ಕುಡ್ಲ: ಕಾವೂರು ಪೊಲೀಸ್ ಠಾಣೆಡ್ ಕರಿನ ರಡ್ಡ್ ವರ್ಷೊರ್ದಿಂಚಿ ಹೆಡ್‌ ಕಾನ್‌ಸ್ಟೇಬಲ್ ಆದ್ ಬೇಲೆ ಮಲ್ತೊಂದು ಇತ್ತಿನ ಮೂಲತಃ ಬಾಗಲಕೋಟೆದ ಲವಲೇಶ್ವರ ಗ್ರಾಮದ ಹನುಮಂತ ನಾಯ್ಕ (38) ಮೇರ್ ತಿಗಲೆ ಬೇನೆಡ್ ತೀರ್ ಪೋಯೆರ್.
ಮೇರ್ ತನ್ನ ಊರು ಬಾಗಲಕೋಟೆಗ್ ಇನಿ ಬೊಲ್ಪುಗು ಪೋಯಿನ ಪೊರ್ತುಡು ಘಟನೆ ನಡತ್ಂಡ್. ಕೂಡ್ಲೆ ಆಸ್ಪತ್ರೆಗ್ ಲೆತೊಂದು ಪೋಯೆರ್. ಆಂಡ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್. ಮೆರೆಗ್ ಬೊಡೆದಿ ಮಂಜುಳಾ, ಜೋಕುಲು ಕೃತ್ತಿಕಾ, ಲಾವಣ್ಯ, ಕೃಪಾ ಬೊಕ್ಕ ಕುಶಾಲ್ ಉಲ್ಲೆರ್.
ಅಳ್ವೆಕೋಡಿ : ಎರ್ಮಾಳು ತೆಂಕ, ಅಳ್ವೆಕೋಡಿ ದೇವಿ ಫ್ರೆಂಡ್ಸ್ ಕ್ಲಬ್ ದ ಮುತಾಲಿಕೆಡ್ ಎಳ್ಳಮಾಸೆದ ಲೆಕ್ಕೊಡು ಮುಲ್ಕಿ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿ ಮೊಕ್ಲೆರ್ದ್ “ಕಾರ್ನಿಕೊದ ಪಂಚ ದೈವೊಲು” ಯಕ್ಷಗಾನ ಬಯಲಾಟ ಡಿ.22 ಗುರುವಾರದಾನಿ ರಾತ್ರೆ 8 ಗಂಟೆರ್ದ್ ಕಡಲ್ ಬರಿಟ್ ಪಾಡ್ದಿನ ರಂಗಸ್ಥಳೊಡು ನಡಪರೆ ಉಂಡು.
ಈ ಲೇಸ್ ಗ್ ಕಲಾಭಿಮಾನಿಲಾಯಿನ ನಿಕುಲು ಮಾತ ಬತ್ ದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಿ ಫ್ರೆಂಡ್ಸ್ ಕ್ಲಬ್ ದಕುಲು ತೆರಿಪಾದೆರ್.
ಕಡಂದಲೆ: ತಾಲೂಕ್ ಮಟ್ಟದ ಗ್ರಾಮೀಣ ಕ್ರೀಡಾ ಕೂಟ ಕಬಡ್ಡಿಡ್ ಸುರುತ ಸ್ಥಾನ ಪಡೆದ್ ಜಿಲ್ಲಾ ಮಟ್ಟಗ್ ಆಯ್ಕೆಯಾಯಿನ ಕಡಂದಲೆ ಪಾಲಡ್ಕ ಗ್ರಾಮ ಪಂಚಾಯತ್ ಮಹಿಳಾ ತಂಡ ಖೋ ಖೋ ಡ್ ರಡ್ಡನೇ ಸ್ಥಾನ ಪಡೆತ್ಂಡ್.
