ಮಹಾರಾಷ್ಟ್ರದ ಶಿರಡಿ ಸಾಯಿ ದೇವಲ್ಯಗ್ ಈ ವರ್ಷ 394 ಕೋಟಿ ರೂ.ದ 28 ಲಕ್ಷ ರೂ.ದ ದೇಣಿಗೆ ಬೈದ್ಂಡ್.
ಈ ತಿಂಗೊಲ್ದ ಆಕೆರಿಗ್ 400 ಕೋಟಿ ರೂ. ದಾಖಲೆ ಆಪಿನ ಸಾಧ್ಯತೆ ಉಂದು ಪಂದ್ ಅಧಿಕಾರಿಲು ತೆರಿಪಾದೆರ್. ನೆಟ್ಟ್ 25.578 ಕೆಜಿ ಬಂಗಾರ್ ಬೊಕ್ಕ 326.38 ಕೆಜಿ ಬೊಳ್ಳಿದ ಕಾಣಿಕೆಲು ಸೇರ್ದ್ಂಡ್ ಪಂದ್ ತೆರಿದ್ ಬೈದ್ಂಡ್.
ಸಾವೋ ಪಾಲೋ: ಬ್ರೆಜಿಲ್ ದ ಫುಟ್ಬಾಲ್ ಮಾಜಿ ಆಟಗಾರೆ, ಸಾರ್ವಕಾಲಿಕ ಶ್ರೇಷ್ಠ ಆಟಗಾರೆ ಪಂದೇ ಪುದರ್ ಪಡೆಯಿನ ಪೀಲೆ (82) ತೀರ್ ಪೋಯೆರ್ ಪಂದ್ ಅರೆನ ಕುಟುಂಬದಕುಲು ಗುರುವಾರ ತೆರಿಪಾದೆರ್.
ಫುಟ್ಬಾಲ್‌ದ ಮಾಸ್ಟರ್ ಮೈಂಡ್ ಪಂದೇ ಪುಗರ್ತೆ ಪಡೆಯಿನ ಮೇರ್ ಮೂಜಿ ಸರ್ತಿ ವಿಶ್ವಕಪ್ ಗೆಂದ್ ದೆರ್. ಮೂಜಿ ಸರ್ತಿ ಮದಿಮೆ ಆಯಿನ ಮೆರೆಗ್ 7 ಜೋಕುಲು ಉಲ್ಲೆರ್.
ಡೆಲ್ಲಿ: ಪುಗರ್ತೆದ ಕ್ರಿಕೆಟ್ ಆಟಗಾರೆ ರಿಷಬ್ ಪಂತ್ ಕಾರ್ ಆಕ್ಸಿಡೆಂಟ್ ಆದ್ ಡೆಲ್ಲಿದ ಏಮ್ಸ್ ಆಸ್ಪತ್ರೆಗ್ ದಾಖಲ್ ಆತೆರ್.
ಮೇರ್ ಡೆಲ್ಲಿರ್ದ್ ಉತ್ತರಾ ಖಂಡ್ ಗ್ ಪೋವೊಂದು ಇತ್ತಿನ ಪೊರ್ತುಡು ಈ ಘಟನೆ ನಡತ್ಂಡ್. ನೆಟ್ ಮೆರೆಗ್ ಮೋನೆಗ್, ಬೆರಿಕ್ ಮಸ್ತ್ ಪೆಟ್ಟಾತ್ಂಡ್.
ಎನ್ಐಎ ಇನಿ ಕೇರಳದ ಸುಮಾರ್ ಕಡೆಟ್ ದಾಳಿ ಮಲ್ತ್ ದ್ ಪಾಪ್ಯುಲರ್ ಫ್ರಂಟ್ ಸಂಘಟನೆದ ಒರಿ ಕಾರ್ಯಕರ್ತನ್ ಅರೆಸ್ಟ್ ಮಲ್ದ್ಂಡ್.
ಎರ್ನಾಕುಲಂದ ಎಡವನಕ್ಕಾಡ್ ಮೂಲದ ಮುಬಾರಕ್ ನ್ ಕಸ್ಟಡಿಗ್ ದೆತೊಂದುಂಡು. ಅತ್ತಂದೆ ಇನಿ ರಾಜ್ಯದ 56 ಜಾಗೆಲೆಗ್ ದಾಳಿ ಮಲ್ತ್ ದ್ ಮೊಬೈಲ್ ಫೋನ್, ಸಿಮ್ ಕಾರ್ಡ್ ಬೊಕ್ಕ ಪಿಎಫ್ಐ ಸಮವಸ್ತ್ರನ್ ವಶಕ್ಕ್ ಪಡೆತ್ಂಡ್ ಪಂದ್ ಎನ್ಐಎ ತೆರಿಪಾದ್ಂಡ್.
