ಕೊಲ್ಕತ್ತಾಡ್ ನಡತಿನ ಶ್ರೀಲಂಕಾ ವಿರುದ್ಧದ ರಡ್ಡನೇ ಏಕದಿನ ಪಂತೊದ ಪೊರ್ತುಡು ಭಾರತ ಕ್ರಿಕೆಟ್ ತಂಡದ ಕೋಚ್ ರಾಹುಲ್ ದ್ರಾವಿಡ್ ಗ್ ಹುಷಾರ್ ಇಜ್ಜಂದೆ ಆತ್ಂಡ್.
ಮೇರ್ ನೆತ್ತೆರ್ ದ ಒತ್ತಡರ್ದ್ ನರಲೊಂದು ಇತ್ತೆರ್ ಪಂದ್ ವರದಿ ಆತ್ಂಡ್. ಮೆರೆಗ್ ವೈದ್ಯೆರ್ ಕೆಲವು ಮರ್ದ್ ನ್ ಕೊರ್ತೆರ್ ಪಂದ್ ತೆರಿದ್ ಬೈದ್ಂಡ್.
ಕುಡ್ಲ: ಬಾಂದೊಟ್ಟು ಶ್ರೀ ಕೋರ್ದಬ್ಬು ದೈವೊಲ್ಯಡ್ ಪುನರ್ ಪ್ರತಿಷ್ಠೆ, ಮಹಾಕಲಶಾಭಿಷೇಕ ಬೊಕ್ಕ ವರ್ಷಾಧಿದ ಕೋಲ ದೇರೆಬೈಲು ಶ್ರೀ ವಿಠಲದಾಸ ತಂತ್ರಿಲೆನ ಮುತಾಲಿಕೆಡ್ ಜ.25 ರ್ದ್ 29 ಮುಟ್ಟ ನಡಪರೆ ಉಂಡು.
ಜ.25 ಬುಧಾರ ಪ್ರಾರ್ತನೆ, ವಾಸ್ತು ಶಿಲ್ಪಿಲೆರ್ದ್ ಆಲಯ ಪರಿಗ್ರಹ, ತೋರಣ ಮೂರ್ತ, ದೈವೊಲೆನ ಭಂಡಾರ ಬರಿಯೆರೆ ಉಂಡು. ಬೊಕ್ಕ ವಾಸ್ತು ರಾಕ್ಷೋಘ್ನ ಹೋಮ, ಬಲಿ ನಡಪರೆ ಉಂಡು. ಜ.26 ಗಣಹೋಮ, ಶುದ್ಧಿ, ದೈವ ದರ್ಶನಡ್ ಪರ್ವಸೇವೆ ಆದ್ ಸಾರ್ವಜನಿಕ ಅನ್ನಸಂತರ್ಪಣೆ ನಡಪುಂಡು. ಬೊಕ್ಕ ಬಯ್ಯಗ್ ಕಟೀಲ್ ಮೇಳದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು. ಜ.27 ಶುಕ್ರಾರ ಚೌತಿ ಪರ್ಬ ಆದ್ ಅನ್ನಸಂತರ್ಪಣೆ ನಡಪುಂಡು. ಜ.28 ಸನಿಯಾರ ಶ್ರೀ ಕೋರ್ದಬ್ಬು ತನ್ನಿಮಾನಿಗ ದೈವೊಲೆನ ಕೋಲ ನಡಪರೆ ಉಂಡು. ಜ.29 ಐತಾರ ಸಭಾ ಲೇಸ್ ಆದ್ ಪೌರಾಣಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪುಂಡು. ಬೊಕ್ಕ ರಾತ್ರೆ ರಾಹುಗುಳಿಗ, ಗುಳಿಗ-ಪಂಜುರ್ಲಿ ದೈವೊಲೆನ ಕೋಲ ಬೊಕ್ಕ ಮಾರಿಬಲಿ ಆದ್ ಭಂಡಾರ ಪೋಪುಂಡು. ಈ ಮಾತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೋರ್ದಬ್ಬು ಸೇವಾ ಸಮಿತಿದ ಅಧ್ಯಕ್ಷೆರ್ ಬಾಲಕೃಷ್ಣ ರೈ ಬಾಂದೊಟ್ಟು ಗುತ್ತು, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಗಿರಿಧರ ಶೆಟ್ಟಿ, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್, ದೈವೊಲ್ಯದ ಗುರಿಕಾರೆರ್ ಅರುಣ್ ಗುರಿಕಾರ ಲೆಪ್ಪೋಲೆಡ್ ತೆರಿಪಾದೆರ್.