ಕಬಡ್ಡಿಡ್ ಬೆಸ್ಟ್ ಆಲ್ ರೌಂಡರ್ ಪ್ರಶಸ್ತಿನ್ ಸುಪ್ರಿತಾ ಅಮೀನ್ ಕಡಂದಲೆ ಪಡೆತೆರ್. ಕಬ್ಬಡ್ಡಿಡ್ ಪವಿತ್ರ, ಎನ್.ಟಿ., ಸುನಿತಾ, ಸೀತ ಶೆಟ್ಟಿ, ನಳಿನಿ, ಶ್ರೇಯ, ಪಾವನ, ಪಾಲ್ ಪಡೆದಿತ್ತೆರ್. ಬೊಕ್ಕ ಖೋ ಖೋ ಕೂಟಡ್ ಮಾಲತಿ ಕಡಂದಲೆ, ಲೀಲಾ ಕಡಂದಲೆ, ಗೀತಾ.ಪಿ.ಶೆಟ್ಟಿ, ಸುಲೋಚನಾ, ನೀತಾ, ಸುಚಿತ್ರ, ನಳಿನಾಕ್ಷಿ, ಜಯಲಕ್ಷ್ಮಿ, ಜಾನಕಿ, ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಪಿಡಿಒ ರಕ್ಷಿತಾ ಪಾಲಡ್ಕ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ದಿನೇಶ್ ಕಂಗ್ಲಾಯಿ ಬೊಕ್ಕ ಉಪಾಧ್ಯೆಕ್ಷೆರ್ ಸುಕೇಶ್ ಶೆಟ್ಟಿ ಇತ್ತೆರ್.
✍️ಜಗದೀಶ್ ಪೂಜಾರಿ
ಕಡಂದಲೆ
ತಿಗಲೆ ಬೇನೆಡ್ ಭವ್ಯ (30) ಪನ್ಪುನ ಪೊಂಜೋವ್ ತೀರ್ ಪೋಯಿನ ಘಟನೆ ಒಡಿಪು ಜಿಲ್ಲೆದ ಬ್ರಹ್ಮಾವರ ತಾಲೂಕ್ ದ ಕೋಟ ಪಡುಕರೆಟ್ ನಡತ್ಂಡ್.
ಮೇರ್ ಕೋಟ ಪಡುಕರೆತ ಮೀನ್ ದ ಫ್ಯಾಕ್ಟರಿಡ್ ಕಚೇರಿ ಸಿಬ್ಬಂದಿಯಾದ್ ಬೇಲೆ ಮಲ್ತೊಂದು ಇತ್ತೆರ್. ಮೆರೆಗ್ ಕಂಡನಿ, ಮೆಗ್ಯೆ , ಪೊಪ್ಪ ಅಮ್ಮ ಉಲ್ಲೆರ್.
ಉಳ್ಳಾಲ: ಕೊಣಾಜೆ ಠಾಣೆ ವ್ಯಾಪ್ತಿದ ಅಸೈಗೋಳಿ ಸೈಟ್ ದ ನಿವಾಸಿ ಅಭಿಲಾಷ್ ( 36) ಇಲ್ಲಡ್ ಬಲ್ಲ್ ದೆತ್ತೊಂದು ಆತ್ಮಹತ್ಯೆ ಮಲ್ತೊನ್ನ ಘಟನೆ ಇನಿ ನಡತ್ಂಡ್.
ಮೆಡಿಕಲ್ ರೆಪ್ ಆದ್ ಬೇಲೆ ಮಲ್ತೊಂದು ಇತ್ತಿನ ಮೇರ್ ಇಂಚಿಪ್ಪ ಕೆಲವು ದಿರ್ನದಿಂಚ ಬೇಲೆಗ್ ಪೋವಂದೆ ಇಲ್ಲಲೇ ಇತ್ತೆರ್. ಮೇರ್ ಏಪಲದಲೆಕ್ಕನೇ ಇನಿ ಬೊಲ್ಪುಗು ಜಾಗಿಂಗ್‌ಗ್ ಪೋದು ಕುಡ ಇಲ್ಲಗ್ ಬೈದೆರ್. ಬೊಕ್ಕ ಇಲ್ಲಲ್ ದಕುಲು ಸಂಬಂಧದ ಮದಿಮೆಗ್ ಪೋಯಿನ ಪೊರ್ತುಡು ಇಲ್ಲದ ಉಲಯಿ ಇತ್ತಿನ ಸೀರೆರ್ದ್ ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತೊಂದೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಕೊಣಾಜೆ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಡೆಲ್ಲಿ: ಆನ್ ಒರಿ 17 ವರ್ಷದ ಶಾಲೆದ ಪೊಣ್ಣನ ಮಿತ್ತ್ ಆ್ಯಸಿಡ್ ಪಾಡಿನ ಘಟನೆ ಡೆಲ್ಲಿದ ದ್ವಾರಕಾ ಜಿಲ್ಲೆಡ್ ಬುಧಾರ ಬೊಲ್ಪುಗು ನಡತ್ಂಡ್.
