Mangalore

ಸಂಘಟನೆದ ಶಕ್ತಿ ಗಟ್ಟಿ ಇತ್ತ್ಂಡ ಮಾತ್ರ ಸಮಾಜದ ಅಭಿವೃದ್ಧಿ: ಡಾ. ಭರತ್ ಶೆಟ್ಟಿ

ಸುಭಾಷಿತನಗರ ರೆಸಿಡೆಂಟ್ಸ್ ವೆಲ್ ಫೇರ್ ಅಸೋಸಿಯೇಷನ್ ದ ವರ್ಸದ ಉಚ್ಚಯ

ಸುರತ್ಕಲ್: ಸುಭಾಷಿತನಗರ ರೆಸಿಡೆಂಟ್ಸ್ ವೆಲ್ ಫೇರ್‌ ಅಸೋಸಿಯೇಶನ್(ರಿ.) ಸುರತ್ಕಲ್ ನೆತ್ತ ಸುರೂತ್ತ ವರ್ಸದ ಉಚ್ಚಯ ಲೇಸ್ ಸುರತ್ಕಲ್ ಬಂಟರ ಭವನಡ್ ಇಂಚೊಗು ನಡತ್ಂಡ್. ಮಂಗಳೂರು ಉತ್ತರ ವಿಧಾನ ಸಭಾ ಕ್ಷೇತ್ರದ ಶಾಸಕೆರ್ ಡಾ. ವೈ. ಭರತ್ ಶೆಟ್ಟಿ ಬೊಲ್ಪು ಅರ್ಲಾದ್ ಲೇಸ್ ಉದಿಪನ ಮಲ್ತೆರ್.

ಬೊಕ್ಕ ಪಾತೆರಿನ ಆರ್, “ಸಂಘೇ ಶಕ್ತಿ ಕಲೌಯುಗೇ” ಪನ್ಪಿನ ಪಾತೆರದಲೆಕ ಕಲಿಯುಗಟ್ಟ್ ಸಂಘಟನೆದ ಶಕ್ತಿ ಗಟ್ಟಿ ಇತ್ತ್ಂಡ ಮಾತ್ರ ಸಮಾಜದ ಅಭಿವೃದ್ಧಿ ಸಾಧ್ಯ. ಉಂದೆನ್ ತಪ್ಪಂದೆ ಪಾಲನೆ ಮಲ್ತೊಂದು ಬರೊಂದುಪ್ಪುನ ಸುಭಾಷಿತ ನಗರ ವೆಲ್ ಫೇರ್ ಅಸೋಸಿಯೇಷನ್ ಏತೋ ಸಮಾಜಮುಖಿ ಕೆಲಸೊಲೆನ್ ಮಲ್ತೊಂದುಂಡು. ನನ ದುಂಬಗ್ ಸುರತ್ಕಲ್, ಸೂರಜ್ ಹೋಟೆಲ್ ಕೈತಲ್ಡ್ 5 ಕೋಟಿ ರೂ. ಅನುದಾನಡ್ ಸರ್ವಿಸ್ ರಸ್ತೆ, ಟ್ರಾಫಿಕ್ ಸಿಗ್ನಲ್ ಸೇರ್ದ್ ಬೇತೆ ಬೇತೆ ಅಭಿವೃದ್ಧಿದ ಬೇಲೆ ಆವರೆ ಉಂಡು. ಶಾಸಕೆರಾದ್ ಯಾನ್ಲ ಸಂಘಟನೆದ ಒಟ್ಟುಗು ಇತ್ತ್ ದ್ ಸಕಾಯ ಕೊರ್ಪೆ ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ರತ್ನಾಕರ ಹೆಗ್ಡೆ ಮಟ್ಟಾರ್ ಬತ್ತಿತ್ತೆರ್. ಸುಭಾಷಿತನಗರ ರೆಸಿಡೆಂಟ್ಸ್ ವೆಲ್‌ ಫೇರ್‌ ಅಸೋಸಿಯೇಶನ್ ಅಧ್ಯಕ್ಷೆರ್ ರಮೇಶ್ ಶೆಟ್ಟಿ ಲೇಸ್ ದ ಅಧ್ಯಕ್ಷತೆ ಒಯಿಸ್ ದ್ ಪ್ರಾಸ್ತಾವಿಕದ ಪಾತೆರ ಪಂಡೆರ್.