ಮಂಜೇಶ್ವರ: ಶಾಲೆದ ಗಾಡಿಗ್ ಬೈಕ್ ಗುದ್ದುದು ರಡ್ಡ್ ಕಲ್ಪಾರ್ಥಿಲು ಜಾಗೆಡೇ ತೀರ್ ಪೋಯಿನ ಘಟನೆ ಮಂಜೇಶ್ವರ ಕೈತಲ್ ದ ಮೀಂಜ ಬಾಳಿಯೂರುಡ್ ನಡತ್ಂಡ್.
ಈ ಘಟನೆಡ್ ಮೀಯಪದವುದ ಪ್ರೀತೇಶ್ ಶೆಟ್ಟಿ ಬೊಕ್ಕ ಅಭಿ ತೀರ್ ಪೋಯಿನಕುಲು ಪಂದ್ ತೆರಿದ್ ಬೈದ್ಂಡ್.
ಬೆಂಗ್ಲೂರ್: ಸೈಪುನ ಸ್ಥಿತಿಡ್ ಇತ್ತಿನ ಒಡು (ಪ್ಯಾಂಗೋಲಿಯನ್) ನ್ ಕೇರ್ದ್ ಅಯಿತ್ತ ವೋಡುಲೆನು (ಚಿಪ್ಪು) ಮಾರಿಯೆರೆ ತೂಯಿನ ಒರಿ ಆರೋಪಿನ್ ಬೊಕ್ಕ ಆಯಡ ಇತ್ತಿನ 30 ಕಿಲೊ ತೂಕದ ವೋಡುನು ಪೊಲೀಸೆರ್ ವಶಕ್ಕ್ ಪಡೆತೆರ್.
ನೆಟ್ಟ್ ಕಿರಣ್ ಪನ್ಪುನ ಆರೋಪಿ ಅರೆಸ್ಟ್ ಆತೆರ್. ಈ ಚಿಪ್ಪುದ ಬಿಲೆ 30 ಲಕ್ಷ ರೂ. ಪಂದ್ ಅಂದಾಜ್ ಮಲ್ಪರೆ ಆತ್ಂಡ್. ಅಂತಾರಾಷ್ಟ್ರೀಯ ಮಾರ್ಕೆಟ್ ಡ್ ಒಡುತ್ತ ವೋಡುಗು ಮಸ್ತ್ ಬೇಡಿಕೆ ಉಂಡು. ನೆನ್ ಸೌಂದರ್ಯ ವರ್ಧಕ ಸೊತ್ತುಲೆನ ಉತ್ಪಾದನೆಡ್ ಗಲಸುವೆರ್. ಹನುಮಂತ ನಗರ ಠಾಣೆಡ್ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ಮಲ್ತೊಂದು ಉಲ್ಲೆರ್.
ಡೆಲ್ಲಿ: ಮಾಜಿ ಕೇಂದ್ರ ಸಚಿವೆರ್, ಜೆಡಿಯು ಪಕ್ಷದ ಮಾಜಿ ಅಧ್ಯಕ್ಷೆರ್ ಶರದ್ ಯಾದವ್ (75) ಗುರುವಾರ ರಾತ್ರೆ ತೀರ್ ಪೋಯೆರ್.
ಈ ಮಾಹಿತಿನ್ ಮೆರೆನ ಮಗಲ್ ಸುಭಾಷಿಣಿ ಶರದ್ ಯಾದವ್ ಟ್ವೀಟ್‌ ಮಲ್ದೆರ್. ಆರ್ ಹುಷಾರ್ ಇಜ್ಜಂದೆ ಗುರುಗ್ರಾಮ್‌ದ ಫೋರ್ಟಿಸ್ ಆಸ್ಪತ್ರೆಗ್ ದಾಖಲ್ ಆದಿತ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್.
ಕುಡ್ಲ ಯುನಿವರ್ಸಿಟಿ ದೈಹಿಕ ಶಿಕ್ಷಣ ವಿಭಾಗ ಬೊಕ್ಕ ಸರಕಾರಿ ಪ್ರಥಮ ದರ್ಜೆ ಕಾಲೇಜ್, ಉಬಾರ್ ದ ಒಟ್ಟುಸೇರಿಗೆಡ್ ಆಂಜೋವ್ ನಕ್ಲೆಗ್ ಅಖಿಲ ಭಾರತ ಅಂತರ ವಿಶ್ವವಿದ್ಯಾಲಯ ಬಾಲ್ ಬ್ಯಾಡ್ಮಿಂಟನ್ ಚಾಂಪಿಯನ್‌ಶಿಪ್ 2022-23 ದ ಪಂತೊ ಜ.13 ಬೊಕ್ಕ ಜ.17 ಕ್ ಉಬಾರ್ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ಡ್ ನಡಪರೆ ಉಂಡು.
