty Kotinje ,instructor Shekhar Shettigar and members of the Yaksha Yodhas inaugurated the event.12 Kannadiga teams participated in the event.The final match was played between Kateel friends association and Elegants Kudla and Elegants Kudla won the YPL 2022 trophy.

Man of the match Salman ( Elegants), Safvan ( Elegants) was the man of the series,best bowler Niyaz(Kateel) , Best batsman Vishwa(Kateel) best player Handan Udupi ( Kateel) .

At the closing ceremonies the main sponsor Harish Sherigar of Akmay Building Materials,
U Nagraj Rao of Bheema jewellers, Harish Bangera of Dubai Stores, Frank Fernandes of Mosoco Shipping Sandeep Rai of Nanjay Yaucth ,Dinesh Shetty of Dumac, entrepreneur Lakshmi Kanth Shetty, Vasu Kumar Shetty, Kannada film director Saurabh Kulkarni and others participated.Members of Yaksha Yodhas and students of Yakshagana Tarabathi Kendra UAE along with their parents participated in the program.Girish Narayan and Shekhar Shettigar hosted the program.

ಮುಲ್ಕಿಗ್ ಬತ್ತ್ಂಡ್ ಬ್ರಿಟನ್ ರಾಣಿನ ಮೋಕೆದ ನಾಯಿ ವೆಲ್ಶ್ ಕೊರ್ಗಿದ ಬಿದೆ!

ಮುಲ್ಕಿ: ಬ್ರಿಟನ್ ಅರಮನೆತ ರಾಣಿ ಮೋಕ್ಯೆಡ್ ತಾಂಕುನ ನಾಯಿ ವೆಲ್ಶ್ ಕೊರ್ಗಿದ ಕಿನ್ನಿಲು ಇತ್ತೆ ಮುಲ್ಕಿಗ್ ಬೈದ್ಂಡ್.

ಮುಲ್ಕಿದ ರಾಯಲ್ ಪೆಟ್ ಶಾಪ್ ದಕುಲು ನೆನ್ ಡೆಲ್ಲಿದ ಮುಖೇನ ಮುಲ್ಕಿಗ್ ಕನಪಾದೆರ್. ನೆತ್ತ ಬಿಲೆ 1.5 ಲಕ್ಷ ರೂ.ಮುಟ್ಟ ಉಂಡು. ವೆಲ್ಶ್ ಕೊರ್ಗಿ ಜಗತ್ತ್ ಡೇ ಬುದ್ಧಿವಂತ ನಾಯಿಲೆಡ್ 11 ನೇ ತಾನ ಪಡೆತ್ಂಡ್.

ರಡ್ಡನೇ ರಾಣಿ ಎಲಿಜಬೆತ್ ರಾಯಲ್ ಕೊರ್ಗಿನ್ 70 ವರ್ಷರ್ದಿಂಚ ತಾಂಕೊಂದು ಬೈದೆರ್. ಬ್ರಿಟನ್ ದೇಶಡ್ ಕೊರ್ಗಿಗ್ ಬೇಡಿಕೆ ಜಾಸ್ತಿ ಉಂಡು. ದಾಯೆ ಪಂಡ ನೆತ್ತ ಬುದೆ ಕಡಿಮೆ ಆವೊಂದುಂಡು. ಅಮೆರಿಕನ್ ಕೆನ್ ಕ್ಲಬ್ ರ್ದ್ 2020 ಟ್ ನಡತಿನ ಪ್ರದರ್ಶನಡ್ ಉಂದು ಮಸ್ತ್ ಬುದ್ಧಿವಂತ ತಳಿ ಪನ್ಪಿನ ಬಿರುದುನ್ ಪಡೆತ್ಂಡ್.

ಕಾಂಗ್ರೆಸ್ ರ್ದ್ 36 ಜನ ಸದಸ್ಯೆರ್ನ ಚುನಾವಣಾ ಸಮಿತಿ ರಚನೆ

ಡೆಲ್ಲಿ: ವಿಧಾನಸಭೆ ಚುನಾವಣೆಗ್ ಸಿದ್ದತೆ ನಡಪಾವೊಂದು ಇಪ್ಪುನ ಕಾಂಗ್ರೆಸ್ 36 ಜನ ಸದಸ್ಯೆರ್ ಇಪ್ಪುನ ಚುನಾವಣಾ ಸಮಿತಿ ರಚನೆ ಮಲ್ದ್ಂಡ್.

ಸಮಿತಿಡ್ ಕೆಪಿಸಿಸಿ ಅಧ್ಯಕ್ಷೆರ್ ಡಿ.ಕೆ ಶಿವಕುಮಾರ್, ಪ್ರತಿಪಕ್ಷ ನಾಯಕೆರ್ ಸಿದ್ದರಾಮಯ್ಯ, ಪರಿಷತ್ ಪ್ರತಿಪಕ್ಷ ನಾಯಕೆರ್ ಬಿ.ಕೆ ಹರಿಪ್ರಸಾದ್ ಸೇರ್ದ್ 36 ಜನ ಸಮಿತಿದ ಸದಸ್ಯೆರಾತೆರ್. ನೆಟ್ ಸಿದ್ದರಾಮಯ್ಯ ಮೆರೆನ ಆಪ್ತೆರೆಗ್ ಬೊಕ್ಕ ಮಾಜಿ ಸ್ಪೀಕರ್ ರಮೇಶ್ ಕುಮಾರ್ ಗ್ ತಾನ ತಿಕ್ ದಿಜಿ.

