ಸಿಆರ್ ಪಿಎಫ್ ಡ್ 1458 ಬೇಲೆಲೆಡ್ 143 ಅಸಿಸ್ಟೆಂಟ್ ಸಬ್ ಇನ್ಸ್‌ಪೆಕ್ಟರ್ ಬೊಕ್ಕ 1315 ಹೆಡ್ ಕಾನ್ಸ್‌ಟೇಬಲ್ ಬೇಲೆ ಉಂಡು.
ಈ ಬೇಲೆ ಅರ್ಜಿ ಪಾಡೊಡಾಂಡ ಪಿಯುಸಿ ಆದಿಪ್ಪೊಡು. ಅಂಚನೆ 18 ರ್ದ್ 25 ವರ್ಸರ್ದ್ ತೀರ್ತ್ ಇಪ್ಪೊಡು. ಈ ಅರ್ಜಿನ್ https://crpf.gov.in/ ಮುಖೇನ ಜನವರಿ 4 ರ್ದ್ 5 ಮುಟ್ಟ ಪಡೊಲಿ.
ಗುಜರಾತ್ ಡ್ ಬಸ್ ಬೊಕ್ಕ ಕಾರ್ ಗುದ್ದುದು 9 ಜನ ತೀರ್ ಪೋಯಿನ ಘಟನೆ ಇನಿ ಬೊಲ್ಪುಗು ನಡತ್ಂಡ್.
ನೆಟ್ಟ್ 32 ಜನಕ್ ಮಸ್ತ್ ಪೆಟ್ಟಾತ್ಂಡ್. ಮೊಕ್ಲೆನ್ ಚಿಕಿತ್ಸೆಗಾದ್ ಕೈತಲ್ ದ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಬಗೆಟ್ ಎಚ್ಚದ ಮಾಹಿತಿ ನನ ಗೊತ್ತಾವೊಡಾತೆ.
ಒಡಿಪುದ ಅಂಬಾಗಿಲ್ ಡ್ ಲಾರಿ ಗುದ್ದುದು ಕುಡ್ಲ ಅಬಕಾರಿ ಇಲಾಖೆದ ಸಬ್ ಇನ್ಸ್‌ಸ್ಪೆಕ್ಟರ್ ತೀರ್ ಪೋಯಿನ ಘಟನೆ ಕೋಡೆ ರಾತ್ರೆ ನಡತ್ಂಡ್.
ಈ ಘಟನೆಡ್ ಬ್ರಹ್ಮಾವರದ ಉಳ್ಳೂರ್ ನಿವಾಸಿ ಅಬಕಾರಿ ಇಲಾಖೆದ ಸಬ್ ಇನ್ ಸ್ಪೆಕ್ಟರ್ ಶಂಕರ್ (52) ತೀರ್ ಪೋಯಿನಾರ್. ಈ ಬಗೆಟ್ ಬ್ರಹ್ಮಾವರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್
ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ ವಿಶ್ವವಿದ್ಯಾಲಯ ಧನಸಹಾಯ ಆಯೋಗದ 2023ತ ಯುಜಿಸಿ ನೆಟ್‌ ಪರೀಕ್ಷೆದ ತಾರೀಕ್ ಪ್ರಕಟ ಆತ್ಂಡ್.
ಜೂನ್ 13 ರ್ದ್ 22 ಮುಟ್ಟ ನಡಪುಂಡು ಪಂದ್ ಯುಜಿಸಿ ಅಧ್ಯಕ್ಷೆರ್ ಎಮ್.ಜಗದೀಶ್ ಕುಮಾರ್ ಘೋಷಣೆ ಮಲ್ದೆರ್. ಈ ಪರೀಕ್ಷೆ ವರ್ಷಗ್ 2 ಸಲ ಜೂನ್ ಬೊಕ್ಕ ಡಿಸೆಂಬರ್ ಡ್ ನಡಪುಂಡು ಪಂದ್ ಟ್ವೀಟ್ ಮಲ್ದೆರ್. ಎನ್ಎಟಿದ ವೆಬ್ ಸೈಟ್‌ http://ugcnet.nta.ac.in./ ಡ್ ವೇಳಾಪಟ್ಟಿ ಪ್ರಕಟ ಆತ್ಂಡ್.
