Mulki

ವಿದ್ಯಾರ್ಥಿ ಸಂಘದ ವೋಟು ಇಜ್ಜಂದಿನ ಕ್ಯಾಂಪಸ್ ಮೌನ ಆಂಡ, ಭವಿಷ್ಯಡ್ ರಾಜಕಾರಣ ದುರ್ಬಲ ಆಪುಂಡು: ಅನ್ವಿತ್ ಕಟೀಲ್

ವಿದ್ಯಾರ್ಥಿ ಸಂಘಟನೆಲೆನ ವೋಟು ಶಿಕ್ಷಣ ವ್ಯವಸ್ಥೆದ ಇಸಯ ಅತ್ತ್, ಅವು ಪ್ರಜಾಸತ್ತಾತ್ಮಕ ಸಮಾಜದ ಮೂಲಭೂತ ಅಂಶ. ಕರ್ನಾಟಕ ಸರ್ಕಾರ ರಾಜ್ಯದ ಕಾಲೇಜ್ ಬೊಕ್ಕ ವಿಶ್ವವಿದ್ಯಾಲಯಲೆಡ್ ವಿದ್ಯಾರ್ಥಿ ಸಂಘಟನೆದ ವೋಟುನ್ ಕುಡ ಸುರು ಮಲ್ಪುನ ದಿಟ್ಟಿಡ್ ಸಮಿತಿ ರಚನೆ ಮಲ್ಪೆರೆ ದುಂಬಾತ್ಂಡ್, ವಿದ್ಯಾರ್ಥಿ ಸಮುದಾಯದ ರಾಜಕೀಯ-ಸಾಮಾಜಿಕ ಅಭಿವ್ಯಕ್ತಿಗ್ ಕುಡ ಸಂಸ್ಥಾತ್ಮಕ ಅವಕಾಶ ಕಲ್ಪಿಸಾವುನ ಮಹತ್ವದ ಪಜ್ಜೆ ಆತ್ಂಡ್. ಸುಮಾರ್ ದಿರ್ನೊದಿಂಚ ಇಜ್ಜಂದಿನ ಈ ಪ್ರಕ್ರಿಯೆನ್ ಕುಡ ಸುರು ಮಲ್ಪೊಡು. ಕೇವಲ ವಿದ್ಯಾರ್ಥಿಲೆನ ಹಿತಕೋಸ್ಕರ ಸೀಮಿತ ಅತ್ತ್, ಅವು ರಾಜ್ಯದ ಬೊಕ್ಕ ದೇಶದ ಭವಿಷ್ಯದ ನಾಯಕತ್ವ ನಿರ್ಮಾಣದ ಪ್ರಶ್ನೆಲ ಆಂದ್.

ಭಾರತದ ರಾಜಕೀಯ ಇತಿಹಾಸನ್ ಅವಲೋಕನ ಮಲ್ತ್ಂಡ, ವಿದ್ಯಾರ್ಥಿ ರಾಜಕಾರಣ ರಾಷ್ಟ್ರ ಮಟ್ಟದ ನಾಯಕತ್ವಗ್ ಸಾದಿ ಮಲ್ತಿನ ಸುಮಾರ್ ಉದಾಹರಣೆಲು ತಿಕ್ಕುಂಡು. ದೇಶ ತೂಯಿನ ಅತ್ಯುತ್ತಮ ಸಂಸದೀಯ ಪಟು ಸೀತಾರಾಂ ಯೆಚೂರಿ ಮೇರ್ ಜವಾಹರಲಾಲ್ ನೆಹರು ವಿಶ್ವವಿದ್ಯಾಲಯದ ವಿದ್ಯಾರ್ಥಿ ಸಂಘದ ಮುಕೇನ ಚಿಂತನಾ ರಾಜಕಾರಣಗ್ ಬತ್ತಿನಾರ್. ಬಿಜೆಪಿದ ಅರುಣ್ ಜೇಟ್ಲಿ ದೆಹಲಿ ವಿಶ್ವವಿದ್ಯಾಲಯದ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್ ಆಯಿನಾಗೇ ಸಂಘಟನೆ, ಸಂವಾದ ಬೊಕ್ಕ ರಾಜಕೀಯ ಸಮತೋಲನದ ಪಾಠ ಕಲಿತಿನಾರ್. ಇತ್ತೆ ದೇಶದ ವಿರೋಧ ಪಕ್ಷದ ನಾಯಕೆರಾಯಿನ ರಾಹುಲ್ ಗಾಂಧಿ ಮೇರ್ಲ ಡೆಲ್ಲಿದ ವಿವಿಡ್ ತನ್ನ ವೋಟುದ ರಾಜಕೀಯದ ಸುರುತ್ತ ಪಾಠ ಕಲ್ತಿನಾರ್. ಪ್ರಕಾಶ್ ಕಾರಟ್, ನಿತಿನ್ ಗಡ್ಕರಿ, ಲಾಲು ಪ್ರಸಾದ್ ಯಾದವ್, ನವೀನ್ ಪಟ್ನಾಯಕ್, ಪಿ.ಚಿದಂಬರಂ, ಜೈ ರಾಂ ರಮೇಶ್, ಕಪಿಲ್ ಸಿಬಲ್, ಬಿ.ಕೆ.ಹರಿಪ್ರಸಾದ್ ಅಂಚಿನ ಈ ಪುದರ್ ದ ಪಿರವು ವಿದ್ಯಾರ್ಥಿ ರಾಜಕಾರಣದ ಅನುಭವ ಉಂಡು.

