Times of kudla

ಗೋರೆಗಾಂವ್ ಕರ್ನಾಟಕ ಸಂಘದ ತುಳು ಪರ್ಬ ದತ್ತಿ ನಿಧಿ ಲೇಸ್

ಬೊಂಬೈ: ಬಿಸು ಪರ್ಬನ್ ಇತ್ತೆದ ಕಾಲಡ್ ದೇಶ ಇಡೀ ಆಚರಣೆ ಮಲ್ಪುವೆರ್. ಉಂದು ಪ್ರಕೃತಿದ ಆಚರಣೆ. ದೇಶದ ಬೇತೆ ಬೇತೆ ರಾಜ್ಯಲೆಡ್ ಬೇತೆ ಬೇತೆ ಪುದರ್ ಡ್ ಈ ಪರ್ಬನ್ ಆಚರಣೆ ಮಲ್ಪುವೆರ್. ಈ ಪರ್ಬ ತುಳುನಾಡ್ ದ ಸಂಸ್ಕ್ರತಿನ್ ಒರಿಪಾದ್ ಬುಲೆಪಾವುನ ಲೇಸ್ ಪಂದ್ ಮಲಾಡ್ ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿದ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್, ಕುಲಾಲ ಸಂಘ ಬೊಂಬೈದ ಚರ್ಚ್ ಗೇಟ್ – ದಹಿಸರ್ ಕೈತಲ್ದ ಸಮಿತಿದ ಉಪಕಾರ್ಯಾಧ್ಯಕ್ಷೆರ್ ರತ್ನಾ ಡಿ. ಕುಲಾಲ್ ಪಂಡೆರ್.

ಗೋರೆಗಾಂವ್ ಕರ್ನಾಟಕ ಸಂಘ ಬೊಕ್ಕ ಸಂಘದ ಯುವ ವಿಭಾಗದ ಒಟ್ಟುಸೇರಿಗೆಡ್ ಎ.14 ಕ್ಕ್ ಬಿಸು ಪರ್ಬದ ಲೆಕ್ಕೊಡು ನಿಟ್ಟೆ ಸುಧಾಕರ ಶೆಟ್ಟಿ ಬೊಕ್ಕ ಎಸ್. ಜೆ. ಶೆಟ್ಟಿ ನೆಂಪುಗಾದ್ ಜಯಕರ ದೇಜಪ್ಪ ಪೂಜಾರಿ ವೇದಿಕೆಡ್ ತುಳು ಪರ್ಬ ದತ್ತಿನಿಧಿ ಲೇಸ್ ಗೋರೆಗಾಂವ್ ಪಶ್ಚಿಮದ ಆರೇ ರೋಡ್‌ ಡ್ ಇಪ್ಪುನ ಕೇಶವ ಗೋರೆ ಸ್ಮಾರಕ ಟ್ರಸ್ಟ್ ದ ರಡ್ಡನೇ ಮಾಳಿಗೆದ ಸಭಾಗೃಹಡ್ ಸಂಘದ ಅಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್ ಮೆರೆನ ಅಧ್ಯಕ್ಷತೆಡ್ ನಡತ್ಂಡ್.

ಮಲ್ಲ ಬಿನ್ನೆರಾದ್ ಬತ್ತಿನ ರತ್ನಾ ಡಿ. ಕುಲಾಲ್ ಮೇರ್ ಪಾತೆರ್ದ್, ಬಿಸು ಪರ್ಬ ತುಳು ಪರ್ಬ ಆತ್ಂಡ್. ನೆತ್ತ ಆಚರಣೆ ಕಮ್ಮಿ ಆದಿತ್ತ್ಂಡಲ ಇಂಚಿನ ಸಂಘಟನೆಲೆನ ಮುಕೇನ ಗೌಜಿಡ್ ಆಚರಣೆ ಆವೊಂದುಂಡು. ಯುಗದ ಸುರುನೇ ಯುಗಾದಿ. ಕರಿದ್ ಪೋಯಿನೆನ್ ಮರತ್ ದ್ ಪೊಸತ್ ನ್ ಸ್ವಾಗತಿಸಾವುನ ಪರ್ಬನೇ ಯುಗಾದಿ. ಗೋರೆಗಾಂವ್ ಕರ್ನಾಟಕ ಸಂಘ ಬಿಸು ಪರ್ಬದ ಪೊರ್ತುಡು ತುಳು ಪರ್ಬದ ಮುಕೇನ ತುಳು ಕನ್ನಡಿಗೆರೆನ್ ಒಂಜಿ ಕಡೆ ಸೇರ್ಸಾದ್ ನಮ್ಮ ಭಾಷೆ ಸಂಸ್ಕೃತಿನ್ ಎಚ್ಚ ಮಲ್ತೊಂದು ಉಂಡು. ನನ ಸಂಘದ ಪೊಸ ವಿಶಾಲವಾಯಿನ ಸಭಾಗೃಹಡ್ ಸಂಘದ ಇಂಚಿನ ಲೇಸ್ ನಡಪುಲೆಕ್ಕ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಚಾವಡಿಡ್ ಇತ್ತಿನ ಸಂಘದ ಟ್ರಸ್ಟಿಲು ದೇವಲ್ಕುಂದ ಭಾಸ್ಕರ ಶೆಟ್ಟಿ ತುಡರ್ ಅರ್ಲಾದ್ ಲೇಸ್ ಗ್ ಚಾಲನೆ ಕೊರಿಯೆರ್.