ಮಣಿಪಾಲ: ರೇಡಿಯೋ ಮಣಿಪಾಲ್ 90.4 mhz, ಡ್ ಗ್ರಾಮೀಣ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆ ಬೆಂಗ್ಲೂರ್ ನೆತ್ತ ಮುತಾಲಿಕೆಡ್ ಶುದ್ಧ ಜಲ, ಸ್ವಚ್ಛ ನೆಲ ಆರೋಗ್ಯವಾಗಿರಲಿ ಜೀವಸಂಕುಲ ಸರಣಿ ಲೇಸ್ ಡಿ.30 ಶುಕ್ರಾರ ಬಯ್ಯಗ್ 6 ಗಂಟೆಗ್ ಜಲಾನಯನ ಪ್ರದೇಶದ ಅಭಿವೃದ್ಧಿಡ್ ಸಾರ್ವಜನಿಕೆರೆನ ಪಾತ್ರದ ಬಗೆಟ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಬ್ರಹ್ಮಾವರ ವಲಯದ ಸೇವಾಪ್ರತಿನಿಧಿ ಅಣ್ಣಪ್ಪ ಹಿಲಿಯಾಣ ಪಾಲ್ ಪಡೆಯೆರೆ ಉಲ್ಲೆರ್. ಡಿ.31ಕ್ ಮಧ್ಯಾಹ್ನ 2 ಕ್ ಮರುಪ್ರಸಾರ ಆಪುಂಡು.
ಮಂಡ್ಯ: ಕೇಂದ್ರ ಗೃಹ ಬೊಕ್ಕ ಸಹಕಾರ ಸಚಿವೆರ್ ಅಮಿತ್ ಶಾ ಮೇರ್ ಇನಿ ಮಂಡ್ಯದ ಗೆಜ್ಜಲಗೆರೆ ಡೈರಿ ಆವರಣಡ್ ಮೆಗಾ ಡೈರಿ ಉದಿಪನ ಮಲ್ತೆರ್.
ಬೊಕ್ಕ ಮೇರ್ ಪಾತೆರ್ದ್, ದೇಶದ ಪ್ರತಿ ಪಂಚಾಯತ್‌ಡ್ ಪ್ರೈಮರಿ ಪೇರ್ ದ ಡೈರಿ ಸ್ಥಾಪನೆ ಮಲ್ಪುವ ಪಂದ್ ಪಂಡೆರ್. ಈ ಪೊರ್ತುಡು ಆದಿ ಚುಂಚನಗಿರಿ ಮಠತ ಶ್ರೀ ನಿರ್ಮಲಾನಂದನಾಥ ಸ್ವಾಮೀಜಿ, ಮಾಜಿ ಪ್ರಧಾನಿ ಹೆಚ್.ಡಿ. ದೇವೇಗೌಡ, ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ, ಕೇಂದ್ರ ಕಲ್ಲಿದ್ದಲು ಸಚಿವೆರ್ ಪ್ರಹ್ಲಾದ ಜೋಶಿ, ಸಹಕಾರ ಸಚಿವೆರ್ ಎಸ್.ಟಿ. ಸೋಮಶೇಖರ್, ಸಚಿವೆರ್ ಕೆ. ಗೋಪಾಲಯ್ಯ, ಶಾಸಕೆರ್ ಸಿ.ಎಸ್. ಪುಟ್ಟರಾಜು, ಡಿ.ಸಿ. ತಮ್ಮಣ್ಣ, ಮನ್ಮೂಲ್ ಅಧ್ಯಕ್ಷೆರ್ ಬಿ.ಆರ್. ರಾಮಚಂದ್ರ ಇತ್ತೆರ್.
ಕುಡ್ಲ: ಕ್ಯಾಪ್ರಿಪಾಕ್ಸ್ ಪನ್ಪುನ ವೈರಾಸ್ ರ್ದ್ ಚರ್ಮಗಂಟ್ (ಲುಂಪಿ ಸ್ಕಿನ್ ಡಿಸೀಸ್) ರೋಗ ಕೈಕಂಜಿಗ್ ಬೈದ್ಂಡ್.
