ಪೆಟ್ರೊಲ್, ಡಿಸೇಲ್ ರೇಟ್ ಕುಡ ಎಚ್ಚ!
ಪತ್ತ್ ದಿನೊಟ್ಟು ನಾಲ್ ನೇ ಸರ್ತಿ ಪೆಟ್ರೋಲ್, ಡೀಸೆಲ್ ರೇಟ್ ಎಚ್ಚ
ದಿಲ್ಲಿಡ್ ಪೆಟ್ರೋಲ್ ಗ್ 102.12 ರೂ.
ಡೀಸೆಲ್ ಗ್ 95.20
Mangalore
Religious & Cultural News ಮಾತ ಧರ್ಮದ ಸುದ್ದಿ
ಊರ್ದ ಸುದ್ದಿ Regional News
ಕುಡ್ಲದ ಸುದ್ದಿ | Mangalore News
ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News
ತುಳು ಸುದ್ದಿ
ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News
ಮೇ.15,16: ಚೇಳಾಯರ್ ಖಂಡಿಗೆ ಧರ್ಮರಸು ಶ್ರೀ ಉಳ್ಳಾಯ ದೈವಸ್ಥಾನಡ್ ಕಂಡೇವುದ ಆಯನ ವರ್ಷೊದ ಜಾತ್ರೆ
ಚೇಳಾಯರ್ ಖಂಡಿಗೆ ಧರ್ಮರಸು ಶ್ರೀ ಉಳ್ಳಾಯ ದೈವಸ್ಥಾನಡ್ ಕಂಡೇವುದ ಆಯನ ವರ್ಷೊದ ಜಾತ್ರೆ ಮೇ.15 ಬೊಕ್ಕ 16ಕ್ಕ್ ನಡಪರೆ ಉಂಡು.
ಮೇ.15 ಸುಕ್ರಾರ ಬೊಲ್ಪುಗು ಮೀನ್ ಪತ್ತಿಯೆರೆ ಉಂಡು. ಬೊಕ್ಕ ಮೂಲಸ್ಥಾನಡ್ ಶುದ್ಧಕಲಶ, ಗಣಹೋಮ, ಸಂಕ್ರಾಂತಿ ಪೂಜೆ, ಮಧ್ಯಾಹ್ನ ಅನ್ನಸಂತರ್ಪಣೆ ರಾತ್ರೆ ಅನ್ನಸಂತರ್ಪಣೆ, ಬ್ರಹ್ಮಸ್ಥಾನಡ್ ಬ್ರಹ್ಮೆರೆಗ್ ತಂಬಿಲ, ಕುಮಾರ ಸಿರಿಲೆನ ದರ್ಶನ, ಧರ್ಮರಸು ಶ್ರೀ ಉಳ್ಳಾಯ ಬೊಕ್ಕ ಪರಿವಾರ ದೈವೊಲೆನ ಭಂಡಾರ ಮೂಲಸ್ಥಾನಗ್ ಪೋಪುಂಡು. ಬೆಡಿಮಾರ್ದ್ ಪ್ರದರ್ಶನ ಆದ್ ಕೊಡಿ ಏರುಂಡು. ಬೊಕ್ಕ ಪಾಂಚಜನ್ಯ ಆಟ ನಡಪುಂಡು.
ಮೇ.16 ಸನಿಯಾರ ಬೊಲ್ಪುಗು ಧರ್ಮರಸು ಶ್ರೀ ಉಳ್ಳಾಯ, ಇಷ್ಟದೇವತೆ, ಬಬ್ಬರ್ಯ ಬೊಕ್ಕ ಪರಿವಾರ ದೈವೊಲೆಗ್ ನೇಮೋಚ್ಚಯ ಆದ್ ನಂದಿಗೋಣ ಕುಮಾರ ಸಿರಿಲೆನ ಭೇಟಿ ಆಯೆರೆ ಉಂಡು. ಬೊಕ್ಕ ನಾಗದೇವೆರೆಗ್ ಭಕ್ತೆರೆರ್ದ್ ತಂಬಿಲ ಸೇವೆ, ಬಯ್ಯಗ್ ಬಾಕಿಮಾರ್ ಕಂಡಡ್ ಚೆಂಡ್, ಜಾರಂದಾಯ, ಬಂಟ, ಕೊಡಮಣಿತ್ತಾಯ ದೈವೊಲೆಗ್ ಜೋಡಿ ನೇಮೋಚ್ಚಯ, ಬಾಕಿಲ್ ದಾಂತಿ ಶ್ರೀ ಕೋರ್ದಬ್ಬು ದೈವಸ್ಥಾನದ ಕೋರ್ದಬ್ಬು ಬೊಕ್ಕ ಧೂಮಾವತಿ ದೈವೊದ ಭೇಟಿ, ರಾತ್ರೆ ಶ್ರೀ ಉಳ್ಳಾಯ ಬೊಕ್ಕ ಪರಿವಾರ ದೈವೊಲೆಗ್ ಸಾಮೂಹಿಕ ಪೂತ್ತ ಪೂಜೆ, ಸಾರ್ವಜನಿಕ ಅನ್ನಸಂತರ್ಪಣೆ, ಕೊಡಿ ಜಾವೆರೆ ಉಂಡು. ಬೊಕ್ಕ ಖಂಡಿಗೆ ಬೀಡಿಗೆ ಭಂಡಾರ ಪಿದಾಡುಂಡು. ಬೊಕ್ಕ ಎನ್ನಿಲೆಕ್ಕ ಇಜ್ಜೆರ್ ನಾಟಕ ನಡಪರೆ ಉಂಡು.