ಅಧ್ಯಕ್ಷತೆನ್ ಒಯಿಸೊಂದು ಸಂಘದ ಅಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್ ಪಾತೆರ್ದ್, ಇನಿ ಮಲ್ಲ ಬಿನ್ನೆರ್ ರತ್ನ ಕುಲಾಲ್ ಮೇರ್ ತನ್ನ ಮುತ್ತುದಂಚಿನ ಪಾತೆರರ್ದ್ ನಮಕ್ ಎಡ್ಡೆ ಬಯಕಿಯೆರ್. ತುಳು ಪರ್ಬ ಲೇಸ್ ದ ಮುಕೇನ ನಮ ಮಾತೆರ್ಲಾ ಇನಿ ಒಗ್ಗಟ್ಟಾತ, ಪೊಸ ಪ್ರತಿಭೆಲೆಗ್ ಅವಕಾಶ ಕೊರ್ಪುಲೆಕ್ಕ ಆವಡ್, ಗೋರೆಗಾಂವ್ ಪೂರ್ವದ ತುಳು ಕನ್ನಡಿಗೆರ್ ಸಂಘಡ್ ಕ್ರಿಯಾಶೀಲತೆರ್. ಅಭಿವೃದ್ಧಿದಂಚಿ ಪೋವೊಂದು ಇಪ್ಪುನ ಸಂಘದ ಕಟ್ವಾನದ ಪುನರ್ ನಿರ್ಮಾಣ ಆವೊಂದುಂಡು. ಸಂಘದ ಕಾರ್ಯಾಲಯದ ಕೊರತೆರ್ದ್ ಸದಸ್ಯೆರ್ ದೂರ ಅಯೆರೆ ಬಲ್ಲಿ ಪಂದ್ ಇನಿ ಬೊಲ್ಪುಗು ತಾತ್ಕಾಲಿಕವಾದ್ ಗೋರೆಗಾಂವ್ ಪಶ್ಚಿಮ, ಜವಾಹರ್ ನಗರದ ಎಸ್ ವಿ ರೋಡ್ ಲಕ್ಷಿ ನಿವಾಸಡ್ ಸಂಘಗ್ ಪೊಸ ಕಾರ್ಯಾಲಯನ್ ಉದಿಪನ ಮಲ್ತ್ಂದ ಪಂದ್ ಮಾತೆರೆಗ್ಲಾ ಬಿಸು ಪರ್ಬದ ಎಡ್ಡೆಪ್ಪು ಸಂದಾಯೆರ್.

ಚಾವಡಿಡ್ ಪ್ರಧಾನ ಕಾರ್ಯದರ್ಶಿ ಸರಿತಾ ಸುರೇಶ್ ನಾಯಕ್, ಉಪಾಧ್ಯಕ್ಷೆರ್ ವಿಶ್ವನಾಥ ಕೆ. ಶೆಟ್ಟಿ ಬೊಕ್ಕ ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಶಿವಾನಿ ಎಚ್. ಆಚಾರ್ಯ ಇತ್ತೆರ್.

ಸಂಘದ ಸದಸ್ಯೆರ್ದ್, ಸಂಘದ ಗ್ರಂಥಾಲಯದ ಸದಸ್ಯೆರ್ದ್ ಬೊಕ್ಕ ಯುವ ವಿಭಾಗದ ಸದಸ್ಯೆರ್ದ್ ಬೇತೆ ಬೇತೆ ಲೇಸ್ ನಡತ್ಂಡ್. ಗೌರವ ಪ್ರಧಾನ ಕಾರ್ಯದರ್ಶಿ ಸರಿತಾ ಸುರೇಶ್ ನಾಯಕ್ ಬೊಕ್ಕ ಪ್ರಮೀಳಾ ಆಚಾರ್ಯ ಲೇಸ್ ನ್ ಸುಧಾರಿಕೆ ಮಲ್ತೆರ್. ಜತೆ ಕಾರ್ಯದರ್ಶಿ ಶಾಂತ ಎನ್ ಶೆಟ್ಟಿ ಸಂಘದ ಚಟುವಟಿಕೆಲೆನ ಬಗೆಟ್ಟ್ ಪೊಲಬು ಕೊರಿಯೆರ್.

ಯುವ ವಿಭಾಗದ ಶಕುಂತಲಾ ಆಚಾರ್ಯ ಮೇರ್ ತುಳುನಾಡ್ ದ ಬಗೆಟ್ಟ್ ಸಂಕ್ಷಿಪ್ತವಾದ್ ಪಾತೆರಿಯೆರ್. ಸಂಘದ ಯುವ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಸುಚಲತಾ ಪೂಜಾರಿ, ವಿದ್ಯಾ ಆಚಾರ್ಯ, ಹರಿಣಾಕ್ಷಿ ಶೆಟ್ಟಿ, ಸುಗುಣಾ ಎಸ್. ಬಂಗೇರ ಲೇಸ್ ದ ಯಶಸ್ಸ್ ಗ್ ಸಹಕಾರ ಕೊರಿಯೆರ್. ಮಾನ್ವಿ ಶೆಟ್ಟಿ ಸೊಲ್ಮೆ ಸಂದಾಯೆರ್. ಸಂಘದ ಸದಸ್ಯೆರ್ ಪರಿಸರದ ತುಳು ಕನ್ನಡಿಗೆರ್ ಬೊಕ್ಕ ಮಲಾಡ್ ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿದ ಮಹಿಳಾ ವಿಭಾಗದ ಸದಸ್ಯೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.

ರೋಟರಿ ವಲಯ ಅಧಿಕಾರಿಯಾದ್ ವಿಶ್ವನಾಥ ನಡುತೋಟ ನೇಮಕ

ರೋಟರಿ ಜಿಲ್ಲೆ 31,81 ವಲಯ 5 ತ್ತ 2024-25 ನೇ ಸಾಲ್ ಗ್ ಜೋನಲ್ ಲೆಫ್ಟಿನೆಂಟ್ ಆದ್ ಸುಬ್ರಹ್ಮಣ್ಯ ರೋಟರಿ ಕ್ಲಬ್ ದ ಪೂರ್ವಾಧ್ಯಕ್ಷೆರ್ ರೊ.ವಿಶ್ವನಾಥ ನಡುತೋಟ ಮೇರ್ ನೇಮಕ ಆತೆರ್.