ಈ ನಾಯಕೆರ್ ಕ್ಯಾಂಪಸ್ ರಾಜಕಾರಣನ್ ಕೇವಲ ಅಧಿಕಾರದ ಮೊಟ್ಟು ಆದ್ ಗಲಸಂದೆ, ಅವೆನ್ ವಿಚಾರದ ಆಧಾರಡ್ ಚಿಂತನೆಗ್ ಪೂರಕವಾದ್ ವೇದಿಕೆ ಮಲ್ತೊಂದೆರ್. ಅಂಚಾದ್ ವಿದ್ಯಾರ್ಥಿ ಸಂಘಟನೆಲು ನಾಯಕತ್ವದ ತಾತ್ಕಾಲಿಕ ಪ್ರಯೋಗಾಲಯ ಅತ್ತ್, ದೀರ್ಘಕಾಲದ ಚಿಂತನೆದ ಪಾಠಶಾಲೆ ಆತ್ಂಡ್.

ಕರ್ನಾಟಕಡ್ ವಿದ್ಯಾರ್ಥಿ ಸಂಘಟನೆದ ವೋಟುಲು ಕರಿನ ಒಂಜಿ-ರಡ್ಡ್ ವರ್ಷೊದಿಂಚ ಸುಮಾರ್ ಕಮ್ಮಿ ಆತ್ಂಡ್. ಕೆಲವು ಕಡೆಟ್ಟ್ ಕಾನೂನ್-ಸುವ್ಯವಸ್ಥೆದ ಪುದರ್ ಡ್, ನನ ಕೆಲವು ಕಡೆಟ್ಟ್ ರಾಜಕೀಯ ಭೀತಿಡ್ ವಿದ್ಯಾರ್ಥಿಲೆನ ಪ್ರಜಾಸತ್ತಾತ್ಮಕವಾದ್ ಬಲಿ ಆಯಿನವು ವಾಸ್ತವ. ನೆತ್ತ ಪರಿಣಾಮವಾದ್ ವಿದ್ಯಾರ್ಥಿಲೆನ ಸಮಸ್ಯೆಲು ವೈಯಕ್ತಿಕ ಅಸಮಾಧಾನವಾದ್ ಒರಿದ್, ಸಂಘಟನೆದ ಧ್ವನಿಯಾದ್ ಇಜ್ಜಿ ಪನ್ಪುನವು ಖಚಿತ. ವಿದ್ಯಾರ್ಥಿ ಸಂಘದ ವೋಟು ಅತ್ತಂದೆ ಕ್ಯಾಂಪಸ್‌ಡ್ ರಾಜಕೀಯವಾದ್ ಕೆಲಸ ಮಲ್ಪಂದೆ ಉಂಡು. ಪ್ರಶ್ನೆ ಮಲ್ಪುನ‌ ಮನೋಭಾವ ಇಜ್ಜಂದೆ ಪೋಂಡು. ಆಡಳಿತ ಬೊಕ್ಕ ವಿದ್ಯಾರ್ಥಿಲೆನ‌ ನಡುಟ್ಟ್ ಸಂವಾದ ಇಜ್ಜಿ. ಉಂದು ಆರೋಗ್ಯಕರ ಶೈಕ್ಷಣಿಕ ವಾತಾವರಣದ ಸೂಚಕ ಅತ್ತಂಡ ಎಲ್ಯ ಇಸಯನ್ ಮಲ್ಲ ಮಲ್ಪೆರೆ ಆಪುಜಿ.