ಶ್ರೀ ಗೆಜ್ಜೆಗಿರಿ ಮೇಳಗ್ ದೇವೆರೆನ ಬೊಳ್ಳಿ ಪೀಠ ಕೊರಿನ ಉದ್ಯಮಿ ಜಯಂತ ನಡುಬೈಲ್

ಕಾರಣಿಕದ ಗೆಜ್ಜೆಗಿರಿ ಕ್ಷೇತ್ರದ ನೇಮೋಚ್ಚಯ, ಬಾಲಾಲಯ ಪ್ರತಿಷ್ಠೆ, ಶಿಲಾನ್ಯಾಸ, ಪುನರುತ್ಥಾನ, ಬ್ರಹ್ಮಕಲಶ ಉಚ್ಚಯ, ವಾರ್ಷಿಕ ಜಾತ್ರೆ ಉಚ್ಚಯಗ್ ಬೊಕ್ಕ ಕ್ಷೇತ್ರದ ಮಾತ ಕೆಲಸ ಕಾರ್ಯಲೆಗ್ ನಿರಂತರವಾದ್ ಬೆಂದೊಂದು ಇಪ್ಪುನ ಕ್ಷೇತ್ರದ ಅಧ್ಯಕ್ಷೆರಾದ್, ಗೌರವಾಧ್ಯಕ್ಷೆರಾದ್, ಕೊಡುಗೈ ದಾನಿಯಾದ್ ಕ್ಷೇತ್ರಗ್ ಸೇವೆ ಸಂದಾವೊಂದು ಬತ್ತಿನ ಉದ್ಯಮಿ, ಸಮಾಜಸೇವಕೆರ್ ಜಯಂತ ನಡುಬೈಲು ಮೇರ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಯಕ್ಷಗಾನ ಮೇಳೊಗು ದೇವೆರ್ನ ಬೊಳ್ಳಿದ ಪೀಠದ ವೆಚ್ಚೊನು ಕೊರ್ದು ಮಾತೆರ್ನಲ ಮೆಚ್ಚಿಗೆಗ್ ಪಾತ್ರರಾತೆರ್.

ನವಂಬರ್ 27 ಕ್ ಗೆಜ್ಜೆಗಿರಿ ಕ್ಷೇತ್ರಡ್ ನಡತಿನ ಶ್ರೀ ಗೆಜ್ಜೆಗಿರಿ ಮೇಳದ ಉದಿಪನ ಬೊಕ್ಕ ದೇವೆರೆನ ಸುರುತ ಸೇವೆಯಾಟ ಮೇಳದ ದೇವೆರೆನ ಸುರುತ ಪೂಜೆ ಸತ್ಯಧರ್ಮ ಚಾವಡಿಡ್ ನಡತಿನ ಪೊರ್ತುಡು ಪೊಸತಾದ್ ನಿರ್ಮಾಣ ಮಲ್ತಿನ 3.80 ಲಕ್ಷ ರೂಪಾಯಿ ಕರ್ಚಿದ ದೇವೆರೆನ ಬೊಳ್ಳಿದ ಪೀಠ ಅರ್ಪಣೆ ಮಲ್ದಿತ್ತೆರ್. ಬೊಲ್ಲಿ ಪೀಠದ ಆಕರ್ಷಣೆ ತೂದು ಭಕ್ತಿ ಪರವಶೆರಾದ್ ಆ ಪೀಠದ 3.80ಲಕ್ಷ ರೂ.ನ್ ತಾನ್ ಪಾಡುವೆ ಪಂದ್ ಶಕ್ತಿಲೆನ ಎದುರು ಘೋಷಣೆ ಮಲ್ತ್ ದ್ ಅವ್ವೇ ಪೊರ್ತುಡು 5000 ರೂ. ಕಾಸ್ ನ್ ಬಚ್ಚಿರೆ ಬಜ್ಜೆಯಿ ದೀದ್ ಮೇಳದ ವ್ಯವಸ್ಥಾಪಕೆರ್ ಬೊಕ್ಕ ಸಂಚಾಲಕೆರೆಗ್ ಕೊರ್ದಿತ್ತೆರ್.

“ಮಗಳು” ಕನ್ನಡ ಪಿಕ್ಚರ್ ಜನವರಿಡ್ ರಿಲೀಸ್

“ಮಗಳು” ಕನ್ನಡ ಪಿಕ್ಚರ್ ಜನವರಿಡ್ ರಿಲೀಸ್ ಮಲ್ತೊಂದುಲ್ಲ ಪಂದ್ ನಿರ್ದೇಶಕೆರ್ ಬೊಕ್ಕ ಹೀರೋ ಆದ್ ನಟನೆ ಮಲ್ತಿನ ಥೋಮಸ್ ಎಂಎಂ ತೆರಿಪಾದೆರ್.

ಉಂದು ಮೆರೆನ ಸುರುತ ಪಿಕ್ಚರ್ . ನೆಟ್ ಜೋಕುಲೆನ ಭವಿಷ್ಯದ ಬಗೆ ಬೊಕ್ಕ ಇಲ್ಲದಕ್ಲೆನ ಬಗೆ ಉಂಡು. ಅತ್ತಂದೆ ನಮ್ಮ ಮನಸ್ಸ್ ಗ್ ಮುಟ್ಟುನಂಚಿನ ಕೆಲವು ಸಂಗತಿ ಈ ಪಿಕ್ಚರ್ ಡ್ ಉಂಡು.
“ಮಗಳೇ ಈ ಎಲ್ಯ ಇಪ್ಪುನಗ ಯಾನ್ ನಿನ್ನ ಕೈಕ್ ಪೆನ್ಸಿಲ್ ದೆತ್ತ್ ದ್ ಕೊರಿಯೆ, ದಾಯೆ ಪಂಡ ತಪ್ಪಿತ್ತ್ಂಡ ಸರಿ ಮಲ್ತೊನಿಯೆರೆ ಆಪುಂಡು ಪಂದ್…! ಅವ್ವೇ ಈ ಮಲ್ಲ ಆಯಿ ಬೊಕ್ಕ ಪೆನ್ ದೆತ್ ದ್ ಕೊರಿಯೆ, ದಾಯೆ ಪಂಡ ತಪ್ಪು ಇತ್ಂಡ ನನ ಸರಿ ಮಲ್ಪರೆ ಆಪುಜಿ ಮಗಲೇ ಪಂದ್..!!. ಮೆರೆನ ಈ ಒಂಜೊಂಜಿ ಸಂಭಾಷಣೆಗ್ಲಾ ಈ ಪಿಕ್ಚರ್ ಡ್ ಅರ್ಥ ಉಂಡು. ಅತ್ತಂದೆ ಕುಟುಂಬದಕುಲು ಒಟ್ಟಿಗೆ ಪೋದು ತೂಪುನ ಪಿಕ್ಚರ್ ಉಂದು ಆತ್ಂಡ್ ಪಂದ್ ಆರ್ ಪಂತೆರ್.