ಜ.13ಕ್ ನಡಪುನ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಯುನಿವರ್ಸಿಟಿದ ಪ್ರೊ. ಪಿ. ಸುಬ್ರಹ್ಮಣ್ಯ ಯಡಪಾಡಿತ್ತಾಯ ಒಯಿಸೊನ್ವೆರ್. ಗೌರವ ಉಪಸ್ಥಿತಿಡ್ ಪುತ್ತೂರ್ ಶಾಸಕೆರ್ ಸಂಜೀವ ಮಠಂದೂರು ಉಲ್ಲೆರ್. ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಸಚಿವೆರ್ ಕೆ.ಸಿ. ನಾರಾಯಣ ಗೌಡ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಇಂಧನ ಸಚಿವೆರ್ ಸುನೀಲ್ ಕುಮಾರ್, ಕುಡ್ಲ ಕಾಲೇಜ್ ದ ಜಂಟಿ ನಿರ್ದೇಶಕೆರ್ ಡಾ. ಜೆನಿಫರ್ ಲೋಲಿಟಾ ಸಿ, ಬಾಲ್ ಬ್ಯಾಡ್ಮಿಂಟನ್ ಫೆಡರೇಶನ್ ಆಫ್ ಇಂಡಿಯಾ ಪ್ರಧಾನ ಕಾರ್ಯದರ್ಶಿ ದಿನೇಶ್, ಬಾಲ್ ಬ್ಯಾಡ್ಮಿಂಟನ್‌ಡ್ 1ನೇ ಏಕಲವ್ಯ ಪ್ರಶಸ್ತಿ ಪುರಸ್ಕೃತೆರ್ ಮೊಹಮ್ಮದ್ ಲಿಯಾಸ್ ಬರಿಯೆರೆ ಉಲ್ಲೆರ್. ಜ.17 ಕ್ ಸಭಾ ಲೇಸ್ ನಡಪರೆ ಉಂಡು. ಈ ಲೇಸ್ ದ ಗುರ್ಕಾರ್ಮೆನ್ ಪುತ್ತೂರ್ ಶಾಸಕೆರ್ ಸಂಜೀವ ಮಠಂದೂರು ಒಯಿಸೊನ್ವೆರ್. ಕುಡ್ಲ ಯುನಿವರ್ಸಿಟಿದ ರಿಜಿಸ್ಟರ್ ಡಾ. ಕಿಶೋರ್ ಕುಮಾರ್ ಸಿ.ಕೆ ಇನಾಮು ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷೆರ್ ಡಾ.ಎಂ ಮೋಹನ್ ಆಳ್ವ, ಕಾಲೇಜ್ ಶಿಕ್ಷಣ ಇಲಾಖೆದ ಇಸೇಸ ಅಧಿಕಾರಿ ಡಾ. ಆರ್ ಶ್ರೀಕಾಂತ್, ಬೊಕ್ಕ ಗೌರವ ಉಪಸ್ಥಿತಿಡ್ ಬಾಲ್ ಬ್ಯಾಡ್ಮಿಂಟನ್ ಫೆಡರೇಶನ್ ಆಫ್ ಏಷ್ಯಾದ ಪ್ರಧಾನ ಕಾರ್ಯದರ್ಶಿ ವೈ ರಾಜಾ ರಾವ್, ಬಾಲ್ ಬ್ಯಾಡ್ಮಿಂಟನ್‌ಡ್ ಏಕಲವ್ಯ ಪ್ರಶಸ್ತಿ ಪಡೆತಿನ ಜಿ ಬಿ ನಾಗರಾಜ್ ಉಲ್ಲೆರ್ ಪಂದ್ ಕುಡ್ಲ ಯುನಿವರ್ಸಿಟಿ ಸಂಸ್ಥೆದ ಕಾರ್ಯದರ್ಶಿ, ಡಾ. ಜೆರಾಲ್ಡ್ ಡಿಸೋಜಾ, ಉಬಾರ್ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ.ಸುಬ್ಬಪ್ಪ ಕೈಕಂಬ, ರಿಜಿಸ್ಟರ್ ಡಾ. ಕಿಶೋರ್ ಕುಮಾರ್ ಸಿ.ಕೆ ಪಾಲ್ ಪಡೆವರೆ ಉಲ್ಲೆರ್.