ಅಂಚೆನೆ ಮೇ.25 ಸೋಮಾರ ಕಲ್ಕುಡ ಬೊಕ್ಕ ಪರಿವಾರ ದೈವೊಲೆಗ್ ನೇಮೋಚ್ಚಯ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ದೈವಸ್ಥಾನದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಊರ್ದ ಸುದ್ದಿ Regional News
ಕುಡ್ಲದ ಸುದ್ದಿ | Mangalore News
ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News
ತುಳು ಸುದ್ದಿ
ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News
ಮೇ 9-10: ಸುರತ್ಕಲ್‌‌ಡ್ ‘ಲೆಜೆಂಡ್ಸ್ ಕ್ರಿಕೆಟ್ ಲೀಗ್’ ಸೀಸನ್-5; ಹಿರಿಯೆರ್ನ ಕ್ರಿಕೆಟ್‌ದ ಗೊಬ್ಬು
ಕುಡ್ಲ : ಸುರತ್ಕಲ್ ಸ್ಪೋರ್ಟ್ಸ್ ಆ್ಯಂಡ್ ಕಲ್ಚರಲ್ ಕ್ಲಬ್ (ರಿ.) ಬೊಕ್ಕ ಸುರತ್ಕಲ್ ಸ್ಪೋರ್ಟ್ಸ್ ಆ್ಯಂಡ್ ಕಲ್ಚರಲ್ ಸೇವಾ ಟ್ರಸ್ಟ್ ಮೊಕ್ಲೆನ ಜಂಟಿ ಆಶ್ರಯಡ್ ರಾಜ್ಯ ಮಟ್ಟದ 45 ವರ್ಷ ಮಿತ್ತ್‌ದ ಆಟಗಾರೆರ್ನ ಕೂಟದ ‘ಓವರ್ ಆರ್ಮ್’ ಕ್ರಿಕೆಟ್ ಪಂದ್ಯಾಕೂಟ ʻಲೆಜೆಂಡ್ಸ್ ಕ್ರಿಕೆಟ್ ಲೀಗ್ (LCL) ಸೀಸನ್-5′ ಮೇ 9 ಬೊಕ್ಕ 10 ತಾರೀಕ್‌ಗ್ ಸುರತ್ಕಲ್ ಗೋವಿಂದ ದಾಸ್ ಕಾಲೇಜ್ ಮೈದಾನೊಡು ನಡಪರೆ ಉಂಡು ಪಂದ್ ಕಾರ್ಯದರ್ಶಿ ಕಿರಣ್ ಆಚಾರ್ಯ ತೆರಿಪಾಯೆರ್.
ಕುಡ್ಲದ ಪ್ರೆಸ್‌ಕ್ಲಬ್‌‌ಡ್ ನಡತಿನ ಸುದ್ದಿಗೋಷ್ಠಿಡ್ ಮಾಹಿತಿ ಕೊರ್ನ ಆರ್, ಕರಿನ ಐನ್ ವರ್ಷರ್ದಿಂಚಿ ಯಶಸ್ವಿಯಾದ್ ನಡತೊಂದು ಬೈದಿನ ಈ ಕ್ರೀಡಾಕೂಟ ಹಿರಿಯ ಕ್ರಿಕೆಟಿಗೆರೆನ್ ಒಟ್ಟು ಮಲ್ಪುನ ‘ಹಿರಿಯರ ಕ್ರಿಕೆಟ್ ಪರ್ಬವಾದ್’ ಮೂಡ್ದು ಬರ್ರೆ ಉಂಡು ಪಂದ್ ಪಂಡೆರ್.