Kannada movie ” Magalu” to be released in January

The Kannada movie ” Magalu” will be released in January said Thomas M A the director and lead actor of the movie. This is his first release and he said the movie harped on the future of our next generation and touched on topics that is very close to our hearts

The movie has excellent dialogue that reaches out to the audience in a strong way with blunt truth.It is a clean family movie to be watched together by all in the family.

ಖ್ಯಾತ ಸಂಗೀತ ನಿರ್ದೇಶಕೆರ್ ಮನೋ ರಂಜನ್ ಪ್ರಭಾಕರ್ ದೇವೆರೆ ಪಾದ ಸೇರಿಯೆರ್

ಬೆಂಗ್ಲೂರ್: ಪುಗರ್ತೆದ ಸಂಗೀತ ನಿರ್ದೇಶಕೆರ್ ಮನೋ ರಂಜನ್ ಪ್ರಭಾಕರ್ ಮೇರ್ ದೇವೆರೆ ಪಾದ ಸೇರಿಯೆರ್.

ಮೇರ್ ಕರಿನ ಕೆಲವು ದಿನೊರ್ದಿಂಚಿ ಹುಷಾರ್ ಇಜ್ಜಂದೆ ಇತ್ತೆರ್. 70ತ ದಶಕದ ಸುರುಟ್ ಸಂಗೀತ ಕ್ಷೇತ್ರಗ್ ಕಾರ್ ದೀನ ಮೇರ್ ಸಂಗೀತಗಾರೆರೆನ ಕುಟುಂಬಡ್ ಪುಟ್ಟುದೆರ್. ಇಂಚಾದ್ ಎಲ್ಯರ್ದೆ ಸಂಗೀತಡ್ ಇತ್ತೆರ್. ಮೆರೆನ 800ಕ್ ಹೆಚ್ಚ ಆಲ್ಬಂಲು ಉಂಡು. ಅತ್ತಂದೆ ಸಂಗೀತ ಶಿಕ್ಷಕೆರಾದ್ ಸೇವೆ ಸಂದಾದೆರ್. ಮೆರೆಗ್ ಬೊಡೆದಿ, ಮಗೆ, ಮಗಲ್ ಉಲ್ಲೆರ್.

ಗೋಂದೊಳು, ಮೋಕೆದ ಮದಿಮಾಲ್, ಕಾಪ ನಾಟಕೊಲೆಗ್ ಒಡಿಯೂರು ತುಳು ನಾಟಕ ಪಂತೊದ ಸುರೂತ್ತ 3 ಇನಾಮು

ಒಡಿಯೂರು ಶ್ರೀ ಗುರುದೇವದತ್ತ ಸಂಸ್ಥಾನದ ರಾಜಾಂಗಣಡ್ ಶ್ರೀ ಶ್ರೀ ಗುರುದೇವಾನಂದ ಸ್ವಾಮಿಲೆನ ದಿವ್ಯ ಮಾರ್ಗದರ್ಶನಡ್ ಡಿಸೆಂಬರ್ 1ರ್ದ್ 7 ಮುಟ್ಟ ಶ್ರೀದತ್ತ ಜಯಂತಿ ಉಚ್ಚಯ, ಶ್ರೀದತ್ತ ಮಹಾಯಾಗ ಸಪ್ತಾಹ, ಹರಿಕಥಾ ಸತ್ಸಂಗ ಸಪ್ತಾಹ, ಒಡಿಯೂರು ತುಳು ನಾಟಕ ಉಚ್ಚಯ, ತುಳು ನಾಟಕ ಪಂತೊ ನಡತ್ಂಡ್.