ಮೆರೆನ ಅಧ್ಯಕ್ಷ ಅವಧಿಡ್ ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಗ್ ಸುರುತ್ತ ಸರ್ತಿ ಅಂತರರಾಷ್ಟ್ರೀಯ ಸೈಟೇಶನ್ ಅವಾರ್ಡ್ ಬೈದ್ಂಡ್. ಮೇರ್ ಜೆಸಿಐ ಸುಬ್ರಹ್ಮಣ್ಯ ಕುಕ್ಕೆ ಸ್ಥಾಪಕ ಅಧ್ಯಕ್ಷೆರ್ ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ಸುಬ್ರಹ್ಮಣ್ಯ ಲಿಜೆನ್ ದ ಸ್ಥಾಪಕ ಅಧ್ಯಕ್ಷೆರ್ ಬೊಕ್ಕ ಸುಬ್ರಹ್ಮಣ್ಯ ಪ್ರೆಸ್ ಕ್ಲಬ್ ದ ಸ್ಥಾಪಕ ಅಧ್ಯಕ್ಷೆರ್ ಆತೆರ್.

ಹಿರಿಯ ನಟೆ ದ್ವಾರಕೀಶ್ ನನ ನೆಂಪು ಮಾತ್ರ

ಕನ್ನಡದ ಹಿರಿಯ ನಟೆ ದ್ವಾರಕೀಶ್ (81) ಮೇರ್ ಇನಿ ತಿಗಲೆ ಬೇನೆಡ್ ದೇವೆರೆ ಪಾದೊ ಸೇರಿಯೆರ್.

ನಿರ್ದೇಶಕೆರಾದ್, ನಿರ್ಮಾಪಕೆರಾದ್ ಚಿತ್ರರಂಗಡ್ ಸೇವೆ ಸಂದಾದೆರ್. ಹುಷಾರ್ ಇಜ್ಜಂದೆ ಆಯಿನ ಮೇರ್, ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋತೆರ್.

ಕನ್ನಡದ ಕುಳ್ಳೆ ಪನ್ಪುನ ಪುಗರ್ತೆ ಪಡೆಯಿನ ಮೆರೆನ ಸಾವುದ ಬಗೆಟ್ಟ್ ಕುಟುಂಬಸ್ಥೆರ್ ತೆರಿಪಾದೆರ್.

ಸುರತ್ಕಲ್ ಪಟ್ಲ ಫೌಂಡೇಶನ್ ಘಟಕದ 4ನೇ ವರ್ಷದ ಉಚ್ಚಯ

ಸುರತ್ಕಲ್: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ.) ಸುರತ್ಕಲ್ ಘಟಕದ 4ನೇ ವರ್ಷದ ಉಚ್ಚಯ ಸುರತ್ಕಲ್ ಬಂಟರ ಭವನಡ್ ನಡತ್ಂಡ್.

ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತಿನ ಯಕ್ಷಧ್ರುವ ಯಕ್ಷ ಶಿಕ್ಷಣ ಪ್ರಧಾನ ಸಂಚಾಲಕೆರ್ ವಾಸುದೇವ ಐತಾಳ್ ಯುಎಸ್ ಎ ಪಾತೆರ್ದ್, “ಅಮೇರಿಕಡ್ ಯಕ್ಷಗಾನ ಮಲ್ಪಾವುನ ಮುಕೇನ ಅಲ್ಪದ ಜನಕ್ಲೆಗ್ ನಮ್ಮ ತುಳುನಾಡ್ ದ ಸಂಸ್ಕೃತಿಯ ಪರಿಚಯ ಮಲ್ತಿನ ಕೀರ್ತಿ ಪಟ್ಲ ಸತೀಶ್ ಶೆಟ್ಟಿ ಮೆರೆಗ್ ಸಂದೊಡು. ಯಕ್ಷಧ್ರುವ ಟ್ರಸ್ಟ್ ಈ ಮುಕೇನ ಕಡಲಾಯೆರೆಡ್ ಲ ಯಕ್ಷಪ್ರೇಮಿಲೆನ ಬಾಂಧವ್ಯಡ್ ಉಂಡು. ಯುರೋಪ್ ರಾಷ್ಟ್ರಲೆಡ್ ಪಟ್ಲ ಕೂಟದೊಟ್ಟಿಗೆ ಸಂಚಾರ ನಡಪಾಯಿನವು ಎನ್ನ ಜೀವನದ ಮರಪರೆ ಅವಂದಿನ ದಿನಕುಲು, ನನಲ ಅಮೇರಿಕಡ್ ಪಟ್ಲೆರೆನ ಲೇಸ್ ಗ್ ಸಹಕಾರ ಕೊರ್ಪೆ” ಪಂದ್ ಪಂಡೆರ್.

ಯಕ್ಷಧ್ರುವ ಪಟ್ಲ ಫೌಂಡೇಶನ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಪಾತೆರ್ದ್, “ಎನನ್ ಅಪ್ಪೆ ಕಟೀಲ್ ದುರ್ಗೆ ಯಕ್ಷಗಾನ ಕಲಾವಿದೆರೆನ ಸೇವೆ ಮಲ್ಪುಲೆಕ್ಕ ಅನುಗ್ರಹ ಕೊರ್ತಲ್, ಆಲೆನ ಆಣತಿದಂಚೆನೆ ಯಾನ್ ಇನಿ ಯಕ್ಷಗಾನ ಕಲಾವಿದೆರೆಗ್ ಸಕಾಯ ಮಲ್ತೊಂದು ಉಲ್ಲೆ. ಸುರತ್ಕಲ್ ಡ್ ಸಂಘಟನೆದ ಘಟಕ ಮಸ್ತ್ ಪೊರ್ಲು ಕೆಲಸ ಮಲ್ತೊಂದು ಉಂಡು. ಉಂದುವೇ ರೀತಿ ನನಾತ್ ಎಡ್ಡೆ ಕೆಲಸನ್ ಸುರತ್ಕಲ್ ಘಟಕ ಮಲ್ಪಡ್” ಪಂದ್ ಎಡ್ಡೆಪ್ಪು ಬಯಕಿಯೆರ್.