ಬೆಂಗ್ಲೂರ್ ದ ಕಂಟೋನ್ಮೆಂಟ್ ರೈಲ್ವೇ ನಿಲ್ದಾಣಡ್ ತಿಗಲೆ ಬೇನೆಡ್ ಬೂರ್ದು ಯಾದಗಿರಿ ಜಿಲ್ಲೆದ ದೋರನಹಳ್ಳಿದ ಹಿರೇಮಠತ ವೀರಮಹಾಂತ ಶಿವಾಚಾರ್ಯ ಸ್ವಾಮೀಜಿ ತೀರ್ ಪೋಯೆರ್.
ಮೇರ್ ಜ. 11 ಕ್ ಬೆಂಗ್ಲೂರ್ ರ್ದ್ ಯಾದಗಿರಿಗ್ ಪೋನಗ ಈ ಘಟನೆ ನಡತ್ಂಡ್. ಮೆರೆನ್ ಕೂಡ್ಲೆ ಭಕ್ತೆರ್ ಆಸ್ಪತ್ರೆಗ್ ಲೆತೊಂದು ಪೋನಗ ತಾದಿ ನಡುಟ್ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್.
ಚಾಮರಾಜನಗರ: ಬೆನ್ನಿದಾರ್ ಒರಿ ಕಾಡ್ ಮುರ್ಗೊಲೆರ್ದ್ ಬುಲೆ ಒರಿಪಾವರೆ ನಾಯಿಗ್ ಪಿಲಿತ ಏಸ ಪಾಡಿನ ಘಟನೆ ಹನೂರು ತಾಲೂಕ್ ದ ಅಜ್ಜೀಪುರ ಗ್ರಾಮಡ್ ನಡತ್ಂಡ್.
ರೈತೆರ್ ಜಮೀನ್ ಡ್ ಬುಲೆಯಿನ ಬುಲೆನ್ ಕಾಡ್ ಮುರ್ಗೊಲೆರ್ದ್ ರಕ್ಷಣೆ ಮಲ್ಪುನ ದಿಟ್ಟಿಡ್ ನರಮಾನಿನ ಗೊಂಬೆ, ಲೌಡ್ ಸ್ಪೀಕರ್, ಜಾಗಟೆ-ಗಂಟೆ, ತಾರಾಯಿ ಮರಕ್ ತಗಡ್ ಪಾಡುವೆರ್. ಆಂಡ ಈ ರೈತೆ ನಾಯಿನೇ ಪಿಲಿ ಮಲ್ತ್ ಬುಡ್ತೆರ್. ನೆನ್ ಗಾಡಿಡ್ ಪೋಪುನ, ತಾದಿಡೆ ಪೋಪುನ ಜನಕುಲು ತೂದು ಪೋಡಿದೆರ್ ಪಂದ್ ತೆರಿದ್ ಬೈದ್ಂಡ್.
ಸುರತ್ಕಲ್ ಬಸ್ ಸ್ಟ್ಯಾಂಡ್ ದ ಕೈತಲ್ ಡ್ ಮೂಜಿ ವರ್ಷದ ಬಾಲೆವೊಂಜಿ ಸಾರ್ವಜನಿಕೆರೆಗ್ ತಿಕ್ ದ್ಂಡ್.
ಈ ಬಾಲೆದ ತರೆಕುಜಲ್ ದೆಪ್ಪಾದಿತ್ತೆರ್ . ಗುಲಾಬಿ ಬಣ್ಣದ ಅಂಗಿ ಪಾಡ್ದ್ಂಡ್. ಬಾಲೆದ ಪೋಷಕೆರೆನ್ ಪತ್ತೆ ಮಲ್ಪರೆ ಸಾರ್ವಜನಿಕೆರ್ ಪೊಲೀಸೆರೆಗ್ ಬಿನ್ನಾಪು ಮಲ್ದೆರ್. ಬಾಲೆನ್ ಕಳೆವೊನ್ನ ಪೋಷಕೆರ್ ಸುರತ್ಕಲ್ ಠಾಣೆಡ್ ಕೇನೊಲಿ ಪಂದ್ ಪೊಲೀಸೆರ್ ತೆರಿಪಾದೆರ್.