ಈ ಲೇಸ್ ದ ತುಳು ನಾಟಕ ಪಂತೊಡು ದ.ಕ., ಒಡಿಪು, ಕಾಸ್ರೋಡು ಜಿಲ್ಲೆದ 16 ನಾಟಕ ತಂಡದಕುಲು ಪಾಲ್ ಪಡೆತೆರ್.
*ಗೋಂದೊಳುಗು ಸುರೂತ್ತ ಇನಾಮು:*
ಪ್ರೊ. ಅಮೃತ ಸೋಮೇಶ್ವರ ರಚನೆ ಮಲ್ತಿನ, ವಿದ್ದು ಉಚ್ಚಿಲ್ ನಿರ್ದೇಶನದ, ಜರ್ನಿ ಥೇಟರ್ (ರಿ.) ಕುಡ್ಲ ಮೊಕ್ಲೆನ ನಾಟಕ *ಗೋಂದೊಳು* ಗ್ ಸುರುತ ಇನಾಮು ಬೊಕ್ಕ ನವೀನ್ ಸಾಲ್ಯಾನ್ ಪಿತ್ರೋಡಿ ರಚನೆ ಮಲ್ತಿನ, ಪ್ರಭಾಕರ ಆಚಾರ್ಯ ಮೂಡುಬೆಳ್ಳೆ ನಿರ್ದೇಶನದ, ಕಲಾಚಾವಡಿ (ರಿ.), ಅಂಬಲಪಾಡಿ ಮೊಕ್ಲೆನ ನಾಟಕ
*ಮೋಕೆದ ಮದಿಮಾಲ್* ಗ್ ರಡ್ಡನೇ ಇನಾಮು ಬೊಕ್ಕ ಬಾಲಕೃಷ್ಣ ಶಿಬಾರ್ಲ ರಚನೆ ಮಲ್ತಿನ, ದಿವಾಕರ ಕಟೀಲ್ ನಿರ್ದೇಶನದ, ಸುಮನಸ ಕೊಡವೂರು ಮೊಕ್ಲೆನ ನಾಟಕ *ಕಾಪ* ಗ್ ಮೂಜಿನೇ ಇನಾಮು ತಿಕ್ ದ್ಂಡ್.
*ಎಡ್ಡೆ ನಿರ್ದೇಶನ:*
ಸುರುತ: ವಿದ್ದು ಉಚ್ಚಿಲ್ ನಾಟಕ: ಗೋಂದೊಳು (ಜರ್ನಿ ಥೇಟರ್ ಕುಡ್ಲ)
ರಡ್ಡನೇ: ದಿವಾಕರ ಕಟೀಲು ನಾಟಕ: ಕಾಪ – (ಸುಮನಸ ಕೊಡವೂರು)
ಮೂಜಿನೇ: ರಮೇಶ್ ಆಚಾರ್ಯ ನೂರಾಲ್‍ಬೆಟ್ಟು
ನಾಟಕ: ಬಾಕಿಲ್ ದೆಪ್ಪೊಡ್ಚಿ (ಘಳಿಗೆ ಕಾಲವಿದೆರ್, ನೂರಾಲ್‍ಬೆಟ್ಟು)
*ಕಥಾನಾಯಕೆ:*
ಸುರುತ : ಶರತ್ ಶೆಟ್ಟಿ ಕೆಮ್ತೂರು (ಚಂದ್ರಶೇಖರ) ನಾಟಕ: ಮೋಕೆದ ಮದಿಮಾಲ್ (ಕಲಾಚಾವಡಿ (ರಿ.) ಅಂಬಲಪಾಡಿ)
ರಡ್ಡನೇ: ಅಕ್ಷತ್ ಅಮೀನ್(ಗಿರಿ)
ನಾಟಕ: ಕಾಪ (ಸುಮನಸ ಕೊಡವೂರು)
ಮೂಜಿನೇ: ಯುವ ಶೆಟ್ಟಿ (ರಾಜ್)
ನಾಟಕ: ನಾಲಯಿ ಮಗುರುಜಿ (ಕಲಾಶ್ರೀ ಬೆದ್ರ ಕುಸಾಲ್ದ ಕಲಾವಿದೆರ್)
*ಕಥಾನಾಯಕಿ:*
ಸುರುತ: ಸತ್ಯಾ ಜೀವನ್ ಸೋಮೇಶ್ವರ(ದೇಬೆ) ನಾಟಕ: ಗೋಂದೊಳು (ಜರ್ನಿ ಥೇಟರ್ (ರಿ.), ಕುಡ್ಲ)
ರಡ್ಡನೇ: ಅಶ್ವಿನಿ ಸುವರ್ಣ(ಜಾಹ್ನವಿ)
ನಾಟಕ: ನಾಲಯಿ ಮಗುರುಜಿ (ಕಲಾಶ್ರೀ ಬೆದ್ರ ಕುಸಾಲ್ದ ಕಲಾವಿದೆರ್)
ಮೂಜಿನೇ: ಶ್ರಾವ್ಯ ಶೆಟ್ಟಿ ಬನ್ನಂಜೆ(ಸಪ್ನ)
ನಾಟಕ: ಮೋಕೆದ ಮದಿಮಾಲ್ (ಕಲಾಚಾವಡಿ (ರಿ.) ಅಂಬಲಪಾಡಿ)
*ಹಾಸ್ಯನಟೆ:*
ಸುರುತ: ಪ್ರಭಾಕರ ಆಚಾರ್ಯ(ಗಂಗು)
ನಾಟಕ: ಮೋಕೆದ ಮದಿಮಾಲ್ (ಕಲಾಚಾವಡಿ ಅಂಬಲಪಾಡಿ)
ರಡ್ಡನೇ: ರಮೇಶ್ ಆಚಾರ್ಯ(ಪಾಂಡು)
ನಾಟಕ: ಬಾಕಿಲ್ ದೆಪ್ಪೊಡ್ಚಿ (ಘಳಿಗೆ ಕಾಲವಿದೆರ್, ನೂರಾಲ್‍ಬೆಟ್ಟು)
ಮೂಜಿನೇ: ದಕ್ಷತ್ ಕಾಣಿಚ್ಚಾರು(ಪಾಂಡುರಂಗ)ನಾಟಕ: ಸತ್ಯ ಗೊತ್ತಾನಗ (ಶ್ರೀವಾರಾಹಿ ಯುವಕ ಸಂಘ, ಉಡಲ್‍ ಕಲಾವಿದೆರ್, ಕನ್ಯಾನ)
*ಖಳನಾಯಕೆ:*
ಸುರುತ: ಸುನಿಲ್ ಪಲ್ಲಮಜಲು(ಪೆರ್ಗಡೆ)