ಬೊಲ್ತೇರ್: ಲಾಯಿಲ ಶ್ರೀ ವೆಂಕಟರಮಣ ದೇವಲ್ಯಗ್ ನಟೆ ರಮೇಶ್ ಅರವಿಂದ್ ಬೊಕ್ಕ ಮೆರೆನ ಬೊಡೆದಿ ಭೇಟಿ ಕೊರ್ದು ದೇವೆರೆನ ದರ್ಶನ ಪಡೆಯೆರ್.
ಈ ಪೊರ್ತುಡು ಸಿರಿ ಡೈರೆಕ್ಟರ್ ಜನಾರ್ಧನ್, ರಾಜೇಶ್ ಪೈ, ಸದಾಶಿವ ಶೆಣೈ ಇತ್ತೆರ್.
ಕಾಂಬೋಡಿಯಾ: ಮುಲ್ತ ಲಾಕ್ಸುರಿ ಹೋಟೆಲ್ ಡ್ ತೂ ಪಾತ್ತ್ ದ್ 10 ಜನ ತೀರ್ ಪೋಯಿನ ಘಟನೆ ಕಾಂಬೋಡಿಯಾಡ್ ನಡತ್ಂಡ್.
ಈ ಘಟನೆಡ್ 30ರ್ದ್ ಎಚ್ಚ ಜನಕ್ ಪೆಟ್ಟಾತ್ಂಡ್. ತೂ ಪೊತ್ತರೆ ಕಾರಣ ತೆರಿದ್ ಬೈದಿಜಿ. ಅಗ್ನಿ ಶಾಮಕ ಗಾಡಿಲು ತೂ ತೆಕ್ಕಾವೊಂದು ಉಲ್ಲೆರ್.
ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಉಚ್ಚಿಲ ಶಾಖೆಡ್ ಡಿ.28 ಕ್ ನಬಾರ್ಡ್ ದ ಒಟ್ಟು ಸೇರಿಗೆಡ್ ಗ್ರಾಹಕೆರೆಗ್ ಆರ್ಥಿಕ ಅರಿವು ಲೇಸ್ ನಡತ್ಂಡ್.
ಲೇಸ್ ದ ಗುರ್ಕಾರ್ಮೆನ್ ಶಾಖೆದ ವ್ಯವಸ್ಥಾಪಕೆರ್ ಮನೋಹರ್ ಪೆಜಮಾಡಿ ಒಯಿಸ್ ದಿತ್ತೆರ್. ಉದಿಪನನ್ SCDCC ಬ್ಯಾಂಕ್ ಪಡುಬಿದ್ರೆ ಶಾಖೆದ ಶಾಖಾ ವ್ಯವಸ್ಥಾಪಕೆರ್ ಪ್ರಭೋದ್ ಚಂದ್ರ ಪೆಜಮಾಡಿ ಮಲ್ತೆರ್. ಬೊಕ್ಕ ಮೇರ್ ಪಾತೆರ್ದ್, ಜನಕುಲು ಬೆನ್ಪುನೆತ್ತೊಟ್ಟಿಗೆ ಆವೆನ್ ಒರಿಪಾವುನ ಮನೋಭಾವನೆನ್ ಬುಲೆಪಾವೊಡು ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ನವೋದಯ ಸ್ವಸಹಾಯ ಸಂಘದ ಮೇಲ್ವಿಚಾರಕೆರ್ ಹರಿನಾಥ್, ಹಿರಿಯ ಪತ್ರಕರ್ತೆರ್ ಬಾಲಕೃಷ್ಣ ಪೂಜಾರಿ ಉಚ್ಚಿಲ ಲೇಸ್ ಡ್ ಪಾಲ್ ಪಡೆದಿತ್ತೆರ್. ಶಾಖೆದ ಸಿಬ್ಬಂದಿ ಶ್ರೀನಿಧಿ ರಾವ್ ಕಾಸ್ ಒರಿಪುನ ವಿಷಯಡ್ ಅಂಚನೆ ಬೊಕ್ಕ ಡಿಜಿಟಲ್ ವೈವಾಟ್ ದ ಬಗೆಟ್ ಮಾಹಿತಿ ಕೊರಿಯೆರ್.
