ಹರಿಯಾಣದ ಪಾಣಿಪತ್ ಜಿಲ್ಲೆದ ಬಿಚ್ಪಾಡಿದ ಇಲ್ಲಡ್ ಒಂಜಿ ಸಿಲಿಂಡರ್ ಪುಡಾದ್ ಒಂಜೇ ಇಲ್ಲದ ಆಜಿ ಜನ ತೀರ್ ಪೋಯಿನ ಘಟನೆ ನಡತ್ಂಡ್.
ಪೊಪ್ಪ ಅಮ್ಮ ಸೇರ್ದ್ ನಾಲ್ ಜೋಕುಲು ತೀರ್ ಪೋತೆರ್. ಜಾಗೆಗ್ ಅಗ್ನಿಶಾಮಕ ಸಿಬ್ಬಂದಿ ಬತ್ತ್ ದ್ ತೂ ತೆಕ್ಕಾದೆರ್. ಪೊಲೀಸೆರ್ ತನಿಖೆ ಮಲ್ತೊಂದು ಉಲ್ಲೆರ್.
ಆರ್ ಆರ್ ಆರ್ ಪಿಕ್ಚರ್ ದ ನಾಟು ನಾಟು ಪಂದ್ಯಗ್ ಗೋಲ್ಡನ್ ಗ್ಲೋಬ್ ಪ್ರಶಸ್ತಿ ಬೈದಿನವು ಕುಸಿತ ಇಚಾರ ಪಂದ್ ನಿರ್ಮಾಪಕೆರ್ ಡಿವಿವಿ ದಾನಯ್ಯ ಪಂಡೆರ್.
ಈ ಪಂದ್ಯಡ್ ರಡ್ಡ್ ಹೀರೋನಕುಲು 30 ದಿನ ಪ್ರಾಕ್ಟೀಸ್ ಮಲ್ದೆರ್. ಆಯಿಟ್ 20 ದಿನ ಉಕ್ರೇನ್ ಡ್ ಮಲ್ದೆರ್. ಅತ್ತಂದೆ ಈ ಪಂದ್ಯಗ್ 20 ಕೋಟಿ ರೂ. ಖರ್ಚಾತ್ಂಡ್. ಹೀರೋನಕ್ಲೆನೊಟ್ಟಿಗೆ 2 ಸಾರ ಜನ ಬೇಲೆ ಮಲ್ದೆರ್ ಪಂದ್ ಪಂಡೆರ್.
Natu Natu ….wins Golden Globe Award
Natu Natu song from the movie RRR has won the Golden Globe Awards.The producer DVV Daniah has conveyed his pleasure at the honours.
The two heros had practiced for a month for the song and 20 crores was spent on the picturization of the song and two thousand supporting cast were also involved in the picturising this song.
15 ನೇ ಹಾಕಿ ವಿಶ್ವಕಪ್ ಎಲ್ಲೆರ್ದ್ ಭುವನೇಶ್ವರ-ರೂರ್ಕೆಲಾಡ್ ಸುರು ಆವರೆ ಉಂಡು.
16 ಕೂಟದಕುಲು ಪಾಲ್ ಪಡೆಯೆರೆ ಉಲ್ಲೆರ್. ಭಾರತ ಡಿ ಗುಂಪುಡ್ ತಾನ ಪಡೆತ್ಂಡ್. ಲೀಗ್ ಪಂತೊಲೆಡ್ ಹರ್ಮನ್ ಪ್ರೀತ್ ಬಳಗ ಇಂಗ್ಲೆಂಡ್, ಸ್ಪೇನ್, ವೇಲ್ಸ್‌ ತಂಡದೊಟ್ಟಿಗೆ ಗೊಬ್ಬರೆ ಉಂಡು. ಟೋಕಿಯೋ ಒಲಿಂಪಿಕ್ಸ್ ಡ್ ಕಂಚಿದ ಪದಕ ಗೆಂದಿನ ಭಾರತ ವಿಶ್ವಕಪ್ ಗೆಂದುನ ವಿಶ್ವಾಸಡ್ ಉಂಡು. 2018 ಟ್ ಭಾರತ ಕ್ವಾರ್ಟರ್ ಫೈನಲ್ ಗ್ ಎಂಟ್ರಿ ಕೊರ್ದು ಇತ್ಂಡ್. 1975ತ ವಿಶ್ವಕಪ್ ಡ್ ಚಾಂಪಿಯನ್ ಆತ್ಂಡ್.