ಕುಡ್ಲ: “ಯುಎನ್ ಸಿನೆಮಾಸ್ ಬ್ಯಾನರ್ ಡ್ ನಿರ್ಮಾಣ ಆಯಿನ ಶಕಲಕ ಬೂಮ್ ಬೂಮ್ ತುಳು ಪಿಕ್ಚರ್ ಜ.20 ಗ್ ಬುಡುಗಡೆ ಆಪುಂಡು ಪಂದ್ ನಿರ್ಮಾಪಕೆರ್ ನಿತ್ಯಾನಂದ ನಾಯಕ್ ನರಸಿಂಗೆ ಪತ್ರಿಕಾಗೋಷ್ಠಿಡ್ ತೆರಿಪಾದೆರ್.
“ಕಾಮಿಡಿ, ಹಾರರ್, ಬೇತೆ ಬೇತೆ ಕಥೆತ ರೂಪಡ್ ಪಿಕ್ಚರ್ ನ್ ಶ್ರೀಶ ನಾಯಕ್ ಎಳ್ಳಾರೆ ನಿರ್ದೇಶನ ಮಲ್ದೆರ್. ನಿತ್ಯಾನಂದ ನಾಯಕ್ ನರಸಿಂಗೆ, ಉಮೇಶ್ ಪ್ರಭು ಮಾಣಿಬೆಟ್ಟು ನಿರ್ಮಾಪಕೆರಾದ್ ಉಲ್ಲೆರ್. ಡಾಲ್ವಿನ್ ಕೊಳಲಗಿರಿ ಸಂಗೀತ ನಿರ್ದೇಶಕರಾತೆರ್. ತುಳುನಾಡ್ ದ ಪುಗರ್ತೆದ ಛಾಯಾಗ್ರಾಹಕೆರಾಯಿನ ಪ್ರಜ್ವಲ್ ಸುವರ್ಣ ಬೊಕ್ಕ ಅರುಣ್ ರೈ ಪುತ್ತೂರ್ ಮೊಕುಲು ಕ್ಯಾಮರಾ ಮ್ಯಾನ್ ಆದ್ ಉಲ್ಲೆರ್ ಪಂಡೆರ್. ಕಥಾನಾಯಕೆಯಾದ್ ಗೊಡ್ವಿನ್ ಸ್ಪಾರ್ಕಲ್ ಬೊಕ್ಕ ಕಥಾನಾಯಕಿಯಾದ್ ಲಕ್ಷಾ ಶೆಟ್ಟಿ ಉಲ್ಲೆರ್. ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್, ಉಮೇಶ್ ಮಿಜಾರ್, ಪ್ರವೀಣ್ ಮರ್ಕಮೆ, ಮಿಮಿಕ್ರಿ ಶರಣ್, ರೂಪಶ್ರೀ ವರ್ಕಾಡಿ, ಮನೋಹರ್‌ ಶೆಟ್ಟಿ, ನಂದಳಿಕೆ, ವಸಂತ್ ಮುನಿಯಾಲ್, ಹರೀಶ್ ಗಾಳಿಪಟ, ಸುನಿಲ್ ಕಡ್ತಲ, ಯತೀಶ್ ಪೂಜಾರಿ, ಯಶವಂತ್, ಪ್ರವೀಣ್ ಆಚಾರ್ಯ, ಕಾಮಿಡಿ ಕಿಲಾಡಿ ಪುಗರ್ತೆದ ರಾಧೇಶ್, ಕಾಮಿಡಿ ಗ್ಯಾಂಗ್ ಪುಗರ್ತೆದ ರಾಜೇಶ್ ದಾನಶಾಲೆ, ಲಂಚುಲಾಲ್, ರಾಜೇಶ್ವರಿ ಕುಲಾಲ್, ಧೀರಜ್, ಶಿವಾನಂದ, ಯಜ್ಞೇಶ್ ಶೆಟ್ಟಿ ಅಭಿನಯ ಮಲ್ದೆರ್. ದ ಪತ್ರಿಕಾಗೋಷ್ಠಿಡ್ ಗೊಡ್ವಿನ್ ಸ್ಪಾರ್ಕಲ್, ಸುನೀಲ್ ಕಡ್ತಲ, ಲಂಚು ಲಾಲ್, ಡಾಲ್ವಿನ್ ಕೊಳಲಗಿರಿ ಇತ್ತೆರ್.