ಪಂದ್ಯಾಕೂಟಡ್ ಗೆಂದಿನ ತಂಡದಕ್ಲೆಗ್ ಭರ್ಜರಿ ದುಡ್ಡುದ ಇನಾಮು ಬೊಕ್ಕ ಟ್ರೋಫಿ ಕೊರೊಂದುಲ್ಲ. ಸುರುತ್ತ ಇನಾಮು 1,00,005 ರೂ. ಬೊಕ್ಕ ಟ್ರೋಫಿ, 2 ನೇ ಇನಾಮು 50,005 ರೂ. ಬೊಕ್ಕ ಟ್ರೋಫಿ ಅಂಚೆನೆ 3 ನೇ ಬೊಕ್ಕ 4 ನೇ ಇನಾಮುದ ಒಟ್ಟುಗು ಆಕರ್ಷಕ ಟ್ರೋಫಿ ಪಟ್ಟುವ. ಈ ಪಂದ್ಯ ಕೂಟಡ್ ರಾಜ್ಯದ ಬೇತೆ ಬೇತೆ ಕಡೆರ್ದ್ 45 ವರ್ಷ ಮಿತ್ತ್‌ದ ಆಟಗಾರೆರ್ನ ತಂಡದಕುಲು ಪಾಲ್ ಪಡೆಯರೆ ಉಲ್ಲೆರ್ ಪಂದ್ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ಗೌರವಾಧ್ಯೆಕ್ಷೆರ್ ಮಹಾಬಲ ಪೂಜಾರಿ ಕಡಂಬೋಡಿ ಬೊಕ್ಕ ಸದಸ್ಯೆರಾಯಿನ ಪುಷ್ಪರಾಜ್ ಶೆಟ್ಟಿ ಮಧ್ಯ ಉಪಸ್ಥಿತರಿತ್ತೆರ್.
Religious & Cultural News ಮಾತ ಧರ್ಮದ ಸುದ್ದಿ
ಉಡುಪಿದ ಸುದ್ದಿ | Udupi News
ಊರ್ದ ಸುದ್ದಿ Regional News
ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News
ತುಳು ಸುದ್ದಿ
ಬಸ್ರೂರು ತುಳುವೇಶ್ವರ ದೇವಸ್ಥಾನದ ಅಷ್ಟಮಂಗಲ ಪ್ರಶ್ನೆ ದುಂಬು ಪೋಂಡು
ಸುರುಕ್ಕು ಶ್ರೀ ಚಕ್ರ ಸಾನಿಧ್ಯ ಮೂಲಳ ದೇವಿ ತುಳುವೇಶ್ವರಿ ಸಾನಿಧ್ಯ ಅಭಿವೃದ್ಧಿಗ್ ಸೂಚನೆ
ಬಸ್ರೂರು : ಶ್ರೀ ತುಳುವೇಶ್ವರ ದೇವಸ್ಥಾನ ಬಸ್ರೂರು ಮೂಲು ಮೇ 2 ಕ್ಕ್ ನಡಪೊಡಿತ್ತಿನ ಅಷ್ಟಮಂಗಲ ಪ್ರಶ್ನೆ ಕಾರ್ಯಕ್ರಮ ತಾತ್ಕಾಲಿಕವಾದ್ ದುಂಬು ಪೋಂಡು ಪಂದ್ ಜೀರ್ಣೋದ್ಧಾರ ಸಮಿತಿ ಅಧ್ಯಕ್ಷೆರಾಯಿನ ಎಚ್. ಕೆ. ದೇವಾನಂದ ಶೆಟ್ಟಿ ತೆರಿಪಾಯೆರ್.
ಈ ಬಗೆಟ್ಟ್ ಜ್ಯೋತಿಷ್ಯೆರ್‌ನ ಸಮ್ಮುಖಡ್ ನಡತಿನ ಪ್ರಶ್ನೆ ಚಿಂತನೆ ಪ್ರಕಾರ, ಶ್ರೀಚಕ್ರ ಸಾನಿಧ್ಯ ಉಪ್ಪುನ ಮೂಲಳ ದೇವಿ–ತುಳುವೇಶ್ವರಿ ಸಾನಿಧ್ಯದ ಅಭಿವೃದ್ಧಿ ಮಲ್ತಿ ಬೊಕ್ಕನೇ ತುಳುವೇಶ್ವರನ ಸಾನಿಧ್ಯದ ಪೂರ್ಣ ಅಭಿವೃದ್ಧಿ ಸಾಧ್ಯ ಆಪಿನಿ ಪಂದ್ ದೈವಜ್ಞೆರ್ ಸಂದೇಶ ಕೊರ್ತಿನೆರ್ದಾವರ ಸುರುಕ್ಕು ತುಳುವೇಶ್ವರಿ ಸಾನಿಧ್ಯದ ಜೀರ್ಣೋದ್ಧಾರ ಅಂಚೆನೆ ಅಭಿವೃದ್ಧಿದ ಬೇಲೆ ಸುರುಮಲ್ತ್‌ದ್ ಪೂರ್ಣ ಆಯಿಬೊಕ್ಕನೇ ತುಳುವೇಶ್ವರ ದೇವೆರ್ನ ಬೇಲೆ ಮಲ್ಪೊಡು. ಅಂಚೆನೆ ಭೂದಾನ ಸೇವೆನ್ ಸುರು ಮಲ್ತ್‌ದ್ ತುಳುವೇಶ್ವರ ಸನ್ನಿಧಿ ದ ಸುತ್ತ ಮುತ್ತದ ಜಾಗೆನ್ ವಾಪಸ್ ದೆತೊನ್ನುನ ಬೇಲೆ ಮಲ್ಪೊಡು ಪಂದ್ ಸೂಚನೆ ಕೊರಿಯೆರ್.