ಚಾವಡಿಡ್ ಪಟ್ಲ ಫೌಂಡೇಶನ್ ಸುರತ್ಕಲ್ ಘಟಕದ ಗೌರವಾಧ್ಯಕ್ಷೆರ್ ಮಹಾಬಲ ಪೂಜಾರಿ ಕಡಂಬೋಡಿ, ಅಧ್ಯಕ್ಷೆರ್ ಸುಧಾಕರ ಎಸ್. ಪೂಂಜ, ನಿಕಟಪೂರ್ವ ಅಧ್ಯಕ್ಷೆರ್ ಸಂತೋಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಎಂ.ಜಿ. ರಾಮಚಂದ್ರ ರಾವ್, ಲೀಲಾಧರ ಶೆಟ್ಟಿ ಕಟ್ಲ, ಪಿ.ಕೃಷ್ಣಮೂರ್ತಿ ಸುರತ್ಕಲ್, ಚಂದ್ರಶೇಖರ ಮಾಡ ಕುದ್ರಾಡಿಗುತ್ತು, ಮಹಿಳಾ ಘಟಕದ ಗೌರವಾಧ್ಯಕ್ಷೆರ್ ಆರತಿ ಆಳ್ವ, ಗೋವಿಂದ ದಾಸ ಕಾಲೇಜ್ ನಿವೃತ್ತ ಉಪ ಪ್ರಾಂಶುಪಾಲೆರ್ ಪ್ರೊ. ರಮೇಶ್ ಭಟ್ ಯಸ್.ಜಿ., ಸಂಚಾಲಕೆರ್ ವಿನಯ ಆಚಾರ್, ಕೋಶಾಧಿಕಾರಿ ಟಿ ಎನ್ ರಮೇಶ್, ಟ್ರಸ್ಟಿಲು ಕೃಷ್ಣ ಶೆಟ್ಟಿ ಶ್ರೀ ದ್ವಾರ, ಸಹನಾ ರಾಜೇಶ್ ರೈ, ದೇವೇಂದ್ರ ಕೆ ಶೆಟ್ಟಿ, ನಾರಾಯಣ ಶೆಟ್ಟಿ ಕಟ್ಲ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಹಿರಿಯ ಯಕ್ಷಗಾನ ಕಲಾವಿದೆರ್ ನೆಲ್ಲಿಕಟ್ಟೆ ನಾರಾಯಣ ಹಾಸ್ಯಗಾರ್ ಮೆರೆಗ್ ಮಾನಾದಿಗೆ ಮಲ್ತೆರ್. ಹಿರಿಯ ತಾಳಮದ್ದಳೆ ಕಲಾವಿದೆರ್ ಮಹಾಬಲ ಶೆಟ್ಟಿ ಜೋಕಟ್ಟೆ, ಹಿರಿಯ ತಾಳಮದ್ದಳೆ ಕಲಾವಿದೆ ಜಯಂತಿ ಹೊಳ್ಳ ಕೃಷ್ಣಾಪುರ, ಹಿರಿಯ ತಾಳಮದ್ದಳೆ ಕಲಾವಿದೆರ್ ವಾಸುದೇವ ಆಚಾರ್ಯ ಕುಳಾಯಿ, ಯಕ್ಷಗಾನ ಕಲಾವಿದೆರ್ ಕರುಣಾಕರ ಪೂಜಾರಿ ಮಧ್ಯ, ಯಕ್ಷಗಾನ ಸೇವಾಕರ್ತೆರ್ ಲಿಂಗಪ್ಪ ಶೆಟ್ಟಿ ಕೃಷ್ಣಾಪುರ ಮೊಕ್ಲೆಗ್ ಸನ್ಮಾನ ನಡತ್ಂಡ್.

ಸಂಘಟನೆದ ಮುತಾಲಿಕೆಡ್ ಇಂಚಿಪ್ಪ ದುರ್ಮರಣ ಆಯಿನ ಯಕ್ಷ ಸಿರಿ ತರಗತಿದ ವಿದ್ಯಾರ್ಥಿ ದಿ| ಯಶ್ವಿತ್ ಅಗರಮೇಲು ಮೆರೆನ ಪೋಷಕೆರೆಗ್ ಆರ್ಥಿಕ ಸಕಾಯ ಮಲ್ತೆರ್.

ಪಟ್ಲ ಫೌಂಡೇಶನ್ ಟ್ರಸ್ಟ್ ಗ್ ಪೊಸ ಟ್ರಸ್ಟಿಲಾದ್ ಚರಣ್ ಜೆ ಶೆಟ್ಟಿ ಕುಳಾಯಿಗುತ್ತು, ರವಿ ಶೆಟ್ಟಿ ಸುರತ್ಕಲ್, ಧನಪಾಲ್ ಶೆಟ್ಟಿಗಾರ್ ತಡಂಬೈಲ್, ಸವಿತಾ ಭವಾನಿಶಂಕರ್ ಶೆಟ್ಟಿ ಬಾಳ ಸೇರ್ಪಡೆ ಆಯೆರ್.