ಬೊಲ್ಪುಗು 7:30 ತ ಸುಮಾರ್ ಗ್ ಪಿಎಸ್ ಮೋಹನ್ ಗಾರ್ಡನ್ ಪ್ರದೇಶಡ್ ತನ್ನ ಮೆಗ್ದಿನೊಟ್ಟಿಗೆ ಪೋವೊಂದು ಇಪ್ಪುನ ಪೊರ್ತುಡು ಬೈಕ್‌ಡ್ ಬತ್ತಿನ ಆನ್ ಬೊಕ್ಕ ಕುಡೊರಿ ಆ್ಯಸಿಡ್ ಪಾಡ್ದ್ ಬಲಿತ್ ದೆರ್. ಇತ್ತೆ ಒರಿ ಆರೋಪಿನ್ ಅರೆಸ್ಟ್ ಮಲ್ದೆರ್. ಕುಡೊರಿಯನ್ ನಾಡೊಂದು ಉಲ್ಲ ಪಂದ್ ಪೊಲೀಸೆರ್ ತೆರಿಪಾದೆರ್. ಈ ಪೊಣ್ಣನ್ ಸಫ್ದರ್‌ಜಂಗ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್.
ಮಣಿಪಾಲ್: ರೇಡಿಯೋ ಮಣಿಪಾಲ್ 90.4 mhz ಡ್ ಗ್ರಾಮೀಣ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆ ಬೆಂಗ್ಲೂರ್ ದ ಮುತಾಲಿಕೆಡ್ ಶುದ್ಧ ಜಲ, ಸ್ವಚ್ಛ ನೆಲ ಆರೋಗ್ಯವಾಗಿರಲಿ ಜೀವಸಂಕುಲ ಸರಣಿ ಲೇಸ್ ಡಿ.14 ಬುಧಾರದಾನಿ ಬಯ್ಯಗ್ 6 ಗಂಟೆಗ್ ಇಂಧನ ಸಂರಕ್ಷಣೆ ಬೊಕ್ಕ ಪರಿಸರದ ಬಗೆಟ್ ಈ ಲೇಸ್ ಪ್ರಸಾರ ಆಂಡ್.
ಈ ಲೇಸ್ ಡ್ ಕರ್ನಾಟಕ ರಾಜ್ಯಮಾಲಿನ್ಯ ನಿಯಂತ್ರಣ ಮಂಡಳಿ ಒಡಿಪು ವಿಭಾಗದ ಪರಿಸರ ಅಧಿಕಾರಿ ಡಾ.ಲಕ್ಷ್ಮೀಕಾಂತ್ ಪಾಲ್ ಪಡೆಯೆರೆ ಉಲ್ಲೆರ್. ನನ ಡಿ. 15 ಕ್ ಮಧ್ಯಾಹ್ನ 2 ಗಂಟೆಗ್ ಮರುಪ್ರಸಾರ ಆಪುಂಡು.
ಮುಲ್ಕಿ: ಜೋಕುಲೆಗ್ ಎಲ್ಯ ಪ್ರಾಯೊಡೇ ಎಡ್ಡೆ ಶಿಕ್ಷಣ ಕೊರ್ದು ವಿದ್ಯಾವಂತೆರಾದ್ ಮಲ್ಪುನ ಗುರುಕುಲೇ ನಮ್ಮ ಬದ್ ಕ್ ದ ತಾದಿಗ್ ಬೊಲ್ಪು ಆದುಲ್ಲೆರ್ ಪಂದ್ ಬೆಂಗ್ಲೂರುದ ಅಂತಾರಾಷ್ಟ್ರೀಯ ವಾಸ್ತುತಜ್ಞೆರ್ ಬೊಕ್ಕ ವೈಜ್ಞಾನಿಕ ಜ್ಯೋತಿಷ್ಯೆರ್ ಶ್ರೀ ಶ್ರೀ ಚಂದ್ರಶೇಖರ ಸ್ವಾಮೀಜಿ ಪಂಡೆರ್.