ದಯಾ ಕ್ರಿಯೇಷನ್ ಬಾಯಾರು ನೆತ್ತ 2ನೇ ವರ್ಷ ದ ಗೌಜಿಡ್ “ದಯಾ ಮೆಲೋಡೀಸ್ ಮ್ಯೂಸಿಕಲ್ 2023” ಲೇಸ್ ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ದೇವಲ್ಯಡ್ ನಡತ್ಂಡ್.
ಬೊಲ್ಪುಗು ಸತ್ಯನಾರಾಯಣ ಪೂಜೆ, ಶ್ರೀದೇವಿಗ್ ಪೂಜೆ ಆದ್ ಮಧ್ಯಾಹ್ನ ಅನ್ನಸಂತರ್ಪಣೆ ನಡತ್ಂಡ್. ವನಿತಾ ತಾರಿದಾಳ ಅಧ್ಯಕ್ಷೆರ್ ಗ್ರಾಮ ಪಂಚಾಯತ್ ಮಾಣಿಲ ಮೆರೆನ ಗುರ್ಕಾರ್ಮೆಡ್ ನಡತಿನ ಸಭಾ ಲೇಸ್ ಡ್ ಕುಕ್ಕಾಜೆ ಕಾಳಿಕಾಂಬ ಆಂಜನೇಯ ದೇವಲ್ಯದ ಧರ್ಮದರ್ಶಿ ಶ್ರೀಕೃಷ್ಣ ಗುರೂಜಿ ತುಡರ್ ಅರ್ಲಾದ್ ಆಶೀರ್ವಚನ ಕೊರಿಯೆರ್.
ಮಲ್ಲ ಬಿನ್ನೆರಾದ್ ಕನ್ನಡ ತುಳು ಕಬಿ, ಸಾಹಿತಿ ವಾಗ್ಮಿ ವಿಮರ್ಶಕೆರ್ ಕೆ.ಮಹೇಂದ್ರ ನಾಥ್ ಸಾಲೆತ್ತೂರು, ಲೆಪ್ಪೋಲೆ ಪರಿವಾರದ ವಿಜಯ ಕುಮಾರ್ ಜೈನ್ ಅಳದಂಗಡಿ, ನಮ್ಮಕುಡ್ಲದ ಡಾ.ಪ್ರಿಯಾ ಹರೀಶ್, ಕಾಂತಾರ ಪುಗರ್ತೆದ ಪುಷ್ಪರಾಜ್ ಬೊಳ್ಳಾರ್, ಶ್ರೀಧರ್ ಬಾಳೆಕಲ್ಲ್, ಜೀರ್ಣೋದ್ಧಾರ ಸಮಿತಿದ ಕಾರ್ಯದರ್ಶಿ ರೀತೇಶ್ ಅಂಚನ್, ಕೃಷ್ಣಪ್ಪ ಪೂಜಾರಿ ತಾರಿದಾಳ ಇತ್ತೆರ್.
ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ಕೆ ವಿಲ್ಪೆಡ್ ಡಿ ಸೋಜ ಬೊಕ್ಕ ದಯಾ ಕ್ರಿಯೇಷನ್ ಕೂಟದ ಕಲಾವಿದೆರೆಗ್ ಮಾನಾದಿಗೆ ಮಲ್ತೆರ್.ರವಿ ಎಂ ಎಸ್ ಕುಕ್ಕಾಜೆ ಎದ್ಕೊನಿಯೆರ್. ರೇಣುಕಾ ಕಾಣಿಯೂರು ಲೇಸ್ ದ ಸುಧಾರಿಕೆ ಮಲ್ತೆರ್. ಬೊಕ್ಕ ದಯಾ ಮೆಲೋಡಿಸ್ ಮ್ಯೂಸಿಕಲ್ ಕೂಟರ್ದ್ ಸಾಂಸ್ಕೃತಿಕ ವೈಭವ ನಡತ್ಂಡ್. ನೆಟ್ಟ್ ದಯಾನಂದ ಅಮೀನ್ ಬಾಯಾರು, ದಯಾ ಕ್ರಿಯೇಷನ್ ಕೂಟದ ಪದಾಧಿಕಾರಿಲು ಸೇರ್ದ್ ನೂದೆರ್ದ್ ಎಚ್ಚ ಕಲಾಭಿಮಾನಿಲು ಇತ್ತೆರ್.