ಯಕ್ಷಧ್ರುವ ಪಟ್ಲ ಫೌಂಡೇಶನ್ ಕೇಂದ್ರ ಸಮಿತಿ ಸಂಘಟನಾ ಕಾರ್ಯದರ್ಶಿ ಜಗನ್ನಾಥ ಶೆಟ್ಟಿ ಬಾಳ ವರದಿ ಓದಿಯೆರ್. ಅಧ್ಯಕ್ಷೆರ್ ಸುಧಾಕರ್ ಎಸ್. ಪೂಂಜಾ ಎದ್ಕೊನಿಯೆರ್.ಪ್ರಧಾನ ಕಾರ್ಯದರ್ಶಿ ಬಾಳ ಗಂಗಾಧರ ಪೂಜಾರಿ ಚೇಳಾಯರು ಸೊಲ್ಮೆ ಸಂದಾಯೆರ್. ಸುಧಾ ಶೆಟ್ಟಿ ಲೇಸ್ ನ್ ಸುಧಾರಿಕೆ ಮಲ್ತೆರ್. ಬೊಕ್ಕ ಪಾವಂಜೆ ಮೇಳದಕ್ಲೆರ್ದ್ ಅಯೋಧ್ಯಾ ದೀಪಾ ಯಕ್ಷಗಾನ ಪ್ರದರ್ಶನ ಆಂಡ್.

ಪಟ್ಲ ಸಂಭ್ರಮದ ಲೆಪ್ಪೋಲೆ ಬುಡುಗಡೆ:

ಈ ಪೊರ್ತುಡು ಮೇ 26 ಐತಾರ ಅಡ್ಯಾರ್ ಗಾರ್ಡನ್ ಡ್ ನಡಪುನ “ಪಟ್ಲ ಸಂಭ್ರಮ” ಲೇಸ್ ದ ಲೆಪ್ಪೋಲೆನ್ ಲೇಸ್ ಡ್ ಬುಡುಗಡೆ ಮಲ್ತೆರ್.

ಮುಂಗೆ ಬೈದಿನ ಬಟಾಟೆ ತಿನಿಯೆರೆ ಬಲ್ಲಿ!

ಮುಂಗೆ ಬೈದಿನ ಬಟಾಟೆ ತಿಂದ್ಂಡ ಜೀರ್ಣಕಾರಿ ಸಮಸ್ಯೆ ಸುರು ಆಪುಂಡು.

ನರಮಂಡಲದ ಮಿತ್ತ್ ದುಷ್ಪರಿಣಾಮ ಬೂರುಂಡು.‌ ನೆತ್ತೆರ್ ದ ಒತ್ತಡ ಜಾಸ್ತಿ ಆಪುಂಡು. ಇಂಚಿನ ಬಟಾಟೆನ್ ಮಧುಮೇಹಿಲು ತಿಂದ್ಂಡ, ನನಾತ್ ಎಚ್ಚದ ಸಮಸ್ಯೆ ಸುರು ಆಪುಂಡು.

ನೆರ್ದ್ ಜ್ವರಲ ಬರ್ಪುಂಡು. ಬಂಜಿನಕುಲು ತಿಂದ್ಂಡ ಗಂಭೀರ ಆರೋಗ್ಯ ಸಮಸ್ಯೆನ್ ಎದುರಿಸಾವೊಡಾಪುಂಡು. ಪಚ್ಚೆ ಬಟಾಟೆಲ ಆರೋಗ್ಯಗ್ ಎಡ್ಡೆ ಅತ್ತ್.‌ ಮುಂಗೆ ಬೈದಿನ ಬಟಾಟೆಡ್ ‌ವಿಷತ್ವ ಅಂಶ ಇಪ್ಪುಂಡು ಪಂದ್ ತಜ್ಞೆರ್ ಪಂತೆರ್.

ಸೂಪರ್ ಹಿಟ್ ನಾಟಕ “ಕಥೆ ಎಡ್ಡೆಂಡು” 100ನೇ ಪ್ರದರ್ಶನ

ಮಂಜೇಶ್ವರ ಶಾರದಾ ಆರ್ಟ್ಸ್ ಕಲಾವಿದೆರ್ (ರಿ.) ತುಳು ರಂಗಭೂಮಿಡ್ ಸಂಚಲನ ಪುಟ್ಟಾವೊಂದಿಪ್ಪುನ ಕೂಟ.

ಸಾಮಾಜಿಕ ಹಾಸ್ಯ ನಾಟಕದ ಮುಖೇನ ಕರಿನ 24 ವರ್ಷೊರ್ದಿಂಚಿ ರಂಗಭೂಮಿಡ್ ಕಲಾ ಸೇವೆ ಮಲ್ಪುನ ಈ ಕೂಟ ಈ ವರ್ಷ 25ನೇ ವರ್ಷದ ಬೊಳ್ಳಿ ಪರ್ಬದ ಅಟ್ಟಣೆಡುಂಡು. ರಂಗಭೂಮಿಡ್ ಇತಿಹಾಸ ಬರೆಯೆರೆ ಪಿದಾಡ್ದಿನ ಈ ವರ್ಷದ ಸೂಪರ್ ಹಿಟ್ ನಾಟಕ “ಕಥೆ ಎಡ್ಡೆಂಡು” ಕಿನ್ಯ ಅವಧಿಡ್ ನೂದು ಪ್ರದರ್ಶನ ಕೊರಿನ ಸುರುತ್ತ ತುಳು ಸಾಮಾಜಿಕ ನಾಟಕ ಪಂಡ ತಪ್ಪಾವಂದ್. ಎಪ್ರಿಲ್ 16ನೇ ತಾರೀಕ್ ದಾನಿ ಅಲಂಕಾರ್ ಡ್ 100ನೇ ಪ್ರದರ್ಶನ ಕೊರ್ಪಿನ ಈ ನಾಟಕ ಎಪ್ರಿಲ್ 20ನೇ ತಾರೀಕ್ ದಾನಿ ಕದಿರೆದ ಮಂಜುನಾಥನ ಪುಣ್ಯ ಮಣ್ಣ್ ಡ್ ಶತ ಸಂಭ್ರಮ ಕಾರ್ಯಕ್ರಮಡೊಟ್ಟು ವಿಶೇಷ ಪ್ರದರ್ಶನ ಕೊರಿಯೆರೆ ಉಲ್ಲೆರ್.