ಈ ಹಿನ್ನೆಲೆಡ್ ಮೇ 2 ಕ್ಕ್ ನಿಗದಿಯಾದಿತ್ತಿನ ಅಷ್ಟಮಂಗಲ ಪ್ರಶ್ನೆನ್ ತಾತ್ಕಾಲಿಕವಾದ್ ದುಂಬು ಕೊನದ ಪಂದ್ ತೆರಿಪಾಯೆರ್.
ಈ ಸಂದರ್ಭಡ್ ತುಳುವೇಶ್ವರ ದೇವಸ್ಥಾನ ಜೀರ್ಣೋದ್ಧಾರ ಸಮಿತಿದ ಸಂಚಾಲಕೆರಾಯಿನ ಬೇಲೂರು ದಿನಕರ ಶೆಟ್ಟಿ, ತುಳುವರ್ಲ್ಡ್ ಫೌಂಡೇಶನ್ ನಿರ್ದೇಶಕೆರ್ ಡಾ. ರಾಜೇಶ್ ಆಳ್ವ, ಕಾರ್ಯದರ್ಶಿ ಹರಿಪ್ರಸಾದ್ ರೈ ಮೊಕುಲು ಮಾತ ಇತ್ತೆರ್.
ಎಸ್‌ಎಸ್ಎಲ್‌ಸಿ ರಿಸಲ್ಟ್ ; ದ.ಕ ಫಸ್ಟ್
ಮಂಗಳೂರು ಜಿಲ್ಲೆಗ್ ಶೇ.98.40 ಫಲಿತಾಂಶ.
ಉಡುಪಿ ಜಿಲ್ಲೆ ಗ್ 2 ನೇ ಸ್ಥಾನ, ಶೇ. 98.18 ಪಾಸ್.
ಗುಲ್ಬರ್ಗ ಜಿಲ್ಲೆಗ್ ಅಕೇರಿದ ತಾನ.
ಡಾ. ಕೆ. ಎನ್. ಅಡಿಗ ಮೆರೆಗ್ ‘ಗಾನಸಿರಿ ಕರ್ನಾಟಕ ಭೂಷಣ’ ಪ್ರಶಸ್ತಿ ಪ್ರದಾನ
ಬೆಂಗಳೂರು: ಪುತ್ತೂರುದ ಪುದರ್ ಪೋಯಿನ ಸಾಂಸ್ಕೃತಿಕ ಸಂಸ್ಥೆ ಗಾನಸಿರಿ ಕಲಾ ಕೇಂದ್ರ (ರಿ) ಉಂದೆತ್ತ ರಜತ ವರ್ಷದ ಪರ್ಬದ ಲೇಸ್‌ಡ್ ಆಯೋಜನೆ ಮಲ್ದಿನ ‘ಗಾನಸಿರಿ ಗಾನ ನೃತ್ಯ ಸಮ್ಮಿಲನ’ ಲೇಸ್‌ಡ್ ಪುದರ್ ಪೋಯಿನ ಲೇಸ್ ಸಂಘಟಕೆರ್ ಬೊಕ್ಕ ನಿರೂಪಕೆರಾಯಿನ ಡಾ. ಕೆ. ಎನ್. ಅಡಿಗ ಮೆರೆಗ್ ‘ಗಾನಸಿರಿ ಕರ್ನಾಟಕ ಭೂಷಣ’ ಪ್ರಶಸ್ತಿ ಕೊರ್ದು ಗೌರವ ಮಲ್ತೆರ್.
ಬೆಂಗಳೂರುದ ರವೀಂದ್ರ ಕಲಾಕ್ಷೇತ್ರಡ್ ಐತಾರ ನಡತಿನ ಈ ಭರ್ಜರಿ ಲೇಸ್ ಬೆಂಗಳೂರುದ ‘ಡ್ಯಾನ್ಸ್ ಬೀಟ್ಸ್’ ನೃತ್ಯ ಸಂಸ್ಥೆದ ಒಟ್ಟುಗು ನಡತ್ತ್ಂಡ್. ಡಾ. ಕೆ. ಎನ್. ಅಡಿಗ ಮೆರ್ ಸಾಂಸ್ಕೃತಿಕ ಕ್ಷೇತ್ರಡ್ ಮಲ್ತೊಂದು ಬತ್ತಿನ ಮಲ್ಲ ಕೆಲಸ ಬೊಕ್ಕ ಮೆರೆನ ಎಡ್ಡೆ ನಿರೂಪಣೆನ್ ಗುರ್ತ ಮಲ್ತ್‌ದ್ ಈ ಗೌರವನ್ ಕೊರಿಯೆರ್.