ಮೇರ್ ಮುಲ್ಕಿ ಸರಕಾರಿ ಪದವಿ ಪೂರ್ವ ಕಾಲೇಜ್ ದ 1979ರ್ದ್ 82 ಮುಟ್ಟ ಪ್ರೌಢಶಾಲೆ ಕಲ್ಪಾರ್ಥಿಲು 40 ವರ್ಷದ ಬೊಕ್ಕ ಒಟ್ಟಿಗೆ ಸೇರ್ದ್ ತನ್ನ ಪ್ರೀತಿದ ನಿವೃತ್ತ ಲಕ್ಷ್ಮಣ ಶೆಟ್ಟಿಗಾರ್ ದಂಪತಿಲೆಗ್ ಗೌರವ ಮಲ್ತ್ ದ್ ಪಾತೆರಿಯೆರ್. ನಂಕ್ ಎಡ್ಡೆ ಜೀವನ ಬೊಕ್ಕ ನೆಲೆನ್ ಕೊರ್ನ ಮಾತ ಶಿಕ್ಷಕೆರೆಗ್ ಸೊಲ್ಮೆ ಸಂದಾದ್, ಶಿಕ್ಷಕೆರ್ ದೇವೆರೆನ ಸಮಾನ ಪಂಡೆರ್. ಗೌರವ ಸ್ವೀಕಾರ ಮಲ್ತಿನ ನಿವೃತ್ತ ಶಿಕ್ಷಕೆರ್ ಲಕ್ಷ್ಮಣ ಶೆಟ್ಟಿಗಾರ್ ಪಾತೆರ್ದ್, ಕಲ್ಪಾರ್ಥಿಲು ಜೀವನಡ್ ಸಾಧಕೆರಾದ್ ನಮ್ಮೆದುರುಗು ಬನ್ನಗ ಶಿಕ್ಷಕೆರೆಗ್ ವೃತ್ತಿಜೀವನದ ಸಾರ್ಥಕತೆ ಆಪುಂಡು ಪಂದ್ ಪಂಡೆರ್. ಲೇಸ್ ಡ್ ನಿವೃತ್ತ ಶಿಕ್ಷಕೆರ್ ಲಕ್ಷ್ಮಣ ಶೆಟ್ಟಿಗಾರ್ ಬೊಕ್ಕ ವಸಂತಿ ಶೆಟ್ಟಿಗಾರ್ ದಂಪತಿಲೆಗ್ ತಮ್ಮನ ಮಲ್ತೆರ್. ಬೊಕ್ಕ ಇತ್ತೆ ಶಾಲೆಡ್ ಕರ್ತವ್ಯ ನಿರ್ವಹಿಸೊಂದು ಇಪ್ಪುನ ಶಿಕ್ಷಕೆರೆಗ್ ಬೊಕ್ಕ ಸಾಧಕೆರೆನ ನೆಲೆಟ್ ಶ್ರೀ ಶ್ರೀ ಚಂದ್ರಶೇಖರ ಸ್ವಾಮೀಜಿ ಬೊಕ್ಕ ರಜನಿ ಸಿ ಭಟ್ ಮೆರೆನ್ ಗೌರವ ಮಲ್ತೆರ್. ಈ ಪೊರ್ತುಡು ದೇವೆರೆ ಪಾದೊ ಸೇರ್ದಿನ ಶಿಕ್ಷಕೆರ್ ಬೊಕ್ಕ ಸಹಪಾಠಿಲೆಗ್ ಮೌನ ಪ್ರಾರ್ತನೆದ ಮುಖೇನ ಶೃದ್ಧಾಂಜಲಿ ಅರ್ಪಣೆ ಮಲ್ತೆರ್. ಮಲ್ಲ ಬಿನ್ನೆರಾದ್ ಕಾಲೇಜ್ ದ ಪ್ರಿನ್ಸಿಪಾಲೆರ್ ಡಾ.ವಾಸುದೇವ ಬೆಳ್ಳೆ, ಪ್ರೌಢಶಾಲಾ ಮುಖ್ಯೋಪಾದ್ಯಾಯಿನಿ ಜಯಲಕ್ಷ್ಮೀ ನಾಯಕ್, ಶಾರದಮ್ಮ ಗೋವಿಂದ ಭಟ್, ರಾಹುಲ್ ಚಂದ್ರಶೇಖರ್ ಬೊಕ್ಕ 1979ರ್ದ್82 ಮುಟ್ಟದ ಪ್ರೌಢಶಾಲಾ ಕಲ್ಪಾರ್ಥಿಲು ಇತ್ತೆರ್. ವಕೀಲೆರ್ ವಿ.ಸತೀಶ್ ಕಾಮತ್ ಎದ್ಕೊಂದು ಪ್ರಸ್ತಾವಿಕ ಪಾತೆರ್ಯೆರ್. ಪ್ರಕಾಶ್ ಸುವರ್ಣ ಸೊಲ್ಮೆ ಸಂದಾಯೆರ್.