ಶಾಖೆದ ವ್ಯವಸ್ಥಾಪಕೆರ್ ಮನೋಹರ್ ಪೆಜಮಾಡಿ ಎದ್ಕೊನಿಯೆರ್. ಹಿರಿಯ ಸಿಬ್ಬಂದಿ ಮೀರಾ ಪೂಜಾರಿ ಸೊಲ್ಮೆ ಸಂದಾಯೆರ್. ನವೋದಯ ಸ್ವ ಸಹಾಯ ಸಂಘದ ಪ್ರೇರಕಿ ಕಾಂತಿ ಎಸ್.ಆಚಾರ್ಯ ಪ್ರಾರ್ತನೆ ಮಲ್ತೆರ್. ಈ ಪೊರ್ತುಡು ಸಿಬ್ಬಂದಿಲಾಯಿನ ಮೀರಾ ಪೂಜಾರಿ, ಶ್ರೀನಿಧಿ ರಾವ್, ಅಕ್ಷತಾ, ನವೋದಯ ಸ್ವ ಸಹಾಯ ಸಂಘದ ಪ್ರೇರಕೆರಾಯಿನ ಕಾಂತಿ ಎಸ್ ಆಚಾರ್ಯ, ವಿಮಲಾ ದಯಾನಂದ್ ಇತ್ತೆರ್.
ಮಂಜೇಶ್ವರ: ದೇಲಂತೊಟ್ಟು ಶ್ರೀ ಮಹಾವಿಷ್ಣು ದೇವಲ್ಯಡ್ ನವೀಕರಣ ಪೊಸ ಬಿಂಬ ಪ್ರತಿಷ್ಠಾಷ್ಟಬಂಧ ಬ್ರಹ್ಮಕಲಶೋಚ್ಚಯ ಡಿ.29ರ್ದ್ ಜ.8 ಮುಟ್ಟ ನಡಪರೆ ಉಂಡು.
ಈ ಲೇಸ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ, ರಾಜರ್ಷಿ ಡಾ| ಡಿ. ವೀರೇಂದ್ರ ಹೆಗ್ಗಡೆ ಮೆರೆನ ಶುಭಾಶೀರ್ವಾದದೊಟ್ಟಿಗೆ, ತಂತ್ರಿಲಾಯಿನ ಉಳಿಯತ್ತಾಯ ಶ್ರೀ ವಿಷ್ಣು ಮೆರೆನ ಕೈರ್ದ್ ನಡಪುಂಡು. ಈ ಲೇಸ್ ಡ್ ಭಕ್ತಾದಿಲಾಯಿನ ನಿಕುಲು ಮಾತ ಬತ್ ದ್, ಶ್ರೀ ಮಹಾವಿಷ್ಣು ದೇವೆರೆನ ಬೊಕ್ಕ ಶ್ರೀ ದೈವೋಲೆನ ಕೃಪೆಗ್ ಪಾತ್ರರಾವೋಡು ಪಂದ್ ಜೀರ್ಣೋದ್ಧಾರ ಸಮಿತಿ, ಸ್ವಾಗತ ಸಮಿತಿ, ಬ್ರಹ್ಮಕಲಶೋಚ್ಚಯ ಸಮಿತಿ, ಮಾತೃ ಸಮಿತಿ, ಕಾಸ್ರೋಡು ಜಿಲ್ಲೆ ಮಂಜೇಶ್ವರ ತಾಲೂಕ್ ದ ದೇಲಂತೊಟ್ಟು, ಬಜೆ, ಹೇರೂರು, ಮಂಗಲ್ಪಾಡಿ ಶ್ರೀ ಮಹಾವಿಷ್ಣು ದೇವಲ್ಯ, ಬೊಕ್ಕ ಸರ್ವ ಸಮಿತಿದ ಸರ್ವ ಸದಸ್ಯೆರ್ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಉಳ್ಳಾಲ: ಪುನರ್ ನಿರ್ಮಾಣ ಆಯೆರೆ ಇಪ್ಪುನ ಕಾಪಿಕಾಡ್ ಶ್ರೀ ಬಬ್ಬುಸ್ವಾಮಿ ದೈವೊಲ್ಯದ ಕೆಸರ್ ಕಲ್ಲ್ ಪಾಡುನ ಲೇಸ್ ಜ.1 ಐತಾರ ನಡಪರೆ ಉಂಡು.
ಈ ಲೇಸ್ ಗ್ ನಿಕುಲು ಮಾತ ಬತ್ತ್ ದ್ ಬಬ್ಬುಸ್ವಾಮಿ ಬೊಕ್ಕ ಪರಿವಾರ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕಾಪಿಕಾಡ್ ಶ್ರೀ ಬಬ್ಬುಸ್ವಾಮಿ ದೈವೊಲ್ಯ ಪುನರ್ ನಿರ್ಮಾಣ ಸಮಿತಿದ ಅಧ್ಯಕ್ಷೆರ್, ಗೌರವಾಧ್ಯಕ್ಷೆರ್, ಕಾರ್ಯಧ್ಯೆಕ್ಷೆರ್, ಪದಾಧಿಕಾರಿಲು, ಆಡಳಿತ ಸಮಿತಿ ಬೊಕ್ಕ ದೈವೊಲ್ಯದ ಗುರಿಕಾರೆರ್, ಅರ್ಚಕೆರ್ ಬೊಕ್ಕ ಬಬ್ಬುಸ್ವಾಮಿ ಸೇವಾ ಟ್ರಸ್ಟ್ (ರಿ.) ದ ಅಧ್ಯಕ್ಷೆರ್, ಪದಾಧಿಕಾರಿಲು ಬೊಕ್ಕ ಆಡಳಿತ ಸಮಿತಿದಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಉತ್ತರಪ್ರದೇಶ: ಮೋಕೆ ಮಲ್ತ್ ದ್ ಒಂಜೇ ಕಾಲೇಜ್ ದ ಮೂಜಿ ಕಲ್ಪಾರ್ಥಿಲು ಆತ್ಮಹತ್ಯೆ ಮಲ್ತೊನ್ನ ಘಟನೆ ಉತ್ತರ ಪ್ರದೇಶದ ಸೀತಾಪುರಡ್ ನಡತ್ಂಡ್.