ನಾಟಕ: ಗೋಂದೊಳು (ಜರ್ನಿ ಥೇಟರ್ ಕುಡ್ಲ)
ರಡ್ಡನೇ: ಪ್ರತೀಕ್ ಸಾಲ್ಯಾನ್(ಶಂಕರ)
ನಾಟಕ: ನಾಲಯಿ ಮಗುರುಜಿ – (ಕಲಾಶ್ರೀ ಬೆದ್ರ ಕುಸಾಲ್ದ ಕಲಾವಿದೆರ್)
ಮೂಜಿನೇ: ನಝೀರ್ ಕೊಣಾಜೆ(ಫೈನಾನ್ಸ್ ರಾಜ)
ನಾಟಕ: ಕಟ್ಟೆದ ಗುಳಿಗೆ ಕೈಬುಡಯೆ (ಮಂಗಳಾ ಕಲಾವಿದೆರ್, ಮಂಗಳಾದೇವಿ)
*ಪೋಷಕ ನಟೆ:*
ಸುರುತ: ಕೇಶವ ಆಚಾರ್ಯ ನೆಲ್ಲಿಕಾರ್ (ದೇಜಪ್ಪ ಮಾಸ್ಟ್ರು)
ನಾಟಕ: ಬಾಕಿಲ್ ದೆಪ್ಪೊಡ್ಚಿ (ಘಳಿಗೆ ಕಾಲವಿದೆರ್, ನೂರಾಲ್‍ಬೆಟ್ಟು)
ರಡ್ಡನೇ: ಅರುಣ್ ಶೆಟ್ಟಿ ಜಪ್ಪು(ಕೊರಗಪ್ಪ)
ನಾಟಕ: ಕಟ್ಟೆದ ಗುಳಿಗೆ ಕೈಬುಡಯೆ (ಮಂಗಳಾ ಕಲಾವಿದೆರ್, ಮಂಗಳಾದೇವಿ)
ಮೂಜಿನೇ: ನಿತೇಶ್ ಕೊರಿಯಾ(ಕರಿಯ)
ನಾಟಕ: ಕಾಪ (ಸುಮನಸ ಕೊಡವೂರು)
*ಪೋಷಕ ನಟಿ:*
ಸುರುತ: ಸುಗಂಧಿ ಉಮೇಶ್ ಕಲ್ಮಾಡಿ (ರಾಮಕ್ಕ)
ನಾಟಕ: ಪಟ್ಟೆ ತತ್ತ್ಂಡ (ನಮತುಳುವೆರ್ ಕಲಾಸಂಘಟನೆ, ಮುದ್ರಾಡಿ)
ರಡ್ಡನೇ: ಹರಿಣಿ ಪ್ರಕಾಶ್ ಪಕಳ (ರೇಖಾ)
ನಾಟಕ: ಸತ್ಯ ಗೊತ್ತಾನಗ (ಶ್ರೀವಾರಾಹಿ ಯುವಕ ಸಂಘ, ಉಡಲ್‍ ಕಲಾವಿದೆರ್, ಕನ್ಯಾನ)
*ಸಂಗೀತ:*
ಸುರುತ: ಮೇಘನಾ ಕುಂದಾಪುರ
ನಾಟಕ: ಗೋಂದೋಳು (ಜರ್ನಿ ಥೇಟರ್ ,ಕುಡ್ಲ)
ರಡ್ಡನೇ: ತಂಗವೇಲು ಕೊಯಿಲ
ನಾಟಕ: ಬಾಕಿಲ್ ದೆಪ್ಪೊಡ್ಚಿ (ಘಳಿಗೆ ಕಾಲವಿದೆರ್, ನೂರಾಲ್‍ಬೆಟ್ಟು)
ಮೂಜಿನೇ: ದಿವಾಕರ ಕಟೀಲು
ನಾಟಕ: ಕಾಪ (ಸುಮನಸ ಕೊಡವೂರು)
*ರಂಗವಿನ್ಯಾಸ:*
ಪಟ್ಟೆ ತತ್ತ್ಂಡ (ನಮ ತುಳುವೆರ್ ಕಲಾ ಸಂಘಟನೆ, ಮುದ್ರಾಡಿ)
*ಶಿಸ್ತುಬದ್ಧ ತಂಡ:*
ಶ್ರೀ ವಾರಾಹಿ ಯುವಕ ಸಂಘ, ಉಡಲ್ ಕಲಾವಿದೆರ್, ಕನ್ಯಾನ
*ಪ್ರತಿ ನಾಟಕದ ಶ್ರೇಷ್ಠ ನಟೆ:*
ದಿನೇಶ್ ಕುಂಪಲ (ದೇವೇಂದ್ರ)
ನಾಟಕ: ಅಹಲ್ಯೆ – (ಸಂಗಮ ಕಲಾವಿದೆರ್, ಕುಡ್ಲ)
ರವಿ ಎಂ.ಎಸ್. ವರ್ಕಾಡಿ (ರಂಜಿತ್)
ನಾಟಕ: ಸತ್ಯ ಗೊತ್ತಾನಗ (ಶ್ರೀವಾರಾಹಿ ಯುವಕ ಸಂಘ, ಉಡಲ್‍ ಕಲಾವಿದೆರ್, ಕನ್ಯಾನ)
ಹರ್ಷಿತಾ ಜೋಗಿ ಮಿತ್ತನಡ್ಕ (ಸ್ವಾತಿ)
ನಾಟಕ: ಅಂಚಾಯಿನೆಟ್ ಇಂಚಾಂಡ್ (ಸಂತೋಷ್ ಕಲಾವಿದೆರ್, ಪಾವಳ, ವರ್ಕಾಡಿ)
ಶ್ರೀನಿವಾಸ ಶೆಟ್ಟಿ ವಿಟ್ಲ (ಸಾಯಿಬ)
ನಾಟಕ: ಅಮರ್ ಸಿರಿಕುಲು (ಬಂಟವಾಳದ ಕಲಾವಿದೆರ್)
ರಾಜು ಸಾಲ್ಯಾನ್ ಕೋಜಕುಳಿ (ಗೋಪಾಲ) ನಾಟಕ: ಮೋಕೆದ ಮದಿಮಾಲ್ – (ರಂಗಚಾವಡಿ (ರಿ.), ಒಡಿಪು)
ರೋಹಿತ್ ಶೆಟ್ಟಿ(ಡಾ.ಮಧು)
ನಾಟಕ: ಬಯ್ಯಮಲ್ಲಿಗೆ (ಕೂಡ್ದಿ ಕಲಾವಿದರು, ಪೆರ್ಡೂರು)