ವಿದ್ಯಾರ್ಥಿ ಸಂಘಟನೆದ ವೋಟುದ ವಿರುದ್ಧ ಸಾಮಾನ್ಯವಾದ್ ಕೆಂದ್ ಬರ್ಪುನ ವಾದ ಪಂಡ, ಅವು ಗೊಂದಲ, ಹಿಂಸಾಚಾರ ಬೊಕ್ಕ ಪಕ್ಷ ರಾಜಕಾರಣಗ್ ಸಾದಿ ಮಲ್ತೊದು ಕೊರ್ಪುಂಡು ಪಂದ್. ಆಂಡ ಸಮಸ್ಯೆ ವೋಟುದ ಅತ್ತ್, ಅವೆನ್ ನಡಪಾವುನ ವಿಧಾನಡ್ ಉಂಡು.‌ ವಿದ್ಯಾರ್ಥಿ ಕಾಂಗ್ರೆಸ್ ದ ರಾಜ್ಯ ಪ್ರಧಾನ ಕಾರ್ಯದರ್ಶಿಯಾದ್ ವಿದ್ಯಾರ್ಥಿ ಸಂಘದ ವೋಟುದ ಜಬದಾರಿನ್ ನಿಭಾಯಿಸಾಯಿನ ಅನುಭವಡ್ ಪನೊಡಾಂಡ ಜವಾಹರಲಾಲ್ ನೆಹರು ವಿಶ್ವವಿದ್ಯಾಲಯ, ದೆಹಲಿ ವಿಶ್ವವಿದ್ಯಾಲಯ, ಹೈದರಾಬಾದ್ ಕೇಂದ್ರ ವಿಶ್ವವಿದ್ಯಾಲಯ, ಅಲಿಗಢ ಮುಸ್ಲಿಂ ವಿಶ್ವವಿದ್ಯಾಲಯಲೆಡ್ ನಡಪುನ ವೋಟುಲು ಇತ್ತೆಲ ತನ್ನ ಘನತೆಗಾದ್, ನಿಯಮನ್ ಅನುಸಾರವಾದ್ ಬೊಕ್ಕ ಇಚಾರವಾದ್ ವೋಟುಲು ನಡಪೆರೆ ಸಾಧ್ಯ ಆಯಿನೆನ್ ತಪ್ಪಯೆರೆ ಆಪುಜಿ.

ವಿದ್ಯಾರ್ಥಿಲು ಎಲ್ಲೆದ ಶಾಸಕೆರ್, ಸಚಿವೆರ್ ಅತ್ತಂಡ ಅಧಿಕಾರಿಲು ಆವೊಡು ಪನ್ಪುನವು ಅನಿವಾರ್ಯ ಅತ್ತ್, ಆಂಡ ಅಕುಲು ಜವಾಬ್ದಾರಿದ ನಾಗರಿಕೆರಾವೊಡು ಪನ್ಪುನವು ಅನಿವಾರ್ಯ. ವಿದ್ಯಾರ್ಥಿ ಸಂಘಟನೆದ ವೋಟುಡು ಯುವಜನತೆಗ್ ಪ್ರಜಾಸತ್ತಾತ್ಮಕ ಮೌಲ್ಯಲೆನ್ ಅನುಭವದ ಮುಕೇನ ತೆರಿಪಾವೊಡು. ಮುಕ್ತ ಸಂವಾದ ಚಿಂಥನ-ಮಂಥನಾ, ವಾದ-ಪ್ರತಿವಾದ, ಗಂಭೀರ ಚರ್ಚೆಲು, ಮತದಾನ, ವಿರೋಧ, ಒಪ್ಪಂದ, ಹೊಣೆಗಾರಿಕೆ ಈ ಪ್ರಕ್ರಿಯೆರ್ದ್ ಪಿದಯಿ ಬರ್ಪುನ ನಾಯಕತ್ವ ಕೂಡ್ಲೆ ರಾಜಕೀಯಡ್ ತೂಜಿದ್ ಬತ್ತಿಜಿಂಡಲ, ನನದ ಪೊರ್ತುಡು ರಾಜ್ಯದ ಸಾಮಾಜಿಕ-ರಾಜಕೀಯ ಸಂಸ್ಕೃತಿಗ್ ಬಲ ಕೊರ್ಪುಂಡು. ಕರ್ನಾಟಕದಂಚಿನ ಚಿಂತನಾ ಪರಂಪರೆ ಇಪ್ಪುನ ರಾಜ್ಯಡ್, ಕ್ಯಾಂಪಸ್‌ಲು ಮೌನ ಆಪುನೇ ಅಪಾಯವಾಯಿನವು, ಅವು ಚಿಂತನೆದ ಕೇಂದ್ರಲಾದ್ ಪಿದಯಿ ಬರೊಡು.