ದೇರಳಕಟ್ಟೆ ಶ್ರೀ ವೈದ್ಯನಾಥ ಸೇವಾ ಸಮಿತಿದ ಲೆಕ್ಕೊಡು ಶ್ರೀ ವೈದ್ಯನಾಥೇಶ್ವರ ಭಜನಾ ಮಂದಿರದ 15 ನೇ ವರ್ಷದ ಉಚ್ಚಯ ಜ.14 ರ್ದ್ 16 ಮುಟ್ಟ ನಡಪರೆ ಉಂಡು.
ಜ.14 ಸನಿಯಾರ ಭಜನೆ ಸಂಕೀರ್ತನೆ, ಶ್ರೀ ಶನಿಮಹಾತ್ಮೆ ಪೂಜೆ ಯಕ್ಷಗಾನ ತಾಳಮದ್ದಳೆ, ಸಭಾ ಲೇಸ್ ಬೊಕ್ಕ ಅನ್ನಸಂತರ್ಪಣೆ ನಡಪರೆ ಉಂಡು. ಜ.15 ಐತಾರ ಏಕಾಹ ಭಜನೆ ಸುರು ಆಪುಂಡು. ಜ. 16 ಸೋಮಾರ ಭಜನೆ ಸಂಕೀರ್ತನೆ, ಅನ್ನಸಂತರ್ಪಣೆ, ಸಾಮೂಹಿಕ ಶಿವ ಕಲ್ಪೋಕ್ತ ಪೂಜೆ, ದುರ್ಗಾನಮಸ್ಕಾರ ಪೂಜೆ ಬೊಕ್ಕ ವೈವಿಧ್ಯಮಯ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಈ ಮಾತ ಲೇಸ್ ಡ್ ಮಾತೆರ್ಲಾ ಬತ್ತ್ ದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಧ್ಯಕ್ಷೆರ್ ಪುರುಷೋತ್ತಮ ಅಂಚನ್, ವೈದ್ಯನಾಥ ನಗರ, ಉಪಾಧ್ಯಕ್ಷೆರ್ ಬಾಲಕೃಷ್ಣ ಶೆಟ್ಟಿ, ಗೌರವಾಧ್ಯಕ್ಷೆರ್ ಮೋನಪ್ಪ ಗೌಡ, ಕೋಶಾಧಿಕಾರಿ ಸುರೇಶ್ ಆಚಾರ್ಯ, ಕಾರ್ಯದರ್ಶಿ ಪುಷ್ಪಲತಾ ಬಾಲಕೃಷ್ಣ ಶೆಟ್ಟಿ, ಉಪ ಕಾರ್ಯದರ್ಶಿ ಶ್ವೇತ ವಿ, ಅರ್ಚಕೆರ್ ವೆಂಕಟರಮಣ ಭಟ್, ಭಜನಾ ಮಂಡಳಿದ ಪ್ರಧಾನ ಸಂಚಾಲಕೆರ್ ಶೇಖರ್ ಸಾಲ್ಯಾನ್, ಸಹ ಸಂಚಾಲಕೆರ್ ಶ್ರವಣ್ ಕುಮಾರ್, ಕೃಷ್ಣ ನಾಯ್ಕ್, ಶಾಲಿನಿ ನಾಗರಾಜ್ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿದ ವಿಜಯ ಕಾಲೇಜ್ ಡ್ ಪಿಯುಸಿ ಕಲ್ತೊಂದು ಇತ್ತಿನ ಕಲ್ಪಾರ್ಥಿ ಒರಿ ತನ್ನ ಕೈತಲ್ ದ ದೊಡ್ಡಪ್ಪ ಇಲ್ಲದ ಕೋಣೆಡ್ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ಅಂಗಾರೆ ನಡತ್ಂಡ್.
