Putturu

ಸಂತ ಫಿಲೋಮಿನಾ ಕಾಲೇಜು ‘ಫಿಲೋ ಬೊಳ್ಳಿ’ ತುಳು ಸಂಘ ಉದಿಪನ ತುಳು ಸಂಘಟನೆರ್ದ್ ಭಾಷೆ-ಸಂಸ್ಕೃತಿದ ಬುಲೆಚ್ಚಿಲ್ : ಭಾಸ್ಕರ ರೈ ಕುಕ್ಕುವಳ್ಳಿ

ಪುತ್ತೂರು: ‘ತುಳು ಕೇವಲ ಒಂಜಿ ಭಾಸೆ ಅತ್ತ್ ; ಅವೊಂಜಿ ಸಮೃದ್ಧವಾಯಿನ ಸಂಸ್ಕೃತಿ. ತೌಳವ ಆಚಾರ ವಿಚಾರೊಡು ನಮ್ಮ ಪಿರಾಕ್ದಕ್ಲೆನ ಪ್ರಕೃತಿ ಪೂಜೆದ ಅವ್ವೆತೋ ಪೊಲಬು ಉಂಡು . ಮಾತ್ ಭಾಸೆ ಪಾತೆರುನ ಆಧುನಿಕ ಸಮಾಜೊಡು ತುಳುವೆರ್ ತಮ್ಮ ಭಾಸೆ ಬೊಕ್ಕ ಸಂಸ್ಕೃತಿನ್ ಒರಿಪಾಯೆರೆ ತುಳುವೆರ್ ಬನಿಯತ್ತ್ ಡ್ ಬೆನ್ನಿ ಬೆನೊಂದು ಉಲ್ಲೆರ್ ಐಕಾದ್ ಮಾತಾ ಕಡೆಟ್ಟ್ ಲಾ ಸಂಘಟನಾತ್ಮಕ ಚಟುವಟಿಕೆಲೆನ್ ಮಲ್ಪುನ ಅಗತ್ಯ ಉಂಡು ಪಂದ್ ಎಂದು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜಾನಪದ-ಯಕ್ಷಗಾನ ಅಕಾಡೆಮಿ ಮಾಜಿ ಸದಸ್ಯ ಪ್ರೊ.ಭಾಸ್ಕರ ರೈ ಕುಕ್ಕುವಳ್ಳಿ ಪಂಡೆರ್ .

ಪುತ್ತೂರು ಸಂತ ಫಿಲೋಮಿನಾ ಕಾಲೇಜಿದ ಪಿಜಿ ಸೆಮಿನಾರ್ ಹಾಲ್ ಡ್ ‘ಫಿಲೋ ಬೊಳ್ಳಿ’ ತುಳು ಸಂಘನ್ ಉದಿಪನ ಮಲ್ತ್ ಆರ್ ಪಾತೆರಿಯೆರ್.
ರಂಗಭೂಮಿ ಬೊಕ್ಕ ಸಿನಿಮಾ ನಟ ಸುಂದರ ರೈ ಮಂದಾರ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆದಿತ್ತೆರ್.

ಸಾಂಪ್ರದಾಯಿಕ ಉದಿಪನ :
ತುಳುನಾಡ್ ದ ಸಂಪ್ರದಾಯಲಕ ತಾರಾಯಿದ ಮರತ ಸಿಂಗಾರೊನು ಅರಲ್ಪಾದ್ ಲೇಸ್ ಉದಿಪನ ಮಲ್ತೆರ್. ಸಂಘದ ಜೋಕುಲು ‘ತುಳು ಸುಗಿಪು’ ನಡಪಾದ್ ಕೊರಿಯೆರ್ . ‘ಪೂವರಿ’ ತುಳು ಪತ್ರಿಕೆ ಸಂಪಾದಕ ವಿಜಯಕುಮಾರ್ ಭಂಡಾರಿ ಹೆಬ್ಬಾರಬೈಲು ಬೊಕ್ಕ ಕವಿ ಲಕ್ಷ್ಮೀನಾರಾಯಣ ರೈ ಹರೇಕಳ ಪಾಲ್ ಪಡೆದಿತ್ತೆರ್..

ಲೇಸ್ ದ ಗುರ್ಕಾರ್ಮೆನ್ ವಹಿಸೊಂದಿನ ಸಂತ ಫಿಲೋಮಿನಾ ಕಾಲೇಜಿದ ಪ್ರಾಂಶುಪಾಲ ಡಾ.ಆಂಟನಿ ಪ್ರಕಾಶ್ ಮೊಂತೇರೊ ಪಾತೆರ್ದ್ ‘ಸಾಹಿತ್ಯ ಬೊಕ್ಕ ಸಂಸ್ಕೃತಿಗ್ ಜಾತಿ-ಧರ್ಮದ ಬಂಧನ ಇಜ್ಜಿ . ಜಾತಿ-ಮತದ ಸಂಕೋಲೆನ್ ಮೀರ್ದ್ ಉಂತುಂಡ ಮಾತ್ರ ನರಮಾನಿ ಮಲ್ಲ ಮಟ್ಟೋ ಡು ಉಪ್ಪುವೆ . ತುಳು ಸಂಘದ ಮುಖೇನ ಸಾಮರಸ್ಯದ ಬದ್ಕ್ ಗ್ ಪೂರಕವಾಯಿನ ಅವ್ವೆತೋ ಲೇಸ್ ಮಲ್ಪುನ ಯೋಜನೆ ಉಂಡು ಪಂದ್ ಪಂಡೆರ್.

ತುಳು ಸಂಘದ ಸಂಯೋಜಕಿ ದೀಪಿಕಾ ಸನಿಲ್ ಎದುಕೊಂಡೆರ್ . ಬಿಬಿಎ ವಿಭಾಗ ಮುಖ್ಯಸ್ಥ ಪ್ರೊ.ರಾಧಾಕೃಷ್ಣ ಗೌಡ ಬಿನ್ನೆರ್ನ ಪೊಲಬು ಪಟ್ಟಿಯೆರ್ .ಕಾಲೇಜು ಯಕ್ಷಗಾನ ಸಂಘದ ಸಂಯೋಜಕ ಪ್ರಶಾಂತ ರೈ ಪುತ್ತೂರು ಸೊಲ್ಮೆ ಸಂದೈತ ಮಲ್ತೆರ್ . ವಾಣಿಜ್ಯ ವಿಭಾಗದ ಸಹಾಯಕ ಪ್ರಾಧ್ಯಾಪಕ ದಿನಕರ ಅಂಚನ್ ಲೇಸ್ ನಡಪಾದ್ ಕೊರಿಯೆರ್.