ವಿದ್ಯಾರ್ಥಿ ಸಂಘಟನೆಲೆನ್ ರಾಜಕೀಯ ಪಕ್ಷಲೆನ ನಿರೆಲಾದ್ ಮಲ್ಪುನ ಪ್ರಯತ್ನಲು ಈ ಪ್ರಕ್ರಿಯೆಗ್ ಪೆಟ್ಟ್ ಕೊರ್ಂಡಲ ಅವೆನ್ ಎಚ್ಚರಿಕೆರ್ದ್ ನಿಭಾಯಿಸೊಡು. ವಿದ್ಯಾರ್ಥಿ ರಾಜಕಾರಣ ಪಕ್ಷ ರಾಜಕಾರಣದ ವಿಸ್ತರಣೆ ಅವಂದೆ, ಸ್ವತಂತ್ರ ಚಿಂತನೆದ ವೇದಿಕೆ ಆವೊಡು, ಬೊಕ್ಕ ವಿಚಾರದ ಆಧಾರದ ವಿದ್ಯಾರ್ಥಿ ರಾಜಕಾರಣ ಆವೊಡಾತ್ಂಡ್. ವಿದ್ಯಾರ್ಥಿ ಸಂಘಟನೆದ ವೋಟುಲು ಒಂತೆ ದಿನತ್ತ ಗೊಂದಲರ್ದ್ ಮಾಸ್ತ್ ದಿನತ್ತ ಲಾಭಡ್ ಉಂಡು. ಅವು ಪ್ರಜಾಸತ್ತಾತ್ಮಕ ಸಮಾಜದ ಹೂಡಿಕೆ. ರಾಜ್ಯಡ್ ಆಡಳಿತ ನಡಪಾವೊಂದು ಇಪ್ಪುನ ಕಾಂಗ್ರೆಸ್ ಮುತಾಲಿಕೆದ ಸರ್ಕಾರ ವೋಟುದ ಪ್ರಣಾಳಿಕೆಡ್ಲ ವಿವಿಡ್ ವಿದ್ಯಾರ್ಥಿ ಸಂಘಲೆನ‌‌ ವೋಟುನ್ ನಡಪಾವ ಪಂದ್ ಘೋಷಣೆ ಮಲ್ದ್ಂಡ್.
ಕ್ಯಾಂಪಸ್‌ಲೆಡ್ ಪ್ರಜಾಸತ್ತಾತ್ಮಕ ಸಂವಾದ ಗಟ್ಟಿ ಆಂಡ, ರಾಜ್ಯದ ಬೊಕ್ಕ ರಾಷ್ಟ್ರದ ನಾಯಕತ್ವ ಎಚ್ವ ಸಂವೇದನಾಶೀಲ ಆಪುಂಡು. ಉಂದು ಇತಿಹಾಸ ಪನ್ಪಿನ ಸತ್ಯ. ಉಂದು ಭವಿಷ್ಯ ತೂಪಾವುನ ದಿಕ್ಕ್ ಪಂದ್ ಎನ್ನೊಡು.