ನಮಿತ ಅಳಪೆ(ನಮಿತ) ನಾಟಕ: ಕಟ್ಟೆದ ಗುಳಿಗೆ ಕೈ ಬುಡಯೆ (ಮಂಗಳ ಕಲಾವಿದೆರ್, ಮಂಗಳಾದೇವಿ)
ಸತೀಶ್ ಶೆಣೈ (ಅಲ್ಲಮಪ್ರಭು)
ನಾಟಕ: ಅಕ್ಕಮಹಾದೇವಿ (ಸರಕಾರಿ ನೌಕರರ ಕಲಾ ಬೊಕ್ಕ ಸಾಂಸ್ಕತಿಕ ಸಂಘ, ಕುಡ್ಲ)
ರಾಮಚಂದ್ರ ಶೆಟ್ಟಿಗಾರ್ ಸಾಣೂರು (ಆದಿಶೇಷ) ನಾಟಕ: ಬಾಕಿಲ್ ದೆಪ್ಪೊಡ್ಚಿ (ಘಳಿಗೆ ಕಾಲವಿದರು, ನೂರಾಲ್‍ಬೆಟ್ಟು)
ಚಂದ್ರಿಕಾ ವಿ.ಕೋಟ್ಯಾನ್ (ದುಗ್ಗಣ್ಣ ಕೊಂಡೆ)
ನಾಟಕ: ದೇವು ಪೂಂಜೆ (ಶ್ರೀ ಶಾರದಾ ಉಚ್ಚಯ ನಾಡಪರ್ಬ ಸಮಿತಿ, ಕೈರಂಗಳ)
ವಿಕಾಸ್(ರಾಮೇಗೌಡ) ನಾಟಕ: ಅಮರಸಂಗ್ರಾಮ (ಕುಕ್ಕೆಶ್ರೀ ಸರಕಾರಿ ಪದವಿಪೂರ್ವ ಕಾಲೇಜ್, ಸುಬ್ರಹ್ಮಣ್ಯ)
ಸಾಯಿನಾರಾಯಣ ಕಲ್ಮಡ್ಕ(ರೈಟರ್)
ನಾಟಕ: ಚೋಮನದುಡಿ (ಕಲಾಗ್ರಾಮ ಕಲ್ಮಡ್ಕ)
ಹರೀಶ್ ನೀಲಿಪಾಲ್ (ಕಾಂತು)
ನಾಟಕ: ಗೋಂದೊಳು (ಜರ್ನಿ ಥೇಟರ್ (ರಿ.),ಕುಡ್ಲ)
ಪ್ರವೀಣ್‍ಚಂದ್ರ ತೋನ್ಸೆ (ಬಾಣೆರೆ ಅಣ್ಣೆರ್)
ನಾಟಕ: ಕಾಪ (ಸುಮನಸ ಕೊಡವೂರು)
ಸುಕುಮಾರ ಮೋಹನ್ (ರಂಗಣ್ಣ)
ನಾಟಕ: ಪಟ್ಟೆ ತತ್ತ್ಂಡ (ನಮತುಳುವೆರ್ ಕಲಾಸಂಘಟನೆ, ಮುದ್ರಾಡಿ)
ಸಂದೀಪ್ ಶೆಟ್ಟಿ ರಾಯಿ (ಮೋಹನ)
ನಾಟಕ: ನಾಲಯಿ ಮಗುರುಜಿ – (ಕಲಾಶ್ರೀ ಬೆದ್ರ ಕುಸಾಲ್ದ ಕಲಾವಿದೆರ್)
*ಮೆಚ್ಚುಗೆ ಪಡೆಯಿನ ಪಾತ್ರಲು:*
ಮಹಿಮಾ (ಅಹಲ್ಯೆ)
ನಾಟಕ: ಅಹಲ್ಯೆ (ಸಂಗಮ ಕಲಾವಿದೆರ್ ಕುಡ್ಲ)
ಹೊನ್ನಪ್ಪ ಗೌಡ(ಚೋಮ) ನಾಟಕ: ಚೋಮನದುಡಿ
(ಕಲಾಗ್ರಾಮ ಕಲ್ಮಡ್ಕ)
ನಿತಿನ್ ಹೊಸಂಗಡಿ (ಶರತ್) ನಾಟಕ: ಅಂಚಾಯಿನೆಟ್ ಇಂಚಾಂಡ್ (ಸಂತೋಷ್ ಕಲಾವಿದೆರ್, ಪಾವಳ, ವರ್ಕಾಡಿ)
ಸಂತೋಷ್ (ವಾಮನ ಬಾಳಿಗ)
ನಾಟಕ: ಅಮರಸಂಗ್ರಾಮ (ಕುಕ್ಕೆಶ್ರೀ ಸರಕಾರಿ ಪದವಿಪೂರ್ವ ಕಾಲೇಜ್, ಸುಬ್ರಹ್ಮಣ್ಯ)
ಪ್ರವೀಣ್ ಮರ್ಕಮೆ (ಮಾರಪ್ಪ)
ನಾಟಕ: ನಾಲಯಿ ಮಗುರುಜಿ – (ಕಲಾಶ್ರೀ ಬೆದ್ರ ಕುಸಾಲ್ದ ಕಲಾವಿದೆರ್
ರಶ್ಮಿತಾ (ಶಾಂತಿ)
ನಾಟಕ: ಬಯ್ಯಮಲ್ಲಿಗೆ (ಕೂಡ್ದಿ ಕಲಾವಿದೆರ್, ಪೆರ್ಡೂರು)
ಅಕ್ಷತಾ ಮುದ್ರಾಡಿ (ಅಮ್ಮು) ನಾಟಕ: ಪಟ್ಟೆ ತತ್ತ್‍ಂಡ (ನಮತುಳುವೆರ್ ಕಲಾಸಂಘಟನೆ, ಮುದ್ರಾಡಿ)
*ಅತ್ಯುತ್ತಮ ನೃತ್ಯ:*
ಸುರಕ್ಷಾ ಶೆಟ್ಟಿ & ಸುದೀಕ್ಷಾ ಶೆಟ್ಟಿ
ನಾಟಕ: ಅಮರ್ ಸಿರಿಕುಲು (ಬಂಟವಾಳದ ಕಲಾವಿದೆರ್)
ಈ ನಾಟಕಡ್ ಶ್ರೀ ಮಹಾಬಲೇಶ್ವರ ಹೆಬ್ಬಾರ್ ಮೊಡಂಕಾಪು, ಶ್ರೀ ಮಂಜು ವಿಟ್ಲ, ಶ್ರೀ ಮಧು ಬಂಗೇರ ಕಲ್ಲಡ್ಕ ಮೊಕುಲು ತೀರ್ಪುಗಾರೆರಾದ್ ಇತ್ತೆರ್.