ಜಿಲ್ಲೆಡ್ 289 ಗ್ರಾಮಡ್ ಈ ರೋಗ ಉಂಡು. ಇಡೇ ಮುಟ್ಟ 3,414 ಕೈಕಂಜಿಗ್ ಬೈದ್ಂಡ್. ಆಯಿಟ್ 64 ಕೈಕಂಜಿ ಸೈದ್ಂಡ್. ಅಂಚಾದ್ ನನ ಒಂಜಿ ಕಡೆರ್ದ್ ನನೊಂಜಿ ಕಡೆಕ್ ಕೊನೊಯೆರೆ ಬಲ್ಲಿ ಪಂದ್ ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್. ಆದೇಶ ಮಲ್ದೆರ್.
ಬಂಟ್ವಾಳ: ಕಾರ್ ಬೊಕ್ಕ ರಿಕ್ಷಾ ಗುದ್ದುದು ಮೂಜಿ ಜನಕ್ ಪೆಟ್ಟಾಯಿನ ಘಟನೆ ಕುಡ್ಲ-ಬೆಂಗ್ಲೂರ್ ರಾಜ್ಯ ಮಾರ್ಗ ಮಾಣಿದ ಪಳಿಕೆಡ್ ನಡತ್ಂಡ್.
ಮಾಣಿ ಕಡೆರ್ದ್ ಉಬಾರ್ ದಂಚಿ ಬರೊಂದು ಇತ್ತಿನ ಕಾರ್ ಎದುರುಡ್ ಬರೊಂದು ಇತ್ತಿನ ರಿಕ್ಷಾಗ್ ಗುದ್ದುದುಂಡು. ನೆಟ್ಟ್ ಬೆಂಗ್ಲೂರ್ ಬೊಕ್ಕ ಬಿಸಿ.ರೋಡ್ ಮೂಲದ ಪ್ರಯಾಣಿಕೆರ್ ಇತ್ತೆರ್ ಪಂದ್ ತೆರಿದ್ ಬೈದ್ಂಡ್.
ಒಡಿಪು: ಬೆಳ್ಮಣ್ಣು ಶ್ರೀ ದುರ್ಗಾಪರಮೇಶ್ವರೀ ಕ್ಷೇತ್ರಡ್ ಮಂಡಲ ಪೂಜೆ ಉಚ್ಚಯ ಜ.3 ಅಂಗಾರೆ ನಡಪರೆ ಉಂಡು.
ಈ ಲೇಸ್ ಡ್ ನಿಕುಲು ಮಾತ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದುರ್ಗಾಪರಮೇಶ್ವರೀ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಮೊಕ್ತೇಸರೆರ್ ಬಿ.ಯಂ ಕೃಷ್ಣ ಭಟ್, ಆಡಳಿತ ವರ್ಗ, ಗ್ರಾಮಸ್ಥೆರ್, ಊರುದ ಬೊಕ್ಕ ಪರವೂರುದ ಭಕ್ತಾದಿಲು ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗ್ಲೂರ್: ಕಾಂಪೌಂಡ್ ಬೂರ್ದು ರಡ್ಡ್ ಕಾರ್ಮಿಕೆರ್ ತೀರ್ ಪೋಯಿನ ಘಟನೆ ಭಾರತೀ ನಗರ ಪೊಲೀಸ್ ಠಾಣೆ ವ್ಯಾಪ್ತಿದ ಎಂಇಜಿ ಆಫೀಸರ್ಸ್ ಕಾಲೋನಿಡ್ ಗುರುವಾರ ಬಯ್ಯಗ್ ನಡತ್ಂಡ್.
ಈ ಘಟನೆಡ್ ಚಿತ್ರದುರ್ಗದ ಚಳ್ಳಕೆರೆ ಮೂಲದ ಬಾಣಸವಾಡಿ ನಿವಾಸಿ ಆಶಮ್ಮ (21) ಬೊಕ್ಕ ಪಶ್ಚಿಮ ಬಂಗಾಳ ಮೂಲದ ಅಕ್ರಂ ಉಲ್ ಹಕ್ (22) ತೀರ್ ಪೋತೆರ್. ಈ ಬಗೆಟ್ ಗುತ್ತಿಗೆದಾರೆರೆನ ಮಿತ್ತ್ ಕೇಸ್ ದಾಖಲ್ ಆತ್ಂಡ್ ಪಂದ್ ಪೊಲೀಸೆರ್ ತೆರಿಪಾದೆರ್.