ಬೊಂಬೈದ ವಿ.ಕೆ. ಸಮೂಹ ಸಂಸ್ಥೆದ ಚೇರ್ ಮ್ಯಾನ್ ಕರುಣಾಕರ ಎಂ. ಶೆಟ್ಟಿ ಮದ್ಯಗುತ್ತು, ರಂಗಕರ್ಮಿ ಡಾ. ದೇವದಾಸ್ ಕಾಪಿಕಾಡ್, ನಾಗರಿಕ ಸಮಿತಿದ ಅಧ್ಯಕ್ಷೆರ್ ಸುಭಾಶ್ಚಂದ್ರ ಶೆಟ್ಟಿ ಹೊಸಬೆಟ್ಟು, ನಾಗರಿಕ ಸಲಹಾ ಸಮಿತಿದ ಡಾ. ರಾಜ್ ಮೋಹನ್ ರಾವ್, ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಸುಧಾಕರ ಎಸ್. ಪೂಂಜ, ವಿಜಯ ಮೆಡಿಕಲ್ ಮಾಲಕೆರ್ ದಯಾನಂದ ಶೆಟ್ಟಿ, ಕಾರ್ಪೋರೇಟರ್ ನಯನಾ ಕೋಟ್ಯಾನ್, ಶ್ವೇತಾ ಪೂಜಾರಿ, ವರುಣ್ ಚೌಟ ಮೊಕುಲು ಇತ್ತೆರ್.

ಈ ಪೊರ್ತುಡು ಎಸ್ ಎಸ್ ಎಲ್ ಸಿ ಬೊಕ್ಕ ಪಿಯುಸಿಡ್ ಜಾಸ್ತಿ ಅಂಕ ದೈದಿನ ವಿದ್ಯಾರ್ಥಿಲೆಗ್ ಮಾನಾದಿಗೆ ನಡತ್ಂಡ್. ಅಂಚೆನೆ ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್, ಪತ್ರಕರ್ತೆರ್ ಬಾಳ ಜಗನ್ನಾಥ ಶೆಟ್ಟಿ, ಪ್ರಭುಕೃಷ್ಣನ್, ಅದ್ವಿಕ ಶೆಟ್ಟಿ ಮೊಕ್ಲೆನ್ಲ ಮಾನಾದಿಗೆ ಮಲ್ತೆರ್. ಅಸೋಸಿಯೇಶನ್ ದ ಗೌರವ ಸಲಹೆಗಾರೆರ್ ಸತ್ಯಜಿತ್ ಸುರತ್ಕಲ್, ಪ್ರಶಾಂತ್ ಎಂ, ಉಪಾಧ್ಯಕ್ಷೆರ್ ತಾರಾನಾಥ ಸಾಲ್ಯಾನ್, ಕೋಶಾಧಿಕಾರಿ‌ ನರಸಿಂಹ ಸುವರ್ಣ, ಕಾರ್ಯದರ್ಶಿ ಕಿಷನ್ ರಾವ್, ಜೊತೆ ಕಾರ್ಯದರ್ಶಿ ಚಂದ್ರಶೇಖರ ಶೆಟ್ಟಿ ಇತ್ತೆರ್.

ಪುಷ್ಪರಾಜ್ ಶೆಟ್ಟಿ ಕುಡುಂಬೂರು ಸ್ವಾಗತ ಮಲ್ತೆರ್ . ಲಕ್ಷ್ಮೀ ಚಂದ್ರಶೇಖರ ಸೊಲ್ಮೆ ಸಂದಾಯೆರ್. ನಿತೇಶ್ ಶೆಟ್ಟಿ ಎಕ್ಕಾರ್ ಸಭೆ ಸುಧಾರಿಕೆ ಮಲ್ತೆರ್. ಬೊಕ್ಕ ಚಾ ಪರ್ಕ ಕಲಾವಿದೆರೆರ್ದ್ ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್ ನಿರ್ದೇಶನದ “ನಾಯಿದ ಬೀಲ “ನಾಟಕ ಪ್ರದರ್ಶನ ಆಂಡ್.