ಈ ಕಾರ್ಯಕ್ರಮೊಟು ತುಳುನಾಡ್ದ ಮಾತಾ ದಿಗ್ಗಜ ರಂಗ ಕಲಾವಿದೆರ್, ನಿರ್ದೇಶಕೆರ್, ನಾಟಕ ರಚನಾಕಾರೆರ್ ಪಾಲ್ ಪಡೆಯೆರೆ ಉಲ್ಲೆರ್. ಶಾರದಾ ಆರ್ಟ್ಸ್ ಕೂಟದ ಗುರ್ಕಾರೆ ಗಡಿನಾಡ ಕಲಾನಿಧಿ ಕೃಷ್ಣ ಜಿ ಮಂಜೇಶ್ವರ ಮೆರೆನ ಮುತಾಲಿಕೆಡ್ ಜೆ ಪಿ ತುಮಿನಾಡ್ ರೆನ ಬರವು ಬೊಕ್ಕ ದಕ್ಷ ನಿರ್ದೇಶನೊಡು ಮೂಡ್ದ್ ಬೈದಿನ ಸೂಪರ್ ಹಿಟ್ ನಾಟಕ ಕಥೆ ಎಡ್ಡೆಂಡು ಒಂಜಿ ಸಾರ್ವಕಾಲಿಕ ದಾಖಲೆ ಬರೆಪಿನೆಟ್ ಸಂಶಯ ಇಜ್ಜಿ.

ತುಳುವ ಸೌರಭ ಪ್ರಕಾಶ್ ಕೆ ತುಮಿನಾಡ್ ಬೊಕ್ಕ ನಮಿತಾ ಕಿರಣ್ ಮುಖ್ಯ ಪಾತ್ರಧಾರಿಲಾದ್ ಅಭಿನಯ ಮಲ್ತಿನ ಈ ನಾಟಕೊಡು
ಪ್ರಭಾಕರ್ ಕೊಲ್ಯ, ಅಶ್ವಥ್ ಬಗಂಬಿಲ, ವಿಜಯ್ ಮಯ್ಯ ಐಲ, ಸೂರಜ್ ಸಾಲ್ಯಾನ್, ನಯನ ಸಾಲ್ಯಾನ್, ಪ್ರಶಾಂತ್ ಅಂಚನ್, ರಾಜೇಶ್ ಮುಗುಳಿ, ಉತ್ಸವ್ ವಾಮಂಜೂರು, ಸುರೇಶ್ ವಿಟ್ಲ, ರವಿ ರೈ ಕುಂಬ್ರ, ವೇಣು ಶೆಟ್ಟಿ ಮುಲ್ಕಿ, ದಯಾನಂದ್ ಸಿದ್ಧಕಟ್ಟೆ ಪೊರ್ಲುಡೆ ತನ್ಕುಲೆನ ಪಾತ್ರಗ್ ಜೀವ ಕೊರ್ತೆರ್.

ಕಥೆಕ್ ಬೋಡಾಪಿನ ಪೊರ್ಲುದ ಸಾಹಿತ್ಯನ್ ರಾಜೇಶ್ ಮುಗುಳಿ ಬೊಕ್ಕ ಹಿನ್ನೆಲೆ ಸಂಗೀತನ್ ಗಣೇಶ್ ಕೊಡಕ್ಕಲ್ ಪ್ರೇಕ್ಷಕೆರೆನ ಮನಸ್ಸ್ ಗ್ ನಾಟುಲೆಕ ಕೊರ್ತೆರ್. ಸಮಾಜದ ವಾಸ್ತವಿಕತೆಗ್ ಕೈತಲಾಪಿನ ನನಾತ್ ಕಥೆಕುಲು ಜೆ ಪಿ ತುಮಿನಾಡ್ ರೆನ ಬರವುದ ಮುಖೇನ ನಾಟಕ ರೂಪೊಡು ತುಳುನಾಡೊರ್ಮೆ ಶತಕ ಬಾರಿಸಾವಡ್.

✍️ ಸಂದೇಶ್ ಕರ್ಕೇರ

ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘ, ಶ್ರೀ ಭಗವತೀ ಕೃಪಾ ಭಾಂಡೂಪ್ ದ ಮುತಾಲಿಕೆಡ್ 69ನೇ ವರ್ಷದ ಮಹಾಪೂಜೆ

ಬೊಂಬೈ: ಭಾಂಡೂಪ್ ಪಶ್ಚಿಮದ ಸರ್ವೋದಯ ನಗರದ ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘ (ರಿ.) ದ 69ನೇ ವರ್ಷದ ಮಹಾಪೂಜೆ ಎ.13 ಸನಿಯಾರದಾನಿ ತ್ರಿಮೂರ್ತಿ ನಾಟ್ಯ ಮಂದಿರ, ಸರ್ದಾರ್ ಪ್ರತಾಪ್ ಸಿಂಗ್ ಇಂಡಸ್ಟ್ರೀಯಲ್ ಎಸ್ಟೇಟ್ ಭಾಂಡೂಪ್ (ಪ.) ಡ್ ಗೌಜಿಡ್ ನಡತ್ಂಡ್.

ಬೊಲ್ಪುಗು ಗಣಹೋಮ, ಬಯ್ಯಗ್ ಕಲಶ ಪ್ರತಿಷ್ಠೆ, ಅಲಂಕಾರ ಪೂಜೆ, ಪೊಂಜೋವುಲೆರ್ದ್ ಹಳದಿ ಕುಂಕುಮ, ಸ್ವಾಮಿ ನಿತ್ಯಾನಂದ ಶ್ರೀ ಕೃಷ್ಣ ಭಜನಾ ಮಂಡಳಿ ಭಾಂಡೂಪ್ ದಕ್ಲೆರ್ದ್ ಭಜನೆ ನಡತ್ಂಡ್.