ಲೇಸ್‌ದ ವಿಶೇಷತೆಲು:
ಪ್ರಶಸ್ತಿ ಪ್ರದಾನ: ಗಣ್ಯರೆನ ಎದುರುಡು ಡಾ. ಕೆ. ಎನ್. ಅಡಿಗ ಮೆರೆಗ್ ಶಾಲು ಪಾಡ್ದ್, ನೆನಪುದ ಕಾಣಿಕೆ ಬೊಕ್ಕ ಪ್ರಶಸ್ತಿ ಪತ್ರ ಕೊರ್ದು ಸನ್ಮಾನ ಮಲ್ತೆರ್.
ಬಿನ್ನೆರೆನ ಉಪಸ್ಥಿತಿ: ಈ ಲೇಸ್‌ಡ್ ಸುಗಮ ಸಂಗೀತಗಾರ್ತಿ ಬೊಕ್ಕ ಸಂಗೀತ ನಿರ್ದೇಶಕಿ ಡಾ. ಜಯಶ್ರೀ ಅರವಿಂದ್, ಪುತ್ತೂರುದ ಮಾಜಿ ಶಾಸಕಿ ಶ್ರೀಮತಿ ಶಕುಂತಲಾ ಟಿ. ಶೆಟ್ಟಿ, ಗಾನ ಸಿರಿ ಸಂಸ್ಥೆದ ಶ್ರೀ ಕಿರಣ್ ಇತ್ತ್‌ದ್ ಎಡ್ಡೆಪ್ಪು ಬಯಸಿಯೆರ್.
ಸಾಂಸ್ಕೃತಿಕ ಪರ್ಬ: ಲೇಸ್‌ಡ್ ನಡತಿನ ಗಾಯನ ಬೊಕ್ಕ ನೃತ್ಯದ ಮಿನದಾನಿ ಕಲಾ ರಸಿಕರೆನ ಮನ ಗೆಂದ್ಂಡ್.
ಗಾನಸಿರಿ ಕಲಾ ಕೇಂದ್ರದ 25ನೇ ವರ್ಷದ ಈ ಖುಷಿದ ಪೋರ್ತುಡು ತಮಗೆ ತಿಕ್ಕಿನ ಈ ಪ್ರಶಸ್ತಿ ಎನ್ನ ಜವಾಬ್ದಾರಿನ್ ನನಲಾತ್ ಜಾಸ್ತಿ ಮಲ್ತ್‌ಂಡ್ ಪಂದ್ ಡಾ. ಕೆ. ಎನ್. ಅಡಿಗ ಮೆರ್ ಈ ಸಂದರ್ಭಡ್ ಖುಷಿ ಪಂಡೆರ್.
Religious & Cultural News ಮಾತ ಧರ್ಮದ ಸುದ್ದಿ
ಊರ್ದ ಸುದ್ದಿ Regional News
ಕುಡ್ಲದ ಸುದ್ದಿ | Mangalore News
ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News
ತುಳು ಸುದ್ದಿ
ಮುಲ್ಕಿ
ಸಸಿಹಿತ್ಲು ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನಡ್ ಗೌಜಿದ ಕಾಲಾಧಿದ ನೇಮೋತ್ಸವ
ಸಸಿಹಿತ್ಲು : ಶ್ರೀ ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನಡ್ ಕಾಲಾಧಿದ ನೇಮೋತ್ಸವ ಮಾರ್ಚ್ 20 ಶುಕ್ರವಾರರ್ದ್ ಮಾ.24 ಅಂಗಾರೆ ಮುಟ್ಟ ಭಾರಿ ಗೌಜಿಡ್ ನಡತ್ಂಡ್.
ಮಾ.21 ಶನಿವಾರ ಕಾಂಡೆ ನಾಗದೇವೆರೆಗ್ ತನು ತಂಬಿಲ, ಬ್ರಹ್ಮೆರೆಗ್ ತಂಬಿಲ ಸೇವೆ, ರಕ್ತೇಶ್ವರಿ ದೇವಿಗ್ ಪೂತ್ತ ಪೂಜೆ ಆಯಿ ಬೊಕ್ಕ ದೈವೊಲೆನ ಶುದ್ಧ ಮಲ್ತ್‌ದ್, ದೃಢಕಲಶ ಮಲ್ತ್‌ದ್ ರಾತ್ರೆ ಶ್ರೀ ಕ್ಷೇತ್ರ ಕಾಂತುಲಕಣ ಗಡಿಪ್ರದಾನೆರ್ನ ಭಂಡಾರದಿಲ್ಲಡ್ ತಂಬಿಲ ಸೇವೆ ನಡತ್ಂಡ್. ಅಂಚೆನೆ ಕಾಂತಾಬಾರೆ ಬೂದಾಬಾರೆರೆಗ್ ಅನ್ನ ನೈವೇದ್ಯ, ಅಗೇಲ್ ಸೇವೆ, ಮಾಣಿಬಾಲೆ ಬೊಕ್ಕ ಮಾಯಂದಾಲ್ ದೇವಿಗ್ ಅಗೆಲ್ ಸೇವೆ, ಪ್ರಸಾದ ವಿತರಣೆ ಬೊಕ್ಕ
ಅನ್ನಸಂತರ್ಪಣೆ ನಡತ್ಂಡ್.