ಶಾಲೆದ ಅಭಿವೃದ್ಧಿಡ್ ಹಳೆ ವಿದ್ಯಾರ್ಥಿಲೆನ ಪಾತ್ರ ಮಲ್ಲೆ : ವಸಂತ್ ಬರ್ನಾಡ್

ಒವ್ವೇ ಶಾಲೆ ಆವು, ಸರಕಾರಿ ಆವಡ್ ಅನುದಾನಿತ ಆವಡ್. ಆ ಸಂಸ್ಥೆದ ಅಭಿವೃದ್ಧಿ ಆವೊಡು ಪಂದಾಂಡ ಆ ಸಂಸ್ಥೆಡ್ ಕಲ್ತಿನ ಹಳೆ ವಿದ್ಯಾರ್ಥಿಲು ಶಾಲೆದ ಮಿತ್ತ್ ಗೌರವ ಕೊರ್ದು ಶಾಲೆದ ಅಭಿವೃದ್ಧಿಗ್ ಬೆನೊಡಾಯಿನವು ಅಕ್ಲೆನ ಕರ್ತವ್ಯ ಪಂದ್ ಕೆಪಿಸಿಸಿ ಸದಸ್ಯೆರಾಯಿನ ಎಚ್ ವಸಂತ ಬರ್ನಾಡ್ ಪಂಡೆರ್.

ಮೇರ್ ಹಳೆಯಂಗಡಿ ಸಿಎಸ್ಐ ಆಂಗ್ಲ ಮಾಧ್ಯಮ ಶಾಲೆ ಬೊಕ್ಕ ಅನುದಾನಿತ ಯುಬಿಎಂಸಿ ಶಾಲೆ ಬೊಕ್ಕ ಅಂಗನವಾಡಿ ಕೇಂದ್ರದ ಒಟ್ಟುಸೇರಿಗೆಡ್ ವಾರ್ಷಿಕ ಉಚ್ಚಯ ಲೇಸ್ ದ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್. ಶಾಲೆಡ್ ಅವೆತೋ ಬಡಪತ್ತ್ ದ ಕಲ್ಪಾರ್ಥಿಲು ವಿದ್ಯಾರ್ಜನೆ ಮಲ್ತೊಂದು ಉಲ್ಲೆರ್. ಅಕ್ಲೆನ ವಿದ್ಯಾಭ್ಯಾಸಗ್ ಪೂರಕವಾಯಿನ ವ್ಯವಸ್ಥೆ ಮಲ್ಪರೆ ಹಳೆ ವಿದ್ಯಾರ್ಥಿಲು ಪ್ರಯತ್ನ ಮಲ್ಪೊಡು ಪಂದ್ ಪಂಡೆರ್.  ಲೇಸ್ ದ ಅಧ್ಯಕ್ಷತೆನ್ ಸಿಎಸ್ಐ ಚರ್ಚ್ ದ ಸಭಾ ಪಾಲಕೆರಾಯಿನ ರೆವೆರೆಂಡ್ ವಿನಯ ಲಾಲ್ ಬಂಗೇರ ಒಯಿಸ್ ದಿತ್ತೆರ್. ಈ ಪೊರ್ತುಡು ಹಳೆಯಂಗಡಿ ಪಂಚಾಯತ್ ಅಧ್ಯಕ್ಷೆರ್ ಪೂರ್ಣಿಮಾ, ವಕೀಲೆರಾಯಿನ ಡೇನಿಯಲ್ ದೇವರಾಜ್, ಲಯನ್ಸ್ ಅಧ್ಯಕ್ಷೆರ್ ರಶ್ಮಿ ಕನ್ನಡ ಇತ್ತೆರ್. ಮುಖ್ಯೋಪಾಧ್ಯಾಯೆರ್ ಐರಿನ್ ಕರ್ಕಡ ಎದ್ಕೊನಿಯೆರ್. ಎಂ.ಕೆ ಶಿವರುದ್ರಪ್ಪ ಸೊಲ್ಮೆ ಸಂದಾಯೆರ್.

ಶ್ರೀ ಕ್ಷೇತ್ರ ಕಪಿಲತೀರ್ಥದ ಇತಿಹಾಸ

ರಾಮಾಯಣ, ಮಹಾಭಾರತ ಇಂಚೆನೆ ಸುಮಾರ್ ಪುರಾಣಲೆಡ್ ವರ್ಣನೆ ಮಲ್ತ್ ದ್ ಇಪ್ಪುನ ದಕ್ಷಿಣ ಭಾರತದ ಸಹ್ಯಾದ್ರಿ ಖಂಡದ ಪಶ್ಚಿಮಘಟ್ಟ ಪರ್ವತ ಶ್ರೇಣಿಡ್ ಇಪ್ಪುನ ಈ ಪ್ರದೇಶನ್ ನಾಗರಖಂಡ, ಮಲೆಯಾಚಲ, ಮಧುವಂಕನಾಡು, ರಾಮ ಕ್ಷೇತ್ರ, ಅಗಸ್ತ್ಯಕ್ಷೇತ್ರ ಪಂದ್ ಲೆಪ್ಪುವೆರ್ ಪನ್ಪುನವು ಐತಿಹ್ಯ.