ಈ ಪೊರ್ತುಡು ಸಂಸ್ಥೆದ ಅಧ್ಯಕ್ಷೆರ್ ಸಿಎ ಚಂದ್ರಹಾಸ‌ ಪಾಲನ್ ಅಧ್ಯಕ್ಷತೆಡ್ ನಡತಿನ ಧಾರ್ಮಿಕ ಸಭಾ ಲೇಸ್ ಡ್ ಸಂಘದ ಮಹಿಳಾ ವಿಭಾಗದ ಮಾಜಿ ಅಧ್ಯಕ್ಷೆರ್ ಶಶಿಕಲಾ ಜಿ. ಬಂಗೇರ, ಸಂಘದ ಅಭಿವೃದ್ಧಿಗ್ ಸಹಕಾರ ಮಲ್ತೊಂದು ಬತ್ತಿನ ಹಿರಿಯ ಗೌರವಾಧ್ಯಕ್ಷೆರ್ ಲಾಜರ್ ಟಿ.ಎಮ್ ಕೋಟ್ಯಾನ್ ಮೆರೆಗ್ ಸನ್ಮಾನ ನಡತ್ಂಡ್.

ಲೇಸ್ ನ್ ಪ್ರೋಗ್ರಾಮ್ ಬೊಕ್ಕ ಪಬ್ಲಿಕ್ ರಿಲೇಶನ್ ಸಮಿತಿದ ರಾಜಾ ಆರ್ ತುಂಬೆ, ಪ್ರಿಯಾಂಕ ಕೋಟ್ಯಾನ್ ಬೊಕ್ಕ ಕಾರ್ತಿಕೇಯ ರಾಜ ತುಂಬೆ ಸುಧಾರಿಕೆ ಮಲ್ತೆರ್.

ಧಾರ್ಮಿಕ ಸಭೆತ್ತ ಬೊಕ್ಕ ಪ್ರಧಾನ ಅರ್ಚಕೆರ್ ಸದಾಶಿವ ಡಿ.‌ಕುಂದರೆರ್ದ್ ಬಲಿ ಉಚ್ಚಯ ನಡತ್ಂಡ್. ಅವೆರ್ದ್ ಬೊಕ್ಕ ಮಹಾಮಂಗಳಾರತಿ, ತೀರ್ಥ ಪ್ರಸಾದ, ಅನ್ನ ಪ್ರಸಾದ ಸೇವೆ ನಡತ್ಂಡ್. ಸಾರರ್ದ್ ಎಚ್ಚ ಭಕ್ತೆರ್, ಉದ್ಯಮಿಲು, ತೀಯಾ ಸಮಾಜದ ಬಾಂಧವೆರ್, ಶ್ರೀ ಸಸಿಹಿತ್ಲು ಶ್ರೀ ಭಗವತೀ ಕ್ಷೇತ್ರದ ಭಕ್ತೆರ್ ಮಹಾಪೂಜೆ ಬೊಕ್ಕ ಅನ್ನ‌ ಪ್ರಸಾದ ಸೇವೆಡ್ ಪಾಲ್ ಪಡೆದಿತ್ತೆರ್. ನಾಗಸ್ವರ ವಾದನಡ್ ದಿನೇಶ್ ಕೋಟ್ಯಾನ್ ಬಳಗ ಸೇವೆನ್ ಸಂದಾಯೆರ್.

69ನೇ ವರ್ಷದ ಮಹಾಪೂಜೆದ ಯಶಸ್ವಿಗ್ ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘದ ಗೌರವಾಧ್ಯಕ್ಷೆರ್ ಲಾಝರ್ ಟಿ. ಎಮ್ ಕೋಟ್ಯಾನ್, ಅಧ್ಯಕ್ಷೆರ್ ಚಂದ್ರಹಾಸ್ ಕೆ.ಪಾಲನ್, ಉಪಾಧ್ಯಕ್ಷೆರ್ ಆನಂದ್ ಜೆ ಬಂಗೇರ, ಗೌ.ಪ್ರ ಕಾರ್ಯದರ್ಶಿ ಸುಧಾಕರ್ ಟಿ ಬೆಳ್ಚಡ, ಗೌ.ಕೋಶಾಧಿಕಾರಿ ಮೃತ್ಯುಂಜಯ ಎಮ್ ಬೆಳ್ಚಡ, ಪೂಜಾ ಕಮಿಟಿ ಅಧ್ಯಕ್ಷೆರ್ ವಸಂತ್ ಬಿ. ಕರ್ಕೇರ, ಮಹಿಳಾ ವಿಭಾಗದ ಅಧ್ಯಕ್ಷೆರ್ ರೋಹಿಣಿ ಎಸ್ ಬಂಗೇರ, ಪ್ರಧಾನ ಅರ್ಚಕೆರ್ ಸದಾಶಿವ್ ಡಿ ಕುಂದರ್, ಸಹಾಯಕ ಅರ್ಚಕೆರ್ ಶಂಕರ್ ಎಸ್ ಪಾಲನ್, ಪದ್ಮನಾಭ ಟಿ ಬಂಗೇರ, ಲಕ್ಷ್ಮಣ್ ಪಾಲನ್, ಸುಧಾಕರ್ ಎಮ್ ಕೋಟ್ಯಾನ್, ಸಲಹೆಗಾರೆ ಪ್ರಕಾಶ್ ಕೆ ಅಮೀನ್, ಸದಸ್ಯತ್ವ ಸಮಿತಿದ ಟಿ ಆರ್ ಸಾಲ್ಯಾನ್, ಶೈಕ್ಷಣಿಕ ಸಮಿತಿದ ಪ್ರವೀಣ್ ಎಲ್ ಕೋಟ್ಯಾನ್, ಆಡಳಿತ ಸಮಿತಿದ ಕವಿತಾ ಪಿ ಕೋಟ್ಯಾನ್, ಸದಸ್ಯೆರಾಯಿನ ಎಚ್ ಶ್ರೀಧರ್, ಜಯ ಎಮ್ ಕೋಟ್ಯಾನ್, ಅಚ್ಚುತ ಎ ಕೋಟ್ಯಾನ್, ಯಜ್ಞೇಶ್ವರ್ ಕೆ ಕೋಟ್ಯಾನ್, ಸದಾಶಿವ್ ಬಿ ಕೋಟ್ಯಾನ್, ಮೋಹನ್ ಬಿ ಕೋಟ್ಯಾನ್, ಬಾಲಕೃಷ್ಣ ಎಮ್ ಬಂಗೇರ, ಪುರಂದರ ಸಾಲ್ಯಾನ್, ಶಶಿಕಲಾ ಜಿ ಬಂಗೇರ, ಲೀಲಾವತಿ ಯು ಬೋಳಾರ್, ಪ್ರೀತಿ ಹೆಚ್ ಮಂಜೇಶ್ವರ, ಶಶಿಕಲಾ ಎಸ್ ಪಾಲನ್, ಆಶಾ ಎಸ್ ಸಾಲ್ಯಾನ್, ಸವಿತಾ ಪುತ್ರನ್, ನಯನಾ ಬಂಗೇರ, ಅನುಸೂಯ ಆರ್ ತುಂಬೆ, ತುಳಸಿ ಕೋಟ್ಯಾನ್, ಜೀವನ್ ಎಸ್ ಉಚ್ಚಿಲ್ ಸಹಕಾರ ಕೊರಿಯೆರ್.