ಈ ಘಟನೆಡ್ ಕಕ್ವಪಲ್ಕೆ ನಿವಾಸಿ ಕಿಶನ್ ಆಚಾರ್ಯ (18) ತೀರ್ ಪೋಯಿನಾರ್. ಮೇರ್ ಸೈಯೆರೆ ಕಾರಣ ದಾದ ಪಂದ್ ನನ ತೆರಿದ್ ಬರೊಡಾತೆ, ಈ ಬಗೆಟ್ ದೂರು ಕೊರಿಯೆರೆ ಮುಲ್ಕಿ ಪೊಲೀಸ್ ಠಾಣೆಗ್ ಪೋಂಡ ಪೋಲಿಸೆರ್ ಭಂಗ ಬರ್ಪದೆರ್ ಪಂದ್ ಅತಿಕಾರಿಬೆಟ್ಟು ಗ್ರಾಪಂ ಅಧ್ಯಕ್ಷೆರ್ ಮನೋಹರ ಕೋಟ್ಯಾನ್ ಆರೋಪ ಮಲ್ದೆರ್.
ಮಣಿಪಾಲ: ರೇಡಿಯೋ ಮಣಿಪಾಲ್ 90.4 mhz, ಡ್ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲ ಬೊಕ್ಕ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ದ ಒಟ್ಟು ಸೇರಿಗೆಡ್ ಆರೋಗ್ಯ ದರ್ಶನ ಲೇಸ್ ಋತುಚಕ್ರ ಬೊಕ್ಕ ಆಯಿತ ಏರುಪೇರ್ ದ ಬಗೆಟ್ ಜ.11 ಸನಿಯಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಮಣಿಪಾಲ ಕೆ.ಎಂ.ಸಿ ದ ಸ್ತ್ರೀರೋಗ ವಿಭಾಗಡ್ ಸಹಾಯಕ ಪ್ರಾಧ್ಯಾಪಕೆರಾಯಿನ ಡಾ. ಸುನಯ ಎಸ್ ಪುರಾಣಿಕ್ ಪಾಲ್ ಪಡೆಯೆರೆ ಉಲ್ಲೆರ್. ಜ.12 ಕ್ ಮಧ್ಯಾಹ್ನ 1 ಗಂಟೆಗ್ ಮರುಪ್ರಸಾರ ಆಪುಂಡು.
ಕಾಸ್ರೋಡು ಜಿಲ್ಲೆದ ಬಿರುವೆರ್ ಕುಡ್ಲ (ರಿ.) ಪೈವಳಿಕೆ ಘಟಕದ ಪದಗ್ರಹಣ ಬೊಕ್ಕ ಉದಿಪನ ಲೇಸ್ ಗಣಹೋಮ ಬೊಕ್ಕ ಶ್ರೀ ಸತ್ಯನಾರಾಯಣ ಪೂಜೆದೊಟ್ಟಿಗೆ ಜ.8 ಐತಾರ ಶ್ರೀ ಅಯ್ಯಪ್ಪ ಭಜನಾ ಮಂದಿರ ಬಾಯಿಕಟ್ಟೆಡ್ ಗೌಜಿಡ್ ನಡತ್ಂಡ್.