ಮಾ.22 ಐತಾರ ಬಯ್ಯಡ್ 4 ಗಂಟೆಗ್ ದೊಂಪ ಏರ್‌ದ್ ರಾತ್ರೆ ಶ್ರೀ ಕ್ಷೇತ್ರ ಕಂಡೇವು ಧರ್ಮರಸು ಉಳ್ಳಾಯ ಬೊಕ್ಕ ಸಪರಿವಾರ ದೈವೊಲೆನ
ಭಂಡಾರ ಬತ್ತ್‌ದ್ ಇಂಚಿಡ್ ಕಾಂತುಲಕಣ ಗಡಿಪ್ರದಾನೆರ್ನ ಇಲ್ಲದ ದೈವೊಲೆನ ಭಂಡಾರ ಬತ್ತ್‌ದ್ ಕೊಡಿ ಏರ್‌ದ್ ಬೊಕ್ಕ ಅನ್ನಸಂತರ್ಪಣೆ ನಡತ್ಂಡ್.
ಮಾ. 23 ಸೋಮವಾರ ಕಾಂಡೆ ಉಳ್ಳಾಯ ದೇವೆರ್ನ ನೇಮೋತ್ಸವ ನಡತ್ಂಡ್. ಅಯಿರ್ದ್ ಬೊಕ್ಕ ಇಷ್ಟದೇವತೆ, ಮೂಲ ಮೈಸಂದಾಯ,
ಬಬ್ಬರ್ಯ ಬೊಕ್ಕ ಪರಿವಾರ ದೈವೊಲೆನ ನೇಮ ನಡತ್ಂಡ್. ಬೊಕ್ಕ ಕಾಂತಾಬಾರೆ
ಬೂದಾಬಾರೆರೆಗ್, ಮಾಯಂದಾಲ್ ಶಕ್ತಿಗ್ ಪಂಚಕಜ್ಜಾಯ ಸೇವೆ ಆದ್ ಅನ್ನಸಂತರ್ಪಣೆ ನಡತ್ಂಡ್. ಬಯ್ಯಡ್ 4 ಗಂಟೆರ್ದ್ ಓಡ್ಯಂತಾಯ ದೈವದ ನೇಮೋತ್ಸವ ನಡತ್ಂಡ್.
ರಾತ್ರೆ 9 ಗಂಟೆಗ್ ಜಾರಂದಾಯ,ಬಂಟ, ಜುಮಾದಿ, ಬಂಟ, ಕೊಡಮಣಿತ್ತಾಯ, ಕಂಡೇವು ಬೂಡುದ
ಕಾಂತೇರಿ ಜುಮಾದಿ, ಪಿಲಿಚಾಮುಂಡಿ ದೈವೊಲೆಗ್ ನೇಮ ನಡತ್ಂಡ್.
ಮಾ. 24 ಅಂಗಾರೆ ಕಾಂಡೆ 5 ಗಂಟೆಗ್ ಕೊಡಿ ಜಾದ್ ಕಾಂತುಲಕಣ ಗಡಿಪ್ರದಾನೆರೆನ ಇಲ್ಲಗ್ ಅಂಚೆನೆ ಕಂಡೇವು ಬೂಡುಗು ಭಂಡಾರ ಪಿರ ಪೋಂಡು. ಈ ನೇಮೋತ್ಸವದ ಸಂದರ್ಭೊಡು ಶ್ರೀ ಕ್ಷೇತ್ರದ ಆಡಳಿತ ಸಮಿತಿ, ಮುಂಬೈ ಸಮಿತಿ ಬೊಕ್ಕ ಮಹಿಳಾ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲು, ಸರ್ವ ಸದಸ್ಯೆರ್, ಕಾಂತುಲಕಣ ಗಡಿಪ್ರಧಾನೆರ್ ಯಾನೆ ಪಠೇಲರ ಮನೆತನದಕುಲು, ತೋಚೋಡಿ ಮನೆತನದಕುಲು,ಅರ್ಚಕ ವಿಭಾಗದಕುಲು, ಕಡಪುರ ಮನೆತನದಕುಲು, ಮುಕ್ಕ ಮಿತ್ರಪಟ್ನ, ಕದಿಕೆ ಮೊಗವೀರ ಸಭಾದ ಸದಸ್ಯೆರ್ ಅಂಚೆನೆ ನಾಲ್ ಕರೆತ್ತ ಪತ್ತ್ ಸಮಸ್ತೆರ್ ಪಾಲ್ ಪಡೆದ್ ಶ್ರೀ ಉಳ್ಳಾಯ ದೇವೆರ್ ಬೊಕ್ಕ ಪರಿವಾರ ದೈವೊಲೆನ ಗಂಧ ಪುರ್ಸಾದ ದೆತೊಂಡೆರ್.