ಬೆಹರಿನ್ ಡ್ ಕರ್ನಾಟಕ ಅನಿವಾಸಿ ಭಾರತೀಯೆರೆನ ವೇದಿಕೆ ಉದಿಪನ

ಬೆಹರಿನ್ ಡ್ ಪೊಸತಾದ್ ಕರ್ನಾಟಕ ಅನಿವಾಸಿ ಭಾರತೀಯೆರೆನ ವೇದಿಕೆ (ಕೆಎನ್‌ಆರ್‌ಐ) ಸ್ಥಾಪನೆ ಆತ್ಂಡ್.

ನೆತ್ತ ಅಧ್ಯಕ್ಷೆರಾದ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಗೆಂದಿನ ರಾಜ್ ಕುಮಾರ್ ಭಾಸ್ಕರ್ ಆಯ್ಕೆ ಆತೆರ್. ಉಪಾಧ್ಯಕ್ಷೆರಾದ್ ವಿಜಯ ನಾಯ್ಕ್, ಪ್ರಧಾನ ಕಾರ್ಯದರ್ಶಿಯಾದ್ ರೋಶನ್ ಲೂಯಿಸ್, ಖಜಾಂಚಿಯಾದ್ ಮಂಗೇಶ ದೇಸಾಯಿ, ಸಹಾಯಕ ಕಾರ್ಯದರ್ಶಿಯಾದ್ ಜಮಾಲುದ್ದೀನ್ ವಿಟ್ಲ, ಕಾರ್ಯಕಾರಿ ಸಮಿತಿದ ಸದಸ್ಯೆರಾದ್ ಮಲ್ಲಿಕಾರ್ಜುನ್ ಪಾಟೀಲ್, ರಾಘವೇಂದ್ರ ಪ್ರಸಾದ್, ಗಣೇಶ್ ಮಾಣಿಲ ಅಜತ್ ಬೈದೆರ್.

ಹಿರಿಯ ಸಲಹೆಗಾರೆರಾದ್ ಉದ್ಯಮಿ ಬೊಕ್ಕ ಬೆಹರಿನ್ ಕ್ರಿಕೆಟ್ ಫೆಡರೇಷನ್ ದ ಸಲಹಾ ಸಮಿತಿದ ಅಧ್ಯಕ್ಷೆರ್ ಮಹಮ್ಮದ್ ಮನ್ಸೂರ್, ಕನ್ನಡ ಸಂಘದ ಮಾಜಿ ಅಧ್ಯಕ್ಷೆರ್ ಆಸ್ಟಿನ್ ಸಂತೋಷ್ ಬೊಕ್ಕ ರಾಜೇಶ್ ಶೆಟ್ಟಿ ನಿಯುಕ್ತಿ ಆತೆರ್.

ಸಮಿತಿದಕುಲು ಬೆಹರಿನ್ ರಾಯಭಾರಿಲಾಯಿನ ವಿನೋದ್ ಕೆ. ಜೇಕಬ್ ಮೆರೆನ್ ಭೇಟಿಯಾದ್ ಕರ್ನಾಟಕ ಸರಕಾರದ ಸಹಕಾರದೊಟ್ಟಿಗೆ ನನದ ದಿನಟ್ಟ್ ನಡಪಾಯೆರೆ ಇಪ್ಪುನ ಲೇಸ್ ದ ಬಗೆಟ್ಟ್ ತೆರಿಪಾಯೆರ್.

ಅನಿವಾಸಿ ಕನ್ನಡಿಗ ವೇದಿಕೆದ ನಿಯೋಗನ್ ಭೇಟಿ ಆಯಿನ ರಾಯಭಾರಿಲು, ಬೆಹರಿನ್ ಡ್ ಕರಿನ ನಾಲ್ ದಶಕರ್ದಿಂಚ ಸಾಮಾಜಿಕ ಸೇವೆಡ್ ಇತ್ತ್ ದ್, ಕರ್ನಾಟಕದ ಬೇತೆ ಬೇತೆ ಜಿಲ್ಲೆಲೆರ್ದ್ ಬತ್ತಿನ ಕನ್ನಡಿಗೆರ್ ಸಮಿತಿಡ್ ಗುರುತಿಸಾಯಿನ ಬಗೆಟ್ಟ್ ತೆರಿದ್ ಕುಸಿ ಪಡೆಯೆರ್. ರಾಯಭಾರಿ ಕಚೇರಿರ್ದ್ ಸಾಧ್ಯವಾಯಿನ ಮಾತ ಸಹಕಾರನ್ ಕೊರ್ಪ ಪಂದ್ ಪಂಡೆರ್.