11 ಬೊಕ್ಕ 12ನೇ ಕ್ಲಾಸ್ ದ ಈ ಮೂಜಿ ಕಲ್ಪಾರ್ಥಿಲೆನ ಆತ್ಮಹತ್ಯೆಗ್ ಮೋಕೆನೇ ಕಾರಣ ಪಂದ್ ಪೊಲೀಸ್ ತನಿಖೆರ್ದ್ ತೆರಿದ್ ಬೈದ್ಂಡ್. ಡಿ.10ಕ್ ನಡತಿನ ಸುರುತ ಆತ್ಮಹತ್ಯೆ ಕೇಸ್ ಡ್ ಪೊಣ್ಣು ಕೈತಲ್ ಇಲ್ಲದಾಯೆ ರಾಹುಲ್ ಯಾದವ್ ನ್ ಮೋಕೆ ಮಲ್ತೊಂದು ಇತ್ತಲ್. ಮೊಕ್ಲೆನ ಪ್ರೀತಿನ್ ಇಲ್ಲಲ್ ದಕುಲು ಒಪ್ಪಿಜೆರ್ ಪಂದ್ ಆತ್ಮಹತ್ಯೆ ಮಲ್ತೊಂಡಲ್. ಈ ಕೇಸ್ ಡ್ ರಾಹುಲ್ ಯಾದವ್ ನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್. 2ನೇ ಕೇಸ್ ಡಿ.12ಕ್ ನಡತ್ಂಡ್. ಅಂಕಿತ್ ಪಾಸ್ವಾನ್ ಪನ್ಪುನ ಆನನ್ ಒಂಜಿ ಪೊಣ್ಣು ಮೋಕೆ ಮಲ್ತೊಂದು ಇತ್ತಲ್. ಮೊಲೆನ ಇಲ್ಲಲ್ ದಕುಲು ಒಪ್ಪುದಿತ್ತೆರ್. ಆಂಡ ಅಂಕಿತ್ನ ಅಮ್ಮ ಮದಿಮೆಗ್ ಬದಿ ಪಂದ್ ಬೈಕ್ ಕೇನ್ ಡೆರ್ ಪಂದ್ ಅವ್ವೇ ಬೇಜಾರ್ ಡ್ ಎಲಿ ಪಾಷಾಣ ಪರ್ದ್ ಪೊಣ್ಣು ತೀರ್ ಪೋಯಲ್. 3ನೇ ಘಟನೆಡ್ ತುದೆಕ್ ಲೈತ್ತ್ ದ್ ಒರ್ತಿ ತೀರ್ ಪೋಯಲ್. ಆಲ್ ಒರಿ ಆನನ್ ಮೋಕೆ ಮಲ್ತೊಂದು ಇತ್ತಲ್. ಮೊಲೆನ ಮೋಕೆನ್ ಮೊಲೆನ ಸಂಬಂಧದಾರ್ ಸಂಜಯ್ ತಿವಾರಿ ಇಲ್ಲಲ್ ದಕ್ಲೆಗ್ ತೆರಿಪಾಯೆರ್ ಪಂದ್ ಆತ್ಮಹತ್ಯೆ ಮಲ್ತೊಂದಲ್. 4ನೇ ಕೇಸ್ ಡ್ ದೋಸ್ತಿಲು ಮಲ್ತಿನ ಕಾಮೆಂಟ್‌ಲೆರ್ದ್ ಪೊಣ್ಣು ಒರ್ತಿ ಬೇಜಾರ್ ಮಲ್ತೊಂದು ತನ್ನ ಮಣಿಕಟ್ಟ್ ನ್ ತುಂಡು ಮಲ್ತೊಂಡಲ್. ಮೊಲೆನ್ ಕೌನ್ಸೆಲಿಂಗ್ ಮಲ್ತಿ ಬೊಕ್ಕ ಆರೋಗ್ಯ ಆದ್ ಉಲ್ಲಲ್ ಪಂದ್ ತೆರಿದ್ ಬೈದ್ಂಡ್.