ಡೆಲ್ಲಿ: ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋದ ರಾಜಬೂಡು ಕಿನ್ಶಾಸಡ್ ಭಾರೀ ಬರ್ಸರ್ದ್ ಗುಡ್ಡೆಜರಿದ್ 120 ರ್ದ್ ಹೆಚ್ಚ ಜನ ತೀರ್ ಪೋಯಿನ ಘಟನೆ ನಡತ್ಂಡ್.
ನೆರ್ದಾವೆರ ಮಾತಾ ಮಾರ್ಗಡ್ ಕೆಸರ್ ದಿಂಜಿದ್ ಪೋತ್ಂಡು, ಇಲ್ಲುಲ್ ಪೂರ ಮುರ್ಕುದುಂಡು, ಅಂಚಾದ್ ಈ ಮಾರ್ಗಡ್ 3-4 ದಿನ ಬಂದ್ ಆತ್ಂಡ್ ಪಂದ್ ಅಲ್ಪದ ಪ್ರಧಾನ ಮಂತ್ರಿ ಕಚೇರಿ ತೆರಿಪಾದ್ಂಡ್.
ಉಬಾರ್: ಸಂಗಮ್ ಸೌಂಡ್ಸ್ ದ ಧಣಿನ ಇಲ್ಲದ ಜಾಲ್ ಗ್ ಗುಜಿರಿ ಪೆಜ್ಜುನ ನೆಪಟ್ ಬತ್ತಿನ ರಡ್ಡ್ ಜನ ಅಲ್ಪ ಇತ್ತಿನ ಮೆಟಲ್ ಚೋಕ್ ಬೊಕ್ಕ ನಾಯಿದ ಸಂಕಲೆ ಕಂಡ್ ದ್ ಕೊನೊಯಿನ ಘಟನೆ ಅಂಗಾರೆ ಬೊಲ್ಪುಗು ಉಬಾರ್ ಡ್ ನಡತ್ಂಡ್.
ಈ ಇಸಯ ತೆರಿದ್ ಬತ್ತಿನ ಕೂಡ್ಲೆ ಕೈತಲ್ ದಕುಲು ಸಿಸಿ ಕ್ಯಾಮರಾಡ್ ತೂದು ಅಕ್ಲೆನ ಗುರ್ತ ಪತ್ತೆ ಮಲ್ತ್ ದ್, ಪೇಂಟೆಡ್ ಇತ್ತಿನ ರಡ್ಡ್ ಜನನ್ ಲ ಪತ್ತ್ ದ್ ಪೊಲೀಸೆರೆಗ್ ಕೊರ್ತೆರ್. ಆರೋಪಿಲೆಡ್ ಒರಿ ದಾವಣಗೆರೆತ ಹರಪ್ಪನಹಳ್ಳಿ ತಾಲೂಕ್ ದ ಶಿವ ಯಾನೆ ಧರ್ಮ ನಾಯಕ್ (39) ಕುಡೊರಿ ಗದಗ ಜಿಲ್ಲೆದ ಮುಂಡರಿಲ್ಲಾ ನಿವಾಸಿ ಪ್ರದೀಪ್ ಯಾನೆ ಚಟ್ರಪ್ಪ (27) ಪಂದ್ ತೆರಿದ್ ಬೈದ್ಂಡ್. ಮೊಕ್ಲೆನ್ ವಶಕ್ ಪಡೆಯಿನ ಪೊಲೀಸೆರ್ ವಿಚಾರಣೆ ಮಲ್ತೊಂದು ಉಲ್ಲೆರ್.