ಈ ಮಲೆಯಾಚಲ ಪ್ರದೇಶಡ್ ” ಕನಕಾಂಬ ” ಪನ್ಪುನ ಶಕ್ತಿ ದೇವಿನ ಮೂಲ ಸಾನಿಧ್ಯಡ್ ತೀರ್ಥರೂಪಿಣಿಯಾದ್ ಪರಪುನ ತುದೆನೇ ” ಕಪಿಲಾ ತುದೆ ” , ಈ ತುದೆ ಚಿಕ್ಕಮಗಳೂರು ಜಿಲ್ಲೆದ ಕೊಪ್ಪ ತಾಲೂಕ್ ದ ಕುದುರೆಗುಂಡಿ ಉಂಡು. ಈ ತುದೆ ಮೂಡಾಯಿಡ್ ಪುಟ್ಟುದು ಬಡಕಾಯಿಡ್ ಪರಪುನ ತುಂಗಾ ತುದೆನ್ ಸೇರುಂಡು. ಈ ತುದೆತ ದಂಡೆದ ಮಿತ್ತ್ ತಿಕ್ಕುನ ಬ್ರಹ್ಮವನಲೆಡ್ ಸೋಮೇಶ್ವರ, ಅಶ್ವಗುಂಡೇಶ್ವರ, ಕಪಿಲೇಶ್ವರ ಇಂಚ ಸುಮಾರ್ ಶಿವಾಲಯಲು ಅಸ್ತಿತ್ವಡ್ ಉಂಡು. ಜಮದಗ್ನಿ ಮಹರ್ಷಿ ಬೊಕ್ಕ ರೇಣುಕಾದೇವಿನ ಮಗೆ ಪರಶುರಾಮೆರ್ ಅರ್ಥಾತ್ ಭಾರ್ಗವ ರಾಮೆರ್ ಅಪ್ಪೆನ್ ಕೆರಿನ ದೋಷ ನಿವಾರಣೆಗಾದ್ ತೀರ್ಥಯಾತ್ರೆ ಮಲ್ಪುನಗ ಈ ಪವಿತ್ರ ಕಪಿಲತೀರ್ಥಡ್ ನಿತ್ಯ ಕರ್ಮಾನುಷ್ಠಾನದೊಟ್ಟಿಗೆ ಅಮ್ಮನ್ ಕೆರಿಯೆರೆ ಗಲಸಿನ ಪರಶು ( ಕೊಡಲಿ ) ನ್ ದೆಕ್ ದ್, ಶುದ್ಧ ಮಲ್ತ್ ದ್ ಮಣ್ಣ್ ಡ್ ಶಿವಲಿಂಗ ಮಲ್ತ್ ದ್, ಪೂಜೆ ಮಲ್ತಿನ ಬಗೆಟ್ ಇತಿಹಾಸ ಉಂಡು. ಅವ್ವೇ ಕಾಲಘಟ್ಟಡ್ ಭಗವತ್ಪಾದೆರಾಯಿನ ಪಂಚಾಚಾರ್ಯರೆನ ಶಿಷ್ಯರಾಯಿನ ಕಪಿಲ ಮಹಾಮುನಿ ಬೊಕ್ಕ ಅಗಸ್ತ್ಯ ಮಹಾಮುನಿ ಈ ಕ್ಷೇತ್ರಡ್ ಶಿವಾರ್ಚನೆ ಮಲ್ತಿನ ಕಾರಣಕ್ಕಾದ್ ಮುಲ್ಪ ಪೂಜೆ ಮಲ್ಪುನ ಈಶ್ವರನ್ ” ಕಪಿಲೇಶ್ವರ ” ಪಂದ್ ಲೆಪ್ಪುವೆರ್.

ನೆನ್ ತೆರಿನ ಕೆಳದಿ ಅರಸೆರ್, ಜೈನ ಸಾಮಂತೆರ್ ಮುಲ್ಪ ಶಿವಾಲಯ ಸ್ಥಾಪನೆ ಮಲ್ತ್ ದ್,ಪೂ ಪೂಜನೆ ಸುರು ಮಲ್ದೆರ್. ನೆಕ್ಕ್ ಸಾಕ್ಷಿ ಪನ್ಪಿಲೆಕ ಮುಲ್ಪ ನೂದೆರ್ದ್ ಹೆಚ್ಚ ವರ್ಷಲೆರ್ದ್ ಪೂಜೆ ಮಲ್ತೊಂದು ಇಪ್ಪುನ ಪುರಾತನ ಶಿಲಾಸ್ತಂಭಡ್ ವೀರಭದ್ರೇಶ್ವರ, ಕಾಲಭೈರವೇಶ್ವರ ದೇವೆರೆನ ಶಿಲ್ಪಾಕೃತಿ ಗೋಚರ ಆತ್ಂಡ್. ಅತ್ತಂದೆ ಈ ಜಾಗೆಡ್ ಸ್ವಚ್ಛತೆದ ಉತ್ಖನದ ಪೊರ್ತುಡು ಪಾಣಿಪೀಠ, ನಾಗರಕಲ್ಲುಲು,ಪಿರಾಕ್ ದ ದೇವಲ್ಯದ ಪಳಿಯುಳಿಕೆಲು ಗೋಚರ ಆತ್ಂಡ್. ಪ್ರಕೃತಿದ ವಿಕೋಪಗ್ ತಿಕೊಂದು ದೇವಲ್ಯ ಸಂಪೂರ್ಣ ನಾಶ ಆದ್, ಒವ್ವೇ ಅಭಿವೃದ್ದಿ ಆವಂದೆ ನಾಶ ಆದ್, ಪಳಿಯುಳಿಕೆ ಮಾತ್ರ ಒರಿತ್ಂಡ್. ಸದರಿ ಕ್ಷೇತ್ರಡ್ ಪ್ರತಿವರ್ಷಲ ಎಳ್ಳಾಮಾವಾಸ್ಯೆ ದಿನ ಜಾತ್ರೆ ನಡತೊಂದು ಉಂಡು. ಆ ದಿನ ಕೈತಲ್ ದ ಬೊಕ್ಕ ಪರವೂರುದ ಭಕ್ತೆರ್ ಕ್ಷೇತ್ರಗ್ ಬತ್ ದ್ ತೀರ್ಥ ಸ್ನಾನ ಮಲ್ತ್ ದ್ ದೇವೆರೆನ ಸಾನಿಧ್ಯಡ್ ಪೂಜೆ ಸಂದಾದ್ ಸಾಮೂಹಿಕ ಅನ್ನ ಸಂತರ್ಪಣೆಡ್ ವನಸ್ ಸ್ವೀಕಾರ ಮಲ್ತ್ ದ್, ಕೃತಾರ್ಥರಾವೊಂದು ಉಲ್ಲೆರ್. ಪ್ರತಿ ವರ್ಷಲ ಶಿವರಾತ್ರಿದಾನಿ ಇಸೇಸ ಪೂಜೆ, ರುದ್ರಾಭಿಷೇಕ, ರಾತ್ರೆಡ್ ಭಜನೆ, ಸಂಕೀರ್ತನೆ ಮಾನದಾನಿ ಸಾಮೂಹಿಕ ಅನ್ನಸಂತರ್ಪಣೆ ಲೇಸ್ ನಡತೊಂದು ಬರೊಂದು ಉಂಡು.