ಎನ್ ಎಂಪಿ ಟಿ ಬಂದರ್‌ಡ್ 72700 ಟನ್ ಎಲ್ಪಿಜಿ ಸ್ಟಾಕ್
ನವ ಮಂಗಳೂರು ಬಂದರ್‌ಡ್ ಈ ವಾರ ಎಲ್ಪಿಜಿ ಗ್ಯಾಸ್ ದ ಸಂಗ್ರಹ 72,700 ಟನ್ ಮುಟ್ಟ ಆತ್ಂಡ್.
ಇಂಡಿಯನ್ ಆಯಿಲ್ ಕಂಪನೆ ಬೊಕ್ಕ ಭಾರತ್ ಪೆಟ್ರೋಲಿಯಂ ದಂಚಿನ ಕಂಪೆನಿಲು ಎಲ್ ಪಿಜಿ ಆಮದು ಮಲ್ದಿನೆರ್ದಾವರ ಸಂಗ್ರಹ ಎಚ್ಚ ಆತ್ಂಡ್. ಅಂಚಾದ್ ಎಲ್ಪಿಜಿ ಸಂಗ್ರಹ ಮಲ್ಪುನೆಟ್ಟ್ ಬಂದರ್ ಮಲ್ಲ ಪಾತ್ರ ವಹಿಸಾದ್ಂಡ್.
Religious & Cultural News ಮಾತ ಧರ್ಮದ ಸುದ್ದಿ
ಊರ್ದ ಸುದ್ದಿ Regional News
ಕುಡ್ಲದ ಸುದ್ದಿ | Mangalore News
ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News
ತುಳು ಸುದ್ದಿ
ರಪಕ್ಕ ಸುದ್ದಿ Flash News
ಅತ್ತಾವರ ಶ್ರೀ ಅಯ್ಯಪ್ಪ ಸ್ವಾಮಿ ಕ್ಷೇತ್ರಡ್ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಬುಡುಗಡೆ
ನೂದೆರ್ದ್ ಎಚ್ಚ ವರ್ಷಲೆನ ಇತಿಹಾಸ ಇಪ್ಪುನ ಶ್ರೀ ಅಯ್ಯಪ್ಪ ಸ್ವಾಮಿ ಕ್ಷೇತ್ರದ ಬ್ರಹ್ಮ ಕಲಶಾಭಿಷೇಕ ಎ.19-23 ಮುಟ್ಟ ನಡಪರೆ ಉಂಡು.
ಈ ಲೇಸ್ ದ ಲೆಕ್ಕೊಡು ಲೆಪ್ಪೋಲೆ ಬುಡುಗಡೆನ್ ಮಾ.22 ಕ್ಕ್ ಶ್ರೀ ಅಯ್ಯಪ್ಪ ಸ್ವಾಮಿ ಕ್ಷೇತ್ರಡ್ ಕುಡ್ಲ ದಕ್ಷಿಣ ಶಾಸಕೆರ್ ವೇದವ್ಯಾಸ ಕಾಮತ್ ಮಲ್ತೆರ್. ಬೊಕ್ಕ ಪಾತೆರ್ದ್, ದಕ್ಷಿಣ ಕನ್ನಡ ಜಿಲ್ಲೆದ ಸುರುತ್ತ ಅಯ್ಯಪ್ಪ ದೇವಸ್ಥಾನದ ಬ್ರಹ್ಮಕಲಶಡ್ ಪಾಲ್ ಪಡೆಪುನ ಸೌಭಾಗ್ಯ ತಿಕಿನವು ಪುಣ್ಯದ ಫಲ, ಒಂಜಿ ಊರಿಡ್ ಬ್ರಹ್ಮಕಲಶ ನಡತ್ಂಡ ಆ ಊರುದ ಉದ್ದಾರಗ್ ಕಾರಣ ಆಪುಂಡು. ಊರುಗು ಸಂಕಷ್ಟ ಬರ್ಪುಜಿ. ಈ ದೇವೆರೆನ ಕಾರ್ಯಡ್ ಊರುದ ಪರವೂರುದ ಮಾತೆರ್ಲಾ ಪಾಲ್ ಪಡೆದ್, ಪೊರ್ಲುಡು ಬ್ರಹ್ಮಕಲಶ ನಡಪುಲೆಕ್ಕ ಪ್ರತಿಯೊರಿಲ ಅಳಿಲು ಸೇವೆ ಮಲ್ಪುನ ಮುಕೇನ ಪಾಲ್ ಪಡೆವೊಡು ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ಸ್ವಾಗತ ಸಮಿತಿದ ಗೌರವಾಧ್ಯಕ್ಷೆರ್ ರತೀಂದ್ರ ನಾಥ, ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆರ್ ಸೂರಜ್ ರಾಘವನ್, ಕಾರ್ಯಾಧ್ಯಕ್ಷೆರ್ ಗೋಕುಲದಾಸ್ ಬೊಕ್ಕ ಮುರುಳಿಧರ್, ಗೌರವ ಕೋಶಾಧಿಕಾರಿ ಸಂತೋಷ ಶೆಟ್ಟಿ, ಸ್ವಾಗತ ಸಮಿತಿದ ಅಧ್ಯಕ್ಷೆರ್ ರಾಜರತ್ನ ಸನಿಲ್, ಗೌರವ ಕಾರ್ಯದರ್ಶಿ ಜನಾರ್ಧನ್ ಅತ್ತಾವರ, ಅಯ್ಯಪ್ಪ ದೇವಸ್ಥಾನ ಪಡೀಲ್ ದ ಅಧ್ಯಕ್ಷೆರ್ ಮೋಹನ್ ಪಡೀಲ್, ಆತ್ಮಶಕ್ತಿ ಕೋ ಆಪರೇಟಿವ್ ಸೊಸೈಟಿ ಚೇರ್ ಮ್ಯಾನ್ ಚಿತ್ತ ರಂಜನ್, ಕರುಣ್ ಇನ್ಫ್ರಾಸ್ಟ್ರಕ್ಚರ್ ಎಸ್ ಮಾಲಕೆರ್ ಕರುಣಾಕರ್, ಹಿಮಾಲಯ ರೋಡ್ ಲೈನ್ ಕುಡ್ಲ ಮಾಲೀಕೆರ್ ಅಶೋಕ್ ಯೆಯ್ಯಾಡಿ, ಉದ್ಯಮಿ ಸುರೇಶ್ ಪೂಜಾರಿ ಕಣ್ಣೂರು, ಶಶಿಧರ್, ರಾಮಪ್ರಸಾದ್ ಅರ್ಥ್ ಮೂವರ್ಸನ ಅಜಿತ್, ಗುತ್ತಿಗೆದಾರೆರ್ ಕೇಶವ ಬಲರಾಜ್, ಉಪಾಧ್ಯಕ್ಷೆರ್ ಪದ್ಮನಾಭನ್, ಪ್ರಧಾನ ಕಾರ್ಯದರ್ಶಿ ಕ್ಷಿತಿ ಮಮ್ಲೂರು, ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಸೂರ್ಯಕಾಂತ್ ಬೊಕ್ಕ ಪದುಕೆರ್ ಪಾಲ್ ಪಡೆದಿತ್ತೆರ್.
ಸಾಹಿತಿ, ಅಮೃತ ಪ್ರಕಾಶ ಪತ್ರಿಕೆ ಸಂಪಾದಕಿ, ಬ್ರಹ್ಮ ಕಲಶ ಸಮಿತಿದ ಉಪಾಧ್ಯಕ್ಷೆರ್ ಡಾ.ಮಾಲತಿ ಶೆಟ್ಟಿ ಮಾಣೂರು ಎದ್ಕೊನಿಯೆರ್. ರಘುವೀರ್ ಬಾಬುಗುಡ್ಡೆ ಲೇಸ್ ನ್ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.
ಉಡುಪಿದ ಸುದ್ದಿ | Udupi News
ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News
ತುಳು ಸುದ್ದಿ
ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News
ರಾಜಕೀಯ ಸುದ್ದಿ | Political News
ಪೆಜಮಾಡಿ ಗ್ರಾಮೀಣ ಕಾಂಗ್ರೆಸ್ ದ ಪೊಸ ಅಧ್ಯಕ್ಷೆರಾದ್ ಪ್ರಭೋದ್ ಚಂದ್ರ ಪೆಜಮಾಡಿ ಆಯ್ಕೆ
ಪೆಜಮಾಡಿ ಗ್ರಾಮೀಣ ಕಾಂಗ್ರೆಸ್ ದ ಪೊಸ ಅಧ್ಯಕ್ಷೆರಾದ್ ಪ್ರಭೋದ್ ಚಂದ್ರ ಪೆಜಮಾಡಿ ಆಯ್ಕೆ ಆತೆರ್.
ಕರ್ನಾಟಕ ಸರಕಾರದ ಮಾಜಿ ಸಚಿವೆರ್ ಬೊಕ್ಕ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ದ ಪ್ರಚಾರ ಸಮಿತಿದ ರಾಜ್ಯಾಧ್ಯಕ್ಷೆರ್ ವಿನಯ ಕುಮಾರ್ ಸೊರಕೆ ಮೆರೆನ ಶಿಫಾರಸ್ ಮಿತ್ತ್ ಕಾಪು ಬ್ಲಾಕ್ ಕಾಂಗ್ರೆಸ್ ಸಮಿತಿ ದಕ್ಷಿಣದ ಅಧ್ಯಕ್ಷೆರ್ ವೈ. ಸುಕುಮಾರ್ ನೇಮಕ ಮಲ್ದೆರ್.