ಈ ಲೇಸ್ ಗ್ ಬತ್ತಿನ ಫ್ರೆಂಡ್ಸ್ ಬಳ್ಳಾಲ್ ಬಾಗ್ ಬಿರುವೆರ್ ಕುಡ್ಲ (ರಿ.) ನೆತ್ತ ಸ್ಥಾಪಕಾಧ್ಯಕ್ಷೆರ್ ಉದಯ ಪೂಜಾರಿ ಬಳ್ಳಾಲ್ ಬಾಗ್ ಬೊಕ್ಕ ಮಲ್ಲ ಬಿನ್ನೆರೆನ ಮೆರವಣಿಗೆ ಜೋಡುಕಲ್ಲ್ ಜಂಕ್ಷನ್ ರ್ದ್ ಕುಡ್ಲದ ಪುಗರ್ತೆದ ಪಿಲಿಏಸ, ನಾಸಿಕ್ ಬ್ಯಾಂಡ್, ಚೆಂಡೆ ಕೊಂಬು, ವಾದ್ಯ ಬೊಕ್ಕ ಬೈಕ್ ರಾಲಿದೊಟ್ಟಿಗೆ ಬಾಯಿಕಟ್ಟೆದ ಜಂಕ್ಷನ್ ಆದ್ ಅಯ್ಯಪ್ಪ ಭಜನಾ ಮಂದಿರಗ್ ಬತ್ಂಡ್. ಬೊಕ್ಕ ನಡತಿನ ಸಭಾ ಲೇಸ್ ದ ಉದಿಪನನ್ ಕುಡ್ಲ ಸಂಘಟನೆದ ಸ್ಥಾಪಕಾಧ್ಯಕ್ಷೆರ್ ಉದಯ ಪೂಜಾರಿ ಮಲ್ತೆರ್. ಈ ಪೊರ್ತುಡು ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿತ ಗೌರವಾಧ್ಯಕ್ಷೆರ್ ಜಯಂತ ನಡುಬೈಲ್, ಕೇರಳದ ನಿವೃತ್ತ ಸಬ್ ಇನ್ಸ್ ಪೆಕ್ಟರ್ ಶೀನಪ್ಪ ಪೂಜಾರಿ ಅಲಾರು, ವಕೀಲೆರ್ ಚಂದ್ರಶೇಖರ ಅಮೀನ್, ಫ್ರೆಂಡ್ಸ್ ಬಳ್ಳಾಲ್ ಬಾಗ್ ಬಿರುವೆರ್ ಕುಡ್ಲ ನೆತ್ತ ಮಹಿಳಾ ವೇದಿಕೆದ ಅಧ್ಯಕ್ಷೆರ್ ವಿದ್ಯಾರಾಕೇಶ್, ಅಶೋಕನಗರದ ಬಿರುವೆರ್ ಕುಡ್ಲ ಮಹಿಳಾ ವೇದಿಕೆದ ಅಧ್ಯಕ್ಷೆರ್ ಸುಮಂಗಲ ಇತ್ತೆರ್. ಪೈವಳಿಕೆದ 8 ತರವಾಡ್ ದ ಹಿರಿಯೆರೆಗ್ ಮಾನಾದಿಗೆ ಮಲ್ತೆರ್. 2 ಕೈತಲ್ ದ ಪ್ರತಿಭೆಲೆಗ್ ಪ್ರತಿಭಾ ಪುರಸ್ಕಾರ ಬೊಕ್ಕ 3 ಬಡಪತ್ತ್ ದಕಲೆಗ್ ಪನವುದ ಸಕಾಯನ್ ಮಲ್ತೆರ್. ಬೊಕ್ಕ ಉದಯ ಪೂಜಾರಿ ಬಳ್ಳಾಲ್ ಬಾಗ್, ವಾಸು ಬಾಯಾರ್, ರಿತೇಶ್ ಅಂಚನ್ ಕುಲಶೇಖರ್ ಮೊಕ್ಲೆಗ್ ನೆಂಪುದ ಕಾಣಿಕೆ ಕೊರ್ದು ತಮ್ಮನ ಮಲ್ತೆರ್. ಪೈವಳಿಕೆ ಘಟಕದ ಲೆಕ್ಕಪರಿಶೋಧಕೆರ್ ಶ್ರೀಧರ್ ಅಮ್ಮೇರಿ ಎದ್ಕೊನಿಯೆರ್. ಕಾಸ್ರೋಡು ಜಿಲ್ಲಾ ಸಂಘಟನಾ ಕಾರ್ಯದರ್ಶಿ ಉದಯ ಕುಮಾರ್ ಅಮ್ಮೇರಿ ಪ್ರಾಸ್ತವಿಕವಾದ್ ಪಾತೆರ್ದ್, ಘಟಕದ ದ್ಯೇಯ ಉದ್ದೇಶಲೆನ್ ತೆರಿಪಾಯೆರ್. ಬೊಕ್ಕ ಘಟಕದ ಅಧ್ಯಕ್ಷೆರ್ ಗಣೇಶ ಪೂಜಾರಿ ಸಾನದ ಇಲ್ಲದಾರ್ ಅಧ್ಯಕ್ಷೆರ್ನ ಭಾಷಣ ಮಲ್ತೆರ್. ಆಯಿರ್ದ್ ಬೊಕ್ಕ ಪದಗ್ರಹಣ ನಡತ್ಂಡ್. ರಿತೇಶ್ ಅಂಚನ್ ಕುಲಶೇಖರ್ ಬೊಕ್ಕ ಜಯಂತಿ ಕೆ ಪೈವಳಿಕೆ ಲೇಸ್ ದ ಸುಧಾರಿಕೆ ಮಲ್ತೆರ್. ಘಟಕದ ಪ್ರಧಾನ ಕಾರ್ಯದರ್ಶಿ ಬಿತೇಶ್ ಕುಮಾರ್ ಕನಿಹಿತ್ತಿಲು ಸೊಲ್ಮೆ ಸಂದಾಯೆರ್. ಬೊಕ್ಕ ಕುಡ್ಲದ ಪಿಲಿಏಸ ಕೂಟರ್ದ್ ಪಿಲಿನಲಿಕೆ ಲೇಸ್ ನಡತ್ಂಡ್. ಸಮಾಜದ 500 ರ್ದ್ ಎಚ್ಚ ಬಾಂಧವೆರ್ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರಿಯೆರ್.
ಪುತ್ತೂರ್: ಎ.ಪಿ.ಎಂ.ಸಿ ಮಾರ್ಗದ ಸೂತ್ರಬೆಟ್ಟುದ ಬಾಡಿಗೆದ ಇಲ್ಲಡ್ ಇತ್ತಿನ ವಿವೇಕಾನಂದ ಯಾನೆ ಸತ್ಯನಾರಾಯಣ ಮೆರೆನ ಇಲ್ಲರ್ದ್ ಸುಮಾರ್ 75 ಸಾರ ಬಿಲೆತ ಬೇತೆ ಬೇತೆ ಸೊತ್ತುಲೆನ್ ಕಂಡಿನ ರಡ್ಡ್ ಕಲ್ವೆರೆನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಕೂರ್ನಡ್ಕ ನಿವಾಸಿಲಾಯಿನ ಮಹಮ್ಮದ್ ಮುಸ್ತಫಾ(28) ಬೊಕ್ಕ ಸವಣೂರು ಚಾಪಳ್ಳ ಶಮೀರ್(24) ಆರೋಪಿಲು. ಈ ಬಗೆಟ್ ಪುತ್ತೂರ್ ಪೇಂಟೆದ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ತ್ ದ್ ಇತ್ತೆರ್. ತನಿಖೆ ಸುರು ಮಲ್ತಿನ ಪೊಲೀಸೆರ್ ರಡ್ಡ್ ಜನ ಆರೋಪಿಲೆನ್ ಪತ್ ದೆರ್.
ಕುಡ್ಲ ಪೇಂಟೆದ ಜೈಲ್‌ರೋಡ್‌-ಕದ್ರಿ ಕಂಬುಲ ಮಾರ್ಗದ 5 ಮಾಲಿಗೆದ ಅಪಾರ್ಟ್ ಮೆಂಟ್ ದ 2ನೇ ಮಾಲಿಗೆದ ಫ್ಲ್ಯಾಟ್‌ದ ಬೆಡ್‌ರೂಮ್‌ಡ್ ಅಂಗಾರೆ ತೂ ಪೊತ್ತಿನ ಘಟನೆ ನಡತ್ಂಡ್.
ನೆಟ್ಟ್ ಒವ್ವೇ ಪ್ರಾಣಗ್ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್. ಜಾಗೆಗ್ ಕದ್ರಿ ಬೊಕ್ಕ ಪಾಂಡೇಶ್ವರ ಅಗ್ನಿಶಾಮಕ ದಳತಕುಲು ಬತ್ತ್ ದ್ ತೂ ತೆಕ್ಕಾದೆರ್ . ಹಾಸಿಗೆ ಬೊಕ್ಕ ಕೆಲವು ಸೊತ್ತುಲು ತೂಟ್ಟ್ ಪೊತ್ತ್ ದ್ಂಡ್.
